1-2. Haniha manö zanolo niha nifahaʼö ba Zura Niʼamoniʼö enaʼö tedou ba wamati irege tebayagö ia idanö?

IMANE Amy si toröi ba Fiji, ”Omasido sibai wamahaʼö nitemagu moroi ba Zura Niʼamoniʼö. Aboto ba dödögu wa daʼö zindruhu. Hizaʼi, awena ubulöʼö waʼaurigu irege tebayagö ndraʼo idanö, me ibörögö fariawö ndraʼo khö ndra talifusöda ba wamati.” So sambua wamahaʼö si tohude nihalöda moroi ba zalua khö Amy: Tola manö tedou ba wamati niha nifahaʼöda ba Zura Niʼamoniʼö irege tebayagö ia idanö, na latolo ia ira talifusöda ba mbanua niha Keriso.

² Tola fao fefu zanuriaigö ba wanolo niha nifahaʼö enaʼö faböbö ira ba mbanua niha Keriso. (Ef. 4:16) Imane samösa perintis si toröi ba Vanuatu sotöi Leilani, ”So sambua gamaedola sangumaʼö, ’Moguna fao fefu niha ba zi sambua banua ba wangebuaʼö si samösa iraono.’” Eluahania, fao ndra satua, si fahatö khöra, si fahuwu khöra, hegöi ira samahaʼö ba zekola, ba wanolo si samösa iraono irege tobali ia niha satua-tua fangera-ngera. No lafalua daʼö na labeʼe khönia wamarou dödö hegöi famahaʼö si tohude. Imane nasa Leilani, ”Moloʼö yaʼo, tefaudu göi gamaedola daʼö ba wombaliʼö nifahaʼö. Moguna fao fefu niha si so ba mbanua niha Keriso ba wanolo si samösa niha enaʼö faböbö ia ba zindruhu.” Hadia zi tola lafalua ira sanuriaigö? Tola labeʼe mene-mene, famarou dödö, hegöi duma-duma si sökhi khö zi samösa niha nifahaʼö, ba latolo ia enaʼö tedou ba wamati irege tebayagö ia idanö.​—Amd. 15:22.

3. Hadia wamahaʼö si tola öhalö moroi ba nitutunö Ana, Dorin, hegöi Leilani?

³ Hana wa omuso dödö zondröniaʼö famahaʼö ba Zura Niʼamoniʼö na latolo niha nifahaʼönia ira sanuriaigö tanö böʼö? Nehegö hadia niwaʼö zi samösa perintis istimewa ba Moldova sotöi Ana, ”Oya wanolo sinangea mubeʼe ba niha nifahaʼö ba Zura Niʼamoniʼö, ba abua khö  zi samösa samahaʼö na ha yaʼi-yaʼia zameʼe fanolo.” Imane Dorin si tobali perintis istimewa ba soi daʼö, ”Asese lawaʼö ira sanuriaigö tanö böʼö ngawua wehede si tofakha ba dödö niha nifahaʼögu, si lö irai tumbu ba dödögu ba zilalö.” Itutunö göi Leilani hadia nasa mbörö wa omuso dödöda na latolo niha nifahaʼöda ira sanuriaigö tanö böʼö, ”Na irasoi niha nifahaʼöda waʼomasi hegöi foʼameʼegö tödö moroi khö ndra talifusöda, daʼö zanolo yaʼia ba wangiʼila wa yaʼita andre sindruhu-ndruhu ono mbanua Yehowa.”​—Yoh. 13:35.

4. Hadia manö nitutunöda ba artikel daʼa?

⁴ Tola manö manofu ndraʼugö, ’Hadia zi tola ufalua ba wanolo niha nifahaʼö ba Zura Niʼamoniʼö enaʼö tedou ia ba wamati, hewaʼae na tenga yaʼo zondröniaʼö khönia famahaʼö?’ Datatutunö hadia zi tola tafalua na fao ita ba wondröniaʼö famahaʼö ba Zura Niʼamoniʼö hegöi na iʼondrasi gangowuloa si samösa niha nifahaʼö. Tatutunö göi hadia wanolo si tola labeʼe ira satua sokubaloi ba niha nifahaʼö ba Zura Niʼamoniʼö enaʼö tedou ia ba wamati irege tebayagö idanö.

5. Hadia zinangea öfalua na so dalifusöda sangumaʼö khöu wefao awönia ba wondröniaʼö famahaʼö ba Zura Niʼamoniʼö?

⁵ Na mufalua wamahaʼö ba Zura Niʼamoniʼö, sondröniaʼö famahaʼö zangokhögö noro dödö sabölö ebua ba wanolo niha nifahaʼönia ba wangokhögö faʼaboto ba dödö sanandrösa ba Daromali Lowalangi. Na so dalifusöda sangumaʼö khöu wefao awönia ba wondröniaʼö famahaʼö ba Zura Niʼamoniʼö, moguna ötuhini ia. (Sango. 4:9, 10) Hadia manö zinangea öfalua ba wotuhini famahaʼö nidöniaʼönia?

