1, 2. (a) Hadia zalua ba wa’auri na lö hadöi Sura Ni’amoni’ö? (b) Hadia zanolo ya’ita ba wanema mbua moroi ba Zura Ni’amoni’ö?

HEWISA wa’aurimö na lö hadöi Sura Ni’amoni’ö? Lö hadöi mene-mene si sökhi same’e khömö fanuturu lala ero ma’ökhö. Lö ö’ila hadia zatulö sanandrösa khö Lowalangi, fa’auri mazui salua ba zi so miföna. Ba lö ö’ila hadia zi no ifalua Yehowa ba niha gulidanö ba götö föna.

² Ta’andrö saohagölö me lö alua khöda zimane da’ö. Ibe’e khöda Yehowa Daromalinia, Sura Ni’amoni’ö. Ifabu’u wa lö tebulö nösinia. Itutunö sinenge sotöi Fetero ayati si so ba Yesaya 40:8. Hewa’ae ayati da’a lö itandrösaigö sanandrösa ba Zura Ni’amoni’ö, hiza’i moguna ia ba nösi Zura Ni’amoni’ö. (Baso I Fetero 1:24, 25.) Oya mbua nitemada moroi ba Zura Ni’amoni’ö na tabaso ia ba li sasese ta’oguna’ö. Niha sangomasi’ö Taromali Lowalangi, aboto ba dödöra da’a. Andrö, ba zi töra hauga abad, ato niha samorege ba wamo’eluaha Sura Ni’amoni’ö, ba labe’e ia ba niha hewa’ae oya wanaisi hegöi fanandraigö. Omasi Yehowa na fefu niha  te’orifi ba ”lasöndra wa’aboto ba dödöra zi duhu”.​—I Timoteo 2:3, 4.

3. Hadia nitutunöda ba wamaha’ö da’a? (Faigi gambara ba wamobörö wamaha’ö.)

³ Ba wamaha’ö da’a, tatutunö hewisa wa tola anau gölö Daromali Lowalangi hewa’ae so (1) wa’atebulö li, (2) wa’atedou politik sombulö’ö li sasese mu’oguna’ö, ba (3) zanaisi ba wamo’eluaha Sura Ni’amoni’ö. Hadia mbuania khöda na tatutunö da’a? Itugu ta’ame’egö tödö Zura Ni’amoni’ö hegöi Samazökhi ya’ia.​—Mikha 4:2; Roma 15:4.

4. (a) Börö me itugu numalö ginötö, hadia zalua ba li? (b) Hewisa wa tola ta’ila wa i’ame’egö tödö fefu ngawalö li Lowalangi? Hewisa dödömö ba da’ö?

⁴ Itugu numalö ginötö, itugu tebulö li ni’oguna’ö. Ngawua wehede hegöi fanguma’ö ya’ia tola manö no aröu faehu ba geluaha sindruhunia. Te tola ö’angeraigö duma-dumania ba li ni’oguna’ömö. Alua göi da’a ba li ni’oguna’ö ba götö föna. Li Heberai’o hegöi li Yunani ba götö föna ni’oguna’ö ba wanura Sura Ni’amoni’ö no faehu ia ba li Heberai’o hegöi Yunani ni’oguna’ö iada’a. Ato niha si lö mangila geluaha nösi Zura Ni’amoni’ö nisura ba li siföföna, moguna so khöra wamo’eluahania. So niha sanguma’ö wa moguna lafaha’ö ira ba li Heberai’o hegöi Yunani ni’oguna’ö ba götö föna ena’ö aboto ba dödöra Zura Ni’amoni’ö. Hiza’i, lö oya mbuania khöra da’ö. * (Faigi nisura ba gahe zura.) Ta’andrö saohagölö börö me no mufo’eluaha Zura Ni’amoni’ö, he si no awai tefazökhi mazui si lö awai nasa, arakhagö ba zi 3.000 ngawalö li. Omasi Yehowa na fefu niha ba ”ngawalö soi fefu, ba ba ngawalö niwa, ba ba ngawalö li” latema mbua moroi ba Daromalinia. (Baso Fama’ele’ö 14:6.) Da’a zi tola mangahatö’ö ya’ita khö Lowalangida, safönu fa’omasi hegöi si lö ebua dödö zambuana.​—Halöwö Zinenge 10:34.

