1-2. Moloʼö Halöwö Zinenge 8:27-31, 35-38, hana wa omasi tebayagö idanö niha salawa faka moroi ba Gaitiofia?

HADIA omasi ndraʼugö tebayagö idanö ba tobali nifahaʼö Keriso? Ato niha si terou tödö ba wamayagö yaʼira idanö börö me laʼomasiʼö Yehowa, ba laʼandrö saohagölö ba ngawalö zi sökhi si no latema moroi khönia. Duma-dumania, samösa niha salawa faka sohalöwö khö ratu niha Gaitiofia.

² Me latutunö khönia nösi Zura Niʼamoniʼö, iʼanemaiʼö omasi tebayagö idanö niha salawa faka moroi ba Gaitiofia andrö. (Baso Halöwö Zinenge 8:27-31, 35-38.) Hadia mbörö wa terou dödönia? Me ifalukhaisi ia Filifo, yawa ba gureta kudo so niha salawa faka andrö, me mangawuli ia moroi ba Yeruzalema numalö ba Gaitiofia. Sagötö fofanöra, ibaso Filifo gölu-gölu zura nisura Yesaya. Tatu iʼameʼegö tödö sibai Zura Niʼamoniʼö, niha salawa faka andrö. Ba me no aefa ifondrondrongo nitutunö Wilifo, iʼandrö sibai saohagölö ba zi no ifalua Yesu khönia. Baero daʼö, tatu iʼomasiʼö sibai göi Yehowa. Hana wa tola tawaʼö zimane daʼö? Börö me awena mangawuli ia moroi ba Yeruzalema ba wamalua famosumange khö Lowalangi. No iröi göi agama nifaduhusinia tödö iʼotarai me tumbu, ba fao ia ba soi samalua famosumange khö Lowalangi satulö. Börö daʼö, faʼomasinia khö Yehowa zamarou tödönia ba wangai angetula si tohude enaʼö tebayagö idanö ba tobali nifahaʼö Keriso.​—Mat. 28:19.

3. Hadia manö daha-taha irege lö tebayagö idanö zi samösa niha? (Faigi kotak ” Hadia Danö si Tefaudu ba Woʼamaedolagö Tödöu?”)

³ Faʼomasi khö Yehowa zamarou tödöu ba wamayagö yaʼugö idanö. Hizaʼi, so göi waʼomasi tanö böʼö zi tobali daha-tahamö irege lö tebayagö ndraʼugö idanö. Datatutunö ösa duma-dumania. Tola manö abölö öʼomasiʼö nösi nomou hegöi si fahuwu khöu, ba so khöu waʼaombö dödö na fatuwu ira khöu börö me  tebayagö ndraʼugö idanö. (Mat. 10:37) Mazui, te omasi ndraʼugö nasa wamalua si fatuwu khö Lowalangi irege abua khömö ba wamöhöli yaʼia. (Zin. 97:10) Mazui, teʼebuaʼö ndraʼugö ba nösi nomo sasese mamalua owasa nifalua agama sofaya. Te omasi nasa ötörö-törö tödömö me öfalua gowasa ba zilalö, irege abua khömö ba wombatogö wamalua owasa si lö mangomusoiʼö tödö Yehowa. (1 Kor. 10:20, 21) Andrö ero zamösana moguna tatatugöi: ”Hadia mazui haniha zabölö uʼomasiʼö ba waʼaurigu?”

