1-3. (a) Hana wa omasi Yehowa khö Zelomo ba hadia manö howu-howu nitemania? (b) Hadia wanofu-nofu nibeʼeda fanema li ba wamahaʼö daʼa?

TOBALI razo ba Gizaraʼeli Zelomo me awuyu-wuyu ia. Ba wamobörö wamatörönia, ifalukhaisi ia Yehowa ba wangifi ba imane, ”Andrö hadia nibeʼegu khöu.” Itema Selomo, ”Ba yaʼo, ba iraono, lö uʼila hewisa wofanö ba lö uʼila hewisa wangawuli. . . . Ba enaʼö na öbeʼe khö genonimö andre dödö samondrongo li, enaʼö tola ifatörö mbanuamö andrö.” (1 Raz. 3:5-10) Iʼandrö Selomo ”dödö samondrongo li”. Daʼö zangoromaʼö wa aboto ba dödönia haniha ia. Andrö wa iʼomasiʼö ia Yehowa! (2 Zam. 12:24) Omasi sibai Lowalangi ba gangandröwa razo sawuyu-wuyu andrö irege ibeʼe khö Zelomo ”dödö satua-tua si so era-era”.​—1 Raz. 3:12.

² Sagötö lö faröi Zelomo, oya howu-howu nitemania. Tebeʼe khönia halöwö sebua ba wamazökhi osali ba ”döi Yehowa, Lowalangi Ndraono Gizaraʼeli”. (1 Raz. 8:20) Börö Lowalangi wa tola tobali ia niha satua-tua ba tehöngö. Fefu hadia ia niwaʼönia börö wanuturu lala moroi khö Lowalangi, no göi tesura ia ba zi tölu buku si so ba Zura Niʼamoniʼö. Sambua moroi ba gotaluania yaʼia daʼö buku Gamaedola.

³ Mato otu kali mutötöi ngawua wehede dödö ba mbuku Gamaedola. Duma-dumania, imane Gamaedola 4:23, ”Ba siaʼania, ba faigi-faigi dödöu.” Hadia geluaha ’dödö’ ba ayati daʼa? Taʼila wanema li moroi ba wanofu andrö ba wamahaʼö daʼa. Angeragö göi wanema li ba zi dombua wanofu tanö böʼö. Hewisa Zatana ba wamaigi-maigi, mazui ba wamakiko tödöda? Ba hadia zi tola tafalua ba wondrorogö tödöda? Enaʼö lö faröi ita khö Lowalangi, moguna aboto ba dödöda  wanema li moroi ba wanofu-nofu si tohude andrö.

4-5. (a) Hadia geluaha ’dödö’ ba Zinunö 51:8? (b) Hana wa muʼamaedolagö wondrorogö tödö andrö simane na tazago enaʼö lö mofökhö mbotoda?

⁴ Ngawua wehede ’dödö’ si so ba Gamaedola 4:23, eluahania ’tödö si tobini’. (Baso Zinunö 51:8.) Mazui tanö böʼönia eluaha ’dödö’ andrö yaʼia daʼö fangera-ngera, nirasoi dödö, ohitö dödö, ösi dödö fondrege zabakha. Daʼö zindruhunia ita, tenga botoda soroma moroi baero.

⁵ Angeragö hewisa waʼalömofökhö mboto ba woʼamaedolagö hawaʼamoguna wondrorogöda tödö si lö oroma andrö. Si oföna, enaʼö lö mofökhö mbotoda, moguna owölö-ölö ita wemanga ö si sökhi ba tafalua olahraga. Enaʼö lö mofökhö göi ita ba wamati, moguna taʼa gö ba wamati ba lö mamalö taforomaʼö wamati khö Yehowa. Taforomaʼö wamati ba ginötö tafalua hadia ia zi no tafahaʼö yaʼita ba tafatunö wamatida ba niha böʼö. (Rom. 10:8-10; Yak. 2:26) Si dua, itaria tawalingagö manö lö fökhöda börö me abölö mbotoda soroma moroi baero, hizaʼi sindruhunia so wökhöda. Simane daʼö göi ita ba wamati. Hewaʼae asese tafalua halöwö ba wamati ba moloʼö yaʼita no saʼae aro ita ba wamati, hizaʼi tola manö tedou wangera-ngera si fasala bakha ba dödöda. (1 Kor. 10:12; Yak. 1:14, 15) Moguna tatörö tödöda wa omasi ifaelungu lala wangera-ngerada Satana. Hewisa wamaluania daʼö? Hewisa wolumöʼöda yaʼita?

