1-2. (a) Hadia nifaigi Yehowa ba ginötö owulo niha si zuta faʼato ba Mbongi Watomesa Zoʼaya? (Faigi gambara ba guli majalah.) (b)  Hadia nitutunöda ba wamahaʼö daʼa?

KHALAIGÖ hewisa wamaigi Yehowa niha si zuta faʼato ba zi sagörö ulidanö si no owulo ba Mbongi Watomesa Zoʼaya. Tenga ha ifaigi ira simane sambua ngawawa sebua, hizaʼi inehegö ira zamösana. Duma-dumania, ifaigi niha si lö faröi ba wangondrasi daʼö ero röfi. Tola manö so moroi ba gotaluara zangondrasi hewaʼae lataögö gabula dödö sebua. So göi zi lö asese möi ba gangowuloa, hizaʼi aboto ba dödöra wa moguna sibai enaʼö möi ira ba Wanörö Tödö andrö. Inehegö göi Yehowa niha sawena möi ba Wanörö Tödö, tola manö börö me omasi laʼila gangowuloa si tohude andre.

² Tatu manö, hasambalö omuso dödö Yehowa na iʼila wa ato niha si möi ba Wanörö Tödö. (Luk. 22:19) Hewaʼae simanö, tenga faʼato niha sangondrasi zabölö moguna khö Yehowa, hizaʼi ohitö dödöra weʼamöi ba daʼö. Ba wamahaʼö daʼa, tatutunö sambua wanofu sabölö moguna: Baero ba wangondrasi Fanörö Tödö nifalua ero röfi, hana göi wa moguna taʼondrasi gangowuloa nifalua ero migu si no ihenaigö Yehowa ba niha sangomasiʼö yaʼia?

3-4. (a) Hana moguna möi ita ba gangowuloa? (b) Na möi ita ba gangowuloa, hadia geluahania daʼö? (c) Moloʼö 1 Korindro 11:23-26, hadia mbörö wa tebai talalöi weʼamöi ba Wanörö Tödö?

³ Dane-dane sabölö tohude wa möi ita ba gangowuloa yaʼia daʼö börö me no faosatö moroi ba wamosumangeda daʼö. Taʼondrasi göi gangowuloa börö me ba daʼö ifahaʼö ita Yehowa. Moloʼö niha sasiliyawa, lö saʼae moguna mufahaʼö ira. (3 Yoh. 9) Hizaʼi, tenga simane daʼö ita. Omasi ita na ifahaʼö  ita Yehowa hegöi organisasi niʼogunaʼönia.​—Yes. 30:20; Yoh. 6:45.

⁴ Na möi ita ba gangowuloa, eluahania no taforomaʼö wangide-ngideʼö. Omasi ita tefahaʼö. Ba mbongi Wanörö Tödö waʼamate Yesu, taʼondrasi waö-waö halöwö andrö tenga ha börö me aboto ba dödöda wa moguna sibai daʼö, hizaʼi börö göi me so khöda wangide-ngideʼö ba woloʼö fareta Yesu me imane, ”Böi miböhöli wamalua daʼa ba wanörö tödö yaʼo.” (Baso 1 Korindro 11:23-26.) Waö-waö halöwö andrö zameʼe khöda faʼafaduhu dödö sanandrösa ba wanötöna ba zi so miföna, ba ifasugi göi ba dödöda waʼomasi Yehowa khöda. Hizaʼi, iʼila wa tenga ha sakali ba zi döfi moguna mubeʼe khöda waʼaro dödö hegöi faʼafaduhu dödö. Andrö wa ihenaigö gangowuloa ero migu ba iʼandrö khöda enaʼö taʼondrasi daʼö. Fangide-ngideʼö zamarou tödöda ba woloʼö daʼö. So mato hauga za niʼogunaʼöda ero migu ba wamaʼanö hegöi ba wangondrasi angowuloa.

