1. Hewisa dödö Dawido sanandrösa khö Yehowa irege tefarou dödönia ba wamalua hadia?

IMANE Razo Dawido, ”Sebua Yehowa ba niforege fanuno.” (Zin. 145:3) Iʼomasiʼö Yehowa, ba daʼö göi zamarou tödönia ba wanuno Lowalangi ”ba hunö zowulo niha”. (Zin. 22:23; 40:5) Tatu, öʼomasiʼö Yehowa ba fao dödöu ba wehede Dawido andre, ”Nisuno ndraʼugö, yaʼugö Yehowa, Lowalangi wurugöma Izaraʼeli, götö-götö waʼara.”​—1 Nga. 29:10-13.

2. (a) Hewisa lalada wanuno Yehowa? (b) Hadia manö daha-taha nitaögö niha ba hadia nitutunöda?

² Iadaʼa, sambua lala ba wanunoda Yehowa yaʼia daʼö na tabeʼe mbua gera-erada ba gangowuloa niha Keriso. Hizaʼi, so ösa ndra talifusöda sabua ba wamalua daʼö. Omasi labeʼe mbua gera-erara ba gangowuloa hizaʼi so khöra waʼataʼu. Hewisa enaʼö lö ataʼu ira? Ba hadia manö zanolo yaʼita enaʼö tola tabeʼe mbua gera-era si möi famarou dödö? Fatua lö tabeʼe wanema li moroi ba wanofu-nofu andrö, datatutunö öfa ngawalö mbörö wa moguna tabeʼe mbua gera-erada ba gangowuloa.

3-5. (a) Simane nitutunö ba Heberaiʼo 13:15, hana wa tabeʼe mbua gera-erada ba gangowuloa? (b) Hadia moguna fagölö-gölö fefu mbua gera-era nibeʼeda? Tutunö.

³ Ibeʼe khöda ginötö si tohude Yehowa ba wanuno yaʼia. (Zin. 119:108) Bua gera-era nibeʼeda ba gangowuloa no faosatö moroi ba ”zumange fanuno” nibeʼeda ba lö hadöi niha böʼö zi tola mosalahini yaʼita wamalua daʼö. (Baso Heberaiʼo 13:15.) Hadia iʼandrö khöda Yehowa zamösana ba wameʼe sumange mazui bua gera-era si fagölö-gölö? Löʼö!

⁴ Aboto ba dödö Yehowa wa faböʼö-böʼö waʼabölö hegöi si tola tafalua, ba iʼameʼegö tödö sibai gofu hadia ia zumange si tola tabeʼe khönia. Angeragö hadia manö zumange somasi itema moroi ba ndraono Gizaraʼeli. So ndraono Gizaraʼeli si  tola mameʼe sageu mbiri-biri mazui nambi. So göi ndraono Gizaraʼeli ha ”dombua nono wune, ba ma dombua nono marafadi” zi tola labeʼe. Ba na so ndraono Gizaraʼeli si tebai mameʼe zi dombua fofo, omasi itema Yehowa ”zi sambua hinaoya hamo si sökhi”. (3 Moz. 5:7, 11) Hewaʼae abölö ide-ide mböli hamo, hizaʼi hasambalö iʼameʼegö tödö daʼö Yehowa na fondrege zi sökhi ”hamo” andrö.

⁵ Lö si tebulö Lowalangi si sökhi tödö andrö göi iadaʼa. Ba ginötö tabeʼe mbua gera-erada, lö iʼandrö khöda enaʼö tobali ita simane Afolo sonekhe fahuhuo mazui simane Faulo sonekhe ba wameʼe faʼafaduhu dödö ba niha. (Hal. 18:24; 26:28) Sabölö moguna khö Yehowa yaʼia daʼö na tabeʼe mbua gera-era fondrege zi sökhi moloʼö si tola tafalua. Törö tödömö lakha mbanua sameʼe dombua loga side-ide. Börö me fondrege zi sökhi nibeʼe ndra alawe daʼö, andrö wa ebua sibai mbölinia föna Yehowa.​—Luk. 21:1-4.

