1-2. Hadia gamakhaita Zangombakha 11:6 ba halöwö fanuriaigö?

BA ZI hauga soi, ato niha somasi manemaʼö turia somuso dödö. Daʼö niʼalu-aluira ba zilalö. Hizaʼi, ba soi tanö böʼö, lö adöni dödö niha ba wanutunö sanandrösa khö Lowalangi mazui Sura Niʼamoniʼö. Hewisa göi ba mbanua si toröi yaʼugö? Gofu hewisa wanemaʼö niha, omasi Yehowa na lö taböhöli wanuriaigö irege iwaʼö wa no awai halöwö andre.

² Ba ginötö si no itatugöi Yehowa, mubatogö dania halöwö fanuriaigö. Aefa daʼö, ”awena dania amozua götö danö andre”. (Mat. 24:14, 36) Gasa-gasa wombaloida faʼatoharenia, hewisa woloʼöda mene-mene enaʼö ’böi taböda dangada’? *—Baso Zangombakha 11:6.

3. Hadia nitutunöda ba artikel daʼa?

³ Ba artikel silalö, no tatutunö öfa lala sinangea tafalua enaʼö sökhi wamaluada halöwöda tobali ”samaʼuʼu niha”. (Mat. 4:19) Ba artikel daʼa, tatutunö tölu lala sinangea tafalua enaʼö itugu tahalö gangetula ba wamalua fanuriaigö, gofu hadia gabula dödö salua khöda. Moguna (1) taʼosambuaʼö dödöda ba wamalua halöwöda, (2) taʼokhögö waʼebolo dödö, ba (3) tarorogö enaʼö lö mamalö aro wamatida.

4. Hana wa moguna taʼosambuaʼö dödöda ba wamalua halöwö moroi khö Yehowa?

⁴ No ifatunö Yesu wa fakhili-khili ngaluo safuria andrö ba götö Noakhi. Me luo daʼö, oya sibai wamangoloi dödö irege lö labeʼe dödöra niha wamangelama nifaʼema Noakhi. Aboto ba dödö Yesu wa oya sibai göi wamangoloi dödö simane daʼö ba götöda iadaʼa, irege tebai taʼosambuaʼö dödöda ba wamalua fanuriaigö. Börö daʼö, ifangelama ndra soloʼö khönia Yesu, imane, ”Böi miförö.” (Mat. 24:37-39, 42; 2 Fet. 2:5) Moguna taʼoʼö mene-mene andrö, ba taforege enaʼö taʼosambuaʼö dödöda ba wamalua halöwö moroi khö Yehowa.

5. Moloʼö Halöwö Zinenge 1:6-8, hezo manö ikhamö wamalua halöwö fanuriaigö?

 ⁵ Ba götöda andre, tohude sibai halöwö fanuriaigö. Ifatunö Yesu wa lö aetu mufalua halöwö daʼa na no manahae ia ba zorugo, ba hasambalö ikhamö niha sabölö ato. (Yoh. 14:12) Me no aefa mate Yesu, so ösa ndra nifahaʼönia si tobali si fagai iʼa mangawuli. Ba gafuriata, me no tesusugi Yesu, iʼogunaʼö dandra sahöli-höli dödö enaʼö tola lasöndra giʼa soya sibai ira nifahaʼönia. Aefa daʼö, ifasugi ba dödöra wa abölö tohude halöwöra tobali samaʼuʼu niha moroi ba halöwöra tanö böʼö. (Yoh. 21:15-17) Fatua lö manahae Yesu ba zorugo, ifatunö khö ndra nifahaʼönia wa tenga ha ba danö Gizaraʼeli mufalua halöwö fanuriaigö si no ibörögö, hizaʼi mufalua ia ba gulidanö maʼasagörö. (Baso Halöwö Zinenge 1:6-8.) Hauga fakhe aefa daʼö, ibeʼe gangiʼilata sahöli-höli dödö Yesu khö zinenge sotöi Yohane ba wangoromaʼö hadia zalua ”ba luo Zoʼaya”. * Hadia manö niʼila Yohane? Sambua ba gotaluania yaʼia daʼö iʼila samösa malaʼika solohe ’turia somuso dödö si lö tebulö’, nifaʼema ”ba ngawalö soi, ba ngawalö mado, banua, hegöi li”. (Fam. 1:10; 14:6) Daʼa zangoromaʼö wa omasi Yehowa na fao ita iadaʼa ba wamalua halöwö fanuriaigö ba zi sagörö ulidanö irege ibatogö halöwö andre.

