1. Hezo ginötönia abua khöda ba wamosumange Yehowa?

MOLOʼÖ yaʼugö, hezo ginötönia abua khöda ba wamalua famosumange khö Yehowa? Hadia ba ginötö oya gabula dödöda mazui ba ginötö tarasoi waʼahono dödö? Si toʼölönia, abölö taʼodaligö Yehowa na göna ita abula dödö. Hizaʼi, hadia nifaluada na tarasoi waʼahono dödö? Hadia itaria mangoloi dödöda irege lö saʼae taʼofönaiʼö wamalua halöwöda ba wamati? Me föna, aboto ba dödö Yehowa wa tola manö laʼolifugö ia iraono Gizaraʼeli na larasoi waʼahono dödö ba waʼaurira, daʼö mbörö wa ibeʼe khöra wamangelama.​—5 Moz. 6:10-12.

2. Hadia duma-duma niröi Razo Asa khöda?

² No iröi khöda duma-duma si sökhi Razo Asa. Sindruhu-ndruhu iʼodaligö Yehowa, ba lö iböhöli ba wamosumange yaʼia, he ba ginötö si basaki hegöi ba ginötö waʼahono dödö. ”Tödö Asa andrö, ba noa sa adölö manö khö Yehowa”, iʼotarai me ono matua ia. (1 Raz. 15:14) Sambua lala nifaluania ba wangoromaʼö daʼö yaʼia daʼö ihori lala wamosumange faya ba Yehuda. Imane Sura Niʼamoniʼö, ”Iheta naha wameʼe sumange böʼö andrö, fabaya hili-hili andrö, irasa harefa, ba iʼobö geu niʼamoniʼö.” (2 Nga. 14:3, 5) Baero daʼö, iheta nenenia sotöi Maʼakha moroi ba dadaoma si tohude ba wamatörö, börö me idönisi dödö niha ba wamosumange adu.​—1 Raz. 15:11-13.

3. Hadia manö nitutunöda ba artikel daʼa?

 ³ So nasa nifalua Razo Asa baero ba wangohori famosumange faya. Ifuli ihaogö lala wamosumange satulö ba itolo ndraono mbanua Yehuda enaʼö mangawuli ira khö Yehowa. Ifahowuʼö Razo Asa hegöi iraono mbanuania Yehowa, irege larasoi ginötö waʼahono dödö. * Me mamatörö Razo Asa, ’no sahono tödö ira’ ba zi fulu fakhe faʼara. (2 Nga. 14:1, 4, 6) Ba artikel daʼa, tatutunö hewisa wangogunaʼö Asa inötö waʼahono dödö andrö. Aefa daʼö, tatutunö göi duma-duma ndra niha Keriso me abad siföföna si no mangogunaʼö inötö waʼahono dödö ba lala si tefaudu. Ba safuria, tabeʼe wanema li ba wanofu andre: Na lö lasaisi Zamaduhuʼö Yehowa ira samatörö ba soi si toröi yaʼugö, hewisa wangogunaʼöu inötö waʼahono dödö andrö ba lala si tefaudu?

4. Moloʼö 2 Ngaʼötö 14:2, 6, 7, hadia nifalua Asa me so ira ba ginötö waʼahono dödö?

⁴ Baso 2 Ngaʼötö 14:2, 6, 7. Ifatunö ba ndraono mbanuania Asa wa ”no ifaigi khöra waʼahono Yehowa”. Hewaʼae na so waʼahono dödö ba ginötö daʼö, lö iwaʼö tödönia Asa wa daʼö ginötö ba wangofönaiʼö faʼasana dödö. Hizaʼi, ibörögö ba wangotomosi banua, öli, malige, hegöi bawa göli. Imane ba niha Yehuda, ”No fönada manö na danö.” Eluahania, lö hadöi nudu ba soi andrö zi tola manaisi yaʼira ba wamalua fangotomosi. Börö daʼö, ifarou ndraono mbanuania ba wangogunaʼö inötö waʼahono dödö andrö ba lala si tefaudu.

5. Hana wa inönö waʼato ndra saradadunia Asa?

⁵ Sagötö waʼahono dödö andrö, inönö waʼato ndra saradadunia Asa. (2 Nga. 14:8)  Hadia daʼa zi tobali tandra wa ambö iʼodaligö Yehowa? Tenga. Börö me razo ia, aboto ba dödö Asa wa moguna ifaʼanö nono mbanuania ba wanaögö abula dödö salua khöra ba zi so miföna. Iʼila Asa wa tenga sagötö faʼara larasoi ginötö waʼahono dödö andrö, ba sindruhu göi wa simane daʼö zalua.