6. (a) Moloʼö Heberaiʼo 10:24, 25, hana wa tola molua-lua khöda mbua gera-era nirongoda? (b) Hewisa wangoromaʼömö wa öʼosinangegö mbua gera-era si tobali famarou dödö?

⁶ Faoma tafarou dödö nawöda ba mbua gera-era nibeʼeda. (Baso Heberaiʼo 10:24, 25.) Tatu manö, omasi ita fefu wamondrondrongo bua gera-era nifaʼema ba gangowuloa. Omasi ita na tarongo mbua gera-era soroi ba dödö nifaʼema ndraono side-ide. Fagöna ba dödöda na so niha sameʼe bua gera-era si fao faʼaterou dödö börö zindruhu sawena aboto ba dödönia. Ba taʼameʼegö tödö göi ndra talifusö sangodödögö ba wangokhögö ’faʼabarani’ ba wameʼe bua gera-era hewaʼae na sindruhunia niha saila-aila ira mazui awena lafomaha ira ba li niʼogunaʼöda. (1 Tes. 2:2) Hezo tola taforomaʼö wa taʼosinangegö wangodödögö nifaluara? Na no aefa gangowuloa, moguna taʼandrö khöra saohagölö börö me no labeʼe mbua gera-era si möi famarou dödö. Lala tanö böʼö yaʼia daʼö na tabeʼe göi mbua gera-erada ba gangowuloa. Na tafalua daʼö, tenga ha tefarou dödöda hizaʼi tafarou göi niha böʼö.​—Rom. 1:11, 12.

7. Hadia manö gunania khöda na tabeʼe mbua gera-erada?

⁷ So gunania khöda na tabeʼe mbua gera-era. (Yes. 48:17) Hadia mbörö? Si oföna, na taʼera-era ba wameʼe bua gera-era, itugu terou dödöda ba wamaʼanö waö-waö  halöwö nifaʼema ba gangowuloa. Na no tahaogö tafaʼanö, itugu aboto ba dödöda Daromali Lowalangi ba itugu sökhi wamaluada hadia zi no tafahaʼö yaʼita. Si dua, na tabeʼe mbua gera-erada na so wamahaʼö, itugu ohahau dödöda weʼaso ba gangowuloa. Si tölu, börö me moguna taforege ba wameʼe bua gera-era, abölö ara toröi ba dödöda mbua gera-era nibeʼeda.

8-9. (a) Moloʼö Maleakhi 3:16, hewisa dödö Yehowa ba ginötö tabeʼe mbua gera-erada? (b) Hadia nasa zabua ba niha enaʼö lafalua?

⁸ Na fahuhuo ita sanandrösa ba wamatida, no taʼomusoiʼö dödö Yehowa. Faduhu dödöda wa hasambalö ifondrondrongo ita Yehowa ba iʼameʼegö tödö wamorege nifaluada ba wameʼe bua gera-era ba gangowuloa. (Baso Maleakhi 3:16.) Iforomaʼö Yehowa wa iʼameʼegö tödö ita ba ginötö ifahowuʼö ngawalö wamorege nifaluada ba wamalua somasi ia.​—Mal. 3:10.

⁹ Sindruhu-ndruhu so dane-dane si sökhi niʼokhögöda wa moguna tabeʼe mbua gera-erada ba gangowuloa. Hizaʼi, so nasa zataʼu wameʼe yawa tangara. Na simane daʼö nirasoimö, böi ide-ide dödömö. Datatutunö ösa goi-goi Zura Niʼamoniʼö, duma-duma hegöi mene-mene si tola manolo yaʼita fefu ba wameʼe bua gera-era ba gangowuloa.

10. (a) Hadia manö waʼataʼu si so khöda? (b) Na ataʼuʼö ba wameʼe bua gera-era, hadia mbua-bua niʼokhögömö?

