1. Hadia zinangea lafalua ira niha sato sowulo ba Yeruzalema?

ATO sibai ndra matua hegöi ira alawe sowulo ba Yeruzalema me abad siföföna. Tohare ira moroi ba ngawalö soi ba no faböʼö-böʼö li niʼogunaʼöra. Aefa daʼö, alua zahöli-höli dödö. Ba zi lö mudöna-döna, so ngawawa niha Yahudi si tola fahuhuo ba li niʼogunaʼö niha si tohare andrö. Hizaʼi, so nasa zabölö ahöli-höli dödöda. Nehegö atö hadia niwaʼö ndra niha Yahudi andrö hegöi sinenge sotöi Fetero. Lafatunö ba niha sato wa tola latema wangorifi na mamati ira khö Yesu Keriso. Toröi-röi sibai ba dödöra duria andrö irege manofu ira, ”Hadia zinangea mafalua?” Imane khöra Fetero, ”Mifabayagöʼö ami idanö.”​—Hal. 2:37, 38.

2. Hadia nitutunöda ba artikel daʼa? (Faigi gambara ba guli majalah.)

² Ahöli-höli sibai göi dödöda me taʼila hadia zalua aefa daʼö. So mato 3.000 niha nibayagö idanö ba tobali ira nifahaʼö Keriso. Iʼotarai daʼö, lö tebulö lafalua goroisa nibeʼe Yesu ira soloʼö khönia ba wombaliʼö nifahaʼö. Lö tebulö mufalua halöwö sebua andre irugi maʼökhö. Hizaʼi ba götöda andre, tebai tatolo zi samösa niha irege tebayagö idanö ha ba zi hauga za. Moguna khöda ginötö mato hauga waŵa, döfi, mazui töra irege tola tebayagö idanö zi samösa niha. Tenga halöwö saoha wombaliʼö nifahaʼö. Tola manö no örasoi samösa daʼö me ödöniaʼö wamahaʼö ba Zura Niʼamoniʼö khö zi samösa niha. Börö daʼö, tatutunö dania ba artikel daʼa hewisa lalau ba wanolo niha nifahaʼöu ba Zura Niʼamoniʼö enaʼö tedou ia ba wamati ba tebayagö idanö.

3. Moloʼö Mataiʼo 28:19, 20, hadia zinangea ifalua niha nifahaʼöda ba Zura Niʼamoniʼö enaʼö tola tebayagö ia idanö?

³ Fatua lö tebayagö idanö niha nifahaʼöda ba Zura Niʼamoniʼö, moguna ifalua hadia zi no ifahaʼö yaʼia. (Baso Mataiʼo 28:19, 20.) Na ifalua daʼö, fagölö ia simane ”niha satua-tua” ba gamaedola nitutunö Yesu. Iʼabakhaiʼö wogao fondrasi enaʼö tola ifasindro nomonia ba dete gara. (Mat. 7:24, 25; Luk. 6: 47, 48) Hewisa wanoloda niha nifahaʼöda ba Zura Niʼamoniʼö? Datatutunö tölu lala si tola tafalua.

4. Hewisa lalada ba wanolo niha nifahaʼöda ba Zura Niʼamoniʼö enaʼö tedou ia ba wamati irege tebayagö idanö? (Faigi göi kotak ” Tolo Niha Nifahaʼöu ba Wotatugöi hegöi ba Wogamö Ohitö Dödönia”.)

⁴ Tolo niha nifahaʼöu ba wotatugöi ohitö dödönia. Hana wa moguna öfalua daʼö? Khalaigö atö na ötörö moto weʼamöi ba mbanua saröu. Enaʼö lö örasoi wa fandröndröu sibai lala nitöröu, tola manö molombase ndraʼugö mato hauga kali ba nahia si sökhi famaigi. Simanö göi, na no itatugöi niha nifahaʼöu gohitö dödö si tola ikhamö ba waʼalio ba mofozu ia wamalua daʼö, tola aboto ba dödönia wa tenga zi tebai ikhamö gohitö dödönia enaʼö tebayagö idanö. Ogunaʼö kotak ”Tandraigö Falua Daʼa” si so ba mbuku Lala ba Wanöndra Faʼohahau Dödö Sagötö Faʼara! ba wanolo niha nifahaʼöu enaʼö tedou ia ba wamati. Ero na miʼasiwai zi sambua famahaʼö, tutunö khönia wa tola ifalua wamahaʼö si no itema na iʼoʼö wanuturu lala si so ba kotak andrö. Na omasiʼö öbeʼe khönia wanuturu lala tanö böʼö, tola ösura daʼö ba gamaudu ”Tanö Böʼö”. Ero na ofeta ami ba kotak daʼö, tutunö hadia manö gohitö dödö si tola ikhamö ba waʼalio hegöi ohitö dödönia ba zi so miföna.

