1. Moloʼö Mataiʼo 11:28-30, hadia nifabuʼu Yesu?

NO IRAI ibeʼe Yesu mbuʼusa li sahöli-höli dödö ba niha sato samondrongo yaʼia. Imane, ”Miʼaine khögu . . . ba ufolombase ami.” (Baso Mataiʼo 11:28-30.) Daʼa tenga mbuʼusa li faya-faya. Duma-dumania, angeragö hadia zi no ifalua khö zi samösa ira alawe sofökhö sabölö-bölö.

2. Hadia nifalua Yesu khö zi samösa ira alawe sofökhö?

² Sindruhu-ndruhu moguna sibai mutolo ndra alawe andrö. No oya doto zi möi ia ba wamadöhö wökhönia. Hizaʼi, lö manö döhö hewaʼae no 12 fakhe ia ba wökhö. Moloʼö Goroisa, yaʼia niha si raʼiö. (3 Moz. 15:25) Irongo wa tola ifadöhö niha sofökhö Yesu. Andrö wa möi ia ba wangalui Yesu. Ba me no iʼila, igogohe gahe mbaru Yesu ba iʼanemaiʼö döhö ia! Hizaʼi, tenga ha wökhönia nifadöhö Yesu, irasoi wa iʼomasiʼö ba ifosumange ia Yesu. Duma-dumania, me fahuhuo Yesu, ikaoni khö ndra alawe andrö faoma fehede ”onogu”. Tatu manö möi fangokafu dödönia daʼö ba teʼabölöʼö ia!​—Luk. 8:43-48.

3. Hadia wanofu-nofu nitutunöda?

³ Nehegö wa ifalua wamorege ira alawe andrö ba weʼamöi khö Yesu. Iadaʼa, moguna göi tafalua simane daʼö. Moguna taforege ba weʼamöi khö Yesu. Ba ginötö iadaʼa, lö ifalua Yesu tandra sahöli-höli dödö ba wamadöhö wökhö niha si möi khönia. Hewaʼae simanö, lö tebulö ikaoni ita Yesu, ”Miʼaine khögu . . . ba ufolombase ami.” Ba wamahaʼö daʼa tatutunö lima wanofu: Hewisa weʼamöida khö Yesu? Hadia geluahania me imane Yesu, ”Mihareʼö khömi kalo mbagi andrö khögu”? Hadia wamahaʼö nihalöda moroi khö Yesu? Hana wa möi fangokafu dödöda halöwö nibeʼe Yesu? Ba hewisa enaʼö lö tebulö möi fangokafu dödöda kalo mbagi Yesu?

4-5. Hadia manö lala si tola tafalua ba weʼamöi khö Yesu?

⁴ Sambua lala weʼamöida khö Yesu, yaʼia daʼö moguna tahaogö tafahaʼö ita enaʼö oya niʼilada sanandrösa ba niwaʼö Yesu hegöi nifaluania. (Luk. 1:1-4) Lö hadöi niha böʼö si tola mamalua daʼa khöda. Moguna tafahaʼö ita samösa hadia niwaʼö Zura Niʼamoniʼö sanandrösa khö Yesu. No göi möi ita khö Yesu na tahalö gangetula tebayagö ita idanö ba tobali nifahaʼö Keriso.

