1. Hadia zangoromaʼö wa itugu alö waʼomasi yomo ba nomo iadaʼa?

NO IFAʼELEʼÖ Sura Niʼamoniʼö wa ba ngaluo safuria, ato niha ”si lö mangomasiʼö awöra”. (2 Ti. 3:1, 3) No alua daʼö iadaʼa. Duma-dumania, so mato hauga zuta wongambatö si no fabali moloʼö huku, faoma faʼudu ira khö nawöra, ba lö larasoi iraonora waʼomasi moroi khö zatuara. So göi nösi nomo si toröi ba zi sambua omo, hizaʼi hulö niha böʼö ira khö nawöra. Imane samösa penasihat perkawinan, ”No arörö ndra satua hegöi iraono ba wangogunaʼö komputer, tablet, HP, hegöi video game, irege lö inötöra saʼae fahuhuo khö nawöra zamösana. Hewaʼae na toröi ira ba zi sambua omo, faoma lö aboto ba dödöra nawöra.”

2-3. (a) Moloʼö Roma 12:10, haʼökhö taforomaʼö waʼomasi simane fangomasiʼöda ösi nomoda? (b) Hadia nitutunöda ba artikel daʼa?

² Böi tafaomagö ita ba niha gulidanö andre si lö mangomasiʼö awöra. (Rom. 12:2) Moguna tadouʼö waʼomasida, tenga ha ba nösi nomoda, hizaʼi khö ndra talifusöda ba mbanua niha Keriso. (Baso Roma 12:10.) Moguna taʼomasiʼö nösi nomoda ba wamati, yaʼia daʼö ira talifusöda ba mbanua niha Keriso, simane fangomasiʼöda ösi nomoda. Daʼa waʼomasi sinangea tadouʼö. Na taʼomasiʼö niha böʼö simane fangomasiʼöda ösi nomoda, no tatolo fefu niha ba wamosumange Yehowa si fao fahasara dödö ba faʼomuso dödö.​—Mi. 2:12.

³ Enaʼö tola tadouʼö waʼomasi ba niha böʼö simane fangomasiʼöda ösi nomoda, datatutunö hadia wamahaʼö si tola tahalö moroi ba duma-duma si so ba Zura Niʼamoniʼö.

4. Hadia nitutunö Yakobo 5:11 sanandrösa ba waʼomasi Yehowa?

⁴ Oya mbua-bua si sökhi niʼokhögö Yehowa si no mututunö  ba Zura Niʼamoniʼö. Duma-dumania, ifatunö wa ”Lowalangi andrö no faʼomasi”. (1 Yo. 4:8) Na tafahaʼö ita ba waʼomasi Yehowa, tola tefarou dödöda enaʼö tobali si fahuwu khönia. Iwaʼö göi Sura Niʼamoniʼö wa Yehowa andrö ”safönu faʼomasi”. (Baso Yakobo 5:11.) Ba ngawua wehede si sökhi andrö tola taʼila hawaʼebua waʼomasi Yehowa khöda!

5. Hadia nifalua Yehowa ba wangoromaʼö faʼahakhö dödö, ba hewisa woloʼöda duma-dumania?

⁵ Itutunö Yakobo 5:11 wa moʼamakhaita waʼomasi Yehowa ba mbua-bua tanö böʼö sangahatöʼö yaʼita khönia, yaʼia daʼö faʼahakhö dödö. (2 Mo. 34:6) Sambua lala Yehowa ba wangoromaʼö faʼahakhö dödönia yaʼia daʼö iʼefaʼö zala si no tafalua. (Si. 51:1) Ba Zura Niʼamoniʼö, faʼahakhö dödö andrö tenga ha fangefaʼö sala. Hizaʼi, moʼamakhaita göi daʼa ba nirasoi zi samösa niha ba ginötö iʼila niha sabu tödö, ba tefarou dödönia ba wanolo niha daʼö. Iwaʼö Yehowa wa faʼedönania ba wanolo yaʼita, abölö ebua moroi ba waʼomasi zi samösa ina khö nononia. (Yes. 49:15) Na göna ita abula dödö, faʼahakhö dödö Yehowa zamarou yaʼia ba wanolo yaʼita. (Si. 37:39; 1 Ko. 10:13) Tola taforomaʼö waʼahakhö dödö khö ndra talifusöda na taʼefaʼö zalara ba lö taʼiröʼö waʼabao dödöda khöra hewaʼae na no laʼafökhöiʼö dödöda. (Ef. 4:32) Hizaʼi, lala sabölö tohude ba wangoromaʼö faʼahakhö dödö khö ndra talifusöda yaʼia daʼö tatolo ira na lataögö gabula dödö. Na faʼomasi zamarou tödöda ba wangoromaʼö faʼahakhö dödö khö ndra talifusöda, no taʼoʼö Yehowa, duma-duma fondrege zebua ba wangoromaʼö faʼomasi.​—Ef. 5:1.

