1. Hewisa woloʼöda duma-duma Namada sebua faʼomasi sotöi Yehowa?

IʼOMASIʼÖ sibai ita Yehowa. (Yoh. 3:16) Tatu, omasi taʼoʼö Namada sebua faʼomasi. Tobali moguna taʼodödögö ba wangoromaʼö wa ’tarasoi zafökhö khö nawöda, taʼomasiʼö nawöda simane ösi nomoda, ba tahakhösi tödö’ fefu niha, mendrua manö khö ndra ”talifusöda si sara lala wamati”. (1 Fet. 3:8; Gal. 6:10) Moguna tatolo ndra talifusöda si sara lala wamati ba ginötö lataögö waʼabu dödö.

2. Hadia nitutunöda ba wamahaʼö daʼa?

² Fefu ita si tobali ösi nomo Yehowa, hasambalö göna ita faʼabu dödö. (Mrk. 10:29, 30) Itugu oya dania wanandraigö nitaögöda börö me no ahatö ngaluo safuria. Hewisa wanoloda niha böʼö? Datatutunö hadia wamahaʼö si tola tahalö si so ba Zura Niʼamoniʼö sanandrösa khö Loti, Yobi hegöi Naʼemi. Tatutunö göi dania ösa, wanandraigö nitaögö ndra talifusöda iadaʼa ba hewisa wanoloda yaʼira ba wanaögö abula dödö.

3. Moloʼö 2 Fetero 2:7, 8, hadia gangetula si lö baga nihalö Loti, ba hadia lua-luania?

³ No ihalö gangetula si lö baga Loti me ifili toröi ba gotalua niha samalua amuata wohorö ba Zodoma. (Baso 2 Fetero 2:7, 8.) Sodoma andrö mbanua satabö zinanö, hizaʼi oya gabula dödö nitaögönia börö me toröi ia ba daʼö. (1 Moz. 13:8-13; 14:12) Te iʼomasiʼö mbanua andrö woʼomonia mazui niha si so ba daʼö, irege lö moloʼö ia khö Yehowa. Mate woʼomo Loti ba ginötö itorugö Lowalangi galitö hegöi balera ba mbanua andrö. Ba mate göi ndra matua si darua si no famatua  khö nononia alawe si darua ba Zodoma. Tekiko nomonia hegöi haratonia, abu sibai dödönia me mate woʼomonia. (1 Moz. 19:12-14, 17, 26) Ba ginötö alua wangabu dödö andrö, hadia taya waʼebolo dödö Lowalangi khö Loti? Löʼö.

4. Hadia nifalua Yehowa ba wangoromaʼö faʼebolo dödönia khö Loti? (Faigi gambara ba guli majalah.)

⁴ Hewaʼae no ifili Loti toröi ba Zodoma, si fao faʼahakhö dödö ifatenge Yehowa darua malaʼikania ba wangorifi yaʼia hegöi ösi nomonia. Lafarou ia ira malaʼika enaʼö iröi Zodoma. Hizaʼi, ”arörö-rörö” Loti ba lö iʼanemaiʼö iʼoʼö niwaʼö malaʼika ba wondröi Sodoma. Lua-luania, laʼanemaiʼö lagogohe dangania ira malaʼika ba wanolo yaʼia hegöi ösi nomonia ba wondröi mbanua andrö. (1 Moz. 19:15, 16) Lawaʼö khönia ndra malaʼika enaʼö fagohi ia numalö ba hili. Hizaʼi, lö iʼoʼö niwaʼö Yehowa, iʼandrö enaʼö toröi ia ba mbanua sahatö ba daʼö. (1 Moz. 19:17-20) Si fao faʼebolo dödö, ifondrondrongo Yehowa gangandröwa Loti ba itehegö weʼamöi ba mbanua daʼö. Ba gafuriata, ataʼu Loti toröi ba daʼö ba numalö ia ba hili ba nahia si no irai iwaʼö Yehowa khönia. (1 Moz. 19:30) Sindruhu-ndruhu iforomaʼö Yehowa waʼebolo dödö! Hewisa woloʼöda yaʼia?

5-6. Hewisa wamaluada niwaʼö si so ba 1 Tesalonika 5:14 enaʼö tola taʼoʼö Lowalangi?

⁵ Simane Loti, tola manö so samösa dalifusöda si sara lala wamati sangai angetula si fasala ba lua-luania alua khönia gabula dödö sabölö-bölö. Na daʼö zalua, hadia nifaluada? Te adöni dödöda ba wangumaʼö khönia wa ibasi hadia zi no itaru, hewaʼae sindruhunia daʼö zalua. (Gal. 6:7) Hizaʼi, abölö sökhi na tatolo ia simane nifalua Yehowa ba wanolo Loti. Hewisa wamaluada?

