SO SAMÖSA nono matua nibayagö idanö me döfi 1926, ba 18 fakhe ndröfinia. No tobali Ono Zekola Zura Niʼamoniʼö ndra satuania, daʼö döi ndra Samaduhuʼö Yehowa me luo daʼö. So daöfa ndra talifusönia, teʼebuaʼö ira ba wamosumange Lowalangi Yehowa hegöi ba woloʼö Yesu Keriso. Simane Ono Zekola Zura Niʼamoniʼö tanö böʼö, talifusöda ira matua si lö faröi andre, iʼa roti ba ibadu nagu ba Mbongi Watomesa Zoʼaya nifalua ero röfi. Hizaʼi, tebulö dötönafönia sanandrösa ba zi so miföna me irongo huhuo si tohude, tuhonia ”Ngawawa Sato Sibai”. Ifaʼema huhuo daʼö talifusöda J. F. Rutherford me döfi 1935 ba gangowuloa sebua nifalua ba Washington, DC, AS. Hadia nitutunö ba gangowuloa sebua andrö?

2. Hadia waʼaboto ba dödö si bohou nitutunö dalifusöda Rutherford ba huhuo nifaʼemania?

² Ba huhuo nifaʼemania, itutunö talifusöda Rutherford sanandrösa ba ”ngawawa sato sibai” nitötöi ba Wamaʼeleʼö 7:9. Ba zilalö, so ba dödö ndra Samaduhuʼö Yehowa wa manandrösa ngawua wehede daʼa ba ngawawa niha si möi ba zorugo, hizaʼi lö tobali ira razo awö Yesu börö me faʼalöfaröira tenga simane faʼalöfaröi zi 144.000. Iʼogunaʼö Zura Niʼamoniʼö talifusöda Rutherford ba wanutunö wa tenga ba zorugo auri ngawawa sato sibai andrö. Yaʼira andrö biri-biri tanö böʼö * khö Keriso, niʼorifi sagötö alua ”wamakao sabölö-bölö”, ba  sangokhögö faʼauri si lö aetu ba gulidanö. (Fam. 7:14) No ifabuʼu Yesu, ”Ba so khögu mbiri-biri tanö böʼö si tenga moroi ba kandra andre, ba lö tola löʼö uʼohe ira ba lafondrondrongo ligu dania ba tobali ha sambawa nikubaloi ba ha samösa gubalo.” (Yoh. 10:16) Börö daʼö, biri-biri tanö böʼö eluahania ono mbanua Yehowa si lö faröi sangokhögö tötönafö faʼauri si lö aetu ba gulidanö Faradaiso. (Mat. 25:31-33, 46) Datatutunö hewisa wa tola tebulö waʼauri dalifusöda ira matua no mege hegöi faʼauri nono mbanua Yehowa sato, börö waʼaboto ba dödö si bohou andre.​—Si. 97:11; Amd. 4:18.

3-4. Hadia zaboto ba dödö niha si hauga ribu faʼato sangondrasi angowuloa sebua nifalua me döfi 1935, ba hadia mbörö?

³ Ba gangowuloa sebua andrö, imane talifusöda Rutherford ba niha sangondrasi, ”Yaʼami sangokhögö tötönafö faʼauri si lö aetu ba gulidanö, miʼosindro.” Moloʼö talifusöda sangondrasi angowuloa sebua andrö, töra matonga zosindro. Aefa daʼö, imane talifusöda Rutherford, ”Hiza! Daʼa ngawawa sato sibai!” Iʼanemaiʼö labözi dawö-tawö ira sangondrasi si fao faʼomuso dödö. No sahöli-höli dödö zalua andrö. Fefu niha sosindro andrö, aboto ba dödöra wa tenga yaʼira nifili enaʼö auri ba zorugo. Aboto ba dödöra wa lö nibayoini geheha niʼamoniʼö ira. Ba gangowuloa sebua nifalua mahemolunia, so 840 niha nibayagö idanö tobali Samaduhuʼö Yehowa, ba ato ba gotaluara zi tefarahu ba mbiri-biri tanö böʼö.

