1. Hana wa tola faduhu dödömö ba wa’abölö Daromali Lowalangi? (Faigi gambara ba wamobörö wamaha’ö.)

FADUHU dödö nono mbanua Yehowa wa taromalinia, ya’ia da’ö turia nibe’enia ba niha gulidanö, ’auri ba abölö’. (Heberai’o 4:12) Tola ta’ila wa’abölö Zura Ni’amoni’ö ba wa’aurida samösa hegöi ba niha bö’ö. Fatua lö tobali Samaduhu’ö, so ösa zi tobali sanagö, sandru ba narkoba mazui samalua fohorö. So göi niha si kayo mazui si tehöngö, hiza’i larasoi wa lö hadöi eluaha wa’aurira. (Zangombakha 2:3-11) Omuso dödöda börö me ato niha zafatö tödö ba zilalö, la’okhögö dötönafö ba fanuturu lala ba wa’aurira iada’a. Ba Manuriaigö, oya waö-waö si sökhi andre si no tabaso ba seri artikel ”Sura Ni’amoni’ö Zombulö’ö Fa’auri”. Hewa’ae no tobali ira niha Keriso, moguna nasa laforege ba wangoguna’ö Sura Ni’amoni’ö ena’ö itugu aro wahuwusara khö Yehowa.

2. Hewisa wa’abölö Daromali Lowalangi ba wanolo niha ba götö siföföna?

² Lö ahöli-höli dödöda na ato niha zamalua fombulö’ö sebua ba wa’aurira me no aefa lafaha’ö ira ba zindruhu. Ira talifusöda ba götö siföföna sangokhögö dötönafö ba zorugo,  lafalua göi da’a. (Baso I Korindro 6:9-11.) Me itutunö Faulo sanandrösa ba niha si tebai möi ba Mbanua Lowalangi, imane ”Ba no simanö ösa ami föna.” Taromali Lowalangi hegöi eheha ni’amoni’ö zanolo ya’ira ba wombulö’ö fa’aurira. Hiza’i, hewa’ae no tobali ira niha Keriso, so ösa zamalua horö sebua irege molua-lua da’ö ba wahuwusara khö Yehowa. Duma-dumania, itutunö Sura Ni’amoni’ö samösa dalifusöda ira matua si no mubayoini ni’efasi ba gangowuloa. Hiza’i, ba gafuriata ibulö’ö lala wa’aurinia ba ifuli latema’ö ia ba mbanua niha Keriso. (I Korindro 5:1-5; II Korindro 2:5-8) Tatu tefarou dödöda me so ndra talifusöda si no mombulö’ö fa’aurira börö wa’abölö Daromali Lowalangi.

3. Hadia nitutunöda ba wamaha’ö da’a?

³ Ebua sibai wa’abölö Daromali Lowalangi. Börö me no buala nibe’e Yehowa da’a khöda, omasi ita tahaogö wangoguna’ö ya’ia. (II Timoteo 2: 15) Ba wamaha’ö da’a tatutunö hewisa wangoguna’öda fa’abölö Zura Ni’amoni’ö (1) ba wa’aurida, (2) ba wanuriagö, hegöi (3) ba wama’ema huhuo. Famaha’ö da’a zanolo ya’ita ba wangoroma’ö fa’omasi hegöi fangandröda saohagölö khö Namada si so ba zorugo, samaha’ö ya’ita ba zoguna khöda.​—Yesaya 48:17.

4. (a) Hadia nifaluada ena’ö tatema wanolo ba Daromali Lowalangi? (b) Hewisa wangoguna’ömö inötömö ba wombaso Sura Ni’amoni’ö?

⁴ Ena’ö tatema wanolo ba Daromali Lowalangi, moguna tatatugöi ginötö ba wombaso ya’ia. Tabaso ia ero ma’ökhö. (Yosua 1:8) Ato ba gotaluada zoya halöwö. Hiza’i, böi tatehegö gofu hadia ia, simane noro dödöda, möi fanaisida ba wombaso Sura Ni’amoni’ö. (Baso Efeso 5:15, 16.) Tola tabaso ia si hulö wongi, ba zi laluo, mazui ba zi bongi. Fao dödöda ba niwa’ö zanura sinunö me isura, ”Ha lö omasido goroisamö andrö! Ma’ö-ma’ökhö lö aefa ba dödögu.”​—Zinunö 119:97.

5, 6. (a) Hana wa moguna so khöda wo’angerönusi? (b) Hewisa ena’ö itugu mo’eluaha wo’angerönusi nifaluada? (c) Hewisa wa möi fanolomö na öbaso ba ö’angerönusi Zura Ni’amoni’ö?

