So ösa niha Keriso sangogunaʼö aplikasi pesan singkat enaʼö tola fahuhuo ira ba nösi nomora hegöi talifusöra si sara lala wamati. Hizaʼi, niha Keriso saro ba wamati, lö olifu ia mene-mene daʼa, ”Niha satua-tua ibiniʼö ia na so deʼala, hizaʼi niha si lö faʼaboto ba dödö itörö manö ba iluʼi lua-luania.”​—Amd. 27:12.

Aboto ba dödöda wa ibeʼe mene-mene daʼö Yehowa ba wolumöʼö yaʼita. Börö daʼö, lö fariawö ita ba niha somasi mamoto fahasara dödö, si no muʼefasi ba mbanua niha Keriso, mazui samazaewe famahaʼö faya. (Rom. 16:17; 1 Ko. 5:11; 2 Yo. 10, 11) Baero daʼö, ba mbanua niha Keriso, so ösa zamalua amuata si lö tefaudu ba Zura Niʼamoniʼö. (2 Ti. 2:20, 21) Daʼö mbörö wa taʼangenanöi sibai wamili si fahuwu khöda. Hizaʼi, te abua wamili fariawösa si sökhi na taʼogunaʼö aplikasi pesan singkat.

Moguna taʼangenanöi wariawösada, mendrua manö ba grup chat sato niha. Hizaʼi alimagö sibai, so ösa niha Keriso si göna abula dödö börö me fao ira ba grup simane daʼö. Te so mato hauga ngaotu mazui hauga ribu niha si fao ba zi sambua grup. Na fao zi samösa talifusöda ba grup sato niha simane daʼö, tatu abua khönia ba woʼangenanöi fariawösania. Lö iʼila sibai haniha zindruhunia zi farahu ba grup daʼö, ba hewisa waʼaro wamatira. Imane Sinunö 26:4, ”Lö fariawö ndraʼo ba niha si falimo, ba uʼaröuʼö ndraʼo ba niha saminiʼö haniha ia zindruhunia.” Daʼa zangoromaʼö wa abölö sökhi na taʼogunaʼö aplikasi pesan singkat ba wahuhuosa ha ba niha niʼilada.

Hewaʼae na lö ato niha si farahu ba grup daʼö, moguna laʼangenanöi ira niha Keriso hawaʼoya ginötö niʼogunaʼöra ba hadia manö nidunö-dunöra. Tatu lö omasi ita na ahori ginötöda ha ba wahuhuosa ba pesan singkat. Baero daʼö, böi öwaʼö tödöu wa moguna öbeʼe wanema li ero na so pesan singkat nifaʼoheʼö ba grup daʼö, gofu hadia nidunö-dunöra. Ifangelama Dimoteo Faulo enaʼö iʼangenanöi wariawösania ba niha ’samatou-tou awöra ba soʼurusai si tenga urusara’. (1 Ti. 5:13) Moguna göi taʼoʼö mene-mene daʼö ero na tafaʼoheʼö pesan singkat.

Lö omasi niha Keriso saro ba wamati ba wamazaewe mazui ba wamondrondrongo fehede si lö sökhi hegöi informasi si tebai laʼila niha sanandrösa khö ndra talifusöda. (Si. 15:3; Amd. 20:19) Lö göi adöni dödöra ba duria mazui huhuo sahöli-höli dödö hegöi ba gangombakhata si lö tatu na atulö, ba lö lafaʼema daʼö misa ba niha. (Ef. 4:25) Sindruhunia, oya sibai gö ba wamati hegöi turia si tola mufaduhusi tödö ba situs web jw.org hegöi ba JW Broadcasting^® nifazökhi ero waŵa.

Ato ndra talifusöda sangogunaʼö pesan singkat ba wowöli, ba wamawa, hegöi ba wondrönisi tödö niha ba zi sambua gama-gama mazui halöwö. Moʼamakhaita fefu daʼö ba wangalui kefe, tenga ba wamosumange Yehowa. Börö me ’lö taʼomasiʼö gefe’, lö taʼakali ndra talifusöda ba wangalui hare.​—Heb. 13:5.

Hewisa na so ndra talifusöda si göna abula dödö mazui bencana alam? Hadia taʼogunaʼö pesan singkat ba wangowuloi tolo-tolo? Taʼomasiʼö ndra talifusöda ba taʼameʼegö tödö ira. Börö daʼö, omasi ita tatolo ba tarara dödö ndra talifusöda si göna abula dödö. (Yak. 2:15, 16) Hizaʼi, na taʼogunaʼö grup chat sato niha ba wangowuloi tolo-tolo, tola manö tafawukaisi gamakhoita nitatugöi gödo ndraha mazui banua niha Keriso. (1 Ti. 5:3, 4, 9, 10, 16) Tatu lö omasi ita na so ba dödö niha wa hulö zi no tebeʼe khöda halöwö si tohude ba wanolo ira talifusöda.

Omasi ita tafolakhömi Lowalangi ba ngawalö nifaluada. (1 Ko. 10:31) Börö daʼö, na taʼogunaʼö aplikasi pesan singkat mazui teknologi tanö böʼö, dataʼangeragö hadia manö deʼalania ba taʼangenanöi wangogunaʼö yaʼia.