1-2. (a) Hadia lua-lua wehede nisura ba Yesaya 41:10 khö dalifusöda Yoshiko? (b) Haökhö manö moguna wehede si so ba ayati andrö?

SO SAMÖSA dalifusöda ira alawe si lö faröi sotöi Yoshiko, itema duria si lö baga. Iwaʼö doto wa hatö hauga waŵa tö waʼanau nosonia. Hewisa dödö Yoshiko me irongo daʼö? Itörö tödönia ayati Zura Niʼamoniʼö somasi ia, yaʼia daʼö Yesaya 41:10. (Baso.) Aefa daʼö, ihaogö ifatunö khö doto wa lö khönia faʼataʼu börö me igogohe dangania Yehowa. * Fehede si so ba ayati daʼö zanolo talifusöda andrö ba wamaduhusi tödö Yehowa. Tola göi tobali fanolo khöda ayati andrö enaʼö taʼokhögö waʼahono dödö ba wanaögö abula dödö sebua. Enaʼö tola aboto ba dödöda hewisa wa tola alua daʼö, datatutunö hadia mbörö wa ibeʼe Lowalangi wehede daʼö khö Yesaya.

² Ba wamobörö, iʼandrö Yehowa khö Yesaya ba wanura fehede daʼö ba wondrara tödö niha Yahudi nitiboʼö ba Mbabilona. Hizaʼi, irorogö wehede andrö Yehowa enaʼö tola moguna ba nono mbanuania maʼafefu iadaʼa, tenga ha ba niha Yahudi nitiboʼö. (Yes. 40:8; Rom. 15:4) Iadaʼa, auri ita ba ”mbaŵa si lö sökhi ba ngaluo safuria,” andrö wa moguna sibai khöda wondrara dödö si tesöndra ba mbuku Yesaya.​—2 Tim. 3:1.

3. (a) Hadia mbuʼusa li si tesöndra ba Yesaya 41:10 si no mufili tobali ayati ba ndröfi 2019? (b) Hana wa moguna khöda mbuʼusa li andrö?

³ Ba artikel daʼa, tafahaʼö ita ba zi tölu mbuʼusa li Yehowa nisura ba Yesaya 41:10. (1) Fao-fao khöda Yehowa, (2) Lowalangida  ia, ba (3) hasambalö itolo ita. Moguna khöda mbuʼusa li andre * börö me oya gabula dödö nitaögöda simane salua khö Yoshiko. Tataögö göi gabula dödö börö ngawalö zi lö sökhi salua ba gulidanö andre. So ösa ba gotaluada zanaögö famakao moroi khö ndra samatörö. Datazara-zara wanutunö si tölu mbuʼusa li andrö.

4. (a) Hadia mbuʼusa li siföföna nitutunöda? (Faigi nisura ba gahe zura.) (b) Hewisa wangoromaʼö Yehowa waʼomasinia khöda? (c) Hadia nirasoimö ba ginötö öbaso daromali Lowalangi?

⁴ Si oföna, irara dödöda Yehowa faoma buʼusa li andre, ”Böi ataʼuʼö, börö me fao ndraʼo khöu.” * Iforomaʼö Yehowa wa iʼameʼegö tödö ba iʼomasiʼö ita. Faigi hewisa wangoromaʼönia khöda daʼö me imane, ”Me no ebua mböliu, wamaigigu, me afökhö khögu ndraʼugö, ba me omasido ndraʼugö.” (Yes. 43:4) Lö hadöi zi so ba gulidanö hegöi ba mbanua zi tola manaha Yehowa ba wangomasiʼö ono mbanuania. Lö irai tebulö waʼalöfaröinia khöda. (Yes. 54:10) Börö me iʼomasiʼö ita ba fahuwu ia khöda, daʼö mbörö wa tola lö hadöi khöda faʼataʼu. Ilumöʼö ita iadaʼa simane folumöʼönia zi fahuwu khönia Aberamo (Aberahamo). Imane Yehowa khönia, ”Böi ataʼu ndraʼugö, Aberamo. Baluseu ndraʼo.”​—1 Moz. 15:1.

5-6. (a) Hezo tola taʼila wa omasi itolo ita Yehowa ba wanaögö abula dödö? (b) Hadia wamahaʼö si tola tahalö moroi ba duma-duma Yosikho?

⁵ Aboto ba dödöda wa omasi itolo ita Yehowa ba wanaögö abula dödö börö me no fawuʼu li ia ba nono mbanuania, ”Na ötörö nidanö, ba sodo ba ngaiu, ba na ötörö hohou, ba lö tola alömö ndraʼugö. Na ötörö galitö, ba si lö akhozi ndraʼugö ba lö tola iraʼi ndraʼugö holahola.” (Yes. 43:2) Hadia geluahania daʼö?

