Tumbu ndraʼo me 19 mbaŵa si Lima 1940 ba mbanua Amioûn, Lebanon. Ba zi hauga fakhe aefa daʼö, findra ndraʼaga ba mbanua Tripoli. Ba daʼö teʼebuaʼö ndraʼo. So waʼomuso dödö ba nösi nomogu, ba faoma maʼomasiʼö nawöma. Teʼebuaʼö ndraʼo ba zindruhu. Yaʼodo andre ono siakhi moroi ba zi dalima zi fatalifusö, datölu nono alawe ba darua nono matua. Ba wamaigi ndra satuagu, tenga fangalui kefe zabölö moguna. Sabölö moguna ba nösi nomoma yaʼia daʼö famahaʼö ba Zura Niʼamoniʼö, feʼamöi ba gangowuloa, hegöi ba wanolo niha böʼö enaʼö aboto ba dödöra Lowalangi.

Me föna, so ösa niha nibayoini ba mbanua niha Keriso si farahu yaʼaga. Samösa moroi ba gotaluara yaʼia daʼö Michel Aboud, sondröniaʼö famahaʼö Zura Niʼamoniʼö ba mbanua niha Keriso. Iʼila zindruhu me so ia ba New York, ba ibörögö manuriaigö ia ba Lebanon me döfi 1921. Itörö tödögu wa sökhi sibai lagunia khö ndra talifusöda ira alawe si darua lulusan Gilead sotöi Anne hegöi Gwen Beavor. Iforomaʼö wa iʼameʼegö tödö sibai ira. Tobali ira si fahuwu khöma. Ba zi hauga fakhe aefa daʼö, omuso sibai dödögu me falukhado khö Anne ba Amerika Serikat. Lö  ara aefa daʼö, falukhado göi khö Gwen, si no mangowalu khö Wilfred Gooch ba sangai halöwö ba Mbetieli London ba Inggris.

Me awuyu-wuyu ndraʼo, lö ato ndra Samaduhuʼö ba Lebanon. Hizaʼi, owölö-ölö ndraʼaga ba wamahaʼö niha sanandrösa ba Zura Niʼamoniʼö, hewaʼae na so wanaisi moroi khö ndra sondröniaʼö ba agama. So ösa nifaluara si lö irai uʼolifugö.

Samuza maʼökhö, faodo manuriaigö khö gaʼagu alawe sotöi Sana ba zi sambua apartemen. Ba zi lö mudöna-döna, tohare samösa wandrita. Tola manö so zogaoni yaʼia. Ibörögö ilele-lele gaʼagu fandrita andrö. Baero daʼö, ibörögö fabözi ia ba ituliʼö Sana irege alabu ia moroi ba nora. Lua-luania, mesokho Sana. Hizaʼi, so zotelefo folisi. Tohare wolisi ba laʼalui niha sanolo Sana. Aefa daʼö, laʼohe wandrita andrö ba gödo wolisi. Ba me lafareso ia, lasöndra khönia wana. Imane khönia kafalo wolisi, ”Yaʼugö andre sondröniaʼö ba agama mazui kafalo farema?”

Itörö göi tödögu me lasewa moto ira talifusöda ba mbanua niha Keriso weʼamöi manuriaigö ba mbanua saröu. Fakhamö marasoi waʼomuso dödö fatua lö iʼila si samösa fandrita wa manuriaigö ndraʼaga ba mbanua andrö. Iʼowuloi niha sato, laʼailasi ndraʼaga, ba latebuga faoma kara. Mesokho bapagu. Itörö tödögu wa afönu do mbawania. Aefa daʼö, ifuli möi yawa ba moto ndra satuagu, ba faoga khöra. Me luo daʼö, ataʼu sibai ndraʼaga. Hizaʼi, imane mamagu me iʼosi ndro bapagu, ”He Yehowa, efaʼö zalara. Lö laʼila hadia nifaluara.” Lö irai uʼolifugö wehede mamagu andrö.

