1, 2. Hadia manö niwa’ö-wa’ö niha sanandrösa ba halöwöra?

ATO niha iada’a lawa’ö wa ba lala halöwöra oroma hadia moguna ira mazui lö’ö. Ba zi hauga ngawalö soi, na so zi falukha khö nawönia, sasese sibai lasofu ya’ia da’ö, ”Hadia halöwömö?”

² Itaria itutunö Sura Ni’amoni’ö sanandrösa ba zi samösa niha hegöi halöwönia. Duma-dumania, ”Matai’o, sanema beo”, ”Zimoni andrö, tuka guli zaŵi”, ”Luka, doto andrö, ni’omasi’ö”. (Matai’o 10:3; Halöwö Zinenge 10:6; Kolose 4:14) Baero da’ö, itutunö göi Sura Ni’amoni’ö halöwö nifalua zi samösa niha ba wamosumange Yehowa. Duma-dumania, Razo Dawido, sama’ele’ö sotöi Elia, ba sinenge sotöi Faulo. Ya’ira andre, la’ame’egö tödö sibai halöwö nibe’e Yehowa khöra. Simanö göi ita, moguna ta’ame’egö tödö gofu hadia halöwö nibe’e khöda ba wamosumange Yehowa.

3. Hadia mbörö wa moguna lafaha’ö zi bohou ebua ira talifusöda si no alawa ndröfi? (Faigi gambara ba wamobörö wamaha’ö.)

³ Omasi sibai ita wamosumange Yehowa ba ta’ame’egö  tödö hadia ia halöwöda. Ato moroi ba gotaluada sorasoi fa’omuso dödö ba wamalua halöwö nitemada ba tadöna-döna ena’ö tola tafalua ia sagötö fa’ara. Hiza’i, na no itugu numalö sa’ae ndröfi niha, tebai lafalua halöwö nifaluara me awuyu-wuyu ira. (Zangombakha 1:4) No sambua fanandraigö da’a ba nono mbanua Yehowa. Iada’a, itugu tedou halöwö fanuriaigö, ba oya lala ni’oguna’ö organisasi ba wama’ema turia somuso dödö ba niha fefu. Hiza’i, itaria abua ba niha si no alawa ndröfi ba wamaha’ö ya’ira ba lala si bohou andre. (Luka 5:39) Si to’ölönia, na no itugu alawa ndröfi niha, alö sa’ae wa’abölönia. (Gamaedola 20:29) No laforoma’ö wa’omasi ira talifusöda si no alawa ndröfi na lafaha’ö zi bohou ebua ba wangai halöwö ba organisasi Yehowa.—Baso Zinunö 71:18.

4. Hana wa itaria abua ba niha wame’e halöwö ba niha bö’ö? (Faigi kotak ”Tani Wa Abua Khöda ba Wame’e Halöwöda ba Niha Bö’ö.”)

⁴ Itaria abua khö ndra talifusöda si no alawa ndröfi ba wame’e halöwö khö ndra talifusöda si bohou ebua. Tola manö afatö dödöra börö me tebai sa’ae lafalua halöwö somasi ira. Mazui, so khöra wa’aombö-aombö dödö ma lö a’ozu halöwö da’ö na tenga ya’ira zamalua. Tola manö göi so ba dödöra wa tebai lafaha’ö niha bö’ö börö me ambö ginötöra. Andrö, moguna so wa’ebolo dödö ba zi bohou ebua na lö nasa nibe’e khöra halöwö.

5. Hadia manö wanofu-nofu ditutunöda ba wamaha’ö da’a?

⁵ Hana wa moguna sibai latolo zi bohou ebua ira talifusöda si no alawa ndröfi ena’ö oya halöwö nifaluara? Hewisa wamaluara da’ö? (II Timoteo 2:2) Hana wa moguna la’oroma’ö bua-bua satulö ira talifusöda si bohou ebua ba ginötö falulu fohalöwö ira khö ndra talifusöda si no alawa ndröfi hegöi si no ara ba wamati? Hana wa moguna lafaha’ö ira khö ndra talifusöda si no alawa ndröfi? Datatutunö hewisa wamaha’ö Razo Dawido ononia ba wamalua halöwö sabölö moguna.

