1-2. (a) Hana wa no turia somuso dödö ba niha Hamagedo? (b) Hadia manö wanofu-nofu nitutunöda ba wamahaʼö daʼa?

ATO niha si faduhu tödö wa ulidanö daʼa tefakiko börö wasuwöta nuklir mazui bencana alam sabölö-bölö. Hizaʼi, tenga daʼö nifahaʼö Zura Niʼamoniʼö. Ifahaʼö ita Zura Niʼamoniʼö wa lö ara tö, alua sambua wasuwöta sangaʼasogö oya howu-howu. Lafotöi wasuwöta andrö yaʼia daʼö Hamagedo, ba hadia nifatunö Zura Niʼamoniʼö sanandrösa ba wasuwöta andrö no turia somuso dödö khöda sameʼe faʼowua-wua dödö! (Fam. 1:3) Lö tekiko niha dania ba wasuwöta Hamagedo, hizaʼi möi folumöʼöra! Hewisa lalania?

² Itutunö Sura Niʼamoniʼö wa telumöʼö dania niha ba ginötö wasuwöta Hamagedo, börö me fasuwöta daʼö dania ifakiko wamatörö niha gulidanö, niha si lö sökhi, hegöi ba wolumöʼö ulidanö moroi ba waʼatekiko. (Fam. 11:18) Enaʼö itugu aboto ba dödöda, tatutunö dania öfa wanofu daʼa: Hadia Hamagedo andrö? Hadia manö zalua fatua lö si tohare Hamagedo? Hewisa enaʼö teʼorifi ita ba ginötö Hamagedo? Hewisa enaʼö lö faröi ita hewaʼae na itugu ahatö Hamagedo?

3. (a) Hadia geluaha ngawua wehede ”Hamagedo”? (b) Moloʼö Famaʼeleʼö 16:14, 16, hana wa taʼila Hamagedo tenga sindruhu-ndruhu sambua nahia?

³ Baso Famaʼeleʼö 16:14, 16. Ngawua wehede ”Hamagedo” ha sakali mutötöi ia ba Zura Niʼamoniʼö, ba tehalö ia moroi ba li Heberaiʼo eluahania ”Hili Megido”. (Fam. 16:16; nis.) Megido yaʼia daʼö sambua mbanua si so me götö ndraono Gizaraʼeli me föna. (Yos. 17:11) Hizaʼi, Hamagedo andrö tenga sindruhu-ndruhu sambua nahia si so ba gulidanö. Daʼa manandrösa ia khö ”razo ba zi sagörö ulidanö” sowulo ba wolawa Yehowa.  (Fam. 16:14) Ba wamahaʼö daʼa, taʼogunaʼö göi ngawua wehede ”Hamagedo” sanandrösa ba wasuwöta si lö ara tö alua na no owulo ira razo ba zi sagörö ulidanö. Hezo tola taʼila wa Hamagedo ha amaedola zi sambua nahia? Si oföna, ba Hamagedo lö hadöi hili. Si dua, lö ebolo mbanua Megido irege tebai monaha fefu ”razo ba zi sagörö ulidanö” awö zaradadu hegöi fakake wasuwöta niʼokhögöra. Si tölu, simane nitutunöda dania ba wamahaʼö daʼa, tebörögö wasuwöta Hamagedo ba ginötö fefu ”razo” si so ba zi sagörö ulidanö, lasuwö nono mbanua Lowalangi si so ba zi sagörö ulidanö.