Itörö göi tödögu me mangawuli ndraʼaga ba mbanua si toröi kakegu. Ba nomo kakegu, falukha ndraʼaga khö zi samösa uskup nifosumange ba mbanua andrö. Iʼila wa Samaduhuʼö Yehowa ndra satuagu. Me luo daʼö, awena önö fakhe ndröfigu. Hizaʼi, imane khögu ba wangailasi yaʼo, ”Hana wa lö nasa si tebayagö idanö ndraʼugö?” Uwaʼö khönia wa iraono nasa ndraʼo, ba omasido tebayagö idanö na no oya waʼaboto ba dödö niʼokhögögu sanandrösa ba Zura Niʼamoniʼö ba uʼokhögö wamati saro. Lö omasi ia wanema li nibeʼegu. Börö daʼö, iwaʼö khö kakegu wa yaʼodo andre iraono si lö mangila huku.

Sindruhunia, lö asese alua zimane daʼö. Ato niha Lebanon si sökhi amuata ba somasi manemaʼö tome. Börö daʼö, tola manuriaigö ndraʼaga ba niha sato si so ba Lebanon, ba ato moroi ba gotaluara zomasi mamahaʼö yaʼira ba Zura Niʼamoniʼö.

Me sekola nasa ndraʼo, so samösa dalifusöda ira matua moroi ba Venezuela si möi ba Lebanon. Iʼondrasi gangowuloa nifalua ba mbanua niha Keriso si farahu yaʼaga. Ba gafuriata, fakawa ia khö gaʼagu alawe sotöi Wafa. Aefa daʼö, mangowalu ira ba toröi ira ba Venezuela. Asese ifaʼoheʼö khöma zura, ba ifarou dödö bapagu enaʼö findra ndraʼaga ba Venezuela, börö me omasi sibai ia falukha khöma. Börö daʼö, mahalö gangetula findra ba Venezuela.

 Marugi Venezuela me döfi 1953, ba toröi ndraʼaga ba Caracas, ahatö ba gödo presiden. Börö me awuyu-wuyu nasa ndraʼo me luo daʼö, omuso sibai dödögu na uʼila moto presiden sanörö föna nomoma. Hizaʼi, abua sibai khö ndra satuagu ba wamaudugö faʼaurira ba soi, li, si toʼölö mufalua, ö, hegöi cuaca ba daʼö. Me ibörögö tola lafaudugö waʼaurira, alua khöma gabula dödö.

Mofökhö bapagu. Lö madöna-döna wa alua daʼa, börö me lö fökhö-fökhö bapagu ba zilalö ba abölö ia. No saʼae olifu ndraʼaga hamega safuria sibai mofökhö ia. Hizaʼi sindruhunia, no göna ia fökhö kanker pankreas, ba lö tola löʼö laʼoperasi ia. Samigu aefa daʼö, mate bapagu.

Lö uʼila ututunö waʼabu dödö nirasoima me luo daʼö. Awena 13 fakhe ndröfigu. Lö irai matötöna wa mate bapagu. Lö maʼila göi hewisa waʼaurima me no iröi ndraʼaga. Ba wamobörö, itaria lö faduhu dödö mamagu wa no mate bapagu. Hizaʼi, aboto ba dödöma wa fasala na marörö ndraʼaga ba waʼabu dödö, ba itolo ndraʼaga Yehowa ba wanaögö salua andrö. Ba gafuriata, me 16 fakhe ndröfigu, lulus ndraʼo moroi ba zekola si so ba Caracas, ba omasido sibai mohalöwö ba wotuhini ösi nomogu.

Me luo daʼö göi, mangowalu gaʼagu alawe sotöi Sana khö Rubén Araujo, sawena mangawuli ba Venezuela me no aefa lulus ia ba Sekolah Gilead. Me no mangowalu ira, findra ira ba New York. Lahalö gangetula ira ösi nomogu wa moguna möido kuliah. Börö daʼö, findra ndraʼo ba New York. Ba daʼö, toröi ndraʼo ba nomo gaʼagu hegöi foʼomonia. Yaʼira zanolo yaʼo ba wangokhögö fahuwusa saro khö Yehowa. Baero daʼö, ato ndra talifusöda saro ba wamati ba mbanua niha Keriso sangogunaʼö li Spanyol si so ba Brooklyn. Duma-dumania, Milton Henschel hegöi Frederick Franz, sangai halöwö ba Mbetieli Brooklyn.

