1-2. (a) Hadia lala niʼogunaʼö Yehowa ba wahuhuosa ba niha? (b) Hadia nitutunöda ba wamahaʼö daʼa?

OMASI Yehowa fahuhuo khöda. Ba götö föna, iʼogunaʼö ndra samaʼeleʼö, malaʼika hegöi Ononia Yesu Keriso ba wanutunö hadia zi so ba wangera-ngerania. (Gamo. 3:7; Gal. 3:19; Fam. 1:1) Iadaʼa, fahuhuo khöda Yehowa moroi ba Daromalinia, Sura Niʼamoniʼö. Ibeʼe khöda daʼö enaʼö tola aboto ba dödöda lala wangera-ngerania hegöi nifaluania.

² Sagötö weʼaso Yesu ba gulidanö, no irai fahuhuo Yehowa tölu kali moroi ba zorugo. Ba wamahaʼö daʼa, tatutunö dania hadia niwaʼö Yehowa, hadia wamahaʼö si tola tahalö moroi ba wehedenia ba hadia guna wehedenia khöda.

3. Simane nibasoda ba Mareko 1:9-11, hadia niwaʼö Yehowa me tebayagö idanö Yesu, ba hadia manö zoroma moroi ba wehede andrö?

³ Itutunö ba Mareko 1:9-11 me fahuhuo Yehowa moroi ba zorugo si oföna sibai. (Baso.) Imane, ”Onogu ndraʼugö, niʼomasiʼögu, waʼomasigu ndraʼugö.” Tofakha sibai ba dödö Yesu me irongo wehede Yehowa ba wangoromaʼö faʼomasi hegöi faʼafaduhu dödönia khö Yesu! Moroi ba wehede daʼö, so tölu ngawalö nitutunö Yehowa sanandrösa khö Yesu. Si oföna, Yesu andrö Ononia. Si dua, iʼomasiʼö Nononia andrö Yehowa. Si tölu, omuso dödö Yehowa khö Nononia. Datatutunö ia.

4. Me no aefa tebayagö idanö Yesu, hadia gamakhaita si bohou niʼokhögö Yesu khö Lowalangi?

⁴ ”Onogu Ndraʼugö.” Fehede Yehowa andre zangoromaʼö wa Yesu Ono niʼomasiʼönia, sangokhögö amakhaita si bohou khönia. Me so Yesu ba zorugo, yaʼia andrö ono Lowalangi sangokhögö boto eheha. Hizaʼi me tebayagö ia idanö, tebayoini ia faoma eheha niʼamoniʼö. Ba ginötö daʼö, iforomaʼö Lowalangi wa Yesu andrö Ono nibayoini  khönia. Daʼö mbörö wa tola mangawuli ia ba zorugo tobali Razo hegöi Ere Sebua nibayoini Lowalangi. (Luk. 1:31-33; Heb. 1:8, 9; 2:17) Andrö me tebayagö idanö Yesu, imane Amania, ”Onogu ndraʼugö.”​—Luk. 3:22.

5. Hewisa woloʼöda duma-duma Yehowa ba wangoromaʼö faʼomasi ba lö mangosiwawöi?

⁵ ’Yaʼugö Niʼomasiʼögu.’ Ifatunö Yehowa wa iʼomasiʼö ba lö iʼosiwawöi Yesu. Duma-duma Yehowa tobali famasugi ba dödöda wa moguna taʼabölöʼö niha böʼö. (Yoh. 5:20) Na iforomaʼö niha niʼomasiʼöda wa iʼomasiʼö ita ba isuno zi sökhi si no tafalua, tatu teʼabölöʼö ita. Simane daʼö göi, moguna taʼomasiʼö ba taʼabölöʼö ndra talifusöda ba gangowuloa hegöi ösi nomoda. Na tasuno niha böʼö, itugu aro wamatira ba itugu terou dödöra ba wamosumange Yehowa si fao faʼalöfaröi. Mendrua manö khö ndra satua, moguna laʼabölöʼö ndraonora. Ba ginötö lasuno ndraonora soroi ba dödö ba laforomaʼö waʼomasira, tola tedou ira tobali niha si sökhi.

