1. Hadia wamahaʼö si tola tahalö ba Zangombakha 3:1, 7?

SO ÖSA niha somasi fahuhuo, hizaʼi so göi ösa niha si lö hede-hede. Sindruhunia, simane nitutunö ba ayati artikel daʼa, so ginötö fahuhuo ba so göi ginötö lö hede-hede. (Baso Zangombakha 3:1, 7.) Hewaʼae simanö, te so ösa ndra talifusöda somasi ita enaʼö oya fahuhuo, hizaʼi so göi ösa zomasi ita enaʼö laʼalösi wahuhuosara.

2. Haniha zinangea motatugöi lalada wangogunaʼö faʼatua-tua ba wahuhuosa?

² Faʼatua-tuada ba wahuhuosa, no buala moroi khö Yehowa. (2 Moz. 4:10, 11; Fam. 4:11) Moroi ba Daromalinia, itolo ita Yehowa enaʼö aboto ba dödöda hewisa lala enaʼö atulö wangogunaʼöda buala andrö. Ba artikel daʼa, tatutunö ösa duma-duma moroi ba Zura Niʼamoniʼö, si tola manolo yaʼita ba wangiʼila hawaʼara zinangeania talau fahuhuo ba hawaʼara lö hede-hededa. Tatutunö göi hewisa dödö Yehowa sanandrösa ba wehededa ba niha böʼö. Si oföna, datatutunö hawaʼara zinangeania talau fahuhuo.

3. Moloʼö Roma 10:14, hawaʼara zinangeania talau fahuhuo?

³ Moguna lö mamalö tefaʼanö ita ba wahuhuosa sanandrösa khö Yehowa hegöi Famatörönia. (Mat. 24:14; baso Roma 10:14.) Na tafalua daʼö, no taʼoʼö duma-duma Yesu. Dane-dane si oföna wa tohare Yesu ba gulidanö, yaʼia daʼö ba wangombakha ba niha böʼö sindruhu sanandrösa khö Namania. (Yoh. 18:37) Hizaʼi, böi olifu ita wa moguna sibai tafaudugö lalada wamaʼema turia andrö. Börö daʼö, na fahuhuo ita ba niha böʼö sanandrösa khö Yehowa, moguna ’tahaogö wameʼe fanema li si fao sumange’. Moguna göi taforomaʼö wa taʼameʼegö tödö hadia nirasoira hegöi nifaduhusira tödö. (1 Fet. 3:15) Andrö, tenga ha si fahuhuo manö ita khöra, hizaʼi tafahaʼö göi ira sanandrösa khö Yehowa, ba tola manö tofakha ba dödöra daʼö.

4. Simane nisura ba Gamaedola 9:9, hewisa enaʼö möi fanolo ba niha böʼö wehededa?

⁴ Lö moguna so waʼaombö dödö khö ndra satua sokubaloi ba  wahuhuosa, na laʼila wa moguna mene-mene khö zi samösa dalifusöda ira matua mazui ira alawe. Tatu manö, moguna latatugöi ginötö si tefaudu ba wamalua yaʼia, enaʼö lö aila niha daʼö. Omasi ira labaloi irege lö niha böʼö ba zi fasuira. Moguna laforege ira satua sokubaloi enaʼö oroma ba wehedera wa laʼosinangegö niha daʼö. Hewaʼae simanö, lö lataha dödöra ba wameʼe mene-mene moroi ba Zura Niʼamoniʼö si tola manolo niha daʼö ba wamalua satulö. (Baso Gamaedola 9:9.) Hana wa lö moguna aombö dödöda fahuhuo na moguna tabeʼe mene-mene? Tatutunö dania dombua duma-duma si faehu sibai. Duma-duma si oföna, yaʼia daʼö samösa ndra matua sinangea mameʼe fotu ba ndraononia. Duma-duma si dua, yaʼia daʼö samösa ndra alawe si fahuhuo khö zi samösa ira matua si lö ara tö tobali razo.

