1-2. Hadia zalua sahöli-höli dödö me Fendrakose 33 M?

ME DÖFI 33 M, sihulö wongi hari Migu, so mato 120 ndra nifahaʼö si no owulo ba mbateʼe tanö yawa ba zi sambua omo. Daʼö ngaluo wamalua Fendrakose. (Hal. 1:13-15; 2:1) Hauga hari ba zilalö, ifaretakö ira Yesu enaʼö lö laröi Yeruzalema börö me latema mbuala sahöli-höli dödö. (Hal. 1:4, 5) Hadia zalua me so ira ba mbateʼe si so tanö yawa andrö?

² ”Me modadao ira, lö ladöna-döna ziʼugu moroi ba mbanua hulö nangi sabölö-bölö.” Terongo ziʼugu daʼö fefu yomo ba nomo andrö. Aefa daʼö, ”laʼila zi hulö hola-hola galitö side-ide” ahono yawa ba högö ndra nifahaʼö, ”ba fahöna khöra geheha niʼamoniʼö”. (Hal. 2:2-4) Iʼogunaʼö lala sahöli-höli dödö andrö Yehowa ba wameʼe khöra ehehania niʼamoniʼö. (Hal. 1:8) Yaʼira andre zi oföna sibai mubayoini faoma eheha niʼamoniʼö * ba tebeʼe khöra dötönafö, fao khö Yesu mamatörö ba zorugo.

3. Hana wa faduhu dödö ndra nifahaʼö, wa eheha niʼamoniʼö zombayoini yaʼira me alua Fendrakose?

³ Khalaigö na so ndraʼugö ba gotalua ndra nifahaʼö si so ba mbateʼe tanö yawa andrö. Hasambalö wa lö irai öʼolifugö hadia zalua me luo daʼö. Ahono yawa ba högöu zi hulö hola-hola galitö, ba ibörögö fahuhuo ndraʼugö ba li böʼö! (Hal. 2: 5-12) Tatu faduhu dödömö wa eheha niʼamoniʼö zombayoini yaʼugö. Hizaʼi, hadia simane daʼö manö fefu lala geheha niʼamoniʼö ba wombayoini niha? Löʼö. Hezo tola taʼila?

4. Hadia mubayoini fefu niha Keriso ba abad siföföna me no aefa tebayagö ira idanö? Tutunö.

⁴ Iadaʼa, datatutunö hawaʼara tebayoini zi samösa niha. Me döfi 33 M, nibayoini faoma eheha niʼamoniʼö tenga ha niha Keriso si 120 niha si so ba mbateʼe tanö yawa. Ba ngaluo daʼö, so mato 3.000 niha tanö böʼö nibayoini eheha niʼamoniʼö simane nifabuʼu Yesu. Tebayoini ira me tebayagö ira idanö. (Hal. 2:37, 38, 41) Hizaʼi, hauga fakhe aefa daʼö, lö iʼanemaiʼö tebayoini fefu niha Keriso na no aefa tebayagö ira idanö. Ara maʼifu me no aefa tebayagö idanö niha Zamaria, awena tebayoini ira. (Hal. 8:14-17) Baero daʼö, tebayoini Konelio hegöi ösi nomonia fatua lö tebayagö ira idanö. No sahöli-höli dödö daʼö, ba ha khöra alua ia.​—Hal. 10:44-48.

5. Moloʼö 2 Korindro 1:21, 22, hadia nirasoi zi samösa niha si no mubayoini faoma eheha niʼamoniʼö?

⁵ Tatutunö göi hadia manö nirasoi zi samösa niha na tebayoini ia eheha niʼamoniʼö. Ba wamobörö, te so ösa niha nibayoini si lö faduhu tödö wa no sinangea ifili ira Lowalangi. Tola manö lö aboto ba dödöra hadia mbörö wa ifili ira Lowalangi, ba tola manö tenga simane daʼö göi nirasoi niha nibayoini tanö böʼö. Gofu hadia nirasoira, itutunö zinenge sotöi Faulo hewisa wa tola tebayoini ira, ”Me no faduhu dödömi, iʼogunaʼö ia Lowalangi ba wamotandro * yaʼami faoma eheha niʼamoniʼö si no ifabuʼu, si tobali weʼe-weʼe dödö wa yaʼita zanema ondröita.” (Ef. 1:13, 14; nis.) Iʼogunaʼö gehehania Yehowa ba wamaduhuʼö ba niha Keriso andrö wa no ifili ira. Me ifalua daʼö, no tobali ’tandra [weʼe-weʼe dödö mazui buʼusa li]’ ba wangaroʼö tödöra wa ba zi so miföna auri ira ba zorugo sagötö faʼara tenga ba gulidanö.​—Baso 2 Korindro 1:21, 22.

