1. Hadia goroisa nibeʼe Yesu khö ndra nifahaʼönia? (Faigi gambara ba guli majalah.)

BA MBONGI fatua lö mate ia, ibeʼe Yesu sambua goroisa khö ndra nifahaʼönia. Imane khöra, ”Simane fangomasiʼögu yaʼami, yasimanö göi wangomasiʼömi awömi.” Imane nasa, ”Ba daʼö aboto ba dödö niha fefu wa no nifahaʼögu ami na faoma miʼomasiʼö nawömi.”​—Yoh. 13:34, 35.

2. Hadia mbörö wa moguna sibai taforomaʼö waʼomasi ba nawöda?

² Iwaʼö Yesu wa tola oroma haniha zindruhu nifahaʼönia, na laforomaʼö waʼomasi ba niha böʼö simane faʼomasinia khöra. Tefaudu wehede daʼa ba niha si so ba abad siföföna hegöi ba götö daʼa. Daʼa mbörö wa moguna sibai taʼomasiʼö niha böʼö hewaʼae na oya daha-tahada ba wamalua yaʼia!

3. Hadia nitutunöda ba artikel daʼa?

³ Börö me lö moʼahonoa ita hegöi niha böʼö, tola manö abua khöda wangoromaʼö faʼomasi soroi ba dödö ba nawöda. Hewaʼae simanö, moguna taforege ba woloʼö duma-duma nibeʼe Keriso. Ba artikel daʼa, tatutunö hewisa wa tola möi fanoloda waʼomasi andrö ba wangaʼasogö faʼatulö, ba wanimbagö famaigi bawa, hegöi ba wangoromaʼö faʼoböwö. Sagötö wamaluada famahaʼö andre, sofu khöu samösa: ’Hadia wamahaʼö si tola uhalö moroi khö ndra talifusöda si lö mamalö mangoromaʼö faʼomasi, hewaʼae na oya daha-tahara ba wamalua yaʼia?’

4. Moloʼö Mataiʼo 5:23, 24, hadia mbörö wa moguna sibai taforege ba wangaʼasogö faʼatulö na fatiti ita khö ndra talifusöda?

⁴ Ifahaʼö ita Yesu wa moguna sibai taʼasogö waʼatulö na fatiti ita ba niha böʼö. (Baso Mataiʼo 5:23, 24.) Ihaogö wamatunö wa moguna sibai tarorogö wahuwusa si sökhi khö ndra talifusöda, na omasi ita taʼomusoiʼö dödö Lowalangi. Omuso dödö Yehowa na taforege wamalua sabölö sökhi ba wangaʼasogö  faʼatulö khö ndra talifusöda. Na lö aetu-aetu wönuda ba lö omasi ita atulö ba niha böʼö, lö itema zumange nibeʼeda Lowalangi.​—1 Yoh. 4:20.

5. Hadia mbörö wa tola abua khöda ba wangaʼasogö faʼatulö?

⁵ Tola manö abua khöda ba wangaʼasogö faʼatulö. Hadia mbörö? Nehegö hadia zalua khö Mark. * Afökhö dödönia khö zi samösa dalifusöda ira matua. Ifatou-tou ia talifusöda andrö, ba itutunö gamuatania si lö baga khö ndra talifusöda tanö böʼö ba mbanua niha Keriso. Hadia nifalua Mark? Imane, ”Tebai utaha dödögu ba mofönudo khönia.” Ba gafuriata, maniasa Mark ba gamuatania andrö, ba iforege wangandrö faʼebolo dödö khö dalifusöda andrö enaʼö tola ifuli atulö ira. Hizaʼi, lö omasi atulö dalifusöda andrö. Börö daʼö, imane tödönia Mark, ’Na lö omasi ia atulö, hana wa yaʼo zamorege ba wangaʼasogö faʼatulö?’ Hewaʼae simanö, so samösa zatua samasui zamarou tödönia enaʼö lö awuwu. Hadia nifalua Mark?

6. (a) Hewisa lala Mark ba wangaʼasogö faʼatulö? (b) Hewisa lala Mark ba woloʼö fehede nisura ba Kolose 3:13, 14?

