1. Hewisa dödö Yehowa ba niha sangide-ngideʼö? Tutunö.

IʼOMASIʼÖ Yehowa niha sangide-ngideʼö. Ha niha sangide-ngideʼö soroi ba dödö si tola fahuwu khönia. Hizaʼi, ”iʼaröuʼö ia moroi ba niha sasiliyawa”. (Zin. 138:6, NW) Tatu, fefu ita omasi taʼomusoiʼö dödö Yehowa ba iʼomasiʼö göi ita. Börö daʼö, dataforege wangokhögö fangide-ngideʼö.

2. Hadia nitutunöda ba wamahaʼö daʼa?

² Ba wamahaʼö daʼa, tabeʼe wanema li ba zi tölu wanofu andre: (1) Hadia wangide-ngideʼö andrö? (2) Hana wa moguna taforege wangokhögö fangide-ngideʼö? (3) Ba ginötö hadia manö abua khöda wangoromaʼö fangide-ngideʼö? Ba wamahaʼö daʼa dania, tafahaʼö ita wa möi fangomusoiʼö dödö Yehowa na so khöda wangide-ngideʼö ba oya mbuania khöda.​—Gamd. 27:11; Yes. 48:17.

3. Hadia wangide-ngideʼö andrö?

³ Lö hadöi ba dödö niha sangide-ngideʼö wa abölö tohude ia moroi ba niha böʼö, ba lö khönia faʼasiliyawa. Itutunö Zura Niʼamoniʼö wa niha sangide-ngideʼö aboto ba dödönia wa abölö alawa Yehowa moroi khönia. Aboto göi ba dödönia wa abölö tohude niha böʼö moroi khönia.​—Fil. 2:3, 4.

4-5. So niha na mufaigi iʼokhögö wangide-ngideʼö. Hadia daʼö geluahania sindruhu-ndruhu iʼokhögö wangide-ngideʼö?

⁴ So ösa niha na mufaigi iʼokhögö wangide-ngideʼö, hizaʼi sindruhunia löʼö. Tola manö yaʼira niha si lö hede-hede mazui niha saila sibai. Mazui lafosumange niha böʼö, ba sökhi lagura na mohede börö me daʼö nifahaʼö zatuara khöra. Hizaʼi  sindruhunia, tola manö so bakha ba dödöra waʼasiliyawa. Alio ara, hasambalö oroma hadia zi so ba dödöra.​—Luk. 6:45.

⁵ Tanö böʼönia, so niha abölö ifaduhusi tödö ia samösa mazui barani ia wamaʼema mbua wangera-ngerania, hizaʼi tenga daʼö geluahania wa yaʼia niha sasiliyawa. (Yoh. 1:46, 47) Hewaʼae simanö, niha simane daʼö moguna mangelama enaʼö lö iʼodaligö waʼatua-tuania samösa. Gofu hewisa gamuatada, fefu ita moguna taforege enaʼö sindruhu-ndruhu mangide-ngideʼö ita.

6. Moloʼö 1 Korindro 15:10, hadia wamahaʼö nihalöda moroi ba duma-duma Waulo?

⁶ Angeragö duma-duma zinenge sotöi Faulo. Asese iʼogunaʼö ia Yehowa ba wamasindro banua niha Keriso ba mbanua misa. Ba wanuriaigönia, tola manö abölö oya mbanua si no iʼanöröi moroi khö ndra sinenge Yesu tanö böʼö. Hizaʼi, lö hadöi ba wangera-ngera Faulo wa abölö sökhi ia moroi khöra. Si fao fangide-ngideʼö imane Faulo, ”Yaʼo zinenge fondrege zide-ide, ba tenga sinangea lafotöi ndraʼo sinenge börö me no ufakao mböröta mbanua niha Keriso khö Lowalangi.” (1 Kor. 15:9) Aefa daʼö iwaʼö nasa Waulo, sambua mbörö wa tola iʼokhögö wahuwusa si sökhi khö Yehowa börö me iforomaʼö khönia Yehowa waʼahakhö dödö sebua, tenga börö me tohude ia mazui no mofozu ba wamalua hadia ia. (Baso 1 Korindro 15:10.) Fehede nisura Waulo ba zurania ba mbanua niha Keriso ba Gorindro, sangoromaʼö wa mangide-ngideʼö Faulo. Me götö daʼö, so ösa niha ba mbanua niha Keriso ba Gorindro si fadaʼawa khö Waulo, hizaʼi me ibeʼe fanema li, lö ihöni-höni waʼamofozu si no ifalua!​—2 Kor. 10:10.

