1. Hana wa tola tobali ono mbanua Yehowa ita?

NO IDÖNI ita Yehowa tobali ono mbanuania. (Yoh. 6:44) Angeragö atö hadia geluahania daʼö. Me inehe-nehegö Yehowa zi hauga miliar niha ba gulidanö andre, iʼila wa so zi tohude khöu. Öʼokhögö dödö si sökhi si tola mangomasiʼö yaʼia. (1 Ng. 28:9) Aboto ba dödönia ndraʼugö ba iforomaʼö waʼomasinia khöu. Tatu möi famarou dödöu daʼö!

2. Hadia gamaedola niʼogunaʼö Yesu ba wanutunö hewisa dödö Yehowa ba mbiri-birinia?

² Iʼameʼegö tödö sibai nono mbanuania Yehowa ero zamösana. Enaʼö tola aboto ba dödöda daʼa, iʼamaedolagö Yehowa andrö Yesu simane samösa kubalo sangokhögö 100 ngaʼeu mbiri-biri. Na so sageu mbiri-birinia selungu, hadia nifalua gubalo andrö? Hasambalö ”iröi zi 99 ngaʼeu ba hili ba wangalui si sageu si no elungu andrö”. Me no isöndra, lö ihuku mbiri-biri andrö, hizaʼi omuso sibai dödönia. Hadia wamahaʼönia khöda? Ba wamaigi Yehowa, no sebua böli mbiri-birinia ero zamösana. Imane Yesu, ’Amagu si so ba zorugo, lö omasi ia na tekiko fazamösa niha simane ono side-ide andre.’​—Mat. 18:12-14.

3. Hadia nitutunöda dania ba artikel daʼa?

³ Tatu lö omasi ita taʼafökhöiʼö dödö ndra talifusöda. Na simanö, hewisa enaʼö lö tobali börö wangala ita ba niha böʼö? Ba hadia nifaluada na so niha sangafökhöiʼö tödöda? Tatutunö wanema linia ba artikel daʼa. Hizaʼi si oföna, datatutunö haniha ’ndraono side-ide’ nitötöi ba Mataiʼo faza 18.

4. Haniha ’ndraono side-ide’ andrö?

⁴ ’Iraono side-ide andre’ yaʼia daʼö fefu nifahaʼö Yesu. Gofu hawaʼalawa ndröfira, yaʼira andrö hulö ’ndraono side-ide’  börö me omasi ira latema wamahaʼö nifaʼema Yesu. (Mat. 18:3) Hewaʼae na faböʼö-böʼö waö-waö waʼaurira, si toʼölö lafalua, bua gera-erara hegöi amuatara, mamati ira khö Yesu Keriso. Daʼö mbörö wa iʼomasiʼö sibai ira Yesu.​—Mat. 18:6; Yoh. 1:12.

5. Hewisa dödö Yehowa na so niha sangafökhöiʼö tödö nono mbanuania?

⁵ Fefu ’ndraono side-ide andre’ no sebua böli ba wamaigi Yehowa. Enaʼö aboto ba dödöda nirasoinia, angeragö atö hewisa dödöda ba ndraono side-ide. No sebua böli ira ba wamaigida. Börö me taʼila wa lö khöra faʼatua-tua ba faʼabölö simane niʼokhögö niha satua, omasi ita talumöʼö ira. Si toʼölönia, lö omasi ita na so niha samakao niha böʼö. Mendrua manö na iraono side-ide nifakao, tatu aukhu sibai dödöda ba mofönu ita. Simanö göi Yehowa, omasi ia ilumöʼö nono mbanuania ero zamösana. Na so niha sangafökhöiʼö tödöra, aukhu dödönia ba mofönu sibai ia!​—Yes. 63:9; Mrk. 9:42.

6. Simane nitutunö ba 1 Korindro 1:26-29, hewisa wamaigi niha gulidanö ndra nifahaʼö Yesu?

⁶ Hadia nasa mbörö wa tola muʼamaedolagö ndra nifahaʼö Yesu simane ’iraono side-ide’? Angeragö atö, haniha zi tohude ba wamaigi niha gulidanö? Niha si kayo, si tehöngö, ba sebua kuaso. Si toʼölönia, tenga simane daʼö ndra nifahaʼö Yesu. Börö daʼö, ba wamaigi niha gulidanö andre, yaʼira andrö ha ’iraono side-ide’ si lö tohude ba si lö eluaha. (Baso 1 Korindro 1:26-29.) Hizaʼi, tenga simane daʼö wamaigi Yehowa yaʼira.