6. Hewisa wangoromaʼö Yonata hegöi Dawido faʼomasi khö nawöra zamösana?

⁶ Ba Zura Niʼamoniʼö, so duma-duma niha si lö moʼahonoa sangomasiʼö niha böʼö simane fangomasiʼöra ösi nomora. Nehegö duma-duma Yonata hegöi Dawido. Imane Sura Niʼamoniʼö, ”Tobali  si fahuwu si sökhi Yonata khö Dawido. Ibörögö iʼomasiʼö Dawido andrö Yonata simane fangomasiʼönia botonia samösa.” (1 Sa. 18:1) No ifili Dawido Yehowa tobali razo fangali Zaulo. Aefa daʼö, ibörögö afökhö dödö Zaulo khö Dawido, ba iʼalui lala wamunu yaʼia. Hizaʼi, lö fao Yonata khö namania Saulo me iforege ba wamunu Dawido. Fawuʼu li Yonata hegöi Dawido wa lö tebulö tobali ira si fahuwu ba faoma latuhini nawöra zamösana.​—1 Sa. 20:42.

7. Hadia zanaisi fahuwusa Yonata khö Dawido?

⁷ No sahöli dödöda wahuwusa ba gotalua Yonata hegöi Dawido börö me oya zanaisi fahuwusara. Duma-dumania, so mato 30 fakhe gotalua ndröfi Yonata khö Dawido. Sindruhunia, tola manö iwaʼö tödönia Yonata wa tebai fahuwu ia ba niha sabölö awuyu-wuyu moroi khönia. Hizaʼi, tenga simane daʼö lala wangera-ngera Yonata. Ifosumange sibai Dawido.

8. Moloʼö yaʼugö, hana wa no si fahuwu si sökhi Yonata khö Dawido?

⁸ Sindruhunia, tola manö afökhö dödö Yonata khö Dawido. Börö me ono Razo Saulo ia, no sinangea na yaʼia zi tobali razo fangali namania. (1 Sa. 20:31) Hizaʼi, so khönia wangide-ngideʼö ba lö faröi ia khö Yehowa. Börö daʼö, ituhini gangetula Yehowa ba wamili Dawido tobali razo fangali Zaulo. Lö göi faröi ia khö Dawido, hewaʼae na tobali börö wönu namania daʼö.​—1 Sa. 20:32-34.

9. Hadia fahindri Yonata khö Dawido? Tutunö.

⁹ Börö me iʼomasiʼö Dawido, lö fahindri Yonata khönia. Yonata andrö niha sonekhe fafana, ba saradadu si barani. Yaʼia hegöi amania Saulo, no tehöngö wa ”alio ira moroi ba moyo” ba ”abölö moroi ba zingo”. (2 Sa. 1:22, 23) Börö daʼö, tola manö ihöni-höni ia Yonata börö waʼabarani niforomaʼönia. Hewaʼae simanö, lö irai fahindri mazui afökhö dödönia khö Dawido. Iʼomasiʼö sibai Dawido börö me iʼokhögö waʼabarani ba iʼodaligö Yehowa. Duma-dumania, me no aefa ibunu Goliato Dawido, ibörögö iʼomasiʼö ia Yonata simane fangomasiʼönia yaʼia samösa. Hewisa wangoromaʼöda faʼomasi simane daʼö khö ndra talifusöda?

