Moguna Nasa Wangide-ngide’ö
”Ba zangide-ide’ö ya’ia, ba so wa’atua-tua.”
SINUNÖ: 38, 11
1, 2. Hadia mbörö wa itimbagö Zaulo Lowalangi? (Faigi gambara ba wamobörö wamaha’ö.)
ME IFILI Zaulo Yehowa tobali razo, so khö Zaulo wangide-ngide’ö. (I Zamueli 9:1, 2, 21; 10:20-24) Hiza’i, me no aefa tobali ia razo, ihalö halöwö si tenga sinangea ifalua. Ba zi sambua inötö, tohare ngahönö ndrawa Wilisiti ba wanuwö ndraono Gizara’eli. Sama’ele’ö sotöi Samueli iwa’ö khö Zaulo wa hasambalö tohare ia ba wame’e sumange khö Yehowa. Hiza’i, fatua lö tohare Zamueli, ata’u sibai ndraono Gizara’eli ba ato zondröi Saulo. Andrö, lö ahono dödönia ba lö ibaloi we’aso Zamueli, irege ya’ia samösa zame’e sumange andrö. Tebai ifalua da’ö sindruhunia, ba lö omasi Yehowa ba nifaluania andrö.
2 Me no irugi Zamueli, mofönu ia khö Zaulo me lö i’o’ö nifakhoi Yehowa. Hiza’i, i’osilömangilagö zala nifaluania. I’alui dani ba itahigö niha bö’ö ba zala nifaluania. (I Zamueli 13:10-14) I’otarai da’ö, oya ifalua halöwö si tenga sinangea ifalua. Andrö wa itimbagö ia Yehowa tobali razo. (I Zamueli 15:22, 23) Sökhi wa’auri Zaulo me mböröta, hiza’i sindruhu-ndruhu lö sökhi wa’aurinia ba gafuriata.
3. (a) Hadia manö niwa’ö niha sanandrösa ba wangide-ngide’ö? (b) Hadia manö wanofu-nofu nitutunöda?
3 Ato niha iada’a, lö la’okhögö wangide-ngide’ö. Hewa’ae simanö, lasöndra wa’auri si sökhi ba alua gohitö dödöra. Si fao fa’asiliawa lawa’ö wa abölö tohude ira moroi ba niha bö’ö. Duma-dumania, imane samösa aktor hegöi politisi, ”Lö moguna khögu ngawua wehede fangide-ngide’ö. Ba utötöna wa lö irai u’oguna’ö ia.” Hiza’i, hana wa moguna sibai so wangide-ngide’ö ba niha Keriso? Hadia wangide-ngide’ö andrö? Ba wamaha’ö da’a, tatutunö wanema li ba wanofu-nofu andrö. Ba wamaha’ö migu fönada, ta’ila hewisa ena’ö lö aetu so khöda wangide-ngide’ö hewa’ae abua ba wamalua ya’ia.
HANA WA MOGUNA SIBAI WANGIDE-NGIDE’Ö?
4. Hadia gamuata wayawasa andrö?
4 Itutunö Sura Ni’amoni’ö wa no aröu faehu ira wayawasa hegöi fangide-ngide’ö. (Baso Gamaedola 11:2.) Imane Dawido khö Yehowa, ”Timba khö genonimö zi fayawa.” (Zinunö 19:14) Hadia gamuata wayawasa andrö? Eluahania, tafalua zi tenga halöwöda, tola manö börö me lö khöda fombaloi mazui börö wa’asiliawada. Fefu ita tola so khöda wayawasa börö me lö mo’ahonoa ita. Hiza’i, simane si no tafaha’ö ita moroi ba duma-duma Razo Saulo, lö omasi Yehowa na no to’ölö-ölö ita wamalua da’ö. Imane ba Zinunö 119:21 wa ’itenawa wayawasa’ Yehowa. Hadia mbörö?