⁵ Lala tanö böʼö ba weʼamöi khö Yesu yaʼia daʼö na taʼandrö tolo khö ndra satua sokubaloi. Iʼogunaʼö Yesu ”buala ba niha” ba wondrorogö mbiri-birinia. (Ef. 4:7, 8, 11; Yoh. 21:16; 1 Fet. 5:1-3) Moguna yaʼita samösa zamorege ba wangandrö tolo khöra. Tebai tatötöna wa laʼila ira satua sokubaloi hadia niʼera-erada hegöi soguna khöda. Imane samösa dalifusöda ira matua sotöi Julian, ”Lö tola löʼö uheta ndraʼo moroi ba Mbetieli börö wökhögu. Ba so samösa nawögu ifarou ndraʼo enaʼö uʼandrö khö ndra satua sokubaloi enaʼö lakubaloi ndraʼo. Ba wamobörö, so ba wangera-ngeragu wa lö moguna khögu daʼö. Hizaʼi, ba gafuriata uʼandrö khö ndra satua sokubaloi enaʼö lakubaloi ndraʼo. Feʼamöira ba wokubaloi ndraʼo no buala si sökhi khögu.” Ira satua sokubaloi si lö faröi, simane ira zatua sokubaloi si darua samalukhaisi Julian, tola tobali fanolo khöda ba wangiʼila lala ”wangera-ngera Keriso”, eluahania aboto ba dödöda ba taʼoʼö lala wangera-ngerania hegöi nifaluania. (1 Kor. 2:16; 1 Fet. 2:21) Fanolo simane daʼö, no sindruhu-ndruhu buala si sökhi nibeʼera khöda.

6. Hadia geluahania me imane Yesu, ”Mihareʼö khömi kalo mbagi andrö khögu”?

⁶ Me imane Yesu, ”Mihareʼö khömi kalo mbagi andrö khögu,” tola manö geluaha niwaʼö Yesu enaʼö tafondrondrongo ia ba taʼoʼö wanuturu lala nibeʼenia. Mazui eluaha niwaʼönia wa fao ita khö Yesu ba wohareʼö kalo mbagi, ba falulu fohalöwö ita khönia hegöi khö Yehowa. Gofu hadia geluaha niwaʼö Yesu, fehedenia zangoromaʼö wa so halöwö zinangea tafalua.

7. Moloʼö Mataiʼo 28:18-20, hadia halöwö nibeʼe khöda, ba hadia nifaduhusida tödö?

⁷ No tatema wogaoni andrö moroi khö Yesu, me talulu waʼaurida khö Yehowa ba tebayagö ita idanö. Fogaoni nibeʼe Yesu moguna ia ba niha fefu. Lö irai itimbagö Yesu niha somasi mamosumange Lowalangi soroi ba dödö. (Yoh. 6:37, 38) No tebeʼe döi si sökhi ba niha soloʼö Keriso ba wamalua halöwö nibeʼe Yehowa khö Yesu. Tola faduhu dödöda wa lö tebulö fao khöda Yesu ba ituhini ita wamalua halöwö daʼa.​—Baso Mataiʼo 28:18-20.

8-9. Hana wa niha sangide-ngideʼö omasi ira ahatö khö Yesu, ba hadia wanofu-nofu sinangea tasofu khöda samösa?

⁸ Niha sangokhögö fangide-ngideʼö omasi ira ahatö khö Yesu. (Mat. 19:13, 14; Luk. 7:37, 38) Hadia mbörö? Nehegö gamaehuta Yesu ba niha Farizaiʼo. Ira sondröniaʼö ba agama andrö so khöra waʼasiliyawa ba lö khöra faʼomasi. (Mat. 12:9-14) Na Yesu so khönia wangide-ngideʼö ba faʼomasi. Omasi niha Farizaiʼo na laʼila ira niha sato ba lafosumange ira niha. Hizaʼi iwaʼö Yesu khö ndra nifahaʼönia wa tebai lafalua simane daʼö. Ifahaʼö ira Yesu, enaʼö so khöra wangide-ngideʼö ba tobali ira enoni khö nawöra. (Mat. 23:2, 6-11) Niha soloʼö khö Warizaiʼo, moguna laʼoʼö hadia niwaʼöra börö me ataʼu ira na lahuku. (Yoh. 9:13, 22) Hizaʼi, niha sahatö khö Yesu larasoi waʼokafu dödö börö me ifalua khöra Yesu waʼomasi ba fahuhuo ia si fao faʼasökhi dödö.

