1-2. (a) Hadia mbörö wa lö ahöli dödöda me ifatunö khöda Yesu lala halöwö si öna-öna ba wanörö tödö faʼamatenia? (b) Hadia mbua-bua Yesu nitutunöda?

HADIA tola ötutunö hadia manö nifalua ba Wanörö Tödö faʼamate Keriso ero röfi? Tola manö ato ba gotaluada zi lö olifu hadia manö nifalua ba Mbongi Watomesa Zoʼaya. Hadia mbörö? Börö me öna-öna lala halöwö nifalua. Hizaʼi tohude sibai daʼö. Tola manö manofu ita, ’Hana wa öna-öna sibai lala halöwö nifalua?’

² Sagötö me mangai halöwö Yesu ba gulidanö, asese iʼogunaʼö lala si öna-öna ba wamahaʼö sindruhu, tefaudu ba alio aboto ba dödö niha. (Mat. 7:28, 29) Simanö göi, ifatunö khöda lala si öna-öna ba wanörö tödö * faʼamatenia, hizaʼi tohude sibai daʼö. Tahaogö tatutunö lala halöwö nifalua ba wanörö tödö andre, ba tatutunö ösa niwaʼö Yesu hegöi nifaluania. Itugu aboto ba dödöda wa sindruhu-ndruhu iʼokhögö Yesu wangide-ngideʼö, faʼabarani hegöi faʼomasi. Tatutunö göi hewisa enaʼö itugu sökhi lalada ba woloʼö yaʼia.

3. Simane nitutunö ba Mataiʼo 26:26-28, hezo tola taʼila wa öna-öna sibai lala halöwö nitatugöi Yesu ba Wanörö Tödö ba hadia niʼamaedolagö zi dombua ngawalö si öna-öna niʼogunaʼönia?

³ Itatugöi Yesu Wanörö Tödö faʼamatenia me fao ia khö ndra sinengenia si lö faröi si-11 niha. Iʼozaragö zi toröi me no aefa mufalua gowasa Fasa ba ifalua lala halöwö si öna-öna.  (Baso Mataiʼo 26:26-28.) Ha roti si lö muʼaisöni hegöi agu si so ba daʼö niʼogunaʼönia. Ifatunö khö ndra sinengenia wa si dombua ngawalö zi öna-öna andrö no amaedola mboto hegöi donia soʼahonoa si lö ara tö mubeʼe tobali sumange salahira. Tola manö lö ahöli dödö ndra sinengenia ba lala halöwö si bohou si öna-öna andrö. Hadia mbörö?

4. Hewisa mene-mene nibeʼe Yesu khö Marata möi fanoloda enaʼö taʼila wa lala halöwö nitatugöi Yesu ba Wanörö Tödö no öna-öna?

⁴ Angeragö hadia zalua mato hauga waŵa silalö, me no tölu fakhe mangai halöwö Yesu. Me luo daʼö, möi ia manörö ba nomo zi fahuwu khönia sotöi Lazaro, Marata ba Maria. Ba ginötö si sökhi andrö ibörögö mamahaʼö ia. So göi Marata ba daʼö, hizaʼi mangoloi dödönia ba wamaʼanö owasa sebua ba wanemaʼö tome nifosumangenia. Me iʼila daʼö Yesu, si fao faʼasökhi dödö iʼamenesi Marata. Itolo Marata enaʼö aboto ba dödönia wa lö moguna oya gö nihenaigö ba wanemaʼö tome. (Luk. 10:40-42) Ba gafuriata, hauga za fatua lö mate ia tobali sumange, ifalua samösa mene-mene nibeʼenia andrö. Itatugöi enaʼö öna-öna wamalua lala halöwö ba Wanörö Tödö. Moroi ba zalua andre, hadia wamahaʼö nihalöda khö Yesu?

5. Hadia niforomaʼö lala halöwö si öna-öna andrö sanandrösa khö Yesu ba hewisa wa tefaudu daʼa moloʼö Filifi 2:5-8?

⁵ Fefu niwaʼö Yesu hegöi nifaluania zangoromaʼö wa iʼokhögö wangide-ngideʼö. Daʼö mbörö wa lö moguna ahöli dödöda me iforomaʼö wangide-ngideö si tohude ba mbongi safuria weʼasonia ba gulidanö. (Mat. 11:29) Iʼila wa lö ara tö ibeʼe zumange sebua sagötö waö-waö waʼauri niha. Aboto göi ba dödönia wa hasambalö isusugi ia Yehowa enaʼö tobali ia razo ba zorugo. Hewaʼae simanö, lö iʼalui lala enaʼö adöni dödö niha khönia ba iʼandrö enaʼö mufalua lala halöwö sebua ba wanörö tödö faʼamatenia. Hizaʼi ifatunö khö ndra nifahaʼönia wa moguna latörö tödöra ia ba lala halöwö si öna-öna andrö, sakali ero röfi. (Yoh. 13:15; 1 Kor. 11:23-25) Lala halöwö si no öna-öna ba solakhömi andre zangoromaʼö wa lö khö Yesu faʼasiliyawa. Omuso dödöda börö me fangide-ngideʼö no sambua bua-bua si sökhi niʼokhögö Razoda ba zorugo.​—Baso Filifi 2:5-8.

