1. Hewisa wanutunö Yehowa ya’ia khö Moze? Ba hana wa moguna da’a?

BA ZI sambua inötö, ifatunö haniha ia Lowalangi khö Moze me i’ombakha’ö döinia hegöi bua-buania. Tola manö itandrösaigö wa’abölönia Yehowa mazui fa’atua-tuania. Hiza’i, si oföna itutunö ya’ia da’ö fa’ebua dödönia hegöi fa’ahakhö dödönia. (Baso II Moze 34:5-7.) Moguna i’ila Moze hadia ituhini ia Yehowa. Da’ö mbörö wa itutunö mbua-buania Yehowa ba wangoroma’ö wa omasi ia itolo zamosumange ya’ia. (II Moze 33:13) Hewisa dödöda börö me ta’ila wa irorogö ita Yehowa? Ba wamaha’ö da’a, tatutunö sanandrösa ba wa’ahakhö dödö, ya’ia da’ö tarasoi hadia gabula dödö nirasoi niha bö’ö ba tatolo ira.

2, 3. (a) Hadia zangoroma’ö wa no sinangea la’okhögö wa’ahakhö dödö niha gulidanö? (b) Hana wa adöni dödömö ba niwa’ö Zura Ni’amoni’ö sanandrösa ba wa’ahakhö dödö?

² Yehowa no sahakhö tödö, ba tefazökhi niha si fakhili-khili khönia. Da’ö mbörö wa no sinangea na fefu niha la’ame’egö tödö niha bö’ö. Hewa’ae lö la’okhögö wa’aboto ba  dödö khö Yehowa, hiza’i asese laforoma’ö wa’ahakhö dödö. (I Moze 1:27) Ba Zura Ni’amoni’ö, oya duma-duma ni’ilada sanandrösa ba niha sangoroma’ö fa’ahakhö dödö. Duma-dumania, ba götö Razo Zelomo, so darua ndra alawe samadöni ono sawuyu. Ena’ö i’ila haniha zindruhunia nina nono sawuyu andrö, iwa’ö Zelomo ena’ö labagi dalu nono andrö. I’omasi’ö sibai nono sawuyu andrö inania sindruhu. Andrö wa i’andrö khö razo ena’ö labe’e manö nono da’ö khö ndra alawe si samösa. (I Razo 3:23-27) Duma-duma tanö bö’ö ya’ia da’ö ono Wara’o alawe. Me isöndra Moze me ono sawuyu, i’ila wa ono niha Heberai’o da’ö ba no sinangea labunu. Hiza’i, ”ahakhö dödönia” ba ihalö tobali ononia.​—II Moze 2:5, 6.

³ Hana wa moguna tafaha’ö ita nasa ba wa’ahakhö dödö? Börö me omasi Yehowa na ta’o’ö ia. (Efeso 5:1) Hewa’ae tefazökhi ita ena’ö ta’okhögö da’ö, hiza’i lö mo’ahonoa ita ba so khöda wakhögusa. Itaria abua khöda ba wotatugöi hadia tatolo niha bö’ö mazui ta’osambua’ö dödöda ba wa’aurida samösa. Hadia zanolo ya’ita ena’ö itugu ta’ame’egö tödö niha bö’ö? Si oföna, datatutunö hewisa wangoroma’ö Yehowa hegöi niha bö’ö fa’ahakhö dödö. Si dua, datafaigi hewisa wolo’öda wa’ahakhö dödö Lowalangi ba hadia mbuania khöda na tafalua da’ö.

4. (a) Hana wa ifatenge mala’ikania Yehowa ba Zodoma? (b) Hadia wamaha’ö khöda ba zalua ba nösi nomo Loti?

⁴ Ba Zura Ni’amoni’ö, oya duma-duma sanandrösa ba wa’ahakhö dödö Yehowa. Duma-dumania, simane salua khö Loti. Ya’ia andre niha satulö tödö ”nifakao-kao” börö wa’alösökhi nifalua niha Zodoma ba Gomora. Niha si so ba da’ö lö lafosumange Lowalangi, ba ihalö gangetula Yehowa ba wangohori ya’ira. (II Fetero 2:7, 8) Ifatenge mala’ikania Yehowa ba wamatunö khö Loti wa idudugö Zodoma hegöi Gomora, ba moguna iröi mbanua da’ö. Imane Sura Ni’amoni’ö, ”Ba me arörö-rörö [Loti] na, ba latuyu da’ionia [mala’ika] andrö, fabaya fo’omonia ba ononia andrö si dombua, me no edöna i’orifi ia Yehowa, la’ohe baero ba laröi ia ba da’ö baero mbanua.” (I Moze 19:16) I’ila Yehowa hadia zalua khö Loti. Andrö wa tola faduhu dödöda wa i’ila fefu gabula dödö nitaögöda.​—Yesaya 63:7-9; Yakobo 5:11; II Fetero 2:9.