 ⁹ Hadia no öʼoʼö duma-duma Yesu? Sofu khöu samösa: ’Hadia ba wamaigi niha böʼö ndraʼo niha si lö alio mofönu ba si so fangide-ngideʼö? Hadia aoha gölögu wamalua halöwö side-ide soguna ba niha böʼö? Hadia sökhi dödögu ba niha böʼö?’

12-14. Hana wa möi fangokafu dödöda na tafalua halöwö nibeʼe Yesu?

¹² Hana wa möi fangokafu dödöda na tafalua halöwö nibeʼe Yesu? Oya zi tobali mbörönia, hizaʼi datatutunö mato hauga ngawua.

¹³ Taʼokhögö ira sondröniaʼö zabölö sökhi. Yehowa, yaʼia Sondröniaʼö Fondrege Zalawa khöda, tenga sondröniaʼö si lö sökhi ia mazui si lö mangila mangandrö saohagölö. Iʼameʼegö tödö sibai halöwö nifaluada. (Heb. 6:10) Ibeʼe göi khöda waʼabölö ba wamalua halöwö nibeʼenia khöda. (2 Kor. 4:7; Gal. 6:5, nis.) Yesu, Razoda, no ibeʼe khöda duma-duma soʼahonoa hewisa zinangeania gamuatada ba niha böʼö. (Yoh. 13:15) Ba ginötö lakubaloi ita, laforege ira satua sokubaloi ba woloʼö Yesu, ”kubalo sebua” khöda. (Heb. 13:20; 1 Fet. 5:2) Ba ginötö lafahaʼö ba lalumöʼö ita, laforege ira satua sokubaloi ba wangoromaʼö faʼasökhi dödö, famarou dödö, hegöi faʼabarani.

¹⁴ Taʼokhögö si fahuwu si sökhi. Lö laʼokhögö niha böʼö si fahuwu safönu faʼomasi hegöi halöwö sabölö moguna simane niʼokhögöda. Angeragö daʼa: Fariawö ita ba niha sangokhögö amuata sabölö sökhi, ba lö irai so ba wangera-ngerara wa abölö sökhi ira moroi ba niha böʼö. Hewaʼae oya nekhe-nekhe danga niʼilara, lafaduhuʼö wa moʼamböta göi ira. Ba wamaigira, abölö alawa niha böʼö moroi khöra. Aefa daʼö, ba wamaigira yaʼita tenga ha awöra falulu fohalöwö, hizaʼi si fahuwu khöra. Ba laʼomasiʼö sibai ita irege latehegö mate ira khöda!

15. Hewisa zinangeania dödöda ba halöwö nifaluada?

¹⁵ Taʼokhögö halöwö si sökhi. Tafahaʼö zindruhu ba niha böʼö sanandrösa khö Yehowa, ba tafatunö ba niha walimosa Gafökha. (Yoh. 8:44) Ilimo niha Satana irege larasoi wa abua sibai noro dödö nitaögöra ba aetu wanötönara. Duma-dumania, omasi ia na faduhu dödöra wa lö iʼefaʼö zalara Lowalangi ba tenga sinangea lahakhösi tödö ira. Daʼö no walimosa sebua, irege so waʼide-ide dödö ba niha! Na taʼondrasi Keriso, teʼefaʼö horöda. Ba sindruhunia, fefu ita iʼomasiʼö sibai Yehowa. (Rom. 8:32, 38, 39) Tatu omuso dödöda börö me tola tatolo niha böʼö ba wangodaligö Yehowa. Ba omuso göi dödöda ba ginötö taʼila wa itugö sökhi waʼaurira me no lafahaʼö ira ba zindruhu!

