1-2. Hadia manö zi tola alua ba nono mbanua Yehowa, ba hadia lua-luania ba waʼaurira?

ANGERAGÖ zi tölu zalua andre: Samösa dalifusöda ira matua, ifatunö khönia doto wa no göna ia fökhö sabölö-bölö ba itugu alö waʼabölönia. Samösa dalifusöda ira matua, döfinia 50 fakhe si no muʼefasi moroi ba halöwönia, hewaʼae no iforege ba wangalui halöwö tanö böʼö, ba lö manö nasa isöndra. Samösa dalifusöda ira alawe si lö faröi si no alawa döfi, tebai saʼae ifalua halöwö ba wamati simane si toʼölö ifalua ba zilalö.

² Na no alua khömö simane si no mututunö andrö, tola manö tumbu ba dödömö wa niha si lö moguna saʼae ndraʼugö. Tola taya waʼomuso dödömö, so khöu waʼide-ide dödö, ba tola göi ifakiko wahuwusamö ba niha böʼö.

3. Hewisa Zatana hegöi niha si so barö wamatörönia ba wamaigi faʼauri niha gulidanö?

³ Ulidanö andre zangoromaʼö hewisa wamaigi Zatana waʼauri niha gulidanö. Ifalua zomasi-masi dödönia ba niha, ba hulö zi lö eluaha ira ba wamaiginia. Si fao faʼalösökhi, ifatunö Zatana khö Khawa wa tola owua-wua dödönia na lö moloʼö ia khö Lowalangi, hewaʼae sindruhunia aboto ba dödö Zatana wa lua-luania yaʼia daʼö faʼamate. Ba gulidanö iadaʼa, fogale, politik hegöi agama so barö wamatörö Zatana. Andrö wa lö tokea ita, na ato ndra pengusaha, sondröniaʼö politik hegöi sondröniaʼö agama, lö laʼosinangegö waʼauri niha ba lö laʼameʼegö tödö nirasoi niha böʼö.

4. Hadia nitutunöda ba wamahaʼö daʼa?

⁴ Hizaʼi, faehu sibai Yehowa khö Zatana. Omasi Yehowa na aboto ba dödöda wa ebua sibai mbölida fönania. Omasi göi itolo ita na so gabula dödöda, na tarasoi wa niha si lö moguna ita. (Zin. 136:23; Rom. 12:3) Famahaʼö daʼa zanutunö khöda, hewisa Yehowa ba wanolo yaʼita ba zi tölu zalua andre:  (1) Na mofökhö ita, (2) na tataögö gabula dödö sanandrösa ba zoguna, ba (3) na tumbu ba dödöda wa niha si lö moguna saʼae ita föna Yehowa börö me no alawa ndröfida. Hizaʼi, si oföna sibai tatutunö, hana wa faduhu dödöda wa ebua sibai mbölida föna Yehowa.

5. Hadia mbörö wa faduhu dödömö wa ebua sibai mbölimö föna Yehowa?

⁵ Hewaʼae moroi ba dambu tefazökhi ita, sindruhunia abölö ebua mbölida moroi ba daʼö. (1 Moz. 2:7) Angeragö ösa hadia mbörö wa faduhu dödöda wa ebua sibai mbölida föna Yehowa. Ifazökhi niha Yehowa si fakhili-khili khönia irege tola laʼoʼö gamuatania. Ba nifaluania andrö, no iforomaʼö wa abölö tohude ita moroi ba niwöwöinia tanö böʼö si so ba gulidanö. (1 Moz. 1:27) Taʼokhögö göi noro dödö ba wondrorogö ulidanö hegöi ba wamatörö urifö.​—Zin. 8:5-9.

6. Hadia dane-dane tanö böʼö zameʼe khöda faʼafaduhu dödö wa iʼosinangegö niha si lö moʼahonoa Yehowa?

⁶ Hewaʼae na no ifalua horö Adamo, lö tebulö iʼosinangegö niha Yehowa. Sindruhu-ndruhu iʼosinangegö ita irege itehegö Yesu, Ono niʼomasiʼönia ba wangöhöli yaʼita moroi ba horö. (1 Yoh. 4:9, 10) Börö höli nibeʼe Yesu, so dane-dane khö Yehowa ba wanusugi niha si no mate börö horö nifalua Gadamo, ”he satulö he si lö atulö”. (Hal. 24:15) Taromali Lowalangi zanutunö khöda wa ebua sibai mbölida föna Lowalangi, hewaʼae na göna ita fökhö, numana, mazui alawa ndröfida.​—Hal. 10:34, 35.

