1, 2. (a) Hadia lua-lua na ambö fanaha tödö? (b) Hana wa moguna tatutunö sanandrösa ba wanaha tödö?

ITOLO ita Lowalangi Yehowa ba wangokhögö fanaha tödö. (Galatia 5:22, 23) Mo’ahonoa wanaha tödö ni’okhögö Yehowa. Hiza’i, tebai ta’okhögö zimane da’ö börö me lö mo’ahonoa ita. Sindruhunia, fefu gabula dödö salua iada’a, alua ia börö me ambö fanaha tödö. Da’a göi mbörö wa itaha-taha ia si samösa niha ba wamalua halöwö si tohude, lö sökhi halöwönia ba zekola mazui ba nahiania wohalöwö. Börö me ambö fanaha tödö, alua wa’alösökhi, femabu, fehede si lö sökhi, fabali auri, mo’ömö ba zi lö moguna, fa’asandru, lakuru, fökhö wangera-ngera, fökhö ni’asogö börö wamalua amuata fohorö, hegöi abeto.​—Zinunö 34:12-15.

² Niha si lö fanaha tödö, i’asogö gabula dödö khönia samösa hegöi ba niha bö’ö. Itugu numalö ginötö, ba itugu oroma wa alö wanaha tödö ba niha. Hiza’i, lö tokea ita ba da’a börö me no ifa’ele’ö Taromali Lowalangi wa fa’ambö fanaha tödö no sambua tandra wa auri ita ba ”götö safuria”.​—II Timoteo 3:1-3.

3. Hana wa moguna so khöda wanaha tödö?

 ³ Hana wa moguna so khöda wanaha tödö? So dombua dani si tohude. Si oföna, lö oya gabula dödö nirasoi niha si tola mo’angenanöi hadia nirasoi hegöi ni’angeraigönia. Aoha göi khöra ba wangokhögö fahuwusa si sökhi, ba wanimbagö fönu, fa’aombö dödö mazui fa’afawuka wangera-ngera. Si dua, ena’ö lö mamalö tobali si fahuwu khö Lowalangi, moguna tatimbagö wanandraigö hegöi isö-isö dödö si fasala. Da’a zi tebai lafalua ira Adamo ba Khawa. (I Moze 3:6) Simane ya’ira, ato niha iada’a zanaögö abula dödö börö me lö la’okhögö wanaha tödö.

4. Hadia zi möi famarou dödö ba niha samorege ba wolawa gisö-isö dödöra si fasala?

⁴ Aboto ba dödö Yehowa wa lö mo’ahonoa ita ba abua khöda wangokhögö fanaha tödö. Hiza’i, omasi ia itolo ita ba wolawa gisö-isö dödöda si fasala. (I Razo 8:46-50) Börö me si Fahuwu safönu fa’omasi ia, andrö wa si fao fa’omasi ibe’e wamarou dödö ba niha na itaria abua khöra ba wo’angenanöi hadia nirasoi hegöi gisö-isö dödöra. Ba wamaha’ö da’a, tafaha’ö ita ba duma-duma wanaha tödö ni’okhögö Yehowa. Tatutunö göi duma-duma si sökhi hegöi si lö sökhi moroi ba Zura Ni’amoni’ö hegöi fanuturu lala si sökhi si tola manolo ya’ita.

5, 6. Hadia duma-duma wanaha tödö nibe’e Yehowa khöda?

⁵ Mo’ahonoa wanaha tödö ni’okhögö Yehowa börö me mo’ahonoa ia ba ngawalö nifaluania. (V Moze 32:4) Lö mo’ahonoa ita. Hiza’i, moguna ta’angeraigö duma-duma wanaha tödö moroi khönia ena’ö tola itugu sökhi wolo’öda ya’ia. Da’a zanolo ya’ita ba wamalua hadia zatulö na tarasoi wa’afatö dödö. Hadia manö duma-duma wanaha tödö moroi khö Yehowa?

⁶ Angeraigö hadia nifalua Yehowa me mamadaö Zatana ba kabu Edena. Fefu zamosumange Lowalangi si lö faröi si so ba zorugo tola manö tokea, mofönu ba lö fao dödöra ba wamadaö nifalua Gafökha. Te örasoi göi zimane da’ö na ö’angeraigö fefu gabula dödö ni’asogö Zatana. Hiza’i, so wa’ebolo dödö khö Yehowa ba atulö lala nifaluania. Lö alio mofönu Yehowa ba so khönia wa’atulö ba wamadaö nifalua Zatana. (II Moze 34:6; Yobi 2:2-6) Hadia mbörö? Itehegö numalö ginötö Yehowa börö me lö omasi ia na so niha si tehori, hiza’i ”ena’ö ahori falukha ira wamalalini era-era”.​—II Fetero 3:9.