10. Hadia geluahania ’sindruhu-ndruhu faoma taʼomasiʼö nawöda soroi ba dödö’?

¹⁰ Ifarou ita Sura Niʼamoniʼö enaʼö ’sindruhu-ndruhu faoma taʼomasiʼö nawöda soroi ba dödö’. (1 Fe. 1:22) No ibeʼe khöda duma-duma Yehowa. Iʼomasiʼö ita soroi ba dödö, ba lö iböhöli wangomasiʼö yaʼita asala lö faröi ita khönia. (Rom. 8:38, 39) Ngawua wehede ”sindruhu-ndruhu”, eluahania iforege si samösa niha ba wangoromaʼö faʼomasi. Itaria abua khöda ba wangoromaʼö faʼomasi khö ndra talifusöda. Na so zangafökhöiʼö tödöda, böi taböhöli ba wangoromaʼö ’fanaha tödö börö waʼomasi, taforege enaʼö lö tebulö khöda wahasara dödö ba geheha niʼamoniʼö, ba wamaböbö faʼatulö andrö’. (Ef. 4:1-3) Na tarorogö ”wamaböbö faʼatulö” khö ndra talifusöda, lö taʼosambuaʼö dödöda ba zala nifaluara. Taforege ba wamaigi ira talifusöda simane famaigi Yehowa yaʼira.​—1 Sa. 16:7; Si. 130:3.

11. Hana wa itaria abua khöda ba wangomasiʼö niha böʼö simane fangomasiʼöda ösi nomoda?

¹¹ Itaria abua khöda ba wangomasiʼö ira talifusöda simane fangomasiʼöda ösi nomoda, mendrua manö na lafalua zala. Te no alua daʼa khö ndra niha Keriso me abad siföföna. Duma-dumania, te lö abua khö  Gewodia hegöi Sitikhe me ”fao [ira khö Waulo] ba wamorege fanuriaigö turia somuso dödö”. Hizaʼi, abua khöra ba wangoromaʼö fahasara dödö. Börö daʼö, ifarou ira Faulo ”enaʼö hasara dödöra ba wangai halöwö khö Zoʼaya”.​—Fil. 4:2, 3.

12. Hewisa enaʼö taʼomasiʼö ndra talifusöda simane fangomasiʼöda ösi nomoda?

¹² Hewisa enaʼö taʼomasiʼö ndra talifusöda iadaʼa simane fangomasiʼöda ösi nomoda? Na itugu ahatö ita khö ndra talifusöda ba wamati, tola manö itugu aoha khöda ba wangiʼila hewisa ira zindruhunia, ba taʼomasiʼö ira simane fangomasiʼöda ösi nomoda. Tola fahuwu ita khöra hewaʼae na faböʼö ndröfi hegöi lala waʼaurida ba zilalö. Törö tödömö wa te mato 30 fakhe abölö atua Yonata moroi khö Dawido, hizaʼi tola aro wahuwusara. Hadia so zi tola öbaliʼö si fahuwu khöu ba mbanua niha Keriso, hewaʼae na abölö awuyu-wuyu mazui abölö atua ia moroi khöu? Na öfalua daʼö, no öforomaʼö wa ’öʼomasiʼö dalifusöu ba wamati’.​—1 Fe. 2:17.

13. Hana wa tebai tabaliʼö si fahuwu khöda fefu niha si so ba mbanua niha Keriso?

¹³ Na taʼomasiʼö ndra talifusöda simane fangomasiʼöda ösi nomoda, hadia daʼö geluahania wa tabaliʼö si fahuwu khöda fefu niha si so ba mbanua niha Keriso? Tenga. Tebai tafalua daʼö. Lö fasala na so ösa dalifusöda sabölö ahatö khöda börö me fagölö zomasi-masi ita. Duma-dumania, abölö ahatö Yesu khö Yohane, hewaʼae na ifotöi fefu ndra sinengenia ”si fahuwu” khönia. (Yoh. 13:23; 15:15; 20:2) Hizaʼi, lö abölö tohude nifalua Yesu khö Yohane moroi khö ndra sinenge tanö böʼö. Me iʼandrö Yohane hegöi talifusönia Yakobo dadaoma si tohude ba Wamatörö Lowalangi, imane khöra Yesu, ”Tenga yaʼo zotatugöi haniha zi dadao ba gambölö hegöi ba gaberagu.” (Mrk. 10:35-40) Simane Yesu, lö göi omasi ita na abölö tohude nifaluada khö zi fahuwu khöda moroi ba niha böʼö. (Yak. 2:3, 4) Na tafalua daʼö, lö tarorogö wahasara dödö ba mbanua niha Keriso.​—Yud. 17-19.