5. Moloʼö Mareko 10:17-22, hadia niʼandrö Yesu khö zi samösa ira matua si kayo, ba hadia mbörö?

⁵ Tolo niha nifahaʼöu ba wombulöʼö lala waʼaurinia. (Baso Mareko 10:17-22.) Aboto ba dödö Yesu wa abua ba niha si kayo ba wamawa fefu gokhötania. (Mrk. 10:23) Hewaʼae simanö, iʼandrö Yesu khö zi samösa ira matua si kayo ba wombulöʼö lala waʼaurinia. Hadia mbörö? Börö me iʼomasiʼö ia Yesu. Hewisa göi ita? Aboto ba dödöda wa moguna tafarou dödö niha nifahaʼöda ba wamalua hadia zi no ifahaʼö yaʼia. Hizaʼi, itaria tataha-taha wamalua daʼö börö me tawaʼö tödöda wa lö nasa si tefaʼanö ia ba wombulöʼö lala waʼaurinia. Sindruhu sa wa moguna khönia  ginötö ba wamöhöli amuata si fasala si toʼölö ifalua hegöi ba wamohouni amuatania. (Kol. 3:9, 10) Hizaʼi, na iʼanemaiʼö öfatunö khönia hadia manö zinangea ibulöʼö, tola manö iʼanemaiʼö ifalua daʼö niha nifahaʼöu. Na öfalua daʼö, no öforomaʼö wa öʼomasiʼö ia.​—Si. 141:5; Amd. 27:17.

6. Hana wa moguna tabeʼe wanofu-nofu ba niha nifahaʼöda?

⁶ Enaʼö tola itutunö nösi dödönia niha nifahaʼöu ba Zura Niʼamoniʼö, moguna öbeʼe khönia wanofu-nofu. Na öfalua daʼö, tola öʼila hadia zaboto ba dödönia hegöi nifaduhusinia tödö. Na asese öʼandrö mbua gera-erania, tola aoha khöu wanutunö tuho sambö fatema ba dödönia. Oya wanofu-nofu si tola öʼogunaʼö ba mbuku Lala ba Wanöndra Faʼohahau Dödö Sagötö Faʼara! Duma-dumania, ba wamahaʼö si 04 so wanofu, ”Moloʼö yaʼugö, hewisa dödö Yehowa na öʼogunaʼö döinia?” Ba wamahaʼö si 09 so göi wanofu, ”Hadia manö zomasiʼö öʼohe ba wangandrö?” Ba wamobörö, tola manö abua ba niha nifahaʼöu ba wameʼe fanema li ba wanofu-nofu simane daʼö. Hewaʼae simanö, tola öfahaʼö ia ba wangai rahu-rahu moroi ba ayati hegöi gambara si no tefaʼanö.

7. Hewisa wangogunaʼöda waö-waö waʼauri ndra talifusöda ba wamarou tödö niha nifahaʼöda?

⁷ Na no aboto ba dödö niha nifahaʼöu hadia zinangea ifalua, tutunö khönia waö-waö waʼauri ndra talifusöda enaʼö terou dödönia ba wombulöʼö lala waʼaurinia. Ba mbuku Lala ba Wanöndra Faʼohahau Dödö Sagötö Faʼara! oya waö-waö waʼauri si tola ösöndra ba faosatö ”Odödögö Nasa Wangalui” mazui ”Alui Nasa Danö Böʼö”. * Duma-dumania, na abua ba niha nifahaʼöu ba Zura Niʼamoniʼö ba wangondrasi angowuloa, tola öforomaʼö khönia video Iʼameʼegö Tödö Ndraʼo Yehowa si so ba faosatö ”Alui Nasa Danö Böʼö” ba wamahaʼö si 14. Hizaʼi, böi faedo-faedogö ia ba niha böʼö mazui ömane khönia, ”Na tola ifalua daʼö, hasambalö wa tola göi öfalua.” Akha niha nifahaʼöu andrö zotatugöi hadia zinangea ifalua. Na no aefa mifaigi video, tutunö hadia manö zanolo niha si so ba video andrö ba wamalua goi-goi Zura Niʼamoniʼö. Te tola öfatunö hadia ayati mazui fanuturu lala sanolo niha si so ba video andrö. Na tola, abakhaiʼö wanutunö hewisa wanolo Yehowa niha daʼö.