6. Enaʼö tola möi ba zorugo, hadia zinangea ifalua niha Keriso si no tebayoini?

 ⁶ Na no tebayoini zi samösa niha, hadia daʼö geluahania wa hasambalö möi ia ba zorugo? Löʼö. Sindruhu sa wa faduhu dödönia wa yaʼia zi no mufili weʼamöi ba zorugo. Hizaʼi, moguna itörö tödönia mene-mene daʼa, ”Miforege enaʼö lö tebulö wa niha nikaoni ba nituyu ami. Na miforege wamalua daʼö, lö teʼala ami.” (2 Fet. 1:10) Börö daʼö, hewaʼae no tefili zi samösa niha Keriso si no mubayoini, mazui mukaoni weʼamöi ba zorugo, awena isöndra daʼö na lö faröi ia.​—Fil. 3:12-14; Heb. 3:1; Fam. 2:10.

7. Hezo tola laʼila ira niha Keriso nibayoini wa no tekaoni ira weʼamöi ba zorugo?

⁷ Hizaʼi, hewisa wa tola iʼila si samösa niha wa no mukaoni ia weʼamöi ba zorugo? Tola taʼila wanema linia ba wehede Waulo khö ndra niha Roma ”nikaoni tobali niha niʼamoniʼö”. Imane khöra, ”Lö iʼosawuyu ita eheha niʼamoniʼö mazui ifetaʼu ita. Hizaʼi, börö geheha niʼamoniʼö andrö wa tekaoni ita tobali ono Lowalangi ba tefarou dödöda weʼao, ’He Abba, Ama!’ Eheha niʼamoniʼö hegöi tödöda zamaduhuʼö wa ono Lowalangi ita.” (Rom. 1:7; 8:15, 16) Andrö, moroi ba gehehania niʼamoniʼö, iʼaroʼö dödö niha nibayaoini Lowalangi wa no tekaoni ira weʼamöi ba zorugo.​—1 Tes. 2:12.

8. Moloʼö 1 Yohane 2:20, 27, hana wa lö moguna so zamaduhuʼö ba niha Keriso nibayoini wa sindruhu-ndruhu no tebayoini ia?

⁸ No itatugöi Yehowa wa lö faʼaombö dödö ba niha sanemaʼö fogaoni moroi khönia enaʼö möi ira ba zorugo. (Baso 1 Yohane 2:20, 27.) Tatu manö, iʼogunaʼö nasa mbanua niha Keriso Yehowa ba wamahaʼö niha Keriso si no mubayoini simane ndra talifusöra tanö böʼö. Hizaʼi, lö moguna so niha böʼö si tobali samaduhuʼö wa no tebayoini ira. No iʼogunaʼö Yehowa waʼabölönia fondrege zebua ba mbanua si yawa awö danö, yaʼia daʼö ehehania niʼamoniʼö, ba wamaduhuʼö ba dödöra wa sindruhu-ndruhu no tebayoini ira!

9. Moloʼö Efeso 1:18, hadia zalua khö zi samösa niha me labayoini ia?

⁹ Ato nono mbanua Lowalangi iadaʼa tola manö abua khöra ba wangiʼila, hadia nirasoi zi samösa niha na no ibayoini ia Lowalangi. No si toʼölö daʼö, börö me lö irai tebayoini ira. Iwöwöi niha Lowalangi enaʼö auri sagötö faʼara ba gulidanö, tenga ba zorugo. (1 Moz. 1:28; Gamd. 37:29) Hizaʼi, so ösa niha nifili Yehowa enaʼö auri ba zorugo. Andrö, ba ginötö ibayoini ira, sindruhu-ndruhu ibulöʼö wanötöna hegöi lala wangera-ngerara irege ladöna-döna dania dötönafö faʼauri ba zorugo.​—Baso Efeso 1:18.