7. Hadia wamaha’ö khöda moroi ba duma-duma Yehowa?

⁷ Moroi ba duma-duma Yehowa, tafaha’ö ita wa moguna tahaogö ta’angeraigö fatua lö tawa’ö ba tafalua hadia ia. Andrö, be’e ginötömö ba wo’angeraigö fatua lö öhalö gangetula si tohude. Andrö wa’atua-tua ba wanguma’ö mazui ba wamalua hadia zatulö. (Zinunö 141:3) Ba ginötö mofönu mazui afatö dödöda,  aoha khöda ba wamalua hadia manö. Da’a mbörö wa ato niha zaniasa ba wehede mazui ba nifaluara si lö fakhamö la’angeraigö!​—Gamaedola 14:29; 15:28; 19:2.

8. (a) Hezo tola tasöndra duma-duma si sökhi ba wanaha tödö? (b) Hadia zanolo Yosefo ba wotimbagö fondrönisi dödö moroi khö wo’omo Wotifa? (Faigi gambara ba wamobörö wamaha’ö.)

⁸ Haniha duma-duma moroi ba Zura Ni’amoni’ö sangoroma’ö wa moguna wanaha tödö? Duma-dumania, salua khö Yosefo ono Yakobo. Itimbagö wanandraigö ba ginötö mohalöwö ia ba nomo Wotifa, högö wazuri khö Wara’o. Adöni dödö wo’omo Wotifa khö Yosefo börö me ”sökhi sibai mboto Yosefo ba si sökhi göi mbawania”. No hauga kali itandraigö idönisi dödö Yosefo. Hadia zanolo Yosefo ba wotimbagö fondrönisi dödö andrö? Te no ihaogö i’angeraigö hadia zalua na ifalua da’ö. Andrö, me idöni nukhania fo’omo Wotifa, ilau moloi Yosefo. Imane, ”Ba hadia, ulau zi lö atulö andrö, sabölö-bölö sibai, wamazökhi horö ba Lowalangi?”​—I Moze 39:6, 7, 9; baso Gamaedola 1:10.

9. Hewisa wama’anömö ya’ugö ba wanimbagö fondrönisi dödö?

⁹ Hadia wamaha’ö khöda ba duma-duma Yosefo? Na adöni dödöda ba wamalua hadia zi lö tefaudu ba goi-goi Lowalangi, moguna tatimbagö da’ö. Fatua lö tobali Samaduhu’ö Yehowa, so ösa zamorege ba wolawa fa’arörö dödö ba wemanga-manga, femabu, foroko, fangoguna’ö narkoba, amuata fohorö mazui tanö bö’önia. Ba me no aefa tebayagö idanö, itaria adöni dödöra ba wamalua da’ö. Na da’a zalua khömö, batogö ba angeraigö wa tola tekiko wahuwusamö khö Yehowa na adöni dödömö ba wamalua da’ö. Angeraigö hadia zalua si tola mondrönisi tödömö, ba alui lala ba wanimbagö ya’ia. (Zinunö 26:4, 5; Gamaedola 22:3) Na no irai tetandraigö ndra’ugö simane da’ö, andrö wa’atua-tua hegöi fanaha tödö khö Yehowa ba wanimbagö fondrönisi dödö andrö.

10, 11. (a) Hadia manö zalua khö ndra si bohou ebua ba zekola? (b) Hadia zanolo niha Keriso si bohou ebua ba wotimbagö fondrönisi dödö ba wolawa goi-goi Lowalangi?

¹⁰ Itaria ato niha Keriso si bohou ebua zanaögö simane salua khö Yosefo. Duma-dumania Kim. Asese lahöni-höni ira awönia ba kelas sanandrösa ba wamalua fohorö barö migu andrö. Lö hadöi si tola itutunö Kim sanandrösa ba da’ö. Börö me fabö’ö ia moroi khö ndra awönia, irasoi wa ha ya’i-ya’ia ba lö si fahuwu khönia. Lawa’ö göi khönia ira awönia wa bodo ia börö me lö ilau fakawa. Hiza’i, atua-tua Kim. I’ila wa ebua wondrönisi dödö ba wamalua fohorö ba ginötö awuyu-wuyu ita nasa. (II Timoteo 2:22) Asese lasofu khönia ira awönia hadia ono alawe ia nasa. Da’a zame’e khönia  ginötö ba wotutunö hadia mbörö wa lö omasi ia ifalua wohorö. Omuso dödöda ba niha Keriso si bohou ebua sanimbagö fondrönisi dödö ba wamalua fohorö, ba omuso göi dödö Yehowa khöra!