7. Hewisa zi samösa dalifusöda ba wangoromaʼö fangide-ngideʼö?

⁷ Ato nono mbanua Yehowa, teʼabölöʼö ira moroi ba waö-waö waʼauri dalifusöda Karl F. Klein, si no irai tobali samösa Boto Solohe.  Ba waö-waö waʼaurinia, si fao fangide-ngideʼö ifaduhuʼö talifusöda Klein wa no irai itaögö ngawalö wanandraigö ba zi hauga fakhe. Duma-dumania, me döfi 1920-an, abua sibai khönia me awena manuriaigö ba nomo-omo misa. Börö me irasoi wa abua sibai wamalua yaʼia, lö ifalua saʼae halöwö daʼö mato dua fakhe. Ba gafuriata, me mohalöwö ia ba Mbetieli, so samösa dalifusöda zameʼe khönia mene-mene, ba ilau mofönu khö dalifusöda daʼö. Aefa daʼö göi, börö me oya sibai niʼera-erania awö niʼaombösinia tödö, andrö wa fawuka wangera-ngerania. Hizaʼi ba gafuriata tola ilawa daʼö. Ba oya göi halöwö si tohude nitemania si möi faʼomuso dödö. Hewaʼae ato niha zangila dalifusöda Klein, omasi ia ba wamatunö fefu zoʼamböta ia. Daʼa zangoromaʼö wa sindruhu-ndruhu iʼokhögö fangide-ngideʼö! Ato ndra talifusö somasi ba wanörö tödö salua khö dalifusöda Klien hegöi ba wombaso waö-waö waʼaurinia. *

8. Hewisa 1 Fetero 5:6 möi fanoloda enaʼö aboto ba dödöda wa fangide-ngideʼö möi fangomusoiʼö dödö Yehowa?

⁸ Sambua mbörö wa moguna taʼokhögö wangide-ngideʼö börö me daʼö möi fangomusoiʼö dödö Yehowa. No irai itutunö daʼa Fetero. (Baso 1 Fetero 5:6.) Ba mbuku ”Mari Jadilah Pengikutku” itutunö wehede Fetero. Imane ba mbuku daʼö, ”Faʼasiliyawa muʼamaedolagö ia simane langu. Lua-luania möi famakiko. Niha fondrege satua-tua manö tola ibeʼe lö moguna khö Lowalangi. Hizaʼi, na so wangide-ngideʼö tola ibeʼe niha fondrege zide-ide moguna khö Yehowa. . . . omuso dödönia ba wamahowuʼö yaʼugö börö wangide-ngideʼö niʼokhögömö.” * Sabölö sökhi si tola tafalua yaʼia daʼö na taʼomusoiʼö dödö Yehowa!​—Gamd. 23:15.

9. Hana wa omasi ahatö khöda niha na so wangide-ngideʼö?

⁹ Na taforege wangokhögö fangide-ngideʼö, tenga ha möi fangomusoiʼö dödö Yehowa daʼö, hizaʼi tatema göi mbuania. Na mangide-ngideʼö ita, omasi niha ahatö khöda. Hadia mbörö? Angeragö atö, niha simane hewisa zomasi ndraʼugö. (Mat. 7:12) Tatu, lö omasi ita fahuwu ba niha si fatandro ba khönia samösa hegöi si lö omasi mamondrongo mbua wangera-ngera niha böʼö. Hizaʼi, omasi ita na ndra talifusöda si sara lala wamati laforomaʼö wa ’larasoi zafökhö khö nawöra, faoma laʼomasiʼö nawöra simane ösi nomora, so waʼahakhö dödö, ba lö fayawa’. (1 Fet. 3:8)  Tatu, omuso dödöda na ahatö ita ba niha sangide-ngideʼö. Simane göi niha böʼö, omasi ira fahuwu khöda na so khöda wangide-ngideʼö.

