1. Moloʼö Mataiʼo 24:9, hana wa lö tokea ita na fatiu dödö niha gulidanö khöda?

IWÖWÖI ita Yehowa ba wangoromaʼö faʼomasi hegöi ba worasoi faʼomasi niforomaʼö niha böʼö. Börö daʼö, abu sibai dödöda mazui tola manö ataʼu ita na fatiu dödö niha böʼö khöda. Duma-dumania, imane talifusöda ira alawe sotöi Georgina, si toröi ba Eropa, ”Me 14 fakhe ndröfigu, fatuwu sibai khö mamagu ndraʼo börö me ufosumange Yehowa. Abu sibai dödögu ba urasoi wa ha yaʼo-yaʼo, ba ibörögö tumbu ba dödögu wa tenga niha si sökhi ndraʼodo andre.” * Imane talifusöda ira matua sotöi Danylo, ”Me laböbözi, laʼoʼaya, ba lafetaʼu ndraʼo ira saradadu börö me no tobalido Samaduhuʼö Yehowa, urasoi waʼataʼu ba faʼaila.” Abu sibai dödöda na fatiu dödö niha böʼö khöda, hizaʼi lö tokea ita na alua daʼö. No ifaʼeleʼö Yesu wa hasambalö fatiu dödö niha böʼö khöda.​—Baso Mataiʼo 24:9.

2-3. Hana wa fatiu dödö niha gulidanö khö ndra soloʼö khö Yesu?

² Fatiu dödö niha gulidanö khö ndra soloʼö khö Yesu. Hadia mbörö? Börö me simane Yesu, ”tenga tana khö niha gulidanö” ita. (Yoh. 15:17-19) Hewaʼae na tafosumange wamatörö niha gulidanö, lö mangalulu ita khöra mazui ba gama-gama soʼamaedolagö yaʼira. Ha khö Yehowa mangalulu ita. Tatuhini waʼasinangea Lowalangi ba wamatörö niha gulidanö, hewaʼae na iforege Satana hegöi ’maʼuwunia’ ba wolawa daʼö. (1 Mo. 3:1-5, 15) Taturiaigö wa lö hadöi tötönafö tanö böʼö ba wangeheta abula dödö ba gulidanö baero Wamatörö Lowalangi, ba hasambalö ihori zoʼuduni yaʼia ba zi lö ara tö. (Dan. 2:44; Fam. 19:19-21) No turia  somuso dödö daʼö ba niha sangokhögö fangide-ngideʼö, hizaʼi turia si lö sökhi daʼö ba niha safaito.​—Si. 37:10, 11.

³ Fatiu göi dödö niha gulidanö khöda börö me tafalua goi-goi Lowalangi ba waʼaurida. Faböʼö sibai goi-goinia andre ba gamakhoita niha gulidanö sanandrösa ba zatulö hegöi si lö atulö. Duma-dumania, ato niha sangumaʼö wa lö fasala na mufalua gamuata wohorö si fakhili ba gamuata niha nihori Lowalangi ba Zodoma hegöi Gomora. (Yud. 7) Börö me taʼoʼö goi-goi Zura Niʼamoniʼö sanandrösa ba gamuata simane daʼö, ato niha sangoʼaya yaʼita ba lawaʼö wa niha si fatandro ita!​—1 Fe. 4:3, 4.

4. Hadia manö mbua-bua sanolo yaʼita enaʼö anau gölöda na so zi fatiu tödö khöda?

⁴ Hadia zanolo yaʼita enaʼö anau gölöda na fatiu dödö niha böʼö khöda ba laʼoʼaya ita? Moguna aro wamatida wa hasambalö itolo ita Yehowa. Famatida andrö simane baluse, tola ’itaha nono wana soʼalitö andrö khö Zatana’. (Ef. 6:16) Hizaʼi, lö obönö na ha famati niʼokhögöda. Moguna göi taʼokhögö waʼomasi. Hadia mbörö? Börö me faʼomasi andrö ”lö alio mofönu”. Itaögö fefu hadia ia zagafökhö si fao faʼanau gölö. (1 Ko. 13:4-7, 13) Iadaʼa, datatutunö hewisa wa tola möi fanoloda waʼomasi khö Yehowa, faʼomasi khö ndra talifusöda, hegöi faʼomasi ba niha si faʼudu khöda, enaʼö anau gölöda hewaʼae na fatiu dödö niha gulidanö khöda.