6. Hadia lala si tola tafalua enaʼö tola taʼosambuaʼö dödöda ba wamalua halöwö fanuriaigö?

⁶ Tola itugu taʼosambuaʼö dödöda ba wamalua halöwö fanuriaigö na taʼangerönusi fefu zi no ifalua khöda Yehowa ba wanolo yaʼita. Duma-dumania, no iʼasogö gö ba wamati soya sibai, ba no mufaʼanö daʼö ba publikasi nicetak hegöi elektronik, rekaman audio ba video, hegöi ba acara JW Broadcasting®. Angeragö atö: Ba situs web resmi organisasida, no tehenaigö informasi ba zi töra 1.000 ngawalö li! (Mat. 24:45-47) Baero daʼö, hewaʼae na no aboto wahasara dödö ba gulidanö andre börö waʼafaehu agama, faʼebua gokhöta, hegöi lala wangera-ngera sanandrösa ba politik, tola tarasoi wahasara dödö khö  ndra talifusöda ba zi sagörö ulidanö, si töra walu zuta faʼato. Duma-dumania, me ngaluo Zumaha, 19 mbaŵa si Öfa 2019, fao ndra Samaduhuʼö Yehowa ba zi sagörö ulidanö ba wamaigi video sanutunö ayati Zura Niʼamoniʼö ba zi maʼökhö daʼö. Ba zi tanö owinia, owulo niha si 20.919.041 faʼato ba wanörö tödö faʼamate Yesu. Tatu taʼandrö sibai saohagölö börö me taʼokhögö döi si sökhi farahu ba waʼafatalifusöta sahöli-höli dödö andre. Na taʼangerönusi daʼa, itugu taʼosambuaʼö dödöda ba wamalua halöwö fanuriaigö.

7. Hadia duma-duma nibeʼe Yesu, si tobali fanoloda ba wangosambuaʼö tödöda ba wanuriaigö?

⁷ Lala tanö böʼö si tola tafalua enaʼö lö aetu taʼosambuaʼö dödöda ba wanuriaigö yaʼia daʼö taʼoʼö duma-duma Yesu. Hewaʼae na oya zi tobali famangoloi dödönia, tola iʼosambuaʼö dödönia ba wanuriaigö sindruhu. (Yoh. 18:37) Duma-dumania, lö adöni dödö Yesu me iforomaʼö khönia Satana ”fefu wamatörö ba gulidanö awö lakhöminia”. (Mat. 4:8, 9) Lö göi tedönisi dödö Yesu me ato niha somasi mombaliʼö ia Razo. (Yoh. 6:15) Lö adöni dödö Yesu ba wolohi faʼakayo, ba lö göi ataʼu ia hewaʼae na göna ia folohi. (Luk. 9:58; Yoh. 8:59) Iʼamenesi niha Keriso sinenge sotöi Faulo enaʼö laʼoʼö duma-duma Yesu irege ”lö atage ba awuwu” ira. (Heb. 12:3) Na tatörö tödöda mene-mene Waulo andre, tola taʼosambuaʼö dödöda ba wanuriaigö hewaʼae na tetandraigö wamatida.

8. Hadia waʼebolo dödö andrö, ba hana wa moguna sibai taʼokhögö daʼö iadaʼa?

⁸ Faʼebolo dödö yaʼia daʼö faʼabölö ba wombaloi si fao faʼahono dödö irege tebulö zalua. So ösa zalua sanandraigö faʼebolo dödöda. Duma-dumania, omasi ita na alio tebato zi lö sökhi zalua khöda, mazui te lö manö salua irugi iadaʼa zi no ara tadöna-döna. Omasi sibai zamaʼeleʼö sotöi Habakuki enaʼö aheta waʼalösökhi ba Yehuda. (Hab. 1:2) Ladöna-döna waʼatohare Wamatörö Lowalangi ira nifahaʼö Yesu enaʼö tola teʼefaʼö ira moroi ba wamakao ndra niha Romawi. (Luk. 19:11) Tadöna-döna sibai waʼatohare Wamatörö Lowalangi ba wangohori faʼalösökhi irege afönu gulidanö andre niha sangataʼufi Lowalangi. (2 Fet. 3:13) Hizaʼi, moguna khöda waʼebolo dödö ba wombaloi daʼö irege takhamö ginötö si no itatugöi Yehowa. Iadaʼa, datatutunö hadia manö lala niʼogunaʼö Yehowa ba wamahaʼö yaʼita ba wangokhögö faʼebolo dödö.