14. Moloʼö Filifi 2:3, hadia zanolo yaʼita enaʼö lö fahindri ita ba niha böʼö?

 ¹⁴ Na faoma taʼomasiʼö niha böʼö simane fangomasiʼöda ösi nomoda, no tarorogö enaʼö lö fahindrisa ba mbanua niha Keriso. Törö tödöu wa lö fahindri Yonata khö Dawido, ba lö ifadöni dadaoma waʼarazo. Fefu ita tola taʼoʼö duma-duma Yonata. Böi afökhö dödöda khö ndra talifusöda börö waʼonekhera. Hizaʼi, moguna ’taʼide-ideʼö ita, enaʼö alawa niha böʼö tawaʼö tödöda’. (Baso Wilifi 2:3.) Törö tödöu wa fefu ita so zi tola tafalua ba mbanua niha Keriso. Na so khöda wangide-ngideʼö, tola taʼila mbua-bua si sökhi niʼokhögö ndra talifusöda ba tatema mbua moroi ba waʼalöfaröi niforomaʼöra.​—1 Ko. 12:21-25.

15. Hadia wamahaʼö nihalöu moroi ba zalua khö Tanya hegöi ösi nomonia?

¹⁵ Na alua gabula dödö ba waʼaurida, irara dödöda Yehowa. Iʼodela ndra talifusöda ba wangoromaʼö khöda faʼomasi hegöi ba wameʼe khöda fanolo si tefaudu. Nehegö hadia zalua ba zi sambua ösi nomo me no aefa laʼondrasi Gangowuloa Sebua Internasional 2019 ba Amerika Serikat, ”Si Lö Mamalö-malö Waʼomasi Andrö”! Me mangawuli ira ba hotel ba ngaluo Satu, so moto sotandru motora. Imane Tanya, ”Samösa lö sesokho ba gotaluama, he yaʼo hegöi iraonogu si datölu. Hizaʼi, tokea sibai ndraʼaga. Möiga tou ba moto, ba mosindro manö ndraʼaga ba lala. So samösa niha ba zi tambai lala, ikaoni-kaoniga enaʼö möiga ba motonia. Yaʼia andrö samösa talifusöda ira matua sawena mangawuli moroi ba gangowuloa sebua. Ba tenga ha yaʼia zi tebato. Tebato göi dalima delegasi moroi ba Swedia. So ndra talifusöda ira alawe sotalagui yaʼo hegöi onogu  alawe, irege terara dödöma. Ufatunö khöra wa lö hadia ia khöma, ba tola saʼae mofanö ira. Hizaʼi, lö laröi ndraʼaga. Lö tebulö fao ira khöma hewaʼae no tohare ndra matiri ba latatugöi enaʼö so fefu zoguna khöma. Marasoi waʼomasi Yehowa ba ginötö si basaki andre. Salua andre zangaʼaroʼö faʼomasima khö ndra talifusöda, ba sangaʼaroʼö faʼomasi hegöi fangandröma saohagölö khö Yehowa.” Hadia itörö tödöu me so dalifusöda sangoromaʼö khöu faʼomasi ba ginötö alua khöu gabula dödö?

16. Hadia mbörö wa taʼomasiʼö niha böʼö simane fangomasiʼöda ösi nomoda?

¹⁶ Angeragö hadia manö mbua si sökhi na taʼomasiʼö niha böʼö simane fangomasiʼöda ösi nomoda. Tola tarara dödö ndra talifusöda na so gabula dödöra. Tola taʼaroʼö wahasara dödö ba gotalua nono mbanua Lowalangi. Taforomaʼö göi wa yaʼita andre nifahaʼö Yesu, irege adöni dödö niha satulö tödö ba wamosumange Yehowa. Sabölö tohudenia, no tafolakhömi Yehowa, ”Ama safönu faʼahakhö dödö, ba Lowalangi wondrara dödö”. (2 Ko. 1:3) Dataforege ba wondrouʼö hegöi ba wangoromaʼö faʼomasi ba niha böʼö simane fangomasiʼöda ösi nomoda!