5. Hadia zi tola ifalua Yesu börö me iʼomasiʼö Namania?

⁵ Ba mbongi fatua lö labunu ia ira udunia, imane Yesu khö ndra soloʼö khönia si lö faröi, ”Uʼomasiʼö Nama, [andrö wa] ufalua niwaʼö Nama khögu.” (Yoh. 14:31) Börö me iʼomasiʼö Yehowa, andrö wa tola itaögö wamakao sabua. Tola göi tataögö zimane daʼö na taʼomasiʼö Yehowa.

6. Moloʼö Roma 5:3-5, hewisa dödö nono mbanua Yehowa na fatiu dödö niha gulidanö khöra?

⁶ Faʼomasi khö Lowalangi zanolo ono mbanua Yehowa ba wanaögö folohi. Duma-dumania, me lafaso ndra sinenge ira sangetuʼö huku ba niha Yahudi enaʼö laböhöli wanuriaigö, faʼomasi khö Yehowa zanolo yaʼira ba ’woloʼö khö Lowalangi me yaʼia zamatörö yaʼira moroi ba woloʼö ba niha’. (Hal. 5:29; 1 Yo. 5:3) Faʼomasi saro simane daʼö göi zanolo ira talifusöda ba ginötö andre ba wanaögö folohi moroi khö ndra samatörö safaito ba sebua kuaso. Lö ide-ide dödöda na fatiu dödö niha gulidanö khöda, hizaʼi so khöda waʼomuso dödö.​—Hal. 5:41; baso Roma 5:3-5.

7. Hewisa zinangeania ita na so nösi nomoda sanaisi yaʼita?

⁷ Na lasaisi ita ira ösi nomoda, tola tobali fanandraigö sabölö ebua daʼö. Me ibörögö adöni dödöda ba zindruhu, te so ösa nösi nomoda sangumaʼö wa no ifaelungu ita famahaʼö sofaya. Mazui, te lawalinga no owöhö ita. (Fatimbaisi Mareko 3:21.) Tola manö lö faʼahakhö dödöra ba wamakao yaʼita. Hizaʼi, lö tokea ita na alua khöda zimane daʼö. Imane Yesu, ”Si faʼudu ba niha dania zoroi yomonia.” (Mat. 10:36) Hewaʼae simanö, lö fatiu dödöda khöra. Na taʼomasiʼö Yehowa, taʼomasiʼö sibai göi niha böʼö. (Mat. 22:37-39) Hizaʼi, lö tasawö huku hegöi goi-goi Zura Niʼamoniʼö, ha enaʼö omuso dödö niha böʼö.

8-9. Hadia zanolo si samösa talifusöda ira alawe enaʼö anau gölönia hewaʼae na göna ia fanaisi?

⁸ Tola anau gölö Georgina, si no mututunö moroi yawa, hewaʼae na isaisi ia mamania. Itutunö Georgina, ”Faoga mamagu ba wamahaʼö yaʼaga ba Zura Niʼamoniʼö khö ndra Samaduhuʼö Yehowa. Hizaʼi önö waŵa aefa daʼö, me edöna möido ba gangowuloa, tebulö sibai gamuata mamagu. Sindruhunia, no fahuhuo ia ba niha sondröi sindruhu, ba iʼogunaʼö  walimosara andrö ba wabuʼa-buʼasa khögu. Iʼoʼaya göi ndraʼo, isöbi mbugu, itögi mbagigu, ba itiboʼö publikasi si no labeʼe khögu. Tebayagö ndraʼo idanö me 15 fakhe ndröfigu. Iforege mamagu enaʼö uböhöli wamosumange Yehowa, andrö wa ibeʼe ndraʼo ba nahia niʼogunaʼö ba wangowuloi iraono si bohou ebua si lö sökhi amuata. So ösa ba gotaluara zangogunaʼö narkoba ba sanawö huku. Abua sibai wanaögö fanandraigö moroi ba nösi nomoda, börö me sinangea menaʼö na laʼomasiʼö ba laʼameʼegö tödö ita.”

