1. Hana wa so ösa niha sinangea lafosumange, ba hadia nidunö-dunöda ba wamaha’ö da’a?

HEWISA wangoroma’öda wa tafosumange niha bö’ö? Taforoma’ö da’ö na tafalua khöra hadia zi lö tafalua ba niha bö’ö, ba na ta’ame’egö tödö ira. Si to’ölönia, tafosumange niha si no mamalua si sökhi, niha sangokhögö halöwö si tohude mazui niha si so ba faka. Ba wamaha’ö da’a, tafaha’ö ita haniha zindruhunia zinangea tafosumange ba hadia mbörö.

2, 3. (a) Hana wa ha Yehowa zabölö tohude sinangea manema sumange? (Faigi gambara ba wamobörö wamaha’ö.) (b) Haniha Nono Mbiri-biri nitutunö ba Fama’ele’ö 5:13, ba hana wa hasambalö tafosumange ia?

² Imane Fama’ele’ö 5:13 wa ”zi dadao andrö, ba dadaoma” hegöi ”Nono Mbiri-biri”, zinangea manema sumange. ”Zi dadao andrö, ba dadaoma” tetandrösaigö ia khö Yehowa. Ba Fama’ele’ö faza 4, labe’e khöda sambua dani ira mala’ika si so ba zorugo hana wa Yehowa ”sauri irugi zi lö aetu”  sinangea manema zumange. Lamane, ”No sinangea manema ndra’ugö lakhömi ba sumange ba fa’abölö, ya’ugö So’aya ya’aga, Lowalangima, me no ya’ugö zamazökhi fefu hadia ia, ba börö nilau dödöu, wa so ia, awö wa tefazökhi ia.”—Fama’ele’ö 4:9-11.

³ ”Nono Mbiri-biri” nitutunö ba Fama’ele’ö 5:13 ya’ia da’ö Yesu Keriso. Hewisa wa tola ta’ila? Me so ia ba gulidanö, lafotöi Yesu andre ”Nono Mbiri-biri andrö khö Lowalangi, sangeheta horö nösi gulidanö”. (Yohane 1:29) Hadia so razo tanö bö’ö sanehegö nosonia salahi nono mbanuania? No dani si sökhi da’a ba wamosumange ya’ia. No sinangea itema zumange Yesu börö me ya’ia Razo yawa razo ba So’aya yawa zo’aya. (I Timoteo 6:14-16) Tola manö örasoi hadia nirasoi ndra mala’ika si so ba zorugo sanunö, ”No sinangea Nono Mbiri-biri andrö, si no mutaba, ba wanema fa’abölö ba fo’ana’a ba fa’atua-tua ba fa’abe’e ba sumange ba lakhömi ba howu-howu!”—Fama’ele’ö 5:12.

4. Hana wa no fa’atua-tua na tafosumange Yehowa hegöi Keriso?

⁴ Itutunö ba Yohane 5:22, 23 wa no ifataro Keriso Yehowa tobali sanguhuku fefu niha gulidanö. Da’a no sambua dani si sökhi wa moguna sibai tafosumange Yesu. Na tafalua da’a, no tafosumange göi Yehowa. Na tafili ba wamosumange Yesu hegöi Amania, tola ta’okhögö wa’auri si lö aetu.—Baso Zinunö 2:11, 12.

5. Hana wa sinangea tafosumange ba ta’ame’egö tödö fefu niha?

⁵ Tefazökhi niha simane ”famaedo Lowalangi”. (I Moze 1:27) Eluahania, la’okhögö wa’abölö niha ba wangoroma’ö mbua-bua simane ni’okhögö Lowalangi. Duma-dumania, tola laforoma’ö wa’omasi, fa’ebua dödö, hegöi fa’ahakhö dödö. Tefazökhi göi niha si fao tödö side-ide, ba wotatugöi hadia zatulö mazui zi sala, hadia zindruhu mazui faya, hadia zi tefaudu mazui si lö tefaudu. (Roma 2:14, 15) Ato niha somasi ngawalö hadia ia zi lö ta’unö ba si sökhi, ba omasi ira na so wa’ohahau dödö ba gotaluara niha bö’ö. Lö tokea ita ba da’ö, börö me Yehowa no Lowalangi si toföfö ba satulö. Ba da’a oroma wa tefazökhi fefu niha si fao fa’abölö ba wolo’ö Yehowa ba ngawalö lala. Da’a dani wa sinangea tafosumange ba ta’ame’egö tödö göi niha.—Zinunö 8:6

6, 7. Hadia gamaehuta ndra Samaduhu’ö Yehowa ba niha sato ba wamosumange niha bö’ö?