5. Hewisa wamaha’ö Daromali Lowalangi ita ba wangoroma’ö fa’ahakhö dödö?

⁵ Ifaha’ö göi nono mbanuania Yehowa ba wangoroma’ö fa’ahakhö dödö. Angeraigö sambua huku nibe’enia ba ndraono Gizara’eli. Na so niha samiza kefe, niha same’e nifiza tola ihalö mbaru niha samiza si tobali gade irege ifuli gefe nifizania andrö. (Baso II Moze 22:26, 27.) Hiza’i, moguna ifuli mbaru da’ö same’e nifiza fatua lö aekhu luo ena’ö lö okafu  niha samiza andrö ba zi bongi. Niha si lö fa’ahakhö dödö tola manö lö ifuli mbaru andrö. Hiza’i, ifaha’ö nono mbanuania Yehowa ba wangoroma’ö fa’ahakhö dödö. Hadia goi-goi si tola tafaha’ö ita ba huku andre? Böi ta’osiwawöi zoguna khö ndra talifusöda niha Keriso. Na tola tatolo ndra talifusöda si so abula dödö, moguna tafalua ia.​—Kolose 3:12; Yakobo 2:15, 16; baso I Yohane 3:17.

6. Hadia wamaha’ö khöda moroi ba wa’ahakhö dödö Yehowa ba zala nifalua ndraono Gizara’eli?

⁶ Ahakhö dödö Yehowa ndraono Gizara’eli hewa’ae no lafalua zala khönia. Imane Sura Ni’amoni’ö, ”Ba lö adage-dage Yehowa, Lowalangi ndra tuara, lö ibato wamatenge khöra sinengenia; me no ahakhö dödönia mbanuania ba he nahiania andrö.” (II Nga’ötö 36:15) Simanö göi, moguna taforoma’ö wa’ahakhö dödö ba niha si lö mangokhögö fa’aboto ba dödö sanandrösa khö Yehowa si tola manö mamalalini era-era ba tobali si fahuwu khönia. Lö omasi Yehowa na so niha nihori na alua wanguhukunia. (II Fetero 3:9) Andrö, fatua so ginötö omasi ita taturiaigö duria famangelama ba niha sato ba tatolo ira ena’ö latema mbua moroi ba wa’ahakhö dödö Lowalangi.

7, 8. Hana wa faduhu dödö zi sambua ösi nomo wa iforoma’ö wa’ahakhö dödö khöra Yehowa?

⁷ Iada’a, ato zamosumange Yehowa zorasoi fa’ahakhö dödönia. Duma-dumania, me 1990-an ba Bosnia, fasuwö ngawalö soi ba lalau fabunu. Milan, ono matua si 12 fakhe hegöi ösi nomonia toröi ira ba da’ö. Milan, akhinia ono matua, ira satuania hegöi ira Samaduhu’ö tanö bö’ö latörö bus moroi ba Bosnia möi ira ba Serbia ba wangondrasi kebaktian. Ba da’ö mena’ö labayagö idanö zatuania. Hiza’i, ba perbatasan so ösa zaradadu sangila wa fabö’ö soi nösi nomonia. Andrö wa lawa’ö khöra we’amöi tou ba bus, hiza’i tola mofanö danö bö’ö. Lataha ira dua hari. Ba gafuriata, niha sohalöwö ba da’ö itelefo kafalonia ba isofu hadia zinangea lafalua ba nösi nomo andrö. Lö aröu moroi ba da’ö, no muzizio nösi nomo Milan ba larongo me imane kafalo andrö, ”Ohe ira baero ba fana manö!”

⁸ Me fahuhuo zohalöwö andrö khö zaradadu tanö bö’ö, so darua niha sangondrasi nösi nomo Milan. Lafatunö wa ya’ira andre Samaduhu’ö Yehowa ba no lafatunö khöra ira talifusöda si so ba bus hadia zalua. La’andrö khö Milan hegöi akhinia ena’ö möi ira yawa ba motora ena’ö tola lalalöi perbatasan, börö me lö lafareso zura-sura ndraono. Aefa da’ö, lawa’ö ira talifusöda andrö khö zatua Milan ena’ö latörö furi gödo pos ba perbatasan irege tola ifuli falukha ira zui. Ata’u sibai Milan irege lö i’ila hadia ma’iki mazui me’e ia. Lamane ira satuania, ”Hadia tola mofanöga simane da’ö?” Hiza’i, me ibörögö lalau mofanö, hulö zi lö oroma ira föna zaradadu. Milan hegöi akhinia tola ifuli falukha ira khö zatuara me no aefa lalalöi perbatasan da’ö. Ba latohugö we’amöi ba kebaktian. Faduhu dödöra wa ifondro-ndrongo wangandröra Yehowa! Ta’ila ba Zura Ni’amoni’ö wa tenga ha da’ö lala ni’oguna’ö Yehowa ba wolumö’ö nono mbanuania. (Halöwö Zinenge 7:58-60) Hiza’i, ba zalua andre, imane Milan,  ”Hulö zi no labalunöisi hörö ndra saradadu andrö ira mala’ika, ba i’orifiga Yehowa.”​—Zinunö 97:10.

