1, 2. (a) Hadia niwa’ö niha sanandrösa ba wangai angetula samösa? (b) Hadia nifaha’ö Zura Ni’amoni’ö khöda sanandrösa ba wangai angetula samösa, ba hadia wanofu-nofu nitutunöda?

SANANDRÖSA ba wangai angetula, imane samösa ira alawe khö nawönia, ”Ya’ugö manö zo’etu’ö khöda. Afökhö högögu wo’angeraigö.” Lö omasi ia i’oguna’ö buala si sökhi moroi khö Zomböi, ya’ia da’ö ba wangai angetula samösa. Hewisa göi ndra’ugö? Hezoso zabölö omasi’ö, hadia ya’ugö samösa zangai angetula mazui omasi’ö na niha bö’ö zangai angetula khömö? Hewisa dödöu sanandrösa ba wangai angetula samösa?

² No fabö’ö-bö’ö niwa’ö niha sanandrösa ba wangai angetula samösa. So zanguma’ö wa tebai tahalö gangetula samösa, börö me no itatugöi Lowalangi hadia nifaluada. So göi zanguma’ö wa tebai tahalö gangetula samösa börö me no mutatugöi hezo ndrege zi tola tafalua. Hiza’i, ifaha’ö ita Sura Ni’amoni’ö wa tewöwöi ita si fao fa’abölö ba tetehegö khöda ba wangai angetula si sökhi. (Baso Yosua 24:15.) Ba Zura Ni’amoni’ö,  tola göi tasöndra wanema li moroi ba wanofu-nofu andre: Hadia so nola-ola ba wangai angetula samösa? Hewisa zinangeania wangoguna’öda zi no tetehegö khöda ba wangai angetula? Hewisa wangoroma’öda wa sindruhu-ndruhu ta’omasi’ö Yehowa ba gangetula nihalöda? Hewisa wangoroma’öda wa ta’ame’egö tödö gangetula niha bö’ö?

3. Tola ifalua gofu hadia ia Yehowa. Hewisa wangoguna’önia da’ö?

³ Tola ifalua gofu hadia ia Yehowa, ba tola tafaha’ö ita moroi ba lala wamaluania da’ö. Duma-dumania, ifili ndraono Gizara’eli Yehowa tobali ono mbanuania, ”soi tana khönia”. (V Moze 7:6-8) So dani wa ihalö gangetula simane da’ö Yehowa. Omasi Ia ifalua zi no ifabu’u khö Gaberahamo, niha si fahuwu khönia. (I Moze 22:15-18) Aefa da’ö, ifalua gofu hadia ia Yehowa si fao fa’omasi hegöi fa’atulö. Tola ta’ila da’ö ba ginötö ihuku ndraono Gizara’eli me lö la’o’ö niwa’önia. Ba ginötö la’andrö wangefa khö Yehowa soroi ba dödö ba zala si no lafalua, iforoma’ö khöra wa’omasi hegöi fa’ahakhö dödö Yehowa. Imane, ”Ufuli dania ufadöhö lua-lua wangerogöra ya’o andrö, ba aoha gölögu wangomasi’ö ya’ira.” (Hosea 14:5) Ibe’e khöda duma-duma si sökhi Yehowa ba ginötö i’oguna’ö kuasonia ba wanolo niha bö’ö!

4, 5. (a) Haniha zi oföna sibai manema buala ba wangai angetula samösa, ba hewisa wangoguna’önia da’ö? (b) Hadia wanofu sinangea tasofu khöda zamösana?

⁴ Yehowa zamazökhi mala’ika hegöi niha gulidanö. Ifazökhi ira si fao fa’abölö ba wangai angetula samösa. Si oföna nifazökhi Yehowa ya’ia da’ö Yesu. Tefazökhi ia simane famaedo Lowalangi ba tetehegö khönia ba wangai angetula samösa. (Kolose 1:15) Hewisa wangoguna’ö Yesu zi no tetehegö khönia? Fatua lö möi Yesu ba gulidanö, lö faröi ia khö Lowalangi ba lö fao ia khö Zatana ba wamadaö. Me so Yesu ba gulidanö, itimbagö wanandraigö moroi khö Zatana. (Matai’o 4:10) Ba mbongi fatua lö mate ia, si fao fa’afaduhu dödö omasi ia ifalua hadia zomasi Namania. Imane, ”He Ama, ena’ö na öfatalu’i’ö khögu mako andrö, ba böi ya’itörö zomasi ndra’o, ha somasi ndra’ugö.” (Luka 22:42) Hadia sindruhu-ndruhu ta’o’ö Yesu ba ta’oguna’ö hadia zi no tetehegö khöda ba wamosumange Yehowa hegöi ba wamalua somasi ia?

