1. Hadia mbörö wa ihalö gangetula si fasala Ka’ino, ba hadia lua-luania?

MOGUNA ihalö gangetula sebua Ka’ino. Moguna ifili ba wotimbagö tödönia si lö sökhi, si tola manga’asogö mbua si sökhi. Mazui itehegö ifatörö ia tödönia ba wangai angetula ba nifaluania, si tola manga’asogö abula dödö. Itutunö khöda Sura Ni’amoni’ö wa ihalö gangetula si fasala Ka’ino. Lua-lua gangetula nihalönia ya’ia da’ö mate dalifusönia sotöi Habeli, ba tekiko wahuwusania khö Zomböi ya’ia.—I Moze 4:3-16.

2. Hana wa moguna sibai tahalö gangetula si sökhi?

² Simanö göi ita fefu, moguna tafili ba tahalö gangetula ba wa’auri. So ösa gangetula sabölö moguna, ba tanö bö’önia lö’ö. Hiza’i, oya gangetula nihalöda sanga’asogö lua-lua sebua ba wa’aurida. Ba ginötö tahalö gangetula si sökhi, te ha ma’ifu gabula dödö nitaögöda ba tola abölö ohahau dödöda. Hiza’i, na tahalö gangetula si lö sökhi, afönu gabula dödö ba fa’afatö dödö wa’aurida.—Gamaedola 14:8.

3. (a) Ba wangai angetula si sökhi, hadia zinangea tafaduhusi tödö? (b) Hadia wanofu-nofu nitutunöda?

 ³ Hadia zi tola manolo ya’ita ba wangai angetula si sökhi? Moguna mamati ita khö Lowalangi, faduhu dödöda wa omasi ia itolo ita ba ibe’e khöda wa’atua-tua ba wangai angetula si sökhi. Moguna göi mamati ita ba Daromalinia, tafaduhusi tödö mene-menenia. (Baso Yakobo 1:5-8.) Na tahatö’ö ita khö Yehowa ba na itugu ta’omasi’ö Daromalinia, da’a zanolo ya’ita irege faduhu dödöda wa i’ila hadia zi sökhi khöda. Aefa da’ö, moguna tafareso Daromalinia fatua lö tahalö gangetula. Hiza’i, hewisa ena’ö tola tedou wa’atua-tuada ba wangai angetula si sökhi? Hadia moguna tabulö’ö gangetula si no tahalö?

4. Hadia gangetula nihalö Gadamo, ba hadia lua-luania?

⁴ I’otarai ba wamobörö waö-waö wa’auri, moguna lahalö gangetula si sökhi niha. Niha siföföna sotöi Adamo, moguna ihalö gangetula hadia ifondro-ndrongo wo’omonia Khawa mazui Somböi ya’ia, Yehowa. Ifili Adamo ba wamondro-ndrongo Khawa, sondrönisi ya’ia ba wangai angetula si lö sökhi. Lua-luania, ifofanö Gadamo Yehowa moroi ba kabu Edena, ba gafuriatania mate ia. Iada’a, tataögö göi wamakao börö gangetula si fasala nihalö Gadamo.

5. Hewisa zinangeania wamaigida noro dödö ni’okhögöda ba wangai angetula?

⁵ So ösa zanguma’ö wa itugu aoha wa’aurira na lö lahalö gangetula. Te simanö göi nirasoimö. Hiza’i, sökhi na tatörö tödöda wa ifazökhi niha Yehowa tenga simane robot si lö fangera-ngera mazui si tebai mangai angetula. No ibe’e khöda Daromalinia, samaha’ö ya’ita ba wangai angetula si sökhi. Omasi Yehowa na tahalö gangetula, ba da’a zi tola manolo ya’ita. Angeraigö duma-duma andre.

6, 7. Hadia gangetula nihalö ndraono Gizara’eli, ba hana wa abua khöra ba wangai angetula? (Faigi gambara ba wamobörö wamaha’ö.)

