1. Hadia mbua-bua niʼokhögö Yesu si möi fondrara dödöda? Tutunö.

SO KHÖ Yesu waʼabölö ba wangiʼila hadia gabula dödö nitaögö niha si lö moʼahonoa. Tatu möi fondrara dödöda daʼa. Me so Yesu ba gulidanö, tola ’iʼomusoiʼö dödönia awö zomuso tödö, ba meʼege-ege ia awö zege-ege’. (Rom. 12:15) Duma-dumania, ”omuso dödö” Yesu me mangawuli ndra nifahaʼönia si 70 si fao faʼomuso dödö börö me mofozu halöwö fanuriaigöra. (Luk. 10:17-21) Me iʼila Yesu abu dödö niha börö me no mate Lazaro, ”abu sibai dödönia ba ifatalikhö ia”.​—Yoh. 11:33.

2. Hana wa tola iforomaʼö Yesu wa irasoi hadia nirasoi niha böʼö?

² Hewaʼae moʼahonoa Yesu, so khönia waʼahakhö dödö ba faʼasökhi dödö ba niha sebua horö. Hana wa simanö? Si oföna, börö me iʼomasiʼö niha. Simane nidunö-dunö ba wamahaʼö si no aefa, ’somuso tödö ia ba nono niha’. (Gamd. 8:31) Börö me iʼomasiʼö niha, iforege enaʼö aboto ba dödönia lala wangera-ngerara. Imane sinenge sotöi Yohane, ’iʼila Yesu nösi dödö niha’. (Yoh. 2:25) Niha nifalukhaisi Yesu tola larasoi wa so khönia waʼahakhö dödö ba iʼomasiʼö ira. Andrö wa omasi ira wamondrongo turia somuso dödö nifaʼema Yesu. Na lö tebulö ita ba woloʼö faʼahakhö dödö Yesu, tola mofozu ita ba wanolo niha na tafalua halöwö fanuriaigö.​—2 Tim. 4:5.

3-4. (a) Na tarasoi hadia nirasoi niha böʼö, hewisa wamaigida halöwö fanuriaigö? (b) Hadia nitutunöda ba wamahaʼö daʼa?

³ Aboto ba dödö Waulo wa hasambalö möi ia manuriaigö, simanö göi ita. (1 Kor. 9:16) Hizaʼi, na tarasoi hadia nirasoi niha böʼö, lö tamane tödöda wa fanuriaigö andrö no sinangea tafalua. Möi ita manuriaigö börö me taʼameʼegö tödö niha ba omasi ita wanolo yaʼira. Aboto ba dödöda wa ”ohahau dödö ba wameʼe moroi ba wanema”. (Hal. 20:35) Na tatörö tödöda  ayati daʼa, tola itugu taʼomasiʼö halöwö fanuriaigö.

⁴ Ba wamahaʼö daʼa, tatutunö dania hewisa lalada ba wangoromaʼö wa tarasoi hadia nirasoi niha böʼö ba ginötö manuriaigö ita. Si oföna, tatutunö dania hadia nirasoi Yesu ba niha hegöi hadia wamahaʼönia khöda. Aefa daʼö, tatutunö öfa lala ba woloʼöda duma-duma Yesu.​—1 Fet. 2:21.

5-6. (a) Haʼökhö iforomaʼö Yesu wa irasoi hadia nirasoi niha böʼö? (b) Hana wa so khö Yesu waʼahakhö dödö ba niha irege manuriaigö ia khöra simane nifaʼeleʼö ba Yesaya 61:1, 2?

⁵ Tatutunö dania hewisa wangoromaʼö Yesu wa irasoi hadia nirasoi niha böʼö. Samuza inötö, erege dödö Yesu hegöi ndra nifahaʼönia börö me no aefa manuriaigö ira ba lö khöra folombase irege ”lö saʼae inötöra wemanga”. Andrö iwaʼö Yesu khö ndra nifahaʼönia enaʼö ’molombase ira sabata’. Möi ira ba ”nahia si lö niha-niha enaʼö lö fao khöra niha sato”. Hizaʼi me laʼila ira, fagohi niha sato weʼamöi ba nahiara ba oföna larugi. Hadia nifalua Yesu me irugi ba iʼila niha sato? ”Ahakhö dödönia * börö me hulö mbiri-biri si lö kubalo ira. Andrö wa oya ifahaʼö ira.”​—Mrk. 6:30-34.