10. Hana wa itugu aoha ba niha sangide-ngideʼö wanemaʼö gabula dödö ba waʼauri?

¹⁰ Na so khöda wangide-ngideʼö, itugu aoha khöda wanemaʼö ngawalö hadia ia zi lö mameʼe omuso dödöda. Itaria, taʼila alua ba niha böʼö zi lö atulö. Mazui, yaʼita samösa zanaögö simane daʼö. Tefaudu daʼa simane niwaʼö niha satua-tua sotöi Razo Selomo, imane, ”Ba hulu kudo uʼila zawuyu, ba mowaö-waö zalawa, simane sawuyu.” (Zango. 10:7) Itaria, lö lasuno niha sabölö onekhe, hizaʼi abölö lasuno ba lafosumange niha sambö onekhe. Hewaʼae simanö, iwaʼö Razo Selomo wa moguna tatema hadia zalua ba waʼauri, ba böi talafo taʼera-era sibai ngawalö zi lö sökhi salua ba waʼaurida. (Zango. 6:9) Na so khöda wangide-ngideʼö, itugu aoha khöda ba wanemaʼö ngawalö hadia ia zi lö mameʼe omuso dödöda.

11. Hadia zinangea tafalua ba ginötö labeʼe khöda mene-mene?

¹¹ Ero maʼökhö, oya ginötö si tola taʼogunaʼö ba wangoromaʼö fangide-ngideʼö. Nehegö ösa zalua andre. Ba ginötö tatema mene-mene. Moguna tatörö tödöda, na so zi samösa niha soʼamenesi yaʼita, tola manö börö me lö taʼila wa no tafalua zala sebua. Ba ginötö labeʼe khöda mene-mene, tola manö taʼanemaiʼö tatimbagö mene-mene daʼö. Tola manö taʼalu-alui zala niha soʼamenesi yaʼita, mazui lö fao dödöda ba lalania wameʼe mene-mene. Hizaʼi, na so khöda wangide-ngideʼö, tatu taforege ba wanemaʼö mene-mene nibeʼe khöda.

12. Moloʼö Gamaedola 27:5, 6, hana wa taʼandrö sibai saohagölö na so zoʼamenesi yaʼita? Beʼe duma-duma.

¹² Na so khöda wangide-ngideʼö, tatu taʼandrö sibai saohagölö ba ginötö labeʼe khöda mene-mene. Muʼamaedolagö ia simane daʼa: Angeragö wa so ndraʼugö ba gangowuloa. Me no aefa fahuhuoʼö khö ndra talifusö ba gangowuloa, so samösa moroi ba gotaluara zolohe yaʼugö ba nahia zi lö lafondrondrongo niha böʼö, ba iwaʼö khöu wa so laengua ba nifömö. Hewaʼae aila sibai ndraʼugö, tatu öʼandrö sibai saohagölö börö me no ifatunö khöu. Tatu ötötöna menaʼö, na so samösa niha zamatunö khömö iʼotarai mege! Simane daʼö göi, na so samösa dalifusöda si sara lala wamati soʼamenesi yaʼita na inötö moguna khöda, moguna so khöda wangide-ngideʼö ba taʼandrö saohagölö ba zi no ifalua. Datafaigi ia simane awöda, tenga nududa.​—Baso Gamaedola 27:5, 6; Gal. 4:16.

13. Hewisa wangoromaʼöda fangide-ngideʼö ba ginötö tebeʼe ba niha böʼö noro dödö ba mbanua niha Keriso?

 ¹³ Ba ginötö itema zi samösa niha noro dödö ba mbanua niha Keriso. Ifaduhuʼö samösa zatua sokubaloi sotöi Jason, imane, ”Ba ginötö tebeʼe ba niha böʼö noro dödö ba mbanua niha Keriso, itaria manofu-nofu ndraʼo, hana wa tenga yaʼo nifilira.” Hadia no irai örasoi simane daʼö? Atulö sa, wa lö fasala na ’taʼodödögö’ ba wanöndra noro dödö ba mbanua niha Keriso. (1 Tim. 3:1) Hizaʼi, moguna mangelama ita sanandrösa ba niʼera-erada. Na lö mangelama ita, tola ibörögö so khöda waʼasiliyawa ba dödöda. Duma-dumania, samösa ndra matua niha Keriso, tola ibörögö so ba wangera-ngerania wa sinangea ia manema halöwö daʼö ba gangowuloa. Mazui, samösa woʼomo ira alawe niha Keriso, tola manö so ba wangera-ngerania, ’Abölö sinangea woʼomogu moroi khö dalifusöda daʼö!’ Na so khöda wangide-ngideʼö, lö irai so ba wangera-ngerada simane daʼö.