7. Hewisa zinangeania dödöda khö ndra talifusöda?

⁷ Iʼomasiʼö fefu nono mbanuania Yehowa, he na no ara lafosumange ia mazui löʼö. Tohude sibai ira ba wamaiginia. Börö daʼö, moguna göi tawaʼö tödöda wa tohude sibai ndra talifusöda andrö. ’Taʼomasiʼö fefu dalifusöda ba wamati’ ba böi tafili-fili. (1 Fe. 2:17) Moguna göi omasi ita tafalua gofu hadia ia ba wolumöʼö hegöi ba wanolo yaʼira. Na tarasoi wa no taʼafökhöiʼö dödö dalifusöda ba wamati, böi taʼosilömangilagö. Böi tawaʼö tödöda wa talafo alio tetutu dödönia ba no sinangea iʼefaʼö zalada. Angeragö atö, hana wa so ösa ndra talifusöda si tetutu tödö? Te so ösa ba gotaluara zorasoi faʼide-ide dödö börö waö-waö waʼaurira ba zilalö. Tola manö talafo laʼera-era wehede niha böʼö sanandrösa khöra irege alio tetutu dödöra. So göi ösa ndra talifusöda sawena farahu ba zindruhu si tokea me laʼila walömoʼahonoa ndra talifusöda. He na laʼafökhöiʼö dödöda mazui taʼafökhöiʼö dödö niha böʼö, moguna taforege ba wangaʼasogö faʼatulö. Baero daʼö, moguna göi taforege enaʼö lö alio tetutu dödöda. Na tafalua daʼö, tola tarasoi waʼomuso dödö ba taʼokhögö wahuwusa si sökhi khö ndra talifusöda.

8. Hadia lala wangera-ngera niha sato me götö Yesu sondrönisi tödö ndra nifahaʼönia?

⁸ Hadia mbörö wa itutunö Yesu sanandrösa ba ’ndraono side-ide’? Me luo daʼö, manofu khönia ndra nifahaʼönia, ”Haniha zindruhunia zabölö ebua ba Wamatörö Lowalangi ba zorugo?” (Mat. 18:1) Omasi ndra niha Yahudi na abölö tohude ira moroi ba niha böʼö. Imane samösa pakar, ”Omasi-masi sibai ira lafosumange ba laforege enaʼö tehöngö ira. Ba wamaigira, daʼö zabölö moguna ba waʼauri.”

9. Hadia zinangea lafalua ira nifahaʼö Yesu?

⁹ Aboto ba dödö Yesu wa omasi ndra niha Yahudi na abölö tohude ira moroi ba niha böʼö, ba moguna laforege ira nifahaʼönia ba wangeheta lala wangera-ngera simane daʼö. Imane khöra, ”Haniha zabölö ebua ba gotaluami yatobali ia simane siakhi, ba niha sondröniaʼö yatobali simane  enoni.” (Luk. 22:26) Hulö no tabaliʼö ita ”siakhi” na tawaʼö tödöda wa abölö ”alawa niha böʼö” moroi khöda. (Fil. 2:3) Na taʼokhögö lala wangera-ngera simane daʼö, lö tobali ita börö wangala ba niha böʼö.

10. Hadia mene-mene Waulo sinangea tafalua?

¹⁰ Tatu so zabölö tohude khö ndra talifusöda moroi khöda. Lö abua khöda wanöndra daʼö, na taʼosambuaʼö dödöda ba mbua-bua si sökhi niʼokhögöra. Moguna tafalua mene-mene nibeʼe Waulo ba niha Gorindro, ”Hadia gamaehutami ba niha böʼö? Sindruhunia, hadia tenga buala fefu niʼokhögömi andrö? Na sindruhu buala daʼö, hana wa fayawa ami hulö na tenga buala?” (1 Ko. 4:7) Börö daʼö, böi taʼalui lala enaʼö lasuno-suno ita niha böʼö mazui tawaʼö tödöda wa abölö tohude ita moroi khöra. Duma-dumania, na so samösa dalifusöda ira matua samaʼema huhuo si sökhi sibai mazui na ato niha nifahaʼö zi samösa talifusöda ira alawe ba Zura Niʼamoniʼö, moguna labaliʼö daʼö famolakhömi Yehowa börö me yaʼia zanolo yaʼira ba wamalua daʼö.