⁶ Lö fawuʼu li Yehowa ba wangeheta fefu abula dödö sebua salua ba waʼaurida. Hizaʼi, lö itehegö alua fefu gabula dödöda simane ”hohou” irege lö hadöi khöda faʼabölö ba wamosumange yaʼia. Lö göi itehegö gabula dödö simane ’alitö’ ba wamakao  yaʼita sagötö faʼara. Ifabuʼu khöda wa hasambalö fao-fao ia khöda. Itolo ita ba wanaögö fefu abula dödö. Hadia nifalua Yehowa? Itolo ita enaʼö alö waʼataʼuda irege lö faröi ita khönia hewaʼae tataögö waʼamate. (Yes. 41:13) Daʼö nirasoi Yoshiko si no mutötöi ba wamobörö. Imane ononia alawe, ”Ahöli-höli dödöma börö me lö aombö dödö mamagu. Maʼila wa ibeʼe khönia waʼahono dödö Yehowa. Irege ngaluo waʼamatenia, lö iböhöli mamagu fahuhuo khö ndra perawat hegöi ba niha sofökhö tanö böʼö sanandrösa khö Yehowa hegöi buʼusa linia.” Hadia wamahaʼö si tola tahalö moroi ba duma-duma Yosikho? Na faduhu dödöda ba mbuʼusa li Lowalangi me imane, ”Löʼö sa aefado khöu”, hasambalö barani ita ba so khöda waʼabölö ba wanaögö abula dödö.

7-8. (a) Hadia mbuʼusa li si dua sinangea taʼangeragö ba hadia geluahania daʼö? (b) Hadia mbörö wa iwaö Yehowa ba niha Yahudi si so ba nahia waniboʼö, ”Böi aombö dödöu”? (c) Hadia wehede si tesöndra ba Yesaya 46:3, 4 sanolo ono mbanua Lowalangi enaʼö böi ataʼu?

⁷ Nehegö mbuʼusa li si dua nisura ba Yesaya, ”Böi aombö dödöu, Lowalangiu sa ndraʼodo.” Hadia geluaha wehede daʼö? Ngawua wehede ’aombö dödö’ ba li sindruhunia tola daʼö geluahania ”asese mufaigi-faigi furi börö waʼataʼu ba ngawalö hadia ia zi möi famaʼala” mazui ”ataʼu simane niha si göna sikho”.

⁸ Hana wa iwaʼö Yehowa ba niha Yahudi si tobali sawuyu ba Mbabilona ”böi aombö dödöu”? Börö me aboto ba dödönia wa hasambalö so waʼataʼu ba niha si so ba soi andrö. Hadia mbörö waʼataʼu ira? Tetiboʼö niha Yahudi 70 fakhe waʼara ba me arakhagö awai mbaŵa waniboʼö andrö tohare zaradadu Media-Persia sagabölö ba wanuwö Mbabilona. Iʼogunaʼö ira Yehowa ba wangefaʼö ono mbanuania moroi ba Mbabilona. (Yes. 41:2-4) Ba ginötö daʼö, me laʼila niha Mbabilona hegöi soi tanö böʼö wa no itugu ahatö nudura, ladouʼö waʼabarani ba lamane khö nawöra ”Abeʼeʼö dödöu.” Itugu oya lafazökhi nadu ba latötöna wa tola möi folumöʼöra daʼö. (Yes. 41:5-7) Hizaʼi, fehede Yehowa nisura Yesaya andrö tobali fangahono dödö niha Yahudi si so ba waniboʼö. Imane Yehowa, ”Ba yaʼugö, Iraono Gizaraʼeli, enonigu [tenga simane soi böʼö] . . . Böi aombö dödöu, Lowalangiu sa ndraʼodo.” (Yes. 41:8-10, NW) Nehegö me imane Yehowa, ”Lowalangiu sa ndraʼodo.” Iʼogunaʼö wehede daʼa Yehowa ba wangaroʼö dödö nono mbanuania si lö faröi wa lö irai iʼolifugö ira. Lowalangira sa ia ba lö tebulö tobali ono mbanuania ira. Imane khöra, ”Uhalö . . . ba ufaigi wangorifi.” Fehede fondrara dödö ba famarou dödö andre tatu möi fangaro niha Yahudi si so ba nahia waniboʼö.​—Baso Yesaya 46:3, 4.