Me no arakhagö döfi kuliah ndraʼo ba New York, ibörögö uʼangeragö sanandrösa ba waʼaurigu. Me luo daʼö, asese uʼangeragö artikel si so ba majalah Menara Pengawal, sanutunö sanandrösa ba niha Keriso sangokhögö ohitö dödö ba wamati. Na ufaigi, omuso sibai dödö ndra perintis hegöi ösi nomo Mbetieli si so ba mbanua niha Keriso si farahu yaʼaga, ba omasido göi urasoi zimane daʼö. Hizaʼi, lö nasa si tebayagö ndraʼo idanö me luo daʼö. Aboto ba dödögu wa moguna ululu waʼaurigu khö Yehowa. Daʼö nifaluagu, ba tebayagö ndraʼo idanö me 30 mbaŵa si Tölu 1957.

Me no tebayagö ndraʼo idanö, ibörögö uʼera-era wangai halöwö safönu inötö. Omasido sibai tobali perintis, hizaʼi uʼila wa tenga saoha wamalua daʼö. Manofu-nofu dödögu, ’Hewisa wa tola ulau merintis ba ginötö kuliah nasa ndraʼo?’ Faoma mafaʼoheʼö zura ösi nomogu. Ba zura nifaʼohegu, ututunö khöra wa omasido uböhöli kuliahgu, ufulido ba Venezuela, ba ulau merintis.

 Mangawulido ba Caracas me baŵa si Önö 1957. Hizaʼi me luo daʼö, lö tebönökhi zoguna ba nösi nomogu, ba moguna so samösa tö zohalöwö ba wangalui soguna. Me luo daʼö, lakaoni ndraʼo wohalöwö ba bank, hizaʼi omasido sibai göi ulau merintis. Sindruhunia, daʼö gohitö dödögu wa mangawulido ba Venezuela. Ba gafuriata, uhalö gangetula ba wohalöwö safönu inötö ba bank, ba ulau göi merintis. Ufalua daʼö ba zi hauga fakhe faʼara. Oya sibai halöwögu, hizaʼi urasoi waʼomuso dödö!

Omuso sibai göi dödögu me falukhado khö Sylvia, samösa talifusöda ira alawe si baga-baga sangomasiʼö Yehowa moroi ba Jerman. Findra ia hegöi ira satuania ba Venezuela. Ba gafuriata, mangowalu ndraʼaga, ba tumbu khöma nono matua sotöi Michel (Mike), ba samösa nono alawe sotöi Samira. Urorogö göi mamagu, ba toröi ia ba nomoma. Sindruhu sa, moguna uböhöli merintis börö me so noro dödögu yomo ba nomo. Hizaʼi, lö tebulö owölö-ölö ndraʼo weʼamöi manuriaigö. Merintis ekstra ndraʼo hegöi Sylvia ero na libur ndraʼo ba halöwögu.

Simane nitutunögu ba wamobörö, oya niʼangeragögu sanandrösa ba waʼaurigu. Me luo daʼö, sekola nasa ndraonogu. Ohahau dödöma ba waʼauri, ba lafosumange ndraʼo ira sohalöwö ba bank. Hizaʼi sindruhunia, omasido na laʼila niha wa yaʼodo andre ono mbanua Yehowa. Lö tebulö uʼangeragö hadia zinangea ufalua. Börö daʼö, matutunö foʼomogu sanandrösa ba wombönökhi soguna khöma. Na uböhöli wohalöwö, hasambalö labeʼe khögu pesangon. Börö me lö hadöi ömöma, tola ibönö gefema ba wombönökhi soguna khöma ba zi hauga fakhe faʼara na maʼöna-önaiʼö waʼaurima.

Tenga saoha wangai angetula simane daʼö, hizaʼi ituhini gangetula nihalögu andrö foʼomogu hegöi mamagu. Börö daʼö, omasido na ifuli merintis ndraʼo. Omuso sibai dödögu! Hizaʼi lö ara aefa daʼö, matema duria si lö mudöna-döna.