8. Hewisa lalada ba wanolo niha nifahaʼöda ba wangomasiʼö Yehowa?

⁸ Tolo niha nifahaʼöu ba wangomasiʼö Yehowa. Hewisa lalau ba wamalua daʼö? Alui lala ba wanutunö khönia bua-bua Yehowa. Moguna aboto ba dödö niha nifahaʼöu wa Yehowa andrö Lowalangi somuso tödö ba hasambalö ifahowuʼö niha sangomasiʼö yaʼia. (1 Ti. 1:11; Heb. 11:6) Tutunö hadia manö mbua nitemania na ifalua goroisa Yehowa. Aefa daʼö, fatunö wa daʼö dandra waʼomasi Yehowa khönia. (Yes. 48:17, 18) Na itugu iʼomasiʼö Yehowa, tola itugu terou göi dödönia ba wombulöʼö faʼaurinia.​—1 Yo. 5:3.

9. Na so zinangea itehegö niha nifahaʼöu, hana wa tola möi fanolonia wehede nisura ba Mareko 10:29, 30?

⁹ Enaʼö tola tedou ba wamati niha nifahaʼöu irege tebayagö ia idanö, oya zinangea itehegö. Simane ira matua si kayo nitutunöda mege ba wamobörö, te moguna itehegö gokhötania niha nifahaʼöda. Na fatimba halöwönia ba goi-goi Zura Niʼamoniʼö, tola manö moguna iʼalui halöwö tanö böʼö. Baero daʼö, moguna göi iböhöli wariawösa khö ndra awö-awönia si tenga samosumange  Yehowa. Ba tola manö göi latiboʼö ia ira ösi nomonia si fatuwu khö ndra Samaduhuʼö Yehowa. Aboto ba dödö Yesu wa abua wanehegö fefu daʼö. Hizaʼi, tenga zaya-zaya gölö na ifalua daʼö niha nifahaʼöu, börö me no ifabuʼu Yesu ba niha soloʼö khönia wa hasambalö lasöndra nösi nomo ba wamati sangomasiʼö yaʼira. (Baso Mareko 10:29, 30.) Hewisa wanolou niha nifahaʼöu ba Zura Niʼamoniʼö enaʼö tola itema howu-howu si sökhi andrö?

10. Hadia wamahaʼö si tola öhalö moroi ba zi no irai alua khö Manuel?

¹⁰ Baliʼö ndraʼugö si fahuwu ba niha nifahaʼöu. Moguna irasoi niha nifahaʼöu wa öʼameʼegö tödö ia. Hadia mbörö? Nehegö atö zi no irai alua khö dalifusöda Manuel si toröi ba Meksiko. Imane wanutunö hewisa me ifahaʼö ia ba Zura Niʼamoniʼö, ”Fatua lö mabörögö wamahaʼö, hasambalö isofu duriagu talifusöda samahaʼö yaʼo. Daʼö mbörö wa lö alawö ndraʼo fahuhuo khönia. Tola urasoi wa sindruhu-ndruhu iʼameʼegö tödö ndraʼo.”

11. Hadia mbuania na tabeʼe ginötöda fariawö ba niha nifahaʼöda?

¹¹ Beʼe ginötöu fariawö ba niha nifahaʼöu ba Zura Niʼamoniʼö, simane nifalua Yesu khö ndra nifahaʼönia. (Yoh. 3:22) Na tefaudu, tola ökaoni ba nomou niha nifahaʼöu si no tedou ba wamati. Tola fao ami ba wamadu kofi, ba wemanga, mazui ba wamaigi video JW Broadcasting^® ero waŵa. Tatu omuso sibai dödö niha nifahaʼöu na öfalua daʼö, mendrua manö na no mofanö ndra awö-awönia hegöi ösi nomonia ba wamalua owasa si lö tefaudu ba Zura Niʼamoniʼö. Imane talifusöda Kazibwe si toröi ba Uganda, ”Oya wamahaʼö nisöndragu sanandrösa khö Yehowa me fariawö ndraʼo khö dalifusöda samahaʼö yaʼo, tenga ha ba ginötö mafalua wamahaʼö ba Zura Niʼamoniʼö. Tola uʼila wa iʼameʼegö tödö nono mbanuania Yehowa ba omuso dödöra. Omasido göi urasoi zimane daʼö.”

