1. Hadia nirasoimö börö me iʼomasiʼö ndraʼugö Lowalangi?

IMANE sinenge sotöi Yohane, ”Lowalangi andrö no faʼomasi.” (1 Yo. 4:8) Fehedenia sadogo-dogo andre zamasugi ba dödöda wa Yehowa andrö Umbu waʼomasi, tenga ha Umbu waʼauri. Sindruhu-ndruhu wa iʼomasiʼö sibai ita Yehowa! Börö waʼomasinia khöda, tola tarasoi waʼahono dödö hegöi faʼomuso dödö, ba moʼeluaha waʼaurida.

2. Moloʼö Mataiʼo 22:37-40, hadia zi dombua oroisa fondrege zebua, ba hana wa tola manö abua khöda ba woloʼö oroisa si dua?

² Yaʼita niha Keriso, lö taʼila tafili hadia taforomaʼö waʼomasi mazui löʼö. Daʼö no sambua oroisa si lö tola löʼö tafalua. (Baso Mataiʼo 22:37-40.) Me no aboto ba dödöda sanandrösa khö Yehowa, tola manö aoha khöda ba woloʼö oroisa si oföna, börö me moʼahonoa Yehowa andrö. Sindruhu-ndruhu wa iʼameʼegö tödö ita ba iforomaʼö khöda waʼasökhi dödö. Hizaʼi, te abua khöda ba woloʼö oroisa si dua. Hadia mbörö? Börö me fefu niha lö moʼahonoa, tefarahu ba daʼö ndra talifusöda. Itaria laʼafökhöiʼö dödöda moroi ba wehede mazui ba nifaluara. Aboto ba dödö Yehowa wa tola manö abua khöda ba wamalua oroisa daʼa. Daʼö mbörö wa ibeʼe wanuturu lala khö ndra sanura Sura Niʼamoniʼö ba wanutunö hadia mbörö wa moguna faoma taʼomasiʼö nawöda ba hewisa lala wamalua yaʼia. Samösa zanura andrö yaʼia daʼö sinenge sotöi Yohane.​—1 Yo. 3:11, 12.

3. Hadia nifahaʼö Yohane sanandrösa ba waʼomasi?

³ Ba zi hauga buku nisura Yohane, no hauga kali iwaʼö wa moguna laforomaʼö waʼomasi ira niha Keriso. Sindruhunia, me isura Yohane waö-waö waʼauri Yesu, abölö asese itutunö sanandrösa ba waʼomasi moroi khö zi datölu sanura Injil tanö böʼö. Te mato otu fakhe ndröfi Yohane me isura Injilnia  hegöi surania si tölu ngawua. Fefu mbuku nisurania andrö zamahaʼö yaʼita wa moguna teʼodane-dane fefu nifaluada ba waʼomasi. (1 Yo. 4:10, 11) Hizaʼi, moguna khö Yohane ginötö ba wamahaʼö yaʼia sanandrösa ba daʼö.

4. Hadia lö tebulö iforomaʼö waʼomasi Yohane?

⁴ Me awuyu-wuyu nasa Yohane, itaria lö iforomaʼö waʼomasi. Samuza inötö, mofanö Yesu hegöi ira nifahaʼönia ba weʼamöi manuriaigö iʼotarai ba Yeruzalema numalö ba Zamaria. Hizaʼi, niha si toröi ba zi sambua banua ba Zamaria, lö latehegö khöra wemörö ba daʼö. Hadia nifalua Yohane? Yaʼia hegöi talifusönia Yakobo, lamane khö Yesu, ”He Soʼaya, hadia omasiʼö na maʼandrö galitö moroi ba mbanua si yawa enaʼö mate ira?” (Luk. 9:52-56) Ba ginötö tanö böʼö göi, lö iforomaʼö Yohane wa iʼomasiʼö ndra sinenge tanö böʼö. Yaʼia hegöi Yakobo, te no lawaʼö khö ninara ba wangandrö khö Yesu enaʼö ibeʼe khöra dadaoma si tohude ba Wamatörönia. Me laʼila daʼö ira sinenge tanö böʼö, mofönu sibai ira! (Mat. 20:20, 21, 24) Hewaʼae na no ifalua fefu zala andrö Yohane, lö tebulö iʼomasiʼö ia Yesu.​—Yoh. 21:7.