5. Hawaʼara zinangeania fahuhuo Gere Sebua sotöi Eli?

⁵ Ere Sebua sotöi Eli, iʼomasiʼö sibai ndraononia matua si darua. Hizaʼi, lö lafosumange Yehowa iraononia andrö. Laʼokhögö noro dödö si tohude tobali ere ba nose Lowalangi. Hewaʼae simanö, laʼogunaʼö kuasora ba lala si fasala, laʼosiwawöi zumange nitunu khö Yehowa, ba lö aila ira göi ba wamalua amuata fohorö. (1 Zam. 2:12-17, 22) Moloʼö Oroisa Moze, no sinangea na mate ndraono Eli andrö. Hizaʼi, lö iʼabeʼö Eli ba wameʼe khöra degu-tegu, ba itehegö nasa khöra wohalöwö ba nose Lowalangi. (5 Moz. 21:18-21) Hewisa dödö Yehowa ba lala nifalua Eli ba wangasiwai abula dödö andrö? Imane khö Eli, ’Hana wa no ebua dödöu ba ndraonou andrö moroi ba waʼebua dödöu khögu?’ Ihalö gangetula Yehowa ba wamunu ndraono Eli si lö sökhi andrö.​—1 Zam. 2:29, 34.

6. Hadia wamahaʼö si tola tahalö moroi khö Eli?

⁶ Tola tahalö wamahaʼö si sökhi moroi khö Eli. Na taʼila so nawöda mazui ösi nomoda sanawö oroisa Lowalangi, moguna fahuhuo ita khönia. Moguna tafasugi ba dödönia sanandrösa ba goi-goi Yehowa. Aefa daʼö, moguna tatatugöi enaʼö itema wanolo moroi khö ndra talifusöda si tobali salahi Yehowa, yaʼia daʼö ira satua sokubaloi. (Yak. 5:14) Lö omasi ita tobali simane Eli, sabölö mangofönaiʼö awönia mazui ösi nomonia moroi khö Yehowa. Sindruhu sa, moguna barani ita fahuhuo khö ndra awöda mazui ösi nomoda samalua sala. Na tafalua daʼö, hasambalö iʼasogö mbua si sökhi. Iadaʼa, nehegö gamaehuta duma-duma Eli andrö ba duma-duma zi samösa ira alawe Gizaraʼeli sotöi Abigaila.

7. Hana wa moguna fahuhuo Abigaila khö Dawido?

⁷ Abigaila andrö foʼomo Nabalo, samösa  niha si kayo sangokhögö tanö sebolo. Me moloi Dawido awö zaradadunia moroi khö Razo Saulo, no fakhamö fao ira khö ndra kubalo mbiri-biri Nabalo ba lalumöʼö gurifönia moroi khö ndra sorabu. Hadia iʼandrö saohagölö Nabalo ba wanolo nibeʼera? Löʼö. Me iʼandrö Dawido nidanö hegöi ö soguna khönia awö zaradadunia, mofönu sibai Nabalo ba ihangöi ira. (1 Zam. 25:5-8, 10-12, 14) Börö daʼö, ihalö gangetula Dawido ba wamunu fefu ndra matua si so ba nomo Nabalo. (1 Zam. 25:13, 22) Hewisa enaʼö lö alua gabula dödö andrö? Aboto ba dödö Abigaila wa daʼa ginötönia fahuhuo. Si fao faʼabarani, fahuhuo ia khö Dawido hewaʼae na so 400 ndra matua si falukha khönia solohe gama-gama wasuwöta, olofo ira ba ebua sibai wönura.

8. Hadia wamahaʼö si tola tahalö moroi ba duma-duma Abigaila?

⁸ Me falukha Abigaila khö Dawido, fahuhuo ia si fao faʼabarani, safönu foʼameʼegö tödö, ba tola mufaduhusi tödö wehedenia. Hewaʼae na tenga Abigaila zamobörö abula dödö andrö, iʼandrö waʼebolo dödö khö Dawido. Iwaʼö wa Dawido andre niha si sökhi ba hasambalö ifalua zatulö. Iʼodaligö Yehowa Abigaila ba wanolo yaʼia. (1 Zam. 25:24, 26, 28, 33, 34) Simane Abigaila, na taʼila so samösa niha samalua amuata si fasala, moguna barani ita fahuhuo khönia. (Zin. 141:5) Moguna tafalua ia si fao foʼameʼegö tödö, hizaʼi moguna göi barani ita. Na tabeʼe mene-mene si fao faʼomasi ba niha sinangea muʼamenesi, daʼö zangoromaʼö wa yaʼita andre sindruhu si fahuwu.​—Gamd. 27:17.