12. Hana wa moguna tafaböʼö-böʼöni nawöda ba wondröniaʼö famahaʼö ba Zura Niʼamoniʼö?

¹² Ohe awöu ndra talifusöda si faböʼö-böʼö na ödöniaʼö wamahaʼö ba Zura Niʼamoniʼö.  Tola manö tawaʼö tödöda wa abölö aoha khöda na ha yaʼi-yaʼita zondröniaʼö famahaʼö, mazui na ha daʼö-daʼö manö zanuriaigö niʼoheda. Hizaʼi, oya mbua nitema niha nifahaʼöda na taʼohe awöda ndra talifusöda si faböʼö-böʼö. Imane talifusöda Dmitrii si toröi ba Moldova, ”Dozi sanuriaigö niʼohe dalifusöda samahaʼö yaʼo, no faböʼö-böʼö lalara wanutunö famahaʼö ba Zura Niʼamoniʼö. Daʼö zanolo yaʼo ba wangiʼila hadia nasa lala tanö böʼö si tola ufalua ba wangaurifagö famahaʼö nitemagu. Baero daʼö, me awena sibai uʼondrasi gangowuloa, lö saʼae alawö-lawö ndraʼo börö me ato ndra talifusöda si no irai falukha khögu.”

13. Hana wa moguna tafarou dödö niha nifahaʼöda ba wangondrasi angowuloa?

¹³ Farou niha nifahaʼöu ba wangondrasi angowuloa. Hana wa moguna öfalua daʼö? Börö me no iʼoroisi Yehowa ba nono mbanuania enaʼö owulo ira ba wamosumange yaʼia. (Heb. 10:24, 25) Baero daʼö, no ösi nomoda ba wamati ndra talifusöda. Na fao ita khöra ba gangowuloa, no amaedola zi fao manga ita khöra simane nifalua zi sambua ösi nomo. Moguna ifalua daʼö niha nifahaʼöu enaʼö tola tebayagö ia idanö. Hizaʼi ba wamobörö, te abua khönia weʼamöi ba gangowuloa. Na daʼö nirasoi niha nifahaʼöu, tola öʼogunaʼö mbuku Lala ba Wanöndra Faʼohahau Dödö Sagötö Faʼara! ba wanolo yaʼia.

14. Hadia zinangea tafalua enaʼö terou dödö niha nifahaʼöda ba wangondrasi angowuloa?

¹⁴ Enaʼö terou dödö niha nifahaʼöu ba wangondrasi angowuloa, ogunaʼö wamahaʼö si 10 moroi ba mbuku Lala ba Wanöndra Faʼohahau Dödö Sagötö Faʼara! Fatua lö murilis mbuku daʼa, no muʼandrö khö ndra sanuriaigö enaʼö latandraigö wangogunaʼö famahaʼö andre. Buania, ato niha nifahaʼöra ba Zura Niʼamoniʼö somasi mangondrasi angowuloa. Hizaʼi, tenga dali mirugi wamahaʼö si 10 awena ökaoni niha nifahaʼöu ba wangondrasi angowuloa. Moguna öʼanemaiʼö wogaoni yaʼia ba öʼaseseʼö wamalua daʼö. No faböʼö-böʼö daha-taha nitaögö niha nifahaʼöda ero zamösana. Börö daʼö, moguna öʼila hadia manö daha-taha nitaögö niha nifahaʼöu enaʼö tola ötolo ia. Böi ide-ide dödöu na lö iʼanemaiʼö iʼondrasi gangowuloa. Böi tebulö so khöu waʼebolo dödö ba böi awuwu ndraʼugö.