9. Hadia manö duma-duma sangoromaʼö faʼebolo dödö Yehowa?

⁹ Sambua lala niʼogunaʼö Yehowa ba wamahaʼö yaʼita ba wangokhögö faʼebolo dödö yaʼia daʼö ibeʼe khöda duma-duma soʼahonoa. Duma-dumania, oya ginötö nibeʼenia khö Noakhi ba wangehaogö owo hegöi ba wamalua halöwönia tobali ”sanuriaigö sindruhu”. (2 Fet. 2:5; 1 Fet. 3:20) Si fao faʼebolo dödö, ifondrondrongo niwaʼö Gaberahamo Yehowa me oya kali manofu ia sanandrösa ba gangetula Yehowa ba wangohori niha si lö sökhi si so ba Zodoma hegöi Gomora. (1 Moz. 18:20-33) Baero daʼö, hewaʼae na faröi ndraono Gizaraʼeli, lö aetu iforomaʼö khöra Yehowa waʼebolo dödö ba zi hauga ngaotu fakhe faʼara. (Neh. 9:30, 31) Ba götöda iadaʼa, no oroma sibai göi waʼebolo dödö Yehowa. Ibeʼe nasa ginötö ba niha enaʼö tola ”lafalalini gera-erara”. (2 Fet. 3:9; Yoh. 6:44; 1 Tim. 2:3, 4) Tatu möi famarou dödöda duma-duma Yehowa andre enaʼö lö aetu taforomaʼö waʼebolo dödö sagötö wamaluada halöwö fanuriaigö hegöi famahaʼö. Ifahaʼö göi ita Yehowa ba wangokhögö faʼebolo dödö moroi ba gamaedola si no tesura ba Daromalinia.

10. Hadia wamahaʼö si tola tahalö moroi ba gamaedola sanandrösa ba niha sohalöwö ba danö nisura ba Yakobo 5:7, 8?

¹⁰ Baso Yakobo 5:7, 8. Tola tafahaʼö ita sanandrösa ba waʼebolo dödö moroi ba gamaedola sanandrösa ba zi samösa sohalöwö ba danö, sombaloi faʼatedou zinanönia. Sindruhu  sa, so ösa zinanö salio tedou. Hizaʼi, oya göi zinanö sangogunaʼö inötö sabölö ara irege tola mubasi, mendrua manö zinanö sowua. Ba danö Gizaraʼeli, awena tola mubasi zinanö simane daʼö mato önö waŵa me no aefa mutanö. Si toʼölönia, itanö danömö sohalöwö ba danö na tebörögö mbaŵa deu, yaʼia daʼö ba dalu mbaŵa si Fulu. Awena ibasi dania danömö andrö na no aefa mbaŵa deu, yaʼia daʼö ba dalu mbaŵa si Öfa. (Mrk. 4:28) Moguna göi khöda waʼebolo dödö simane sohalöwö ba danö andrö. Hizaʼi, tola manö lö aoha wamalua daʼö.

11. Hadia mbuania na taʼokhögö waʼebolo dödö ba wamalua halöwö fanuriaigö?

¹¹ Börö me niha si lö moʼahonoa ita, si toʼölönia omasi ita na ba waʼalio tatema mbua ba halöwö si no tafalua. Hizaʼi, na omasi ita tedou ba mowua zinanöda, moguna tarorogö daʼö si fao faʼebolo dödö. Moguna takhao danö, tatanö zinanö andrö, tahawui, ba tadöni ndruʼu si so ba zi fasuinia. Moguna göi lö aetu taforomaʼö waʼebolo dödö ba ginötö tafalua halöwö ba wombaliʼö nifahaʼö. Na so khöda waʼebolo dödö, lö ide-ide dödöda na latimbagö ita niha. Baero daʼö, moguna göi taforomaʼö waʼebolo dödö hewaʼae na adöni dödö zi samösa niha ba omasi ia lafahaʼö. Hadia mbörö? Börö me tebai tafaso niha nifahaʼöda ba Zura Niʼamoniʼö enaʼö iʼanemaiʼö tedou ia ba wamati. Me föna, itaria göi lö iʼanemaiʼö aboto ba dödö ndra nifahaʼö Yesu wamahaʼö nifaʼemania khöra. (Yoh. 14:9) Aefa daʼö, moguna göi khöda ginötö ba wanolo niha nifahaʼöda ba Zura Niʼamoniʼö enaʼö itugu iʼomasiʼö niha böʼö ba lö khönia faʼebua dödö zambuana. Törö tödöu wa halöwöda ha fananö hegöi fowuwui danömö zindruhu, hizaʼi Lowalangi Yehowa zamanöi yaʼia.​—1 Kor. 3:6.