4. Hana wa Megido andrö ifotöi Lowalangi fasuwöta sebua safuria?

⁴ Hana wa Megido andrö ifotöi Yehowa fasuwöta sebua safuria? Ba götö Zura Niʼamoniʼö, oya wasuwöta salua ba Megido hegöi sahatö ba Daso Yezereʼeli. No mato hauga kali itolo Yehowa ono mbanuania ba wasuwöta salua ba daʼö. Duma-dumania, ”ba mbewe nidanö andrö ba Megido”, itolo Yehowa sangetuʼö huku ba ndraono Gizaraʼeli sotöi Baraki ba wokalaisi saradadu Ganaʼana nidöniaʼö Zisera. Iʼandrö saohagölö Baraki hegöi samösa ira alawe samaʼeleʼö sotöi Debora ba waʼamöna nifalua Yehowa khöra. Manunö ira, ”Moroi ba mbanua si yawa fasöndra ndröfi . . . khö Zisera andrö. No ahani ira ba mbombo Kizono andrö.”​—Zangu. 5:19-21.

5. Hadia gamaehuta wasuwöta Hamagedo faoma wasuwöta ba götö Baraki?

⁵ Sinunö niʼanunöisi Baraki hegöi Debora laʼasiwai faoma fehede, ”Simanö zinangea waʼatekiko zi faʼudu khöu fefu, yaʼugö Yehowa! Ba sangomasiʼö yaʼia, ba no hulö waʼatumbu luo, ba lakhöminia andrö.” (Zangu. 5:31) Fefu nudu Lowalangi tefakiko ba Hamagedo, ba teʼorifi niha sangomasiʼö Lowalangi. Hizaʼi, so gamaehuta wasuwöta Hamagedo faoma wasuwöta ba götö Baraki. Ba Hamagedo dania, lö fao nono mbanua Lowalangi ba wasuwöta. Ba lö göi khöra fakake wasuwöta! Hewaʼae simanö, ’ba waʼahono-hono ba ba wanötöna so waʼabeʼera’ khö Yehowa hegöi saradadu zorugonia.​—Yes. 30:15; Fam. 19:11-15.

6. Hadia manö zi tola iʼogunaʼö Yehowa ba wokalaisi nudunia ba Hamagedo?

⁶ Hewisa Lowalangi ba wokalaisi nudunia ba Hamagedo? Oya lala zi tola ifalua Yehowa. Duma-dumania, tola manö iʼogunaʼö duru danö, teu esi, hegöi gari mbanua. (Yob. 38:22, 23; Hez. 38:19-22) Tola manö göi iʼalui lala enaʼö nudunia andrö faoma lasuwö nawöra. (2 Nga. 20:17, 22, 23) Ba tola göi iʼogunaʼö malaʼikania ba wamunu niha si lö sökhi. (Yes. 37:36) Gofu hadia lala niʼogunaʼö Yehowa hasambalö yaʼia zi möna. Fefu nudunia hasambalö tefakiko ba fefu niha satulö tödö teʼorifi.​—Gamd. 3:25, 26.

7-8. (a) Moloʼö 1 Tesalonika 5:1-6, hadia angombakhata si lö toʼölö nibeʼe ira sondröniaʼö ba gulidanö? (b) Hana wa möi famaʼala gangombakhata daʼa?

⁷ Fatua lö si tohare ”ngaluo Yehowa”, so gangombakhata ”no atulö, no ahono”. (Baso 1 Tesalonika 5:1-6.) Ba 1 Tesalonika 5:2, ”ngaluo Yehowa” eluahania ’famakao sabölö-bölö’. (Fam. 7:14) Hezo tola taʼila hawaʼara tebörögö wamakao sabölö-bölö? Itutunö khöda Sura Niʼamoniʼö wa so dania angombakhata si lö toʼölö. Angombakhata daʼö dania si tobali tandra wa tebörögö wamakao sabölö-bölö.