6. Hana wa tola tafaduhusi tödö Yesu Keriso?

⁶ ”Waʼomasigu ndraʼugö.” Fehede daʼa zangoromaʼö wa faduhu dödö Yehowa khö Yesu wa hasambalö lö faröi ia ba wamalua somasi Namania. Börö me faduhu sibai dödö Yehowa khö Yesu, tatu faduhu göi dödöda khö Yesu wa hasambalö ifalua hadia zi no ifabuʼu Yehowa. (2 Kor. 1:20) Na taʼangerönusi duma-duma Yesu itugu tahalö gangetula ba wamahaʼö yaʼita khönia ba taʼoʼö duma-dumania. Faduhu dödö Yehowa khö nono mbanuania wa hasambalö lö laböhöli wamalua daʼa, simane waʼafaduhu dödönia khö Yesu.​—1 Fet. 2:21.

7. Moloʼö Mataiʼo 17:1-5, hamega fahuhuo Yehowa moroi ba zorugo, ba hadia niwaʼönia?

⁷ Baso Mataiʼo 17:1-5. Fahuhuo Yehowa ba zi dua kali moroi ba zorugo yaʼia daʼö ba ginötö ”faböʼö zikhala Yesu”. Iʼandrö Yesu khö Wetero, Yakobo hegöi Yohane tobali awönia weʼamöi ba hili salawa. Me luo daʼö, ”no mörö” zinengenia si datölu, hizaʼi me maoso ira, laʼila gangilata sahöli-höli dödö. Mohaga mbawa Yesu hulö haga luo ba takile waʼafusi nukhania. Ba laʼila göi Moze hegöi Elia, ba fahuhuo ira khö Yesu sanandrösa ba waʼamatenia hegöi fanusuginia si lö ara tö alua. (Luk. 9:29-32) Aefa daʼö, iʼanemaiʼö so lawuo si haga solumöʼö yaʼira, ba larongo li moroi ba lawuo andrö—li Lowalangi! Simane me tebayagö idanö Yesu, ifuli iforomaʼö Yehowa waʼomasinia hegöi faʼomuso dödönia khö Nononia, imane, ”Onogu daʼa, niʼomasiʼögu, waʼomasigu ia.” Hizaʼi sakali daʼa, inönö wehedenia Yehowa, imane, ”Mifondrondrongo niwaʼönia.”

8. Hadia lua-lua gangilata andrö khö Yesu hegöi khö ndra nifahaʼönia?

⁸ Gangilata andrö zangoromaʼö lakhömi hegöi faʼabölö niʼokhögö Yesu tobali Razo ba Wamatörö Lowalangi. Tatu möi fangabölöʼö Keriso daʼö ba wanaögö famakao hegöi faʼafökhö waʼamate si lö ara tö itaögö. Teʼaroʼö göi wamati ndra nifahaʼönia börö gangilata andrö. Tobali fanolo daʼö khöra ba ginötö tetandraigö waʼalöfaröira hegöi ba wangasiwai halöwö sebua nifaluara. Arakhagö 30 fakhe aefa daʼö, isura zinenge sotöi Fetero sanandrösa ba gangilata andrö. Daʼa zangoromaʼö wa lö olifu ia ba gangilata daʼö.​—2 Fet. 1:16-18.

9. Hadia mene-mene nibeʼe Yesu sinangea laʼoʼö ira nifahaʼönia?

⁹ ”Mifondrondrongo niwaʼönia.” Ba wehede daʼa oroma wa omasi Yehowa enaʼö tafondrondrongo hadia niwaʼö Nononia ba taʼoʼö. Hadia manö niwaʼö Yesu me so ia ba gulidanö? Oya nifatunönia sinangea tafondrondrongo! Duma-dumania, si fao faʼomasi ifahaʼö ndra soloʼö khönia hewisa lala weʼamöi manuriaigö, ba no hauga kali ifasugi ba dödöra enaʼö böi mörö ira. (Mat. 24:42; 28:19, 20) Iʼandrö göi khöra enaʼö lö tebulö waʼaterou dödöra ba böi awuwu. (Luk. 13:24) Ba iʼabeʼeʼö wehedenia khö ndra nifahaʼönia enaʼö faoma laʼomasiʼö nawöra, lö tebulö so wahasara dödö ba laʼoʼö goroisania. (Yoh. 15:10, 12, 13) Mene-mene nibeʼe Yesu moguna sibai khö ndra nifahaʼönia! Irugi maʼökhö, moguna taʼoʼö mene-menenia andrö.

