1, 2. (a) Hadia mbörö wa lö aoha khö zatua ba wamaha’ö iraono ena’ö mamati ira khö Yehowa, ba hadia sambua lala si tola lafalua satua ba wamalua da’ö? (b) Hadia manö zi öfa ngawalö nitutunöda iada’a?

LAMANE ira sambua ngambatö ba Prancis, ”Mamati ndra’aga khö Yehowa, hiza’i tenga da’ö geluahania no fao göi nonoma ba wamati. Famati andre tenga gondröita. Itugu ara itugu tumbu wamati ndraonoma.” Isura samösa dalifusöda ba Australia imane, ”No sambua fanandraigö sabua ba wame’e fanolo khö ndraonoda ena’ö mamati ira.” Imane nasa, ”Tola manö, öwalinga no öbe’e wanema li ba ngawalö wanofu ndraonomö. Hiza’i, isofu nasa wanofu si fagölö mahemolunia! Fanema lida ma’ökhö tola manö lö tefaudu ba dödönia da’ö mahemolu.” Na itugu ebua-bua ndraono, ato zatua moguna la’abakha’ö wanutunö khöra duho si fagölö. Moguna göi la’oguna’ö ngawalö lala ba wamaha’ö iraonora ena’ö la’omasi’ö Yehowa.

² Na satua ba nomo ndra’ugö, te no irai manofu ndra’ugö, ’Hadia sindruhu-ndruhu tola ufaha’ö ndraonogu ba wangomasi’ö  hegöi ba wamosumange Yehowa na no ebua-bua ia?’ Sindruhunia, tebai tafalua samösa da’a. (Yer. 10:23) Da’a mbörö wa moguna ta’odaligö Yehowa ba wanolo yaita. Ibe’e oya wanuturu lala khö ndra satua. Hadia zi tola öfalua ba wanolo iraonomö? (1) Moguna sibai aboto ba dödöu ndraonomö. (2) Faha’ö hadia nirasoimö sanandrösa khö Yehowa. (3) Oguna’ö duma-duma. (4) Andrö geheha ni’amoni’ö ba wangandrö hegöi bologö dödöu khö ndraonomö.

3. Hewisa zatua ba wolo’ö lala nifalua Yesu me ifaha’ö ndra nifaha’önia?

³ Asese isofu Yesu khö ndra nifaha’önia hadia nifaduhusira tödö. (Mat. 16:13-15) Tola ö’o’ö duma-duma nifaluania. Ba ginötö fahuhuo mazui fao ami mohalöwö iraonomö, sofu hadia zi so ba dödöra ba tehegö lafatunö khömö hadia ia nirasoira. Hadia so zaombö dödönia? Samösa dalifusöda ono matua 15 fakhe ndröfinia ba Australia imane, ”Asese fahuhuo Bapa khögu sanandrösa ba wamatigu, ba itolo ndra’o ba wo’angeraigö da’ö. Isofu khögu, ’Hadia niwa’ö Zura Ni’amoni’ö?’ ’Hadia faduhu dödömö ba da’ö?’ ’Hana wa faduhu dödömö?’ Omasi ia na ube’e wanema li moroi ba wehedegu samösa, tenga ha u’o’ö simane wehedenia mazui niwa’ö Mama. Me no ebua-bua ndra’o, moguna ube’e wanema li sabölö sökhi.”

4. Hana wa moguna öbologö dödömö ba öbe’e wanema li moroi ba wanofu-nofu ndraonomö? Be’e duma-duma.

⁴ Bologö dödöu na lö i’anemai’ö faduhu dödö ndraonomö ba wamaha’ö Zura Ni’amoni’ö. Tolo ira ba wanöndra fanema li moroi ba wanofu-nofura. Imane samösa ama, ”Ame’egö tödö wanofu ndraonomö. Böi osiwawöi wanofura hewa’ae ambö moguna wanofu andrö, ba böi tutunö danö bö’ö ha börö me lö omasi’ö wanofura andrö.” Sindruhunia, sökhi na manofu ndraono, börö me da’ö geluahania wa omasi i’ila abölö oya nasa. Asese göi manofu-nofu Yesu me ide-ide ia. (Baso Luka 2:46.) Imane samösa si bohou ebua ba Denmark, ”Me uwa’ö wa aombö dödögu hadia agama sindruhu agamama, lö mofönu zatuagu hewa’ae sindruhunia abu dödöra. La’oguna’ö Zura Ni’amoni’ö ba wame’e fanema li moroi ba wanofu-nofugu.”