Tola taforoma’ö wa tafosumange Yehowa na so khöda wangide-ngide’ö
5. Hadia mbörö wa no sala sebua gamuata wayawasa?
5 Si oföna sibai, na tafalu-falua manö hadia ia zomasi dödöda, no taforoma’ö wa lö tafosumange Yehowa si tobali Lowalangida hegöi Samatörö ya’ita. Si dua, ba ginötö tafalua hadia zi tenga halöwöda, tola manö so wasosota ba gotaluada niha bö’ö. (Gamaedola 13:10) Si tölu, la’ailasi ita niha bö’ö na tafalu-falua manö gofu hadia ia zomasi dödöda. (Luka 14:8, 9) Ba da’ö tola ta’ila hadia mbörö wa omasi Yehowa na so khöda wangide-ngide’ö.
HADIA MANÖ ZI TEFARAHU BA WANGIDE-NGIDE’Ö?
6, 7. Hadia geluaha wangide-ngide’ö?
6 Niha Keriso si so fangide-ngide’ö lö khönia fa’asiliawa. Ba wamaiginia abölö tohude niha bö’ö moroi khönia. (Filifi 2:3) I’ila wa so zi tebai ifalua ba si fao fangide-ngide’ö itutunö hadia zalania. Omasi ia ifondro-ndrongo mbua gera-era niha bö’ö ba ihalö wamaha’ö moroi ba da’ö. Niha sangokhögö fangide-ngide’ö sindruhu-ndruhu i’omasi’ö ia Yehowa.
7 Itutunö Sura Ni’amoni’ö wa niha si so fangide-ngide’ö i’ila ba ifaduhu’ö wa so zi tebai ifalua mazui si lö tetehegö khönia ba wamalua. Da’a zanolo ya’ia ba wamosumange hegöi ba wamalua si sökhi ba niha bö’ö.
8. Ena’ö lö aetu so khöda wangide-ngide’ö, hadia wangera-ngera sinangea tatimbagö?
8 Hiza’i, ba zi lö tadöna-döna tola manö ibörögö tumbu ba wangera-ngerada wayawasa. Roma 12:16) Mazui, ibörögö ta’alui lala ena’ö lasuno ita niha bö’ö. (I Timoteo 2:9, 10) Tola manö göi ibörögö tafatörö niha bö’ö sanandrösa ba zi tola hegöi si tebai lafalua.
9. Hana wa so niha sangai halöwö si tenga halöwönia? Be’e duma-duma moroi ba Zura Ni’amoni’ö.
9 Tola manö tahalö zi tenga halöwöda na lö talawa gisö-isö dödöda si fasala. Ato zamalua da’ö börö me omasi ira na lasuno ira niha, afökhö dödöra ba niha bö’ö, mazui börö me lö itaha wönunia. Simane nitutunö ba Zura Ni’amoni’ö, da’ö zalua khö Gabisalomi, Usia, hegöi Nebukanesa. Ifatunö khöra Yehowa wa moguna so khöra wangide-ngide’ö.
10. Hana wa tebai tahuku niha bö’ö? Be’e duma-duma moroi ba Zura Ni’amoni’ö.
10 So dani tanö bö’ö wa itaria so zi lö mangoroma’ö fangide-ngide’ö. Angeraigö duma-duma Gabimelekhi hegöi Fetero. (I Moze 20:2-7; Matai’o 26:31-35) Hadia so khöra wa’asiliawa? Mazui, hadia lö la’ila zindruhu mazui lö la’angeraigö hadia nifaluara? Börö me lö ta’ila nösi dödö niha bö’ö, andrö wa tebai tahuku ira.
FETAROU BA ZI NO IFAKHOI LOWALANGI
11. Hadia zinangea aboto ba dödöda?
11 Niha si so fangide-ngide’ö, aboto ba dödönia hadia wetaronia ba zi no ifakhoi Lowalangi. Yehowa no Lowalangi si toföfö. Ibe’e halöwö ba niha si so ba mbanua niha Keriso. Fefu ita so halöwöda. Ibe’e khöda Yehowa mbuala simane fa’atua-tua, nekhe-nekhe danga hegöi fa’abölö si fabö’ö-bö’ö, ba itehegö khöda wangoguna’ö buala andrö molo’ö zomasi ita. Na so khöda wangide-ngide’ö, tola ta’oguna’ö mbuala nibe’e khöda si tefaudu ba zomasi Yehowa. (Roma 12:4-8) Aboto ba dödöda wa itötöna Yehowa ena’ö ta’oguna’ö da’ö ba wamosumange ya’ia hegöi ba wanolo niha bö’ö.