11. Hadia wamahaʼö si tola tahalö moroi ba gamaedola nitutunö Yesu sanandrösa khö zi samösa razo hegöi sawuyunia?

¹¹ Lö ara me no ifangelama ndra nifahaʼönia Yesu enaʼö lö tobali ira börö wangala ba niha böʼö, itutunö khöra sambua gamaedola sanandrösa khö zi samösa razo hegöi sawuyunia. Ebua sibai gömö zawuyu andrö khö razo no mege irege tebai ibuʼa. Hewaʼae simanö, omasi razo andrö ba wangefaʼö foʼömönia. Ba gafuriata, lö omasi zawuyu andrö ba wangefaʼö foʼömö zawuyu tanö böʼö hewaʼae na abölö ide-ide woʼömönia. Börö daʼö, ibeʼe ba gurunga zawuyu si lö faʼahakhö dödö andrö razo. Hadia wamahaʼönia? Imane Yesu, ”Simanö göi Namagu ba zorugo, ifalua khömi zimane daʼö na lö miʼefaʼö zala dalifusömi soroi ba dödömi.”​—Mat. 18:21-35.

12. Hewisa wa tola tefakao ndra talifusöda na lö taʼefaʼö zala niha böʼö?

¹² Tenga ha sawuyu andrö zi tefakao börö gangetula nihalönia, hizaʼi tefakao göi niha böʼö. Si oföna, no ifakao zawuyu soʼömö khönia, yaʼia me ”ifakuruʼö nawönia andrö, irege ibuʼa fefu woʼömönia”. Si dua, no göi iʼafökhöiʼö dödö ndra sawuyu tanö böʼö samaigi-maigi hadia nifaluania. Me ”laʼila ira sawuyu tanö böʼö zalua andrö, abu sibai dödöra”. Simanö göi, tola tefakao niha böʼö börö nifaluada. Na so niha sangafökhöiʼö tödöda ba lö omasi ita taʼefaʼö zalania, hadia lua-luania daʼö? Si oföna, no taʼafökhöiʼö dödönia börö me lö omasi ita taʼefaʼö zalania, lö taʼameʼegö tödö ia, ba lö taforomaʼö khönia waʼomasi. Si dua, no tatayaigö waʼahono dödö khö ndra talifusöda ba mbanua niha Keriso börö me laʼila wa lö satulö ita khö dalifusöda andrö.

13. Hadia wamahaʼö si tola öhalö moroi ba zalua khö Crystal?

¹³ Tenga ha yaʼita zorasoi faʼohahau dödö na taʼefaʼö zala ndra talifusöda, hizaʼi larasoi göi daʼö ira niha böʼö. Daʼö zalua khö zi samösa perintis sotöi Crystal. * No irai abao dödönia khö zi samösa talifusöda ira alawe ba mbanua niha Keriso. Itutunö Crystal, ”Afökhö dödögu khönia börö me itaria iwaʼö khögu wehede si lö sökhi. Daʼö mbörö wa lö omasido fao khönia ba wanuriaigö. Ibörögö areudo weʼamöi manuriaigö ba taya waʼomuso dödögu.” Ba wamobörö, iwaʼö tödönia Crystal wa no sinangea abao dödönia khö dalifusöda andrö. Hizaʼi ba gafuriata, iforege ba wanayaigö faʼabao dödönia andrö ba lö saʼae iʼera-era manö waʼafökhö dödö nirasoinia. Iʼoʼö mene-mene Zura Niʼamoniʼö nitutunö ba artikel ”Ampunilah  dengan Segenap Hati Saudara” si so ba Menara Pengawal 15 Mbaŵa si Fulu 1999. Buania, tola iʼefaʼö zala dalifusöda andrö. Imane Crystal, ”Tola aboto ba dödögu wa moguna taforege ba wangokhögö amuata si bohou. Ifuli göi itörö tödögu wa omasi ia iʼefaʼö zalada Yehowa ero maʼökhö. Iadaʼa, ohahau sibai dödögu ba urasoi waʼomuso dödö.”

14. (a) Moloʼö Mataiʼo 18:21, 22, hadia zinangea iforege sinenge sotöi Fetero, ba hadia wamahaʼö si tola tahalö moroi ba wanema li nibeʼe Yesu? (b) Hadia zanolo yaʼita ba wangefaʼö sala niha böʼö?