7. Hadia nasa mbörö tanö böʼö, zangaroʼö tödö nono mbanua Lowalangi wa sindruhu-ndruhu iʼosinangegö ira Yehowa?

⁷ So nasa dane-dane tanö böʼö wa tola faduhu dödöda wa iʼosinangegö ita Yehowa. No idöni ita enaʼö tahatöʼö ita khönia, ba inehegö hewisa wanemaʼöda turia somuso dödö. (Yoh. 6:44) Ba ginötö tahatöʼö ita khö Yehowa, hasambalö ihatöʼö ia khöda. (Yak. 4:8) Baero daʼö, itehegö ginötö hegöi faʼabölönia ba wamahaʼö yaʼita. Daʼa zangoromaʼö wa ebua sibai mbölida fönania. Iʼila hewisa waʼaurida iadaʼa, ba iʼila wa tola tobali ita niha sabölö sökhi. Iʼamenesi göi ita Yehowa börö me iʼomasiʼö ita. (Gamd. 3:11, 12) Daʼö fefu zangaroʼö tödöda wa sindruhu-ndruhu iʼosinangegö ita Yehowa!

8. Hewisa Zinunö 18:28-30, tola möi fanoloda ba wanaögö abula dödö faoma amuata si sökhi?

⁸ So ösa niha sangumaʼö wa Razo Dawido andrö niha si lö moguna, hizaʼi faduhu dödö Dawido wa iʼomasiʼö ba ituhini ia Yehowa. Daʼö zanolo Dawido ba wanaögö abula dödönia faoma amuata si sökhi. (2 Zam. 16:5-7) Ba ginötö tataögö gabula dödö irege tumbu khöda waʼide-ide dödö, tola itolo ita Yehowa ba wangokhögö lala wangera-ngera si tefaudu. Tola göi itolo ita Yehowa ba wanaögö abula dödö andrö. (Baso Zinunö 18:28-30.) Na ituhini ita Yehowa, lö hadöi zi tola manaha yaʼita ba wamosumange yaʼia si fao faʼowua-wua dödö. (Rom. 8:31) Iadaʼa, datatutunö tölu ngawalö zi tola alua khöda. Ba zalua andre, moguna tatörö tödöda wa iʼomasiʼö ba iʼosinangegö ita Yehowa.

9. Hadia lua-lua wökhö ba lala wamaigida yaʼita samösa?

⁹ Na mofökhö ita, tola molua-lua daʼö ba nirasoida irege tumbu ba dödöda wa lö saʼae moguna ita ba niha böʼö. Te aila ita na taʼandrö wanolo ba niha böʼö ba ginötö mofökhö ita, mazui te no laʼila wa no mofökhö ita. Hewaʼae na lö laʼila niha böʼö wa mofökhö ita, tola manö aila ita börö me tebai saʼae tafalua ngawalö halöwö si toʼölö tafalua ba zilalö. Hewisa Yehowa ba wangaʼaroʼö yaʼita ba ginötö simane daʼö?

10. Moloʼö Gamaedola 12:25, hadia zi tobali fangaroʼöda ba ginötö mofökhö ita?

 ¹⁰ Na mofökhö ita, tola tobali fangaroʼöda ”daromali nihaogö”. (Baso Gamaedola 12:25.) Ba Zura Niʼamoniʼö, oya ngawua wehede si sökhi moroi khö Yehowa, si tobali famasugi ba dödöda wa ebua sibai mbölida fönania, hewaʼae ba ginötö mofökhö ita. (Zin. 31:20; 41:3) Na asese tabaso Daromali Lowalangi, hasambalö itolo ita Yehowa ba wanaögö lala wangera-ngerada si lö tefaudu börö wökhö si göna yaʼita.