10-11. Hewisa wangoromaʼöda wa tafondrondrongo Yesu?

¹⁰ Imane Yesu, ”Dozi si faʼawö khögu ba zindruhu, lafondrondrongo wehedegu.” (Yoh. 18:37) No taforomaʼö wa tafondrondrongo li Yesu na lö ’tebulö waʼebolo dödöda ba faoma taʼefaʼö zala nawöda soroi ba dödö’. (Kol. 3:13; Luk. 17:3, 4) Ba lö tebulö taturiaigö duria somuso dödö si fao faʼaterou dödö ”he na tefaudu ginötö he na löʼö”.​—2 Tim. 4:2.

¹¹ Imane Yesu, ”Larongo ligu biri-birigu.” (Yoh. 10:27) Laforomaʼö ira soloʼö khö Keriso wa lafondrondrongo linia, yaʼia daʼö lafalua hadia zi no larongo moroi khönia. Lö latehegö mangoloi dödöra börö ’waʼaombö dödö ba waʼauri’. (Luk. 21:34) Hizaʼi, laʼofönaiʼö ba waʼaurira woloʼö Yesu hewaʼae ba ginötö si basaki. Ato ndra talifusöda si göna abula  dödö sebua. Duma-dumania, göna ira folohi, numana sibai waʼaurira ba göna ira göi bencana alam. Hewaʼae simanö, lö faröi ira khö Yehowa. No ifabuʼu khöra Yesu, ”Dozi sanemaʼö oroisagu ba samalua yaʼia, daʼö niha sangomasiʼö yaʼo. Niha sangomasiʼö yaʼo, iʼomasiʼö ia Amagu.”​—Yoh. 14:21.

12. Hadia lala tanö böʼö ba wangoromaʼö wa tafondrondrongo Yesu?

¹² So lala tanö böʼö ba wangoromaʼö wa tafondrondrongo Yesu. Moguna tatuhini niha si no ifataro Yesu ba wondröniaʼö yaʼita. (Heb. 13:7, 17) Ba zi hauga fakhe safuria andre, oya wamohouni nibeʼe organisasi Lowalangi. Duma-dumania, iadaʼa so ösa fakake hegöi lala si bohou niʼogunaʼöda ba wanuriaigö. No göi labohouni waö-waö halöwöda ba gangowuloa barö migu. Aefa daʼö, no lafaudugö göi hewisa lala ba wamasindro, fangehaogö hegöi ba wondrorogö Balai Mbanua Lowalangi. Soguna khöda wa labeʼe fefu wanuturu lala si bohou andre, ba daʼö fefu zangoromaʼö wa iʼomasiʼö ita organisasi Lowalangi. Tatu taʼandrö sibai saohagölö! Tola faduhu dödöda khö Yehowa wa hasambalö ifahowuʼö wamorege si no tafalua ba woloʼö fanuturu lala nibeʼe organisasinia.

13. Hadia manö mbua nitemada na tafondrondrongo Yesu?

¹³ Na tahaogö tafondrondrongo fefu hadia zi no ifahaʼö Yesu, tola tatema mbuania. No ifabuʼu Yesu khö ndra nifahaʼönia wa famahaʼönia tobali fangokafu dödö. Imane, ”Ba misöndra wolombase. Sökhi kalo mbagi andre, ba aoha noro khögu.” (Mat. 11:28-30) Taromali Lowalangi, tefarahu göi ba daʼö zi öfa Injil, sanutunö waö-waö waʼauri ba fanuriaigö Yesu si tobali fangokafu dödöda, sangaroʼö famatida ba sameʼe khöda faʼatua-tua. (Zin. 19:8; 23:3) Imane Yesu, ”Nifahowuʼö yaʼia daʼö, samondrongo ba samalua taromali Lowalangi!”​—Luk. 11:28.

14-15. (a) Moloʼö Yohane 12:27, 28, hamega nasa fahuhuo Yehowa moroi ba zorugo? (b) Hana wa möi fondrara dödö hegöi fangabölöʼö Yesu wehede Yehowa?

¹⁴ Baso Yohane 12:27, 28. Tölu kali isura Injil Yohane me fahuhuo Yehowa moroi ba zorugo. Hauga hari fatua lö si  mate Yesu, so ia ba Yeruzalema ba wangowasaini Owasa Fasa safuria khönia. Imane, ”Abu dödögu.” Aefa daʼö imane ba wangandrönia, ”He Ama, folakhömi döimö.” Ba itema linia Amania moroi ba zorugo, ”No ufolakhömi ba ufolakhömi nasa dania.”