5. Hewa’ae hulö no mamati iraono khö Yehowa, hadia zinangea lafalua zatua?

⁵ Moguna aboto ba dödöu ndraonomö. Böi öwalinga wa no mamati ira khö Yehowa ha börö me no fao ira ba wanuriaigö ba möi ira ba gangowuloa. Hewisa dödöra khö Yehowa, ba hewisa molo’ö ya’ira Zura Ni’amoni’ö? Moguna öforege ena’ö ö’ila hadia so zame’e awuwu wamatira khö Yehowa. Tutunö sanandrösa khö Yehowa ero ma’ökhö khö ndraonomö ba ginötö fao ami ba wamalua hadia ia. Ohe ira ba wangandrö, he ba ginötö mangandrö ami yomo ba nomo mazui ba ginötö mangandrö’ö samösa.

6. Na lö iböhöli satua ba wamaha’ö ya’ia sanandrösa khö Yehowa hegöi Sura Ni’amoni’ö, hewisa da’ö tola möi fanolo khöra ba wamaha’ö ndraonora?

⁶ Omasi niha mamondro-ndrongo hadia niwa’ö Yesu börö me i’omasi’ö Yehowa ba aboto ba dödönia Daromali. Larasoi samösa göi wa i’omasi’ö ira Yesu. Andrö lahaogö lafondro-ndrongo nifa’emania. (Luk. 24:32; Yoh. 7:46) Simanö göi, na i’ila iraonomö wa ö’omasi’ö Yehowa, da’ö zanolo ya’ira ba wangomasi’ö ya’ia göi. (Baso V Moze 6:5-8; Luka 6:45.) Andrö böi böhöli ba wamaha’ö ya’ugö ba Zura Ni’amoni’ö ba asese’ö baso publikasida. Faha’ö nasa ndra’ugö ba niwöwöi Yehowa. (Mat. 6:26, 28) Na itugu aboto ba dödömö sanandrösa khö Yehowa, itugu oya zi tola öfaha’ö khö ndraonomö sanandrösa khönia.​—Luk. 6:40.

7, 8. Ba ginötö so wamaha’ö si no ösöndra sanandrösa khö Yehowa, hadia nifaluamö? Hewisa wamalua zatua da’a?

⁷ Tutunö khö ndraonomö hadia si no öfaha’ö ndra’ugö sanandrösa khö Yehowa. Falua da’a ero inötö khöra, tenga ha ba ginötö mama’anö möi ba gangowuloa mazui ba wamaha’ö yomo ba nomo. Da’a nifalua sambua fongambatö ba Amerika Serikat. Latutunö ba ndraonora sanandrösa khö Yehowa ba ginötö la’ila so zi baga-baga ba gulidanö mazui na la’a gö sami. Lamane, ”Mafasugi ba dödöra wa i’omasi’ö ita Yehowa, ba fefu si no ihenaigö no ihaogö wama’anö khöda da’ö.” Sambua fongambatö ba Afrika Tanö ba Gaekhula, asese latutunö sanandrösa ba niwöwöi ba ginötö moi ira ba kabu khö zi darua nonora ono alawe. Duma-dumania, lawa’ö wa no ahöli-höli dödöda wamaigi sambua hunö tola tobali sambua geu. Lamane, ”Maforege ena’ö la’ame’egö tödö iraonoma wa’auri hegöi niwöwö sahöli-höli dödö.”