14. Hadia wamahaʼö si tola tahalö ba duma-duma Moze me tebeʼe ba niha böʼö noro dödö?

¹⁴ Tola tafahaʼö ita ba duma-duma Moze me tebeʼe ba niha böʼö noro dödö. Lö iʼaohasi ba dödö halöwö nibeʼe khönia ba wondröniaʼö iraono Gizaraʼeli. Hewisa dödö Moze me ibeʼe Yehowa ba niha böʼö halöwö nifaluania? Lö khönia waʼafökhö dödö. (4 Moz. 11:24-29) So khönia wangide-ngideʼö, ba itehegö niha böʼö ba wanolo yaʼia tobali sangetuʼö huku ba ndraono Gizaraʼeli. (2 Moz. 18:13-24) Börö me so ösa zi tobali sangetuʼö huku, lö moguna ara labaloi ndraono Gizaraʼeli na laʼandrö tolo khö zi samösa sangetuʼö huku. Ba wamaigi Moze, abölö iʼameʼegö tödö ba wanolo niha böʼö moroi ba noro dödö nitemania. Sindruhu-ndruhu no duma-duma si sökhi daʼa khöda! Moguna tatörö tödöda wa iʼogunaʼö ita Yehowa tenga sibai börö waʼonekhe niʼokhögöda. Ba wamaigi Yehowa, wangokhögö fangide-ngideʼö daʼö zabölö moguna. ”Hewaʼae molakhömi Yehowa, inehegö niha sangide-ngideʼö.”​—Zin. 138:6, NW.

15. Hadia manö fombulöʼö zalua khö ndra talifusöda?

 ¹⁵ Ba ginötö alua khöda waʼatebulö. Ba zi hauga fakhe safuria andre, ato ndra talifusöda si no ngafulu fakhe ba wangai halöwö khö Yehowa tebulö halöwö nitemara. Duma-dumania me döfi 2014, no itatugöi organisasi wa lö hadöi saʼae pengawas distrik. Ira pengawas distrik hegöi foʼomora, tebeʼe khöra halöwö tanö böʼö. Ba ndröfi daʼö göi, no itatugöi organisasi wa na no irugi 70 fakhe waʼalawa ndröfi zi samösa pengawas distrik, lö saʼae tobali ia pengawas distrik. Ba tebai saʼae si samösa niha tobali sondröniaʼö boto zatua sokubaloi na no 80 fakhe waʼalawa ndröfinia. Baero daʼö nasa, ba zi hauga fakhe safuria andre, ato nösi nomo Mbetieli nifatenge tobali perintis. So göi zondröi halöwö safönu inötö börö wökhö, noro dödöra ba nösi nomora, mazui tanö böʼönia.

16. Hewisa ndra talifusöda ba wangoromaʼö fangide-ngideʼö ba zawena alua khöra?

¹⁶ Tola manö abua khö ndra talifusö ba wanemaʼö faʼatebulö andre. Daʼa zangoromaʼö wa laʼomasiʼö halöwö nifaluara me mböröta, si no lafalua ba zi hauga fakhe. So ösa ”zabu tödö” börö me laröi halöwöra, ba lö tola löʼö lafaudugö waʼaurira ba zi bohou alua khöra. Hizaʼi, ba gafuriata tola lafaudugö waʼaurira. Hadia mbörö? Börö me abölö laʼomasiʼö Yehowa. Aboto ba dödöra wa no lalulu waʼaurira khö Yehowa, tenga ba halöwö mazui ba noro dödö nibeʼe khöra. (Kol. 3:23) Omasi ira ba wangai halöwö khö Yehowa si fao fangide-ngideʼö gofu hadia halöwö nibeʼe khöra. ’Latouʼö ba dangania na so zabu dödöra’ börö me aboto ba dödöra wa iʼameʼegö tödö ira.​—1 Fet. 5:6, 7.

17. Hana wa taʼandrö sibai saohagölö me ifarou ita Zura Niʼamoniʼö enaʼö taforege wangokhögö fangide-ngideʼö?

¹⁷ Taʼandrö sibai saohagölö börö me ifarou ita Zura Niʼamoniʼö enaʼö taforege wangokhögö fangide-ngideʼö. Na so khöda wangide-ngideʼö, so gunania khöda hegöi ba niha böʼö. Tola göi itugu aoha khöda ba wanemaʼö gabula dödö. Sabölö moguna, tola itugu fahuwu ita khö Namada si so ba zorugo. Omuso sibai dödöda hewaʼae yaʼia Lowalangi Fondrege Zalawa, iʼomasiʼö ita ba iʼameʼegö tödö genoninia sangide-ngideʼö!​—Yes. 57:15.