6. Hadia zomasi ifalua Razo Dawido? Hadia niwa’ö Yehowa khönia?

⁶ Ba zi hauga fakhe, göna folohi Dawido irege fabö’ö-bö’ö nahiania woloi. Aefa da’ö, me no tobali ia razo, toröi ia ba nomo si sökhi sibai. Andrö wa imane khö Zama’ele’ö sotöi Natano, ”Hiza, ya’o, ba ba nomo eresi sodo, ba ha oloso nose dawöla goroisa Yehowa.” Omasi Dawido ba wamazökhi omo Yehowa si sökhi sibai. Imane khönia Natano, ”Falua hadia ia zi so ba dödöu, itolo’ö sa Lowalangi.” Hiza’i tenga da’ö zomasi Yehowa. Ifatenge Natano ba wanguma’ö khö Dawido, ”Tenga ya’ugö zolau nahiagu omo.” Hewa’ae ifabu’u Yehowa wa lö aetu fao-fao Ia khö Dawido, te’ombakha’ö khönia wa samösa moroi ba gotalua nononia dania zangehaogö omo Lowalangi. Hadia nifalua Dawido?—I Nga’ötö 17:1-4, 8, 11, 12; 29:1.

7. Hadia nifalua Dawido sanandrösa ba wanuturu lala nibe’e Yehowa?

⁷ Tola manö afatö dödö Dawido börö me sindruhu-ndruhu omasi ia wamazökhi omo Yehowa. Hewa’ae simanö, lö aetu ituhini halöwö nifalua nononia sotöi Zelomo. Itolo göi ba wamöfö’ö ndra sohalöwö hegöi ba wangowuloi zi’öli, tembaga, firö, ana’a ba eu. Si so ba dödönia tenga haniha zanema töi ba wangehaogö omo Lowalangi andrö. Ba gafuriata,  lafotöi ia omo Lowalangi nifazökhi Zelomo. Ifarou dödö Zelomo Dawido imane, ’Ba iya’e sa’ae, ya’ugö onogu, ba yamutolo’ö Yehowa, ena’ö mofozu wolaumö, ba ena’ö ölau nomo andrö khö Lowalangiu, Yehowa, simane nifabu’unia, nitandrösaigö khöu.’—I Nga’ötö 22:11, 14-16.

8. Hana wa no irai tumbu ba dödö Dawido wa tebai nasa ifazökhi nomo Lowalangi Zelomo? Hiza’i, hadia nifalua Dawido?

⁸ Baso I Nga’ötö 22:5. Te no irai so ba dödö Dawido wa tebai nasa ifalua halöwö sabölö moguna andre Zelomo. Omo Lowalangi andrö ”lö tola lö ebua sibai”, ba ba ginötö da’ö ”iraono” ba ”sambö fa’abe’e” nasa Zelomo. Hiza’i, i’ila Dawido wa hasambalö itolo Zelomo Yehowa ba wamalua halöwö sebua andre. Da’ö mbörö wa ifalua hadia ia zi tola ifalua Dawido ba wanolo Zelomo wohenaigö fefu zoguna ba halöwö sebua andre.

9. Hewisa ena’ö omuso dödö ndra talifusöda si no alawa ndröfi ba ginötö labe’e halöwö ba niha bö’ö? Be’e duma-duma.

⁹ Böi afatö dödö ndra talifusöda si no alawa ndröfi ba ginötö labe’e halöwö khö ndra talifusöda si bohou ebua. Aboto ba dödöda wa sabölö moguna ya’ia da’ö ba wamalua halöwö si no ibe’e Yehowa. Tola alua da’ö na no tefomaha ndra talifusöda si bohou ebua ba wamalua halöwö da’a. Khalaigö atö da’a. Me ide-ide nasa ndra’ugö, te no irai ö’ila hewisa na i’ohe moto bapamö. Me no itugu ebua ndra’ugö, ifaha’ö ndra’ugö ba wolohe moto. Na no so SIM-mö, tola ö’ohe sa’ae moto. Hewa’ae simanö, lö aetu ibe’e khömö wanuturu lala bapamö. Itaria göi mifalali ami ba wolohe. Hiza’i, na itugu alawa ndröfinia sa’ae, ya’ugö zasese wolohe moto. Hadia ide-ide dödö bapamö? Tatu lö’ö. Omuso dödönia börö  me ya’ugö zolohe ya’ia. Simane da’ö göi ndra talifusöda si no alawa ndröfi, omuso dödöra ba ginötö la’ila ndra talifusöda si bohou ebua si no lafaha’ö latema’ö halöwö moroi ba organisasi Yehowa.