⁸ Daʼö angombakhata ”no atulö, no ahono” si no mufaʼeleʼö. Hana wa labeʼe gangombakhata daʼö ira sondröniaʼö ba gulidanö? Hadia  fao göi ira sondröniaʼö agama? Tola manö. Gofu hewisa ia, angombakhata daʼa ha walimosa moroi ba malaʼika si lö sökhi. Hizaʼi, walimosa daʼa möi famaʼala börö me tola manö so ba wangera-ngera niha wa no so khöra waʼahono dödö, hizaʼi sindruhunia ibörögö alua wamakao sabölö-bölö si lö irai alua iʼotarai ba zilalö. Sindruhu sa, ”ba zi lö mudöna-döna hulö waʼafökhö nirasoi ndra alawe sanabina si lö aratö moʼono”. Hadia zalua ba nono mbanua Yehowa si lö faröi? Tola manö tokea ira börö me lö laʼila hawaʼara ginötö si tefaudu wa tebörögö wamakao sabölö-bölö, hizaʼi no tefaʼanö ira ba wanaögö daʼö.

9. Hadia isamuzaigö Yehowa wamakiko fefu ulidanö nifatörö Zatana? Tutunö.

⁹ Lö isamuzaigö Yehowa wamakiko fefu ulidanö nifatörö Zatana, simane nifaluania me föna ba götö Noakhi. Hizaʼi, izara-zara ba wamakiko. Si oföna, ifakiko ua Babilona Sebua yaʼia daʼö agama sofaya ba zi sagörö ulidanö. Awena ba Hamagedo dania, ifakiko nifatörö Zatana tanö böʼö simane politik, saradadu, hegöi gamawaö. Datatutunö si dombua ngawalö zalua andre.

10. Moloʼö Famaʼeleʼö 17:1, 6, hegöi 18:24, hana wa ifakiko Yehowa dania Babilona Sebua?

¹⁰ ’Fanguhuku si göna zohorö sebua.’ (Baso Famaʼeleʼö 17:1, 6; 18:24.) Tefakiko döi Lowalangi börö Babilona Sebua, duma-dumania ibeʼe wamahaʼö sofaya sanandrösa khö Lowalangi. Simane ira alawe sohorö-horö, faröi agama sofaya khö Lowalangi börö me latuhini wamatörö niha gulidanö. Ifakao nono mbanuania agama sofaya ba irabu gefera. Ba oya ndro niha si no aduwa ibeʼe, tefarahu ba daʼö do nono mbanua Lowalangi. (Fam. 19:2) Hewisa wamakiko Yehowa Babilona Sebua?

11. Hadia geluahania ”gurifö samuʼi soyo si hulö hola-hola galitö”, ba hewisa Yehowa wangogunaʼö yaʼia ba wamakiko Babilona Sebua?

¹¹ Iʼogunaʼö Yehowa dania ”tandru si fulu rozi” niʼokhögö ”gurifö samuʼi soyo si hulö hola-hola galitö” ba wamakiko ’sohorö sebua’. Niʼamaedolagö gurifö samuʼi yaʼia daʼö Perserikatan Bangsa-Bangsa. Tandru si fulu rozi  eluahania fefu gamatöröwa sotuhini organisasi daʼö. Ba ginötö si no itatugöi Lowalangi, Perserikatan Bangsa-Bangsa hegöi fefu gamatöröwa lasuwö dania Babilona Sebua. ”Lahalö fefu gokhötania, laheta nukhania” ba laforomaʼö ba niha sato wa lö sökhi Babilona Sebua. (Fam. 17:3, 16) Faʼatekiko si lö mudöna-döna daʼö, hulö ba zi sahari waʼaluania irege oi zara tokea fefu zotuhini Babilona Sebua. Lö faduhu dödöra wa alua daʼö börö me asese imane Babilona Sebua, ”Yaʼodo andre ratu, tenga lakha mbanua, ba lö irai uʼila wangabu dödö.”​—Fam. 18:7, 8.

12. Hadia zi lö itehegö Yehowa ba soi böʼö, ba hadia mbörö?

¹² Lö itehegö Lowalangi na tefakiko nono mbanuania ba danga soi böʼö. Si fao faʼomuso dödö, lö aila nono mbanua Lowalangi ba wangotöigö töi Yehowa, ba laʼoʼö niwaʼönia enaʼö aheta moroi ba Mbabilona Sebua. (Hal. 15:16, 17; Fam. 18:4) Laforege göi ba wanolo niha böʼö enaʼö aheta moroi ba Mbabilona Sebua. Daʼö mbörö wa lö göna dania ba nono mbanua Yehowa ’famakao’ nitema Mbabilona Sebua. Hizaʼi, moguna khöra wamati saro enaʼö tola lataögö hadia zalua nasa aefa daʼö.

