1. Hana wa itaria larasoi ono mbanua Yehowa wa hulö zi lö hadöi awö-awöra?

ATO ba gotalua nono mbanua Yehowa zorasoi wa hulö zi lö hadöi awö-awöra. So ösa zorasoi daʼö ha ba zi sabata, ba so göi zi lö mamalö morasoi simane daʼö. Tola manö tarasoi wa hulö zi lö hadöi awö-awöda hewaʼae na so ita ba gotalua niha sato. So zorasoi simane daʼö na awena findra ira ba mbanua niha Keriso tanö böʼö, mazui börö me fandröndröu ira moroi ba nösi nomora si no toʼölö fao-fao khöra ba zilalö. Larasoi göi daʼö ira niha böʼö börö me mate nösi nomora mazui si fahuwu khöra. So göi ösa ndra talifusöda, mendrua manö zawena farahu ba zindruhu, larasoi wa hulö zi lö hadöi awö-awöra börö me so nösi nomora si tenga Samaduhuʼö Yehowa saniboʼö mazui sanaisi yaʼira.

2. Hadia manö wanofu-nofu nitutunöda ba artikel daʼa?

² Aboto ba dödö Yehowa fefu nirasoida. Iʼila na tarasoi wa hulö zi lö hadöi awö-awöda ba omasi ia itolo ita. Hewisa wamaluania daʼö? Hadia zi tola tafalua enaʼö lö tarasoi wa hulö zi lö hadöi awö-awöda? Ba hadia zi tola tafalua ba wanolo ira talifusöda ba mbanua niha Keriso na larasoi zimane daʼö? Datatutunö wanema linia.

3. Hadia nifalua Yehowa börö me iʼameʼegö tödö Gelia?

³ Omasi Yehowa na omuso dödö nono mbanuania. Ahatö ia khöda zamösana, ba tola iʼila na abu dödöda mazui tarasoi waʼide-ide dödö. (Si. 145:18, 19) Nehegö atö zalua khö zamaʼeleʼö sotöi Elia me götö ndraono Gizaraʼeli. Basaki zalua ba nono mbanua Yehowa me luo daʼö börö me göna ira famakao. Baero daʼö, laʼalui göi lala ira samatörö si lö mangomasiʼö Lowalangi ba wamunu Elia. (1 Ra. 19:1, 2) Te abu göi dödö Gelia börö me iwalingagö hatö yaʼia zauri moroi ba gotalua zamaʼeleʼö Yehowa. (1 Ra. 19:10) Iʼameʼegö tödö sibai  Gelia andrö Yehowa. Daʼö mbörö wa iʼanemaiʼö ifatenge malaʼikania ba wondrara tödö Gelia. Ifaduhuʼö khönia malaʼika andrö wa ato nasa ndraono Gizaraʼeli si lö faröi ba wamosumange Yehowa!​—1 Ra. 19:5, 18.

4. Moloʼö Mareko 10:29, 30, hadia nibeʼe Yehowa ba nono mbanuania na lö saʼae fahuwu khöra ndra awö-awöra hegöi ösi nomora?

⁴ Aboto ba dödö Yehowa wa oya zinangea tatehegö na tahalö gangetula ba wamosumange yaʼia. Duma-dumania, te lö saʼae fahuwu khöda ndra awö-awöda mazui ösi nomoda si tenga Samaduhuʼö Yehowa. No irai imane Fetero khö Yesu, ”No maröi fefu hadia ia ba maʼoʼö ndraʼugö. Na simanö, hadia dania nitemama?” (Mat. 19:27) Iwaʼö daʼö Fetero te börö me so khönia waʼaombö-aombö dödö. Hizaʼi, si fao faʼasökhi dödö, ifaduhuʼö khö ndra nifahaʼönia Yesu wa hasambalö lasöndra dania nösi nomo ba wamati. (Baso Mareko 10:29, 30.) No ifabuʼu göi khöda Yehowa, Amada si so ba zorugo, wa lö tebulö itolo niha samosumange yaʼia. (Si. 9:10) Na tarasoi wa hulö zi lö hadöi awö-awöda, hadia manö zi tola tafalua ba wanemaʼö fanolo moroi khö Yehowa?