⁵ Hiza’i, tenga ha asala tabaso Zura Ni’amoni’ö. Moguna ta’angerönusi mazui tahaogö ta’angeraigö hadia zi no tabaso. (Zinunö 1:1-3) Da’a zanolo ya’ita ba wamalua hadia zi no tabaso ba Zura Ni’amoni’ö. Andrö, gofu hezoso tabaso Zura Ni’amoni’ö, he ba zi no mucetak mazui ba fakake elektronik, omasi ita tatehegö ibulö’ö ba ifarou dödöda Taromali Lowalangi.

⁶ Hewisa ena’ö itugu mo’eluaha wo’angerönusi nifaluada? Ba ginötö tabaso Zura Ni’amoni’ö, moguna tabatogö ba tasofu khöda samösa, ’Hadia wamaha’ö khögu sanandrösa khö Yehowa ba ayati da’a? Hewisa wamaluagu ba wa’aurigu hadia  zi no ubaso? Hadia zinangea ubulö’ö?’ Na ta’angerönusi Daromali Lowalangi ba na ta’ohe ba wangandrö hadia nibasoda, omasi ita tafalua da’ö. Ba tola tarasoi wa’abölö Zura Ni’amoni’ö ba wa’aurida.​—II Korindro 10:4, 5.

7. Hewisa wangoguna’öda Taromali Lowalangi ba wanuriaigö?

⁷ Moguna asese ta’oguna’ö Daromali Lowalangi ba ginötö manuriaigö hegöi na tafaha’ö niha. Imane samösa talifusöda ira matua, ”Na fao ndra’ugö manuriaigö khö Yehowa ba nomo-omo misa, hadia ha ya’ugö manö zi fahuhuo mazui ötehegö khönia fahuhuo?” Na tabaso Zura Ni’amoni’ö khö zi samösa niha, no tatehegö fahuhuo khönia Yehowa. Ayati si no tahaogö tafili, abölö moguna ia moroi ba ngawalö niwa’öda. (I Tesalonika 2:13) Ba ginötö ölau manuriaigö, hadia öforege ena’ö asese öbaso Zura Ni’amoni’ö?

8. Hana wa tenga ha asala tabaso manö ayati Zura Ni’amoni’ö na möi ita manuriaigö?

⁸ Hewa’ae simanö, tenga ha asala tabaso Zura Ni’amoni’ö ba niha nifalukhaisida. Ato niha si lö mangila eluaha nösi Zura Ni’amoni’ö. No alua da’a ba götö föna hegöi ba götöda iada’a. (Roma 10:2) Böi alio halö gangetula wa no aboto ba dödö zokhö omo ayati nibasoda. Tola tatolo ia na tatandrösaigö ngawua wehede si tohude moroi ba ayati da’ö ba tatutunö hadia geluahania. Na tafalua da’ö, tola tofakha ba dödö hegöi ba wangera-ngerania Daromali Lowalangi.​—Baso Luka 24:32.

9. Hewisa wanoloda niha bö’ö ena’ö la’ame’egö tödö Zura Ni’amoni’ö moroi ba wehede famasao ni’oguna’öda fatua lö tabaso sambua ayati? Be’e duma-duma.

⁹ Fehede famasao ni’oguna’öda fatua lö tabaso ayati, möi fanolo zokhö omo ba wo’ame’egö tödö Zura Ni’amoni’ö. Duma-dumania, tola tamane, ”Datafaigi hadia niwa’ö Zomböi ba nidunö-dunöda andre.” Mazui, na fahuhuo ita ba niha si tenga niha Keriso, tola tamane, ”Datafaigi hadia niwa’ö Kitab Suci khöda.” Na falukha ita ba niha si lö mo’ame’egö tödö agama, tola tasofu khönia, ”Hadia no irai örongo wehede si sökhi andre?” Na tatörö tödöda wa fabö’ö-bö’ö lala wa’auri zi samösa niha hegöi hadia nifaduhusira tödö, omasi ita taforege ba wamalua hadia zi tola tafalua ba wangalui fehede famasao si tefaudu.​—I Korindro 9:22, 23.

10. (a) Hadia zi no irai alua khö zi samösa dalifusöda ira matua? (b) Hadia no irai örasoi wa’abölö Daromali Lowalangi ba wanuriaigö nifaluamö?

¹⁰ Ato zi no morasoi wa so mbuania na la’oguna’ö Daromali Lowalangi ba wanuriaigö. Duma-dumania, möi samösa dalifusöda ira matua ba wamalukhaisi niha salawa döfi si no asese mombaso mbukuda ba zi no hauga fakhe. Samuza inötö, moroi na ha ibe’e mbuku Manuriaigö si bohou, ihalö gangetula talifusöda andrö ba wombaso sambua ayati. Ibaso II Korindro 1:3, 4, sanguma’ö, ”Ama wa’ahakhö dödö andrö, Lowalangi  wondrara dödö, fefu, sondrara tödöma, ba wa’afökhö andrö fefu khöma.” Tofakha ba dödö niha salawa döfi andrö ayati da’a. I’andrö khö dalifusöda ena’ö ifuli ibaso ayati da’ö. Iwa’ö wa ya’ia hegöi fo’omonia moguna khöra wondrara dödö. Börö ayati da’a, omasi ia i’ila abölö oya sanandrösa ba Zura Ni’amoni’ö. Oya mbua nitemada na ta’oguna’ö Daromali Lowalangi ba wanuriaigö!​—Halöwö Zinenge 19:20.