⁶ Ta’ila wa moguna tafosumange niha bö’ö. Hiza’i, tola manö abua ba wotatugöi hadia zumange sinangea tabe’e khöra ba hezo ndregenia. Alua da’ö börö me ato niha si lö mo’ahonoa si no tedönisi ba wamalua bua-bua si so ba gulidanö nifatörö Zatana. Ato niha zombali’ö ira matua mazui ira alawe tobali niha nisuno-sunora. Sindruhunia, ha Yehowa zinangea manema sumange hegöi fo’ame’egö tödö nibe’era andrö. Lafosumange sibai nawöra niha ba la’olowalangigö. La’o’ö lagu wonukha, nifalua, hegöi amuata ndra politikus, sondrönia’ö ba agama, si fa’olahraga, bintang film, hegöi ira artis tanö bö’ö.

⁷ La’ila ira niha Keriso sindruhu wa fasala  na lafalua lala simane da’ö ba wamosumange niha bö’ö. Ba gotalua fefu niha si no irai auri, ha Yesu zame’e duma-duma so’ahonoa khöda si tola ta’o’ö. (I Fetero 2:21) Moguna tatörö tödöda wa ”noa sa ahori mamazökhi horö ira, ba lö’ö sa si sökhi turiara khö Lowalangi”. (Roma 3:23) Lö hadöi niha sinangea mu’olowalangigö. Lö omuso dödö Yehowa, na tafosuma-sumange sibai niha.

8, 9. (a) Hewisa wamaigi ndra Samaduhu’ö Yehowa ndra samatörö? (b) Hawa’ara tola lö ta’o’ö hadia ni’andrö ndra samatörö khöda?

⁸ So ösa niha sinangea tafosumange hegöi ta’ame’egö tödö börö dadaoma ni’okhögöra. Duma-dumania, angeraigö sanandrösa khö ndra samatörö ba hadia zi tola lafalua khömö. La’ame’egö tödö hadia zoguna ba nono mbanuara ba latolo ena’ö lö ameta’uö ba zi fasuira. Oya mbua nitemada ba halöwöra. Imane sinenge sotöi Faulo wa ira samatörö tola tabali’ö ira ’salawa’. Ifarou ita ena’ö ta’o’ö huku nibe’era. Imane, ”Midozigö ira, wame’e ömömi, . . .  beo ba zanema beo” ba ”sumange ba nifosumange”.—Roma 13:1, 7.

⁹ Ya’ita Samaduhu’ö Yehowa, tafalua fefu hadia zi tola tafalua ba wangoroma’ö wa ta’ame’egö tödö ndra samatörö. Tatu manö, ero sambua soi fabö’ö-bö’ö zasese lafalua. Andrö wa hadia nitötöna ndra samatörö khöda ba zi sambua banua, fabö’ö nitötöna ndra samatörö ba mbanua bö’ö. Hewa’ae simanö, moguna falulu fohalöwö ita khö ndra samatörö ba wamalua halöwöra. Hiza’i, na la’andrö khöda ba wamalua hadia ia zi möi fangaröu’ö ya’ita khö Yehowa, bö’i tafalua da’ö. Abölö ta’o’ö ba tafosumange Yehowa moroi ba niha.—Baso I Fetero 2:13-17.

10. Hewisa nono mbanua Lowalangi ba götö föna no tobali ira duma-duma si sökhi khöda iada’a?

¹⁰ Tola tafaha’ö ita moroi khö ndra samosumange Yehowa ba götö föna, samosumange niha samatörö ya’ira. Yosefo ba Maria, no sambua duma-duma si sökhi. Ba ginötö omasi zamatörö Roma i’ila hadauga niha zi toröi ba mbanua andrö, möi Yosefo hegöi Maria ba Mbetilekhema ba wamanura’ö töira hewa’ae no ahatö mo’ono Maria. (Luka 2:1-5) Duma-duma tanö bö’ö ya’ia da’ö sinenge sotöi Faulo. Me laböbögö khönia zi lö duhu wa no ifalua zala, si fao famosumange ibu’a ba hulunia hadia niböbögö khönia föna Razo Herode Agerifa ba föna Weso, si tobali gubernur Roma ba provinsi Yudea.—Halöwö Zinenge 25:1-12; 26:1-3.

11, 12. (a) Hana wa tebai tabe’e zumange si tohude khö ndra sondrönia’ö ba agama? (b) Hadia zalua me iforoma’ö samösa Samaduhu’ö ba Austria fo’ame’egö tödö khö zi samösa politikus?