10. Hewisa dödö Moze sanandrösa ba lakhömi hegöi halöwö?

¹⁰ Moguna ta’angenanöi ena’ö böi afökhö dödöda na so halöwö nibe’e ba niha bö’ö. Tola tafaha’ö ita khö Moze me so ösa ndraono Gizara’eli la’osama’ele’ö ira. (Baso IV Moze 11:24-29.) Omasi itegu ira Yosua, hiza’i imane Moze, ”Hadia ya’ugö zame’e lala khögu? Ena’ö na sama’ele’ö manö mbanua Yehowa fefu, ena’ö ifa’ema khöra gehehania Yehowa!” I’ila Moze wa Yehowa zame’e khöra halöwö da’ö. Moroi na i’alui lakhöminia samösa, omasi ia na fefu nono mbanua Lowalangi latema halöwö. Hewisa ita? Hadia omuso dödöda ba ginötö so ndra talifusö sanema’ö halöwö moroi khö Yehowa?

11. Hadia niwa’ö samösa dalifusöda ira matua sanandrösa ba wame’e halöwö ba niha bö’ö?

¹¹ Ato ndra talifusöda si no mamalua halöwö khö Yehowa ngafulu fakhe wa’ara. So göi ndra talifusöda si bohou ebua si no lafaha’ö ba wamalua halöwö soya. Duma-dumania, talifusöda sotöi Peter. No 74 fakhe ihalö halöwö safönu inötö, 35 fakhe mohalöwö ia ba gödo ndraha Eropa. No ara tobali ia pengawas Departemen Dinas. Aefa da’ö, tebe’e halöwö da’a khö Paul, talifusöda ira matua si bohou ebua si no ifaha’ö Peter. Hadia afatö dödö Peter ba zi no mubulö’ö andre? Lö’ö. Imane, ”Omuso dödögu börö me so ndra talifusöda si no mufaha’ö ba wanema’ö halöwö sabölö ebua andre. Sökhi sibai wamaluara halöwö andrö.”

12. Hadia wamaha’ö nihalöda moroi ba duma-duma Rehabeamo?

¹² Me tobali razo nono Zelomo sotöi Rehabeamo, i’andrö wanuturu lala ba niha sabölö atua moroi khönia sanandrösa ba lala nifaluania ba halöwö si bohou andrö. Hiza’i, itimbagö wanuturu lala andrö! I’o’ö wanuturu lala nibe’e ndra awönia si fagölö ndröfi khönia. Lua-luania, fangabu dödö. (II Nga’ötö 10:6-11, 19) Hadia wamaha’önia khöda? Moguna ta’andrö ba ta’ame’egö tödö wanuturu lala moroi ba niha si no alawa ndröfi hegöi si no ara ba wamati. Sindruhusa wa lö mufaso ndra talifusöda si bohou ebua ba wamalua hadia ia nifalua ndra talifusöda si no alawa ndröfi. Hiza’i, moguna göi la’ame’egö tödö mbua wangera-ngera  ndra talifusöda si no alawa ndröfi ba böi alio lahalö gangetula wa lö mofozu lala nibe’era andrö.

13. Hadia zinangea lafalua ira talifusöda si bohou ebua ba ginötö falulu fohalöwö ira khö ndra talifusöda si no alawa ndröfi?

¹³ Itaria, ira talifusöda si bohou ebua labe’e halöwöra ba wamaigi-maigi halöwö ndra talifusöda si no alawa ndröfi hegöi si no aro ba wamati. Hewa’ae simanö, moguna göi lafaha’ö ira khö ndra talifusöda si no alawa ndröfi. Simane duma-duma no mege, imane Paul sohalöwö ba Mbetieli sogatini Peter tobali pengawas departemen, ”U’andrö wanuturu lala moroi khö Peter, ba ufarou göi dödö ndra talifusöda si so ba departemen ba wamalua simane da’ö.”

14. Hadia wamaha’ö nihalöda khö Waulo hegöi Timoteo ba ginötö falulu fohalöwö?

¹⁴ Aröu faehu wa’awuyu-wuyu Dimoteo moroi khö Waulo, ba no hauga fakhe sa’ae falulu fohalöwö ira. (Baso Filifi 2:20-22.) Imane Faulo ba niha Korindro, ”Ufatenge khömi Dimoteo andrö, onogu andrö, ba khö Zo’aya, somasi ndra’o, si lö faröi, da’ö dania zamasugi ba dödömi lala andrö khögu, ba khö Keriso Yesu, simane famaha’ögu fefu gofu heza, ba mbanua fefu.” (I Korindro 4:17) Ba da’ö ta’ila wa Faulo hegöi Timoteo, falulu fohalöwö ira ba faoma latolo nawöra. Ibe’e ginötönia Faulo ba wamaha’ö Dimoteo ’lala andrö khönia, ba khö Keriso Yesu’, ba ihaogö ifaha’ö ia Dimoteo. I’omasi’ö sibai Dimoteo Faulo. Faduhu dödönia khö Dimoteo wa hasambalö i’ame’egö tödö zoguna khö ndra talifusö si so ba Korindro. Tola la’o’ö hadia nifalua Waulo andre ira satua sokubaloi ba ginötö lafaha’ö ndra talifusöda ira matua ba wangai halöwö ba mbanua niha Keriso.