⁶ Ba ginötö toröi ira ba Danö Gamabu’ula, moguna lafili iraono Gizara’eli hadia Yehowa nifosumangera mazui lowalangi bö’ö. (Baso Yosua 24:15.) Hulö angetula saoha sibai da’a. Hiza’i, angetula nihalöra zotatugöi fa’auri ba fa’amatera. Ba götö Zanguhuku, asese lafili iraono Gizare’eli ba wamalua si lö sökhi. Laböhöli wamosumange Yehowa ba ibörögö lafosumange lowalangi faya. (Zanguhuku 2:3, 11-23) Ba götö zama’ele’ö sotoi Elia, moguna lahalö gangetula ono mbanua Lowalangi hadia Yehowa nifosumangera mazui lowalangi faya Mba’ali. (I Razo 18:21) Aoha sibai wangai angetula da’ö börö me famosumange Yehowa no sabölö sökhi. Niha satua-tua lö omasi ira lafosumange lowalangi si lö noso. Hiza’i, lö la’ila lahalö gangetula. Imane Sura Ni’amoni’ö wa dua-dua dödö ndraono Gizara’eli ba wamosumange Yehowa. Si  fao fa’atua-tua, ifarou ira Elia ena’ö lafili ba wamosumange Lowalangi satulö, Yehowa.

⁷ Hana wa abua ba ndraono Gizara’eli ba wangai angetula si sökhi? Si oföna, lö mamati ira khö Yehowa, ba lö lafondro-ndrongo niwa’önia. Lö faduhu dödöra khö Yehowa, ba lö labe’e ginötöra ba wamaha’ö ya’ira sanandrösa khönia mazui fa’atua-tuania. Na lafalua mena’ö da’ö, hadia zi no lafaha’ö ira tola möi fanolora ba wangai angetula si sökhi. (Zinunö 25:12) Si dua, tedönisi dödö ndraono Gizara’eli ba niha si so ba mbanua bö’ö. Ladönisi wangera-ngera ndraono Gizara’eli, ba lahalö gangetula khöra. Lua-luania, ibörögö la’o’ö niha baero ba lafosumange lowalangi faya. Ba zi hauga fakhe silalö, no ifangelama ira Yehowa ba zalua andre.—II Moze 23:2.

8. Hadia wamaha’ö si sökhi si tola tahalö ba ndraono Gizara’eli?

⁸ Duma-duma ndraono Gizara’eli zamaha’ö ya’ita wa na tahalö gangetula, moguna ta’oguna’ö Daromali Lowalangi. Ifangelama ita Galatia 6:5 wa fefu niha la’onorogö tödö zamösana hadia gangetula nihalöra. Ba da’a aboto ba dödöda wa böi tabe’e noro dödö niha bö’ö ba wangai angetula khöda. Moguna tafaha’ö ita hadia zindruhu niwa’ö Lowalangi ba tafili wamalua da’ö.

9. Hana wa tobali de’ala na tatehegö niha bö’ö zangai angetula khöda?

⁹ Hewisa wa tola tatehegö niha bö’ö zangai angetula khöda? Na tatehegö lafarou dödöda ba wangai angetula si lö sökhi. (Gamaedola 1:10, 15) No sambua de’ala da’a. Hiza’i, moguna ta’onorogö tödö ba wolo’ö dödöda side-ide si no ifaha’ö Sura Ni’amoni’ö. Ba ginötö tatehegö niha bö’ö zangai angetula khöda eluahania tahalö gangetula ba wolo’ö ya’ira. Da’a no angetula si tola manga’asogö abula dödö.

10. Hadia wamangelama nibe’e Waulo ba niha Galatia?

¹⁰ Sinenge sotöi Faulo, ifangelama niha si so ba Galatia ena’ö lö latehegö niha bö’ö zangai angetula khöra. (Baso Galatia 4:17.) So ösa ndra talifusöda ba Galatia, latandraigö ba wangai angetula ba niha bö’ö ba mbanua niha Keriso. Hadia gohitö dödöra? Niha sangalui tana khöra andre, omasi ira na ya’ira ni’o’ö ndra talifusöra tenga ira sinenge. Lö khöra fangide-ngide’ö, ba lö la’ame’egö tödö ndra talifusöra ba wangai angetula samösa.