6. Hadia gohitö dödö Zatana, ba hadia nifaluania enaʼö mofozu daʼö?

⁶ Satana andrö samadaö ba sangosiwawöi goi-goi Yehowa ba ha tana khönia iʼalui. Omasi ia na tobali ita simane yaʼia. Tebai ifaso ita Satana ba wamalua simane nifaluania mazui simane niʼera-erania. Tobali, iʼalui lala tanö böʼö enaʼö mofozu gohitö dödönia. Duma-dumania, ifaʼaso ita ba gotalua niha si no ifaelungu. (1 Yoh. 5:19) Itötöna enaʼö fariawö ita khö ndra niha daʼö hewaʼae taʼila wa fariawösa si lö sökhi andrö tola ”ifakiko” wangera-ngera  hegöi nifaluada. (1 Kor. 15:33) Mofozu Zatana ba wangogunaʼö lala daʼa ba wamaelungu Razo Selomo. Ato ndra alawe si tenga samosumange Yehowa nihalönia tobali foʼomonia. Lua-luania ’lafowöhö ia’ ba ’lafangoloi dödönia’ ba wamosumange Yehowa.​—1 Raz. 11:3.

7. Hadia nasa niʼogunaʼö Zatana ba wamaelungu niha, ba hana wa moguna taʼangelamaisi daʼö?

⁷ Iʼogunaʼö Zatana cerita film ba TV ba wamaelungu fangera-ngera niha. Iʼila wa tenga ha tobali fondrara dödöda daʼö, hizaʼi tola ifahaʼö khöda hadia zinangeania taʼangeragö, tarasoi, mazui tafalua. Iʼogunaʼö Yesu göi cerita ba wamahaʼö. Duma-dumania, amaedola niʼogunaʼö Yesu sanandrösa ba niha Zamaria si sökhi tödö hegöi sanandrösa ba nono si taya. (Mat. 13:34; Luk. 10:29-37; 15:11-32) Hizaʼi, tola laʼogunaʼö cerita andrö niha si no ifaelungu Satana ba wamaʼala yaʼita. Moguna böi abua dambai ita. Tola tobali fondrara dödö ba famahaʼö khöda acara TV hewaʼae lö ifaelungu wangera-ngerada. Hizaʼi, moguna mangelama ita. Na tafili hiburan, moguna tasofu khöda samösa, ’Hadia ifahaʼö ndraʼo acara TV andre wa lö fasala na uʼoʼö gisö-isö nösi?’ (Gal. 5:19-21; Ef. 2:1-3) Hadia nifaluamö na öʼila wa so sambua acara TV mazui film si fao tödö ba lala wangera-ngera Zatana? Moguna ötimbagö daʼö simane na öʼaröuʼö ndraʼugö ba wökhö salio fatöfa!

8. Hewisa zatua wanolo iraono ba wondrorogö tödöra?

⁸ Na so khöu ndraono, tebeʼe khöu noro dödö sebua ba wondrorogö yaʼira enaʼö lö ifaelungu ira Satana. Börö me satua ami, tatu miforege ba wolumöʼö iraonomi moroi ba wökhö. Mizago enaʼö lö taʼunö nomo, ba mitiboʼö fefu hadia ia zi tola mangaʼasogö khömi fökhö hegöi ba ndraonomi. Simanö göi, moguna milumöʼö ndraonomi moroi ba acara TV, game elektronik, hegöi situs web si tola mamaelungu yaʼira faoma  fangera-ngera Zatana. No ibeʼe khömi halöwö Yehowa ba wondrorogö iraono enaʼö lö mofökhö ira ba wamati. (Gamd. 1:8; Ef. 6:1, 4) Andrö, böi ataʼuʼö ba wameʼe amakhoita ba nösi nomou si teʼodane-dane ba goi-goi Zura Niʼamoniʼö. Fatunö ba ndraonomi side-ide hadia zi tola mazui si tebai lafaigi ba TV, ba tolo ira enaʼö aboto ba dödöra hadia mbörö wa miwaʼö khöra daʼö. (Mat. 5:37) Na itugu ebua-bua ndraonomi, fomaha ira ba wamaehusi hadia zatulö awö zi lö atulö moloʼö goi-goi Yehowa. (Heb. 5:14) Mitörö tödömi wa lafahaʼö ira iraono moroi ba wehede ba töra-töra ba nifaluami.​—5 Moz. 6:6, 7; Rom. 2:21.