6. Hadia nifalua ndra niha Keriso me abad siföföna ba ginötö waʼahono dödö?

⁶ Asese tefakao niha Keriso sauri me abad siföföna. Hizaʼi, no irai göi larasoi ginötö waʼahono dödö. Hewisa wangogunaʼöra inötö andrö? Lö laböhöli ira niha Keriso si lö faröi andrö ba wamaʼema turia somuso dödö si fao faʼaterou dödö. Buania, itugu ”monönö waʼatora”. Ba daʼa taʼila wa ifahowuʼö ira Yehowa börö me laforege wanuriaigö ba ginötö waʼahono dödö andrö.​—Hal. 9:26-31.

7-8. Hadia nifalua Waulo hegöi ira niha Keriso tanö böʼö me tebeʼe khöra ginötö ba wamalua halöwö fanuriaigö? Tutunö.

⁷ Ero na so ginötö, laʼogunaʼö daʼö ira niha Keriso me abad siföföna ba wamalua halöwö fanuriaigö. Duma-dumania, me iʼila sinenge sotöi Faulo wa tola manuriaigö ia ba niha sato si so ba Efeso, ihalö gangetula toröi ba mbanua daʼö enaʼö tola ifalua wanuriaigö.​—1 Kor. 16:8, 9.

⁸ Me döfi 49 M, tebeʼe göi ginötö khö Waulo hegöi ira niha Keriso tanö böʼö ba wamalua fanuriaigö ba niha sato. Ba ginötö daʼö, lahalö gangetula ira sinenge hegöi ira satua sokubaloi si so ba Yeruzalema ba wangasiwai abula dödö sanandrösa ba wosuna. (Hal. 15:23-29) Me no aefa lafaʼema misa ba mbanua niha Keriso gangetula si no muhalö, itugu terou dödö ndra niha Keriso ba wamaʼema ’turia somuso dödö sanandrösa ba daromali Yehowa’. (Hal. 15:30-35) Hadia mbuania? Iwaʼö Sura Niʼamoniʼö wa ”itugu aro wamati mbanua niha Keriso ba monönö waʼatora ero maʼökhö”.​—Hal. 16:4, 5.

9. Hewisa zalua ba soi misa iadaʼa, ba hadia zinangea tasofu khöda samösa?

⁹ Oya soi ba ginötö andre si lö manaisi halöwö fanuriaigö nifaluada. Hadia ba soi simane daʼö toröi ndraʼugö? Na yaʼia, sofu khöu samösa, ’Hewisa wangogunaʼögu inötö waʼahono dödö andre ba lala si tefaudu?’ Ba ngaluo safuria andre, omuso dödö ndraono mbanua Lowalangi börö me laforege ba wamalua halöwö fanuriaigö hegöi ba wamahaʼö niha böʼö. Daʼa no halöwö sebua sibai, nifalua ba zi sagörö ulidanö. (Mrk. 13:10) Börö daʼö, oya sibai zi tola tafalua na fao ita ba halöwö daʼa.

10. Hadia zinangea tafalua moloʼö 2 Timoteo 4:2?

¹⁰ Hewisa wangogunaʼömö inötö waʼahono dödö ba lala si tefaudu? (Baso 2 Timoteo 4:2.) Angeragö atö hewisa waʼaurimö iadaʼa, ba nehegö hadia zi tola öbulöʼö enaʼö itugu oya ginötö niʼogunaʼömö mazui niʼogunaʼö nösi nomou ba wanuriaigö, irege tola mangai halöwö tobali perintis. Tenga inötönia iadaʼa ba wolohi faʼakayo börö me tenga daʼö zangorifi yaʼita dania na alua wamakao sabölö-bölö.​—Gamd. 11:4; Mat. 6:31-33; 1 Yoh. 2:15-17.

11. Hadia zi no lafalua ira sanuriaigö irege tola laturiaigö duria somuso dödö ba niha sabölö ato?

¹¹ Ato ndra sanuriaigö iadaʼa si no mamahaʼö yaʼira ba li si bohou irege tola laʼogunaʼö li daʼö ba wanuriaigö hegöi ba wamahaʼö. Ba wanolo yaʼira, no ihenaigö organisasida publikasi ba li soya sibai. Duma-dumania, me 2010, no mufaʼanö  publikasida ba zi 500 ngawalö li. Iadaʼa, no tedou waʼoyania ba zi töra 1.000 ngawalö li!