¹¹ Ibe’e göi khöda Sura Ni’amoni’ö duma-duma niha si lö manimbagö fondrönisi dödö ba wamalua fohorö. Iforoma’ö göi lua-lua si lö sökhi na lö khöda fanaha tödö. Na alua khömö simane zalua khö Kim, angeraigö sanandrösa ba zi bohou ebua sambö tödö nitutunö ba Gamaedola faza 7. Angeraigö göi sanandrösa khö Gamoni hegöi lua-lua si lö sökhi ba nifaluania. (II Zamueli 13:1, 2, 10-15, 28-32) Tola latolo ndraonora ira satua ba wangokhögö fanaha tödö hegöi fa’atua-tua na latutunö duma-duma da’a ba wamaha’ö zi sambua omo.

12. (a) Hewisa wangoroma’ö Yosefo fanaha tödö khö ndra talifusönia? (b) Hezo manö moguna tataha dödöda?

¹² Ba ginötö bö’ö, ibe’e duma-duma si sökhi Yosefo ba wanaha tödö. Alua da’a me möi ndra talifusönia wowöli gö ba Miserai. Ena’ö i’ila hadia zi so ba wangera-ngerara, lö ifatunö khöra wa ya’ia andre talifusöra. Ba me tebai itaha dödönia, iröi ndra talifusönia ba ilau me’e ba zi ha ya’ia. (I Moze 43:30, 31; 45:1) Na so ndra talifusöda zangafökhöi’ö tödömö, o’ö duma-duma wanaha tödö nifalua Yosefo ena’ö tola ötimbagö ba wamalua mazui ba wanguma’ö hadia zi tola manga’asogö khömö faniasa. (Gamaedola 16:32; 17:27) Mazui, na so zahatö khömö si no la’efasi ba gangowuloa, moguna ötaha dödömö ena’ö lö fariawö ndra’ugö khöra. Tola manö abua wamalua da’a. Hiza’i, tola aoha ia na ötörö tödömö wa ö’o’ö duma-duma Yehowa ba öfalua hadia ni’andrönia.

13. Hadia wamaha’ö khöda ba zalua ba wa’auri Razo Dawido?

¹³ Tola göi tatema mbua moroi ba duma-duma Razo Dawido. Me i’andrö wönunia Saulo hegöi Sime’i, lö mofönu Dawido mazui i’oguna’ö wa’abölönia ba wolawa ya’ira. (I Zamueli 26:9-11; II Zamueli 16:5-10) Hiza’i, tenga sagötö fa’ara so wanaha tödö khö Dawido. Ta’ila da’a na tabaso horö nifaluania khö Mbeseba hegöi nifaluania khö Nabalo, sangalui tana khönia. (I Zamueli 25:10-13; II Zamueli 11:2-4) Tola tahalö wamaha’ö si sökhi moroi khö Dawido. Si oföna, niha sondrönia’ö ono mbanua Lowalangi moguna la’okhögö wanaha tödö ena’ö lö fasala wangoguna’öra halöwö nibe’e khöra. Si dua, böi so niha zi talafo mamaduhusi tödö wa tola aro ia ba wanaögö fanandraigö.​—I Korindro 10:12.

14. Hadia zalua khö zi samösa dalifusöda ira matua, ba hana wa moguna ta’o’ö nifaluania?

¹⁴ Hadia zi tola öfalua ba wondrou’ö fanaha tödö? Angeraigö hadia zalua khö Luigi. So moto zanandru toyo motonia. Hewa’ae niha da’ö zi sala, hiza’i ihangöi Luigi ba edöna ilau fa’udu. Ilau mangandrö Luigi khö Yehowa ena’ö so khönia  wa’ebolo dödö ba lö ifalalawa. Hiza’i, lö aetu mofönu niha zanandru motonia. Da’ö mbörö wa isura waö-waö asuransi ndra matua da’ö Luigi, ba ilau mofanö hewa’ae lö si tebato wofönu-fönu niha zanandru motonia. Samigu aefa da’ö, möi Luigi ba wamalukhaisi samösa ndra alawe si no irai ifalukhaisi. Fo’omo ndra alawe da’ö zanandru motonia! Ifuli aila ia ba i’andrö wa’ebolo dödö khö Luigi. Ihubungi perusahaan asuransi moto Luigi ena’ö tola mufuli muhaogö moto Luigi. Fao ia ba wamaha’ö Zura Ni’amoni’ö, ba owua-wua dödönia. Börö zalua andre, aboto ba dödö Luigi wa moguna sibai i’okhögö wa’ebolo dödö. I’ila göi wa lö sökhi zalua na ilau mofönu.​—Baso II Korindro 6:3, 4.

