1. Hana wa tola tafagölösi Zatana andrö simane si samösa sialu?

OMASI zi samösa sialu ba wondraʼu mazui ba wamunu si sageu urifö. Oya ngawalö dandrawa niʼogunaʼönia, farahu ba daʼö dandrawa si no mututunö ba Zura Niʼamoniʼö. (Yob. 18:8-10) Hadia nifalua zi samösa sialu ba wamaʼala si sageu urifö? Inehe-nehegö gurifö andrö. Duma-dumania, ifaigi-faigi hezo numalö gurifö andrö, hadia zadöni dödönia, ba hadia dandrawa sabölö tefaudu si tola muʼogunaʼö. Hulö simane sialu andrö Zatana. Ifaigi-faigi hezo numalö ita ba hadia zadöni dödöda. Aefa daʼö, ifasa dandrawa si tola mamaʼala yaʼita ba zi lö tadöna-döna. Hizaʼi, ifatunö khöda Sura Niʼamoniʼö wa tola teʼefaʼö ita moroi ba dandrawa andrö, hewaʼae na no irai alau ita ba daʼö. Ifahaʼö ita göi hewisa enaʼö lö alau ita ba dandrawa Zatana.

2. Hadia dandrawa sabölö mofozu niʼogunaʼö Zatana?

² Dombua dandrawa sabölö mofozu niʼogunaʼö Zatana yaʼia daʼö fayawasa ba fakhögusa. * Ba zi hauga ribu fakhe faʼara, no mofozu Zatana ba wangogunaʼö tandrawa si dombua andrö. Hulö zamaʼala fofo ia, ibeʼe lakhö enaʼö alau ita ba dandrawania mazui ifaʼuʼu ita bakha ba guʼö. (Si. 91:3) Hizaʼi, tola mangelama ita faböi aekhu ba dandrawa Zatana. Hadia mbörö? Börö me no ihenaigö ifatunö khöda Yehowa hadia manö nifalua Zatana ba wamaʼala yaʼita.​—2 Ko. 2:11.

3. Hana wa ibeʼe Yehowa ba Zura Niʼamoniʼö duma-duma niha sangoromaʼö fayawasa ba fakhögusa?

 ³ Enaʼö aboto ba dödöda hadia deʼala si tola alua na so khöda wayawasa ba fakhögusa, itutunö khöda Yehowa zi no irai alua ba nono mbanuania. Tola mofozu Zatana ba wamaʼala niha si no ara mamosumange Yehowa. Hadia daʼö geluahania wa hasambalö alau ita ba dandrawania? Tenga. Ibeʼe khöda duma-duma andrö Yehowa ba Zura Niʼamoniʼö si tobali ”famangelama khöda”. (1 Ko. 10:11) Aboto ba dödönia wa tola tatimbagö mazui taʼefaʼö ita moroi ba dandrawa Gafökha na tafahaʼö ita moroi ba duma-duma wamangelama andrö.

4. Hadia lua-luania na so khöda wayawasa?

⁴ Omasi Zatana na fayawa ita. Aboto ba dödönia wa tola tobali simane yaʼia ita ba taya khöda dötönafö faʼauri si lö aetu na so khöda wayawasa. (Amd. 16:18) Börö daʼö, ifangelama ita Faulo wa niha si fayawa andrö hasambalö ”itema wanguhuku simane si göna khö Gafökha”. (1 Ti. 3:6, 7) Tola alua khöda daʼö, he na awena tebayagö ita idanö hegöi na no hauga fakhe tobali ita samosumange Yehowa.