⁸ Samösa ama ba Australia, i’ohe ononia si-10 fakhe ba museum. I’oguna’ö ginötö da’ö ba wanolo ononia ena’ö itugu aro wamatinia ba aboto ba dödönia wa Yehowa Zomböwöi da’ö fefu. Imane, ”Ma’ila gurifö nasi si so meföna töinia ammonit hegöi trilobit. Ahöli-höli dödöma ba ndroto-ndrotonia me a’oi so fefu hulö simane gurifö si so ba götöda iada’a. Baga-baga sibai gurifö da’a hewa’ae no lö hadöi sa’ae iada’a. Na sindruhu tebulö zi sambua gurifö sambö ndroto-ndroto tobali gurifö danö bö’ö zi so fefu ndroto-ndrotonia, hana wa gurifö meföna andre oi so fefu ndroto-ndrotonia? Sindruhu-ndruhu no sambua wamaha’ö si sökhi da’a khögu ba ututunö khö nonogu.”

9. Hana wa sökhi na la’oguna’ö duma-duma? Duma-duma hadia ni’oguna’ö zi samösa ina?

⁹ Asese i’oguna’ö Yesu gamaedola. I’oguna’ö waö-waö mazui duma-duma ba wame’e famaha’ö soguna. (Mat. 13:34,  35) Na ö’oguna’ö duma-duma ba wamaha’ö, tola ikhalaigö onomö da’ö. Da’a zanolo ya’ira ba wo’angeraigö wamaha’ö si no ö’be’e khöra, ena’ö itugu aboto ba dödöra hegöi lö la’olifugö ba omuso dödöra ba wamaha’ö andrö. Duma-dumania, samösa ina ba Jepang, omasi ia na aboto ba dödö zi darua ndraononia matua wa i’ame’egö tödö ita Yehowa, oroma da’ö moroi ba lala wamazökhinia atmosfir gulidanö. Fa’alawa ndröfi ndraononia matua walu ba fulu fakhe. Andrö, i’oguna’ö duma-duma si tefaudu ba ndröfira ena’ö tola aboto ba dödöra. Ibe’e khöra susu, gulo hegöi kofi. Aefa da’ö, i’andrö khöra ena’ö lafazökhi önia kofi. Imane ina andrö, ”Tenga ha asala noa wamazökhira kofi, me usofu khöra hana wa lahaogö ba wamazökhi da’ö, lawa’ö wa omasi ira na tefaudu kofi andrö ba zomasi dödögu. Ututunö khöra wa simanö göi Lowalangi. Ihaogö wamaruka ngawalö gas ba atmosfir ena’ö tefaudu ba niha.” Omasi ira na simane da’ö wamaha’ö ya’ira, ba lö la’olifugö wamaha’ö da’ö!

10, 11. (a) Hadia duma-duma zi tola ö’oguna’ö ba wangoroma’ö wa sindruhu so Zomböi? (Faigi gambara ba wamobörö wamaha’ö.) (b) Hadia duma-duma si no irai ö’oguna’ö?

¹⁰ Hadia duma-duma si tola ö’oguna’ö ba wangoroma’ö khö ndraonomö wa sindruhu-ndruhu so Zomböi? Duma-dumania, tola fao ami ndraonomö ba wamazökhi kue ba mi’oguna’ö sambua resep. Tutunö hana wa moguna la’o’ö fefu resepnia. Aefa da’ö, be’e khönia apel mazui mbua tanö bö’ö. Sofu khönia, ”Hadia ö’ila wa so resep apel andre?” Taba dalu apel, ba be’e khönia hunö. Tutunö wa hunö andrö hulö simane resep. So ba da’ö lala wamazökhi apel, hiza’i abölö abua resep andrö moroi ba resep kue. Tola ösofu, ”So niha sanura resep kue. Na simane da’ö, haniha sanura resep apel?” Na no ebua-bua ndraonomö, tutunö wa resep ba wamazökhi sambua hogu apel si tola mowua so bakha ba DNA hunö andrö. Tola göi öforoma’ö gambara mazui duma-duma si so ba brosur Asal Mula Kehidupan—Lima Pertanyaan yang Patut Direnungkan ba nga’örö si 10 irugi 20.