12. Hewisa wangoromaʼöda faʼebolo dödö na manuriaigö ita ba nösi nomoda si tenga si sara lala wamati?

¹² Tola manö itaria abua khöda ba wangoromaʼö faʼebolo dödö na manuriaigö ita ba nösi nomoda si tenga si sara lala ba wamati. Tola tafahaʼö ita ba goi-goi si so ba Zangombakha 3:1, 7. Imane ayati andrö, ”So  ginötö . . . falöhede-hede ba fehede.” Itaria, hewaʼae na lö hadöi hede-hededa, tola adöni dödö nösi nomoda ba duria somuso dödö na laʼila gamuatada si sökhi. (1 Fet. 3:1, 2) Hizaʼi, moguna göi no tefaʼanö ita ba wamaʼema khöra zi no aboto ba dödöda. Sagötö wamaluada halöwö fanuriaigö hegöi famahaʼö si fao faʼowölö-ölö, moguna taforomaʼö waʼebolo dödö ba niha fefu, tefarahu ba daʼö nösi nomoda.

13-14. Hadia manö duma-duma waʼebolo dödö si tola taʼoʼö?

¹³ Tola göi tafahaʼö ita sanandrösa ba waʼebolo dödö moroi ba duma-duma ndraono mbanua Yehowa si lö faröi ba götö Zura Niʼamoniʼö hegöi ba götöda iadaʼa. Duma-dumania, hewaʼae omasi Habakuki na tehori waʼalösökhi, lö aetu iʼokhögö waʼebolo dödö ba imane, ”Möido ba hati andrö, ba wamaigi-maigi.” (Hab. 2:1) Duma-duma tanö böʼö yaʼia daʼö Faulo. No irai iwaʼö wa omasi sibai ia ’ba wangasiwai’ halöwönia ba gulidanö. Hewaʼae simanö, lö aetu iʼokhögö waʼebolo dödö ba lö iböhöli ba ’wamaduhuʼö turia somuso dödö’.​—Hal. 20:24.

¹⁴ Nehegö sambua duma-duma salua ba götöda iadaʼa. Me no tama ira ba Sekolah Gilead, lafataro zi sambua fongambatö ba wangai halöwö ba soi böʼö. Ba soi daʼö, lö ato ndra Samaduhuʼö Yehowa. Lö göi ato ba daʼö niha si farahu ba agama niha Keriso, ba ha maʼifu zadöni tödö ba wamahaʼö yaʼira ba Zura Niʼamoniʼö. Asese latutunö ira awöra ba Sekolah Gilead sangai halöwö ba soi böʼö wa ato niha nifalukhaisira somasi mamahaʼö yaʼira ba Zura Niʼamoniʼö ba tebayagö idanö. Hizaʼi, hewaʼae na tenga simane daʼö mbua nitema zi sambua fongambatö andrö, lö awuwu ira ba lö laböhöli wanuriaigö si fao faʼebolo dödö. Me no walu fakhe mangai halöwö ira ba soi daʼö, so samösa nifahaʼöra ba Zura Niʼamoniʼö nibayagö idanö. Hadia wamahaʼö si tola tahalö moroi ba duma-duma sawena tatutunö andre? Lö aetu manuriaigö ira si fao faʼowölö-ölö, ba lö ’laböda dangara’. Ba gafuriata, ifahowuʼö waʼebolo dödöra andrö Yehowa. Yatobali ita ”soloʼö niha sanema amabuʼula andrö börö wamati ba faʼebolo dödö”.​—Heb. 6:10-12.

15. Hadia dandra sangoromaʼö wa tola möi fangaroʼö gangetulada wamatida enaʼö lö taböhöli wanuriaigö?

¹⁵ Börö me mamati ita ba duria nifaʼemada, tola terou dödöda ba wanuriaigö turia somuso dödö ba niha sato. Faduhu dödöda wa hasambalö alua mbuʼusa li Lowalangi si no tesura ba Zura Niʼamoniʼö. (Zin. 119:42; Yes. 40:8) No taʼila iadaʼa hewisa waʼalua wamaʼeleʼö si no tesura ba Zura Niʼamoniʼö. Ba no göi taʼila samösa wa tola itugu sökhi waʼauri niha sato börö me laʼoʼö mene-mene Zura Niʼamoniʼö. Daʼa zamarou tödöda enaʼö itugu tahalö gangetula ba wanuriaigö turia somuso dödö ba niha sato.