11. Hewisa dalifusöda ira matua ba worasoi fanolo Yehowa?

¹¹ Nehegö hadia zalua khö dalifusöda ira matua sotöi Jorge. Awuyu-wuyu nasa ndröfinia, hizaʼi göna ia fökhö, irege alö waʼabölönia. Irasoi wa niha si lö moguna ia börö wökhönia andrö. Imane, ”Tebai utaögö wökhögu andre, ba aila sibai ndraʼo börö me asese lafaigi-faigido niha. Me itugu abölö-bölö wökhögu, uʼangeragö hadia zalua ba waʼaurigu ba zi so miföna. Itugu fawuka wangera-ngeragu, ba uʼandrö khö Yehowa enaʼö itolo ndraʼo.” Hewisa Yehowa ba wanolo Jorge? ”Börö me abua khögu ba wangosambuaʼö fangera-ngeragu, lafarou dödögu ba wombaso ösa ayati si so ba mbuku Zinunö, sangoromaʼö wa iʼosinangegö sibai nono mbanuania Yehowa. Ero maʼökhö, ubaso ayati daʼö ba zi hauga kali, ba itugu terara dödögu ba möi fangabölöʼögu. Itugu numalö ginötö, ibörögö laʼila niha wa asese uboho mbawa. Ba lawaʼö khögu, wa amuatagu si sökhi andrö möi fangabölöʼöra. Aboto ba dödögu wa no ifondrondrongo gangandröwagu Yehowa! Itolo ndraʼo Yehowa ba wombulöʼö lala wangera-ngeragu sanandrösa ba khögu samösa. Itugu uʼosambuaʼö dödögu ba niwaʼö Zura Niʼamoniʼö, sanandrösa ba lala wamaigi Yehowa ndraʼo hewaʼae na gönado fökhö.”

12. Ba ginötö mofökhö ndraʼugö, hadia zinangea öfalua ba wanöndra fanolo moroi khö Yehowa?

 ¹² Ba ginötö mofökhö ndraʼugö, yafaduhu dödömö wa hasambalö iʼila Yehowa hadia zalua khömö. Andrö wanolo moroi khönia enaʼö öʼokhögö lala wangera-ngera si tefaudu sanandrösa ba zalua khömö. Aefa daʼö, alui wehede fondrara dödö si no ihenaigö Yehowa ba Zura Niʼamoniʼö. Tola öʼosambuaʼö wangera-ngeramö ba ayati sanutunö wa iʼosinangegö nono mbanuania Yehowa. Na öfalua daʼö, tola öʼila waʼahakhö dödö Yehowa ba niha samosumange yaʼia si lö faröi.​—Zin. 84:11.

13. Hadia zi tola irasoi zi samösa högö yomo ba nomo na laheta ia ba halöwönia?

¹³ Ero samösa niha si no tobali högö yomo ba nomo, moguna ibönökhi zoguna ba nösi nomonia. Hizaʼi, hewisa na so dalifusöda niheta ba halöwönia hewaʼae na lö hadöi zala nifaluania. No iforege ba wangalui halöwö tanö böʼö, hizaʼi lö nasa isöndra. Tola manö tumbu ba dödönia wa niha si lö moguna ia börö zalua khönia andrö. Hewisa wa tola teʼabölöʼö ia na iʼosambuaʼö wangera-ngerania ba mbuʼusa li nibeʼe Yehowa?

14. Hana wa hasambalö ifalua mbuʼusa linia Yehowa?

¹⁴ Hasambalö ifalua Yehowa hadia zi no ifabuʼu. (Yos. 21:45; 23:14) Hadia mbörö? Sambua moroi ba gotaluania, yaʼia daʼö börö me tola molua-lua daʼö ba döinia hegöi dadaomania si sökhi. No ifabuʼu Yehowa wa hasambalö ibönökhi zoguna ba nono mbanuania si lö faröi, ba iʼonorogö tödö sibai ba wamalua mbuʼusa linia andrö. (Zin. 31:1-3) Aefa daʼö, aboto ba dödö Yehowa wa yaʼita andre ösi nomonia, irasoi waʼabu dödö hegöi faʼafatö dödö na lö ibönökhi zoguna khöda. Ifabuʼu Yehowa  wa hasambalö ibönökhi gofu hadia zoguna khöda ba mboto hegöi ba wamati. Lö hadöi zi tola manaha Yehowa ba wamalua mbuʼusa linia andrö!​—Mat. 6:30-33; 24:45.

15. (a) Hadia manö gabula dödö nitaögö niha Keriso ba abad siföföna? (b) Hadia zi tola tafaduhusi tödö simane niwaʼö ba Zinunö 37:18, 19?

¹⁵ Na tatörö tödöda zi dombua mbörö no mege, hasambalö faduhu dödöda wa lö tebulö itolo ita Yehowa ba wanaögö abula dödö sanandrösa ba zoguna. Angeragö duma-duma salua ba niha Keriso ba abad siföföna. Me göna folohi sabölö-bölö niha Keriso si so ba Yeruzalema, ’oi zara muzawili zato, hatö ira sinenge zi toröi’. (Hal. 8:1) Khalaigö zalua khöra andrö. Tola manö lö omora saʼae hegöi halöwöra, irege lataögö gabula dödö sanandrösa ba zoguna. Hewaʼae simanö, lö iröi ira Yehowa. Lö tebulö göi laʼokhögö waʼowua-wua dödö. (Hal. 8:4; Heb. 13:5, 6; Yak. 1:2, 3) Lö tebulö Yehowa ba wotuhini niha Keriso si lö faröi andrö, ba lö göi tebulö ituhini ita.​—Baso Zinunö 37:18, 19.