15, 16. Hewisa wamaha’ö ba Zura Ni’amoni’ö möi fanolomö hegöi ösi nomomö ba wondrou’ö fanaha tödö?

¹⁵ Famaha’ö ba Zura Ni’amoni’ö ba ginötö si no mutatugöi hegöi si tefaudu, möi fanolo niha Keriso ena’ö la’okhögö wanaha tödö. Törö tödö hadia niwa’ö Lowalangi khö Yosua, ”Böi aefa-aefa ba mbeweu nösi zura Goroisa andrö ba  öfatou-tou tödöu, bongi ma’ökhö, ena’ö ö’alui wolo’ö fefu hadia ia nitanö ba zura andrö, ba sökhi lua-lua wolaumö ba falukha’ö zalöfö.” (Yosua 1:8) Hiza’i, hewisa wamaha’ö moroi ba Zura Ni’amoni’ö möi fanolomö ba wangokhögö mazui ba wondrou’ö fanaha tödö?

¹⁶ Oya duma-duma si no tafaha’ö ita moroi ba Zura Ni’amoni’ö sangoroma’ö hadia mbua nitemada na so khöda wanaha tödö hegöi abula dödö salua na lö ta’okhögö da’ö. Ibe’e duma-duma da’a Yehowa ba Zura Ni’amoni’ö ba wanolo ya’ita. (Roma 15:4) Moguna tabaso, tafaha’ö ita ba tahaogö ta’angerönusi duma-dumara andre. Angeraigö hadia mbuania ba wa’aurimö hegöi ba nösi nomomö. Andrö khö Yehowa ba wanolo ya’ugö ba wamalua mene-mene moroi ba Daromalinia. Na ö’ila wa so khöu wa’ambö fanaha tödö, faduhu’ö da’ö. Angandrö ba forege ba wondrou’ö ya’ia. (Yakobo 1:5) Falua riset ba publikasida ena’ö tola ösöndra mene-mene si tefaudu si tola manolo ya’ugö.

17. Hadia zi tola lafalua ira satua ba wanolo iraonora ba wangokhögö fanaha tödö?

¹⁷ Hewisa zatua ba wanolo iraonora ena’ö la’okhögö wanaha tödö? Aboto ba dödö zatua wa tenga i’otarai me tumbu so mbua-bua da’a ba ndraonora. Andrö wa moguna lafaha’ö mbua-bua si sökhi andre ba ndraonora moroi ba duma-duma nibe’era. (Efeso 6:4) Na ö’ila wa ambö fanaha tödö ba ndraonomö, sofu khöu samösa hadia no öbe’e khöra duma-duma si sökhi. Tola tobali ndra’ugö duma-duma si sökhi na asese möi’ö manuriaigö, möi ba gangowuloa, hegöi ba wamalua famaha’ö zi sambua omo. Böi ata’ufi wanguma’ö lö’ö ba ndraonomö na moguna da’ö! No ibe’e Yehowa nola-ola khö Gadamo hegöi Khawa. Nola-ola da’a zanolo ya’ira ena’ö tola lafaha’ö ira ba wo’ame’egö tödö wa’abölö Yehowa. Simanö göi, na labe’e degu-degu ira satua ba ndraonora ba labe’e khöra duma-duma si sökhi, no lafaha’ö ndraonora ba wangokhögö fanaha tödö. Moguna sibai ötolo ndraonomö ena’ö la’okhögö wa’omasi ba la’ame’egö tödö goi-goi hegöi fa’abölö Lowalangi.​—Baso Gamaedola 1:5, 7, 8.

18. Hana wa moguna tafili zi fahuwu khöda si fao fa’atua-tua?

¹⁸ Hewa’ae satua ita mazui tenga, fefu ita moguna tafili zi fahuwu khöda si fao fa’atua-tua. Na i’omasi’ö Yehowa niha si fahuwu khömö, lafarou dödömö ba wotatugöi gohitö dödö si sökhi ba ena’ö lö ötaögö gabula dödö. (Gamaedola 13:20) Duma-duma si sökhi moroi khöra, möi famarou dödömö ba wolo’ö fanaha tödö ni’okhögöra. Ba tola göi tefarou dödöra ba duma-duma nibe’emö. Fanaha tödö ni’okhögöda zanolo ya’ita ba wangokhögö fa’omasi Lowalangi, fa’owua-wua dödö ba wa’auri, ba tabe’e zi sökhi ba niha ni’omasi’öda.