⁶ Nehegö hadia mbörö wa so khö Yesu waʼahakhö dödö mazui irasoi hadia nirasoi niha böʼö. Iʼilawa yaʼira ”hulö mbiri-biri si lö kubalo”. Aboto ba dödö Yesu wa so ösa ba gotaluara niha si numana mazui laforege ba wombönökhi soguna ba nösi nomora. Mazui so ba gotaluara zabu tödö börö me no mate niha niʼomasiʼöra. Na daʼö zalua khöra, tatu aboto ba dödö Yesu hadia nirasoira. Simane nitutunö ba wamahaʼö si no aefa, te no irai irasoi Yesu zalua khöra andrö. Me iʼameʼegö tödö Yesu hadia nirasoi niha böʼö, omasi ibeʼe duria somuso dödö si tobali fondrara dödöra.​—Baso Yesaya 61:1, 2.

7. Hewisa woloʼöda duma-duma Yesu?

 ⁷ Hadia wamahaʼö nihalöda moroi ba duma-duma Yesu? Hulö simane niha ba zi fasui Yesu, simane daʼö göi niha ba zi fasuida ”hulö mbiri-biri si lö kubalo ira”. Lataögö ngawalö gabula dödö ba so khöda zi tobali fanolo khöra yaʼia daʼö turia somuso dödö sanandrösa ba Wamatörö Lowalangi. (Fam. 14:6) Moguna taʼoʼö Zoʼaya yaʼita ba wanuriaigö turia somuso dödö börö me ’tahakhösi tödö zi lö töi ba si numana’. (Zin. 72:13) Börö me so khöda waʼahakhö dödö ba niha, omasi ita na so nifaluada si tobali fanolo khöra.

8. Hadia sambua lala si tola taforomaʼö wa tarasoi hadia nirasoi niha böʼö na tafalua wanuriaigö? Beʼe duma-duma.

⁸ Hadia zanolo yaʼita ba wangoromaʼö wa tarasoi hadia nirasoi niha böʼö na manuriaigö ita? Moguna takhalaigö hadia niʼangeragö hegöi nirasoi niha nifalukhaisida. Aefa daʼö, moguna tafalua khöra hadia zomasi ita lafalua khöda niha böʼö, ba ginötö alua khöda simane nirasoira. * (Mat. 7:12) Datatutunö öfa lala ba wamalua yaʼia. Si oföna, angeragö zoguna ba zi samösa-mösa niha. Hulö doto ita na talau manuriaigö. Samösa doto si sökhi, ihaogö woʼangeragö hadia zoguna ba niha nibeʼenia dalu-dalu. Isofu hadia nirasoira ba ihaogö wamondrongo na latutunö khönia hadia nirasoira ba wökhöra andrö. Lö fagölö dalu-dalu nibeʼenia khöra. Hizaʼi, ihaogö wamareso hadia manö wökhö nirasoira, enaʼö tola ibeʼe dalu-dalu si tefaudu. Simanö göi ita, tatu lö fagölö-gölö manö fefu lala niʼogunaʼöda ba wamörögö fahuhuosa ba niha na möi ita manuriaigö. Hizaʼi, taʼodödögö enaʼö aboto ba dödöda hadia zalua khöra hegöi lala wangera-ngerara.

9. Hadia zi tebai tafalua? Tutunö.

⁹ Na falukhaʼö zi samösa niha ba wanuriaigö, böi so ba wangera-ngeramö wa no aboto ba dödömö hadia zalua ba niha daʼö, hadia nifaduhusinia tödö, ba hana wa ifaduhusi tödö daʼö. (Gamd. 18:13) Beʼe wanofu enaʼö öʼila hadia zalua khönia ba hadia nifaduhusinia tödö. (Gamd. 20:5) Na tefaudu ba zi toʼölö mufalua ba mbanuamö, sofu hadia halöwönia, ösi nomonia, hewisa waö-waö waʼaurinia hegöi lala wangera-ngerania. Na tabeʼe wanofu, hulö no tabeʼe khöra ginötö ba wanutunö khöda hadia mbörö wa moguna khöra duria somuso dödö. Na no taʼila hadia zoguna khöra, tola taforomaʼö wa tarasoi hadia nirasoira ba tatolo ira simane nifalua Yesu.​—Fatimbaisi 1 Korindro 9:19-23.

10-11. Ba 2 Korindro 4:7, 8, hadia lala si dua ba wangoromaʼö wa tarasoi hadia nirasoi niha böʼö? Beʼe duma-duma.

¹⁰ Si dua, khalaigö hewisa lala waʼaurira. Börö me yaʼita niha si lö moʼahonoa, oya  gabula dödö nitaögöda. Daʼö mbörö wa tola göi tarasoi maʼifu hadia zalua khöra. (1 Kor. 10:13) Aboto ba dödöda wa basaki waʼauri ba ginötö iadaʼa. Ha börö wanolo Yehowa wa tola tataögö ia. (Baso 2 Korindro 4:7, 8.) Hizaʼi angeragö niha si lö fahuwu khö Yehowa. Laforege samösa ba wanaögö ulidanö iadaʼa. Simane Yesu, tahakhösi tödö göi ira, irege tefarou dödöda ba wangombakha ”turia somuso dödö”.​—Yes. 52:7.