⁵ Tola ta’o’ö Yesu börö me tewöwöi ita simane famaedo Lowalangi. (I Moze 1:26) Hiza’i, tebai tafalua gofu hadia manö simane Yehowa. Itutunö Taromali Lowalangi wa no ibe’e nola-ola Yehowa ba zi no tetehegö khöda andrö, ba itötöna ena’ö tatema’ö da’ö. Duma-dumania, ba zi sambua omo, fo’omo ira alawe ifosumange wo’omonia. Ba la’o’ö göi li zatuara iraono. (Efeso 5:22; 6:1) Hewisa nola-ola da’ö molua-lua ia ba lala wangoguna’öda hadia zi no tetehegö khöda? Fanema li ba wanofu da’a zotatugöi fa’auri si lö aetu nitemada ba zi so miföna.

6. Be’e duma-duma sangoroma’ö hana wa moguna so nola-ola ba zi no tetehegö khöda.

⁶ Hadia tola möi fa’ohahau dödö sindruhu na ta’o’ö nola-ola si no mutatugöi khöda? Tola! Hadia mbörö? Börö me möi folumö’öda da’ö. Duma-dumania, khalaigö atö hewisa na ta’ohe hondra ba mbanua saröu sibai, hiza’i lö nibe’e ndra samatörö goi-goi sanandrösa ba wolohe hondra ba da’ö. Fa’abölö-bölö hegöi lala nitörö, oi ba zomasi dödöra samösa. Hadia ohahau dödömö wanörö lala simane da’ö? Tatu manö lö’ö. Moguna so goi-goi mazui nola-ola ena’ö fefu niha tola lasöndra wa’ohahau dödö. Datatutunö duma-duma moroi ba Zura Ni’amoni’ö sangoroma’ö wa so mbua moroi ba nola-ola nibe’e Yehowa.

7. (a) Hadia gamaehuta Gadamo moroi ba gurifö? (b) Tutunö sambua lala wangoguna’ö Gadamo mbuala si no tebe’e khönia.

⁷ Ba ginötö ifazökhi niha siföföna Yehowa sotöi Adamo, ibe’e khönia mbuala ba wangai angetula samösa simane nibe’enia khö ndra mala’ika. Hiza’i lö ibe’e da’ö ba gurifö. Hewisa wangoguna’ö Gadamo mbuala andrö ba lala si sökhi? Si fao fa’omuso dödö ibe’e döi gurifö. Hadia nifalua Lowalangi sanandrösa ba gurifö? ”I’ohe ba niha, ena’ö ifaigi, hadia döi ibe’e.” Me no aefa ifaigi fefu gurifö andrö Adamo, ibe’e döira zamösana. Lö ifalalini Yehowa hadia döi nibe’e Gadamo. Andrö, ”hadia si’ai nibe’e niha töi zonoso andrö, da’ö döira dania”.—I Moze 2:19.

8. Hewisa wa tola fasala wangoguna’ö Gadamo mbuala nibe’e khönia, ba hadia lua-luania?

⁸ Ibe’e halöwö khö Gadamo Yehowa ena’ö ibali’ö faradaiso zi sagörö ulidanö andre. Imane khönia, ”Mi’o’ono ba mi’oya’ö ami, mifo’ösi gulidanö ba mibe’e barö mbawami, samatörö i’a ba nasi ami, awö wofo ba dalu mbanua, awö zaliwa-liwa ba danö fefu, sanana-nana ba gulidanö.” (I Moze 1:28) Hiza’i, isawö Adamo goi-goi si no ihonogöi Yehowa, ifili ba wemanga mbua geu si tebai mu’a. Börö me fasala wangoguna’ö Gadamo mbuala nibe’e khönia, andrö wa no ngahönö fakhe aekhu niha ba horö. (Roma 5:12) Datatörö tödöda lua-lua gangetula si fasala si no ihalö Adamo. Da’ö zamarou tödöda ena’ö ta’oguna’ö mbuala andrö ba lala si sökhi ba tatema’ö nola-ola nibe’e Yehowa khöda.

9. Hadia zi tola lafili iraono Gizara’eli si no ibe’e Yehowa khöra, ba hadia zi no lafabu’u wa lafalua?

⁹ Fefu niha latema horö ondröita hegöi fa’amate moroi khö Gadamo ba Khawa. Hiza’i, tebe’e nasa khöda ginötö ba wofili hadia zomasi ita. Oroma da’a moroi ba lala nifalua Yehowa ba ndraono Gizara’eli. Itehegö khöra Yehowa ba wamili hadia omasi ira tobali soi tana khönia mazui lö’ö. (II Moze 19:3-6) Lahalö gangetula iraono Gizara’eli wa tobali ira ono mbanua Lowalangi ba latema’ö hadia zi no ihonogöi Lowalangi. Lamane, ”Fefu hadia  ia niwa’ö Yehowa, ba ma’o’ö!” (II Moze 19:8) Hiza’i, lö ara aefa da’ö lasawö hadia ia zi no lafabu’u khö Yehowa. Tola tafaha’ö ita ba zalua andre. Böi aetu ta’ame’egö tödö mbuala si no tebe’e khöda ba böi aetu ahatö ita khö Yehowa ba ta’o’ö goi-goinia.—I Korindro 10:11.