5. Hadia mbua nitemamö na öʼangeragö hewisa wanolo Yehowa ndraʼugö ba zilalö?

⁵ Angeragö hewisa wanolo Yehowa ndraʼugö ba zilalö. (Si. 55:22) Na öfalua daʼö, tola öʼokhögö lala wangera-ngera si tefaudu. Nehegö atö hadia niwaʼö dalifusöda ira alawe si lö sangowalu sotöi Carol. * Moroi ba gotalua nösi nomonia, ha yaʼia zi no farahu ba zindruhu. Imane, ”Na itörö-törö tödögu hewisa wanolo Yehowa ndraʼo na alua khögu gabula dödö, aboto ba dödögu wa tenga ha yaʼo-yaʼo ba wanaögö abula dödögu andrö. Ba faduhu göi dödögu wa hasambalö itolo ndraʼo Yehowa gofu hadia zalua khögu ba zi so miföna.”

6. Na so niha sorasoi wa hulö zi lö awö-awöra, hewisa wa tola möi fanolora 1 Fetero 5:9, 10?

⁶ Angerönusi hewisa wanolo Yehowa ndra talifusöda tanö böʼö sanaögö abula dödö. (Baso 1 Fetero 5:9, 10.) Nehegö atö hadia niwaʼö Hiroshi, samösa talifusöda si lö tebulö mamosumange Yehowa hewaʼae na tenga Samaduhuʼö Yehowa nösi nomonia.  Imane, ”Ba mbanua niha Keriso, tola taʼila wa so gabula dödö nitaögö ndra talifusöda maʼafefu. Hewaʼae simanö, lö tebulö lafalua wondrege zi sökhi ba wamosumange Yehowa. Daʼa zangabölöʼö yaʼo hegöi ira talifusöda tanö böʼö si ha samö-samösa ba zindruhu.”

7. Hadia mbua nitemau na ölau mangandrö?

⁷ Böi böhöli wangandrö, fombaso Sura Niʼamoniʼö, hegöi feʼamöi ba gangowuloa. Tutunö khö Yehowa fefu nirasoimö. (1 Fe. 5:7) Nehegö atö zalua khö dalifusöda ira alawe si bohou ebua sotöi Massiel. Börö me tenga samosumange Yehowa nösi nomonia, irasoi wa hulö zi lö awö-awönia. Imane, ”Sambua zi tobali fanologu yaʼia daʼö fangandrö soroi ba dödö khö Yehowa. Ba wamaigigu, Yehowa andrö hulö simane Amagu samösa. Asese mangandrö ndraʼo khönia ero maʼökhö ba ututunö fefu nirasoigu.”

8. Hadia mbua nitemamö na öbaso ba öʼangerönusi Daromali Lowalangi?

⁸ Baso Daromali Lowalangi ero maʼökhö ba angerönusi ayati sangoromaʼö wa iʼomasiʼö ndraʼugö Yehowa. No irai irasoi waʼide-ide dödö talifusöda ira alawe sotöi Bianca börö wehede sagafökhö nifaʼema nösi nomonia. Imane, ”Teʼabölöʼö sibai ndraʼo me ubaso ba uʼangerönusi zi no irai alua ba nono mbanua Yehowa sorasoi abula dödö simane nirasoigu, he si no tesura ba Zura Niʼamoniʼö mazui ba publikasida.” So göi ndra talifusöda sananö ba dödöra ngawalö ayati si möi fondrara dödöra, simane Sinunö 27:10 hegöi Yesaya 41:10. So göi zamondrondrongo rekaman audio na lafaʼanö waö-waö halöwö ba gangowuloa hegöi na lafalua wombaso Sura Niʼamoniʼö.