15. Hadia manö waʼaombö dödö nirasoi niha nifahaʼöda?

¹⁵ Hadia itörö tödöu me örasoi waʼataʼu mazui faʼaombö dödö me edöna tobali ndraʼugö Samaduhuʼö Yehowa? Tola manö öwaʼö tödöu wa tebai manuriaigö ndraʼugö misa ba nomo-omo, mazui te ataʼu ndraʼugö na so wanaisi moroi ba nösi nomou hegöi ira awö-awöu. Na daʼö nirasoimö mböröta, tatu aboto ba dödöu hadia nirasoi niha nifahaʼöu. Aboto ba dödö Yesu wa tola manö so khöda waʼataʼu. Hizaʼi, ifarou ndra nifahaʼönia enaʼö böi latehegö tobali taha-tahara daʼö ba wamosumange Yehowa. (Mat. 10:16, 17, 27, 28) Hadia nifalua Yesu ba wanolo yaʼira? Ba hewisa woloʼöda duma-duma nibeʼenia?

16. Hewisa lalada ba wamomaha niha nifahaʼöda enaʼö tola latutunö ba niha hadia zi no lafahaʼö yaʼira?

¹⁶ Böi tebulö fomaha niha nifahaʼöu ba wanutunö ba niha böʼö hadia zi no ifahaʼö yaʼia. Me ifatenge ndra nifahaʼönia Yesu ba weʼamöi manuriaigö, tola manö so khöra wanizi-nizi. Hizaʼi ba wanolo yaʼira, ifatunö khöra Yesu haʼökhö manö tola manuriaigö ira ba hadia manö zinangea lawaʼö. (Mat. 10:5-7) Hewisa woloʼöu duma-duma nibeʼe Yesu? Fatunö ba niha nifahaʼöu haʼökhö manö tola manuriaigö ia. Duma-dumania, tola ösofu hadia so zi faʼila khönia somasi manemaʼö famahaʼö Zura Niʼamoniʼö. Aefa daʼö, foromaʼö hewisa lalania ba wanutunö Sura Niʼamoniʼö ba niha  andrö. Na tefaudu, tola mifalua wamadumaisi simane si so ba fitur ”So Zangumaʼö” hegöi ”Te So Zanofu” moroi ba mbuku Lala ba Wanöndra Faʼohahau Dödö Sagötö Faʼara! Sabölö moguna, fomaha ia ba wangogunaʼö Sura Niʼamoniʼö ba wameʼe fanema li si tefaudu ba salio muʼila eluaha.

17. Hewisa wangogunaʼöda Mataiʼo 10:19, 20, 29-31 ba wanolo niha nifahaʼöda enaʼö laʼodaligö Yehowa?

¹⁷ Tolo niha nifahaʼöu ba wangodaligö Yehowa. Ifaduhuʼö ba dödö ndra nifahaʼönia Yesu wa hasambalö itolo ira Yehowa börö me iʼomasiʼö sibai ira. (Baso Mataiʼo 10:19, 20, 29-31.) Simane Yesu, moguna öfasugi ba dödö niha nifahaʼöu wa hasambalö göi itolo ia Yehowa. Na fao ami ba wangandrö, tola öʼandrö khö Yehowa enaʼö itolo niha nifahaʼöu ba wogamö ohitö dödönia. Na öfalua daʼö, no ötolo ia ba wangodaligö Yehowa. Imane talifusöda Franciszek si toröi ba Polandia, ”Na mangandrö dalifusöda samahaʼö yaʼo ba Zura Niʼamoniʼö, asese iʼandrö khö Yehowa enaʼö tola ukhamö gohitö dödögu ba wamati. Me uʼila wa ifondrondrongo wangandrönia andrö Yehowa, ibörögö göi ulau mangandrö. No urasoi samösa wanolo moroi khö Yehowa me uʼandrö cuti ba nahia wohalöwögu si bohou enaʼö tola uʼondrasi gangowuloa sebua hegöi angowuloa ero migu.”

18. Hewisa dödö Yehowa khö ndra samahaʼö Sura Niʼamoniʼö?

¹⁸ Iʼameʼegö tödö sibai niha nifahaʼöda Yehowa. Iʼameʼegö tödö göi waʼerege dödö ndra samahaʼö Sura Niʼamoniʼö ba iʼomasiʼö sibai ira, börö me no laforege ba wanolo niha böʼö enaʼö tola ahatö ira khönia. (Yes. 52:7) Hewaʼae na lö hadöi niha nifahaʼöu iadaʼa, tola fao ndraʼugö khö ndra sanuriaigö tanö böʼö na ladöniaʼö wamahaʼö ba Zura Niʼamoniʼö. Na öfalua daʼö, no fao ndraʼugö ba wanolo niha nifahaʼö ba Zura Niʼamoniʼö enaʼö tedou ira ba wamati irege tebayagö idanö.