5. Hana wa tohude sibai King James Version?

⁵ Börö me tebulö li ni’oguna’ö, molua-lua da’a ba wamo’eluaha Sura Ni’amoni’ö. Sambua famo’eluaha salio mu’ila eluaha me awena mufazökhi, tola manö lö aboto ba dödöda na no itugu numalö ginötö. Duma-dumania, King James Version nifazökhi si oföna sibai me 1611. Da’a sambua Zura Ni’amoni’ö si tehöngö sangoguna’ö li Inggris. Ngawua wehede ni’oguna’ö ba King James Version la’oguna’ö ia ba ngawua wehede li Inggris. * (Faigi nisura ba gahe zura.) Hiza’i, famo’eluaha da’a lö oya i’oguna’ö döi Yehowa. Töi Lowalangi sasese mu’oguna’ö ba Mbuku Ni’amoni’ö Heberai’o  latukari ia tobali ”LORD” (eluahania ”SO’AYA”) ba la’oguna’ö hurufo sebua. Si no mufazökhi aefa da’ö, la’oguna’ö ngawua wehede ”LORD” ba hurufo sebua ba zi hauga ayati Mbuku Ni’amoni’ö Yunani Niha Keriso. Ifaduhu’ö King James Version wa töi Lowalangi la’oguna’ö göi ia ba Gamabu’ula Li si Bohou.

6. Hana wa ta’andrö saohagölö me no so Terjemahan Dunia Baru?

⁶ Me awena mufazökhi King James Version, alio sibai mu’ila geluaha li Inggris ni’oguna’önia. Hiza’i, me no itugu numalö ginötö, so ösa ngawua wehedenia si lö la’oguna’ö iada’a ba abua wangila geluahania. Alua göi da’a ba wamo’eluaha Sura Ni’amoni’ö ba li tanö bö’ö ba götö föna. Ta’andrö saohagölö börö me so khöda Kitab Suci Terjemahan Dunia Baru sangoguna’ö li saoha mu’ila eluaha. No tehenaigö wamo’eluaha da’a, he si no awai tefazökhi mazui si lö awai nasa, ba zi töra 150 ngawalö li. Eluahania, arakhagö fefu niha ba gulidanö tola labaso wamo’eluaha da’a ba li sasese la’oguna’ö. Börö me li ni’oguna’ö ya’ia da’ö li salio aboto ba dödöda hegöi sasese ta’oguna’ö, andrö wa alio tofakha ba dödöda nösi Zura Ni’amoni’ö. (Zinunö 119:97) Hiza’i, tohude sibai Terjemahan Dunia Baru börö me i’oguna’ö döi Lowalangi ba nahia si no mutatugöi molo’ö naskah sindruhunia.

7, 8. (a) Hana wa niha Yahudi me abad si tölu SM, lö aboto ba dödöra Mbuku Ni’amoni’ö Heberai’o? (b) Hadia geluaha Septuaginta Yunani?