⁴ Me no aefa larongo huhuo andrö, so mato hauga ribu niha, tefarahu ba daʼö dalifusöda ira matua no mege, lö saʼae laʼa roti ba lö labadu nagu ba Mbongi Watomesa Zoʼaya. Si fao fangide-ngideʼö, imane samösa talifusöda ira matua, ”Afuriata wemangagu roti ba famadugu agu, yaʼia daʼö ba Wanörö Tödö nifalua me döfi 1935. Aboto ba dödögu wa lö niʼogunaʼö Yehowa gehehania niʼamoniʼö ba wameʼe khögu tötönafö faʼauri si lö aetu ba zorugo. Hizaʼi, tötönafö niʼokhögögu yaʼia daʼö faʼauri ba gulidanö hegöi ba wombaliʼö faradaiso gulidanö andre.” Fehedenia andrö zosalahini nirasoi ndra talifusöda tanö böʼö. (Rom. 8:16, 17; 2 Ko. 1:21, 22) Iʼotarai daʼö, itugu ato niha si farahu ba ngawawa sato sibai, ba lö tebulö falulu fohalöwö ira khö ndra niha Keriso nibayoini si toröi nasa ba gulidanö.

5. Hewisa wamaigi Yehowa niha samöhöli femanga roti hegöi famadu agu ba Wanörö Tödö?

⁵ Hewisa wamaigi Yehowa niha samöhöli femanga roti hegöi famadu agu ba Wanörö Tödö nifalua me no aefa 1935? Ba hewisa na so ösa ndra Samaduhuʼö Yehowa iadaʼa si manga roti ba samadu agu ba Mbongi Watomesa Zoʼaya, hizaʼi awena aboto ba dödöra ba gafuriata wa tenga niha nibayoini ira? (1 Ko. 11:28) Tola manö lafalua daʼö, börö me lawaʼö tödöra wa ba zorugo dania auri ira. Hizaʼi, na omasi ira lafaduhuʼö zalara, laböhöli wemanga roti hegöi famadu agu ba Wanörö Tödö, ba lö faröi ira wamosumange Yehowa, hasambalö itemaʼö ira Yehowa tobali ngawawa mbiri-biri tanö böʼö. Hewaʼae na lö saʼae laʼa roti ba labadu nagu ba Wanörö Tödö, lö tebulö laʼondrasi gangowuloa andrö börö me laʼandrö sibai saohagölö ba zi no ifalua khöra Yehowa hegöi Yesu.

6. Hadia niwaʼö Yesu khö ndra malaʼika?

⁶ Lö ara tö tohare wamakao sabölö-bölö. Börö daʼö, datatutunö hadia niwaʼö Wamaʼeleʼö faza 7 sanandrösa ba  niha Keriso nibayoini hegöi ngawawa sato mbiri-biri tanö böʼö. Ba faza andrö, iwaʼö Yesu khö ndra malaʼika ba wanaha si öfa nangi famakiko. Moguna lataha zi öfa nangi andrö irege mufotandro fefu niha Keriso nibayoini, eluahania, ifaduhuʼö Yehowa wa lö si faröi ira irugi gamozua. (Fam. 7:1-4) Mufataro ndra talifusö Keriso si no tebayoini andre tobali razo hegöi ere awö Yesu ba zorugo. (Fam. 20:6) Omuso dödö Yehowa, Yesu, hegöi ira malaʼika, na laʼila dania wa latema luora ba zorugo ira niha Keriso nibayoini si 144.000.

7. Moloʼö Famaʼeleʼö 7:9, 10, haniha niʼila Yohane, ba hadia nifaluara? (Faigi gambara ba guli majalah.)

⁷ Me no aefa itutunö zi 144.000 niha si tobali razo hegöi ere, iʼila zahöli-höli dödö Yohane, yaʼia daʼö ”ngawawa sato sibai” si no teʼorifi moroi ba Hamagedo. Abölö ato ira moroi ba zi 144.000, ba lö muʼombakhaʼö khöda hawaʼato ira zindruhunia. (Baso Wamaʼeleʼö 7:9, 10.) Iwaʼö Yohane wa ”no lafake mbaru sebua safusi”. Eluahania, no larorogö waʼaurira enaʼö ”lö raʼiö” ira ba gulidanö nifatörö Zatana andre. Lö tebulö laforomaʼö waʼalöfaröi khö Lowalangi hegöi Keriso. (Yak. 1:27) Muʼao ira wa tola teʼorifi ira börö zi no ifalua Yehowa hegöi Yesu, Ono Mbiri-biri Lowalangi. Ba no lagogohe göi mbulu geu khorema. Daʼa zangoromaʼö wa lafaduhuʼö si fao faʼomuso dödö wa Yesu andrö Razo nifataro Yehowa.​—Fatimbaisi Yohane 12:12, 13.