Hadia wamaha’ö nihalöda khö Yesu ba ginötö tebulö halöwö nibe’e khöda? (Faigi ngenoli si-12-14)
12, 13. Hadia zinangea tatörö tödöda ba ginötö tebulö halöwöda khö Yehowa?
12 Itugu numalö ginötö, tola manö tebulö halöwöda khö Yehowa. Duma-dumania, angeraigö hadia manö zi tebulö salua khö Yesu. Si oföna, fao ia khö Namania. (Gamaedola 8:22) Itolo göi Yehowa ba wamazökhi mala’ika, ulidanö, hegöi niha. (Kolose 1:16) Aefa da’ö, tefatenge ia ba gulidanö. Tumbu ia tobali ono sawuyu ba itugu ebua-bua ia tobali satua. (Filifi 2:7) Me no aefa mate ia, mangawuli ia ba zorugo, ba me döfi 1914 tobali ia Razo ba Mbanua Lowalangi. (Heberai’o 2:9) Ba zi so miföna, na no aefa mamatörö ia tobali Razo ba zi hönö fakhe wa’ara, ifuli itou’ö Wamatörö andrö ba danga Yehowa si no tobali ”Lowalangi ba khöra fefu”.
13 Tola manö göi oya zi tebulö salua ba wa’aurida. Itataria, tebulö halöwöda börö gangetula nihalöda. Duma-dumania, te lö sangowalu ita iada’a, hiza’i ba zi so miföna omasi ita mangowalu. Mazui, tahalö gangetula ena’ö so khöda ndraono. Aefa da’ö, tabulö’ö wa’aurida ena’ö tola tahalö halöwö safönu inötö khö Yehowa. Tola manö göi tebulö halöwöda börö zalua khöda. Hiza’i, hewa’ae awuyu-wuyu mazui atua ita, mofökhö mazui
14. Hewisa wa tola itolo ita fangide-ngide’ö andrö ba wangokhögö fa’omuso dödö gofu hadia ia zalua?
14 Omuso dödö Yesu ba wanema’ö halöwö nibe’e Yehowa khönia, ba tola göi omuso dödöda. (Gamaedola 8:30, 31) Niha si so fangide-ngide’ö, omuso dödönia ba halöwö nibe’e khönia ba mbanua niha Keriso. Lö i’osambua’ö dödönia ba nifalua niha bö’ö. Hiza’i, omuso dödönia ba wamalua halöwönia ba organisasi Lowalangi. Ba wamaiginia, moroi khö Yehowa fefu da’ö. Niha si so fangide-ngide’ö i’ame’egö tödö niha bö’ö ba omasi ia ba wanolo ya’ira. Aboto ba dödönia wa ibe’e göi khöra halöwö Yehowa.
FANGERA-NGERA SATULÖ SANANDRÖSA BA WANGIDE-NGIDE’Ö
15. Hadia wamaha’ö si tola tahalö moroi ba duma-duma Gideono?
15 Duma-duma niha sangoroma’ö fangide-ngide’ö ya’ia da’ö Gideono. Me ituyu ia Yehowa ba wangefa’ö ndraono Gizara’eli moroi ba danga ndraono Midiano, imane Gideono, ”No fondrege zi numana ba mado Manase watalifusöta khöma, ba ya’odo, ba no fondrege zide-ide ba zi sambua omo ndra amagu.” (Zanguhuku 6:15) Hiza’i, faduhu dödö Gideono khö Yehowa ba itema’ö halöwö da’ö. Iforege ba wamaha’ö ya’ia sanandrösa ba zomasi Yehowa. Aefa da’ö, i’andrö wanuturu lala moroi khö Yehowa ba wangandrö. (Zanguhuku 6:36-40) Niha sabölö ba si lö fa’ata’u Gideono, hiza’i atua-tua göi ia ba so khönia wangelama.