¹¹ Hewisa ndra sondrönia’ö ba agama? Hadia moguna tabe’e khöra zumange si tohude? Tafosumange ira simane wamosumangeda niha bö’ö. Fasala ita na tabe’e khöra zumange si tohude, hewa’ae na la’andrö ia khöda. Hadia mbörö? Börö me agama faya andre lö lafaha’ö zindruhu sanandrösa khö Lowalangi hegöi ba Daromalinia, Sura Ni’amoni’ö. Ikata’ö ira Yesu, ba ifotöi ira samini tödö, hegöi sondrönia’ö si lö sökhi. (Matai’o 23:23, 24) Hiza’i, lö fasala na tohude lala wamosumangeda hegöi na ta’ame’egö tödö sibai ndra samatörö, börö me tola manö latolo ita na tafalua da’ö.

 ¹² So samösa politikus moroi ba Austria sotöi Dr. Heinrich Gleissner. Me alua Wasuwöta Gulidanö II, lara’u ia ira Nazi. Ba ginötö la’ohe ia ba gurunga, falukha ia khö Leopold Engleitner, samösa Samaduhu’ö sowölö-ölö moroi ba Austria. Ihaogö wanutunö talifusöda Engleitner hadia nifaduhusinia tödö khö Dr. Gleissner, samondro-ndrongo nifa’emania. Me no awai wasuwöta, asese i’oguna’ö fakania Gleissner ba wanolo ndra Samaduhu’ö ba Austria. Te so ni’ilamö duma-suma si sökhi tanö bö’ö salua börö me laforoma’ö ira niha Keriso wa la’ame’egö tödö ndra samatörö.

13. Haniha niha sabölö tafosumange hegöi ta’ame’egö tödö, ba hadia mbörö?

¹³ Tafosumange ba ta’ame’egö tödö ndra talifusöda. Mendrua manö ndra talifusöda sondrönia’ö, simane satua sokubaloi, satua samasui, Panitia Ndraha, hegöi ira Boto Solohe. (Baso I Timoteo 5:17.) Ya’ira andre la’ame’egö tödö zoguna ba nono mbanua Lowalangi, ba ifotöi ira Sura Ni’amoni’ö amaedola ’buala ba niha’. (Efeso 4:8) Hewa’ae fabö’ö-bö’ö mbanuara, fa’alawa zekolara, dadaomara, mazui fa’ebua gokhötara, hiza’i hasambalö tafosumange ira. Labe’e khöda duma-duma si sökhi ira niha Keriso ba götö siföföna. Lafosumange ndra matua sondrönia’ö ya’ira, ba tafalua göi zimane da’ö iada’a. Ba ginötö fao ita khöra, lö tabali’ö ira simane mala’ika, si tohude moroi ba niha. Hiza’i, moguna ta’ame’egö tödö ba tafosumange ira börö halöwö nifaluara hegöi fangide-ngide’ö  niforoma’öra.—Baso II Korindro 1:24; Fama’ele’ö 19:10.

14, 15. Hadia gamaehuta ndra satua sokubaloi niha Keriso khö ndra sondrönia’ö agama?

¹⁴ Ira satua sokubaloi hulö simane gubalo si so fangide-ngide’ö. Lö omasi ira na labali’ö ira simane artis. No aröu faehu ira moroi khö ndra sondrönia’ö agama ba götö da’a hegöi sondrönia’ö agama ba götö Yesu. Imane Yesu, ”Ba no omasi ira naha tanö si yawa ba gowuloa ba dadaoma tanö si yawa ba zekola; ba omasi ira na la’owa’i ira ba kade.”—Matai’o 23:6, 7.

¹⁵ Ira satua sokubaloi niha Keriso la’o’ö wehede Yesu me imane, ”Ba böi ndramube’e töimi Zamaha’ö, ha sa samösa Zamaha’ö ya’ami, ba si fatalifusö ami fefu. Ba böi fa’ama ami ba niha ba gulidanö, ha sa samösa Namami, si so ba zorugo. Ba böi ndramube’e töimi zolohe, me ha samösa Zolohe ya’ami, Keriso. Enonimi zebuami. Ba samali’ö salawa ya’ia, ba ni’ide-ide’ö dania. Ba sangide-ngide’ö ya’ia, ba nibali’ö salawa.” (Matai’o 23:8-12) Hasambalö la’omasi’ö, la’ame’egö tödö ba lafosumange ndra satua sokubaloi ba mbanua niha Keriso ba zi sagörö ulidanö ira talifusöra na so khöra wangide-ngide’ö ba na la’o’ö wehede Yesu.

