1. Simane Razo Dawido, hadia wanofu si tumbu ba dödö nono mbanua Yehowa?

TATU omasi ita na tarasoi waʼahono dödö ba waʼaurida. Lö hadöi niha somasi morasoi faʼaombö-aombö dödö. Hizaʼi itaria, so manö zangaʼasogö khöda faʼaombö dödö. Daʼö mbörö wa so ösa nono mbanua Yehowa samaʼema fanofu simane fanofu Razo Dawido khö Yehowa, ”Hawaʼara manö tebato waʼaombö dödögu, ba faʼabu dödögu ero maʼökhö?”​—Si. 13:2.

2. Hadia nitutunöda ba artikel daʼa?

² Hewaʼae na itaria aombö dödöda, so ösa zi tola tafalua ba wangalösi faʼaombö dödöda andrö. Ba artikel daʼa, tatutunö hadia manö zangaʼasogö khöda faʼaombö dödö. Aefa daʼö, tatutunö önö ngawalö zi tola tafalua enaʼö tarasoi waʼahono dödö ba lö talafo aombö dödöda na tataögö gabula dödö.

3. Hadia manö zangaʼasogö khöda faʼaombö dödö, ba hadia tola tafatörö fefu daʼö?

³ Oya zangaʼasogö khöda faʼaombö dödö, ba so ösa zi tebai tafatörö. Duma-dumania, tebai tatatugöi mböli gö, böli nukha, hegöi okosi nomo, si tedou ero röfi. Tebai göi tafatörö hawaʼasese ladönisi dödöda ira awöda ba zekola mazui awöda wohalöwö, ba wamalua falimosa mazui amuata wohorö. Tebai göi tabatogö waʼalösökhi salua ba zi fasuida. Alua khöda fefu gabula dödö andrö börö me ato niha ba gulidanö andre si lö mamalua goi-goi Zura Niʼamoniʼö. Baero daʼö, iʼila Satana, samatörö ulidanö andre, wa so niha si lö omasi mangai halöwö khö Yehowa börö ’waʼaombö dödö ba gulidanö ba götö daʼa’. (Mat. 13:22; 1 Yo. 5:19) Börö daʼö, lö tokea  ita na oya zangaʼasogö khöda faʼaombö dödö ba gulidanö andre!

4. Hadia zalua na talafo taʼaombösi tödö gabula dödö salua khöda?

⁴ Tola manö talafo taʼaombösi tödö gabula dödö salua khöda, irege ha ba daʼö manö taʼosambuaʼö dödöda ba lö taʼangeragö danö böʼönia. Duma-dumania, tola manö aombö dödöda wa lö ibönö gefeda ba wowöli soguna khöda. Mazui, te aombö dödöda, alai na göna ita fökhö irege lö taʼila mohalöwö mazui laheta ita moroi ba halöwöda. Aombö göi dödöda, alai na faröi ita na ladönisi dödöda ba wanawö oroisa Lowalangi. Ba zi lö ara tö, hasambalö idönisi dödö niha sato si so barö wamatörönia Satana, ba wanuwö ono mbanua Lowalangi. Börö daʼö, te aombö dödöda hadia nifaluada dania na lasuwö ita. Tola manö manofu-nofu dödöda, ’Hadia fasala na uʼaombösi tödö fefu daʼö?’

5. Hadia geluaha wehede Yesu me iwaʼö, ”Böi mibusi tödö”?

⁵ Imane Yesu khö ndra soloʼö khönia, ”Böi mibusi tödö.” (Mat. 6:25) Hadia daʼö geluahania wa maʼifu tebai taʼaombösi tödö hadia ia? Tenga. Törö tödöu wa so ösa nono mbanua Yehowa si lö faröi me götö föna si no irai morasoi faʼaombö-aombö dödö. Hewaʼae simanö, lö tebulö iʼomasiʼö ira Yehowa. * (1 Ra. 19:4; Si. 6:3) Sindruhunia, omasi Yesu ba wamaduhuʼö ba dödöda wa lö moguna talafo aombö dödöda. Lö omasi ia na lö saʼae taʼofönaiʼö wangai halöwö khö Yehowa börö me talafo taʼaombösi tödö zoguna ba waʼaurida. Börö daʼö, hadia manö zi tola tafalua na tarasoi waʼaombö-aombö dödö?​—Faigi kotak ” Lala Wamalua Yaʼia”.