16. Hana wa tola tumbu ba gera-erada wa lö saʼae moguna khö Yehowa lala wamosumange nifaluada?

¹⁶ Na no alawa ndröfida, te tarasoi wa lö oya zi tola tabeʼe khö Yehowa. Tola manö daʼö göi nirasoi Razo Dawido me no alawa ndröfinia. (Zin. 71:9) Hewisa Yehowa ba wanolo yaʼita?

17. Hadia wamahaʼö si tola tahalö moroi ba duma-duma salua khö dalifusöda ira alawe sotöi Jheri?

¹⁷ Nehegö zalua khö dalifusöda ira alawe sotöi Jheri. Lakaoni ia weʼamöi pelatihan ba wondrorogö Balai Mbanua Lowalangi, hizaʼi so khönia waʼalawö. Imane, ”No numalö saʼae ndröfigu, lakha mbanua ndraʼo, ba lö hadöi nekhe-nekhe dangagu si tola iʼogunaʼö Yehowa. Lö saʼae moguna ndraʼo.” Ba mbongi fatua lö mubörögö  pelatihan, itutunö fefu nösi dödönia khö Yehowa ba wangandrö. Mahemolunia, me tohare ia ba Balai Mbanua Lowalangi, so khönia nasa waʼaombö dödö hadia moguna möi ia ba daʼö. Hizaʼi ba pelatihan andrö, so samösa zi fahuhuo sangumaʼö wa nekhe-nekhe danga si tohude, yaʼia daʼö na so khöda waʼaoha gölö wanemaʼö famahaʼö moroi khö Yehowa. Imane Jheri, ”Me luo daʼö, umane tödögu, ’So khögu nekhe-nekhe danga simane daʼö!’ Ulau meʼe börö me aboto ba dödögu wa no ifondrondrongo wangandrögu Yehowa. Iʼaroʼö dödögu wa so zi tohude niʼokhögögu si tola ubeʼe ba omasi ifahaʼö ndraʼo.” Me itörö tödönia daʼö, imane Jheri, ”Me möi ndraʼo ba pelatihan andrö, moʼugu-ugu dödögu ba so khögu waʼide-ide dödö. Hizaʼi me mangawulido, teʼaroʼö ndraʼo, so khögu waʼafaduhu dödö, ba urasoi wa moguna ndraʼo!”

18. Hewisa Zura Niʼamoniʼö ba wangoromaʼö wa iʼosinangegö nifaluada Yehowa hewaʼae na itugu alawa ndröfida?

¹⁸ Ba wamaigi Yehowa, tola nasa iʼogunaʼö ita hewaʼae itugu alawa ndröfida. (Zin. 92:13-16) Ifahaʼö ita Yesu, wa gofu hawaʼebua zi tola tabeʼe khö Yehowa, ebua sibai mböli nifaluada andrö ba wamaigi Yehowa. (Luk. 21:2-4) Andrö, osambuaʼö dödömö ba zi tola öfalua. Duma-dumania, tola öfatunö ba niha böʼö sanandrösa khö Yehowa, ohe ba wangandrö ndra talifusöda, ba aroʼö dödöra enaʼö lö faröi. Ba wamaigi Yehowa, no si falulu fohalöwö ndraʼugö khönia, tenga börö zi tola öfalua, hizaʼi börö me so khöu waʼaoha gölö ba woloʼö niwaʼönia.​—1 Kor. 3:5-9.

19. Simane nisura ba Roma 8:38, 39 hadia zi tola tafaduhusi tödö?

¹⁹ Sindruhu wa Yehowa andrö no Lowalangi sangosinangegö niha samosumange yaʼia. Taʼandrö sibai saohagölö me no taʼokhögö Lowalangi simane yaʼia! Iwöwöi ita Yehowa ba wamalua ohitö dödönia, ba tola taʼokhögö waʼowua-wua dödö na tafosumange ia. (Fam. 4:11) Te lö iʼosinangegö ita ulidanö andre, hizaʼi tenga simane daʼö Lowalangi. (Heb. 11:16, 38) Na tarasoi waʼide-ide dödö börö wökhö nitaögöda, faʼambö-ambö ba zoguna, mazui faʼalawa ndröfi, böi olifugö wa lö hadöi si tola mamabali yaʼita moroi ba waʼomasi Namada.​—Baso Roma 8:38, 39.