6. Ba ginötö tataögö wanandraigö, hewisa woloʼöda fangide-ngideʼö niforomaʼö Yesu?

⁶ Hewisa lalada ba woloʼö fangide-ngideʼö niforomaʼö Yesu? Na taʼofönaiʼö zoguna ba niha böʼö moroi ba zoguna khöda samösa. (Fil. 2:3, 4) Angeragö mbongi safuria weʼaso Yesu ba  gulidanö. Iʼila Yesu wa lö ara tö mate ia ba lala safökhö. Hizaʼi, iʼameʼegö tödö sibai ndra sinengenia si lö faröi sabu tödö na no aefa mate ia. Daʼö mbörö wa ifahaʼö, iʼabölöʼö ba irara dödöra ba mbongi fatua lö mate ia. (Yoh. 14:25-31) Si fao fangide-ngideʼö, abölö iʼameʼegö tödö Yesu zalua ba niha böʼö moroi khönia samösa. No duma-duma si sökhi daʼa khöda!

7. Lö ara me no aefa itatugöi Mbongi Watomesa Zoʼaya, hewisa Yesu ba wangoromaʼö faʼabarani sebua?

⁷ Lö ara me no itatugöi Yesu Mbongi Watomesa Zoʼaya, iforomaʼö waʼabarani sebua. Hewisa lalania? Iʼoʼö Yesu gohitö dödö Namania khönia hewaʼae na lahuku mate ia börö me laböbögö khönia zi lö duhu wa no ifalua waʼalösökhi sebua, yaʼia daʼö iʼoʼaya Lowalangi. (Mat. 26:65, 66; Luk. 22:41, 42) Lö faröi Yesu ba wamosumange töi Yehowa, ituhini waʼasinangea Yehowa ba wamatörö ba ibokai lala ba niha samalalini era-era ba wogamö faʼauri si lö aetu. Ba ginötö si fagölö, ifaʼanö göi zoloʼö khönia ba ngawalö hadia ia zi lö ara tö lataögö.

8. (a) Hadia niwaʼö Yesu khö ndra nifahaʼönia si lö faröi? (b) Hauga fakhe me no aefa mate Yesu, hewisa ndra nifahaʼönia ba woloʼö duma-duma waʼabaraninia?

⁸ Iforomaʼö Yesu waʼabarani me lö iʼosambuaʼö dödönia ba waʼaombö dödö nirasoinia. Hizaʼi, iʼosambuaʼö dödönia ba zoguna khö ndra sinengenia si lö faröi. Lala halöwö si öna-öna nitatugöi Yesu me no aefa ifofanö Yuda, moguna ba niha sedöna tobali soloʼö khönia nibayoini hegöi ba zedöna tobali ösi mbuʼusa li si bohou. (1 Kor. 10:16, 17) Ba wanolo ndra nifahaʼönia enaʼö lö faröi ba fao khönia ba zorugo, iʼombakhaʼö khöra hadia zomasi ia hegöi Amania. (Yoh. 15:12-15) Iʼombakhaʼö göi khöra Yesu hadia dania wanandraigö nitaögöra. Aefa daʼö,  ifarou dödöra Yesu ba woloʼö duma-dumania. Iʼandrö khöra enaʼö ’böi ataʼu’! (Yoh. 16:1-4a, 33) Hauga fakhe aefa daʼö, lö laböhöli ira nifahaʼö Yesu ba woloʼö faʼaoha gölö hegöi faʼabaraninia. Hewaʼae na tefakao ira, lafarou dödö nawöra zamösana ba ginötö lataögö ngawalö gabula dödö.​—Heb. 10:33, 34.

9. Hewisa woloʼöda Yesu ba wangoromaʼö faʼabarani?

⁹ Iadaʼa, tola göi taʼoʼö duma-duma Yesu ba wangoromaʼö faʼabarani. Duma-dumania, moguna khöda waʼabarani ba wanolo ndra talifusöda si göna folohi börö wamatira. Itaria, labeʼe ira bakha ba gurunga börö walöʼatulö salua khöra. Na alua daʼö, moguna taforege ba wanolo yaʼira, ba taʼoʼawögö ira. (Fil. 1:14; Heb. 13:19) Lala tanö böʼö ba wangoromaʼö faʼabarani yaʼia daʼö na lö taböhöli wanuriaigö si fao ’falöʼataʼu’. (Hal. 14:3) Simane Yesu, tahalö gangetula ba wanuriaigö turia Wamatörö Lowalangi, hewaʼae na lasaisi ba lafakao ita niha. Hizaʼi, itaria tola manö tarasoi wa ambö khöda faʼabarani. Hadia zi tola tafalua?