8. Moloʼö Famaʼeleʼö 7:11, 12, hadia nifalua zauri ba zorugo me laʼila ngawawa sato sibai?

⁸ Baso Wamaʼeleʼö 7:11, 12. Hadia nifalua zauri ba zorugo me laʼila ngawawa sato sibai? Iwaʼö Yohane wa lasuno Yehowa si fao faʼomuso dödö. Alua dania gangilata andrö na teʼorifi ngawawa sato sibai moroi ba wamakao sabölö-bölö. Ba luo daʼö, omuso sibai dödö nösi nomo Yehowa si so ba zorugo.

9. Moloʼö Famaʼeleʼö 7:13-15, hadia nifalua ngawawa sato sibai iadaʼa?

⁹ Baso Wamaʼeleʼö 7:13-15. Iwaʼö Yohane wa ngawawa sato sibai andrö no ”lasasai nukhara sebua ba laʼafusiʼö ba ndro Nono Mbiri-biri”. Daʼa zangoromaʼö wa omuso dödö Yehowa khöra ba laʼokhögö dödö side-ide si lö sinegu. (Yes. 1:18) Yaʼira andrö niha Keriso si no tebayagö idanö, sindruhu-ndruhu mamati ira ba höli nibeʼe Yesu, ba fahuwu ira khö Yehowa. (Yoh. 3:36; 1 Fe. 3:21) Daʼö mbörö wa omuso dödö Yehowa khöra, ba tola ”lafalua halöwö niʼamoniʼö khönia bongi maʼökhö” ba gulidanö. Iadaʼa, si fao faʼowölö-ölö, yaʼira zabölö oya mamalua halöwö fanuriaigö hegöi fombaliʼö nifahaʼö, börö me Famatörö Lowalangi zabölö laʼofönaiʼö ba waʼaurira.​—Mat. 6:33; 24:14; 28:19, 20.

10. Hadia zi faduhu dödö ngawawa sato sibai, ba hadia mbuʼusa li salua khöra dania ba zi so miföna?

¹⁰ Faduhu dödö ngawawa sato sibai si teʼorifi ba wamakao sabölö-bölö wa lö tebulö irorogö ira Lowalangi. Iwaʼö Sura Niʼamoniʼö wa ”si dadao ba dadaoma andrö zolumöʼö yaʼira”. Ba luo daʼö, laʼila ira biri-biri tanö böʼö hewisa waʼalua nifabuʼu Lowalangi andre: ”Iʼosi dawa hörö fefu ba höröra. Lö hadöi saʼae faʼamate, faʼabu dödö, fege-ege, mazui fökhö.”​—Fam. 21:3, 4.

11-12. (a) Moloʼö Famaʼeleʼö 7:16, 17, hadia manö howu-howu nidöna-döna ngawawa sato sibai? (b) Hadia manö nifalua mbiri-biri tanö böʼö ba Wanörö Tödö, ba hadia mbörö wa lafalua daʼö?

¹¹ Baso Wamaʼeleʼö 7:16, 17. So ösa nono mbanua Yehowa sambö balazo börö me lö kefera mazui börö me alua wasuwöta ba soi si so yaʼira. So göi nikuru börö wamatira. Hizaʼi, omuso dödö ngawawa sato sibai börö me laʼila wa fahöna dania zoguna  khöra ba mboto hegöi ba wamati, na no tedudugö gulidanö si lö sökhi andre. Na idudugö gulidanö nifatörö Zatana andre Yehowa ba wönunia si no amaedola ’zino siriri-riri’, lö zi lö itatugöi wa telumöʼö ngawawa sato sibai andrö. Na no aefa wamakao sabölö-bölö, iʼohe ira Yesu ba ”nidanö fangorifi”. Moroi ba zi hauga miliar niha si no irai auri, te ha ngawawa sato sibai zi lö irai manörö faʼamate. No tötönafö si tohude daʼö!​—Yoh. 11:26.