5. Simane nitutunö ba Zangombakha 7:16, 20, hadia zangoromaʼö wa fayawa zi samösa niha?

⁵ Niha si fayawa andrö ha tana khönia niʼera-erania. Iforege Satana ba wondrönisi tödöda enaʼö ha ba zoguna khöda samösa taʼosambuaʼö dödöda, tenga khö Yehowa, mendrua manö na göna ita abula dödö. Duma-dumania, hadia no irai laböbögö khöu zi lö duhu mazui lafalua khöu zi lö atulö? Na alua khöu zimane daʼö, omasi Zatana na ötahigö Yehowa mazui ira talifusöda. Omasi göi ia na ömane tödöu wa abölö sökhi na öʼodaligö waʼatua-tuau samösa ba wangasiwai abula dödömö andrö, moroi na öʼoʼö wanuturu lala Yehowa ba Daromalinia.​—Baso Zangombakha 7:16, 20.

6. Hadia wamahaʼö si tola tahalö moroi ba zalua khö zi samösa talifusöda si toröi ba Belanda?

⁶ Nehegö atö zi no irai alua khö dalifusöda ira alawe si toröi ba Belanda. Mofönu ia khö ndra talifusöda tanö böʼö si no fasala khönia, irege lö omasi ia fariawö khöra saʼae.  Imane wanutunö, ”Urasoi wa lö awö-awögu ba lö iʼila taya waʼabao dödögu. Börö daʼö, uʼandrö khö woʼomogu enaʼö findra ndraʼaga ba mbanua niha Keriso tanö böʼö.” Hizaʼi ba gafuriata, ifaigi video JW Broadcasting^® baŵa si Tölu 2016. Oya mene-mene nisöndrania ba video andrö sanandrösa ba wangefaʼö sala niha böʼö. Imane talifusöda andrö, ”Aboto ba dödögu wa abölö sökhi na utörö zindruhu ba wamareso salagu si fao fangide-ngideʼö, moroi na ubulöʼö gamuata ndra talifusöda ba mbanua niha Keriso. Video daʼö zanolo yaʼo ba wangosambuaʼö tödögu khö Yehowa hegöi ba kuaso niʼokhögönia.” Hadia wamahaʼö si tola öhalö? Na so wanandraigö salua khömö, böi tebulö öʼosambuaʼö dödöu khö Yehowa. Andrö khönia wanolo enaʼö öʼokhögö lala wangera-ngera si tefaudu sanandrösa khö ndra talifusöda, simane niʼokhögönia. Hewaʼae iʼila Amada si so ba zorugo zala nifaluara, omasi ia iʼefaʼö zalara andrö. Omasi göi ia na öfalua zimane daʼö.​—1 Yo. 4:20.

7. Hadia zalua khö Razo Usia?

⁷ Oya zi no ikhamö Razo Usia ba waʼaurinia. Börö me ”ifahowuʼö ia Lowalangi sindruhu”, mofozu ia ba wasuwöta, ba halöwö fangotomosi, ba ebolo göi kabu niʼokhögönia. (2 Ng. 26:3-7, 10) Hizaʼi, imane Sura Niʼamoniʼö, ”Me no monönö waʼabölönia, so khönia wayawasa irege daʼö zi tobali börö waʼatekikonia.” Lua-luania, lö ifondrondrongo mene-mene moroi ba niha böʼö, ba ifalua zi tenga halöwönia. Moloʼö oroisa Yehowa, ha ira ere zi tola manunu sumange somuhua ba gosali. Hizaʼi, börö wayawasa Razo Usia, möi ia itunu zumange somuhua ba gosali. Lua-luania, mofönu sibai Yehowa, ba ibözi ndra matua si fayawa andrö faoma bou auri. Lö aheta khö Usia mbou auri irugi waʼamatenia.​—2 Ng. 26:16-21.