⁶ Tenga ha ifatenge manö Yehowa malaʼikania ba wamangelama Loti, hizaʼi itolo göi enaʼö lö fao ia ba waʼatekiko Zodoma. Simane göi ita, moguna göi tafangelama ndra talifusöda na taʼila aekhu ia ba waʼatekiko. Hizaʼi, tola göi tatolo ia. Hewaʼae na lö iʼanemaiʼö ifalua mene-mene nibeʼe Yehowa moroi ba Zura Niʼamoniʼö, moguna ebolo dödöda simane nifalua malaʼika si darua andrö. Moguna lö tebulö ita ba wanolo ndra talifusöda ba böi tatimbagö ia. Hizaʼi, taʼalui lala ba wanolo yaʼia. (1 Yoh. 3:18) Amaedola no tagogohe dangania ba ginötö tatolo ia ba wamalua mene-mene moroi ba Zura Niʼamoniʼö.​—Baso 1 Tesalonika 5:14.

7. Hewisa lalada ba woloʼö Yehowa ba wamaigi Loti?

⁷ Lö iʼosambuaʼö dödönia Yehowa ba walömoʼahonoa Loti. Ibeʼe gehehania khö zinenge sotöi Fetero ba wanura wa Loti andrö samösa niha satulö. Tatu omuso sibai dödöda börö me iʼefaʼö zalada Yehowa! (Zin. 130:3) Hadia tola taʼoʼö lala Yehowa ba wamaigi Loti? Na taʼosambuaʼö dödöda ba wamaigi mbua-bua si sökhi niʼokhögö ndra talifusöda, tola itugu ebolo dödöda khöra. Tola manö aoha khöra ba wanemaʼö fanolo nibeʼeda.

8. Na so khöda waʼahakhö dödö, hadia nifaluada?

⁸ Tenga simane Loti, tefakao Yobi andre tenga börö lua-lua gangetula nihalönia. Hewaʼae simanö, alua khönia gabula dödö sabölö-bölö. Taya haratonia hegöi dadaomania ba gotalua niha sato, ba mofökhö ia. Ba sabölö-bölönia, mate ndraonora fefu. Ba laböbögö göi khönia zi lö duhu, ira awönia sofaya si datölu. Hadia mbörö wa lö laforomaʼö waʼahakhö dödö ira awönia si datölu ba wondrara dödö Yobi? Börö me lö laʼodödögö ba wangiʼila hadia zindruhunia salua khönia. Lua-luania, lahalö gangetula  si fasala ba lahuku Yobi ba zi lö atulö. Hewisa enaʼö lö tafalua zala simane daʼö? Atulö sa, wa ha Yehowa zi tola mangila fefu salua ba zi samösa niha. Haogö fondrondrongo ba ginötö fahuhuo zi samösa niha. Tenga ha öfondrondrongo manö; odödögö ba worasoi faʼabu dödönia. Na öfalua daʼö, awena tola öforomaʼö wa sindruhu-ndruhu örasoi hadia nirasoi ndra talifusöda.

9. Hadia zinangea böi tafalua na taʼokhögö waʼahakhö dödö, ba hadia mbörö?

⁹ Na so khöda waʼahakhö dödö, daʼö zanaha yaʼita enaʼö lö tafatou-tou nawöda sanandrösa ba gabula dödö nitaögöra. Niha samatou-tou awönia, tenga si möi famarou dödö ba mbanua niha Keriso hizaʼi samoto fahasara dödö. (Gamd. 20:19; Rom. 14:19) Lö khönia waʼasökhi dödö ba lö iʼangeragö sakali hadia niwaʼönia. Fehedenia tola itugu möi fangafökhöiʼö dödö niha si göna abula dödö. (Gamd. 12:18; Ef. 4:31, 32) Tatu, abölö sökhi na tafaigi bua-bua si sökhi niʼokhögö zi samösa niha, ba taʼangeragö hewisa lalada ba wanolo yaʼia mazui ba wanaögö gabula dödönia!

10. Hadia wamahaʼö si tola tahalö moroi ba Yobi 6:2, 3?

¹⁰ Baso Yobi 6:2, 3. Itaria, ’elungu-lungu li’ Yobi na fahuhuo ia. Hizaʼi, ba gafuriata awena aboto ba dödönia wa fasala wehedenia. (Yob. 42:6) Simane Yobi, niha si göna abula dödö iadaʼa tola manö lö iʼangeragö sakali wehedenia, ba gafuriata maniasa ia ba niwaʼönia. Hadia nifaluada na alua zimane daʼö? Moroi na tategu ia ba wehedenia, moguna taforomaʼö waʼahakhö dödö. Moguna tatörö tödöda, lö iwöwöi ita Yehowa enaʼö so gabula dödö hegöi fangabu dödöda. Tobali, aboto ba dödöda ba ginötö  alua wangabu dödö khö zi samösa niha si lö faröi khö Yehowa, tola manö lö iʼangeragö sakali wehede niwaʼönia. Hewaʼae na iwaʼö ngawalö zi lö tefaudu sanandrösa khö Yehowa mazui khöda, moguna böi taʼanemaiʼö mofönu ita khönia mazui tahuku ia börö wehedenia.​—Gamd. 19:11.