5. Hadia nitutunöda ba artikel daʼa?

⁵ Ba artikel daʼa, tatutunö duma-duma Yohane hegöi nisurania sanandrösa ba waʼomasi. Tafahaʼö göi ita hewisa wangoromaʼö faʼomasi khö ndra talifusöda. Baero daʼö, tatutunö göi hadia zi lö tola löʼö ifalua satua si tobali högö yomo ba nomo, ba wangoromaʼö wa iʼomasiʼö nösi nomonia.

6. Hewisa wangoromaʼö Yehowa faʼomasinia khöda?

⁶ Asese tawaʼö tödöda wa manandrösa waʼomasi andrö ba nirasoida mazui ba wehede si sökhi nifaʼemada. Hizaʼi, na sindruhu-ndruhu taʼomasiʼö zi samösa niha, moguna taforomaʼö daʼö ba nifaluada. (Fatimbaisi Yakobo 2:17, 26.) Duma-dumania, iʼomasiʼö ita Yehowa. (1 Yo. 4:19) Ba no hauga kali iforomaʼö waʼomasinia andrö ba wehede si sökhi nisura ba Zura Niʼamoniʼö. (Si. 25:10; Rom. 8:38, 39) Baero daʼö, oroma göi waʼomasi Yehowa ba nifaluania. Imane Yohane, ”Daʼa lala Lowalangi ba wangoromaʼö faʼomasinia khöda: Ifatenge Nononia si ha sambua ba gulidanö enaʼö tasöndra waʼauri ba döinia.” (1 Yo. 4:9) Itehegö tefakao Nononia ba mate salahida. (Yoh. 3:16) Börö me iforomaʼö waʼomasinia Yehowa ba wehede hegöi nifaluania, tola sindruhu-ndruhu faduhu dödöda wa iʼomasiʼö ita.

7. Hewisa wangoromaʼö Yesu faʼomasinia khöda?

⁷ Iʼaroʼö dödö ndra nifahaʼönia Yesu wa  iʼomasiʼö ira. (Yoh. 13:1; 15:15) Iforomaʼö waʼomasi khö ndra nifahaʼönia hegöi khöda, tenga ha ba wehede, hizaʼi ba nifaluania. Imane Yesu, ”Lö hadöi sangokhögö faʼomasi sabölö ebua moroi ba waʼomasi niha sanehegö nosonia salahi zi fahuwu khönia.” (Yoh. 15:13) Na taʼangerönusi hadia zi no ifalua khöda Yehowa hegöi Yesu, hadia zinangea tafalua?

8. Moloʼö 1 Yohane 3:18, hadia zinangea tafalua?

⁸ No taforomaʼö waʼomasida khö Yehowa hegöi Yesu, na taʼoʼö niwaʼöra. (Yoh. 14:15; 1 Yo. 5:3) Iʼoroisi khöda Yesu enaʼö faoma taʼomasiʼö nawöda. (Yoh. 13:34, 35) Moguna tafatunö khö ndra talifusöda wa taʼomasiʼö ira. Hizaʼi, moguna göi taforomaʼö daʼö ba nifaluada. (Baso 1 Yohane 3:18.) Hadia manö zi tola tafalua ba wangoromaʼö wa taʼomasiʼö ira?