8. Simane nitutunö ba 1 Korindro 4:6, 7, hewisa enaʼö lö tumbu ba dödöda wayawasa?

⁸ Hadia tola göi tumbu ba dödöda wayawasa irege tafalua horö simane nifalua Usia? Nehegö atö zalua khö José. Mofozu ia ba wangalui kefe sebua, ba mangai halöwö göi ia tobali satua sokubaloi nifosumange ndra talifusöda ba mbanua niha Keriso. Asese ifaʼema huhuo ba gangowuloa sebua, ba laʼandrö khönia mene-mene ira satua samasui. Hizaʼi imane José, ”Börö me talafo ufaduhusi tödö waʼabölögu hegöi faʼatua-tuagu, lö saʼae uʼodaligö Yehowa. Uwaʼö tödögu wa no aro ndraʼo ba wamati ba lö saʼae moguna ufondrondrongo wamangelama  hegöi mene-mene moroi khö Yehowa.” Lua-luania, aekhu José ba horö sebua ba muʼefasi ia moroi ba mbanua niha Keriso. Me hauga fakhe silalö, ifuli mutemaʼö ia. Imane wanutunö, ”Ifahaʼö ndraʼo Yehowa wa sabölö moguna tenga noro dödö niʼokhögöda, hizaʼi famalua somasi ia.” Böi olifu ita wa moroi khö Yehowa fefu waʼatua-tua hegöi halöwö si tohude niʼokhögöda ba mbanua niha Keriso. (Baso 1 Korindro 4:6, 7.) Na fayawa ita, lö iʼogunaʼö ita Yehowa.

9. Hadia nifalua Zatana hegöi Khawa börö me so khöra wakhögusa?

⁹ Na taʼangeragö sanandrösa ba wakhögusa, iʼanemaiʼö itörö tödöda Gafökha Satana. Me tobali ia malaʼika Yehowa, oya halöwö si tohude nibeʼe khönia. Hizaʼi, omasi ia zi töra moroi ba daʼö. Itötöna enaʼö yaʼia nifosumange, tenga Yehowa. Omasi göi Zatana na tobali ita simane yaʼia. Börö daʼö, iforege enaʼö lö ahono dödöda ba zi no so. Daʼö nifaluania me fahuhuo ia khö Khawa. Sindruhunia, si fao faʼomasi, no fahöna gö nibeʼe Yehowa khö Khawa hegöi foʼomonia. Tola laʼa ”fefu mbua geu si so ba kabu” andrö, ba ha sageu zi lö itehegö khöra Yehowa. (1 Mo. 2:16) Hizaʼi, ilimo Khawa Satana enaʼö iwaʼö tödönia wa moguna iʼa mbua geu si lö itehegö Yehowa andrö. Lö mangandrö saohagölö Khawa ba zi no so, omasi ia zi töra moroi ba daʼö. Lua-luania, aekhu ia ba horö ba mate ia ba gafuriata.​—1 Mo. 3:6, 19.

10. Hadia zalua khö Razo Dawido börö me so khönia wakhögusa?

¹⁰ Oya zi no ibeʼe Yehowa khö Razo Dawido, simane faʼakayo, faʼatehöngö, ba faʼamöna ba wolawa udunia. Si fao fangandrö saohagölö, ifaduhuʼö Dawido wa buala Lowalangi andrö ”talafo oya na mudunö-dunö”. (Si. 40:5) Hizaʼi, börö wakhögusa, olifu Dawido fefu zi no ibeʼe khönia Yehowa andrö. Lö ahono dödönia ba zi no so, omasi ia zi töra moroi ba daʼö. Hewaʼae na ato woʼomo Dawido, itehegö tumbu ba dödönia gisö-isö dödö si fasala khö Mbaseba, foʼomo Guria niha Kheti. Börö wakhögusa, orudu Dawido khö Mbaseba, irege abeto ndra alawe andrö. Ba tenga ha daʼö, iʼalui göi lala enaʼö mate Guria! (2 Sa. 11:2-15) Hana wa ifalua daʼö Dawido? Hadia iwalinga lö iʼila-ila daʼö Yehowa? Hewaʼae na no ara tobali samosumange Yehowa Dawido, itehegö tumbu ba dödönia wakhögusa irege alua khönia ngawalö gabula dödö. Ba gafuriata,  ifaduhuʼö Dawido wa no ifalua horö ba ifalalini gera-erania. Tatu iʼandrö sibai saohagölö me iʼefaʼö zalania Yehowa!​—2 Sa. 12:7-13.