6. Moloʼö Filifi 4:6, 7, hadia zanolo yaʼita enaʼö tarasoi waʼahono dödö?

⁶ (1) Aseseʼö angandrö. Na aombö dödömö, angandrö khö Yehowa enaʼö itolo ndraʼugö. (1 Fe. 5:7) Si tobali fanema li ba wangandrömö, ibeʼe khöu waʼohahau dödö andrö Lowalangi, ”sabölö moroi ba gera-era niha fefu”. (Baso Wilifi 4:6, 7.) Iʼogunaʼö gehehania niʼamoniʼö Yehowa ba wameʼe khöu faʼahono dödö.​—Gal. 5:22.

7. Hewisa zomasi Yehowa na mangandrö ita?

⁷ Na mangandrö ndraʼugö khö Yehowa, tutunö fefu nösi dödöu khönia. Zara-zara wanutunö abula dödö salua khöu. Na tola atö muʼasiwai gabula dödö daʼö, andrö khönia waʼatua-tua enaʼö öʼila hadia zinangea öfalua, ba andrö khönia waʼabölö ba wamalua daʼö. Hizaʼi, na tebai atö muʼasiwai, andrö wanolo moroi khö Yehowa enaʼö lö talafo öʼaombösi tödö daʼö. Na öhaogö özara-zara wanutunö abula dödömö andrö khö Yehowa, tola öʼila samösa hewisa wameʼe Yehowa fanema li ba wangandrömö. Tola manö, lö iʼanemaiʼö ibeʼe wanema li. Hizaʼi, böi böhöli wangandrö. Sindruhu sa, omasi Yehowa na özara-zara wanutunö abula dödömö ba wangandrö. Hizaʼi, abölö omasi ia nasa na lö öböhöli wangandrö.​—Luk. 11:8-10.

8. Hadia zinangea tafaehagö ba wangandröda?

⁸ Ba ginötö öʼohe gabula dödömö ba wangandrö khö Yehowa, böi olifuʼö wangandrö saohagölö khönia. Hewaʼae na oya gabula dödö salua khöda, moguna göi taʼangeragö ngawalö zi sökhi si tola nasa tarasoi iadaʼa. Hewisa na lö öʼila ötutunö nösi dödöu? Törö tödömö wa hasambalö ibeʼe wanema li ba wangandrömö Yehowa hewaʼae na ha daʼa zi tola öwaʼö: ’Tolodo Yehowa!’​—2 Ng. 18:31; Rom. 8:26.

9. Hewisa lala enaʼö sindruhu-ndruhu tarasoi waʼahono dödö?

 ⁹ (2) Odaligö waʼatua-tua Yehowa, tenga faʼatua-tuamö samösa. Me götö zamaʼeleʼö sotöi Yesaya, ataʼu niha Yehuda na tohare niha Asiria ba wanuwö yaʼira. Lö omasi niha Yehuda na niha Asiria zamatörö yaʼira. Börö daʼö, laʼandrö wanolo moroi ba niha Miserai. (Yes. 30:1, 2) Ifangelama ira Yehowa wa lö sökhi lua-lua gangetula nihalöra andrö. (Yes. 30:7, 12, 13) Iʼogunaʼö Yesaya ba wangombakhaʼö khöra hewisa lala enaʼö sindruhu-ndruhu larasoi waʼahono dödö. Imane, ”Na lö miböhöli waʼafaduhu dödö [khö Yehowa] ba lö mangiwa dödömi, hasambalö abölö ami.”​—Yes. 30:15b.