16. Hadia gamaehuta halöwö nibeʼe Yesu ba halöwö tanö böʼö nifaluada?

¹⁶ Halöwö nibeʼe Yesu khöda no faböʼö moroi ba halöwö tanö böʼö nifaluada. Duma-dumania, na mohalöwö niha ba zi maʼö-maʼökhö, ato niha tenga ha faʼerege dödö nirasoira, larasoi göi wa lö khöra faʼomuso dödö. Hizaʼi, na arörö ita maʼö-maʼökhö ba wamalua halöwö nibeʼe Yehowa hegöi Keriso, tarasoi wa sindruhu-ndruhu so khöda waʼomuso dödö. Tola manö tarasoi waʼerege dödö na mohalöwö ita maʼö-maʼökhö, ba tafaso weʼamöi ba gangowuloa. Hizaʼi, si toʼölönia, na no aefa gangowuloa, möi fangokafu dödöda daʼö ba ifuli zui tefarou dödöda. Daʼö göi nirasoida ba ginötö taforege weʼamöi manuriaigö hegöi famahaʼö samösa. Ebua sibai howu-howu nitemada moroi ba wamorege nifaluada!

17. Hadia zinangea tatimbagö, ba hadia zinangea tahaogö taʼangeragö?

¹⁷ Moguna aboto ba dödöda wa so ndrohu-ndrohu waʼabölöda. Tobali, moguna tahaogö taʼangeragö wangogunaʼö yaʼia. Duma-dumania, na lö mangelama ita, tola manö tahorigö waʼabölöda ba wangowuloi harato. No irai manofu samösa nono matua si kayo khö Yesu, imane, ”Hadia zinangea ufalua enaʼö usöndra waʼauri si lö aetu?” No iʼoʼö nono matua andrö niwaʼö ba Goroisa. Tatu manö yaʼia niha si sökhi, börö me isura Injil Mareko wa ”ifaigi ia Yesu si fao faʼahakhö dödö”. Iʼandrö khönia Yesu, ”Famawa haratomö . . . Aefa daʼö, aine oʼö ndraʼo.” Sindruhunia, omasi nono matua daʼö tobali soloʼö khö Yesu, hizaʼi abua khönia ba wondröi haratonia börö me ”ebua haratonia”. (Mrk. 10:17-22) Lua-luania, itimbagö kalo mbagi Yesu ba tobali ia ”sawuyu Ganaʼa”. (Mat. 6:24) Na yaʼugö tobali ira matua daʼö, hadia nifilimö?

18. Hadia zinangea tafalua ero inötö, ba hadia mbörö?

¹⁸ Ero inötö moguna taʼangeragö hadia zabölö moguna ba waʼaurida. Hadia mbörö? Enaʼö tola tahaogö tatatugöi wangogunaʼö faʼabölöda. Imane samösa dalifusöda ono matua sotöi Mark, ”Ba zi hauga fakhe, uwai no öna-öna sibai waʼaurigu. Hewaʼae merintis ndraʼo, lö tebulö uʼangeragö gefe ba hewisa lalagu enaʼö itugu sana waʼaurigu. Manofu-nofu dödögu hana wa hulö abua sibai waʼaurigu. Awena aboto ba dödögu börö me abölö uʼofönaiʼö soguna khögu samösa. Nibeʼegu khö Yehowa ha föfö zi toröi ginötögu ba faʼabölögu.” Ibulöʼö lala wangera-ngerania Mark hegöi lala waʼaurinia enaʼö tola itugu idouʼö ba wangai halöwö khö Yehowa. Imane nasa Mark, ”Itaria so khögu waʼaombö dödö na lö gefegu, hizaʼi börö wanolo Yehowa hegöi fotuhini moroi khö Yesu, tola uʼasiwai ia.”