¹² No sahöli-höli dödö dötönafö niʼokhögö mbiri-biri tanö böʼö! Daʼö mbörö wa laʼandrö sibai saohagölö khö Yehowa hegöi Yesu. Hewaʼae na tenga yaʼira nifili enaʼö auri ba zorugo, tenga daʼö geluahania wa abölö ebua dödö Yehowa ba niha nibayoini. Ira niha Keriso nibayoini hegöi biri-biri tanö böʼö, tola lasuno Lowalangi hegöi Keriso. Sambua lala nifaluara yaʼia daʼö na laʼondrasi Mbongi Watomesa Zoʼaya.

13-14. Hana wa moguna laʼondrasi Wanörö Tödö ira niha Keriso nibayoini si so ba gulidanö hegöi biri-biri tanö böʼö?

¹³ Si toʼölönia, moroi ba zi 1.000 niha sangondrasi Fanörö Tödö, tola na tesöndra samösa zi manga roti ba samadu agu. Eluahania, ba zi hawaʼoya mbanua niha Keriso, lö hadöi niha si manga roti ba samadu agu ba Wanörö Tödö. Sabölö ato ba gotalua zangondrasi Fanörö Tödö yaʼia daʼö niha sangokhögö tötönafö faʼauri si lö aetu ba gulidanö. Na simanö, hana wa laʼondrasi Mbongi Watomesa Zoʼaya? Tola mufagölösi daʼö simane niha sangondrasi falöwa nawöra. Tohare ira ba wangoromaʼö wa laʼomasiʼö ba latuhini nawöra sangowalu andrö. Simanö göi mbiri-biri tanö böʼö sangondrasi Fanörö Tödö, laforomaʼö wa laʼomasiʼö ba latuhini Keriso hegöi niha nibayoini. Ba laforomaʼö göi wa laʼandrö saohagölö ba höli si no ibeʼe Yesu, börö me daʼö mbörö wa tola laʼokhögö waʼauri si lö aetu ba gulidanö.

¹⁴ Dane-dane tanö böʼö wa laʼondrasi Wanörö Tödö yaʼia daʼö börö me laʼoʼö niwaʼö Yesu. Me awena ifalua Yesu Mbongi Watomesa Zoʼaya, imane khö ndra sinengenia si lö faröi, ”Böi miböhöli wamalua daʼa ba wanörö tödö yaʼo.” (1 Ko. 11:23-26) Börö daʼö, lö tebulö laʼondrasi Mbongi Watomesa Zoʼaya ira biri-biri tanö böʼö, sagötö so nasa niha nibayoini ba gulidanö.  Baero daʼö, lakaoni göi fefu niha ba wangondrasi angowuloa andrö.

15. Hadia nifaluada ba wanuno hegöi ba wangandrö saohagölö khö Lowalangi awö Keriso ba Wanörö Tödö?

¹⁵ Ba Wanörö Tödö, tebeʼe khöda ginötö ba wanuno hegöi ba wangandrö saohagölö khö Lowalangi awö Keriso faoma fanunö ba fangandrö. Tuho huhuo nifaʼema ba ndröfi daʼa, yaʼia daʼö: ”Foromaʼö Wangandrö Saohagölö ba zi No Ifalua Khöu Lowalangi hegöi Keriso!” Huhuo daʼa dania zanolo yaʼita enaʼö itugu taʼandrö saohagölö ba zi no ifalua khöda Yehowa hegöi Keriso. Ba ginötö lafaʼema misa roti hegöi agu, tola taʼangerönusi hadia nifoʼamaedolagö roti hegöi agu andrö, yaʼia daʼö boto hegöi do Yesu. Taʼangeragö göi dania waʼomasi niforomaʼö Yehowa. Itehegö mate Nononia salahida enaʼö tola tasöndra waʼauri. (Mat. 20:28) Fefu niha sangomasiʼö Amada hegöi Ononia, tatu omasi ira laʼondrasi Wanörö Tödö.