¹¹ Daʼa nirasoi dalifusöda ira matua sotöi Sergey. Fatua lö ifahaʼö ia ba zindruhu, yaʼia niha si lö hede-hede ba saila-aila. Abua khönia fahuhuo ba niha böʼö. Ba gafuriata, omasi ifahaʼö ia ba Zura Niʼamoniʼö. Imane Sergey, ”Ba Zura Niʼamoniʼö uʼila wa moguna ba niha Keriso wanutunö ba niha böʼö hadia nifaduhusira tödö. Me föna, faduhu sibai dödögu wa tebai ufalua daʼö.” Hizaʼi, iʼangeragö niha si lö irai mamondrongo sindruhu. Iʼila wa tola manö basaki waʼaurira börö me lö aboto ba dödöra Yehowa. Imane, ”Fefu zi bohou sawena ufahaʼö ndraʼo zameʼe khögu faʼohahau dödö hegöi faʼahono dödö. Uʼila wa moguna göi larongo niha böʼö zindruhu andrö.” Börö me aboto ba dödö Sergey hadia nirasoi niha böʼö, itugu barani ia ba wanuriaigö. Imane Sergey, ”Börö me ututunö ba niha böʼö sanandrösa ba Zura Niʼamoniʼö, daʼa zameʼe khögu faʼabarani. Itugu aro göi waʼafaduhu dödögu ba nifahaʼögu yaʼo.” *

12-13. Hadia mbörö wa moguna ebolo dödöda ba niha nifahaʼöda? Beʼe duma-duma.

¹² Si tölu, moguna so khöu waʼebolo dödö ba niha nifahaʼöu. Tola manö no aboto sibai ba dödöda zindruhu andrö moroi ba Zura Niʼamoniʼö. Hizaʼi, böi olifu ita, wa bohou daʼö ba dödö niha sato. Aefa daʼö, ato göi niha saro tödö ba nifaduhusira tödö. Te moguna sibai daʼö ba dödöra, ba daʼö göi zi tola mangosambuaʼö yaʼira ba nösi nomora, ba zi toʼölö lafalua, hegöi ba niha si so ba zi fasuira. Hewisa wanoloda yaʼira?

¹³ Tola muʼamaedolagö daʼö simane daʼa:  Na moguna mugati zoroso satua si no tekiko, hadia zinangea mufalua? Gasa-gasa muhaogö zoroso si bohou asese nasa muʼogunaʼö zoroso satua. Na no awai muhaogö zoroso si bohou tola saʼae mududugö zoroso satua. Simanö göi, tebai taʼanemaiʼö taʼandrö ba zi samösa niha enaʼö iröi nifaduhusinia tödö si no ”ara” somasi sibai ia. Si oföna, moguna tatolo ia enaʼö iʼameʼegö tödö wamahaʼö si ”bohou” yaʼia daʼö famahaʼö moroi ba Zura Niʼamoniʼö hewaʼae ba wamobörö ambö aboto ba dödönia daʼö. Aefa daʼö, awena tefaʼanö ira ba wondröi nifaduhusira tödö ba zilalö. Itaria moguna ginötö enaʼö tola tebulö niha simane daʼö.​—Rom. 12:2.

14-15. Hewisa lalada ba wanolo niha enaʼö aboto ba dödöra sanandrösa ba dötönafö faʼauri si lö aetu ba gulidanö faradaiso? Beʼe duma-duma.

¹⁴ Na taʼokhögö waʼebolo dödö ba ginötö möi ita manuriaigö, lö tatötöna enaʼö alio aboto ba dödö niha mazui fao dödöra ba zindruhu si so ba Zura Niʼamoniʼö sawena larongo. Börö me aboto ba dödöda hadia nirasoira, daʼa zamarou tödöda ba wanolo yaʼira ba woʼangeragö famahaʼö moroi ba Zura Niʼamoniʼö hewaʼae lö iʼanemaiʼö aboto ba dödöra daʼö. Duma-dumania, hewisa wanoloda zi samösa niha enaʼö aboto ba dödönia wa taʼokhögö dötönafö faʼauri si lö aetu ba gulidanö faradaiso? Ato niha si lö mangila famahaʼö daʼa. Tola manö faduhu dödöra wa na no mate niha, tebai ifuli auri ia. Mazui, te faduhu dödöra wa fefu niha si sökhi möi ba zorugo. Hewisa lalada ba wanolo yaʼira?