11. Hewisa ndra satua sokubaloi ba woloʼö duma-duma Elihu ba ginötö labeʼe mene-mene?

¹¹ Itaria, moguna göi mene-mene ba niha si göna waʼabu dödö mazui ba wanegu yaʼia. (Gal. 6:1) Hewisa ndra satua sokubaloi ba wamalua daʼö? Moguna laʼoʼö duma-duma Elihu ba ginötö ihaogö ifondrondrongo niwaʼö Yobi. (Yob. 33:6, 7) Awena ibeʼe khönia mene-mene Elihu, me no aboto ba dödönia lala wangera-ngera Yobi. Moguna khö ndra satua sokubaloi ba woloʼö duma-duma Elihu, enaʼö lahaogö lafondrondrongo ba moguna aboto ba dödöra zalua khö zi samösa niha. Na lafalua daʼö, ba ginötö labeʼe mene-mene, tola aoha ba niha samondrongo ba wanemaʼö mene-mene andrö.

12. Hadia lua-luania khö Naʼemi me no mate woʼomonia hegöi ononia matua si darua?

¹² Naʼemi samösa ndra alawe si lö faröi sangomasiʼö Yehowa. Hizaʼi, me no mate woʼomonia hegöi ononia matua si darua, omasi ibulöʼö töinia tobali ”Mara” eluahania Afeto. (Rut. 1:3, 5, 20, 21) Samösa moroi ba gotalua numönönia sotöi Ruti, lö tebulö ia ba wefao khö Naʼemi ba ginötö alua gabula dödö andrö. Tenga ha ba zoguna khönia itolo ia Ruti, hizaʼi ibeʼe göi fondrara dödö khö Naʼemi. Moroi ba wehedenia soroi ba dödö, iforomaʼö Ruti waʼomasinia ba ituhini Naʼemi.​—Rut. 1:16, 17.

13. Hana wa moguna sibai tatolo niha si no göna abula dödö börö me no mate woʼomonia?

¹³ Na mate woʼomo dalifusöda si sara lala wamati, moguna tatolo ia. Niha si no mangowalu amaedola dombua hogu geu si fasinga. Ba zi hauga fakhe, faoma tefali waʼa geu zi dombua andrö. Na asoʼa si sageu ba mate, tola molua-lua ia ba hogu geu zi sambua. Simanö göi, na mate woʼomo zi samösa niha tola ara awena aheta khönia waʼabu dödö. Imane samösa ndra alawe sotöi Paula, * no mate woʼomonia ba zi lö mudöna-döna, ”Tebulö sibai waʼaurigu ba urasoi wa lö hadöi ia zi tola ufalua. No taya khögu si fahuwu si sökhi. Fefu hadia ia ututunö khö woʼomogu. Fao ia ba waʼomuso dödö khögu ba itolo ndraʼo ba ginötö si basaki. Lö tebulö ia ba wamondrondrongo hadia niwaʼögu ba ginötö ututunö gabula dödögu. Sindruhu-ndruhu urasoi wa hulö no musila mbotogu.”

14-15. Hewisa wameʼeda fondrara dödö ba niha si no göna abula dödö börö me no mate woʼomonia?

¹⁴ Hewisa wameʼeda fondrara dödö ba niha si no göna abula dödö börö me no mate woʼomonia? Lala si oföna sabölö moguna yaʼia daʼö fahuhuo ita khönia hewaʼae so khöda waʼaila mazui lö taʼila hadia zinangea tawaʼö. Imane Paula si no mututunö moroi yawa, ”Aboto ba dödögu wa faʼamate tola iʼasogö ba niha wa lö laʼila hadia zinangea lawaʼö. Tola manö ataʼu ira na fasala wehedera. Hizaʼi, sindruhunia abölö baga daʼö moroi na lö hede-hedera.” Niha sabu tödö lö itötöna khöda enaʼö tawaʼö fehede zi tohude. Imane Paula, ”Uʼandrö sibai saohagölö ba ginötö lawaʼö si fahuwu khögu, ’Faodo khöu ba waʼabu dödö.’”