9-10. Hadia zinangea latörö tödöra ira satua sokubaloi ba ginötö labeʼe mene-mene ba niha böʼö?

⁹ Moguna so waʼabarani khö ndra satua sokubaloi, ba wameʼe mene-mene khö ndra talifusöda ba mbanua niha Keriso, si no mangai angetula si fasala. (Gal. 6:1) Si fao fangide-ngideʼö, aboto ba dödöra wa yaʼira andrö niha si lö moʼahonoa, ba tola manö moguna göi muʼamenesi ira ba zi samuza inötö. Hewaʼae simanö, lö lataha-taha ba wameʼe mene-mene  ba niha sinangea muʼamenesi. (2 Tim. 4:2; Tit. 1:9) Ba ginötö labeʼe mene-mene ba zi samösa niha, moguna laforege ira satua sokubaloi ba wangogunaʼö buala wahuhuosa, ba wamahaʼö niha daʼö si fao faʼatua-tua ba faʼebolo dödö. Lafalua daʼö, börö me laʼomasiʼö niha daʼö. (Gamd. 13:24) Hizaʼi, sabölö moguna khöra yaʼia daʼö famosumange Yehowa. Börö daʼö, laforege ba woloʼö goi-goinia ba lalumöʼö mbanua niha Keriso moroi ba deʼala.​—Hal. 20:28.

¹⁰ No tatutunö hawaʼara zinangeania talau fahuhuo. Hizaʼi, so goi ginötönia moguna lö hede-hededa. Hadia manö gabula dödö nitaögöda na alua zimane daʼö?

11. Hadia duma-duma niʼogunaʼö Yakobo, ba hadia gamakhaitania ba wehededa?

¹¹ Tola manö abua khöda ba wotatugöi hadia niwaʼöda. Iʼogunaʼö Yakobo sambua duma-duma sangoromaʼö wa abua sibai ba wamalua daʼö. Imane, ”Na so niha si lö irai fasala ba wehede, no niha soʼahonoa ia, ba iʼila ifatörö mbotonia maʼasambua. Na tabeʼe wesu ba mbawa kudo enaʼö moloʼö ia, awena tola tafatörö mbotonia maʼasageu.” (Yak. 3:2, 3) Si toʼölönia, muʼogunaʼö wesu ba högö hegöi ba mbawa kudo. Samösa zolohe kudo, moguna isöbi wesu andrö enaʼö tola itatugöi hezo numalö mazui hawaʼara ibatogö ia kudo andrö. Na lö aro wololohenia fesu andrö, tola manö moloi kudo daʼö ba ifosikho mbotonia samösa hegöi niha solohe yaʼia. Simanö göi, na tebai tatatugöi hadia niwaʼöda, tola tobali abula dödö daʼö. Datanehegö ösa zalua andre, sangoromaʼö hawaʼara moguna ”tasöbi wesu” ba tataha dödöda enaʼö lö hede-hededa.