9. Hewisa dödö Yesu ba niha solo’ö ya’ia? (Faigi gambara ba wamobörö wamaha’ö.)

⁹ No ibe’e göi duma-duma si sökhi Yesu ba wangoroma’ö fa’ahakhö dödö. Ahakhö dödönia niha solo’ö ya’ia börö me hulö ”nifakao ira, nifazaewe, hulö mbiri-biri, si lö kubalo”. Andrö, hadia nifaluania? ”Ibörötaigö ifaha’ö ira, oya ngawalö.” (Matai’o 9:36; baso Mareko 6:34.) No aröu faehu ia ba niha Farizai’o si lö fa’ahakhö dödö ba si lö omasi manolo niha bö’ö. (Matai’o 12:9-14; 23:4; Yohane 7:49) Simane Yesu, hadia sindruhu-ndruhu omasi’ö ötolo niha ba öfaha’ö ira sanandrösa khö Yehowa?

10, 11. Hadia hasambalö tefaudu ba wangoroma’ö fa’ahakhö dödö ero inötö? Tutunö.

¹⁰ Tenga da’ö geluahania wa tefaudu ba wangoroma’ö fa’ahakhö dödö ero inötö. Duma-dumania, te so ba wangera-ngera Razo Saulo wa no iforoma’ö wa’ahakhö dödö me lö ibunu Agagi, razo ndraono Gamaleki ba udu nono mbanua Lowalangi. Lö ibunu göi fefu gurifö ndraono Gamaleki. Hiza’i, sindruhunia no iwa’ö khö Zaulo Yehowa ba wamunu fefu niha Gamaleki hegöi uriföra. Börö me lö molo’ö Zaulo, itimba ia Yehowa tobali razo. (I Zamueli 15:3, 9, 15) Yehowa andre Sanguhuku satulö ba tola i’ila hadia zi so ba dödö niha ba i’ila hawa’ara lö moguna iforoma’ö wa’ahakhö dödö. (Ngenu-ngenu Yeremia 2:17; Hezekieli 5:11) Lö aratö ihuku fefu niha si lö molo’ö khönia. (II Tesalonika 1:6-10) Tenga da’ö ginötönia khö Yehowa ba wangoroma’ö fa’ahakhö dödö ba niha si lö sökhi. Sindruhunia, na ihori niha si lö sökhi, no iforoma’ö wa’ahakhö dödö ba niha satulö tödö ni’orifinia.

¹¹ Tatu manö, tenga halöwöda ba wotatugöi hadia te’orifi ira mazui lö’ö. Hiza’i, moguna tafalua hadia zi tola tafalua ba wanolo niha. Hadia manö lala si tefaudu si tola tafalua ba wangoroma’ö fa’ahakhö dödö ba niha bö’ö? So ösa lala si tola tafalua.

12. Hewisa wangoroma’öda fa’ahakhö dödö ba niha bö’ö?

¹² Tobali niha somasi manolo. I’andrö Yehowa ba niha Keriso ena’ö laforoma’ö wa’ahakhö dödö ba niha bö’ö hegöi khö ndra talifusöra ba wamati. (Yohane 13:34, 35; I Fetero 3:8) Sambua geluaha fa’ahakhö dödö ya’ia da’ö ”fao ba wanaögö famakao”. Niha sangokhögö fa’ahakhö dödö, iforege ba wanolo niha si göna abula dödö. Andrö, moguna ta’alui ginötö ba wanolo niha bö’ö. Tabe’e ginötöda ba wamalua halöwöra.​—Matai’o 7:12.