⁷ Fa’atedou politik ba zi sagörö ulidanö itaria möi fombulö’ö li ni’oguna’ö niha. Hiza’i, ifaduhu’ö Yehowa wa hasambalö te’asogö Zura Ni’amoni’ö ba li ni’ilara. Duma-dumania, 39 mbuku si oföna ba Zura Ni’amoni’ö, lasura da’ö ira niha Yahudi mazui iraono Gizara’eli. ”No mube’e ba dangara daromali Lowalangi andrö.” (Roma 3:1, 2) Ba wamobörö, lasura mbuku da’a ba li Heberai’o mazui ba li Garamo. Hiza’i, me abad si tölu SM, ato niha Yahudi si lö mangila li Heberai’o. Hana? Me arakhagö ikuasoi fefu mbanua si so ba gulidanö Aleksander Agung, tefazawili Wamatörö Yunani. Lua-luania, li Yunani zasese mu’oguna’ö ba mbanua nikuasoi Yunani. Ato niha sangoguna’ö li Yunani, tenga sa’ae li ni’oguna’öra me föna. (Danieli 8:5-7, 20, 21) Ato niha Yahudi si no tefarahu ba da’ö. Andrö wa abua khöra wangila geluaha Zura Ni’amoni’ö ba li Heberai’o. Hadia lala wangasiwaisi ya’ia?

⁸ Te 250 fakhe fatua lö tumbu Yesu, lima mbuku siföföna ba Zura Ni’amoni’ö lafo’eluaha ia ba li Yunani. Ba gafuriata, lafo’eluaha göi faosatö tanö bö’ö moroi ba Mbuku Ni’amoni’ö Heberai’o. Famo’eluaha da’a lafotöi ia Septuaginta Yunani. Da’a wamo’eluaha si oföna sibai musöndra moroi ba Mbuku Ni’amoni’ö Heberai’o.

9. (a) Hewisa Septuaginta hegöi famo’eluaha tanö bö’ö möi fanolo ba niha sombaso Taromali Lowalangi? (b) Moroi ba faosatö Mbuku Ni’amoni’ö Heberai’o, hadia ayati sabölö omasi’ö?

⁹ Börö me so wamo’eluaha Septuaginta, niha Yahudi sangoguna’ö li Yunani, tola labaso Mbuku Ni’amoni’ö Heberai’o ba li Yunani. Tatu, omuso sibai dödöra börö me tola labaso mazui lafondro-ndrongo Daromali Lowalangi ba li  ni’ilara eluaha. Ba gafuriata, lafo’eluaha faosatö-faosatö Zura Ni’amoni’ö ba li tanö bö’ö sasese la’oguna’ö, simane Siria, Gotik hegöi Latin. Buania, itugu ato niha si tola mombaso hegöi sangila eluaha nösi Daromali Lowalangi, ba la’omasi’ö da’ö. So göi ayati sabölö omasi ira hulö simane ya’ita iada’a. (Baso Zinunö 119:162-165.) Ba da’a oroma wa anau gölö Daromali Lowalangi hewa’ae so wa’atedou politik hegöi fa’atebulö li sasese mu’oguna’ö.

10. Ba götö Wycliffe, hana wa ato niha si tebai mombaso Sura Ni’amoni’ö?

¹⁰ Ba zi no hauga fakhe, ato ndra samatörö zanaisi niha ba wombaso Sura Ni’amoni’ö. Hiza’i, so niha sangomasi’ö Lowalangi samorege ena’ö fefu niha tola aboto ba dödöra Zura Ni’amoni’ö. Duma-dumania, John Wycliffe si toröi ba Inggris, sauri me abad si-14. Molo’ö ya’ia, no sinangea na fefu niha labaso Zura Ni’amoni’ö ba li sasese la’oguna’ö. Sagötö fa’aurinia, ato niha Inggris si lö irai mamondro-ndrongo nösi Zura Ni’amoni’ö ba li sasese la’oguna’ö. Ebua sibai mböli Zura Ni’amoni’ö ba moguna mufuli musura tanga nösinia. Andrö wa lö ato niha sangokhögö Sura Ni’amoni’ö. Aefa da’ö, ato niha ba götö da’ö, lö la’ila mombaso. Niha si möi ba gereja te ha ba li Latin larongo wombaso Sura Ni’amoni’ö. Hiza’i, lö asese la’oguna’ö li da’ö ba lö aboto ba dödö nono mbanua. Andrö, hadia nifalua Yehowa ena’ö fefu niha tola labaso Zura Ni’amoni’ö ba li sasese la’oguna’ö?​—Gamaedola 2:1-5.