11. Moloʼö Efeso 5:3, 4, hadia zanolo yaʼita ba wanimbagö fakhögusa?

¹¹ Hadia wamahaʼö si tola tahalö ba zalua khö Dawido? Tola tatimbagö wakhögusa na lö tebulö taʼandrö saohagölö ba zi no ibeʼe khöda Yehowa. (Baso Efeso 5:3, 4.) Moguna ahono dödöda ba zi no so. Na ibörögö tafahaʼö niha ba Zura Niʼamoniʼö, tola manö tafarou dödöra ba woʼangeragö sambua howu-howu si no ibeʼe khöra Yehowa ba laʼandrö khönia saohagölö. Na lafalua daʼö ero maʼökhö ba zi samigu, eluahania so fitu ngawalö niʼandröra saohagölö khö Yehowa. (1 Te. 5:18) Hadia no göi öfalua zimane daʼö? Na öʼangerönusi fefu zi no ifalua khöu Yehowa, daʼö zanolo yaʼugö ba wangandrö saohagölö. Na öʼandrö saohagölö, tola ahono dödöu ba zi no so. Ba na ahono dödöu ba zi no so, lö tumbu ba dödöu wakhögusa.

12. Hadia nifalua Yuda Kariota börö me so khönia wakhögusa?

¹² Börö me so wakhögusa khö Yuda Kariota, ifalua zi lö sökhi ba tobali ia si manga mböli Yesu. Ba wamobörö, tenga simane daʼö gamuatania. (Luk. 6:13, 16) No ifili ia Yesu tobali sinengenia. Börö me onekhe ia ba tola mufaduhusi tödö, yaʼia nifili Yesu ba wololohe naha gefe. Iʼogunaʼö gefe daʼö Yesu hegöi ira sinengenia ba wombönökhi soguna khöra na möi ira manuriaigö. Tola tamane wangumaʼö, fagölö ia ba dolo-tolo niʼogunaʼö ba wotuhini halöwö fanuriaigö ba zi sagörö ulidanö iadaʼa. Hizaʼi ba gafuriata, managö Yuda, hewaʼae na no asese irongo wamangelama nifaʼema Yesu sanandrösa ba wakhögusa. (Mrk. 7:22, 23; Luk. 11:39; 12:15) Itimbagö wamangelama andrö Yuda.

13. Hamega itugu oroma wakhögusa khö Yuda?

¹³ Lö ara fatua lö mate Yesu, itugu oroma wa so wakhögusa khö Yuda. Samuza maʼökhö, fatome Yesu ba nomo Zimoni si no irai göna bou auri, fao khönia ndra nifahaʼönia, farahu ba daʼö Maria hegöi Marata. Sagötö wemangara, tohare Maria ba ifaduwa ba högö Yesu wanikha somuhua sebua böli. Mofönu sibai Yuda hegöi ira nifahaʼö tanö böʼö. Te lawaʼö tödöra ira nifahaʼö wa abölö sökhi na muʼogunaʼö gefe daʼö ba wanolo niha si numana. Hizaʼi, tenga daʼö mbörö wa mofönu Yuda. Börö me niha ’sanagö-nagö’ ia, omasi ia na mubeʼe gefe daʼö ba naha dolo-tolo enaʼö tola itagö. Ba gafuriata, börö me so khönia wakhögusa, iʼa mböli Yesu ha enaʼö labeʼe khönia gefe.​—Yoh. 12:2-6; Mat. 26:6-16; Luk. 22:3-6.