9. Börö me iʼomasiʼö niha böʼö, hadia nifalua Yohane?

⁹ Sindruhunia, tola manö ifili Yohane ba wanolo amania ba wangalui hegöi ba wamawa iʼa, irege tola laʼowuloi gefe sebua. Hizaʼi, lö ifalua daʼö. Ifili ba wangogunaʼö faʼaurinia ba wamahaʼö niha böʼö sanandrösa khö Yehowa hegöi Yesu. Börö gangetula nihalönia andrö, oya gabula dödö salua ba waʼauri Yohane. No hauga kali göna ia folohi me manuriaigö ia. Baero daʼö, ba gangohorita abad siföföna M, latiboʼö göi ia. No atua Yohane me luo daʼö. (Hal. 3:1; 4:1-3; 5:18; Fam. 1:9) Hewaʼae na labeʼe ia ba gurunga börö me manuriaigö ia sanandrösa khö Yesu, iforomaʼö Yohane wa iʼomasiʼö niha böʼö. Duma-dumania, me so ia ba Hulo Fatemo, isura gangilata si no itema, ba ifaʼoheʼö misa ba mbanua niha Keriso enaʼö laʼila hadia ”zi lö ara tö alua”. (Fam. 1:1) Aefa daʼö, te me no aefa muʼefasi ia moroi ba Hulo Fatemo, isura Injilnia Yohane, sanutunö waö-waö waʼauri hegöi halöwö fanuriaigö nifalua Yesu. Isura göi tölu ngawua zura ba wangaʼaroʼö ira talifusönia. Sandrohu faʼaurinia, lö tebulö iʼogunaʼö waʼaurinia Yohane ba wanolo niha böʼö. Hewisa woloʼöda duma-dumania?

10. Hewisa wangoromaʼöu wa öʼomasiʼö niha böʼö?

¹⁰ Tola öforomaʼö wa öʼomasiʼö niha böʼö moroi ba lala waʼauri nifilimö. Omasi gulidanö nifatörö Zatana andre na öhorigö ginötö hegöi faʼabölöu ba zoguna khöu samösa, duma-dumania ba wangalui kefe sebua mazui faʼatehöngö. Hizaʼi, ato niha Keriso ba zi sagörö ulidanö sangogunaʼö inötöra ba wanuriaigö turia somuso dödö hegöi ba wanolo niha böʼö tobali si fahuwu khö Yehowa. So göi ösa ba gotaluara zangai halöwö safönu inötö.

11. Hewisa wangoromaʼö niha Keriso si lö faröi wa laʼomasiʼö Yehowa hegöi ira talifusöra?

¹¹ Enaʼö tola labönökhi zoguna khöra hegöi ösi nomora, ato niha Keriso si lö faröi sohalöwö bongi maʼökhö. Hewaʼae simanö, lö tebulö laforege ba wotuhini organisasi Lowalangi. Duma-dumania, labeʼe dolo-tolo si no aoha gölö fameʼe ba wanolo halöwö nifalua ba zi sagörö ulidanö. So göi zi fao ba wameʼe fanolo na so zi göna bencana mazui lalului halöwö famazökhi tomosa. Lafalua fefu daʼö börö me laʼomasiʼö Yehowa hegöi awöra niha. Baero daʼö, tola taforomaʼö wa taʼomasiʼö ndra talifusöda, na möi ita ba gangowuloa ero migu ba tabeʼe mbua gera-erada. Hewaʼae na erege dödöda, lö taröi gangowuloa. Hewaʼae na molimba-limba dödöda, lö tebulö tabeʼe mbua gera-erada. Ba hewaʼae so gabula dödöda, taʼaroʼö niha böʼö fatua lö tebörögö mazui na no aefa gangowuloa. (Heb. 10:24, 25) Tatu taʼandrö sibai saohagölö ba ngawalö zi sökhi nifalua ndra talifusöda!

12. Hadia nasa nifalua Yohane ba wangoromaʼö wa iʼomasiʼö ndra talifusönia?

 ¹² Hadia nasa nifalua Yohane ba wangoromaʼö wa iʼomasiʼö ndra talifusönia? Isuno ira Yohane ba ibeʼe khöra mene-mene. Duma-dumania, ba zura nifaʼoheʼönia khöra, isuno wamati hegöi si sökhi si no lafalua. Hizaʼi, lö ibiniʼö wameʼe khöra mene-mene sanandrösa ba horö. (1 Yo. 1:8–2:1, 13, 14) Simanö göi, moguna tasuno ndra talifusöda ba ngawalö zi sökhi si no lafalua. Hizaʼi, na taʼila wa ibörögö iforomaʼö mbua-bua si lö sökhi si samösa niha, mazui ifalua zi tola mamakiko fahuwusania khö Yehowa, moguna tahaogö ba woʼamenesi yaʼia. Na tafalua daʼö, no taforomaʼö waʼomasida khönia. Sindruhu sa, moguna khöda waʼabarani ba woʼamenesi si fahuwu khöda. Hizaʼi, iwaʼö Sura Niʼamoniʼö wa daʼö nifalua zindruhu si fahuwu.​—Amd. 27:17.