⁶ Me iʼangeragö gamuatania andrö Mark, anehe ia wa so ba wangera-ngerania wa abölö tohude ia moroi ba niha böʼö. Aboto ba dödönia wa moguna ibulöʼö gamuatania. (Kol. 3:8, 9, 12) Si fao fangide-ngideʼö, ifuli iʼondrasi dalifusöda andrö ba iʼandrö waʼebolo dödö ba nifaluania. Baero daʼö, ifaʼoheʼö khönia zura, ba isura Mark wa maniasa ia ba gamuatania ba omasi ia enaʼö ifuli fahuwu ira. Baero daʼö, ibeʼe göi mbuala si tefaudu khönia. Hizaʼi, lö ibologö dödönia talifusöda andrö ba lö aetu wönunia. Hewaʼae simanö, lö mamalö iʼoʼö Mark goroisa nibeʼe Yesu ba wangoromaʼö faʼomasi, hegöi ba wangefaʼö sala niha böʼö. (Baso Kolose 3:13, 14.) Börö me so khöda waʼomasi, lö mamalö taʼefaʼö zala ndra talifusöda ba mangandrö ita enaʼö tola ifuli atulö ita  khöra, hewaʼae na lö sökhi wanemaʼöra famorege nifaluada ba wangaʼasogö faʼatulö.​—Mat. 18:21, 22; Gal. 6:9.

7. (a) Hadia wamarou dödö nibeʼe Yesu enaʼö tafalua? (b) Hadia gabula dödö salua khö zi samösa dalifusöda ira alawe?

⁷ Ifarou ita Yesu enaʼö lö mamalö tafalua ba niha böʼö hadia zomasi ita lafalua khöda. Ifarou göi ita enaʼö tenga ha niha sangomasiʼö yaʼita manö niʼomasiʼöda. (Luk. 6:31-33) Hadia nifaluamö na so samösa dalifusöda ba mbanua niha Keriso, si lö omasi fariawö khöu ba lö iʼowai ndraʼugö? Daʼö zalua khö Lara. Imane, ”So samösa dalifusöda ira alawe si lö omasi fariawö khögu, ba lö uʼila hadia mbörö wa ifalua daʼö. Abu sibai dödögu ba lö khögu faʼohahau dödö ba gangowuloa.” Ba wamobörö, imane tödönia Lara, ’Lö irai ufalua zala khönia. Baero daʼö, so göi ndra talifusöda tanö böʼö sangumaʼö wa no faböʼö gamuatania andrö.’

8. Hadia nifalua Lara ba wangaʼasogö faʼatulö, ba hadia wamahaʼö nihalöda ba zalua khönia?

⁸ Iforege Lara ba wangaʼasogö faʼatulö. Ilau mangandrö khö Yehowa ba ihalö gangetula enaʼö fahuhuo ia khö dalifusöda andrö. Lafahuhuosi gabula dödöra, lalau fatalagu bagi, ba ifuli atulö ira. Sökhi zalua ba ginötö daʼö. Imane Lara, ”Hizaʼi ba gafuriata, ifuli ifalua khögu gamuatania ba zilalö. Afatö sibai dödögu.” Ba wamobörö, iwaʼö tödönia Lara wa tola omuso dödönia na ibulöʼö gamuatania talifusöda andrö. Hizaʼi ba gafuriata, aboto ba dödö Lara wa sabölö sökhi zi tola ifalua, yaʼia daʼö iforege enaʼö lö mamalö ifalua waʼomasi khö dalifusöda, ba ’iʼefaʼö zala nawönia soroi ba dödö’. (Ef. 4:32–5:2) Itörö tödö Lara, wa faʼomasi niha Keriso sindruhu andrö, ”lö itanö ba dödönia zi lö sökhi. Itaögö fefu hadia ia, faduhu dödönia fefu hadia ia, idöna-döna fefu hadia ia ba lö faröi ba ngawalö hadia ia.” (1 Kor. 13:5, 7) Ifuli so khö Lara waʼahono dödö. Arara manö, tola itugu fahuwu khönia dalifusöda ira alawe andrö. Na taforege ba wolohi faʼatulö khö ndra talifusöda, ba lö mamalö taforomaʼö khöra waʼomasi, tola faduhu dödöda wa ’fao khöda  Lowalangi safönu faʼomasi ba faʼatulö’.​—2 Kor. 13:11.

9. Moloʼö Halöwö Zinenge 10:34, 35, hadia mbörö wa moguna tatimbagö wamaigi bawa?

⁹ Lö khö Yehowa famaigi bawa. (Baso Halöwö Zinenge 10:34, 35.) Na lö khöda famaigi bawa, no taforomaʼö wa iraononia ita. Taʼoʼö goroisania ba wangomasiʼö awöda simane fangomasiʼöda yaʼita, ba tarorogö waʼatulö ba gotalua nösi nomoda ba wamati.​—Rom. 12:9, 10; Yak. 2:8, 9.

10-11. Hadia nifalua zi samösa dalifusöda ira alawe ba wanayaigö lala wangera-ngerania si fasala?

¹⁰ Lö aoha ba wamorege enaʼö lö mamalö tatimbagö wamaigi bawa. Nehegö duma-duma salua khö zi samösa dalifusöda ira alawe sotöi Ruth. Me awuyu-wuyu ia, so niha moroi ba soi böʼö si no irai mamalua khönia si lö sökhi. Hadia lua-luania? Imane Ruth, ”Fatuwu ndraʼo ba ngawalö zoʼamakhaita ba soi daʼö. Uwaʼö tödögu wa fagölö fefu gamuata niha moroi ba soi daʼö, hewaʼae na no tobali ira talifusögu ba wamati.” Hewisa lala Ruth ba wanayaigö ba dödönia gera-era si lö sökhi andrö?