¹⁵ Imane William si no mate woʼomonia ba zi hauga fakhe silalö, ”Uʼandrö sibai saohagölö ba ginötö latutunö khögu ngawalö zi sökhi nitörö tödöra sanandrösa khö woʼomogu. Daʼö zameʼe khögu waʼafaduhu dödö wa laʼomasiʼö ia ba lö laʼosiwawöi. Daʼa  no sambua lala ba wanolo yaʼo. Terara sibai dödögu ba wehedera börö me foʼomogu no sebua mböli ia khögu ba föfö waʼaurigu ia.” Imane samösa lakha mbanua sotöi Bianca, ”Terara sibai dödögu ba ginötö fao khögu niha böʼö ba wangandrö hegöi ba ginötö labaso khögu sambua mazui dombua ayati. Ba no sambua fanolo khögu ba ginötö latutunö sanandrösa khö woʼomogu hegöi ba ginötö lafondrondrongo niwaʼögu me ututunö sanandrösa khönia.”

16. (a) Hadia zinangea tafalua ba niha si göna abula dödö börö me no mate niha niʼomasiʼöra? (b) Moloʼö Yakobo 1:27, hadia noro dödöda?

¹⁶ Simane Ruti si lö tebulö ba wefao khö Naʼemi si no tobali lakha mbanua, moguna lö tebulö tatolo niha si göna abula dödö börö me no mate niha niʼomasiʼöra. Imane Paula si no mututunö moroi yawa, ”Me no aefa mate woʼomogu, ato niha zi tohare ba wanolo yaʼo ba labeʼe khögu fondrara dödö. Me no numalö ginötö, lafuli ira ba halöwöra si toʼölö si ero maʼökhö. Hewaʼae simanö, sindruhu-ndruhu no tebulö waʼaurigu. Sindruhu-ndruhu terara sibai dödögu ba ginötö aboto ba dödö niha wa moguna sibai latolo niha sabu tödö mato hauga waŵa, mendrua manö na ba ndröfi me no aefa mate niha niʼomasiʼöra.” Tatu manö ero samösa niha faböʼö-böʼö. So ösa niha, alio lafaudugö waʼaurira ba zawena alua khöra. Hizaʼi tanö böʼönia, tola ifuli mowöi dawa höröra ero na lafalua halöwö si toʼölö lafalua mböröta fatua lö mate niha niʼomasiʼöra. Ero samösa niha no faböʼö-böʼö ba wangoromaʼö faʼabu dödöra. Hewaʼae simanö,  moguna tatörö tödöda wa no ibeʼe khöda Yehowa halöwö si tohude hegöi noro dödö ba woʼameʼegö tödö niha si göna abula dödö börö me no mate niha niʼomasiʼöra.​—Baso Yakobo 1:27.

17. Hana wa niha si no iröi ira foʼomora moguna wanolo moroi khöda?

¹⁷ So ösa niha si no mongambatö sabu tödö ba tefakao börö me laröi ira woʼomora. Daʼa zalua khö zi samösa ira alawe sotöi Joyce. Iröi ia woʼomonia börö ba wolohi ira alawe tanö böʼö. Imane, ”Abölö afökhö fabali auri moroi na mate foʼomogu. Na mate ia börö zikho mazui mate börö wökhö, daʼö tenga börö nifilinia enaʼö alua. Hizaʼi ba zalua daʼa, foʼomogu samösa zofili ba wondröi yaʼo. Urasoi wa iʼailasi ba iʼosilöʼögö ndraʼo.”

18. Na lö hadöi saʼae woʼomo zi samösa niha, hadia zi tola tafalua ba wanolo yaʼia?

¹⁸ Na tafalua ngawalö zi sökhi ba niha si no iröi ira foʼomora, no taforomaʼö wa taʼomasiʼö ira. Ba ginötö simane daʼa, moguna khöra si fahuwu si sökhi. (Gamd. 17:17) Hewisa wangoromaʼömö wa tobali ndraʼugö si fahuwu si sökhi khöra? Kaoni ira wefao manga ba nomomö. Ba beʼe ginötömö wefao khöra, simane weʼamöi manörö-nörö mazui manuriaigö. Tola göi ökaoni ira enaʼö fao ba wamahaʼö zi sambua omo. Na öfalua daʼö, no öʼomusoiʼö dödö Yehowa börö me ’ahatö ia ba zi no arasa tödö’ ba ”ilumöʼö lakha mbanua”.​—Zin. 34:19; 68:5, Terjemahan Dunia Baru.

19. Moloʼö 1 Fetero 3:8, hadia zinangea tafalua?

¹⁹ Ba zi lö ara tö, na tohare Wamatörö Lowalangi ba gulidanö, ”taya ba dödö wamakao andrö” fefu. Hawaʼomuso dödöda ba ginötö daʼö dania, wa ”lö saʼae itörö tödö zi föföna andrö, löʼö saʼae iʼangeragö niha”. (Yes. 65:16, 17) Fatua lö tarugi ginötö andrö, datatolo nawöda ba taforomaʼö daʼö ba wehededa hegöi ba nifaluada, daʼö zangoromaʼö wa taʼomasiʼö dalifusöda si sara lala wamati.​—Baso 1 Fetero 3:8.