10. Hadia nifaluada ba migu fatua lö mufalua Wanörö Tödö, ba hadia mbörö?

¹⁰ Tola itugu barani ita na taʼangerönusi dötönafö nitemada börö höli nibeʼe Keriso. (Yoh. 3:16; Ef. 1:7) Ba migu fatua lö mufalua Wanörö Tödö, tebeʼe khöda ginötö enaʼö itugu taʼameʼegö tödö höli. Tahaogö taʼangerönusi ngawalö zalua fatua lö mate Yesu hegöi me no aefa mate ia. Ba taʼoʼö waö-waö wombaso Sura Niʼamoniʼö soguna ba Wanörö Tödö. Na tafalua daʼö, tola itugu aboto ba dödöda hawaʼamoguna gama-gama niʼogunaʼö ba Wanörö Tödö ba sumange si tohude niʼamaedolagö gama-gama andrö. Na aboto ba dödöda hadia zi no ifalua Yesu hegöi Yehowa khöda, ba na taʼila hadia gunania khöda hegöi  ba niha niʼomasiʼöda, hasambalö wa itugu oroma dötönafö andrö khöda. Tefarou göi dödöda enaʼö anau gölöda si fao faʼabarani irugi zi lö aetu.​—Heb. 12:3.

11-12. Hadia manö zi no tatutunö?

¹¹ No tatutunö wa Fanörö Tödö andrö tenga ha si tobali famasugi ba dödöda sanandrösa ba höli sebua böli, hizaʼi taʼila göi wangide-ngideʼö awö waʼabarani niʼokhögö Yesu. Tatu taʼandrö saohagölö börö me lö iböhöli ba wangoromaʼö mbua-bua daʼa Yesu, Ere Sebua sangandrö salahida! (Heb. 7:24, 25) Ba wangoromaʼö fangandröda saohagölö soroi ba dödö, moguna lö faröi ita ba wamalua fanörö tödö faʼamate Yesu, simane si no ifaretakö. (Luk. 22:19, 20) Tafalua ia ba ngaluo si tefaudu ba tanggal 14 Nisana, yaʼia daʼö ngaluo sabölö tohude ba zi döfi.

¹² Moroi ba lala halöwö si öna-öna ba Mbongi Watomesa Zoʼaya, tola tafahaʼö ita ba mbua-bua tanö böʼö si möi famarou dödö Yesu irege mate ia salahida. Me so Yesu ba gulidanö, laʼila niha wa iʼokhögö mbua-bua andrö. Hadia daʼö?

13. Hewisa Yohane 15:9 ba 1 Yohane 4:8-10 ba woʼamaedolagö faʼomasi niforomaʼö Yehowa ba Yesu, ba haniha manö zanema bua waʼomasira?

¹³ Iʼomasiʼö sibai ita Yehowa, ba moʼahonoa Yesu ba woloʼö duma-duma waʼomasi Yehowa andrö. Iforomaʼö Yesu waʼomasi ba ngawalö hadia ia nifaluania. (Baso Yohane 15:9; 1 Yohane 4:8-10.) Sabölö tohudenia, tefarou dödö Yesu ba wameʼe faʼaurinia salahida. Hewaʼae niha nibayoini ita mazui ’biri-biri tanö böʼö’, tola tatema mbua waʼomasi niforomaʼö Yehowa hegöi Ononia me labeʼe höli salahida. (Yoh. 10:16; 1 Yoh. 2:2) Angeragö göi ngawalö gama-gama niʼogunaʼö ba Wanörö Tödö. Daʼö zangoromaʼö wa iʼomasiʼö ndra nifahaʼönia Yesu ba iʼameʼegö tödö ira. Hana wa tola tawaʼö zimanö?

14. Hewisa wangoromaʼö Yesu faʼomasi khö ndra nifahaʼönia?

¹⁴ Iforomaʼö Yesu waʼomasi khö ndra nifahaʼönia nibayoini yaʼia daʼö me itatugöi gangowuloa Wanörö Tödö si öna-öna tenga si lö ikhamö faʼabölöra. Me no numalö ginötö, moguna lafalua ero röfi Wanörö Tödö andrö ira nifahaʼönia nibayoini, gofu hadia zalua khöra, hewaʼae na no lakuru ira. (Fam. 2:10) Hadia tola laʼoʼö niwaʼö Yesu? Tola!