¹⁵ Abu sibai dödö Yesu börö me so noro dödönia sebua enaʼö lö faröi khö Yehowa. Aboto ba dödö Yesu wa hasambalö tefakao sibai ia dania ba afökhö waʼamatenia. (Mat. 26:38) Ba moguna sibai khö Yesu ba wamolakhömi töi Namania. Abu dödö Yesu na möi fangoʼaya döi Lowalangi waʼamatenia, börö me laböbögö khönia wa yaʼia sangoʼaya Lowalangi. Tatu manö möi fangabölöʼö Yesu wehede Yehowa andrö! Faduhu dödönia wa hasambalö tefolakhömi döi Yehowa dania. Me no irongo wehede Namania, terara dödö Yesu ba abölö ia ba wanaögö salua andrö. Me luo daʼö, tola manö ha Yesu zangila eluaha niwaʼö Yehowa. Hewaʼae simanö, no itatugöi Yehowa enaʼö tesura wehedenia börö me soguna khöda daʼö.​—Yoh. 12:29, 30.

16. Hana wa itaria abu dödöda alai na teʼoʼaya döi Yehowa?

¹⁶ Simane Yesu, tatu abu göi dödöda na teʼoʼaya döi Yehowa. Tola manö lafalua khöda zi lö atulö simane salua khö Yesu. Mazui lö sökhi-sökhi dödöda ba ginötö  tarongo duria si lö duhu sanandrösa khöda, nifaʼema niha si fatuwu khöda. Tatu manö abu dödöda na teʼoʼaya döi Yehowa hegöi organisasinia börö duria si lö duhu andrö. Na alua zimane daʼö, tobali fondrara dödöda wehede Yehowa hegöi Yesu. Lö moguna abu dödöda. Tola faduhu dödöda wa ’irorogö dödöda awö gera-erada faʼohahau dödö andrö khö Lowalangi, sabölö moroi ba gera-era niha fefu ba khö Keriso Yesu’. (Fil. 4:6, 7) Hasambalö lö tebulö Yehowa ba wamolakhömi töinia. Iʼogunaʼö dania Wamatörönia ba wangeheta fefu si lö sökhi salua khö nono mbanuania börö nifalua Zatana hegöi ulidanö andre.​—Zin. 94:22, 23; Yes. 65:17.

17. Moloʼö Yesaya 30:21, hadia lala niʼogunaʼö Yehowa ba wahuhuosa khöda?

¹⁷ Irugi iadaʼa, lö aetu fahuhuo khöda Yehowa. (Baso Yesaya 30:21.) Iadaʼa tenga moroi ba zorugo tarongo li Yehowa. Hizaʼi, ibeʼe khöda Daromalinia si no tesura yaʼia daʼö Sura Niʼamoniʼö. Itutunö Yehowa goroisania ba Zura Niʼamoniʼö. Aefa daʼö, eheha niʼamoniʼö moroi khö Yehowa zamarou ’sohalöwö si lö faröi’ ba wameʼe ö ba wamati khö nono mbanuania. (Luk. 12:42) Iadaʼa, no oya tatema gö ba wamati si no mucetak, online, video hegöi audio!

18. Hewisa wehede Yehowa möi fangaroʼö wamatida ba ibeʼe khöda waʼabarani?

¹⁸ Böi irai olifu ita wehede Yehowa khö Nononia me so ia ba gulidanö. Yamöi fangaroʼö dödöda wehede Lowalangi andrö si no tesura ba Zura Niʼamoniʼö wa Yehowa zamatörö fefu hadia ia ba hasambalö iheta fefu wamakao nitaögöda börö nifalua Zatana hegöi ulidanönia si lö sökhi. Ba böi taböhöli wamondrongo li Yehowa. Na tafalua daʼö, tola tataögö gabula dödö salua khöda iadaʼa hegöi ba zi so fönada. Ifasugi ba dödöda Sura Niʼamoniʼö, ”Moguna anau gölömi enaʼö mitema zi no mufabuʼu andrö na no mifalua zomasi Lowalangi.”​—Heb. 10:36.