9. Hadia mbua nitemau na öʼondrasi gangowuloa?

⁹ Forege enaʼö lö tebulö öʼondrasi gangowuloa. Na öfalua daʼö, tola möi fangabölöʼöu wamahaʼö nitutunö ba gangowuloa ba itugu aboto göi ba dödöu ndra talifusöda ba mbanua niha Keriso. (Heb. 10:24, 25) Imane Massiel si no mututunö moroi yawa, ”Hewaʼae na niha saila-aila ndraʼo, uhalö gangetula enaʼö lö tebulö uʼondrasi gangowuloa ba ubeʼe mbua gera-eragu. Buania, tola urasoi wa ösi mbanua niha Keriso ndraʼo.”

10. Hana wa moguna taʼokhögö wahuwusa saro khö ndra talifusöda ba mbanua niha Keriso?

¹⁰ Okhögö wahuwusa saro khö ndra talifusöda ba mbanua niha Keriso. Alui zi fahuwu khöu si tola tobali duma-duma si sökhi, gofu hawaʼalawa ndröfira ba gofu hewisa waö-waö waʼaurira ba zilalö. Törö tödöu niwaʼö ba Zura Niʼamoniʼö wa so waʼatua-tua ”ba zi no alawa döfi”. (Yob. 12:12) Oya wamahaʼö si tola tahalö khöra, ba oya göi wamahaʼö si tola lahalö moroi khö ndra si bohou ebua. Oʼö duma-duma Dawido hegöi  Yonata, sangokhögö fahuwusa saro hewaʼae na aröu sibai gotalua ndröfira. (1 Sa. 18:1) Faoma latuhini nawöra irege lö faröi ira ba wamosumange Yehowa hewaʼae na alua khöra gabula dödö. (1 Sa. 23:16-18) Imane talifusöda ira alawe sotöi Irina si ha samö-samösa ba zindruhu, ”Fefu ndra talifusöda ba mbanua niha Keriso tola tobali satuada, gaʼada, mazui akhida. Tola iʼogunaʼö ira Yehowa ba wanolo yaʼita.”

11. Hadia zinangea tafalua enaʼö so zi fahuwu khöda?

¹¹ Sindruhu sa, tenga saoha wangokhögö fahuwusa saro ba niha böʼö, mendrua manö na niha saila-aila ndraʼugö. Nehegö atö zi no irai alua khö Ratna, samösa talifusöda ira alawe saila-aila. Hewaʼae na göna ia fanaisi, lö tebulö ifahaʼö ia ba zindruhu. Hadia zanolo yaʼia? Imane Ratna, ”Sindruhu-ndruhu wa moguna khögu wanolo hegöi fotuhini moroi khö ndra talifusöda ba mbanua niha Keriso.” Tola manö abua khöu wanutunö ba niha böʼö hadia nirasoimö. Hizaʼi, na ötutunö daʼö khö zi samösa talifusöda, tola tobali si fahuwu khöu ia. Törö tödöu, omasi fefu ndra talifusöda ba wanolo hegöi ba wangabölöʼö yaʼugö. Hizaʼi, moguna ua ötutunö khöra gabula dödöu enaʼö aboto ba dödöra hadia zinangea lafalua.

12. Hewisa wa tola tasöndra zi fahuwu khöda na fao ita manuriaigö khö ndra talifusöda?

¹² Sambua lala sabölö sökhi ba wanöndra si fahuwu khöda yaʼia daʼö na fao ita manuriaigö khö ndra talifusöda ba wamati. Imane Carol si no mututunö moroi yawa, ”Börö me asese falulu fohalöwö ndraʼo khö ndra talifusöda ba wanuriaigö hegöi ba wamalua halöwö ba wamati tanö böʼö, itugu ato zi fahuwu khögu. Barö zi hauga fakhe andre, yaʼira niʼogunaʼö Yehowa ba wanolo yaʼo.” Tenga zaya-zaya gölö wamorege nifaluada ba wangokhögö fahuwusa saro khö ndra talifusöda. Tola iʼogunaʼö ira Yehowa ba wanolo yaʼita na so khöda waʼide-ide dödö, duma-dumania na tarasoi wa hulö zi lö awö-awöda.​—Amd. 17:17.