11. Hadia noro dödö ni’okhögö ndra talifusöda sangolohesi huhuo?

¹¹ Omasi ita ta’ondrasi gangowuloa, kebaktian wilayah hegöi kebaktian regional. Dani siföföna wa ta’ondrasi ya’ia da’ö ba wamosumange Yehowa. Tatema göi mbua moroi ba nifa’ema ba da’ö. Andrö, ira talifusöda sangolohesi huhuo, la’okhögö halöwö si tohude hegöi noro dödö sebua. (Yakobo 3:1) Moguna te’odane-dane huhuora moroi ba Daromali Lowalangi. Na ö’okhögö halöwö da’a, hewisa wangoguna’ömö fa’abölö moroi ba Zura Ni’amoni’ö ena’ö tofakha ba dödö niha hadia huhuo nifa’emamö?

12. Hadia nifalua niha sangolohesi huhuo ena’ö te’odane-dane moroi ba Zura Ni’amoni’ö hadia nifa’emania?

¹² Moguna sibai la’oguna’ö Zura Ni’amoni’ö gofu hadia huhuo ni’olohesi. (Yohane  7:16) Andrö, haogö angenanöi ena’ö waö-waö wa’auri, duma-duma mazui lala ni’oguna’ömö ba wama’ema huhuo lö tohude ia moroi ba Zura Ni’amoni’ö. Törö göi tödömö wa fombaso moroi ba Zura Ni’amoni’ö fabö’ö ira na mamaha’ö moroi ba Zura Ni’amoni’ö. Sindruhunia, na talafo oya öbaso ayati, tola manö olifu ira da’ö. Andrö, haogö fili ayati ni’oguna’ömö. Oguna’ö ginötö ba wombaso, ba wanutunö, ba wame’e duma-duma hegöi ba wanutunö lala wamalua ya’ia. (Nehemia 8:8) Na huhuo ni’olohesimö moroi ba zi sambua rangka, moguna öfaha’ö ndra’ugö ba rangka hegöi ba ayati ni’oguna’ö ba da’ö. Haogö botokhi ba dödömö hadia gamakhaita rangka ba ayati si no tehenaigö, ba oguna’ö ayati da’ö ba wanutunö duho siföföna moroi ba rangka andrö. (Tola ö’ila mene-mene si sökhi ba pelajaran 21 irugi 23 moroi ba mbuku Memperoleh Manfaat dari Pendidikan Sekolah Pelayanan Teokratis.) Sabölö moguna, andrö wanolo moroi khö Yehowa ba wama’ema fangera-ngerania si sökhi moroi ba Zura Ni’amoni’ö.​—Baso Gesera 7:10; Gamaedola 3:13, 14.

13. (a) Hewisa wa möi fanolo dalifusöda ira alawe ayati nirongonia ba gangowuloa? (b) Hadia mbuania khöu me mu’oguna’ö Zura Ni’amoni’ö ba gangowuloa?

¹³ Oya zi lö sökhi salua khö zi samösa dalifusöda ira alawe si toröi ba Australia me ide-ide ia. Hewa’ae no tobali ia  Samaduhu’ö Yehowa, lö faduhu dödönia wa i’omasi’ö ia Yehowa. Ba gangowuloa, irongo sambua ayati si tofakha ba dödönia. I’angerönusi da’ö ba ifalua riset irege oya ayati tanö bö’ö nibasonia ba Zura Ni’amoni’ö. Ba gafuriata, faduhu dödönia wa i’omasi’ö ia Yehowa. * (Faigi nisura ba gahe zura.) Hadia so ayati si no irai örongo si tofakha ba dödömö me ö’ondrasi gangowuloa, kebaktian wilayah mazui kebaktian regional?​—Nehemia 8:12.

14. Hewisa wangoroma’öda fo’ame’egö tödö hegöi fa’omasida ba Daromali Yehowa?

¹⁴ Ta’andrö saohagölö khö Yehowa me no ibe’e khöda Daromalinia, Sura Ni’amoni’ö. Ifabu’u wa lö tebulö da’ö, ba hasambalö ifalua hadia nifabu’unia. (I Fetero 1:24, 25) Andrö, omasi ita tatatugöi ginötöda ba wombaso Sura Ni’amoni’ö, tafalua ia ba wa’aurida, ba ta’oguna’ö da’ö ba wanolo niha bö’ö. Na tafalua da’a, no taforoma’ö wa sindruhu-ndruhu ta’omasi’ö ba ta’ame’egö tödö mbuala andre hegöi Samazökhi ya’ia, Lowalangi Yehowa.