4. Hadia dane-dane si oföna zamarou tödöda enaʼö tebayagö idanö?

⁴ Fatua lö öfahaʼö ndraʼugö khö ndra Samaduhuʼö Yehowa, te no öʼomasiʼö Yesu ba öʼameʼegö tödö Zura Niʼamoniʼö. Hizaʼi iadaʼa, itugu monönö waʼomasimö khö Yesu ba öʼameʼegö tödö Zura Niʼamoniʼö. Baero daʼö, tola manö omuso dödömö fariawö khö ndra Samaduhuʼö Yehowa. Tatu öʼomasiʼö ba öʼameʼegö tödö fefu ngawalö zi sökhi andrö. Hizaʼi, lö obönö fefu daʼö na omasi ölulu waʼaurimö khö Yehowa ba tebayagö idanö. Dane-dane si oföna zamarou tödömö ba wombayagö yaʼugö idanö, yaʼia daʼö faʼomasimö khö Yehowa. Na öʼomasiʼö Yehowa töra moroi ba danö böʼö, lö ötehegö gofu hadia ia mazui gofu haniha manö zi tola manaisi yaʼugö ba wamosumange Yehowa. Faʼomasimö khö Yehowa zamarou tödömö ba wamayagö yaʼugö idanö, ba faʼomasi daʼö göi zanolo yaʼugö enaʼö lö faröi khö Yehowa me no aefa tebayagö idanö.

5. Hadia wanofu-nofu nitutunöda?

⁵ Iwaʼö Yesu wa moguna taʼomasiʼö Yehowa moroi siʼaikö ba dödöda, nosoda maʼasambua, era-erada ba faʼabölöda maʼafefu. (Mrk. 12:30) Hadia manö zinangea öfalua enaʼö öʼokhögö waʼomasi hegöi foʼameʼegö tödö simane daʼö khö Yehowa? Na öʼangerönusi hawaʼebua waʼomasi niforomaʼö Yehowa khömö, daʼö zamarou tödömö ba wangomasiʼö yaʼia. (1 Yoh. 4:19) Na no tumbu ba dödömö waʼomasi khö Yehowa, hadia nirasoimö hegöi nifaluamö? *

6. Moloʼö Roma 1:20, hadia sambua lala zi tola tafalua ba wamahaʼö yaʼita sanandrösa khö Yehowa?

⁶ Fahaʼö ndraʼugö sanandrösa khö Yehowa moroi ba niwöwöinia. (Baso Roma 1:20; Fam. 4:11) Angerönusi waʼatua-tua Yehowa moroi ba womböwöinia sinanö hegöi urifö. Fahaʼö ndraʼugö sanandrösa ba mboto niha sameʼe khöda faʼahöli-höli dödö. (Zin. 139:14) Baero daʼö, angeragö hawaʼebua energi si so ba luo, si ha sambua moroi ba gotalua ndröfi si miliaran faʼoya. * (Yes. 40:26) Na taʼangerönusi fefu daʼö, itugu tafosumange Yehowa. Hizaʼi, lö obönö na ha taʼila waʼatua-tua hegöi kuaso niʼokhögö Yehowa. Enaʼö tola fahuwu ndraʼugö khö Yehowa, moguna ödouʼö wamahaʼö yaʼugö sanandrösa khönia.

7. Enaʼö tola sindruhu-ndruhu öʼomasiʼö Yehowa, hadia zinangea öfaduhusi tödö?

⁷ Moguna faduhu dödömö wa iʼameʼegö tödö sibai ndraʼugö Yehowa. Hadia abua khöu wokhalaigö wa iʼameʼegö tödö ndraʼugö Yehowa, Somböi banua si yawa awö danö? Na daʼö nirasoimö, törö tödömö wa Yehowa andrö ”lö aröu ia khöda zamösana”. (Hal. 17:26-28) Yehowa ’zosekhegö tödö’ niha maʼafefu, ba no ifabuʼu wa ”na öʼalui ia, ba ibeʼe nisöndrau ia”. (1 Nga. 28:9) Sindruhunia, tola öfahaʼö ndraʼugö ba Zura Niʼamoniʼö iadaʼa, börö me Yehowa ”zondröni” yaʼugö. (Yer. 31:3, Terjemahan Dunia Baru) Na no aboto ba dödömö fefu nifalua Yehowa khömö, tatu itugu öʼomasiʼö ia.