16. Hadia mbörö wa moguna taforege ba wangoroma’ö sumange?

¹⁶ Te oya ginötö ni’oguna’öda ena’ö ta’ila hewisa wamosumange niha bö’ö. Da’a zalua ba niha Keriso siföföna. (Halöwö Zinenge 10:22-26; III Yohane 9, 10) Hiza’i, moguna taforege wamalua ya’ia. Na tafosumange niha bö’o ba lala somasi Yehowa, oya mbua nitemada.

17. Hadia manö mbua na tafosumange niha sangai halöwö?

¹⁷ Ba ginötö tafosumange ba ta’ame’egö tödö ndra samatörö si so ba zifasuida, tola manö la’o’awögö ita ba wamalua halöwö fanuriaigö. Tola göi la’okhögö wangera-ngera satulö ba halöwö fanuriaigö nifaluada. Da’a zalua ba Jerman ba zi hauga fakhe silalö, me möi samösa perintis sotöi Birgit ba wangondrasi kelulusan sekola nononia alawe. Lamane khö Birgit ira guru wa omuso sibai dödöra ba zi hauga fakhe andre börö me so nono Zamaduhu’ö Yehowa ba zekola da’ö. Larasoi wa iraono Samaduhu’ö Yehowa tola labali’ö nahia si sökhi zekola. Imane khöra Birgit, ”La’o’ö goi-goi Lowalangi iraonoma hegöi fanuturu lala moroi khönia, simane ba wo’ame’egö tödö hegöi ba wamosumange ndra gurura.” Imane samösa guru wa na fefu ndraono simane nono ndra Samaduhu’ö Yehowa, aoha sibai wamalua famaha’ö. La’okhögö lala wangera-ngera satulö ba ndraono Samaduhu’ö  Yehowa, irege hauga migu aefa da’ö, so samösa guru sangondrasi kebaktian.

18, 19. Hadia zinangea tatörö tödöda ba wamosumange ndra satua sokubaloi?

¹⁸ Goi-goi si so ba Daromali Lowalangi tola möi fanoloda ena’ö ta’ila hewisa zinangeania lala wamosumangeda ndra satua sokubaloi ba mbanua niha Keriso. (Baso Heberai’o 13:7, 17.) Tola göi tasuno ira ba halöwö si no lafalua. Ba ginötö ta’o’ö wanuturu lala nibe’era, da’a zi tola manolo ndra satua sokubaloi ena’ö owua-wua dödöra ba wamalua halöwöra. Imane Sura Ni’amoni’ö wa moguna ta’o’ö wamatira. Hiza’i, tenga da’ö geluahania wa tahaogö sibai ta’o’ö hadia ”zabölö oroma” moroi ba lala wonukha, fehede, hegöi famaha’ö ndra satua sokubaloi. Na tafalua da’ö, hulö na abölö ta’o’ö ira moroi na ta’o’ö Keriso. Moguna tatörö tödöda wa ira satua sokubaloi andre lö mo’ahonoa simane ya’ita.

¹⁹ Na tafosumange ba ta’ame’egö tödö ndra satua sokubaloi ba lö tafagölösi ira simane artis, da’a zi möi fanolo khöra. Hewisa wa tola? Tola aoha khöra wangokhögö fangide-ngide’ö ba latimbagö wangera-ngera sanguma’ö wa abölö tohude ira moroi ba niha bö’ö mazui wa fefu nifaluara oi manö atulö.

20. Hadia mbua nitemada ba ginötö tafosumange niha bö’ö?

²⁰ Na tafosumange niha bö’ö tola möi fanoloda da’ö ba wanimbagö gamuata fangalui tana khöda, ba möi fanoloda ba wangokhögö fangide-ngide’ö ba ginötö la’ame’egö tödö sibai ita niha bö’ö. Tola göi möi folumö’ö ba fanoloda ena’ö lö awuwu ita na i’afatöisi dödöda niha nifosumangeda andrö. Tola göi itugu hasara dödöda ba organisasi Yehowa. Lö ifohude-hude organisasi wame’e sumange ba niha, he niha si faduhu tödö mazui niha si lö faduhu tödö.

21. Hadia mbua si tohude nitemada na tafosumange niha bö’ö?

²¹ Bua si tohude nitemada na tafosumange niha bö’ö ya’ia da’ö tola ta’omusoi’ö dödö Lowalangi. Tafalua hadia ni’andrönia khöda ba lö faröi ita khönia. Tola ibe’e wanema li Yehowa khö Zatana, sanguma’ö wa samösa lö hadöi niha si lö faröi. (Gamaedola 27:11) Ato niha ba gulidanö si lö mangila hewisa lala satulö ba wamosumange niha bö’ö. Hiza’i, ta’andrö sibai saohagölö börö me ta’ila hewisa wame’e sumange ba lala somasi Yehowa!