16, 17. Hewisa wa tola tedou ba wamati niha si so fangide-ngide’ö?
16 Na itema’ö halöwö si bohou zi samösa niha mazui na omasi ia idou’ö wangai halöwö ba mbanua niha Keriso, tenga da’ö geluahania wa lö khönia fangide-ngide’ö. Imane Sura Ni’amoni’ö wa sökhi na so zamosumange Yehowa somasi mangai halöwö salahi ndra talifusönia, ba ena’ö oroma wa’atedounia. (I Timoteo 4:13-15) Hiza’i, hadia moguna tafalua halöwö si bohou ba wangoroma’ö fa’atedouda? Lö’ö. Fefu ita tola taforoma’ö mbua-bua niha Keriso hegöi fa’atua-tua nibe’e Yehowa khöda irege tola tafalua zabölö sökhi ba wamosumange ya’ia hegöi ba wanolo niha bö’ö.
17 Fatua lö itema’ö halöwö andrö, niha si so fangide-ngide’ö i’ila hadia ni’andrö khönia. Ilau mangandrö sanandrösa ba halöwö andrö ba sindruhu-ndruhu i’angeraigö hadia tola ifalua da’ö. Hadia tobönö ginötönia hegöi fa’abölönia ba wamalua ngawalö zoguna tanö bö’ö? Na tebai atö, hadia tola ibe’e ösa halöwönia andrö ba niha bö’ö? Na no aefa i’angeraigö da’ö, niha si so fangide-ngide’ö tola ihalö gangetula wa tebai ifalua halöwö si bohou andrö. Na niha si so fangide-ngide’ö göi ita, tola tafalua da’ö.
18. (a) Hadia nifalua niha si so fangide-ngide’ö ba ginötö itema halöwö si bohou? (b) Hewisa wanolo Roma 12:3 ya’ita ena’ö so khöda wangide-ngide’ö?
18 Omasi Yehowa na lö ’fayawa ita ba wanörö lalada’ ba wefao khönia. (Mikha 6:8) Andrö, ba ginötö tatema halöwö si bohou, moguna ta’alui wanuturu lala moroi khönia ba ta’andrö ena’ö ibe’e khöda wanolo, simane nifalua Gideono. Moguna tahaogö ta’angeraigö niwa’ö Yehowa khöda nifa’emania ba Zura Ni’amoni’ö hegöi ba organisasinia. Datatörö tödöda wa gofu hadia ia nifaluada ba wamosumange ya’ia, tenga börö wa’abölöda da’ö, hiza’i börö me so khö Yehowa wangide-ngide’ö ba omasi ia itolo ita. (Zinunö 18:36) Niha si so fangide-ngide’ö lö ba dödönia wanguma’ö wa abölö tohude ia moroi ba danö bö’ö.
19. Hana wa moguna so khöda wangide-ngide’ö?
19 Niha si so fangide-ngide’ö, aboto ba dödönia wa ha Yehowa zi tola manema fefu lakhömi, börö me ya’ia Zomböi hegöi Fondrege Zalawa ba mbanua si yawa awö danö. (Fama’ele’ö 4:11) Na so khöda wangide-ngide’ö, tola owua-wua dödöda ba wamalua gofu hadia ia zi tola tafalua ba wamosumange Yehowa. Ta’osinangegö göi hadia mbua gera-era hegöi nirasoi ndra talifusöda. Na tafalua da’ö tola so wahasara dödö ba gotaluada. Niha si so fangide-ngide’ö, ihaogö i’angeraigö fatua lö ihalö gangetula ba wamalua hadia ia, irege tola itimbagö wamalua horö sebua. Omuso sibai dödö Yehowa ba niha sangokhögö fangide-ngide’ö. Moroi ba da’ö fefu, ta’ila wa moguna sibai wangide-ngide’ö ba nono mbanua Lowalangi. Ba wamaha’ö migu fönada, tatutunö hewisa ena’ö lö aetu so khöda wangide-ngide’ö hewa’ae abua ba wamalua ya’ia.