13. Hadia nifalua nono mbanua Lowalangi na alua bencana alam?

 ¹³ Fao ba wanolo si göna bencana alam. Omasi ita taforoma’ö wa’ahakhö dödö ba niha si göna abula dödö börö bencana alam. Ato niha sangila wa ono mbanua Yehowa omasi ira latolo niha bö’ö ero inötö. (I Fetero 2:17) Duma-dumania, samösa dalifusöda ira alawe ba Jepang si göna ndruru danö hegöi tsunami me döfi 2011. Iwa’ö wa ”te’aro’ö ba terara dödönia” me ato ndra talifusöda si tohare moroi ba mbanua bö’ö si so ba Jepang hegöi moroi ba soi bö’ö sanolo ba wangehaogö omo hegöi Balai Mbanua Lowalangi. Imane, ”Ba zalua andre, aboto ba dödögu wa irorogö ndra’aga Yehowa. Ira talifusöda tanö bö’ö faoma göi la’ame’egö tödö nawöra. Ba u’ila wa ato ndra talifusöda ba zi sagörö ulidanö zangandrö salahima.”

14. Hewisa wanolomö niha sofökhö hegöi salawa ndröfi?

¹⁴ Tolo niha sofökhö hegöi salawa döfi. Ahakhö dödöda na ta’ila niha si göna famakao börö wökhö mazui fa’alawa ndröfi. Tabalo-baloi ginötönia dania lö hadöi sa’ae abula dödö simane da’ö. Da’ö mbörö wa ta’angandröi ena’ö tohare Mbanua Lowalangi. Fatua lö alua da’ö, taforege ba wanolo niha sofökhö hegöi si no alawa döfi. Imane samösa sanura wa itaögö wökhö Alzheimer inania si no atua. Samuza inötö ikiöni nukhania, ba me i’osi da’ö inania, moli bel nomora. Tohare darua ndra talifusöda ira  alawe sasese mamalukhaisi ya’ia. Lasofu khönia hadia tola latolo ia. Imane ina andrö, ”Ailado sindruhunia, hiza’i lau bale.” Latolo ia ira talifusöda ba latukari nukhania. Lahaogö sambua galasi tesi ba lalau fahuhuo. I’andrö sibai saohagölö ononia matua ba iwa’ö wa ira Samaduhu’ö ”lafalua hadia nituriaigöra”. Börö me so khöu wa’ahakhö dödö, hadia öforege ba wanolo niha sofökhö hegöi si no alawa ndröfi?​—Filifi 2:3, 4.

15. Hewisa halöwö fanuriaigöda möi fanolo niha bö’ö?

¹⁵ Tolo niha ena’ö aboto ba dödöra Yehowa. Lala sabölö sökhi si tola tafalua ba wanolo niha ya’ia da’ö tafaha’ö ira sanandrösa khö Lowalangi hegöi Mbanuania. Lala tanö bö’ö ya’ia da’ö tatolo ira ena’ö la’ila hadia gunania khöra na la’o’ö goi-goi Yehowa. (Yesaya 48:17, 18) Halöwö fanuriaigö no lala sabölö sökhi ba wamolakhömi Yehowa hegöi ba wangoroma’ö fa’ahakhö dödö ba niha. Hadia tola ödou’ö halöwö fanuriaigö nifaluamö?​—I Timoteo 2:3, 4.

16. Hadia mbua nitemada na taforoma’ö wa’ahakhö dödö?

¹⁶ Imane pakar kesehatan mental wa na so wa’ahakhö dödö lö oya wökhö nitaögöda ba sökhi wahuwusada ba niha bö’ö. Na ötolo niha si so abula dödö, tola itugu owua-wua dödömö, ö’okhögö dötönafö, so zi fahuwu khömö, ba sökhi lala wangera-ngeramö. So mbuania khömö na öforoma’ö wa’ahakhö dödö. (Efeso 4:31, 32) Na tatolo niha bö’ö börö wa’omasi, ta’okhögö dödö side-ide si lö sinegu börö me ta’ila wa no tafalua hadia ni’andrö Yehowa khöda. Fa’ahakhö dödö zanolo ya’ita ena’ö tobali ita satua, fo’omo hegöi si fahuwu si sökhi. Aefa da’ö, niha sangoroma’ö fa’ahakhö dödö tola itema wanolo ba ginötö moguna khönia da’ö.​—Baso Matai’o 5:7; Luka 6:38.

17. Hana wa omasi’ö öforoma’ö wa’ahakhö dödö?

¹⁷ Hewa’ae tatema mbua na taforoma’ö wa’ahakhö dödö, hiza’i dani siföföna wa tafalua ia ya’ia da’ö börö me omasi ita ta’o’ö ba tafolakhömi Yehowa. Ya’ia Gumbu wa’omasi hegöi fa’ahakhö dödö. (Gamaedola 14:31) No ibe’e khöda duma-duma so’ahonoa. Börö da’ö, dataforege ba wolo’ö Lowalangi ba wangoroma’ö fa’ahakhö dödö. Buania, tola itugu ahatö ita khö ndra talifusöda ba ta’okhögö wahuwusa si sökhi ba niha bö’ö.​—Galatia 6:10; I Yohane 4:16.