9. Hadia lala wangera-ngera nibeʼe Zatana, ba hana wa tola möi famaʼala daʼö?

⁹ Iforege göi Satana ba wamaelungu yaʼita enaʼö faduhu dödöda ba waʼatua-tua gulidanö, tenga ba lala wangera-ngera Yehowa. (Kol. 2:8) Nehegö sambua lala wangera-ngera nibeʼe Zatana: Sabölö moguna ba waʼauri yaʼia daʼö wolohi harato. Niha si so fangera-ngera simane daʼö, tola manö kayo ba tola göi löʼö. Gofu hewisa zalua khöra, talafo laʼosambuaʼö dödöra ba wangalui kefe irege latehegö mofökhö ira, tekiko gamakhaitara ba nösi nomora, mazui amakhaitara khö Yehowa ba wolohi ohitö dödöra. (1 Tim. 6:10) Taʼandrö sibai saohagölö me no itolo ita Yehowa, Amada satua-tua enaʼö taʼokhögö lala wangera-ngera si tefaudu sanandrösa ba gefe.​—Zango. 7:12; Luk. 12:15.

10-11. (a) Hadia zinangea tafalua ba wolumöʼö faʼaurida samösa? (b) Hadia nifalua zanaro ba götö föna, ba hewisa wa tola tobali simane sanaro dödöda side-ide?

¹⁰ Enaʼö mofozu ita ba wondrorogö tödöda, moguna taʼila deʼala ba taʼalioʼö ba wolumöʼö yaʼita. Ngawua wehede nifoʼeluaha tobali ”faigi-faigi” ba Gamaedola 4:23 zamasugi ba dödöda halöwö zanaro. Ba götö Razo Zelomo, mozizio zanaro yawa ba dete zagö si so ba kota ba wozago mbanua andrö ba labeʼe wamangelama na laʼila ahatö so deʼala. Duma-duma andre zanolo yaʼita enaʼö taʼila hadia nifaluada enaʼö lö ifaelungu gera-erada Satana.

¹¹ Ba götö föna, falulu fohalöwö zanaro andrö khö zozago göli mbanua. (2 Zam. 18:24-26) Fao-fao ira ba wolumöʼö banua andrö ba latatugöi hadia no muduhö fefu mbawa göli na laʼila ahatö so nudu. (Neh. 7:1-3) Tola tobali sanaro dödöda side-ide si no tefomaha ba Zura Niʼamoniʼö * ba ifangelama ita na iʼila wa iʼodödögö Satana ba wamakiko tödöda, eluahania ba wamaelungu fangera-ngera, nirasoi dödöda hegöi somasi dödöda. Na ibeʼe khöda wamangelama tödöda side-ide, moguna tafondrondrongo daʼö ba amaedola taduhö mbawa göli.

12-13. Tola manö adöni dödöda ba wamalua hadia ia, hizaʼi hadia zinangea tafalua?

¹² Angeragö sambua duma-duma hewisa lalada ba wolumöʼö faʼaurida enaʼö lö ifaelungu Satana. Ifahaʼö ita Yehowa enaʼö ”böi tafadunö-dunö gamuata wohorö ba fefu ngawalö zi raʼiö mazui fakhögusa”. (Ef. 5:3) Hizaʼi, hadia nifaluada na so nawöda wohalöwö mazui nawöda sekola sodunö-dunö sanandrösa ba wohorö? Aboto ba dödöda wa moguna ’talawa zi lö sökhi si fatuwu khönia’. (Tit. 2:12) Simane sanaro,  tola manö ibeʼe khöda wamangelama tödöda side-ide na so deʼala. (Rom. 2:15) Hizaʼi, hadia tafondrondrongo daʼö? Tola manö tedönisi dödöda ba wamondrondrongo nawö-awöda mazui tafaigi gambara niforomaʼöra. Hizaʼi, daʼa ginötö si tefaudu ba wondruhö bawa göli, ba taʼalui duho wahuhuosa tanö böʼö mazui talau mofanö moroi ba daʼö.

¹³ Na ifaso ita awöda ba woʼangeragö mazui ba wamalua si sala, moguna khöda waʼabarani ba wotimbagö daʼö. Faduhu dödöda wa hasambalö iʼila Yehowa wamorege nifaluada, ba ibeʼe khöda waʼabölö hegöi faʼatua-tua ba wotimbagö lala wangera-ngera Zatana. (2 Nga. 16:9; Yes. 40:29; Yak. 1:5) Hizaʼi, hadia nasa zi tola tafalua ba wondrorogö tödöda?

14-15. (a) Hezo manö tabokai dödöda ba hewisa wamaluada daʼö? (b) Moloʼö Gamaedola 4:20-22, hewisa enaʼö tatema mbua moroi ba wombaso Sura Niʼamoniʼö? (Faigi göi kotak ” Lala ba Wamalua Foʼangerönusi”.)