13. Hadia zinangea tafalua khö ndra talifusöda ba mbanua niha Keriso?

¹³ Fefu ita moguna taforege ba wangoromaʼö faʼomasi hegöi ba wangaʼasogö faʼatulö ba mbanua niha Keriso, enaʼö lö hadöi niha sorasoi wa hulö zi lö awö-awöra. (Yoh. 13:35) Tola tobali famarou dödö ndra talifusöda hadia niwaʼöda hegöi nifaluada! Imane samösa talifusöda ira alawe, ”Me ufahaʼö ndraʼo ba zindruhu, hulö nösi nomogu samösa ndra talifusöda ba mbanua niha Keriso. Na tenga börö wotuhini moroi khöra, tatu tebai tobali Samaduhuʼö Yehowa ndraʼo.” Na lö hadöi samosumange Yehowa ba gotalua nösi nomo zi samösa talifusöda, hadia zinangea tafalua enaʼö irasoi wa laʼomasiʼö ia ira talifusönia ba mbanua niha Keriso?

14. Hewisa enaʼö tola tobali ndraʼugö si fahuwu ba niha böʼö?

¹⁴ Baliʼö ndraʼugö si fahuwu khö ndra talifusöda. Na so niha sawena mangondrasi banua niha Keriso si farahu yaʼugö, moguna ötemaʼö ira. (Rom. 15:7) Börö daʼö, enaʼö tobali ndraʼugö si fahuwu khöra, böi ha asala öʼowai ira. Foromaʼö khöra waʼasökhi dödö ba ameʼegö tödö ira. Forege enaʼö aboto ba dödöu hadia gabula dödö nitaögöra. Hizaʼi, böi faʼema khöra wanofu si tola mangailasi yaʼira. Te so ösa niha si lö toʼölö manutunö hadia nirasoira. Andrö, böi faso ira ba wameʼe fanema li ba wanofu-nofu nifaʼemamö. Sabölö sökhinia, beʼe khöra wanofu-nofu si fao faʼatua-tua enaʼö tola öʼila nösi dödöra. Duma-dumania, sofu khöra hewisa wa tola lafahaʼö ira ba zindruhu. Aefa daʼö, fondrondrongo wanema lira si fao faʼebolo dödö.

15. Hadia zi tola lafalua ira talifusöda saro ba wamati ba wanolo niha böʼö ba mbanua niha Keriso?

 ¹⁵ Tola tedou wamati ndra talifusöda ba mbanua niha Keriso na so zoʼameʼegö tödö yaʼira, mendrua manö na ira satua sokubaloi zamalua daʼö mazui ira talifusöda saro ba wamati. Imane talifusöda ira alawe sotöi Melissa niʼebuaʼö mamania ba zindruhu, ”Uʼandrö sibai saohagölö khö ndra talifusöda börö me oya ginötö nitehegöra ba wefao khögu ba laʼameʼegö tödö ndraʼo ba zi hauga fakhe faʼara. Hulö namagu samösa ira. Ero na so zomasido ututunö, hasambalö omasi ira lafondrondrongo.” Irasoi talifusöda ira matua sotöi Mauricio wa hulö zi lö awö-awönia börö me no iböhöli wamalua halöwö ba wamati niha samahaʼö yaʼia ba Zura Niʼamoniʼö. Hewaʼae simanö, imane Mauricio, ”Sindruhu-ndruhu teʼabölöʼö ndraʼo börö me laʼameʼegö tödö ndraʼo ira satua sokubaloi. Asese fahuhuo ira khögu ba laʼohe awöra ndraʼo ba wanuriaigö. Latutunö khögu hadia manö girö-girö ba wamati nisöndrara me lafalua wamahaʼö samösa ba Zura Niʼamoniʼö, ba fao göi ira khögu fa-olahraga.” Iadaʼa, no mangai halöwö safönu inötö Melissa hegöi Mauricio.

16-17. Hadia manö zi tola tafalua ba wanolo ira talifusöda?