11. Hewisa wanoloda niha bö’ö ba ginötö lahalö gangetula?

¹¹ Tola tahalö wamaha’ö ba duma-duma si sökhi nibe’e Waulo. Aboto ba dödönia wa tola lahalö samösa gangetula ira talifusönia, ba i’ame’egö tödö da’ö. (Baso II Korindro 1:24.) Iada’a, la’o’ö duma-duma da’a ira satua sokubaloi ba ginötö labe’e mene-mene so’amakhaita ba wangai angetula samösa. Omuso dödöra ba  wame’e mene-mene si te’odane-dane ba Daromali Lowalangi khö ndra talifusöra. Hiza’i, moguna la’angenanöi ira satua sokubaloi ena’ö böi lahalö gangetula ba niha bö’ö, börö me niha da’ö samösa dania zanema mbuania ba wa’auri. Famaha’ö si sökhi ba da’a ya’ia da’ö: Tola tatolo niha bö’ö ena’ö aboto ba dödöra mene-mene Zura Ni’amoni’ö soguna ba zalua khöra. Hewa’ae simanö, moguna lahalö samösa gangetula ira talifusöda ba la’onorogö tödö da’ö. Ba ginötö lahalö gangetula si sökhi, tola latema mbuania. Aboto ba dödöda wa böi irai so ba wangera-ngerada wa ya’ita zinangea mangai angetula khö ndra talifusöda.

12, 13. Hana wa tobali de’ala na tahalö gangetula ba ginötö mofönu mazui afatö dödöda?

¹² Iada’a, ato niha zolo’ö niwa’ö dödöra ba ginötö lahalö gangetula. Hiza’i, tola möi de’ala da’a. Ifangelama ita Sura Ni’amoni’ö wa böi ta’odaligö dödöda si lö mo’ahonoa ba wangai angetula khöda. (Gamaedola 28:26) Tebai ta’odaligö dödöda börö me ”no tefuyu dödö niha, moroi ba danö bö’ö fefu, ba si lö sökhi”. (Yeremia 17:9) Oya duma-duma ba Zura Ni’amoni’ö sangoroma’ö lua-lua si lö sökhi börö me la’odaligö dödöra si lö mo’ahonoa. (I Razo 11:9; Yeremia 3:17; 13:10) Hadia zalua na ta’o’ö dödöda ba ginötö tahalö gangetula?

¹³ Ifarou ita Yehowa ena’ö ta’omasi’ö ia soroi ba dödö ba ta’omasi’ö göi nawöda simane fangomasi’öda ya’ita samösa. (Matai’o 22:37-39) Hiza’i, moguna tahaogö ta’angenanöi. Ba ngenoli moroi yawa, so ayati Zura Ni’amoni’ö sangoroma’ö hadia de’alania na ta’odaligö dödöda ba wamalua hadia ni’era-erada hegöi nifaluada. Duma-dumania, abua sibai ba niha sofönu-fönu wangai angetula si sökhi. (Gamaedola 14:17; 29:22) Abua göi  ba niha safatö tödö ba wangai angetula si sökhi. (IV Moze 32:6-12; Gamaedola 24:10) Moguna tatehegö goi-goi Lowalangi ba wame’e fanuturu lala ba wangera-ngerada. (Roma 7:25) Ba ginötö tahalö gangetula sabölö tohude, böi ta’odaligö dödöda ba wamalua hadia ia.

14. Hewisa wa tola ta’ila wa lö fasala na tabulö’ö gangetulada?

¹⁴ Moguna tahalö gangetula si sökhi. Niha satua-tua i’ila wa itaria moguna ifatimbaisi gangetula si no ihalö ba zilalö ba tola manö ibulö’ö da’ö. Ibe’e khöda duma-duma si sökhi Lowalangi Yehowa. Angeraigö hadia nifaluania ba niha Niniwe ba götö Yona. ”Ba me i’ila wolaura Lowalangi, wa laböhöli mbua-buara si lö sökhi andrö, ba aröu-röu ba dödö Lowalangi wamakiko andrö niwa’önia, fameta’u ya’ira, ba lö ifalua.” (Yona 3:10) Ba ginötö i’ila Yehowa wa labulö’ö wa’aurira niha Niniwe ba labato wamalua si lö sökhi, ibulö’ö gangetulania. Da’a zangoroma’ö wa i’okhögö wangera-ngera satulö, fangide-ngide’ö, ba fa’akhakhö dödö. No aröu faehu ia moroi ba niha gulidanö. Tola ihalö gangetula si sökhi Yehowa, hewa’ae ba ginötö mofönu ia.

15. Hana wa itaria moguna tabulö’ö gangetulada?

¹⁵ Itaria moguna tafuli tafatimbaisi gangetula si no tahalö, simane na tebulö zalua khöda. Törö tödöu wa itaria ibulö’ö gangetulania Yehowa. (I Razo 21:20, 21, 27-29; II Razo 20:1-5) Tola manö samuza inötö moguna tabulö’ö gangetulada ba ginötö tatema wamohouni sibou. Angeraigö duma-duma Razo Dawido. Ihalö gangetula sanandrösa khö Meriba’ali ma’uwu Zaulo moroi ba duria si sala nibe’e khönia. Ba me itema duria satulö Dawido, ibulö’ö gangetulania. (II Zamueli 19:24-29) Itaria, sökhi göi na tafalua zimane da’ö.