12. Hawaʼara zinangeania ”tasöbi wesu” ba tataha dödöda enaʼö lö hede-hededa?

¹² Hadia nifaluamö na so ndra talifusöda sangila informasi si tebai muʼombakhaʼö ba niha böʼö? Duma-dumania, falukha ndraʼugö khö zi samösa dalifusöda moroi ba soi si lö  manehegö halöwö nifaluada. Hadia tedönisi dödömö ba wanofu khönia hewisa wamaluara halöwöda ba daʼö? Tatu manö sökhi gohitö dödöda. Fefu ita, taʼomasiʼö ndra talifusöda ba taʼameʼegö tödö zalua khöra. Mangandrö göi ita salahira ba wangasiwai abula dödöra. Hewaʼae simanö, daʼa ginötönia khöda ba ”wanöbi fesu” ba tataha dödöda enaʼö lö hede-hededa. Na tafaso zi samösa niha ba wangombakha informasi si tebai muʼombakhaʼö, no taforomaʼö wa lö taʼokhögö waʼomasi ba niha daʼö. Lö taforomaʼö göi waʼomasi khö ndra talifusöda si faduhu tödö khönia, wa hasambalö lö iʼombakhaʼö daʼö ba niha böʼö. Tatu manö, lö omasi ita ba wonönö abula dödö salua khö ndra talifusöda moroi ba soi si lö manehegö halöwöda. Baero daʼö, na toröi ita ba soi si lö manehegö halöwö nifaluada, tatu lö omasi ita ba wamatunö hewisa ndra Samaduhuʼö Yehowa, ba wamalua halöwö fanuriaigö mazui halöwö ba wamati.

13. Simane niwaʼö ba Gamaedola 11:13, hadia zinangea lafalua ira satua sokubaloi, ba hadia mbörö?

¹³ Moguna laʼoʼö ira satua sokubaloi mene-mene nisura ba Gamaedola 11:13, enaʼö lö laʼombakhaʼö informasi ba niha si tenga sinangea mangila daʼö. (Baso.) Tola manö abua daʼa, mendrua manö khö ndra satua sokubaloi si no mangowalu. Hadia mbörö? Niha si no mongambatö, tola aro wahuwusara na asese lalau fahuhuo, ba latutunö hadia niʼera-erara, faʼaombö dödöra, hegöi nirasoira. Hizaʼi, aboto ba dödö zatua sokubaloi wa tebai ’ibokai zi tobini samatou awönia’ khö woʼomonia. Na ifalua daʼö, lö saʼae lafaduhusi tödö ia ira talifusöda ba mbanua niha Keriso, ba teʼobousi döinia si sökhi. Yaʼira nibeʼe noro dödö ba mbanua niha Keriso, tebai ”si dua lela” mazui si falimo. (1 Tim. 3:8) Eluahania, moguna böi falimo ira ba lö lafatou-tou niha böʼö. Na iʼomasiʼö woʼomonia zi samösa satua sokubaloi, tatu lö omasi inönö wangabu dödö woʼomonia. Börö daʼö, moguna lö iʼombakhaʼö informasi si lö moguna iʼila foʼomonia.

14. Hewisa wa tola fao woʼomo ndra satua sokubaloi ba wondrorogö töi si sökhi niʼokhögö woʼomora?

¹⁴ Tola fao woʼomo zi samösa zatua sokubaloi ba wondrorogö töi sökhi niʼokhögö woʼomonia, na lö ifaso woʼomonia ba wangombakha informasi si tebai muʼombakhaʼö. Na ifalua daʼö, tenga ha ituhini woʼomonia, hizaʼi iforomaʼö göi wa iʼameʼegö tödö niha si no manutunö abula dödöra khö woʼomonia. Sabölö moguna, no iʼomusoiʼö dödö Yehowa börö me fao ia ba wondrorogö faʼatulö hegöi fahasara dödö ba mbanua niha Keriso.​—Rom. 14:19.