⁹ Hana wa tola anau gölö Georgina? Imane, ”Me ibörögö isaisi ndraʼo mamagu, awena sibai uʼasiwai wombaso Sura Niʼamoniʼö maʼafefu. Me luo daʼö, faduhu dödögu wa no usöndra zindruhu, ba urasoi wa aro sibai wahuwusagu khö Yehowa. Asese mangandrödo khönia, ba ifondrondrongo wangandrögu. Me toröi ndraʼo ba nahia wangowuloi iraono si bohou ebua si lö sökhi amuata, so samösa dalifusöda ira alawe solohe yaʼo weʼamöi ba nomonia, ba mafahaʼö ndraʼaga ba Zura Niʼamoniʼö. Ba ginötö si basaki andrö, laʼabölöʼö ndraʼo ira talifusöda. Labaliʼö ösi nomora ndraʼo. Uʼila samösa wa abölö nasa Yehowa moroi khö ndra sanaisi yaʼita, gofu haniha ira.”

10. Hadia waʼafaduhu dödö niʼokhögöda sanandrösa khö Yehowa?

¹⁰ Isura Faulo wa lö hadöi si tola ’mamabali yaʼita moroi ba waʼomasi Lowalangi soroma ba khö Zoʼaya yaʼita Yesu Keriso’. (Rom. 8:38, 39) Hewaʼae na tataögö wanandraigö iadaʼa, hasambalö fao khöda Yehowa ba wondrara tödöda hegöi ba wangabölöʼö yaʼita. Ba simane salua khö Georgina, tola iʼodela ndra talifusöda Yehowa ba wanolo yaʼita.

11. Hadia mbuania khö ndra soloʼö Keriso na lafalua mene-mene Yesu nisura ba Yohane 15:12, 13? Beʼe duma-duma.

¹¹ Ba mbongi fatua lö mate ia, ifasugi ba dödö ndra nifahaʼönia Yesu enaʼö faoma laʼomasiʼö nawöra. (Baso Yohane 15:12, 13.) Aboto ba dödönia wa tola so khöra wahasara dödö ba faʼanau gölö hewaʼae na fatiu dödö niha gulidanö khöra, asala faoma laʼomasiʼö ba latolo nawöra. Nehegö hadia zalua ba mbanua niha Keriso ba Desalonika. Iʼotarai me awena mufasindro mbanua niha Keriso andrö, no göna ndra talifusöda folohi. Hizaʼi, no tobali ira duma-duma ba wangoromaʼö faʼalöfaröi hegöi faʼomasi. (1 Te. 1:3, 6, 7) Iʼamenesi ira Faulo  enaʼö lö tebulö laforomaʼö waʼomasi ”soroi ba dödö”. (1 Te. 4:9, 10) Na laʼomasiʼö niha böʼö, tola terou dödöra ba wondrara tödö niha sabu tödö ba latolo niha sambö faʼabölö. (1 Te. 5:14) Laʼoʼö mene-mene Waulo. Tola oroma daʼö ba zurania si dua, nisurania döfi aefa daʼö. Iwaʼö khöra Faulo wa no ’tedou waʼomasira khö nawöra zamösana’. (2 Te. 1:3-5) Börö me faoma laʼomasiʼö nawöra, tola anau gölöra ba wanaögö abula dödö hegöi folohi.

12. Me alua wasuwöta ba zi sambua soi, hewisa wangoromaʼö ndra talifusöda faʼomasi ba nawöra?

¹² Nehegö zi no irai alua khö Danylo, si no mututunö moroi yawa, hegöi foʼomonia. Me alua wasuwöta ba mbanua si toröi yaʼira, lö tebulö laʼondrasi gangowuloa, laforege wanuriaigö, ba labeʼe gö ndra talifusöra. Samuza inötö, so ösa zaradadu si no molohe fakake wasuwöta si möi ba nomo Danylo. Imane wanutunö, ”Lafaso ndraʼo ba wangosilöʼögö famatigu. Börö me lö omasido wamalua daʼö, laböbözi ndraʼo. Laʼosamunu yaʼo göi ira, lafatörö nono wana ba dete högögu. Fatua lö mofanö ira, lafetaʼu ndraʼo wa hasambalö lafuli ira ba wohoröni foʼomogu. Latolo ndraʼaga ira talifusöda enaʼö tola masöndra kereta api weʼamöi ba mbanua böʼö. Lö irai uʼolifugö waʼomasi niforomaʼöra. Me no ofeta ndraʼaga ba mbanua daʼö, labeʼe göma ira talifusöda, ba latolo ndraʼo wangalui halöwö hegöi nahia waʼatoröi. Ba gafuriata, tola matehegö toröi ba nomoma ndra talifusöda soloi moroi ba mbanua böʼö börö me alua wasuwöta ba mbanuara.” Si no irai alua andrö zangoromaʼö wa tola anau gölöda hewaʼae na fatiu dödö niha gulidanö khöda, asala faoma taʼomasiʼö nawöda.