¹⁰ Hadia aböböi ataha ndraʼugö ero öbeʼe yawa dangamö ba wameʼe bua gera-era? Na yaʼia, tenga ha yaʼugö zorasoi simane daʼö. Sindruhunia, ato ba gotaluada zadaʼu-daʼu ba wameʼe bua gera-era. Hizaʼi enaʼö lö hadöi khöda faʼataʼu, moguna taʼila hadia mbörö waʼataʼu ita. Hadia ataʼuʼö na olifuʼö hadia ia niwaʼömö mazui na fasala daʼö? Hadia aombö dödömö na tenga simane faʼabaga mbua gera-era niha böʼö mbua gera-era nibeʼemö? Sindruhunia, baga göi na so khöda waʼataʼu simane daʼö. Daʼö zangoromaʼö wa so khömö wangide-ngideʼö ba abölö tohude niha böʼö ba wamaigimö. Omasi Yehowa  na öʼokhögö mbua-bua simane daʼö. (Zin. 138:6; Fil. 2:3) Hizaʼi, omasi göi Yehowa na ösuno ia ba öfarou dödö ndra talifusö si so ba gangowuloa. (1 Tes. 5:11) Iʼomasiʼö ndraʼugö ba ibeʼe khömö waʼabarani soguna khömö.

11. Hadia wamasugi ba dödö moroi ba Zura Niʼamoniʼö si tobali fanoloda?

¹¹ Angeragö wamasugi ba dödö nibeʼe Zura Niʼamoniʼö. Iwaʼö wa fefu ita tola manö fasala wehede niʼogunaʼöda mazui fasala wamaʼemada fehede. (Yak. 3:2) Lö iʼandrö khöda Yehowa enaʼö moʼahonoa wamaluada fefu daʼö, simanö göi ndra talifusöda. (Zin. 103:12-14) Yaʼira andrö ösi nomoda ba wamati, ba laʼomasiʼö ita. (Mrk. 10:29, 30; Yoh. 13:35) Aboto ba dödöra wa sindruhunia itaria tenga simane salua ba mbeweda geluaha wehede si so ba dödöda.

12-13. Hadia wamahaʼö nihalöda moroi ba duma-duma Nehemia hegöi Yona?

¹² Angeragö ösa duma-duma ba Zura Niʼamoniʼö si tola manolo yaʼugö enaʼö lö ataʼu. Törö tödömö duma-duma Nehemia. Mohalöwö ia ba gödo razo sebua kuaso. Samuza maʼökhö, no ifangerau mbawania Nehemia börö me irongo wa lö ara tö adudu göli hegöi dowa Yeruzalema. (Neh. 1:1-4) Manofu khönia razo börö me no ifangerau mbawania. Khalaigö hewisa dödö Nehemia ba ginötö daʼö. Tola manö aböböi ataha ia! Hizaʼi iʼanemaiʼö ilau mangandrö Nehemia, ba awena itema li razo andrö. Buania, oya wanolo nibeʼe razo ba nono mbanua Lowalangi. (Neh. 2:1-8) Angeragö göi duma-duma Yona, me iʼandrö khönia Yehowa ba wamaʼema huhuo ba mbanua Niniwe, ilau moloi Yona numalö ba mbanua tanö böʼö börö waʼataʼunia. (Yo. 1:1-3) Hizaʼi, börö wanolo moroi khö Yehowa, tola ifalua halöwö nibeʼe khönia andrö. Ba ato niha zotema bua börö wehede nifaʼemania ba mbanua Niniwe. (Yo. 3:5-10) Moroi khö Nehemia, tafahaʼö ita wa moguna talau mangandrö fatua lö tabeʼe mbua gera-erada. Ba moroi khö Yona, tafahaʼö ita wa hasambalö itolo ita Yehowa ba wamosumange yaʼia hewaʼae so khöda waʼataʼu. Na taʼangeragö, hadia so mbanua niha Keriso sameʼe khöda faʼatau moroi ba mbanua Niniwe?

¹³ Hadia manö mene-mene si tobali fanolo khöda ba ginötö tabeʼe mbua gera-erada si tola möi famarou dödö ba gangowuloa? Datatutunö ösa sanandrösa ba mene-mene.