10. Hawaʼara tola taforomaʼö wa tafaduhusi tödö Yehowa?

¹⁰ Hawaʼara tola taforomaʼö wa tafaduhusi tödö Yehowa? Nehegö duma-duma andre. Khalaigö na so zameʼe khöu halöwö sebua gazi, hizaʼi oya ginötö niʼogunaʼöu ba wamalua halöwö daʼö ba itugu alö ginötöu ba wangai halöwö khö Yehowa. Mazui, te so nawöu wohalöwö sangumaʼö wa omasi ia khöu, hizaʼi yaʼia andrö tenga ono mbanua Lowalangi si no tebayagö idanö. Duma-duma tanö böʼö, khalaigö na so nösi nomou sangumaʼö khöu, ”Tatugöi haniha nifiliu, yaʼo mazui Lowalangiu.” Na alua zimane daʼö, tatu abua khöu ba wangai angetula. Hizaʼi, hasambalö ibeʼe khöu Yehowa wanuturu lala si tefaudu. (Mat. 6:33; 10:37; 1 Ko. 7:39) Hadia faduhu dödömö khö Yehowa ba öʼoʼö wanuturu lala nibeʼenia?

11. Ba Zura Niʼamoniʼö, haniha manö zi tobali duma-duma khöda enaʼö lö tebulö tarasoi waʼahono dödö hewaʼae göna ita folohi?

¹¹ (3) Fahaʼö ndraʼugö moroi ba duma-duma si sökhi hegöi si lö sökhi. Ba Zura Niʼamoniʼö, oya waö-waö waʼauri sangoromaʼö wa moguna sibai waʼahono dödö hegöi faʼafaduhu dödö khö Yehowa. Na öfahaʼö ndraʼugö ba waö-waö waʼauri andrö, angeragö hadia mbörö wa lö tebulö so waʼahono dödö ba gotalua nono mbanua Lowalangi hewaʼae na göna ira folohi. Duma-dumania, me lafaretakö ndra sinenge ira sangetuʼö huku Yahudi enaʼö laböhöli wanuriaigö, lö ataʼu ira. Hizaʼi, si fao faʼabarani, lamane wangumaʼö, ”Abölö sökhi woloʼö khö Lowalangi me yaʼia zamatörö yaʼaga moroi ba woloʼö ba niha.” (Hal. 5:29) Ba ginötö daʼö, lö faʼataʼu khö ndra sinenge hewaʼae na no fakhamö laleasi ira. Hadia mbörö? Börö me faduhu dödöra wa fao khöra Yehowa ba omuso dödönia khöra. Andrö, lö laböhöli wanuriaigö. (Hal. 5:40-42) Angeragö göi duma-duma Zitefano. Me arakhagö lahuku mate ia, lö mangiwa dödö Zitefano ba irasoi waʼahono dödö, irege ”hulö mbawa malaʼika” mbawania. (Hal. 6:12-15) Hadia mbörö? Börö me faduhu dödönia wa omuso dödö Yehowa khönia.