13. Hewisa wa tola möi fanoloda geheha niʼamoniʼö enaʼö anau gölöda wamosumange Yehowa hewaʼae na fatiu dödö niha böʼö khöda?

¹³ Iwaʼö Yesu khö ndra soloʼö khönia wa moguna laʼomasiʼö niha si faʼudu khöra. (Mat. 5:44, 45) Hadia aoha wamalua daʼö? Tatu manö löʼö. Hizaʼi, börö wanolo geheha niʼamoniʼö moroi khö Lowalangi, tola tafalua daʼö. Ba mbua-bua geheha, farahu ba daʼö waʼomasi, faʼebolo dödö, faʼasökhi dödö, falöʼalio mofönu, ba fanaha tödö. (Gal. 5:22, 23) Tola möi fanoloda fefu mbua-bua andrö enaʼö anau gölöda hewaʼae na fatiu dödö niha böʼö khöda. Ato ndra talifusöda sangoromaʼö bua-bua simane daʼö, irege tola alulu dödö ngambatöra, satuara, mazui si faola omo khöra, si no irai manaisi  yaʼira. Sindruhunia, ato niha si no irai manaisi yaʼita, si no tobali talifusöda iadaʼa. Börö daʼö, na abua khöu wangomasiʼö niha sanaisi yaʼugö, andrö geheha niʼamoniʼö khö Yehowa. (Luk. 11:13) Yafaduhu dödöu wa lö tebulö ötema mbua si sökhi na öʼoʼö li Yehowa.​—Amd. 3:5-7.

14-15. Hewisa wa tola möi fanolo Yasmeen mene-mene si so ba Roma 12:17-21 enaʼö lö tebulö iforomaʼö waʼomasi khö woʼomonia?

¹⁴ Nehegö zalua khö Yasmeen, si toröi ba Timur Tengah. Me ihalö gangetula tobali Samaduhuʼö Yehowa, iwaʼö tödönia foʼomonia wa no lalimo Yasmeen. Börö daʼö, iforege foʼomonia ba wanaisi yaʼia enaʼö iböhöli wamosumange Yehowa. Iʼoʼaya Yasmeen, ba iʼandrö khö ndra ösi nomora, khö zondröniaʼö ba agama, hegöi khö duku, enaʼö lafetaʼu Yasmeen ba lafobahulu ia wa no iboto wahasara dödö yomo ba nomo. Baero daʼö, ilele ndra talifusöda me mufalua gangowuloa! Asese meʼe Yasmeen börö me lö sökhi gamuata woʼomonia khönia.

¹⁵ Ba Balai Mbanua Lowalangi, lö tebulö larara dödö Yasmeen ira ösi nomonia ba wamati, ba laʼabölöʼö ia. Laʼamenesi ia ira satua sokubaloi ba wamalua mene-mene si so ba Roma 12:17-21. (Baso.) Imane Yasmeen, ”Abua sibai wamalua daʼö. Hizaʼi, uʼandrö wanolo moroi khö Yehowa, ba uforege wamalua mene-mene Zura Niʼamoniʼö. Börö daʼö, me ifatambusi naha nawuma foʼomogu, iʼanemaiʼö ubözini. Me iʼoʼaya ndraʼo, uhaogö-haogö wanema linia. Ba me mofökhö ia, urorogö ia.”

16-17. Hadia wamahaʼö nihalöu moroi ba duma-duma Yasmeen?