14. Hana wa moguna tahaogö tafaʼanö waö-waö halöwö ba gangowuloa ba hawaʼara tola tafalua daʼö?

¹⁴ Faʼanö ndraʼugö ero na möiʼö ba gangowuloa. Na no öʼangeragö ba öfaʼanö ndraʼugö moroi ba waö-waö halöwö ba gangowuloa, tola so khöu waʼabarani ba wameʼe bua gera-era. (Gamd. 21:5) Tatu manö, faböʼö-böʼö ginötö niʼogunaʼöda ba wamaʼanö yaʼita ba gangowuloa. Samösa lakha mbanua sotöi Eloise si no töra 80 fakhe, ibörötaigö ifaʼanö ia ba wamahaʼö majalah Manuriaigö iʼotarai mböröta migu. Imane,  ”Ohahau sibai dödögu weʼamöi ba gangowuloa na no ara uhenaigö ufaʼanödo.” Itutunö Joy sangai halöwö safönu inötö wa ifaʼanö wamahaʼö Manuriaigö andrö sahari fatua lö inötö gangowuloa. Imane, ”Alio itörö tödögu wamahaʼö na ufalua wamaʼanö andrö sahari fatua lö inötö gangowuloa.” Aefa daʼö, samösa zatua sakubaloi sotöi Ike ba yaʼia andre göi samösa perintis imane, ”Ahono sibai dödögu na uzara-zara wamaʼanögu ba zi samigu andrö moroi na usamuzaigö waʼamanö yaʼia ba abölö oya uʼogunaʼö ginötö.”

15. Hewisa enaʼö sökhi wamaʼanöu waö-waö halöwö ba gangowuloa?

¹⁵ Hewisa enaʼö sökhi wamaʼanöda waö-waö halöwö ba gangowuloa? Ero tafaʼanö ita, moguna tabörögö faoma fangandrö ba wangandrö eheha niʼamoniʼö moroi khö Yehowa. (Luk. 11:13; 1 Yoh. 5:14) Tola taʼogunaʼö mato hauga menit ba wonehegö tuho sebua, tuho side-ide, gambara, hegöi kotak. Na tafahaʼö ita ero sambua ngenoli, abölö baga na tabaso fefu ayati si no mubeʼe ba daʼö. Angerönusi nösinia, mendrua manö ngawua wehede si tobali bua gera-eramö. Na öhaogö wamaʼanö waö-waö halöwö ba gangowuloa, itugu oya mbua si tola ötema ba aoha khöu wameʼe bua gera-era.​—2 Kor. 9:6.

16. Hadia manö fakake si no muhenaigö khöda, ba hewisa wangogunaʼöda daʼö?

¹⁶ Na tola, ogunaʼö fakake elektronik si no tehenaigö ba li niʼilamö. Iʼogunaʼö organisasinia Yehowa ba wameʼe fakake elektronik soguna khöda ba wamaʼanö waö-waö halöwö ba gangowuloa. Tola taʼogunaʼö aplikasi JW Library^® ba wo-download publikasi niʼogunaʼö ba wamahaʼö. Na simanö, tola tafahaʼö ita mazui he ha tabaso manö ba tafondrondrongo ia, gofu hezo so ba hawaʼara manö. So göi zangogunaʼö aplikasi daʼa ba wamaʼanö waö-waö halöwö ba gangowuloa na inötö molombase ba kantor, ba zekola mazui ba ginötö manörö-nörö. Börö me so Watchtower Library hegöi PERPUSTAKAAN ONLINE Manuriaigö, itugu aoha khöda ba wangalui duho-tuho moroi ba artikel wamahaʼö somasi tabaso ba tafahaʼö ita.

17. (a) Hana wa moguna muhaogö wamaʼanö bua gera-era? (b) Hadia wamahaʼö nihalömö moroi ba video Tobali si Fahuwu khö Yehowa—Henaigö Mbua Gera-erau?