12. Moloʼö 1 Fetero 3:14 hegöi 4:14, hana wa tola tarasoi waʼomuso dödö hewaʼae na göna ita folohi?

¹² Me föna, ibeʼe Yehowa waʼabölö khö ndra sinenge ba wamalua tandra sahöli-höli dödö. Daʼö mbörö wa faduhu dödöra wa fao khöra Yehowa. (Hal. 5:12-16; 6:8) Iadaʼa, lö saʼae tebeʼe khöda waʼabölö simane daʼö. Hizaʼi, ba Daromalinia, ifaduhuʼö khöda Yehowa si fao faʼomasi wa omuso dödönia khöda, ba ibeʼe khöda gehehania niʼamoniʼö ba ginötö göna ita folohi börö wamalua satulö. (Baso 1 Fetero 3:14; 4:14.) Börö daʼö, lö moguna taʼaombösi tödö hadia zinangea tafalua na göna ita folohi ba zi so miföna. Hizaʼi, dataforege ba wangaʼaroʼö faʼafaduhu dödöda wa hasambalö ituhini ba iʼefaʼö ita Yehowa. Simane ira nifahaʼö Yesu me abad siföföna, tola faduhu dödöda ba mbuʼusa li Yesu andre: ”Yaʼo  zamofaʼatua-tua yaʼami enaʼö miʼila hadia zinangea miwaʼö. Hewaʼae no hasara dödö zi faʼudu khömi, tebai lalawa mazui ladaʼawaini ami.” No göi ifabuʼu Yesu, ”Na anau gölömi, ba teʼorifi ami.” (Luk. 21:12-19) Ba böi olifuʼö wa itörö tödö Yehowa fefu zoʼamakhaita ba nono mbanuania si lö faröi, irugi wondrege zide-ide. Börö daʼö, hasambalö isusugi fefu nono mbanuania si no mate.

13. Hana wa moguna tafahaʼö ita moroi ba duma-duma niha sangiwa tödö ba si lö mangodaligö Yehowa?

¹³ Ba Zura Niʼamoniʼö, so göi duma-duma niha sangiwa tödö ba si lö mangodaligö Yehowa. Moguna tafahaʼö ita moroi ba duma-duma si lö sökhi andrö, enaʼö lö tafalua zala simane daʼö. Duma-dumania, Razo Asa. Me awena tobali ia razo Yehuda, tohare zaradadu sato ba wanuwö soinia. Me luo daʼö, iʼandrö wanolo moroi khö Yehowa, ba ikalaisi ndra saradadu andrö Yehowa. (2 Ng. 14:9-12) Ba gafuriata, isuwö Yehuda Razo Baesa moroi ba Gizaraʼeli, ba lö atoto zaradadunia. Hizaʼi sakali daʼa, lö iʼandrö wanolo Yehowa Razo Asa. Igazi razo Siria ba wanolo yaʼia. (2 Ng. 16:1-3) Ba me abölö-bölö wökhönia ba arakhagö mate ia, lö göi iʼandrö wanolo moroi khö Yehowa.​—2 Ng. 16:12.

14. Hadia wamahaʼö si tola tahalö moroi ba zala nifalua Razo Asa?

¹⁴ Me awena mamatörö Razo Asa, iʼodaligö Yehowa ba ginötö göna ia abula dödö. Hizaʼi ba gafuriata, lö saʼae iʼandrö wanolo moroi khö Yehowa. Iforege ba wangasiwai samösa abula dödö salua khönia. Me lasuwö Yehuda ira niha Gizaraʼeli, hulö mofozu gera-era Asa ba wangandrö fanolo ba niha Siria. Hizaʼi, lö arara waʼamofozu daʼö. Ifatenge samösa zamaʼeleʼönia Yehowa ba wangombakhaʼö khö Razo Asa, ”Börö me öʼodaligö razo Siria, tenga Lowalangimö Yehowa, hasambalö aheta ba dangamö zaradadu razo Siria.” (2 Ng. 16:7) Hadia wamahaʼönia? Moguna mangelama ita enaʼö lö tawaʼö tödöda wa tola taʼasiwai samösa gabula dödö salua khöda, ba lö moguna taʼandrö wanuturu lala moroi khö Yehowa ba Daromalinia. Na lö mangiwa dödöda ba taʼodaligö Yehowa, hasambalö itolo ita ba wangai angetula si tefaudu hewaʼae na basaki zalua khöda.