15-16. Hewisa ndra talifusöda ba wamalua Mbongi Watomesa Zoʼaya hewaʼae ba ginötö si basaki so ira?

¹⁵ Iʼotarai ba götö siföföna irugi maʼökhö, laforege ira niha Keriso sindruhu ba wanörö tödö faʼamate Yesu. Laʼoʼö gamakhoita sanandrösa ba wamalua Mbongi Watomesa Zoʼaya, hewaʼae faʼitaria ba ginötö si basaki lafalua ia. Nehegö duma-duma andre. Me lakuru dalifusöda Harold King ba gurunga si so ba Cina, iʼalui lala ba wamalua Fanörö Tödö. Lö laʼila niha me ifaʼanö gama-gama niʼogunaʼö ba wanörö tödö faoma fakake si so khönia. Ihaogö göi wangerai tanggal wamalua Fanörö Tödö. Me no irugi ngaluo wamalua yaʼia, ilau manunö, mangandrö, ba ifaʼema huhuo si teʼodane-dane ba Zura Niʼamoniʼö. Fefu daʼö, ifalua samösa me so ia ba gurunga.

¹⁶ Nehegö duma-duma tanö böʼö. So sambua ngawawa ndra talifusöda ira alawe si so ba kamp konsentrasi me alua Wasuwöta Gulidanö II samorege ba wamalua Mbongi Watomesa Zoʼaya hewaʼae na tola manö labunu ira. Hizaʼi, börö me no öna-öna gama-gama niʼogunaʼö ba wamalua lala halöwö, daʼö mbörö wa tola lafalua ia ba lö laʼila niha. Lamane wangumaʼö, ”Magaoloni wozizio ba mahatöʼö ndraʼaga khö nawöma. So mbaku-baku nibalugö faoma nukha  safusi ba gotaluama, ba so roti hegöi agu yawa ba detenia. Maʼogunaʼö lili ba wohagaini nahiama börö me tola laʼila ndraʼaga na maʼogunaʼö wandru listrik. Mafuli matötöi mbuʼusa lima soroi ba dödö khö Namama ba wangogunaʼö faʼabölöma ba wangoʼawögö töinia solakhömi.” Sindruhu-ndruhu ebua sibai wamatira! Ba no sahöli-höli dödö waʼomasi Yesu, börö me itolo ita ba wamalua Fanörö Tödö hewaʼae ba ginötö si basaki!

17. Hadia manö zinofu-nofu sinangea taʼangeragö?

¹⁷ Ba zi lö ara tö tafalua Wanörö Tödö. Börö daʼö dataʼangerönusi wanofu-nofu andre, ’Hewisa woloʼögu Yesu enaʼö itugu sökhi lala wangoromaʼögu faʼomasi? Hadia abölö uʼera-era zoguna khö ndra talifusögu moroi ba zoguna khögu samösa? Hadia utötöna enaʼö lafalua ira talifusögu zi lö ikhamö faʼabölöra, mazui aboto ba dödögu hadia zi tebai lafalua?’ Yalö taböhöli ba woloʼö mbua-bua Keriso yaʼia daʼö ’tarasoi zafökhö khö nawöda’.​—1 Fet. 3:8.

18-19. (a) Hadia zi tola tafaduhusi tödö? (b) Hadia gangetulada?

¹⁸ Lö ara tö ginötö ba lö saʼae tafalua Wanörö Tödö. Na ”tohare” Yesu ba ngaluo wamakao sabölö-bölö, iʼowuloi ”niha nifili” ba zorugo. Na no aefa daʼö, lö saʼae mufalua Wanörö Tödö. —1 Kor. 11:26; Mat. 24:31.

¹⁹ Hewaʼae na lö moguna saʼae mufalua Wanörö Tödö, hizaʼi faduhu dödöda wa hasambalö latörö-törö tödöra daʼa ono mbanua Yehowa si tobali tandra wangide-ngideʼö, faʼabarani hegöi faʼomasi sebua si no irai iforomaʼö si samösa niha. Ba ginötö daʼö, yaʼira si no irai mangondrasi angowuloa sahöli-höli dödö andre, hasambalö latutunö ba niha böʼö hewisa waʼaurira me luo daʼö, enaʼö tola göi so mbua nitemara. Hizaʼi, enaʼö tola tatema mbua ba wangondrasi angowuloa andrö iadaʼa, datahalö gangetula ba woloʼö fangide-ngideʼö, faʼabarani, ba faʼomasi Yesu. Na tafalua daʼö, tola faduhu dödöda wa hasambalö ifahowuʼö ita Yehowa.​—2 Fet. 1:10, 11.