8. Hewisa wangoromaʼömö fangandrö saohagölö ba waʼomasi Yehowa?

 ⁸ Hewisa wangoromaʼöda wa taʼandrö saohagölö ba waʼomasi Yehowa? Sambua lala yaʼia daʼö, na fahuhuo ita khönia ba wangandrö. Na ötutunö khönia waʼaombö dödömö ba öʼandrö saohagölö ba zi no ifalua, itugu aro waʼomasimö khönia. Ba itugu aro göi wahuwusamö khö Yehowa ba ginötö öʼila wa ifondrondrongo wangandrömö. (Zin. 116:1) Sindruhu-ndruhu faduhu dödömö wa aboto sibai ba dödö Yehowa ndraʼugö. Hizaʼi, na omasi ndraʼugö ahatö khö Yehowa, moguna aboto ba dödömö lala wangera-ngerania. Moguna göi öʼila hadia zomasi ia moroi khömö. Börö daʼö, sambua lala zi tola öfalua yaʼia daʼö na öfahaʼö ndraʼugö ba Daromali Lowalangi, Sura Niʼamoniʼö.

9. Hewisa wangoromaʼöu wa öʼameʼegö tödö Zura Niʼamoniʼö?

⁹ Forege ba woʼameʼegö tödö Taromali Lowalangi, Sura Niʼamoniʼö. Ha Sura Niʼamoniʼö mbuku sanutunö sindruhu sanandrösa khö Yehowa hegöi ohitö dödönia khöu. Hewisa wangoromaʼöu wa öʼameʼegö tödö Zura Niʼamoniʼö? Baso Zura Niʼamoniʼö ero maʼökhö, faʼanö ndraʼugö fatua lö öfalua wamahaʼö ba Zura Niʼamoniʼö ba niha sondröniaʼö famahaʼö khöu, ba falua zi no öfahaʼö yaʼugö. (Zin. 119:97, 99; Yoh. 17:17) Hadia no ötatugöi ginötöu ba wombaso Sura Niʼamoniʼö? Hadia öʼoʼö zi no ötatugöi andrö ba öbaso Zura Niʼamoniʼö ero maʼökhö?

10. Hadia sambua dane-dane wa tohude sibai Zura Niʼamoniʼö?

¹⁰ Sura Niʼamoniʼö, no buku sabölö tohude. Hadia mbörö? Sambua dane-danenia, yaʼia daʼö börö me ösinia manandrösa ba niha si no irai mangila Yesu. Ha Sura Niʼamoniʼö zanutunö hadia zi no ifalua Yesu khöu, ba tefaudu sibai nösinia. Na öfahaʼö ndraʼugö ba niwaʼö Yesu hegöi ba nifaluania, hasambalö wa omasi ndraʼugö fahuwu khönia.

11. Hadia zi tola manolo yaʼita enaʼö itugu taʼomasiʼö Yehowa?

¹¹ Na öforege ba wangomasiʼö Yesu, hasambalö wa itugu öʼomasiʼö Yehowa. Hadia mbörö? Börö me moʼahonoa Yesu ba woloʼö amuata Namania. (Yoh. 14:9) Andrö,  na lö tebulö öfahaʼö ndraʼugö sanandrösa khö Yesu, itugu aboto ba dödömö lala wangera-ngera Yehowa, ba omasi ndraʼugö ahatö khönia. Angeragö hewisa waʼahakhö dödö niforomaʼö Yesu ba niha niʼosiwawöi niha böʼö börö me numana, mofökhö mazui lö faʼabölö. Baero daʼö, angerönusi mene-mene nibeʼe Yesu ba waʼaurida sero maʼökhö, hegöi mbua nirasoimö me öʼoʼö mene-mene daʼö.​—Mat. 5:1-11; 7:24-27.