¹⁶ Itema howu-howu Yasmeen börö me lö tebulö iforomaʼö waʼomasi khö woʼomonia. Imane, ”Ibörögö ifaduhusi tödö ndraʼo foʼomogu börö me iʼila wa lö irai falimo ndraʼo. Ibörögö göi ifondrondrongo niwaʼögu me madunö-dunö zoʼamakhaita ba agama, ba fao dödönia ba wondrorogö faʼatulö yomo ba nomo. Iadaʼa, ifarou dödögu weʼamöi ba gangowuloa. Marasoi waʼohahau dödö ba faʼatulö yomo ba nomo. Utötöna wa samuza inötö dania, ifahaʼö ia ba zindruhu foʼomogu ba fao ndraʼaga wamosumange Yehowa.”

¹⁷ Moroi ba duma-duma Yasmeen, tola taʼila wa niha sangokhögö faʼomasi, ”itaögö fefu hadia ia, . . . idöna-döna fefu hadia ia, ba lö faröi ba ngawalö hadia ia”. (1 Ko. 13:4, 7) Abölö ebua lua-lua niʼasogö waʼomasi moroi ba watiusa tödö. Na taforomaʼö waʼomasi ba niha böʼö, tola manö laböhöli wanaisi yaʼita. Ba na lö  tebulö taforomaʼö waʼomasi, tola taʼomusoiʼö dödö Yehowa. Hizaʼi, hewaʼae na lö tebulö fatiu dödö niha gulidanö khöda, hasambalö tarasoi waʼomuso dödö. Hadia mbörö?

18. Hana wa lö tebulö tarasoi waʼomuso dödö hewaʼae na fatiu dödö niha gulidanö khöda?

¹⁸ Imane Yesu, ”Yaʼahowu ami na fatiu dödö niha khömi.” (Luk. 6:22) Lö omasi ita na fatiu dödö niha böʼö khöda hegöi na lafakao ita börö wamatida. Na simanö, hana wa lö tebulö tarasoi waʼomuso dödö hewaʼae na fatiu dödö niha gulidanö khöda? Si löʼö-löʼönia, so tölu dane-danenia. Si oföna, na anau gölöda, omuso dödö Yehowa khöda. (1 Fe. 4:13, 14) Si dua, itugu aro wamatida me no tetandraigö. (1 Fe. 1:7) Ba si tölu, tola tatema howu-howu sebua böli, yaʼia daʼö faʼauri si lö aetu.​—Rom. 2:6, 7.

19. Hana wa omuso dödö ndra sinenge me no aefa laleasi ira?

¹⁹ Lö ara me no aefa tesusugi Yesu, larasoi ira sinengenia waʼomuso dödö si no irai itutunö. Me no aefa laleasi ba lafaso ira enaʼö laböhöli wanuriaigö, ”omuso dödöra börö me no sinangea laʼoʼaya ira ba döi [Yesu] andrö”. (Hal. 5:40-42) Abölö ebua waʼomasira khö Zoʼaya yaʼira moroi ba waʼataʼura ba niha si faʼudu khöra. Ba no göi laforomaʼö waʼomasi me ”lö laböhöli” wanuriaigö turia somuso dödö. Iadaʼa, ato ndra talifusöda si lö faröi ba wamosumange Yehowa hewaʼae na oya gabula dödöra. Aboto ba dödöra wa lö iʼolifugö Yehowa waʼerege dödöra hegöi faʼomasi niforomaʼöra ba döinia.​—Heb. 6:10.

20. Hadia nitutunöda ba artikel aefa daʼa?

²⁰ Sagötö lö nihori gulidanö si lö sökhi andre, lö tebulö fatiu dödö niha gulidanö khöda. (Yoh. 15:19) Hizaʼi, lö moguna ataʼu ita. Simane nitutunöda dania ba artikel aefa daʼa, hasambalö ”iʼabeʼeʼö ba ilumöʼö” nono mbanuania si lö faröi Yehowa. (2 Te. 3:3) Börö daʼö, yalötebulö taʼomasiʼö Yehowa, ira talifusöda, hegöi niha si faʼudu khöda. Na tafalua daʼö, tola tarorogö wahasara dödöda ba itugu aro wamatida. Tola göi tafolakhömi Yehowa. Ba tola taforomaʼö wa abölö ebua lua-lua niʼasogö waʼomasi moroi ba watiusa tödö.