¹¹ Aboto ba dödö Ruth wa moguna ilawa lala wangera-ngerania si lö sökhi andrö. Ibaso ba Buku Tahunan waö-waö waʼauri hegöi laporan sanandrösa ba soi daʼö. Imane, ”Uforege ba wangokhögö era-era si sökhi sanandrösa ba niha si so ba soi daʼö. Ibörögö anehe ndraʼo wa so waʼamohiʼa dödö khö ndra talifusöda si so ba soi daʼö, ba wamosumange Yehowa. Aboto ba dödögu wa farahu ira khöda ba waʼafatalifusöta ba zi sagörö ulidanö.” Ba gafuriata, aboto ba dödö Ruth wa moguna nasa idouʼö ba wangoromaʼö faʼomasi. Imane, ”Ero na falukha ndraʼo khö ndra talifusöda moroi ba soi daʼö, uforege sibai enaʼö fahuwu ndraʼo khöra. Ulau fahuhuo khöra ba uforege enaʼö itugu oya niʼilagu sanandrösa khöra.” Hadia mbuania? Imane Ruth, ”Ba gafuriata, taya ba dödögu lala wangera-ngera si fasala andrö.”

12. Hadia gabula dödö salua khö zi samösa dalifusöda ira alawe sotöi Sarah?

¹² Ba zi lö tadöna-döna, tola manö so khöda wamaigi bawa. Duma-dumania Sarah, imane tödönia wa lö khönia famaigi bawa börö me lö ihuku niha böʼö moloʼö mado, faʼakayo, halöwö hegöi noro dödö niʼokhögöra ba organisasi. Hizaʼi imane, ”Ibörögö anehe ndraʼo wa so khögu wamaigi bawa.” Hewisa wamaluania daʼö? Börö me moroi ba nösi nomo sagalawa sekola Sarah, abölö omasi ia fariawö ba niha salawa sekola simane yaʼia. No irai iwaʼö khö zi samösa nawönia, ”Ha ba niha si no alawa sekola fariawö ndraʼo. Hewaʼae na no tobali ira talifusöda si sara lala ba wamati, lö omasido fariawö khöra na lö alawa zekolara.” Tatu manö, moguna ibulöʼö lala wangera-ngerania andrö Sarah. Hewisa lalania?

13. Hadia wamahaʼö si tola tahalö moroi ba nifalua Sarah ba wombulöʼö lala wangera-ngerania?

¹³ So samösa zatua samasui sanolo Sarah ba wamareso lala wangera-ngerania. Imane Sarah, ”Ibeʼe mbua gera-era si sökhi sanandrösa ba waʼalöfaröigu ba wamosumange Lowalangi hegöi faʼaboto ba dödö niʼokhögögu sanandrösa ba Zura Niʼamoniʼö. Aefa daʼö itutunö, wa ba ginötö tedou waʼaboto ba dödöda, moguna göi tadouʼö wamalua bua-bua niha Keriso simane fangide-ngideʼö, faʼamoadu, hegöi faʼahakhö dödö.” Ifalua Sarah mene-mene nibeʼe zatua samasui andrö. Imane, ”Aboto ba dödögu hadia zabölö moguna, yaʼia daʼö faʼasökhi dödö hegöi faʼomasida.” Buania, tebulö lala wangera-ngerania khö ndra talifusöda. Imane wangumaʼö, ”Uforege enaʼö aboto ba dödögu hadia manö gamuatara si sökhi sameʼe  ebua mbölira föna Yehowa.” Hewisa göi ita? Böi so ba wangera-ngerada wa abölö tohude ita moroi ba niha böʼö, börö me no alawa zekolada! Na ’taʼomasiʼö dalifusöda ba wamati,’ tola tatimbagö wamaigi bawa.​—1 Fet. 2:17.

14. Moloʼö Heberaiʼo 13:16, hewisa dödö Yehowa na taforomaʼö waʼoböwö ba niha böʼö?

¹⁴ Omuso dödö Yehowa na tafaromaʼö waʼoböwö. (Baso Heberaiʼo 13:16.) Ba wamaiginia, no sambua lala daʼö ba wamosumange yaʼia, töra-töra na tatolo niha si tosasa. (Yak. 1:27; 2:14-17) Börö daʼö, ifarou ita Sura Niʼamoniʼö, ”Yatoʼölö ami wangoromaʼö faʼoböwö.” (Rom. 12:13) Na oböwö ita, no taforomaʼö ba niha böʼö wa sindruhu-ndruhu taʼameʼegö tödö ira, taʼomasiʼö ira, ba omasi ita tobali si fahuwu khöra. Omuso dödö Yehowa na taʼamualagö gö, idanö, mazui tabeʼe ginötöda ba niha böʼö. (1 Fet. 4:8-10) Hizaʼi, so ösa zi tobali daha-tahada ba wangoromaʼö faʼoböwö.