10. Hadia manö duma-duma si so ba Heberai’o faza 11 sangoroma’ö wa niha si lö mo’ahonoa tola la’oguna’ö mbuala nibe’e khöra ba wamosumange Lowalangi? (Faigi gambara ba wamobörö wamaha’ö.)

¹⁰ Ba Heberai’o faza 11, so 16 döi ndra matua ba ira alawe samili ba wolo’ö nola-ola si no ihonogöi Yehowa. Buania, oya howu-howu nitemara ba la’okhögö dötönafö sahöli-höli dödö ba zi so miföna. Duma-dumania Noakhi. Mamati ia irege ifili ba wolo’ö fanuturu lala nibe’e Lowalangi khönia ba wangehaogö nowo irege te’orifi nösi nomonia hegöi nga’ötönia ba zi so miföna. (Heberai’o 11:7) Simanö göi Gaberahamo ba Sara, la’o’ö hadia niwa’ö Lowalangi ba möi ira ba danö si no ifabu’u khöra. Hewa’ae tola ”mangawuli ira” ba danö Guri, hiza’i la’osambua’ö dödöra ba nifabu’u Lowalangi ba zi so miföna. Iwa’ö Sura Ni’amoni’ö wa ”si sökhi ni’aluira”. (Heberai’o 11:8, 13, 15, 16) Itimbagö göi harato si so ba Miserai Moze ba ifili ”itaögö wamakao, awö mbanua Lowalangi, moroi isöndra wa’omuso dödö ba horö, si lö arara”. (Heberai’o 11:24-26) Data’ohia’ö wamatira, ta’ame’egö tödö mbuala si sökhi nibe’e khöda, ba ta’oguna’ö ia ba wamalua somasi Lowalangi.

11. (a) Hadia howu-howu sebua si tebai tatema na niha bö’ö zangai angetula khöda? (b) Hadia zamarou tödömö ba wangoguna’ö zi no tetehegö khömö ba lala si sökhi?

¹¹ Te abölö aoha na niha bö’ö zangai angetula khöda. Hiza’i, lö irai tatema howu-howu sebua na tafalua da’ö. Hadia da’ö? Itutunö Sura Ni’amoni’ö ba V Moze 30:19, 20. (Baso.) Ba ayati 19, ibe’e ginötö ba ndraono Gizara’eli Yehowa ba wofili. Ba ayati 20, ibe’e khöra ginötö Yehowa ba wombulö’ö fa’aurira ena’ö tola laforoma’ö hewisa wa’omasira khönia. Tola göi tafili ba wamosumange Yehowa. Tola göi ta’oguna’ö mbuala nibe’enia khöda ba wamosumange ya’ia hegöi ba wangoroma’ö hewisa wa’omasida khönia!

12. Ba wangai angetula samösa, hadia zi tebai tafalua?

¹² Duma-dumania, so mbuala sebua böli nibe’emö khö nawömö. Khalaigö atö hewisa wa’afökhö dödömö na itibo’ö mbuala andrö ba naha zasao mazui na i’oguna’ö da’ö ba wangafökhöi’ö tödö niha bö’ö. No ibe’e khöda Yehowa mbuala ba wangai angetula samösa. Andrö, afökhö dödönia na i’ila wa la’oguna’ö mbuala andrö ba lala si lö tefaudu hegöi ba wangai angetula si lö sökhi mazui ba wangafökhöi’ö tödö niha bö’ö. Imane Sura Ni’amoni’ö wa ba ”götö safuria” so niha ”si tebai mangandrö saohagölö”. (II Timoteo 3:1, 2) Andrö, hewisa wangoroma’öda wa ta’andrö sibai saohagölö ba mbuala sebua böli nibe’e Yehowa khöda? Ba hewisa ena’ö lö ta’oguna’ö da’ö ba lala si fasala?

13. Hewisa zinangeania wangoguna’öda mbuala si no tebe’e khöda?

¹³ Fefu ita tola tafili samösa niha si fariawö khöda, hadia ni’onukhada, fangehao mboto hegöi hiburan somasi ita. Hiza’i, tola manö ta’oguna’ö mbuala andrö si tobali dani ba wamalua hadia zi lö omasi Lowalangi mazui ba wolo’ö hadia  zasese lafalua niha ba gulidanö andre. (Baso I Fetero 2:16.) Moroi na ta’oguna’ö mbuala nibe’e khöda ba wamalua zala, abölö sökhi na ta’oguna’ö ia ba wamalua hadia ia zi möi ’famosumange Lowalangi’.—I Korindro 10:31; Galatia 5:13.