16. Hadia manö waʼafagölö ba gotalua niha Keriso nibayoini hegöi biri-biri tanö böʼö?

¹⁶ Sindruhu sa wa faböʼö dötönafö niʼokhögö niha Keriso nibayoini hegöi biri-biri tanö böʼö. Hewaʼae simanö, lö ebua dödö zambuana Yehowa khöra. Fagölö-gölö tohude ira föna Yehowa. Tola taʼila daʼö börö me fagölö mböli nibuʼania ba wohöli yaʼira, yaʼia daʼö faʼauri Nononia. Moguna fagölö-gölö larorogö waʼalöfaröira khö Lowalangi hegöi Keriso. (Si. 31:23) Baero daʼö, fagölö-gölö ibeʼe gehehania niʼamoniʼö Yehowa ba wangabölöʼö ono mbanuania maʼafefu, gofu hadia dötönafö niʼokhögöra. Ifaudugö wameʼe khöra eheha niʼamoniʼö moloʼö soguna khöra zamösana.

17. Hadia manö nidöna-döna niha Keriso nibayoini si so nasa ba gulidanö?

¹⁷ Tenga iʼotarai me tumbu ira laʼokhögö dötönafö faʼauri si lö aetu ba zorugo ira niha Keriso nibayoini. Yehowa zotanögö ba dödöra dötönafö andrö. Asese laʼangeragö dötönafö niʼokhögöra, laʼolohesi daʼö ba wangandrö, ba akhari-khari dödöra wombaloi tötönaföra ba zorugo. Lö laʼila lakhalaigö hewisa dania mbotora na no tobali ira boto eheha ba zorugo. (Fil. 3:20, 21; 1 Yo. 3:2) Ladöna-döna sibai hawaʼara tola falukha ira khö Yehowa, Yesu, ira malaʼika, hegöi khö ndra niha nibayoini tanö böʼö, ba falulu fohalöwö ira ba Wamatörö Lowalangi si so ba zorugo.

18. Hadia manö nidöna-döna mbiri-biri tanö böʼö?

¹⁸ Ladöna-döna ira biri-biri tanö böʼö hawaʼara tola laʼokhögö waʼauri si lö aetu ba gulidanö. Sindruhunia, daʼö nidöna-döna fefu niha iʼotarai me tumbu ira. (Sango.  3:11) Omasi sibai mbiri-biri tanö böʼö ba wombaliʼö faradaiso gulidanö andre. Labalo-baloi hawaʼara tola lafazökhi samösa nomora, latanö zinanö ba kabura, ba owua-wua dödöra wefao ba nösi nomora si lö fökhö ba soʼahonoa. (Yes. 65:21-23) Lakhalaigö hewisa dania na laʼanöröi gulidanö ba möi ira ba hili, ba gatua, hegöi ba nasi, ba lafahaʼö ira ba gomböila danga Yehowa. Ba faʼomuso dödö sabölö ebua khöra yaʼia daʼö börö me laʼila wa itugu aro dania wahuwusara khö Yehowa.

19. Hadia zi tola tafalua ba Wanörö Tödö, ba hawaʼara mufalua Wanörö Tödö ba ndröfi daʼa?

¹⁹ No ibeʼe Yehowa dötönafö sahöli-höli dödö ba nono mbanuania si lö faröi. (Yer. 29:11) Ba Wanörö Tödö, tebeʼe khöda ginötö ba wanuno Lowalangi hegöi Keriso ba ngawalö zi no lafalua khöda irege tola taʼokhögö waʼauri si lö aetu. Ba niha Keriso sindruhu, Fanörö Tödö andrö no angowuloa sabölö tohude nifalua ero röfi. Ba ndröfi daʼa, mufalua ia ba luo Satu, 27 mbaŵa si Tölu 2021, na no aekhu luo. Ato ba gotaluada zi lö taha-taha ba wangondrasi angowuloa andre. Te so ösa ndra talifusöda si toröi ba soi si lö manehegö halöwö nifaluada, hizaʼi laʼondrasi göi gangowuloa daʼa. So göi zamalua yaʼia ba gurunga. Gofu hadia zalua khöda, böi olifu ita wa Yehowa, Yesu, ira malaʼika, hegöi niha nibayoini si no so ba zorugo iadaʼa, hasambalö lafaigi-faigi Wanörö Tödö nifaluada. Yaʼomuso dödö niha fefu, kelompok, hegöi banua niha Keriso, samalua Fanörö Tödö ba ndröfi daʼa!