¹⁷ Na tola, faʼanö mato hauga ngawua mbua gera-era ero sambua famahaʼö. Hadia mbörö? Tola manö lö iʼanemaiʼö latuyu ndraʼugö na öbeʼe yawa dangamö. So göi danö böʼö zameʼe yawa tanga, ba tola manö daʼö nituyu zondröniaʼö famahaʼö. Enaʼö tefaudu ginötö niʼogunaʼö ba gangowuloa, moguna göi itatugöi sondröniaʼö hadauga zi tola mameʼe bua gera-era ero sambua famahaʼö. Böi abao dödömö mazui ide-ide dödömö na lö mutuyu ndraʼugö ba wamobörö wamahaʼö. Na tenga ha sambua mbua gera-era nifaʼanömö, oya nasa khöu ginötö ba wameʼe bua gera-era. Tola göi öfaʼanö mbua gera-era simane fombaso ayati. Hizaʼi,  abölö baga göi na tola öfaʼanö mbua gera-era faoma fehedemö samösa. *

18. Hana wa moguna tabeʼe mbua gera-era sadogo-dogo?

¹⁸ Beʼe mbua gera-era sadogo-dogo. Sasesenia, bua gera-era si möi famarou dödö yaʼia daʼö bua gera-era sadogo-dogo ba si tefaudu. Tobali, forege enaʼö adogo-dogo mbua gera-era nibeʼemö. Tatugöi waʼara ginötö niʼogunaʼömö, duma-dumania 30 detik. (Gamd. 10:19; 15:23) Na no hauga fakhe öbeʼe mbua gera-eramö ba gangowuloa, moguna tobali ndraʼugö duma-duma si sökhi ba wameʼe bua gera-era sadogo-dogo. Na mato hauga menit öʼogunaʼö ginötö ba wameʼe bua gera-era, tola manö ide-ide dödö niha böʼö börö me tenga simane faʼabaga wameʼemö bua gera-era na labeʼe mbua gera-erara. Baero daʼö, na adogo-dogo mbua gera-eramö, tola abölö ato niha sameʼe bua gera-era ba obönö nasa ginötö. Beʼe mbua gera-era si tefaudu, anemaiʼö beʼe wanema li mendrua manö na yaʼugö zi oföna mutuyu. Böi beʼe mbua gera-erau ba zi sambua ngenoli maʼafefu. Na no mututunö ngawua wehede si tohude ba zi sambua ngenoli, tola öbeʼe mbua gera-era si tobali nönö-nönö.​—Faigi kotak ” Hadia Mbua Gera-era si Tola Ufaʼema?”

19. Hadia wanolo si tola ifalua khöu sondröniaʼö famahaʼö, hizaʼi hadia zinangea öfalua?

¹⁹ Fatunö khö zondröniaʼö famahaʼö ba ngenoli hadia öbeʼe mbua gera-eramö. Na omasi öfalua daʼö, moguna öʼondrasi zondröniaʼö famahaʼö fatua lö tebörögö gangowuloa. Ba ginötö labeʼe wanofu ba ngenoli daʼö, alawakö wombeʼe yawa tangamö enaʼö tola iʼila sondröniaʼö.

20. Hana wa tola muʼamaedolagö weʼamöi ba gangowuloa simane na fao wemanga khö ndra talifusöda?

²⁰ Amaedolagö gangowuloa andrö simane na fao ndraʼugö wemanga khö ndra talifusöda. Na lakaoni ndraʼugö wemanga ba laʼandrö khöu enaʼö öʼohe gö maʼifu, hadia nifaluau? Tola manö so khöu maʼifu waʼaombö dödö, hizaʼi tatu öforege ba wolohe ö si tola laʼa ira talifusöda. Ikaoni ita ba gangowuloa Yehowa, ba oya zi sökhi si no ihenaigö khöda ba daʼö. (Zin. 23:5; Mat. 24:45) Omasi ia na so niʼoheda hewaʼae no öna-öna hizaʼi tola larasoi daʼö niha böʼö ba daʼö zabölö sökhi si tola tabeʼe. Tobali, haogö faʼanö waö-waö halöwö ba gangowuloa ba oyaʼö beʼe mbua gera-erau. Na öfalua daʼö, tenga ha örasoi nihenaigö Yehowa, hizaʼi tola göi öʼohe mbuala khö ndra talifusöda ba gangowuloa.