¹¹ Ato satua zobaso duho ”Apakah Ini Dirancang?” si so ba Sadarlah! khö ndraonora. Na ide-ide nasa nono da’ö, tola ö’adogoi’ö ba wanutunö duho andrö. Duma-dumania, sambua fongambatö ba Denmark, lafagölösi göfa sihombo simane wofo. Lamane, ”Göfa  sihombo hulö simane wofo. Hiza’i hadia tola mo’adulo ba mamoto ia tobali göfa sihombo side-ide? Hadia moguna bandara khö wofo? Hezoso zomasi’ö, li göfa sihombo mazui na manunö wofo? Andrö, haniha zabölö onekhe, hadia samazökhi göfa sihombo mazui Samazökhi wofo?” Na ötutunö ba öbe’e wanofu simane da’ö, tola ifaha’ö ia ba wangoguna’ö lala ”wangenanö”, ba itugu aro wamatinia khö Yehowa.​—Gamd. 2:10-12.

12. Hewisa tola ö’oguna’ö duma-duma ba wamaha’ö iraonomö wa sindruhu fefu nösi Zura Ni’amoni’ö?

¹² Tola ö’oguna’ö duma-duma ba wamaha’ö iraonomö wa sindruhu fefu nösi Zura Ni’amoni’ö. Duma-dumania, tola öbaso Yobi 26:7. (Baso.) Böi ha öwa’ö manö khöra wa moroi khö Yehowa fefu nösi ayati andre. Hiza’i, tolo ira ba wokhalaigö. Tola ötutunö khönia wa me ba götö Yobi, so niha zi lö faduhu dödö wa no manawa-nawa gulidanö andre. Molo’ö ya’ira fefu hadia ia, simane bola mazui gara, so dane-danenia. Ba ginötö da’ö, lö hadöi teleskop mazui göfa sihombo si möi ba mbanua siaŵa. Andrö wa lö hadöi niha si tola mamaduhu’ö wa no manawa-nawa gulidanö andre. Famaha’önia khöda, hewa’ae ba götö meföna lasura Zura Ni’amoni’ö, fefu nösinia atulö börö me moroi khö Yehowa da’ö.​—Neh. 9:6.

13, 14. Hewisa zatua ba wamaha’ö iraonora ba wolo’ö mene-mene Zura Ni’amoni’ö?

¹³ Moguna öfaha’ö ndraonomö wa tola sindruhu-ndruhu owua-wua dödöra na la’o’ö mene-mene si so ba Zura Ni’amoni’ö. (Baso Zinunö 1:1-3.) Duma-dumania, tola ö’andrö khönia ba wokhalaigö hewisa na findra ia ba zi sambua hulo. Tola ifili haniha nawönia zi toröi ba da’ö. Aefa da’ö sofu khönia, ”Ena’ö tola owua-wua dödömö ba wa’auri, haniha manö niha somasi ö’ohe ba da’ö?” Ba gafuriata, baso Galatia 5:19-23 ena’ö aboto ba dödönia haniha manö niha somasi i’ohe Yehowa ba gulidanö si bohou.

¹⁴ Na öfalua simane da’ö, so dombua wamaha’ö nifaha’ömö khöra. Si’oföna, ifaha’ö ita Yehowa hewisa lalania ena’ö owua-wua dödöda ba wa’auri iada’a ba hewisa ena’ö lö fa’udusa ba niha bö’ö. Si dua, ifaha’ö ita hewisa wa’auri ba gulidanö si bohou. (Yes. 54:13; Yoh. 17:3) Tola öforoma’ö khö ndraonomö hewisa Zura Ni’amoni’ö ba wanolo ndra talifusöda ba wamati. Duma-dumania, alui waö-waö wa’auri si so ba publikasi, tola manö moroi ba duho ”Sura Ni’amoni’ö Zombulö’ö Fa’auri” ba Manuriaigö. Mazui, andrö samösa dalifusöda ba gangowuloa ba wodunö-dunö hewisa wanolo Zura Ni’amoni’ö ia ba wobulö’ö lala wa’aurinia irege tola i’omusoi’ö dödö Yehowa.​—Heb. 4:12.