15-16. (a) Hadia mbörö wa tola aombö dödöda ba wangoromaʼö faʼoböwö? (b) Hewisa lala Edit ba wotayaigö faʼaombö dödönia ba wangoromaʼö faʼoböwö?

¹⁵ Tola manö aombö dödöda ba wangoromaʼö faʼoböwö börö zalua khöda. Nehegö duma-duma lakha mbanua sotöi Edit. Fatua lö tobali ia Samaduhuʼö Yehowa, ambö fariawö ia ba niha böʼö. Irasoi wa abölö sökhi wangoromaʼö niha böʼö faʼoböwö moroi khönia.

¹⁶ Me no tobali ia Samaduhuʼö Yehowa, ibulöʼö lala wangera-ngerania Edit. Iforege enaʼö itugu omasi ia ba wanemaʼö tome. Imane, ”Me mufazökhi Balai Mbanua Lowalangi si bohou, ifatunö khögu samösa satua sokubaloi wa so sambua wongambatö si tohare ba wanolo yaʼaga ba halöwö daʼa, ba isofu khögu hadia tola toröi ira ba nomogu dua migu faʼara. Itörö tödögu hewisa Yehowa ba wamahowuʼö lakha mbanua moroi ba Zarefa.” (1 Raz. 17:12-16) Fao dödö Edit na toröi ba nomonia zongambatö andrö. Hadia tefahowuʼö ia? Imane, ”Omuso dödögu  börö me tenga ha dua migu toröi ira, hizaʼi dua waŵa. Sagötö waʼatoröira, itugu fahuwu ndraʼaga.” Itema nasa howu-howu Edit irege tola iʼokhögö zi fahuwu si sökhi ba mbanua niha Keriso. Iadaʼa no tobali ia perintis ba irasoi waʼomuso dödö börö me asese möi ba nomonia ndra talifusö si fao khönia manuriaigö. Imane, ”Omuso dödögu börö me uforomaʼö waʼoböwö! Ba oya sibai howu-howu nitemagu börö me ufalua daʼö.”​—Heb. 13:1, 2.

17. Hadia zaboto ba dödö Luke hegöi foʼomonia?

¹⁷ Tola manö no taforomaʼö waʼoböwö, hizaʼi hadia tola tadouʼö nasa wamalua yaʼia? Nehegö duma-duma Luke hegöi foʼomonia, yaʼira andre no sambua fongambatö soböwö. No toʼölö lakaoni ndra satuara, si fahatö khöra, si fahuwu khöra, hegöi satua samasui awö woʼomonia ba weʼamöi ba nomora. Hewaʼae simanö, imane Luke, ”Aboto ba dödögu, wa ha niha sahatö khöma manö nikaonima weʼamöi ba nomoma.” Hewisa lala Luke hegöi foʼomonia ba wondrouʼö yaʼira ba wangoromaʼö faʼoböwö?

18. Hewisa lala Luke hegöi foʼomonia ba wondrouʼö faʼoböwö?

¹⁸ Tola tebulö lala wangera-ngera Luke hegöi foʼomonia, börö me laʼangeragö wehede Yesu me imane, ”Na ha ba niha sangomasiʼö yaʼami miforomaʼö waʼomasi, hadia mitema howu-howu?” (Mat. 5:45-47) Aboto ba dödöra wa moguna laʼoʼö Yehowa ba wangoromaʼö faʼoböwö ba niha fefu. Börö daʼö, lahalö gangetula ba wogaoni ndra talifusö si lö irai lakaoni weʼamöi ba nomora. Imane Luke, ”Omuso dödöma ba wariawösa nifaluama, ba itugu ahatö ndraʼaga khö nawöma hegöi khö Yehowa.”

19. Hewisa lalada ba wangoromaʼö wa nifahaʼö Yesu ita, ba hadia gangetula nihalöda?

¹⁹ No tatutunö wa na taʼomasi niha böʼö soroi ba dödö, tola möi fanoloda ba wangaʼasogö faʼatulö, ba wanimbagö famaigi bawa, hegöi ba wangoromaʼö faʼoböwö. Moguna tatayaigö ba dödöda lala wangera-ngera si lö sökhi ba taʼomasiʼö ndra talifusöda soroi ba dödö. Na tafalua daʼö, tola tarasoi waʼomuso dödö ba taforomaʼö wa sindruhu-ndruhu nifahaʼö Yesu ita.​—Yoh. 13:17, 35.