15. Hewisa dödö Yehowa khö ndra awö Yobi si datölu, ba hadia mbörö?

¹⁵ Ba mbuku Yobi, tafahaʼö ita hawaʼara zinangeania talau fahuhuo ba hewisa lalada ba wahuhuosa. Me alua khö Yobi ngawalö wamakao sabölö-bölö, so daöfa ndra matua si tohare ba wondrara tödönia hegöi ba wameʼe khönia mene-mene. No ara lalau zi lö hede-hede. Datölu ba gotaluara zotöi Elifasi, Bilidado, ba Sofari. Me lalau zi lö hede-hede, lö laʼogunaʼö ginötö daʼö ba woʼangeragö hewisa lalara ba wanolo Yobi. Hizaʼi, laʼangeragö hewisa lala ba wangoromaʼö wa no fasala Yobi. Tola oroma daʼö moroi ba wehedera khönia. So ösa wehedera satulö, hizaʼi abölö oya wehedera si lö mangoromaʼö faʼomasi, mazui si lö atulö sanandrösa khö Yobi hegöi Yehowa. Lahuku Yobi si fao faʼalösökhi. (Yob. 32:1-3) Hewisa dödö Yehowa ba nifaluara? Mofönu sibai ia khö ndra matua si datölu andrö. Ifotöi ira niha si bodo ba ifarou Yobi enaʼö mangandrö ia salahira.​—Yob. 42:7-9.

16. Hadia wamahaʼö si tola tahalö moroi ba duma-duma si lö sökhi niforomaʼö Elifasi, Bilidado, ba Sofari?

¹⁶ So ösa wamahaʼö si tola tahalö moroi ba duma-duma si lö sökhi niforomaʼö Elifasi, Bilidado, ba Sofari. Si oföna, böi tahuku ndra talifusöda. (Mat. 7:1-5) Hizaʼi, moguna ua tahaogö wamondrongo yaʼira fatua lö talau fahuhuo.  Na tafalua daʼö, tola sindruhu-ndruhu aboto ba dödöda hadia gabula dödö nitaögöra. (1 Fet. 3:8) Si dua, moguna tatatugöi enaʼö fahuhuo ita si fao faʼomasi ba atulö. (Ef. 4:25) Si tölu, böi olifu ndraʼugö wa inehe-nehegö Yehowa hadia niwaʼöda ba niha böʼö.

17. Hadia wamahaʼö si tola tahalö moroi ba duma-duma niforomaʼö Gelihu?

¹⁷ So samösa tö ndra matua zamalukhaisi Yobi, töinia Elihu, yaʼia andrö si fahatö khö Gaberahamo. No ifondrondrongo me fahuhuo Yobi khö ndra awönia si datölu. Ihaogö sibai ba wangosisiʼö hadia niwaʼöra irege tola ibeʼe mene-mene si fao faʼomasi ba soroi ba dödö, ba wangatulöʼö lala wangera-ngera Yobi. (Yob. 33:1, 6, 17) Me fahuhuo Elihu, iʼofönaiʼö ba wamolakhömi Yehowa, tenga ba wamolakhömi yaʼia samösa mazui niha böʼö. (Yob. 32:21, 22; 37:23, 24) Moroi ba duma-duma nibeʼe Gelihu andre, tola tafahaʼö ita wa so ginötönia talau zi lö hede-hede ba tafondrondrongo manö. (Yak. 1:19) Tafahaʼö göi ita wa ba ginötö tabeʼe mene-mene, moguna tafolakhömi Yehowa tenga yaʼita samösa.

18. Hewisa wangoromaʼöda fangandrö saohagölö ba mbuala wahuhuosa nibeʼe Lowalangi?

¹⁸ Tola taforomaʼö wangandrö saohagölö ba mbuala wahuhuosa moroi khö Yehowa, na taʼoʼö mene-mene Zura Niʼamoniʼö sanandrösa hawaʼara zinangeania talau fahuhuo ba hewisa lalada ba wahuhuosa. Isura samösa Razo satua-tua sotöi Selomo, ”Simane bua apel anaʼa ba wiga firö, simanö göi wehede niwaʼö ba ginötö si tefaudu.” (Gamd. 25:11, Terjemahan Dunia Baru) Na tahaogö tafondrondrongo ba ginötö fahuhuo khöda niha böʼö ba taʼangeragö fatua lö mohede ita, hulö simane bua apel anaʼa si sökhi ba sebua mböli wehededa. Na simanö, he na oya wehededa mazui löʼö, tola möi fondrara dödö niha böʼö daʼö ba möi fangomusoiʼö dödö Yehowa. (Gamd. 23:15; Ef. 4:29) Daʼa lala sabölö sökhi ba wangoromaʼö fangandröda saohagölö ba mbuala wahuhuosa nibeʼe Lowalangi!