¹⁵ Ifatunö samösa dalifusöda ira matua lala niʼogunaʼönia irege mofozu ba wanuriaigö. Si oföna, ibaso 1 Moze 1:28. Aefa daʼö, ibeʼe wanofu khö zokhö omo, ”Hezo toröi niha zomasi Lowalangi, ba hewisa waʼaurira ba daʼö?” Ato niha zameʼe fanema li, ”Ba gulidanö, ba laʼokhögö waʼauri si sökhi.” Aefa daʼö, ibaso Yesaya 55:11 ba manofu ia, hadia tebulö gohitö dödö Lowalangi. Ato zokhö omo sangumaʼö wa lö tebulö. Aefa daʼö, awena ibaso Zinunö 37:10, 11 ba manofu ia nasa, hewisa dania waʼauri niha ba zi so miföna. Börö me iʼogunaʼö lala simane daʼö, so ösa niha si no itolo irege aboto ba dödöra wa omasi Lowalangi na auri niha si sökhi ba gulidanö Faradaiso sagötö faʼara.

16-17. Ba Gamaedola 3:27, hadia manö zi tola tafalua ba wangoromaʼö wa taʼameʼegö tödö hadia zalua ba niha böʼö? Beʼe duma-duma.

¹⁶ Si öfa, angeragö hadia manö zi tola öfalua ba wangoromaʼö wa öʼameʼegö tödö ira. Duma-dumania, hewisa na ambö tefaudu ginötö waʼatohareda khö zokhö omo? Tola taʼandrö waʼebolo dödönia ba tawaʼö khönia wa tafuli ita ba ginötö si tefaudu. Hewisa na moguna wanolo khö zokhö omo ba wamalua halöwö side-ide? Mazui, hewisa na tebai möi baero zokhö omo ba moguna mutolo ia ba wamalua halöwönia? Tola tatolo ira na alua khöra zimanö.​—Baso Gamaedola 3:27.

¹⁷ Hewaʼae no ide-ide nifaluada khöra si  fao faʼasökhi dödö, no moguna sibai daʼö khöra. Daʼö nirasoi samösa dalifusöda ira alawe. Iforomaʼö waʼahakhö dödö ba isura zura ba zi sambua fongambatö börö me awena mate nonora sawuyu. So ösa ayati si möi fondrara dödö nitutunönia bakha ba zura andrö. Hadia nifalua zi sambua fongambatö andrö? Isura nina nono sawuyu andrö imane, ”Abu sibai dödögu meʼowi, hizaʼi sindruhu-ndruhu möi fangabölöma nösi zura andrö. Uʼandrö sibai saohagölö. Terara sibai dödöma me mabaso ia. Meʼowi töra 20 kali ubaso zura andre. Lö utötöna wa sökhi sibai nösinia, si fao faʼomasi, ba möi fondrara dödöma. Sindruhu-ndruhu maʼandrö sibai saohagölö.” Na taforege ba worasoi gabula dödö niha böʼö ba tatolo ira, tola göi tarasoi mbua si sökhi simane daʼö.

18. Moloʼö 1 Korindro 3:6, 7, hadia zi tebai taʼolifugö ba ginötö tatolo niha nituriaigöda, ba hadia mbörö?

¹⁸ Ba wanuriaigö, tola fao ita ba wanolo niha böʼö enaʼö aboto ba dödöra sanandrösa khö Lowalangi. Hewaʼae fao ita ba wanolo niha, hizaʼi tenga nifaluada zabölö moguna. (Baso 1 Korindro 3:6, 7.) Yehowa zondrönisi niha khönia. (Yoh. 6:44) Ba gafuriata, sotatugöi hadia itema mazui itimbagö duria somuso dödö zi samösa niha teʼodaligö daʼö ba nösi dödönia. (Mat. 13:4-8) Törö tödöu wa ato niha si lö omasi manemaʼö turia somuso dödö nifaʼema Yesu, hewaʼae yaʼia samösa Samahaʼö sebua! Andrö böi ide-ide dödöda na lö omasi niha wamondrongo nifaʼemada hewaʼae omasi ita ba wanolo yaʼira.

19. Hadia mbuania na taforomaʼö wa tarasoi hadia nirasoi niha böʼö ba wanuriaigö?

¹⁹ Oya mbuania khöda na taforomaʼö wa tarasoi hadia nirasoi niha böʼö ba ginötö möi ita manuriaigö. Itugu omuso dödöda ba wanuriaigö ba itugu owua-wua dödöda ba wameʼe. Ba itugu aoha ba niha ”si sökhi amuata somasi manöndra faʼauri si lö aetu” ba wanemaʼö turia somuso dödö. (Hal. 13:48) Börö daʼö ”fatua so ginötö, datafalua zi sökhi ba niha fefu”. (Gal. 6:10) Na tafalua daʼö, tola omuso dödöda börö me tafolakhömi Namada si so ba zorugo.​—Mat. 5:16.