13. Hadia zi lö omasi ita tafalua?

¹³ Itaria, tola taforomaʼö wa taʼomasiʼö ndra talifusöda moroi ba gamuata si lö tafalua. Duma-dumania, lö alio abao dödöda ba wehedera. Angeragö hadia zalua khö Yesu me so ia ba gulidanö. Ifatunö khö ndra nifahaʼönia wa moguna laʼa nagolenia ba labadu ndronia, ba wanöndra faʼauri si lö aetu. (Yoh. 6:53-57) Me larongo daʼö, ato ndra nifahaʼö Yesu si tokea irege laböhöli woloʼö yaʼia. Hizaʼi, lö laröi ia ira sindruhu si fahuwu khönia, tefarahu ba daʼö Yohane. Lö aboto ba dödöra geluaha wehede Yesu, ba tola manö göi tokea ira. Hewaʼae simanö, lö iʼanemaiʼö lahalö gangetula wa fasala wehede Yesu andrö, ba lö göi abao dödöra khönia. Lö tebulö faduhu dödöra khö Yesu börö me laʼila wa sindruhu niwaʼönia. (Yoh. 6:60, 66-69) Böi göi alio abao dödöda ba wehede zi fahuwu khöda! Moguna tabeʼe khöra ginötö ba wanutunö eluaha wehedera.​—Amd. 18:13; Sango. 7:9.

14. Hana wa tebai fatuwu ita khö ndra talifusöda?

¹⁴ Iʼamenesi göi ita Yohane enaʼö lö fatuwu ita khö ndra talifusöda. Na lö tafalua mene-menenia andrö, tola idönisi dödöda Satana. (1 Yo. 2:11; 3:15) So ösa niha sauri ba gangohorita abad siföföna M samalua daʼö. Me luo daʼö, iforege Satana ba wondrönisi tödö nono mbanua Lowalangi enaʼö faoma fatuwu ira khö nawöra zamösana ba aboto wahasara dödöra. Me isura zurania Yohane, so ösa niha soloʼö amuata Zatana si farahu ba mbanua niha Keriso. Duma-dumania, Dioterefe, samoto fahasara dödö ba zi sambua banua  niha Keriso. Lö ifosumange ndra satua sokubaloi nifatenge ndra boto solohe ba wangondrasi banua niha Keriso. Börö me lö omasi ia khöra, iforege enaʼö aheta moroi ba mbanua niha Keriso fefu niha sanemaʼö yaʼira. Asiliyawa sibai ia! (3 Yo. 9, 10) Iadaʼa göi, lö tebulö iforege Satana ba wamoto fahasara dödö ba gotalua nono mbanua Lowalangi. Tatu lö omasi ita fatuwu khö ndra talifusöda. Hizaʼi, omasi ita enaʼö lö tebulö tatuhini ira.

15. Hadia zinangea latörö tödöra ira satua si tobali högö yomo ba nomo?

¹⁵ Sambua lala si tohude si tola ifalua satua si tobali högö yomo ba nomo ba wangoromaʼö wa iʼomasiʼö nösi nomonia, yaʼia daʼö na ibönökhi zoguna khöra sero maʼökhö. (1 Ti. 5:8) Hizaʼi, moguna itörö tödönia wa lö tola löʼö ibönökhi zoguna khöra sabölö tohude, yaʼia daʼö soguna ba wamati. (Mat. 5:3) Angeragö duma-duma si sökhi nibeʼe Yesu khö ndra satua si tobali högö yomo ba nomo. Moloʼö Injil Yohane, me arakhagö mate Yesu ba döla geu famakao, iʼangeragö nasa nösi nomonia. Me luo daʼö, no mosindro Yohane hegöi Maria ina Yesu ba zinga döla geu famakao. Hewaʼae ba waʼafökhö so ia, iʼandrö khö Yohane ba wondrorogö Maria. (Yoh. 19:26, 27) Sindruhu sa, so nasa ndra akhi Yesu si tola mamönökhi soguna khö Maria sero maʼökhö. Hizaʼi, me luo daʼö, te lö nasa si tobali ira nifahaʼö Yesu. Börö daʼö, enaʼö tebönökhi zoguna ba wamati khö Maria, iʼandrö Yesu wanolo khö Yohane.