¹⁴ Ba wondrorogö tödöda, lö ibönö na ha tatimbagö wondrönisi dödö si lö sökhi. Moguna göi tatema wondrönisi dödö si sökhi. Fuli angeragö duma-duma mbanua nifoʼöli no mege. Laduhö mbawa göli ira sanaro enaʼö lö möi bakha nudu. Hizaʼi, labokai mbawa göli andrö ba ginötö tanö böʼö enaʼö tola muʼohe gö hegöi soguna tanö böʼö bakha ba mbanua. Na lö irai mubokai mbawa göli, tola manö olofo niha mbanua andrö. Moguna göi tabokai dödöda ba tatehegö enaʼö fangera-ngera Lowalangi zondrönisi fangera-ngerada.

¹⁵ Ösi Zura Niʼamoniʼö yaʼia daʼö fangera-ngera Yehowa. Ero tabaso ia, tatehegö enaʼö fangera-ngera Yehowa zondrönisi fangera-ngerada, nirasoi dödöda, hegöi nifaluada. Hewisa enaʼö tatema mbua moroi ba wombaso Sura Niʼamoniʼö? Moguna nifotöi fangandrö. Imane samösa talifusöda ira alawe, ”Fatua lö ubaso Zura Niʼamoniʼö, mangandrödo ua khö Yehowa. Uʼandrö wanolo moroi khönia enaʼö tola ’uʼila zahöli-höli dödögu’ ba Daromalinia.” (Zin. 119:18) Moguna göi taʼangerönusi hadia ia nibasoda. Na talau mangandrö, tabaso ba taʼangerönusi, hasambalö tefaudu Daromali andrö ba ’hunö dödöda’ irege taʼomasiʼö lala wangera-ngera Yehowa.​—Baso Gamaedola 4:20-22; Zin. 119:97.

16. Hadia manö mbua nitemada na tafaigi JW Broadcasting?

¹⁶ Lala tanö böʼö enaʼö tatehegö lala wangera-ngera Yehowa zondrönisi yaʼita yaʼia daʼö na tafaigi video si so ba JW Broadcasting^®. Lamane si sambua fongambatö, ”Sindruhu-ndruhu fanema li moroi ba wangandröma waö-waö halöwö nifalua ero waŵa andre! Na inötö abu dödöma mazui hulö zi lö awö-awöma, waö-waö halöwö andre zangaroʼö yaʼaga ba sondrara tödöma. Asese mafondrondrongo zinunönia ba nomo. Mafuta zinunö daʼö ba ginötö mondrino, maföföʼö nomo, mazui na mabadu tesi.” Tola tobali fanolo khöda waö-waö halöwö andre ba wondrorogö tödöda. Lafahaʼö göi ita ba wangokhögö lala wangera-ngera Yehowa ba tatimbagö wondrönisi dödö ba woloʼö lala wangera-ngera Zatana.

17-18. (a) Hadia mbua na tafalua zi no tafahaʼö yaʼita moroi khö Yehowa, simane si so ba 1 Razo 8:61? (b) Hadia wamahaʼö si tola tahalö moroi ba duma-duma Razo Hizikia? (c) Moroi ba wangandrö Dawido si tesöndra ba Zinunö 139:23, 24, hadia mbörö wa mangandrö ita?

¹⁷ Ero tarasoi mbua wamaluada sindruhu, itugu aro wamatida. (Yak. 1:2, 3) Omuso dödöda me tola taʼomusoiʼö dödö Yehowa, ba itugu taʼomasiʼö ia yaʼita iraononia. (Gamd. 27:11) Ero so wanandraigö, daʼö göi ginötö khöda ba wangoromaʼö wa tenga  ha mato-matonga dödöda ba wamosumange Namada sebua faʼomasi. (Zin. 119:113) Hizaʼi, omasi taforomaʼö wa taʼomasiʼö Yehowa soroi ba dödö, yaʼia daʼö tödö si no mangai angetula ba woloʼö nifakhoinia ba samalua somasi ia.​—Baso 1 Razo 8:61.

¹⁸ Hadia tola tafalua zala? Tola, börö me lö moʼahonoa ita. Na alabu ita, moguna tatörö tödöda duma-duma Razo Hizikia. Mato hauga kali ifalua zala. Hizaʼi ifuli ifalalini gera-erania, ibulöʼö waʼaurinia, ba ”tenga si dua tödö” ia ba wamosumange Yehowa. (Yes. 38:3-6; 2 Nga. 29:1, 2; 32:25, 26) Tobali, moguna tatimbagö wamorege nifalua Zatana ba wamaelungu yaʼita faoma fangera-ngerania. Moguna mangandrö ita enaʼö tola taʼokhögö ”dödö samondrongo li”. (1 Raz. 3:9; baso Zinunö 139:23, 24.) Moroi ba ngawalö hadia ia zinangea tarorogö, sabölö sibai tarorogö yaʼia daʼö tödöda. Na tafalua daʼö, lö faröi ita khö Yehowa.