Imane ayati sadöni dödöda andre, ”Na öʼila ba danö, lafakao zi numana, ba lafuyuʼö huku ba labilaʼö lala, ba böi ahöli-höli dödöu ba daʼö; ifaigi-faigi sa nawönia salawa, ba fondrege zalawa zamaigi-maigi yaʼira [fefu].”​—Zango. 5:7.

Ba ginötö tabaso ayati daʼa, tola manö tawaʼö wa ha khö ndra samatörö manandrösa ia. Hizaʼi sindruhunia, ayati andre göi zamasugi ba dödöda sanandrösa khö Yehowa. Na aboto ba dödöda daʼa, tola terara dödöda ba teʼabölöʼö ita.

Ba Zangombakha 5:7 andrö, itutunö wa so samösa zamatörö samakao niha si numana ba ifalua khöra zi lö atulö. Moguna itörö tödönia samatörö andrö wa inehe-nehegö ia samatörö tanö böʼö sabölö alawa mazui sabölö ebua kuaso moroi khönia. Sindruhunia, so nasa zamatörö tanö böʼö sangokhögö kuaso sabölö alawa moroi khöra. Hizaʼi, tola manö lö tefaudu wangogunaʼöra kuasora, irege tefakao waʼauri niha sato.

Hizaʼi, gofu hawaʼalösökhi zalua ba gulidanö andre, aboto ba dödöda wa inehe-nehegö Yehowa nifalua ndra samatörö. Tatu terara dödöda börö me no taʼila daʼö. Baero daʼö, aboto göi ba dödöda wa iʼameʼegö tödö ita Yehowa. Imane Sura Niʼamoniʼö, ”Ihörö-hörögö sa gulidanö maʼasagörö Yehowa, enaʼö iʼabölögö wanolo si no adölö tödö khönia.” (2 Nga. 16:9) Börö daʼö, tola taʼandrö wanolo moroi khö Lowalangi ba tatouʼö khönia fefu waʼaombö dödöda.​— Zin. 55:23; Fil. 4:6, 7.

Rahu-rahunia, ifatunö khöda Zangombakha 5:7 wa ba wamatörö niha gulidanö, hasambalö so zamatörö sangokhögö kuaso sabölö ebua moroi khö ndra samatörö tanö böʼö. Hizaʼi, sabölö moguna, ayati daʼa göi zangoromaʼö wa Yehowa andrö no Samatörö Fondrege Zalawa. Iʼila fefu hadia nifalua niha ero zamösana, ba iʼogunaʼö kuasonia ba lala satulö. Iadaʼa, no ifataro Nononia Yesu Keriso, si no tobali Razo ba Wamatörö Lowalangi, ba wosalahini yaʼia ba wamatörö. Simane Amania, iʼogunaʼö göi kuasonia Yesu ba lala satulö.