13. (a) Haniha Gogi andrö? (b) Moloʼö Hezekieli 38:2, 8, 9, hawaʼara tebörögö wasuwöta Hamagedo?

¹³ Fanuwö moroi khö Gogi. (Baso Hezekieli 38:2, 8, 9.) Na no aefa tefakiko fefu agama sofaya, ha sambua tö agama si so ba gulidanö. Ha ono mbanua Lowalangi si toröi. Mofönu sibai dania Zatana ba iʼogunaʼö ’fehede si raʼiö’, yaʼia daʼö informasi si lö atulö moroi ba malaʼika si lö sökhi irege owulo ngawalö soi ba wanuwö ono mbanua Yehowa. (Fam. 16:13, 14) Angorudua ngawalö soi lafotöi ia ’Gogi ba danö Magogi’. Ba ginötö tohare ngawalö soi ba wanuwö ono mbanua Yehowa, ibörögö alua wasuwöta Hamagedo.​—Fam. 16:16.

14. Hadia zaboto ba dödö Gogi dania?

¹⁴ Iʼodaligö Gogi dania ”faʼabölö niha” yaʼia daʼö saradadunia. (2 Nga. 32:8) Niʼodaligöda Lowalangida Yehowa. Ba wamaigi ngawalö soi wa no si bodo ita. Hadia mbörö? Börö me  götö föna, lowalangi moroi Babilona Sebua tebai ilumöʼö Babilona Sebua si no abölö moroi ba ’gurifö samuʼi’ hegöi ”tandru si fulu rozi”! (Fam. 17:16) Tobali, faduhu dödö Gogi wa aoha sibai ba wamakiko yaʼita. Isuwö Gogi dania ono mbanua Yehowa ”hulö lawuo, ba wangahawui tanö”. (Hez. 38:16) Hizaʼi lö ara aefa daʼö, awena aboto ba dödö Gogi wa no teʼuʼu ia. Simane Faraʼo ba Nasi Soyo, awena aboto ba dödö Gogi wa sindruhunia Yehowa nilawania.​—2 Moz. 14:1-4; Hez. 38:3, 4, 18, 21-23.

15. Hadia nifalua Yesu dania ba wasuwöta Hamagedo?

¹⁵ Keriso awö zaradadunia moroi ba zorugo, laʼoʼawögö dania ono mbanua Lowalangi ba lafakiko fefu soi awö zaradadura. (Fam. 19:11, 14, 15) Hizaʼi, hadia zalua khö Zatana, nudu sebua khö Yehowa si no mamaelungu ngawalö soi irege lasuwö ono mbanua Lowalangi ba wasuwöta Hamagedo? Itiboʼö dania Zatana Yesu hegöi ira malaʼika si lö sökhi ba mbaho sabakha. Lakuru ira ba zi saribu fakhe faʼara.​—Fam. 20:1-3.

16. (a) Hewisa wangoromaʼöda wa ’aboto ba dödöda Lowalangi’? (b) Ba wasuwöta Hamagedo, hadia zalua ba niha sangokhögö faʼaboto ba dödö khö Yehowa?