10. Hadia geluahania ”ifuli zui tumbu”? (Faigi göi nisura ba gahe zura.)

¹⁰ Me mubayoini niha Keriso faoma eheha niʼamoniʼö, ”ifuli zui tumbu” ira, mazui ”si tumbu moroi yawa”. * Iforomaʼö göi Yesu wa niha si lö irai mubayoini, tebai aboto ba dödöra hewisa rasonia ”ifuli zui tumbu”, mazui ”tumbu moroi ba geheha niʼamoniʼö”.​—Yoh. 3:3-8; nis.

11. Hadia zi tebulö moroi ba lala wangera-ngera zi samösa niha me no tebayoini ia?

¹¹ Hadia zi tebulö moroi ba lala wangera-ngera niha Keriso na no tebayoini ia? Fatua lö ibayoini ia Yehowa, iʼokhögö dötönafö faʼauri sagötö faʼara ba gulidanö. Idöna-döna ba ginötö ibaliʼö gulidanö andre Yehowa tobali faradaiso ba ihori fefu  waʼalösökhi. Tola manö no ikhalaigö ba wanemaʼö ösi nomo mazui si fahuwu khönia si no mate. Hizaʼi, me labayoini ia, tebulö lala wangera-ngerania. Hadia mbörö? Hadia itaögö gabula dödö sebua irege lö saʼae adöni dödönia auri sagötö faʼara ba gulidanö? Hadia tumbu ba gera-erania wa faʼauri ba gulidanö andre ha simane-mane daʼö manö? Löʼö. Ibulöʼö Yehowa lala wangera-ngerania hegöi dötönafönia faoma eheha niʼamoniʼö.

12. Moloʼö 1 Fetero 1:3, 4, hadia nirasoi niha Keriso nibayoini sanandrösa ba dötönafö niʼokhögönia?

¹² Niha si no tebayoini, tola manö iwaʼö tödönia wa tenga sinangea itema dötönafö si tohude andrö. Hizaʼi, lö irai aombö dödönia wa no ifili ia Yehowa. Omuso sibai dödönia ba iʼandrö saohagölö me iʼangeragö dötönafö faʼauri ba zorugo.​—Baso 1 Fetero 1:3, 4.

13. Hewisa dödö niha Keriso si no mubayoini sanandrösa ba waʼauri ba gulidanö?

¹³ Hadia daʼö geluahania wa niha Keriso si no tebayoini omasi ira na alio mate? Nehegö hadia niwaʼö zinenge sotöi Faulo. Ifagölösi mbotora simane zi sambua ose imane, ”Sindruhunia, yaʼita si so ba nose andre mangarö-ngarö ita bakha ba dödö ba abua sibai noroda, börö me lö omasi ita taheta daʼa, hizaʼi taʼonukha zi sambua andrö enaʼö tefalalini mboto si tola mate faoma faʼauri.” (2 Kor. 5:4) Niha Keriso si no mubayoini lö irai aföli ira auri ba gulidanö ba lö omasi ira alio mate. Sindruhunia, owua-wua sibai dödöra auri ba gulidanö ba omasi ira lafosumange Yehowa ero maʼökhö, fao ba nösi nomo hegöi si fahuwu khöra. Hizaʼi, gofu hadia nifaluara iadaʼa, lö tebulö laʼangeragö dötönafö sahöli-höli dödö nitemara ba zi so miföna.​—1 Kor. 15:53; 2 Fet. 1:4; 1 Yoh. 3:2, 3; Fam. 20:6.