5. Hewisa wotemaʼö niha si so fangide-ngideʼö wogaoni andrö moroi khö Yehowa?

⁵ Ikaoni niha Yehowa ba wamahaʼö yaʼira, ba ato niha si so fangide-ngideʼö zotemaʼö fogaoni andrö ero röfi. (Yes. 50:4) Omuso dödöra ba ginötö laʼondrasi Wanörö Tödö ba ibörötaigö möi ira ba gangowuloa. (Zakh. 8:20-23) Fagölö-gölö omasi ita na ifahaʼö ba ituturu khöda lala Yehowa, ”Sanolo [yaʼita] ba sangorifi [yaʼita].” (Zin. 40:18) Sindruhunia, hadia so zabölö sökhi mazui sabölö tohude moroi na tatema wogaoni enaʼö ifahaʼö ita Yehowa hegöi Yesu, Ononia fondrege niʼomasiʼö?​—Mat. 17:5; 18:20; 28:20.

6. Hewisa mbua-bua fangide-ngideʼö tobali fanolo khö zi samösa ira matua irege iʼondrasi Wanörö Tödö?

⁶ Ero röfi, taʼodödögö ba wogaoni niha sato ba wangondrasi Fanörö Tödö waʼamate Yesu. Ato niha si so fangide-ngideʼö zorasoi bua börö me latemaʼö wogaoni nibeʼeda. Angeragö duma-duma daʼa. Ba zi hauga fakhe silalö, so samösa ndra matua sanema karate wogaoni ba wangondrasi Fanörö Tödö. Ifatunö khö dalifusöda sameʼe khönia fogaoni andrö wa tebai möi ia. Hizaʼi, tokea dalifusöda andrö ba mbongi Wanörö Tödö me iʼila tohare ndra matua daʼö ba Balai Mbanua Lowalangi. Lahaogö latemaʼö ndra matua andrö ira talifusöda. Toröi-röi ba dödö ndra matua daʼö gamuata ndra talifusöda irege terou dödönia wangondrasi angowuloa ero migu. Ba zi döfi, ha tölu kali lö möi ia ba gangowuloa. Hadia mbua-bua samarou tödönia ba wangondrasi angowuloa andrö fefu? Iʼokhögö wangide-ngideʼö irege tebulö lala wangera-ngerania. Ba gafuriata, imane talifusöda sogaoni yaʼia, ”Niha si so fangide-ngideʼö ndra matua daʼö.” Tatu ikaoni ndra matua daʼö Yehowa enaʼö tobali samosumange yaʼia ba no tebayagö idanö iadaʼa ndra matua daʼö.​—2 Zam. 22:28; Yoh. 6:44.

7. Hewisa enaʼö tobali fanolo khöda ngawalö hadia ia nifahaʼöda yaʼita ba gangowuloa mazui nibasoda ba Zura Niʼamoniʼö ba wangoromaʼö fangide-ngideʼö?

⁷ Fefu hadia ia nibasoda mazui nifahaʼöda yaʼita ba gangowuloa, tola tobali fanolo khöda ba wangoromaʼö fangide-ngideʼö. Ba zi hauga migu fatua lö mufalua Wanörö Tödö, asese mututunö ba gangowuloa duma-duma Yesu hegöi fangide-ngideʼö niforomaʼönia irege ibeʼe nosonia tobali höli. Ba mato hauga hari fatua lö alua Wanörö Tödö, laʼandrö khöda enaʼö tabaso waö-waö si so ba Zura Niʼamoniʼö sanandrösa ba ngawalö hadia ia zalua fatua mazui me no aefa mate hegöi me no tesusugi Yesu. Börö wamahaʼö nitemada ba gangowuloa hegöi nibasoda ba Zura Niʼamoniʼö wa tola itugu taʼandrö saohagölö ba zi no ifalua Yesu khöda. Terou dödöda ba  woloʼö fangide-ngideʼö niforomaʼönia ba wamalua somasi Yehowa hewaʼae na abua daʼö.​—Luk. 22:41, 42.

8. Hewisa wangoromaʼö Yesu faʼabarani?

⁸ Taʼodödögö göi woloʼö duma-duma Yesu ba wangoromaʼö faʼabarani. Angeragö waʼabarani niforomaʼö Yesu me ahatö ngaluo waʼamatenia. Iʼila wa lö ara tö laʼoʼaya ia ira udunia, laböbözi ba labunu ia. (Mat. 20:17-19) Hewaʼae simanö, itehegö mate ia. Me no irugi inötö, imane khö ndra sinengenia si lö faröi si fao khönia ba kabu Gezemane, ”Mifaoso, mofanö ita. Lö aratö tohare zi manga mböligu.” (Mat. 26:36, 46) Me so ngawawa niha solohe föda si möi mondraʼu yaʼia, möi ia föna ba ifatunö wa yaʼia andrö Yesu ba iʼandrö khö ndra saradadu andrö enaʼö latehegö mofanö ndra sinengenia. (Yoh. 18:3-8) Faʼabarani niforomaʼö Yesu no sahöli-höli dödö! Iadaʼa, laʼodödögö woloʼö duma-duma Yesu andrö ira niha nibayoini hegöi biri-biri tanö böʼö sanandrösa ba wangoromaʼö faʼabarani. Hewisa lalania?