16. Simane niʼilada ba Zinunö 46:2-4, hewisa wamatida khö Yehowa hegöi Yesu tola möi fangaroʼö gangetulada enaʼö lö taböhöli wanuriaigö?

¹⁶ Mamati göi ita khö Yehowa, Umbu duria nifaʼemada, hegöi khö Yesu, si no ifataro tobali Razo ba Wamatörö Lowalangi. (Yoh. 14:1) Gofu hadia gabula dödö salua khöda, hasambalö ilumöʼö ba iʼabölöʼö ita Yehowa. (Baso Zinunö 46:2-4.) Baero daʼö, faduhu dödöda wa lö iböhöli Yesu ba wangogunaʼö faʼabölö hegöi kuaso nibeʼe Yehowa khönia ba wameʼe fanuturu lala moroi ba zorugo sanandrösa ba halöwö fanuriaigö.​—Mat. 28:18-20.

17. Tutunö duma-duma sangoromaʼö hadia mbörö wa moguna lö taböhöli wamalua halöwö fanuriaigö.

¹⁷ Famati göi zanolo yaʼita ba wangokhögö faʼafaduhu dödö wa hasambalö ifahowuʼö wamorege nifaluada Yehowa enaʼö lö taböhöli wanuriaigö. Itaria, iʼogunaʼö lala si lö tadöna-döna ba wamalua daʼö. (Zango. 11:6) Duma-dumania,  ero maʼökhö so ribu niha samaigi publikasi nifaʼanöda ba nahia mbuku si so gaolo-gaolo mazui ba dete meza. Hadia so mbua niʼasogö halöwö fanuriaigö nifalua ba nahia sato niha simane daʼa? So. Ba Pelayanan Kerajaan Kita Baŵa si Felezara 2014, mututunö ba daʼö zi samösa mahasiswi somasi mangehaogö karya tulis sanandrösa khö ndra Samaduhuʼö Yehowa. Lö musöndrania hezo nahia Balai Mbanua Lowalangi. Hizaʼi, ba zekolania, iʼila publikasida si no mufaʼanö yawa ba dete meza, ba isöndra göi informasi soguna khönia ba wangehaogö karya tulis andrö. Ba gafuriata, ibörögö wamahaʼö yaʼia ba Zura Niʼamoniʼö irege tebayagö ia idanö. Iadaʼa, no tobali ia perintis biasa. Salua andre zangoromaʼö wa so nasa niha sinangea mamondrongo turia somuso dödö sanandrösa ba Wamatörö Lowalangi. Tatu itugu terou dödöda enaʼö lö taböhöli wanuriaigö.

18. Hana wa tola faduhu dödöda wa hasambalö teʼasiwai halöwö fanuriaigö ba ginötö si no itatugöi Yehowa?

¹⁸ Hana wa tola faduhu dödöda wa hasambalö teʼasiwai halöwö fanuriaigö ba ginötö si no itatugöi Yehowa? Nehegö hadia zalua ba götö Noakhi. No itatugöi Yehowa hawaʼara alua waʼanönö danö idanö, mato 120 fakhe fatua lö alua ia. Ngafulu fakhe aefa daʼö, ifaretakö Noakhi Yehowa ba wamazökhi owo. Mato 40 fakhe mazui 50 fakhe fatua lö anönö danö idanö, lö iböhöli Noakhi ba wamalua halöwönia. Hewaʼae na lö lafondrondrongo ia niha, lö iböhöli ba wameʼe khöra famangelama. Ifalua daʼö Noakhi irege ifaretakö ia Yehowa ba wolohe urifö bakha ba nowo. Aefa daʼö, ba ginötö si no itatugöi, ”ikusi mbawandruhö Yehowa, furinia”. (1 Moz. 6:3; 7:1, 2, 16) Daʼa fefu zi tobali tandra wa iʼoʼö Yehowa hadia zi no itatugöi.

19. Hadia nifalua Yehowa ba zi lö ara tö?

¹⁹ Ba zi lö ara tö, ibatogö halöwö fanuriaigö andre Yehowa. Aefa daʼö, tehori gulidanö nifatörö Zatana irege hatö niha sangataʼufi Lowalangi zi toröi ba gulidanö. Gasa-gasa wombaloida daʼö, datahalö gangetula enaʼö lö mamalö taʼoʼö duma-duma Noakhi, Habakuki, hegöi ono mbanua Lowalangi tanö böʼö, si lö mamöda tangara. Yalö mamalö taʼosambuaʼö dödöda ba wanuriaigö, taʼokhögö waʼebolo dödö, ba mamati ita khö Yehowa hegöi buʼusa linia.