12. Hadia mbua nitema niha me larongo duria somuso dödö ba li niʼogunaʼöra? Beʼe duma-duma.

¹² Hewisa dödö niha me larongo Daromali Lowalangi ba li niʼogunaʼöra? Nehegö atö hadia zalua khö dalifusöda ira alawe ba Amerika Serikat, sangondrasi angowuloa ba zi sambua regional nifalua ba li Kinyarwanda. Daʼa li si toʼölö muʼogunaʼö ba Rwanda, Kongo (Kinshasa), hegöi ba Uganda. Me no aefa mufalua gangowuloa sebua, imane talifusöda ira alawe andrö, ”Sagötö weʼasogu ba Amerika Serikat ba zi 17 fakhe faʼara, awena sakali daʼa urasoi wa sindruhu-ndruhu aboto ba dödögu wamahaʼö nifaʼema ba gangowuloa sebua.” Sindruhu-ndruhu wa tofakha sibai ba dödö dalifusöda ira alawe andrö me irongo wamahaʼö ba li niʼogunaʼönia. Hadia so ösa niha sangogunaʼö li böʼö ba nahiamö wanuriaigö, sabölö omasi manemaʼö turia somuso dödö ba li niʼogunaʼöra? Na tefaudu ginötö ba so khöu waʼabölö, hadia tola öfahaʼö ndraʼugö ba li daʼö irege tola ötolo ira? Hewaʼae na lö aoha wamalua daʼö, tola örasoi waʼomuso dödö börö me no öforege ba wamalua yaʼia.

13. Hewisa lala ndra talifusöda ba Rusia ba wangogunaʼö inötö waʼahono dödö?

¹³ Lö fefu ndra talifusöda, larasoi waʼahono dödö ba wamalua fanuriaigö. Ba zi hauga soi, lasaisi halöwöda ira samatörö irege lö faʼahono dödö khö ndra talifusöda ba wamalua fanuriagö. Duma-dumania, nehegö hadia zalua khö ndra talifusöda ba Rusia. Ba zi ngafulu fakhe faʼara, göna ira folohi moroi khö ndra samatörö ba soi daʼö. Hizaʼi, me baŵa si Tölu 1991, latehegö khöra ira samatörö ba wamalua fanuriaigö hegöi ba wamosumange Lowalangi. Ba ginötö daʼö, so mato 16.000 waʼato  zanuriaigö ba Rusia. Dua wulu fakhe aefa daʼö, tedou waʼato zanuriaigö irege töra 160.000! Sindruhu-ndruhu wa lahaogö laʼogunaʼö ginötö si no latehegö khöra ba wamalua fanuriaigö. Iadaʼa, lö saʼae larasoi ginötö waʼahono dödö andrö. Hizaʼi, hewaʼae na no tebulö zalua ba soi si so yaʼira, lö tebulö lafosumange Yehowa si fao faʼaterou dödö. Lö laböhöli ba wameʼe fefu niʼokhögöra ba wamalua somasi Yehowa.

14-15. Hewisa wangogunaʼö Yehowa faʼabölönia ba wanolo Asa?

¹⁴ Ba gafuriata, taya saʼae ginötö waʼahono dödö ba götö Asa. So zaradadu sato sibai si töra sazuta waʼato moroi ba Gaitiofia si tohare ba wanuwö yaʼira. Faduhu dödö gumandru zaradadu sotöi Zera wa hasambalö lakalaisi zaradadu Yehuda. Hewaʼae simanö, faduhu dödö Asa khö Yehowa. Mangandrö Asa, imane, ”Tologa, yaʼugö Yehowa, Lowalangima! Yaʼugö sa weʼe-weʼe dödö, ba no moroi ba döimö, wa no mafaondragö zato sibai andrö.”​—2 Nga. 14:11.

¹⁵ Arakhagö dua winaeta abölö ato zaradadu Gaitiofia moroi ba zaradadu Yehuda. Hewaʼae simanö, aboto ba dödö Asa wa ebua sibai waʼabölö Yehowa ba tola itolo nono mbanuania. Lö afatö dödö Asa ibeʼe Yehowa. Itolo nono mbanuania ba wokalaisi zaradadu Gaitiofia.​—2 Nga. 14:8-13.