15. Hewisa wanolo Roma 12:3-5 ya’ita ena’ö tatema’ö hadia ia zi tebulö?

¹⁵ No so ita ba ginötö si tohude, börö me itugu tedou organisasi Yehowa si so ba gulidanö andre. Eluahania, oya zi tebulö salua. Tola molua-lua ba wa’aurida hadia zi tebulö andrö ba lö aoha ba wamalua da’ö. Hiza’i, na so khöda wangide-ngide’ö ba ta’osambua’ö dödöda ba wamalua halöwö fanuriaigö moroi ba zomasi dödöda, tola tetolo ita. Na tafalua da’a, so khöda wahasara dödö. Isura Faulo ba niha Keriso si so ba Roma, ”Uwa’ö sa khömi, dozi ami, . . . böi fayaŵa zamösana, ha ndrohu-ndrohu, era-era zatua-tua yamu’alui.” Aefa da’ö, itutunö wa hulö simane ndroto-ndroto mboto si fabö’ö-bö’ö gunania, simane da’ö göi ndra talifusöda ba mbanua niha Keriso, fabö’ö-bö’ö halöwöra.—Roma 12:3-5.

16. Hadia manö zi tola lafalua ira niha Keriso ena’ö so wa’atulö hegöi fahasara dödö ba organisasi Yehowa?

¹⁶ Fefu nono mbanua Yehowa, omasi ira latuhini Mbanua Lowalangi ba lafalua gofu hadia ia ni’andrö khöra. Talifusöda si no alawa ndröfi, tola lafaha’ö zi bohou  ebua. Tola ladou’ö wangai halöwö ira si bohou ebua si fao fangide-ngide’ö ba famosumange satulö. Fefu ndra talifusöda ira matua si no mangowalu, tola göi la’ame’egö tödö wanolo moroi khö wo’omora ba ginötö so zi tebulö. Fo’omo ira alawe göi tola la’o’ö duma-duma Ferikila, si lö faröi ba wanolo wo’omonia sotöi Akila.—Halöwö Zinenge 18:2.

17. Ifaha’ö ndra nifaha’önia Yesu ba wamalua hadia ia?

¹⁷ Ibe’e duma-duma si sökhi Yesu sanandrösa ba wamaha’ö niha bö’ö. I’ila Yesu wa moguna so niha bö’ö zanohugö halöwönia andrö. Tatu aboto ba dödönia wa lö mo’ahonoa ndra nifaha’önia. Hiza’i, faduhu göi dödönia wa tola lafalua halöwö sabölö ebua moroi ba nifaluania. (Yohane 14:12) Ihaogö wamaha’ö ya’ira irege tola lafalua halöwö fanuriaigö ba zi sagörö ulidanö.—Kolose 1:23.

18. Hadia halöwö ni’okhögöda ba zi so miföna? Hadia halöwö ni’okhögöda iada’a?

¹⁸ Me no aefa mate Yesu, isusugi ia Yehowa ba ibe’e khönia halöwö si tohude. Halöwö nibe’e khönia abölö ”alawa yaŵa zamatörö andrö fefu, ba yaŵa zalaŵa andrö, ba yaŵa zabölö, ba yaŵa zo’aya andrö”. (Efeso 1:19-21) Hewa’ae mate ita fatua lö tohare Hamagedo, hiza’i na tobali ita samosumange Yehowa si lö faröi hasambalö tesusugi ita ba tatema halöwö si sökhi sibai ba gulidanö si bohou. Iada’a, fefu ita tafalua halöwö si sökhi ya’ia da’ö ba wanuriaigö turia somuso dödö hegöi ba wamaha’ö niha bö’ö. Andrö, he iraono mazui si no alawa ndröfi ’ya’a’oi so khöda wangai halöwö Zo’aya andrö, böi yamamalö-malö’.—I Korindro 15:58.