¹⁶ Beʼe wanolo si tefaudu. (Gal. 6:10) Imane samösa utusan injil sotöi Leo, si toröi ba soi si fandröndröu moroi ba nösi nomonia, ”Sasesenia, soguna khöda ha fanolo si öna-öna ba ginötö si tefaudu. Itörö tödögu me fatandrudo ba wolohe moto. Me ofetado ba nomo, fawuka sibai wangera-ngeragu. Lö ara aefa daʼö, so sambua fongambatö sogaoni yaʼo weʼamöi manga ba nomora. Lö itörö tödögu hadia gö niʼama. Hizaʼi, itörö tödögu wa lahaogö sibai lafondrondrongo hadia nitutunögu khöra. Ba gafuriata, tola urasoi waʼahono dödö!”

¹⁷ Tatu omuso sibai dödöda weʼamöi ba gangowuloa ba zi sambua wilayah hegöi regional. Hadia mbörö? Börö me tola fariawö ita khö ndra talifusöda ba tadunö-dunö hadia zadöni dödöda ba gangowuloa sebua andrö. Imane Carol si no mututunö moroi yawa, ”Ba gangowuloa ba zi sambua wilayah mazui regional, asese urasoi wa hulö zi lö awö-awögu. Hewaʼae na so ndraʼo ba gotalua ndra talifusöda si hauga ngaotu mazui hauga ribu faʼato, si toʼölönia ha ba nösi nomora samösa fao ira wedadao. Börö daʼö, itugu  urasoi wa hulö zi lö hadöi awö-awögu.” So ösa ndra talifusöda sorasoi wa abua sibai khöra wangondrasi angowuloa sebua na awena mate woʼomora. Hadia so dalifusöda niʼilamö sorasoi abula dödö simane daʼö? Na so, hadia tola ökaoni ia wefao ba nösi nomou na mufalua gangowuloa sebua ba zi so miföna?

18. Hewisa woloʼöda mene-mene si so ba 2 Korindro 6:11-13?

¹⁸ Beʼe ginötöu fariawö ba niha böʼö. Forege enaʼö tola fariawö ndraʼugö khö ndra talifusöda si faböʼö-böʼö, mendrua manö khö ndra talifusöda sorasoi wa hulö zi lö hadöi awö-awöra. Moguna ’taʼeboloʼö wamokai tödöda’ khöra. (Baso 2 Korindro 6:11-13.) Imane Melissa si no mututunö moroi yawa, ”Omuso sibai dödöma na so dalifusöda sogaoni yaʼaga weʼamöi ba nomora mazui solohe yaʼaga wanörö fao ba nösi nomora.” Angeragö atö, haʼökhö nasa tola fariawö ndraʼugö ba mbanua niha Keriso?

19. Hawaʼara manö moguna tabeʼe ginötöda fariawö khö ndra talifusöda?

¹⁹ Tola manö omuso sibai dödö ndra talifusöda na fariawö ita khöra. Te so ba gotaluara zi göna fanaisi moroi ba nösi nomora si tenga si sara lala wamati samalua owasa ba ngaluo sebua. Ero röfi, so göi zorasoi faʼabu dödö börö me itörö tödöra wa ba ngaluo daʼö mate woʼomora mazui ösi nomora tanö böʼö. Na öbeʼe ginötöu fariawö khö ndra talifusöda sorasoi abula dödö simane daʼö, no öforomaʼö wa ’öʼameʼegö tödö ira soroi ba dödö’.​—Fil. 2:20.

20. Na tarasoi wa hulö zi lö hadöi awö-awöda, hewisa wa tola möi fanoloda wehede Yesu nisura ba Mataiʼo 12:48-50?

²⁰ Oya mbörö wa itaria tarasoi wa hulö zi lö hadöi awö-awöda. Hizaʼi, böi olifu ita wa sindruhu-ndruhu aboto ba dödö Yehowa hadia nirasoida. Sasesenia, iʼogunaʼö ndra talifusöda ba wangabölöʼö yaʼita. (Baso Mataiʼo 12:48-50.) Börö daʼö, si tobali tandra wa taʼandrö saohagölö khö Yehowa, taforege ba wanolo ira talifusöda. Na tarasoi wa hulö zi lö hadöi awö-awöda, moguna tatörö tödöda wa sindruhunia so nawöda, börö me lö tebulö fao khöda Yehowa!