16. Hadia manö noro dödö niʼokhögö Yohane?

¹⁶ Oya sibai noro dödö niʼokhögö Yohane. Börö me samösa sinenge ia, moguna owölö-ölö ia ba wanuriaigö. Te göi no mangowalu Yohane. Daʼö mbörö wa moguna ibönökhi zoguna ba nösi nomonia, he soguna sero maʼökhö hegöi soguna ba wamati. (1 Ko. 9:5) Hadia wamahaʼönia khö ndra satua si tobali högö yomo ba nomo iadaʼa?

17. Hana wa moguna labönökhi zoguna ba wamati ba nösi nomora ira satua si tobali högö yomo ba nomo?

¹⁷ Te oya noro dödö si tohude niʼokhögö zi samösa satua si tobali högö yomo ba nomo. Duma-dumania, moguna owölö-ölö ia wohalöwö. Tola tefolakhömi döi Yehowa ba gamuatania si sökhi andrö. (Ef. 6:5, 6; Tit. 2:9, 10) Te so göi noro dödönia ba  mbanua niha Keriso, simane fokubaloi ira talifusöda hegöi ba wondröniaʼö yaʼira ba wanuriaigö. Baero daʼö, moguna göi ifaogö woʼomonia hegöi iraononia ba wamalua famahaʼö ba Zura Niʼamoniʼö ero migu. Tatu mangandrö sibai saohagölö woʼomonia hegöi iraononia börö me lö tebulö iforege ba wombönökhi soguna khöra, irege lö mofökhö ira, larasoi waʼomuso dödö, ba aro ira ba wamati.​—Ef. 5:28, 29; 6:4.

18. Hadia nifaduhusi tödö Yohane?

¹⁸ Anau sibai noso Yohane, ba oya zahöli-höli dödö salua ba waʼaurinia. Oya göi gabula dödö salua khönia si tola möi fangawuwu wamatinia. Hizaʼi, lö tebulö iforege ba woloʼö fefu oroisa Yesu, tefarahu ba daʼö goroisa ba wangomasiʼö ira talifusönia. Börö daʼö, tola faduhu dödö Yohane wa iʼomasiʼö ia Yehowa hegöi Yesu, ba labeʼe khönia waʼabölö ba wanaögö abula dödö. (Yoh. 14:15-17; 15:9, 10; 1 Yo. 4:16) Gofu hadia nifalua Zatana hegöi ulidanö nifatörönia, tebai lasaisi Yohane ba wangomasiʼö ira talifusönia. Lö tebulö iforomaʼö waʼomasinia Yohane, ba wehede hegöi ba nifaluania.

19. Moloʼö 1 Yohane 4:7, hadia zinangea tafalua, ba hadia mbörö?

¹⁹ Simane Yohane, so ita ba gulidanö nifatörö Zatana. Yaʼia andrö samatörö si lö sökhi ba lö khönia faʼomasi. (1 Yo. 3:1, 10) Iforege Satana ba wondrönisi tödöda enaʼö lö saʼae taʼomasiʼö ndra talifusöda. Hizaʼi, na lö taböhöli ba wolawa fondrönisi dödö andrö, lö mofozu nifalua Zatana. Datahalö gangetula enaʼö lö tebulö taʼomasiʼö ndra talifusöda, ba taforomaʼö daʼö ba wehededa hegöi ba nifaluada. Na tafalua daʼö, tola tarasoi waʼomuso dödö me tola farahu ita ba nösi nomo Yehowa, ba sindruhu-ndruhu moʼeluaha waʼaurida.​—Baso 1 Yohane 4:7.