15. Hadia si tobali fanolo khömö ba wamaha’ö ndraonomö?

¹⁵ Ena’ö tola itugu omasi ba adöni dödö ndraonomö ba ginötö ofaha’ö ia, andrö khönia ba wokhalaisi famaha’ö andrö. Alui lala wamaha’ö si bohou ena’ö omuso dödöra ba wamaha’ö sanandrösa khö Yehowa ba ena’ö itugu aro wahuwusara khönia. Böi böhöli wamalua da’a irege ebua-bua ira. Imane samösa ama, ”Böi aföli ndra’ugö ba wamalua lala tanö bö’ö ba wamaha’ö duho si fagölö.”

16. Ba ginötö öfaha’ö ndraonomö, hana wa moguna öbologö dödömö? Hewisa duma-duma nifalua zatua ba wangoroma’ö fa’ebolo dödö?

¹⁶ Tola itugu aro wamati ndraonomö börö wanolo geheha Yehowa. (Gal. 5:22, 23) Hiza’i, moguna ginötö ena’ö itugu aro wamatira. Andrö böi bato ba wamaha’ö ya’ira ba moguna öbologö dödömö. Imane samösa ama si so ba Jepang sangokhögö samösa nono matua ba ono alawe, ”Ya’odo hegöi fo’omogu, mabe’e abölö oya ginötöma khö ndraonoma. I’otarai me ide-ide ira, ube’e 15 menit ginötögu ero ma’ökhö ba wamaha’ö ya’ira, baero na so gangowuloa niha Keriso ba ngaluo da’ö. Si felelima menit da’ö lö talafo abua khöma simanö göi khöra.” Imane samösa satua samasui, ”Me awuyu-wuyu ndra’o, oya sibai wanofu hegöi fa’aombö-aombö dödö si so ba dödögu. Ba gafuriata, tebe’e wanemali da’ö ba gangowuloa, ba wamaha’ö yomo ba nomo hegöi ba wamaha’ö samösa. Da’ö mbörö wa moguna khö ndra satua ena’ö lö aetu lafaha’ö ndraonora.”

17. Hadia mbörö wa moguna la’aro’ö wamatira ira satua? Hadia nifalua zi sambua ngambatö si so ba Bermuda ba wanolo ndraonora wangokhögö famati khö Yehowa?

¹⁷ Tatu manö, oya wamaha’ö si tola lahalö iraonomö na la’ila hewisa wa’aro wamatimö khö Yehowa. Lafaigi-faigi hadia nifaluamö. Andrö, böi bato ba wangaro’ö wamatimö. Moguna la’ila iraonomö hewisa wa sindruhu-ndruhu ö’odaligö Yehowa. Duma-dumania, ba ginötö abu dödö zi sambua ngambatö si so ba Bermuda, fao ira mangandrö khö ndraonora ba wangandrö wanuturu lala moroi khö Yehowa. Lafarou göi dödö ndraonora ena’ö mangandrö samösa göi ira. ”Mafatunö khö nonoma sia’a, ’Moguna sindruhu-ndruhu faduhu dödömö khö Yehowa, böi aetu falua halöwö ba wanuriaigö, ba böi talafo aombö dödömö.’ Ba ginötö taya gabula dödö andrö, aboto ba dödönia wa Yehowa zanolo ya’aga. Da’a zanga’aro’ö wamatinia khö Lowalangi hegöi ba Zura Ni’amoni’ö.”

18. Hadia zi tebai la’olifugö ira satua?

¹⁸ Satua, böi irai olifu ndra’ugö wa tebai öfaso ndraonomö ba wangokhögö famati. Ya’ugö zananö ba zombuwui, hiza’i ha Yehowa zi tola mamanöi ya’ia. (I Kor. 3:6) Andrö, ame’egö tödö ba wamaha’ö iraonomö sanandrösa khö Yehowa, ba andrö geheha ni’amoni’ö ba wanolo ndraonomö wangokhögö famati. Tola faduhu dödömö wa ifahowu’ö Yehowa fefu wamorege si no öfalua.​—Ef. 6:4.