16. (a) Hadia wanuturu lala si tola manolo ya’ita ba ginötö tahalö gangetula? (b) Hana wa moguna tafuli ta’angeraigö gangetula si no irai tahalö, ba hewisa wamaluada da’ö?

¹⁶ Imane Sura Ni’amoni’ö wa böi aösö-aösö manö tahalö gangetula si tohude. (Gamaedola 21:5) Moguna ta’oguna’ö ginötö ba wo’angeraigö hadia zindruhunia zalua ena’ö tola tahalö gangetula si sökhi. (I Tesalonika 5:21) Högö yomo ba nomo, moguna i’oguna’ö ginötönia ba wamalua riset ba Zura Ni’amoni’ö hegöi ba publikasida fatua lö ihalö gangetula. Sökhi göi na ifondro-ndrongo mbua gera-era nösi nomonia. Törö tödömö wa ifarou Gaberahamo Lowalangi ena’ö ifondro-ndrongo wa’omonia. (I Moze 21:9-12) Moguna la’oguna’ö ginötöra ira satua sokubaloi ba wamalua riset. Ba ginötö latema wamohouni si bohou ba moguna labulö’ö gangetula si no irai lahalö, lö ata’u ira na so zi lö mamosumange ya’ira. Ira satua sokubaloi si so fangera-ngera satulö hegöi fangide-ngide’ö, hasambalö  labulö’ö wangera-ngerara hegöi gangetulara ba ginötö moguna da’ö. Ba sökhi göi na ta’o’ö duma-dumara andre. Da’a zi tola manga’asogö fa’owua-wua dödö ba so wahasara dödö ba mbanua niha Keriso.—Halöwö Zinenge 6:1-4.

17. Hadia zi tola manolo ya’ita ena’ö tola tahalö gangetula?

¹⁷ So ösa gangetula sabölö ebua moroi ba danö bö’ö. Duma-dumania, hadia mangowalu ita, ha’ökhö mangowalu ita, mazui ba wamörögö wamalua halöwö safönu inötö. No angetula sabölö ebua da’a. Fatua lö tahalö gangetula sabölö tohude, moguna tahaogö ta’angeraigö ba ta’andrö wanolo moroi khö Yehowa. Te lö i’anemai tatema wanema li, hiza’i na omasi ita tahalö gangetula si sökhi, moguna faduhu dödöda khö Yehowa, tafondro-ndrongo wanuturu lala hegöi mene-mene nibe’enia. (Gamaedola 1:5) No ibe’e khöda Yehowa wanuturu lala si sökhi ba Daromalinia. Andrö wa moguna tafalua riset ba ta’andrö wanuturu lala moroi khö Yehowa. Tola ibe’e khöda mbua-bua sinangea ta’oguna’ö irege tola tahalö gangetula si sökhi ba lala somasi ia. Fatua lö tahalö gangetula sabölö tohude, moguna tasofu khöda samösa: ’Hadia oroma ba gangetulagu wa u’omasi’ö Yehowa? Hadia tola manga’asogö fa’owua-wua dödö hegöi fahasara dödö yomo ba nösi nomogu da’ö? Ba hadia da’ö zangoroma’ö wa so khögu wa’ebolo dödö ba fa’ebua dödö?’

18. Hana wa omasi Yehowa na ya’ita samösa zangai angetula?

¹⁸ Lö ifaso ita Yehowa ba wangomasi’ö ya’ia hegöi ba wamosumange ya’ia. Ibe’e khöda mbuala ba wangai angetula samösa. I’ame’egö tödö gangetula nihalöda, hadia tafili ba wamosumange ya’ia mazui lö’ö. (Yosua 24:15; Zangombakha 5:4) Hiza’i, omasi ia na tafalua gangetula si no tahalö si te’odane-dane moroi ba Daromalinia. Na mamati ita ba wanuturu lala moroi khö Yehowa ba tafalua goi-goi nibe’enia khöda, tola tahalö gangetula si sökhi. Ba taforoma’ö wa lö mangiwa ita ba ngawalö nifaluada.—Yakobo 1:5-8; 4:8.