9. (a) Hana wa moguna khöda waʼabarani enaʼö lö mamalö taʼondrasi gangowuloa? (b) Hewisa wa tola so lua-lua gamuatada khö ndra talifusöda nibeʼe ba gurunga börö wamatira?

⁹ Enaʼö lö mamalö möi ita ba gangowuloa, moguna taforomaʼö waʼabarani ba ngawalö hadia ia zi möi fanaisida. So ösa ndra talifusöda si lö mamalö möi ba gangowuloa hewaʼae so waʼabu dödöra, so waʼide-ide dödö, mazui mofökhö. Tanö böʼönia, laforomaʼö waʼabarani wa lö laböhöli weʼamöi ba gangowuloa hewaʼae so wanaisi moroi ba nösi nomo hegöi moroi khö ndra samatörö. Angeragö hadia lua-lua duma-duma niforomaʼöda andrö khö ndra talifusöda nibeʼe ba gurunga börö me laʼoʼawögö wamatira. (Heb. 13:3) Me larongo wa lö mamalö tafosumange Yehowa hewaʼae so wanandraigö, teʼaroʼö ira enaʼö mamati, barani ba lö faröi. Simanö göi zi no irai alua khö Waulo. Me labeʼe ia ba gurunga ba Roma, lö mamalö omuso dödönia ero irongo wa lö faröi ndra talifusö ba wamosumange Lowalangi. (Fil. 1:3-5, 12-14) Lö ara fatua lö aheta ia ba gurunga mazui me awena aheta ia ba gurunga, isura zura Faulo ba niha Heberaiʼo. Ba zura daʼö, iʼandrö ba niha Keriso si lö faröi enaʼö ’lö laböhöli wangoromaʼö faʼomasi khö ndra talifusö’ ba böi irai lalalöi weʼamöi ba gangowuloa.​—Heb. 10:24, 25; 13:1.

10-11. (a) Haniha manö zinangea takaoni weʼamöi ba Wanörö Tödö? (b) Moloʼö Efeso 1:7, hadia mbörö wa tafalua daʼö?

¹⁰ Moguna khöda waʼabarani na takaoni nösi nomoda, awöda wohalöwö, mazui si fasinga omo khöda weʼamöi ba Wanörö Tödö. Hana wa takaoni ira? Börö me taʼandrö sibai saohagölö ba zi no ifalua khöda Yehowa hegöi Yesu. Andrö wa tebai tataha dödöda ba wogaoni niha weʼamöi ba Wanörö Tödö. Omasi ita na lafahaʼö ira ba latema mbua moroi ba waʼebua dödö Yehowa me no ”teʼefaʼö göi golalöwada”.​—Baso Efeso 1:7; Fam. 22:17.

 ¹¹ Taforomaʼö waʼabarani yaʼia daʼö na möi ita ba gangowuloa, hizaʼi moguna göi taforomaʼö mbua-bua tanö böʼö si tohude, si no iforomaʼö Yehowa hegöi Yesu moloʼö lala sahöli-höli dödö.

12. (a) Hana wa itugu taʼomasiʼö Yehowa hegöi Yesu na möi ita ba gangowuloa? (b) Hewisa 2 Korindro 5:14, 15 wamarounia tödöda ba woloʼö Yesu?

¹² Faʼomasida khö Yehowa hegöi Yesu zamarou tödöda weʼamöi ba gangowuloa. Aefa daʼö, börö wamahaʼö nitemada ba gangowuloa, itugu taʼomasiʼö Yehowa hegöi Ononia. Lö mamalö lafasugi ba dödöda ba gangowuloa hadia manö zi no lafalua khöda. (Rom. 5:8) Ba Wanörö Tödö, lafasugi ba dödöda waʼomasi sebua niforomaʼöra khöda hegöi ba niha si lö saboto ba dödö hadia guna höli andrö. Börö me taʼandrö sibai saohagölö, andrö wa taforege sibai ba woloʼö Yesu ba lala waʼaurida si ero maʼökhö. (Baso 2 Korindro 5:14, 15.) Baero daʼö, tefarou göi dödöda ba wanuno Yehowa börö me no ihenaigö höli. Sambua lala si tola tafalua yaʼia daʼö na tabeʼe mbua gera-era soroi ba dödö ba gangowuloa.