¹⁶ Hewaʼae na awena mazui no hauga fakhe tobali ita ono mbanua Lowalangi, moguna taforomaʼö wa ’aboto ba dödöda Lowalangi’ ba ’taʼoʼö duria somuso dödö sanandrösa khö Zoʼaya yaʼita Yesu’. (2 Tes. 1:7-9) Tola ’aboto ba dödöda Lowalangi’ na taʼila hadia nifakhoinia, hadia zomasi ia hegöi si lö omasi ia. Tola göi aboto ba dödöda ia na taʼomasiʼö ia, taʼoʼö niwaʼönia, ba ha khönia mangalulu ita. (1 Yoh. 2:3-5; 5:3) Na taforomaʼö wa aboto ba dödöda Lowalangi, no töi sebua khöda börö me ’aboto ba dödö Lowalangi ita’ irege tola teʼorifi ita ba Hamagedo! (1 Kor. 8:3) Hana wa tola teʼorifi ita? Börö me ’aboto ba dödö Lowalangi ita’ eluahania omasi khöda Lowalangi.

17. Hadia geluahania ’ba woloʼö turia somuso dödö sanandrösa khö Zoʼaya yaʼita Yesu’?

¹⁷ ”Turia somuso dödö sanandrösa khö Zoʼaya yaʼita Yesu” moʼamakhaita ia ba ngawalö  nifahaʼö Yesu si so ba Daromali Lowalangi. No taʼoʼö duria somuso dödö andrö, na tafalua ia ba waʼaurida si ero maʼökhö. Moguna göi taʼofönaiʼö halöwöda khö Yehowa, ba woloʼö fefu goi-goi satulö khö Lowalangi, ba taturiaigö Famatörö Lowalangi. (Mat. 6:33; 24:14) Ba moguna göi tatuhini ndra talifusö Keriso si no mubayoini samalua halöwö si tohude.​—Mat. 25:31-40.

18. Hewisa niha Keriso nibayoini ba wosulöni si sökhi niforomaʼö khöra?

¹⁸ Ba zi lö ara tö, tola lasulöni ira niha Keriso nibayoini si sökhi niforomaʼö ”mbiri-biri tanö böʼö” khöra. (Yoh. 10:16) Hewisa wosulönira? Fatua lö tebörögö wasuwöta Hamagedo, fefu si 144.000 no tefazawa ira ba zorugo tobali mboto eheha. Tobali ira saradadu zorugo ba wamakiko Gogi ba lalumöʼö ”ngawawa zato” ono mbanua Yehowa. (Fam. 2:26, 27; 7:9, 10) Ba ginötö daʼö dania, omuso sibai dödö ngawawa zato börö me no latuhini niha nibayoini khö Yehowa me so ira nasa ba gulidanö!

19-20. Hewaʼae oya gabula dödö nitaögöda, hewisa enaʼö lö faröi ita hewaʼae na itugu ahatö Hamagedo?

¹⁹ Sagötö ba mbaŵa si lö sökhi ba ngaluo safuria andre, ato nono mbanua Yehowa zanaögö ngawalö waʼabu dödö. Hewaʼae simanö, tola anau gölöda si fao faʼomuso dödö. (Yak. 1:2-4) Moguna enaʼö lö tebulö mangandrö ita soroi ba dödö. (Luk. 21:36) Moguna göi ero maʼökhö tafahaʼö ita ba Daromali Lowalangi ba taʼangerönusi ia, duma-dumania ba ngawalö wamaʼeleʼö sahöli-höli dödö salua ba zi so miföna. (Zin. 77:13) Na tafalua daʼö fefu, ba lö tebulö ita ba wanuriaigö si fao owölö-ölö, hasambalö aro wamatida ba aro ita ba wanötönada!

²⁰ Khalaigö atö, hewisa dania na no tefakiko Babilona Sebua ba na no awai Hamagedo. Tatu omuso sibai dödömö! Ba khalaigö göi, hewisa waʼomuso dödömö dania börö me no teʼamoniʼö döi Yehowa ba fefu niwöwöinia lafaduhuʼö wa sinangea ia mamatörö! (Hez. 38:23) Sindruhu wa Hamagedo no turia si sökhi ba niha sangokhögö faʼaboto ba dödö khö Lowalangi, soloʼö khö Nononia, ba sanau ölö irugi gamozua.​—Mat. 24:13.