14. Hewisa zi sambua fongambatö ba wamalua mene-mene nisura ba Luka 16:13?

¹⁴ Ifasugi ba dödö ndra nifahaʼönia Yesu, ”Tebai tobali ami sawuyu Lowalangi ba sawuyu Ganaʼa göi.” (Baso Luka 16:13.) Atulö niwaʼönia andrö irugi mane maʼökhö. Duma-dumania, nehegö atö hewisa zi sambua fongambatö ba Rumania ba wamalua mene-mene Yesu andrö. Lawaʼö khöra wohalöwö ba soi böʼö. Lamane wanutunö, ”Ba wamobörö, mawaʼö tödöma wa no howu-howu moroi khö Yehowa halöwö daʼa, börö me ebua sibai woʼömöma ba bank.” Hizaʼi, tobali tandrawa khöra daʼö. Na latema halöwö daʼö, itugu alö ginötöra ba wamalua halöwö khö Yehowa. Me no awai labaso artikel ”Pertahankan Loyalitas dengan Kebulatan Hati” ba Menara Pengawal 15 Mbaŵa si Walu 2008, tola lahalö gangetula si tefaudu. Lamane, ”Na findra ndraʼaga ba soi böʼö ha enaʼö masöndra gefe sebua, lö saʼae maʼofönaiʼö wamosumange Yehowa ba waʼaurima. Faduhu dödöma, hasambalö tekiko wahuwusama khö Yehowa na mafalua daʼö.” Börö daʼö, lö latema halöwö andrö. Hadia zalua ba gafuriata? Isöndra halöwönia talifusöda ira matua andrö ba soira samösa, si tola mamönökhi  soguna khöra. Imane foʼomonia, ”Lö tebulö itolo nono mbanuania Yehowa.” Omuso dödö zi sambua fongambatö andre börö me tobali ira sawuyu Yehowa, tenga sawuyu ganaʼa.

15. Hana wa faduhu dödöda wa tola aefa ita moroi ba dandrawa Zatana?

¹⁵ Na taʼila wa ibörögö so khöda wayawasa mazui fakhögusa, hadia zinangea tafalua? Moguna taforege enaʼö aefa ita moroi ba dandrawa andrö! Iwaʼö Faulo wa tola taʼefaʼö ita moroi ba dandrawa Gafökha, hewaʼae na no irai ifaʼala ita. (2 Ti. 2:26) Daʼö zalua khö Dawido. Börö me no ifondrondrongo mene-mene nibeʼe Natano, tola iheta khönia wakhögusa ba ifuli sökhi wahuwusania khö Yehowa. Böi olifu ita, abölö nasa Yehowa moroi khö Zatana. Börö daʼö, na tatema wanolo moroi khö Yehowa, tola aefa ita moroi ba ngawalö dandrawa Zatana.

16. Hadia zanolo yaʼita ba wanimbagö tandrawa Zatana?

¹⁶ Sindruhu sa, tola taʼefaʼö ita moroi ba dandrawa Zatana. Hewaʼae simanö, abölö sökhi na lö alau ita ba daʼö. Tola tatimbagö dandrawa andrö ha börö wanolo moroi khö Lowalangi. Hizaʼi, böi abeʼe dödöda ba waʼabölöda samösa! Niha si no ara mamosumange Yehowa manö, tola tumbu ba dödönia wayawasa mazui fakhögusa. Börö daʼö, andrö khö Yehowa ero maʼökhö enaʼö itolo ndraʼugö ba wamareso era-erau hegöi amuatau, irege tola öʼila hadia no ibörögö tumbu ba dödöu wayawasa mazui fakhögusa. (Si. 139:23, 24) Forege enaʼö lö tumbu ba dödöu mbua-bua si lö sökhi andrö!

17. Hadia zi lö ara tö alua khö Gafökha?

¹⁷ No tobali sialu Zatana ba zi hauga ribu fakhe faʼara. Hizaʼi ba zi lö ara tö, hasambalö murate ia ba tehori ba gafuriata. (Fam. 20:1-3, 10) Tatu tadöna-döna sibai waʼalua daʼö. Gasa-gasa fombaloida, böi tebulö mangelama ita faböi aekhu ba dandrawa Zatana. Taforege ba wanimbagö fayawasa hegöi fakhögusa. Datahalö gangetula ba ’wolawa Afökha’, ba hasambalö ’iröi ita’.​—Yak. 4:7.