12. Na lö tebulö öfahaʼö ndraʼugö sanandrösa khö Yesu, hadia zi terou dödöu öfalua?

¹² Itugu aro waʼomasida khö Yesu, na taʼangerönusi höli si no ibeʼe khöda irege teʼefaʼö horö si no tafalua. (Mat. 20:28) Me no öʼila wa itehegö mate ia salahimö, terou dödömö ba wamalalini era-era ba öʼalui wangefa moroi khö Yehowa. (Hal. 3:19, 20; 1 Yoh. 1:9) Ba na itugu öʼomasiʼö Yesu hegöi Yehowa, hasambalö wa omasi ndraʼugö fao ba niha sangomasiʼö yaʼira.

13. Hadia zi no ibeʼe khöu Yehowa?

¹³ Forege enaʼö itugu öʼomasiʼö niha sangomasiʼö Yehowa. Tola manö lö aboto ba dödö nösi nomou hegöi ira awömö si lö faʼaboto ba dödö sanandrösa khö Yehowa, hadia mbörö wa omasi ölulu waʼaurimö khö Yehowa. Tola manö lasaisi ndraʼugö. Hizaʼi, hasambalö itolo ndraʼugö Yehowa ba ibeʼe ndra talifusö si so ba gangowuloa si tobali ösi nomou ba wamati. Na lö tebulö ahatö ndraʼugö ba nösi nomou ba wamati andrö, ösöndra waʼomasi hegöi famarou dödö si tefaudu khöu. (Mrk. 10:29, 30; Heb. 10:24, 25) Ba zi samuza inötö dania, tola manö fao nösi nomomö ba wamosumange Yehowa ba laʼoʼö goi-goinia.​—1 Fet. 2:12.

14. Simane nisura ba 1 Yohane 5:3, hewisa dödömö ba goi-goi Yehowa?

¹⁴ Forege enaʼö itugu öʼameʼegö tödö goi-goi Yehowa ba falua daʼö. Fatua lö öʼokhögö waʼaboto ba dödö sanandrösa khö Yehowa, tola manö ötatugöi samösa hadia zatulö hegöi si lö atulö. Hizaʼi iadaʼa, no aboto ba dödömö wa tola itugu sökhi waʼaurimö na öʼoʼö goi-goi Yehowa. (Zin. 1:1-3; baso 1 Yohane 5:3.) Angeragö mene-mene Zura Niʼamoniʼö sanandrösa khö woʼomo ira matua, foʼomo ira alawe, satua hegöi iraono. (Ef. 5:22–6:4) Me no öfalua mene-mene andrö, hadia itugu so waʼohahau dödö ba nösi nomou? Ba me no aefa öʼoʼö wanuturu lala nibeʼe Yehowa sanandrösa ba wamili awö, hadia itugu sökhi ndraʼugö? Hadia itugu owua-wua dödöu? (Gamd. 13:20; 1 Kor. 15:33) Tola manö fanema li nibeʼemö ba wanofu-nofu andrö, yaʼia.

15. Hadia zinangea öfalua na lö öʼila hewisa lala ba wamalua mene-mene Zura Niʼamoniʼö?

¹⁵ Itaria, lö manö öʼila hewisa lala ba wamalua mene-mene Zura Niʼamoniʼö si no öfahaʼö yaʼugö. Daʼö mbörö wa iʼogunaʼö organisasinia Yehowa ba wohenaigö publikasi si teʼodane-dane ba Zura Niʼamoniʼö. Fefu publikasi daʼö tobali fanolo khöu ba wamaehusi hezo manö zatulö hegöi si lö atulö. (Heb. 5:13, 14) Me öbaso fefu hegöi öfahaʼö ndraʼugö ba publikasi daʼö, hasambalö aboto ba dödömö wa mene-mene Zura Niʼamoniʼö andrö tefaudu ba so mbuania. Tola manö, terou dödömö tobali ösi nomo organisasi Yehowa.