16. Hezo taʼila wa tenga sagötö faʼara tarasoi ginötö waʼahono dödö?

¹⁶ Lö taʼila sibai hadia zalua khöda ba zi so miföna. Hewaʼae simanö, no aboto ba dödöda wa ha ba zi lö arara tarasoi ginötö waʼahono dödö. Moguna tatörö tödöda nifaʼeleʼö Yesu wa ba ngaluo safuria dania, ”dozi soi fatiu dödöra” khö ndra nifahaʼönia. (Mat. 24:9) Imane göi sinenge sotöi Faulo, ”Dozi sedöna moloʼö Keriso ba wamosumange Lowalangi soroi ba dödö, hasambalö göna ira folohi.” (2 Tim. 3:12) Ebua sibai wönu Zatana, ba alio ara, hasambalö tarasoi lua-lua wönunia andrö.​—Fam. 12:12.

17. Hadia manö zi tola manandraigö famatida?

¹⁷ Ba zi lö ara tö, hasambalö tetandraigö wamatida. Lö ara tö tohare ”wamakao sabölö-bölö si lö irai alua, iʼotarai me tewöwöi  gulidanö irugi iadaʼa”. (Mat. 24:21) Ba ginötö daʼö, tola manö laʼuduni ita ira ösi nomoda, ba lö latehegö halöwö nifaluada ira samatörö. (Mat. 10:35, 36) Simane Asa, hadia faduhu dödöda wa hasambalö itolo ba ilumöʼö ita Yehowa?

18. Moloʼö Heberaiʼo 10:38, 39, hadia zanolo yaʼita enaʼö tola tataögö wanandraigö salua ba zi so miföna?

¹⁸ No ifaʼanö wamatida Yehowa iʼotarai iadaʼa enaʼö tola tefaʼanö ita ba wanaögö fanandraigö salua ba zi so miföna. Iʼogunaʼö ”zawuyu si lö faröi ba satua-tua” ba wameʼe ’öda ba ginötö si tefaudu’, enaʼö lö tebulö aro wamatida. (Mat. 24:45) Hizaʼi, moguna göi taforege ba wangaʼaroʼö famatida khö Yehowa.​—Baso Heberaiʼo 10:38, 39.

19-20. Me no aefa tabaso 1 Ngaʼötö 28:9, hadia manö wanofu-nofu sinangea tasofu khöda samösa, ba hadia mbörö wa tafalua daʼö?

¹⁹ Simane Razo Asa, moguna göi taʼalui Yehowa. (2 Nga. 14:4; 15:1, 2) No tabörögö wangalui Yehowa me tafahaʼö ita sanandrösa khönia ba tebayagö ita idanö. Aefa daʼö, moguna taʼogunaʼö fefu ginötö niʼokhögöda ba wangaʼaroʼö famatida khö Yehowa. Enaʼö taʼila hadia no tafalua daʼö, tola tasofu khöda samösa, ’Hadia lö uböhöli weʼamöi ba gangowuloa?’ Na taʼondrasi gangowuloa nifaʼanö organisasi Yehowa, tola itugu aro ita ba wamati ba tatema wamarou dödö moroi khö ndra talifusöda. (Mat. 11:28) Tola göi tasofu khöda samösa, ’Hadia lö tebulö ufahaʼö ndraʼo ba Zura Niʼamoniʼö?’ Na so nösi nomou, hadia mibeʼe ginötömi ero migu ba wamalua famahaʼö si sambua omo? Na ha samösa-mösa ndraʼugö, hadia öbeʼe ginötöu ba wamalua famahaʼö samösa? Hadia no öforege ba wamalua zabölö sökhi ba wanuriaigö hegöi ba wamahaʼö niha böʼö?

²⁰ Hana wa moguna taʼangeragö wanofu-nofu daʼö? Ifatunö khöda Sura Niʼamoniʼö wa isekhegö gera-erada hegöi tödöda Yehowa. Moguna göi tafalua zimane daʼö. (Baso 1 Ngaʼötö 28:9.) Me no tafareso dödöda hegöi era-erada, te so gohitö dödöda, amuatada, mazui lala wangera-ngerada sinangea tabulöʼö. Moguna taʼandrö wanolo moroi khö Yehowa ba wamalua daʼö. Daʼa ginötönia khöda ba wamaʼanö yaʼita enaʼö tola tataögö wanandraigö ba zi so miföna. Börö daʼö, böi böhöli ba wangogunaʼö inötö waʼahono dödö ba lala si tefaudu!