14. Hadia zi tebai tabaliʼö tandra wa no ibayoini Lowalangi zi samösa niha?

¹⁴ Te manofu-nofu dödömö hadia no tebayaoini ndraʼugö faoma eheha niʼamoniʼö. Na simanö, angeragö wanofu-nofu daʼa: Hadia so khömö waʼedöna ba wamalua ohitö dödö Yehowa? Hadia örasoi wa tefarou sibai dödömö ba wamalua halöwö fanuriaigö? Hadia omasi öfahaʼö ndraʼugö ba Zura Niʼamoniʼö hegöi ’fangera-ngera Lowalangi sabölö abakha’? (1 Kor. 2:10) Hadia örasoi wa no itolo ndraʼugö Yehowa ba wanöndra faʼomuso dödö ba wamalua fanuriaigö? Hadia öʼonorogö tödö sibai ba wanolo niha böʼö enaʼö lafahaʼö ira sanandrösa khö Yehowa? Hadia no öʼila dandra sangoromaʼö wa itolo ndraʼugö Yehowa ba ngawalö hadia ia ba waʼaurimö? Na fanema li moroi ba wanofu-nofu andrö noa, hadia daʼö zi tobali tandra khömö wa no ikaoni ndraʼugö Yehowa weʼamöi ba zorugo? Tenga. Hadia mbörö? Börö me fefu nono mbanua Lowalangi larasoi göi zimane daʼö, hewaʼae na niha si no mubayoini ia. Moroi ba gehehania niʼamoniʼö, tola ibeʼe Yehowa waʼabölö si fagölö khö nono mbanuania ero zamösana, hewaʼae na faböʼö dötönaföra. Sindruhunia, na manofu-nofu nasa dödömö mazui so khömö waʼaombö dödö hadia niha nibayoini ndraʼugö mazui tenga, daʼö geluahania wa lö nikaoni ndraʼugö weʼamöi ba zorugo. Niha nifili Yehowa lö khöra faʼaombö dödö. Sindruhu-ndruhu faduhu dödöra wa no mubayoini ira!

15. Hezo tola taʼila wa lö fefu niha si no manema eheha niʼamoniʼö, mufili weʼamöi ba zorugo?

¹⁵ Itutunö Sura Niʼamoniʼö wa ato niha samati sanema eheha niʼamoniʼö, hizaʼi lö lasöndra dötönafö faʼauri ba zorugo. Duma-dumania yaʼia daʼö Dawido. Lö tebulö fao  khönia geheha niʼamoniʼö. (1 Zam. 16:13) Eheha niʼamoniʼö zanolo yaʼia enaʼö itugu aboto ba dödönia sanandrösa khö Yehowa. Ifarou göi dödönia eheha niʼamoniʼö ba wanura ösa nösi Zura Niʼamoniʼö. (Mrk. 12:36) Hewaʼae simanö, iwaʼö sinenge sotöi Fetero wa ”tenga ba zorugo möi Dawido”. (Hal. 2:34) Duma-duma tanö böʼö, yaʼia daʼö Yohane Samayagö Idanö. ”Fahöna khönia geheha niʼamoniʼö.” (Luk. 1:13-16) Iwaʼö Yesu wa lö hadöi niha ”sabölö ebua moroi khö Yohane Samayagö Idanö”. Hizaʼi, iwaʼö Yesu wa tebai tefarahu ia ba Wamatörö Lowalangi. (Mat. 11:10, 11) Iʼogunaʼö gehehania niʼamoniʼö Yehowa, enaʼö so khöra waʼabölö ba wamalua ngawalö dandra sahöli-höli dödö. Hizaʼi, lö iʼogunaʼö gehehania ba wameʼe khöra dötönafö faʼauri ba zorugo. Hadia daʼö geluahania wa ambö khöra foloʼö, tenga simane niha si no mufili fao mamatörö ba zorugo? Tenga. Hizaʼi, hasambalö isusugi ira Yehowa ba gulidanö Faradaiso.​—Yoh. 5:28, 29; Hal. 24:15.

16. Hadia nidöna-döna nono mbanua Lowalangi iadaʼa?

¹⁶ Iadaʼa, ato nono mbanua Lowalangi si so ba gulidanö, si lö mangokhögö dötönafö faʼauri ba zorugo. Ladöna-döna dania waʼauri ba gulidanö tobali ono mbanua ba Wamatörö Lowalangi. Dötönafö daʼö göi niʼokhögö Gaberahamo, Sara, Dawido, Yohane Samayagö Idanö, hegöi ira matua ba ira alawe tanö böʼö ba götö Zura Niʼamoniʼö.​—Heb. 11:10.

17. Hadia manö wanofu-nofu si so fanema li ba artikel aefa daʼa?

¹⁷ Börö me so nasa niha nibayoini ba gotaluada, so ösa wanofu si tola taʼangeragö. (Fam. 12:17) Duma-dumania, hewisa zinangeania niha Keriso si no tebayoini ba wamaigi faʼaurira samösa? Hewisa zinangeania mbua-buada ba niha si manga roti hegöi samadu agu ba ngaluo Wanörö Tödö? Hadia moguna so khöda waʼaombö dödö na itugu monönö niha samalua daʼö? So wanema li moroi ba wanofu-nofu andre ba artikel aefa daʼa.