19. Hana wa moguna taʼokhögö lala wangera-ngera satulö?

¹⁹ Lö tebulö tasöndra fangokafu dödö barö kalo mbagi Yesu na tafalua zi tölu ngawalö. Si oföna, böi tebulö ba wangokhögö lala wangera-ngera satulö. Börö me halöwö Yehowa nifaluada, moguna tafalua ia ba zomasi Yehowa. Yaʼita zohalöwö, ba Yehowa Zokhö yaʼita. (Luk. 17:10) Na tafalua halöwö daʼa moloʼö lala wangera-ngerada, tola abua khöda wamalua yaʼia börö me talawa kalo mbagi Yesu. Hewaʼae abölö zi sageu sawi si matua, tola mesokho ia mazui marase na iʼoʼö zomasi ia, ba ilawa kalo mbagi nifatörö zokhö yaʼia. Hizaʼi, na taʼoʼö wanuturu lala nibeʼe Yehowa tola tataögö ngawalö gabula dödö, ba tola tafalua ngawalö si tebai tafalua ba wamaigida. Böi olifu ita, wa lö hadöi zi tola manaha gohitö dödö Yehowa enaʼö alua!​—Rom. 8:31; 1 Yoh. 4:4.

20. Hadia zinangeania ohitö dödöda ba ginötö tahareʼö khöda kalo mbagi Yesu?

²⁰ Si dua, famalua halöwö si fao gohitö  dödö satulö. Omasi tahareʼö khöda kalo mbagi Yesu, börö me omasi tafolakhömi Namada sebua faʼomasi, Yehowa. Me abad siföföna, so zomasi ba woloʼö Yesu börö me laʼalui tana khöra mazui ba wanöndra hare. Ba gafuriata lö khöra waʼomuso dödö ba laröi kalo mbagi Yesu. (Yoh. 6:25-27, 51, 60, 66; Fil. 3:18, 19) Hizaʼi, so niha soloʼö khö Yesu börö me sindruhu-ndruhu ohitö dödöra ba wangomasiʼö Yehowa hegöi awöra niha. Buania, so khöra waʼomuso dödö ba ginötö lahareʼö khöra kalo mbagi Yesu sagötö auri ira ba gulidanö, si fao ba wombaloi fanötönara wefao khö Yesu wangai halöwö ba zorugo. Simane yaʼira, lö tebulö taʼokhögö waʼomuso dödö na atulö gohitö dödöda ba ginötö tahareʼö khöda kalo mbagi Yesu.

21. Moloʼö Mataiʼo 6:31-33, hadia nifaduhusida tödö si tola ifalua Yehowa?

²¹ Si tölu, yafaduhu dödömö wa itolo ndraʼugö Yehowa. Ba ginötö tafili wa tahareʼö khöda kalo mbagi Yesu, no taʼila wa moguna tatehegö hadia zi so khöda ba taforege ba wohalöwö. No göi ifangelama ita Yesu wa hasambalö lafakao ita. Hizaʼi, faduhu dödöda wa ibeʼe khöda Yehowa waʼabölö ba wanaögö fanandraigö. Na lö tebulö so khöda waʼanau gölö, itugu so khöda waʼabölö. (Yak. 1:2-4) Tola göi faduhu dödöda wa hasambalö ibönökhi zoguna khöda Yehowa, ikubaloi ita Yesu, ba laʼabölöʼö ita ira talifusöda. (Baso Mataiʼo 6:31-33; Yoh. 10:14; 1 Tes. 5:11) Tola anau gölöda börö wanolo nibeʼera!

22. Hadia zameʼe omuso dödöda?

²² Me ifadöhö Yesu ira alawe sofökhö no mege, irasoi möi fangokafu dödönia ba teʼabölöʼö ia. Hizaʼi, tola irasoi fangokafu dödö sagötö faʼara na lö faröi ia tobali nifahaʼö Keriso. Moloʼö yaʼugö hadia ifalua daʼö? Na ifili ba wohareʼö khönia kalo mbagi Yesu, khalaigö hadia howu-howu nitemania. Tola fao ia khö Yesu ba wangai halöwö ba zorugo! Gofu hadia ia zi no itehegö ba woloʼö Keriso, tebai mufagölösi ia faoma howu-howu daʼö. Gofu hadia wanötönada, he auri ita ba zorugo sagötö faʼara mazui ba gulidanö, tatu omuso dödöda börö me no tatema wogaoni moroi khö Yesu, ”Miʼaine khögu!”