9-10. Hana wa moguna böi ataʼu ita? Beʼe duma-duma.

⁹ Iadaʼa, monönö waʼaombö-aombö dödö niha ba zi fasuida börö me itugu lö sökhi zalua ba gulidanö andre. Tola manö, fagölö gabula dödöda khöra. Hizaʼi lö moguna ataʼu ita. Imane Yehowa, ”Lowalangiu sa ndraʼodo.” Hadia mbörö wa tola tobali dane-dane waʼahono dödö ngawua wehede daʼa?

¹⁰ Angeragö duma-duma daʼa: So darua ndra matua sotöi Jim hegöi Ben si so ba göfa sihombo si tolega-lega börö waʼabölö-bölö nangi. Me tolega-lega göfa sihombo, imane pilot ba niha si so ba daʼö fefu, ”Mihaogö wamasa sabuk pengamanmi. Ara maʼifu tolega-lega ita.” Aombö sibai dödö Jim. Aefa daʼö imane pilot andrö, ”Yaʼo pilot  göfa sihombo andre. Böi miʼaombösi tödö, lö hadia ia zalua.” Ifalikhö-likhö ia Jim ba imane, ”Hezo tola iʼila wa lö hadia ia zalua?” Iʼila Jim wa maʼifu lö faʼaombö dödö khö Ben. Manofu khönia Jim, ”Hana wa ahono sibai dödömö?” Iboho mbawa Ben ba imane, ”Börö me aboto sibai ba dödögu pilot daʼa. Yaʼia andrö bapagu!” Aefa daʼö imane Ben, ”Omasido ufatunö khömö sanandrösa khö bapagu. Faduhu dödögu wa hasambalö göi so khöu waʼahono dödö na aboto ba dödömö ia ba öʼila waʼonekhenia.”

11. Hadia wamahaʼö si tola tahalö moroi ba duma-duma zi darua niha si so ba göfa sihombo?

¹¹ Hadia wamahaʼö si tola tahalö moroi ba duma-duma andrö? Simane Ben, tola so khöda waʼahono dödö börö me no aboto ba dödöda Namada Yehowa si so ba zorugo. Taʼila wa hasambalö itolo ita enaʼö anau gölöda ba wanaögö abula dödö sebua ba ngaluo safuria andre. (Yes. 35:4) Börö me faduhu dödöda khö Yehowa, andrö wa tola so khöda waʼahono dödö hewaʼae so waʼataʼu ba niha si so ba zi fasuida. (Yes. 30:15) Tola göi taʼoʼö nifalua Ben na tafatunö ba niha böʼö hadia mbörö wa tafaduhusi tödö Lowalangi. Gofu hadia ia gabula dödö salua khöra, tola faduhu dödöra wa hasambalö itolo ira Yehowa.

12. (a) Hadia mbuʼusa li si tölu sinangea taʼangeragö? (b) Hadia nitörö tödöda sanandrösa khö Yehowa na tabaso ngawua wehede ’danga’?

¹² Angeragö mbuʼusa li si tölu nisura Yesaya, ”Ulumöʼö ndraʼugö, ba utoloʼö.” Itutunö Yesaya hewisa Yehowa ba wangabeʼeʼö hegöi ba wanolo ono mbanuania me imane, ”So Zoʼaya Yehowa, sabölö ia, tangania zamolala hadia ia khönia.” (Yes. 40:10) Asese iʼogunaʼö Sura Niʼamoniʼö ngawua wehede ’danga’ ba woʼamaedolagö  faʼabölö. Tobali, fehede ”tangania zamolala hadia ia khönia” zamasugi ba dödöda wa Yehowa andrö Razo fondrege zabölö. Me föna, iʼogunaʼö waʼabölönia si lö famaedo andrö ba wanolo hegöi ba wangoʼawögö ono mbanuania. Iadaʼa, lö mamalö iʼabölöʼö ba ilumöʼö niha si faduhu tödö khönia.​—5 Moz. 1:30, 31; Yes. 43:10.

13. (a) Ba ginötö hadia ifalua mbuʼusa linia Yehowa ba wolumöʼö yaʼita? (b) Hadia mbuʼusa li sameʼe khöda faʼabölö hegöi faʼafaduhu dödö?