13. Hewisa wangoromaʼöda faʼomasi khö Yehowa hegöi khö Yesu? Tutunö.

¹³ Tola taforomaʼö waʼomasi khö Yehowa hegöi Yesu na tatehegö tafalua hadia ia börö ira. Sasesenia, oya nitehegöda enaʼö tola möi ita ba gangowuloa. Oya mbanua niha Keriso samalua angowuloa ba gafuriata ngaluo wohalöwö, ba ginötö molombase niha tanö böʼö. Hadia inehe-nehegö ita Yehowa ba gangowuloa hewaʼae marase ita? Tatu manö! Iʼila Yehowa ba iʼameʼegö tödö fefu wamorege nifaluada weʼamöi ba gangowuloa.​—Mrk. 12:41-44.

14. Hewisa wameʼe Yesu duma-duma si sökhi ba wangoromaʼö faʼomasi si fao faʼaoha gölö?

¹⁴ Ibeʼe khöda Yesu duma-duma fondrege zi sökhi ba wangoromaʼö faʼomasi si fao faʼaoha gölö. Tenga ha itehegö mate ia salahi ndra nifahaʼönia. Hizaʼi, iforomaʼö göi ero maʼökhö wa abölö iʼofönaiʼö zoguna khöra moroi ba zoguna khönia samösa. Duma-dumania, omasi iʼogunaʼö ginötö wefao khö ndra soloʼö khönia hewaʼae marase ia mazui so noro dödönia. (Luk. 22:39-46) Iʼosambuaʼö dödönia ba zi tola ibeʼe ba niha, tenga hadia ia zi tola itema khöra. (Mat. 20:28) Na so khöda waʼomasi simane  daʼö khö Yehowa hegöi khö ndra talifusö, hasambalö taʼodödögö weʼamöi ba Mbongi Watomesa Zoʼaya.

15. Haniha zi oföna sibai zinangea tatolo?

¹⁵ No fao ita ba gotalua waʼafatalifusöta niha Keriso sindruhu, ba omasi taʼogunaʼö ginötö ba wogaoni niha böʼö enaʼö fao göi ira khöda. Hizaʼi, taʼofönaiʼö tatolo ”ndra talifusöda si sara lala wamati” si no mamöhöli wamalua halöwö fanuriaigö hegöi feʼamöi ba gangowuloa. (Gal. 6:10) Taforomaʼö khöra waʼomasi na tafarou dödöra weʼamöi ba gangowuloa mendrua manö weʼamöi ba Wanörö Tödö. Simane Yehowa hegöi Yesu, omuso sibai dödöda na mangawuli niha si no mamöhöli wangai halöwö ba wamati khö Namada Yehowa, Kubalo sebua faʼomasi.​—Mat. 18:14.

16. (a) Hewisa lalada wamarou tödö niha böʼö ba hadia gunania khöda na taʼondrasi gangowuloa? (b) Hana wa tefaudu sibai na iadaʼa ginötö si sökhi ba wanörö tödö fehede Yesu si tesöndra ba Yohane 3:16?

¹⁶ Ba zi hauga migu andre, kaoni niha gofu hawaʼato manö ba wangondrasi Fanörö Tödö nifalua ba ngaluo Zumaha tanö owi, 19 mbaŵa si Öfa 2019. (Faigi kotak ” Hadia Ökaoni Ira?”) Moguna böi mamalö tafarou dödö nawöda ba taʼondrasi fefu gangowuloa nihenaigö Yehowa khöda. Lö ara tö tehori gulidanö daʼa, andrö moguna möi ita ba gangowuloa si tobali fanolo khöda ba wangokhögö fangide-ngideʼö, faʼabarani hegöi faʼomasi. (1 Tes. 5:8-11) Moguna taforomaʼö soroi ba dödö wa taʼameʼegö tödö Yehowa hegöi Ononia si no mangomasiʼö yaʼita!​—Baso Yohane 3:16.