Niha Lewi si lö mubeʼe noro dödö tobali ere, laʼokhögö ngawalö halöwö tanö böʼö, duma-dumania tobali sohalöwö ba gosali. Mohalöwö ira barö wamatörö gafalo zanaro osali. Itutunö samösa zanura moroi ba Yahudi sotöi Filo, hadia manö halöwö nifaluara: ”So ösa nifataro ba wozago mbawandruhö weʼamöi bakha ba gosali. So göi zanaro föna nahia niʼamoniʼö [bakha ba gosali]. Andrö wa manaro ira enaʼö lö möi bakha niha si lö sinangea moloʼö huku, he na laʼodödögö mazui löʼö. Baero daʼö, so göi zanaro ba wamasui osali. Lafalali-lali ira wohalöwö, so zanaro ba zi maʼökhö ba so göi ba zi bongi.”

Tola göi laʼandrö tolo khö ndra sohalöwö ba gosali andre ira Sangetuʼö Huku. Ha ngawawa niha Yahudi nitehegö ndra samatörö Romawi ba wolohe fakake wasuwöta.

Imane samösa pakar sotöi Joachim Jeremias, ”Ba ginötö muraʼu Yesu, iwaʼö wa ero maʼökhö mamahaʼö ndraʼo ba Gosali, ba lö niraʼumi yaʼo (Mat. 26:55), fehede Yesu zangoromaʼö wa niha sondraʼu yaʼia andrö sohalöwö ba Gosali.” Aefa daʼö, iwaʼö nasa Jeremias wa tola manö niha sohalöwö ba gosali zoʼanga-anga ba wondraʼu Yesu me luo daʼö. (Yoh. 7:32, 45, 46) Ba gafuriata, ibeʼe fareta Sangetuʼö Huku khö gafalo zanaro hegöi sohalöwö ba gosali ba wondraʼu ndra nifahaʼö Yesu. Me lasöbi baero ba gosali zinenge sotöi Faulo, tola manö ira sanaro ba gosali zamalua daʼö.​—Hal. 4:1-3; 5:17-27; 21:27-30.