¹³ Ifalua mbuʼusa linia Yehowa me imane, ”Ulumöʼö ndraʼugö” ba ginötö lafakao ita udu. Ba zi hauga soi ba gulidanö andre, latandraigö labatogö ira udu halöwö organisasi hegöi fanuriagö nifaluada. Hewaʼae simanö, lö aombö sibai dödöda ba zalua andrö. No ibeʼe khöda Yehowa mbuʼusa li si tola mangabölöʼö ba sameʼe khöda faʼabarani yaʼia me imane, ”Fefu wangöna, nibago ba wamakiko yaʼugö, ba si lö boto.” (Yes. 54:17) Daʼö zamasugi ba dödöda zi tölu balö sabölö moguna.

14. Hana lö moguna tokea ita na so nudu si fatuwu khöda?

¹⁴ Si oföna, yaʼita soloʼö khö Keriso hasambalö fatuwu niha khöda. (Mat. 10:22) No ifatunö Yesu wa hasambalö tefakao ndra nifahaʼönia sagötö ngaluo safuria andre. (Mat. 24:9; Yoh. 15:20) Si dua, famaʼeleʼö Yesaya zangombakha wa tenga ha fatuwu ira khöda, hizaʼi oya ngawalö wangöna niʼogunaʼöra ba wolawa yaʼita. Fangöna andrö yaʼia daʼö falimosa hizaʼi hulö atulö ba wamaigida, laböbögö khöda zi lö duhu, ba lafakao ita. (Mat. 5:11) Lö ibatogö ira Yehowa ba wangogunaʼö fangöna andrö ba wolawa yaʼita. (Ef. 6:12; Fam. 12:17) Hizaʼi, lö moguna ataʼu ita. Hadia mbörö?

15-16. (a) Hadia dane-dane si tölu sinangea tatörö tödöda, ba hadia gamakhaitania ba Yesaya 25:4, 5? (b) Hewisa Yesaya 41:11, 12 woʼamaedolagö niha solawa yaʼita?

¹⁵ Angeragö dane-dane si tölu sinangea tatörö tödöda. Imane Yehowa, ”fefu wangöna” niʼogunaʼö ba wolawa yaʼita ”ba si lö  boto.” Simane towa solumöʼö yaʼita moroi ba mbade sabölö-bölö, simanö göi wolumöʼö Yehowa yaʼita moroi ba ”wönu zamalangögö”. (Baso Yesaya 25:4, 5.) Tebai lafakao ita ira udu andrö sagötö faʼara.​—Yes. 65:17.

¹⁶ So danö böʼö nasa niwaʼö Yehowa khöda irege monönö waʼafaduhu dödöda khönia. Ihaogö izara-zara wanutunö khöda hadia zalua ba niha ”si falukha faʼaila”. (Baso Yesaya 41:11, 12.) Gofu hewisa wamorege nifalua nudu ba wolawa yaʼita, hasambalö fagölö lua-luania: Fefu zi faʼudu ba nono mbanua Lowalangi ”tobali si lö boto ba si tekiko”.

17-18. (a) Hana wa tola itugu faduhu dödöda khö Lowalangi na tabaso Zura Niʼamoniʼö? Beʼe duma-duma. (b) Hadia gunania khöda na taʼangerönusi ayati si no mufili ba ndröfi 2019?

¹⁷ Tola itugu faduhu dödöda khö Yehowa na sindruhu-ndruhu aboto ba dödöda ia. Sambua lala enaʼö aboto ba dödöda Lowalangi yaʼia daʼö na tabaso ba taʼangerönusi Zura Niʼamoniʼö. Oya waö-waö nisura ba Zura Niʼamoniʼö zangoromaʼö lala Yehowa ba wolumöʼö ono mbanuania me föna. Daʼa zangaroʼö tödöda wa hasambalö irorogö ita iadaʼa.

¹⁸ Angeragö duma-duma si baga niʼogunaʼö Yesaya ba woʼamaedolagö lala Yehowa ba wolumöʼö yaʼita. Iʼamaedolagö Yehowa tobali kubalo ba ifotöi nono mbanuania andrö biri-biri nikubaloi. Imane Yesaya sanandrösa khö Yehowa, ”Ihagi nono mbiri-biri andrö, iʼohe, ba dotonia.” (Yes. 40:11) Ba ginötö tarasoi wa italagui ita Yehowa, tatu manö so khöda waʼahono dödö. Enaʼö lö mamalö so khöda waʼahono dödö hewaʼae so gabula dödö, lafili ira sawuyu si lö faröi ba satua-tua ayati ba Yesaya 41:10 tobali ayati ba ndröfi 2019, ”Böi aombö dödöu, Lowalangiu sa ndraʼodo.” Angerönusi wehede si möi fondrara dödö andre. Hasambalö möi fangabölömö daʼa ba wanaögö abula dödö salua.