14. Hana wa moguna ta’odaligö Yehowa ba ginötö ta’oguna’ö mbuala ba wangai angetula samösa?

¹⁴ Imane Yehowa, ”Ya’o, Yehowa, Lowalangiu zamahaö ya’ugö ba zoguna khöu, samasao ya’ugö ba lala nitöröu.” (Yesaya 48:17) Moguna faduhu dödöda khö Yehowa ba ta’o’ö hadia zi no ihonogöi ena’ö tola tahalö gangetula si sökhi. Si fao fangide-ngide’ö tafaduhu’ö wa ”tebai ihuku lalania niha, awö wa tebai ifanandrösa mbekania niha sanörö lala”. (Yeremia 10:23) Adamo hegöi iraono Gizara’eli si faröi, lafili ba wanawö hadia ia zi no ihonogöi Yehowa khöra ba la’odaligö ira samösa. Datahalö wamaha’ö moroi ba duma-duma da’a. Moroi na ta’odaligö ita samösa, abölö sökhi na ’tadöna-döna khö Yehowa moroi si’aikö ba dödöda’.—Gamaedola 3:5.

15. Hadia wamaha’ö si tola tahalö moroi ba goi-goi si so ba Galatia 6:5?

¹⁵ Moguna ta’ame’egö tödö mbuala si no tetehegö ba niha bö’ö ba wangai angetula ba wa’aurira. Hadia mbörö? Fefu ita no tetehegö khöda ba wangai angetula samösa, ba lö irai so darua niha Keriso sangai angetula si fagölö. Duma-dumania, angetula sanandrösa ba gamuata hegöi famosumange nifaluada. Törö tödöu goi-goi si so ba Galatia 6:5. (Baso.) Na aboto ba  dödöda wa dozi niha lalu’i-lu’i samösa hadia ia gangetula nihalöra, no ta’ame’egö tödö mbuala nitehegö ba niha bö’ö ba wangai angetula samösa.

16, 17. (a) Hadia zalua ba Korindro sanandrösa ba wangai angetula samösa? (b) Hadia nifalua Waulo ba wanolo niha Keriso, ba hadia wamaha’önia khöda?

¹⁶ Datatutunö duma-duma si so ba Zura Ni’amoni’ö sangoroma’ö wa moguna sibai ta’ame’egö tödö gangetula si no lahalö ira talifusöda. Niha Keriso si so ba Korindro, ladunö-dunö sanandrösa ba gö nifamawa ba fasa si no labe’e sumange adu. So ösa niha Keriso si manga gö da’ö börö me lawa’ö wa lö mo’amakhaita ia ba nadu. Hiza’i, so ösa zi tetutu tödö ba lawa’ö wa na la’a gö da’ö, hulö zi no mamosumange adu ira. (I Korindro 8:4, 7) Da’a no sambua abula dödö sebua si tola mamabali mbanua niha Keriso. Hadia nifalua Waulo ba wanolo niha Keriso ena’ö tola te’asiwai gabula dödö andre?

¹⁷ Si oföna, ifasugi ba dödöra Faulo wa fefu hadia ia ni’a lö tola möi fanga’aro wahuwusara khö Lowalangi. (I Korindro 8:8) Aefa da’ö, ifangelama ira Faulo ena’ö lö latehegö hadia zi ”no tola” andrö khöra ba wangafökhöi’ö dödö side-ide niha bö’ö salio tetutu. (I Korindro 8:9) Aefa da’ö, iwa’ö göi ba niha sangokhögö tödö side-ide sambö fa’abe’e ena’ö böi lahuku niha si manga gö da’ö. (I Korindro 10:25, 29, 30) Andrö, ba ginötö so zalua so’amakhaita ba wamosumange, moguna lahalö samösa gangetula ira niha Keriso. Hadia ta’ame’egö tödö mbuala si no tetehegö khö ndra talifusöda ba wangai angetula samösa hewa’ae na ide-ide da’ö?—I Korindro 10:32, 33.

18. Hewisa wangoroma’öu wa ö’andrö saohagölö ba mbuala nibe’e khömö ba wangai angetula samösa?

¹⁸ No ibe’e khöda mbuala Yehowa ba wangai angetula samösa, irege tola ta’okhögö wa’ohahau dödö sindruhu. (II Korindro 3:17) Sindruhu-ndruhu ta’andrö saohagölö ba mbuala andrö irege tola tahalö gangetula sangoroma’ö wa ta’omasi’ö sibai Yehowa. Andrö, böi taböhöli ba wangai angetula si möi famosumange ya’ia, ba ta’ame’egö tödö gangetula nihalö niha bö’ö sanandrösa ba wangoguna’öra mbuala si sökhi andre.