15. Hadia zi tola tafalua na tabaso Zura Niʼamoniʼö?

¹⁵ (4) Tanö ba dödöu ayati Zura Niʼamoniʼö. Na ösöndra ayati Zura Niʼamoniʼö sangoromaʼö wa moguna sibai waʼahono dödö hegöi faʼafaduhu dödö khö Yehowa, tandraigö tanö ba dödöu ayati andrö. Enaʼö aoha khöu wamalua yaʼia, ebuaʼö limö ba wombaso ayati daʼö. Mazui, tola ösura ayati andrö ba aseseʼö wombaso yaʼia. Iwaʼö Yehowa khö Yosua enaʼö owölö-ölö ia ba wombaso hegöi ba woʼangerönusi Oroisa Moze, irege isöndra waʼatua-tua. Daʼö göi zanolo yaʼia enaʼö lö khönia faʼataʼu ba ginötö idöniaʼö nono mbanua Lowalangi. (Yos. 1:8, 9) Simanö göi, oya ayati Zura Niʼamoniʼö si tola manolo yaʼugö ba wangokhögö faʼahono dödö, hewaʼae na so zalua sasese mangaʼasogö khöu faʼaombö-aombö dödö mazui faʼataʼu.​—Si. 27:1-3; Amd. 3:25, 26.

16. Hewisa wangogunaʼö Yehowa ira talifusöda ba wanolo yaʼita enaʼö lö tebulö tarasoi waʼahono dödö ba faduhu dödöda khönia?

¹⁶ (5) Fariawö ba nono mbanua Lowalangi. Iʼogunaʼö ndra talifusöda Yehowa ba wanolo yaʼita enaʼö lö tebulö tarasoi waʼahono dödö ba faduhu dödöda khönia. Ba gangowuloa, tola tatema mbua moroi ba huhuo sebua nifaʼema khöda, bua gera-era nifondrondrongoda, hegöi fehede si  möi famarou dödö moroi khö ndra talifusöda. (Heb. 10:24, 25) Tola göi teʼabölöʼö ita na tatutunö nösi dödöda khö ndra si fahuwu khöda ba mbanua niha Keriso. Tola alö waʼaombö-aombö dödöda na tarongo ’wehede si sökhi’ moroi khö ndra si fahuwu khöda.​—Amd. 12:25.

17. Moloʼö Heberaiʼo 6:19, hewisa wa tola möi fanoloda dötönafö moroi khö Yehowa enaʼö lö mangiwa ita na so gabula dödöda?

¹⁷ (6) Aroʼö waʼafaduhu dödöu ba dötönafö salua ba zi so miföna. Tötönafö nibeʼe Yehowa andrö ”no amaedola zao ba waʼaurida”. Eluahania, tola itolo ita enaʼö lö mangiwa dödöda hewaʼae na alua khöda gabula dödö mazui tarasoi waʼaombö-aombö dödö. (Baso Heberaiʼo 6:19.) Angeragö dötönafö nifabuʼu Yehowa ba zi so miföna. Ba luo daʼö, lö saʼae sangaʼasogö khöu faʼaombö-aombö dödö. (Yes. 65:17) Khalaigö na so dania ndraʼugö ba gulidanö si bohou safönu faʼohahau dödö ba si lö faʼalösökhi. (Mi. 4:4) Tola göi öʼaroʼö waʼafaduhu dödöu ba dötönafö ba zi so miföna, na ötutunö daʼö ba niha böʼö. Börö daʼö, forege wanuriaigö hegöi ba wombaliʼö nifahaʼö. Na öfalua daʼö, tola ’faduhu dödöu wanötöna andrö irugi gamozua’.​—Heb. 6:11.

18. Hadia zalua khöda ba zi so miföna, ba hadia zanolo yaʼita enaʼö lö mangiwa dödöda?

¹⁸ Börö me no ahatö gamozua götö danö andre, itugu oya gabula dödö sangaʼasogö khöda faʼaombö-aombö dödö. Ayati ba ndröfi 2021 andre, möi fanoloda enaʼö lö mangiwa ita na alua khöda gabula dödö, börö me taʼodaligö Yehowa, tenga faʼabölöda samösa. Sagötö ndröfi 2021, dataforomaʼö moroi ba gamuatada wa mamati ita ba mbuʼusa li Yehowa andre: ”Na lö miböhöli waʼafaduhu dödö ba lö mangiwa dödömi, hasambalö abölö ami.”​—Yes. 30:15.