Samuza inötö, ifatunö doto wa manabina Sylvia. Tokea sibai ndraʼaga me marongo daʼö! Omuso sibai dödöma, hizaʼi manofu-nofu dödögu, ’Hadia tola merintis ndraʼo?’ Hewaʼae simanö, no tefaʼanö ndraʼaga ba wanemaʼö ösi nomoma si bohou. Hizaʼi me luo daʼö, aombö nasa dödögu hadia tola ulau merintis.

Me no mafatunöisi, mahalö gangetula ba wamalua hadia zi no matatugöi ba zilalö. Tumbu  khöma nono matua sotöi Gabriel me baŵa si Öfa 1985. Aefa daʼö, uböhöli wohalöwö ba bank, ba ibörögö merintis ndraʼo me baŵa si Önö 1985. Ba gafuriata, mufataro ndraʼo tobali anggota Panitia Cabang. Hizaʼi, tenga ba Caracas so gödo ndraha Venezuela. Börö daʼö, ba zi dua kali mazui tölu kali samigu, moguna möido ba Mbetieli, faʼaröunia mato 80 kilometer numalö mangawuli.

Ba mbanua La Victoria so gödo ndraha Venezuela. Börö daʼö, mahalö gangetula ösi nomogu enaʼö findra ndraʼaga ba daʼö irege tola ahatöga ba Mbetieli. Tebulö sibai waʼaurima börö gangetula andrö. Uʼandrö sibai saohagölö börö me latuhini ndraʼo ösi nomogu. Omasi gaʼagu ira alawe sotöi Baha ba wondrorogö inama. Me luo daʼö, no mangowalu Mike, hizaʼi ba nomoma nasa toröi Samira hegöi Gabriel. Börö me findra ndraʼaga ba La Victoria, moguna laröi ndra awö-awöra si so ba Caracas. Baero daʼö, lö tola löʼö ifaudugö waʼaurinia Sylvia ba mbanua side-ide. Moguna göi mafaudugö waʼaurima börö me ba nomo side-ide toröi ndraʼaga iadaʼa. Sindruhu-ndruhu wa oya sibai zinangea mafaudugö me findra ndraʼaga moroi ba Caracas numalö ba La Victoria.

Hizaʼi, so nasa zi tebulö aefa daʼö. Mangowalu Gabriel, ba lö saʼae toröi ba nomoma Samira. Aefa daʼö, lakaoni ndraʼo hegöi Sylvia ba wangai halöwö ba Mbetieli me döfi 2007, ba irugi iadaʼa lö tebulö mangai halöwö ndraʼaga ba Mbetieli. Mangai halöwö nonoma siaʼa sotöi Mike tobali satua sokubaloi, ba merintis göi ia hegöi foʼomonia sotöi Monica. No göi tobali satua sokubaloi Gabriel, ba mangai halöwö ia hegöi foʼomonia sotöi Ambra ba Italia. Baero daʼö, ilau merintis Samira ba ilului halöwö ba Mbetieli tobali relawan jarak jauh.

No oya gangetula si tohude nihalögu ba waʼaurigu. Hizaʼi, lö irai maniasa ndraʼo. Na ifuli tebeʼe khögu ginötö ba wangai angetula, hasambalö uhalö gangetula si fagölö. Uʼandrö sibai saohagölö fefu zi no ufalua khö Yehowa. Sagötö ufosumange ia, aboto ba dödögu wa moguna uʼokhögö wahuwusa saro khönia. Ero na tahalö gangetula sebua mazui side-ide, hasambalö ibeʼe khöda Yehowa waʼohahau dödö ”sabölö moroi ba gera-era niha fefu”. (Fil. 4:6, 7) Omuso sibai dödögu hegöi Sylvia ba wangai halöwö ba Mbetieli. Marasoi wa ifahowuʼö fefu gangetula nihalöma Yehowa, börö me lö tebulö maʼofönaiʼö ia ba waʼaurima.