11. Hadia mbuania börö me so Zura Ni’amoni’ö Wycliffe?

¹¹ Me 1382, John Wycliffe hegöi niha bö’ö lafo’eluaha Zura Ni’amoni’ö ba li Inggris. Niha Lollard sangomasi’ö Sura Ni’amoni’ö, la’omasi’ö sibai Zura Ni’amoni’ö Wycliffe. Latöröi mbanua si so ba Inggris ba wombaso Sura Ni’amoni’ö, ba labe’e ba niha faosatö Zura Ni’amoni’ö si no ifuli lasura. Ba nifaluara andre, ifuli tehöngö Zura Ni’amoni’ö.

12. Hadia nifalua ndra pendeta khö Wycliffe hegöi ba halöwönia?

¹² Fatuwu ndra pendeta khö Wycliffe,  Sura Ni’amoni’önia hegöi ba niha solo’ö ya’ia. Lafakao niha Lollard ba lafakiko fefu Zura Ni’amoni’ö Wycliffe nisöndrara. Hewa’ae no mate Wycliffe, lawa’ö ira pendeta wa ya’ia andre niha samadaö mazui udu Gereja. Lahalö dölania moroi ba lewatö, latunu ba latibo’ö ba nungo nidanö Swift. Hiza’i, ato niha somasi mombaso hegöi somasi ena’ö aboto ba dödöra Daromali Lowalangi, ba tebai lataha ira Gereja. Ngaotu fakhe aefa da’ö, niha Eropa hegöi soi bö’ö, ibörötaigö lafo’eluaha ba lahaogö Zura Ni’amoni’ö ba li sasese la’oguna’ö niha.

13. Hadia zi tola tafaduhusi tödö? Ba hewisa wa tola itugu aro wamatida ba da’ö?

¹³ Moroi khö Lowalangi Zura Ni’amoni’ö. Hiza’i, tenga i’anemai’ö moroi khö Lowalangi wamo’eluaha Septuaginta, Sura Ni’amoni’ö Wycliffe, King James Version mazui famo’eluaha tanö bö’ö. Hewa’ae simanö, ba ginötö tabaso waö-waö sanandrösa ba wamo’eluaha da’a, oroma wa no ifalua zi no ifabu’u Yehowa ba wondrorogö ena’ö anau gölö Daromalinia. Da’a zanga’aro’ö famatida wa hasambalö alua hadia zi no ifabu’u Yehowa.​—Yosua 23:14.

14. Me no ta’ila hadia dani wa ilumö’ö Zura Ni’amoni’ö Yehowa, hana wa itugu ta’omasi’ö ia?

¹⁴ Na tafaha’ö ita ba lala nifalua Yehowa ba wolumö’ö Taromalinia, itugu aro wamati hegöi fa’omasida khönia. * (Faigi nisura ba gahe zura.) Hadia dani si oföna wa ibe’e khöda Zura Ni’amoni’ö Yehowa ba hana wa ifabu’u wa ilumö’ö da’ö? Börö me i’omasi’ö ita ba omasi ia ifaha’ö ita ena’ö sökhi wa’aurida. (Baso Yesaya 48:17, 18.) Da’a zamarou tödöda ba wangomasi’ö hegöi ba wolo’ö ya’ia.​—I Yohane 4:19; 5:3.

15. Hadia nitutunöda ba wamaha’ö aefa da’a?

¹⁵ Ta’omasi’ö sibai Daromali Lowalangi. Börö da’ö, hewisa ena’ö tatema mbua na tabaso Zura Ni’amoni’ö? Hewisa ena’ö niha nifalukhaisida ba wanuriaigö tola la’ame’egö tödö Zura Ni’amoni’ö? Hewisa ena’ö niha sangolohesi huhuo ba mbanua niha Keriso tola te’odane-dane wamaha’öra moroi ba Daromali Lowalangi? Tatutunö ia ba wamaha’ö aefa da’a.