¹⁴ Aboto ba dödöda wa moguna taʼefaʼö zala niha böʼö. Hizaʼi, tola manö tarasoi wa abua khöda wamalua daʼö. Te no irai irasoi zimane daʼö sinenge sotöi Fetero. (Baso Mataiʼo 18:21, 22.) Hadia zi tola manolo yaʼita? Si oföna, moguna taʼangerönusi hawaʼasese iʼefaʼö zalada Yehowa. (Mat. 18:32, 33) Sindruhunia, tenga sinangea iʼefaʼö zalada Yehowa. Hizaʼi, omasi ia wamalua daʼö. (Si. 103:8-10) Börö daʼö, ”moʼömö göi ita ba wangomasiʼö awöda”. Daʼö mbörö wa lö tola löʼö taʼefaʼö zala ndra talifusöda. (1 Yo. 4:11) Si dua, moguna taʼangerönusi hadia mbuania na taʼefaʼö zala niha böʼö. Tola ifuli sökhi gamakhaitada ba niha sangafökhöiʼö tödöda, itugu aro wahasara dödö ba mbanua niha Keriso, terorogö wahuwusada khö Yehowa, ba tarasoi waʼahono dödö. (2 Ko. 2:7; Kol. 3:14) Si tölu, moguna mangandrö ita khö Yehowa börö me yaʼia zameʼe khöda oroisa ba wangefaʼö sala niha böʼö. Omasi Zatana ba wamakiko fahuwusada khö ndra talifusöda. Hizaʼi, böi tatehegö alua daʼö. (Ef. 4:26, 27) Moguna khöda wanolo moroi khö Yehowa enaʼö lö alau ita ba dandrawa Zatana.

15. Simane nitutunö ba Kolose 3:13, hadia zinangea öfalua na so dalifusöda ba wamati sangafökhöiʼö tödöu?

¹⁵ Hewisa na so dalifusöda ba wamati sangafökhöiʼö tödöu ba wehede hegöi ba nifaluania? Hadia zinangea öfalua?  Moguna öforege enaʼö ifuli atulö ndraʼugö khönia. Tutunö khö Yehowa hadia nirasoimö, angandrö salahi dalifusöda no mege, ba andrö enaʼö tola öʼila mbua-buania si sökhi sadöni dödö Yehowa khönia. (Luk. 6:28) Na abua khöu wangefaʼö sala dalifusöda andrö, haogö wamatunöisi daʼö khönia. Böi waʼö tödöu wa iʼodödögö wamalua daʼö. (Mat. 5:23, 24; 1 Ko. 13:7) Hizaʼi, hewisa na lö omasi ia mangatulö khöu? ’Böi tebulö khöu waʼebolo dödö’. Yafaduhu dödöu wa samuza inötö dania tola ifuli atulö ami. (Baso Kolose 3:13.) Sabölö moguna, böi saʼae abao dödöu khönia enaʼö lö tekiko wahuwusau khö Yehowa. Böi tehegö so zi tobali famaʼalau. Buania, tola öforomaʼö wa abölö öʼomasiʼö Yehowa moroi ba ngawalö hadia ia.​—Si. 119:165.

16. Hadia noro dödö niʼokhögöu?

¹⁶ Fefu ita tafosumange Yehowa tobali ”sambawa nikubaloi” barö wanuturu lala zi ’samösa kubalo’! Tatu taʼandrö sibai saohagölö börö me so wahasara dödö ba gotaluada. (Yoh. 10:16) Imane buku Diorganisasi untuk Melakukan Kehendak Yehuwa ngaʼörö 165, ”Börö me oya mbua nitemamö moroi ba wahasara dödö andre, tebeʼe khöu noro dödö ba wondrorogö yaʼia.” Moguna öfomaha ndraʼugö ”ba wamaigi niha böʼö simane famaigi Yehowa yaʼira”. Ba wamaigi Yehowa, no ’iraono side-ide’ sebua böli fefu ita. Hadia simane daʼö göi wamaigimö ira talifusöda? Törö tödöu, inehe-nehegö ba iʼameʼegö tödö Yehowa fefu wamorege nifaluamö ba wanolo hegöi ba wondrorogö ira talifusöda ba wamati.​—Mat. 10:42.

17. Hadia gangetula nihalöda?

¹⁷ Taʼomasiʼö sibai ndra talifusöda si sara lala ba wamati. Börö daʼö, ”böi tafobörö wangala mazui gofu hadia ia si möi fangawuwu wamati ndra talifusöda”. (Rom. 14:13) Datawaʼö tödöda wa abölö tohude ndra talifusöda moroi khöda. Dataʼefaʼö zalara soroi ba dödö. Böi tatehegö tobali börö wangalada niha böʼö. Datahalö gangetula ba ’wamalua ngawalö zi möi fangatulö ba si möi famarou dödö zamösana’.​—Rom. 14:19.