16. Hewisa wondröniaʼö Yehowa nono mbanuania?

¹⁶ Forege ba wangokhögö faʼaboto ba dödö sanandrösa ba organisasi Yehowa ba tuhini daʼö. No itatugöi Yehowa enaʼö teʼosambuaʼö nono mbanuania bakha ba mbanua niha Keriso. Ono Lowalangi, Yesu Keriso zi tobali högö ba mbanua niha Keriso. (Ef. 1:22; 5:23) So sambua ngawawa side-ide ndra matua si no tebayoini, nifili Yesu ba wondröniaʼö fefu halöwö somasi ia. Ifotöi ira Yesu, ’sawuyu si lö faröi ba satua-tua’. Laʼonorogö tödö sibai halöwö si no labeʼe khöra ba wameʼe ö, hegöi ba wondrorogö yaʼugö ba wamati. (Mat. 24:45-47) Sambua lala nifaluara ba wanolo yaʼugö yaʼia daʼö, latatugöi  enaʼö tobali satua sokubaloi ndra talifusöda ira matua si no moloʼö goi-goi niʼandrö, ba zedöna mufataro tobali satua sokubaloi. Tola labeʼe khöu wanuturu lala ba larorogö ndraʼugö. (Yes. 32:1, 2; Heb. 13:17; 1 Fet. 5:2, 3) Laforege ira satua sokubaloi ba wanolo yaʼugö, larara dödömö, ba latolo ndraʼugö enaʼö itugu ahatö khö Yehowa. Hizaʼi, sambua lala sabölö tohude nifaluara yaʼia daʼö, latolo ndraʼugö enaʼö tola öfahaʼö niha böʼö sanandrösa khö Yehowa.​—Ef. 4:11-13.

17. Moloʼö Roma 10:10, 13, 14, hana wa tafatunö ba niha böʼö sanandrösa khö Yehowa?

¹⁷ Tolo niha böʼö ba wangomasiʼö Yehowa. No ibeʼe Yesu fareta khö ndra soloʼö khönia, enaʼö lafahaʼö niha böʼö sanandrösa khö Yehowa. (Mat. 28:19, 20) Tola manö, tafalua fareta andrö ha börö me no tobali ia noro dödöda. Hizaʼi, na itugu ebua waʼomasimö khö Yehowa, tola örasoi zimane nirasoi zinenge sotöi Fetero hegöi Yohane me lamane, ”Tebai mabato wangombakha sanandrösa ba zi no maʼila hegöi si no marongo.” (Hal. 4:20) Na tola tatolo zi samösa niha ba wangomasiʼö Yehowa, tebai musuʼa waʼomuso dödö nirasoida. Angeragö hawaʼomuso dödö Wilifo me itolo niha salawa faka moroi ba Gaitiofia, ba wamahaʼö yaʼia ba zindruhu si so ba Zura Niʼamoniʼö ba tebayagö idanö! Baero daʼö, na öʼoʼö duma-duma Wilifo, ba öfalua wanuriaigö simane nifaretakö Yesu, no öforomaʼö wa omasi ndraʼugö tobali Samaduhuʼö Yehowa. (Baso Roma 10:10, 13, 14.) Aefa daʼö, simane niha Gaitiofia no mege, tola manö manofu göi ndraʼugö, ”Hadia daha-tahagu wa lö ubayagö ndraʼo idanö?”​—Hal. 8:36.

18. Hadia nitutunöda ba artikel aefa daʼa?

¹⁸ Famayagö idanö no angetula sabölö tohude ba waʼaurimö. Börö me tenga si famai-mai gangetula daʼö, moguna sibai öʼangeragö hadia geluahania. Börö daʼö, ba artikel aefa daʼa, tatutunö: Hadia manö zinangea öʼila sanandrösa ba wamayagö idanö? Hadia zinangea öfalua fatua lö tebayagö idanö hegöi na no aefa tebayagö idanö?