6. Fatua lö fao ndraʼugö ba wondröniaʼö famahaʼö ba Zura Niʼamoniʼö, hewisa wamaluamö goi-goi si so ba Gamaedola 20:18?

⁶ Henaigö faʼanö ndraʼugö. Si oföna, andrö khö zondröniaʼö famahaʼö ba Zura Niʼamoniʼö enaʼö itutunö sanandrösa ba niha nifahaʼönia. (Baso Gamaedola 20:18.) Tola ösofu khönia, ”Hewisa waö-waö waʼauri niha nifahaʼöu andrö? Hadia duho nitutunöda khönia? Hadia wamahaʼö sinangea mutandrösaigö? Sagötö mufalua wamahaʼö, hadia so zinangea ufalua mazui uwaʼö? Hadia so göi zi tebai ufalua mazui uwaʼö? Hewisa wameʼegu khönia famarou dödö enaʼö idouʼö ia ba wamati?” Tatu lö iʼombakhaʼö khöu sondröniaʼö famahaʼö andrö zi tebai muʼombakhaʼö ba niha böʼö. Hizaʼi, tola möi fanolomö fefu niʼombakhaʼönia. Daʼö nifalua dalifusöda ira alawe sotöi Joy, sangai halöwö tobali utusan injil. Itutunö fefu zoʼamakhaita ba niha nifahaʼönia khö dalifusöda si fao awönia ba wondröniaʼö famahaʼö ba Zura Niʼamoniʼö. Imane wangumaʼö, ”Me no ututunö daʼö, terou dödö dalifusöda si fao khögu ba wanolo niha nifahaʼögu ba Zura Niʼamoniʼö. Daʼö göi zanolo yaʼia ba wotatugöi hadia manö zinangea iwaʼö sagötö mufalua wamahaʼö.”

7. Na fao ndraʼugö ba wondröniaʼö famahaʼö ba Zura Niʼamoniʼö, hana wa moguna öfaʼanö ndraʼugö ba duho sinangea mututunö?

⁷ Moguna göi öfaʼanö ndraʼugö ba duho nitutunö ba wamahaʼö andrö. (Esr. 7:10) Imane Dorin si no  mututunö moroi yawa, ”Omuso dödögu na no ifaʼanö ia talifusöda si fao khögu ba duho sinangea mututunö ba wamahaʼö. Na ifalua daʼö, tola ibeʼe mbua gera-era si tefaudu.” Baero daʼö, na iʼila niha nifahaʼö andrö wa no mihaogö mifaʼanö ami, tola tobali duma-duma si sökhi daʼö khönia. Hewaʼae na lö fakhamö öfaʼanö fefu duho sinangea mututunö, si löʼö-löʼönia, alui hadia manö duho sinangea mutandrösaigö.

8. Na yaʼugö zondröniaʼö fangandrö, hadia zinangea öfalua enaʼö itugu oya mbua nitema niha nifahaʼö moroi ba wangandröu?

⁸ Sambua faosatö si tohude na mufalua wamahaʼö ba Zura Niʼamoniʼö yaʼia daʼö fangandrö. Börö daʼö, na laʼandrö khöu ba wondröniaʼö fangandrö, angeragö sakali hadia manö zinangea öwaʼö. Na öfalua daʼö, itugu oya mbua nitema niha nifahaʼö andrö moroi ba wangandrö nifaʼemamö. (Si. 141:2) Itutunö talifusöda ira alawe sotöi Hanae si toröi ba Jepang wa lö solifu ia wangandrö nifaʼema dalifusöda ira alawe si fao khö zondröniaʼö famahaʼö khönia. Imane wangumaʼö, ”Tola urasoi wa aro wahuwusania khö Yehowa. Omasido göi zimane daʼö. Ba me itötöi döigu ba wangandrönia, tola urasoi wa iʼomasiʼö ndraʼo.”

9. Moloʼö Yakobo 1:19, hewisa enaʼö tola tobali ndraʼugö sanolo na fao ndraʼugö ba wondröniaʼö famahaʼö ba Zura Niʼamoniʼö?

⁹ Tolo zondröniaʼö famahaʼö. Imane samösa talifusöda ira alawe sotöi Omamuyovbi, sangai halöwö tobali perintis istimewa ba Nigeria, ”Talifusöda si fao khöda ba wondröniaʼö famahaʼö, tola tobali ia sanolo na ihaogö iʼosisiʼö wamahaʼö nitutunöda. Ibeʼe göi gonönöta si sökhi. Hizaʼi, lö talafo oya fahuhuo ia börö me aboto ba dödönia wa tenga yaʼia zondröniaʼö famahaʼö andrö.” Börö daʼö, hawaʼara tola öbeʼe gonönöta, ba hadia gonönöta sinangea öfaehagö? (Amd. 25:11) Haogö wamondrondrongo ba ginötö fahuhuo zondröniaʼö famahaʼö hegöi niha nifahaʼönia. (Baso Yakobo 1:19.) Na öfalua daʼö, tola tefaʼanö ndraʼugö ba wanolo yaʼia na inötö moguna. Fatua lö fahuhuo ndraʼugö, angeragö ua sakali. Duma-dumania, böi taba dalu huhuo zondröniaʼö famahaʼö, böi tutunö duho tanö böʼö, ba böi talafo anau gonönöta nibeʼemö. Tola itugu aboto ba dödö niha nifahaʼö andrö duho nitutunömi na öbeʼe gonönöta, duma-duma, mazui fanofu sadogo-dogo. Itaria, tola manö örasoi wa lö oya gonönöta si tola öbeʼe. Hizaʼi, na ösuno niha nifahaʼö andrö ba öforomaʼö wa öʼameʼegö tödö ia, tola tobali fanolonia daʼö enaʼö itugu tedou ia ba wamati.

10. Hadia mbuania ba niha nifahaʼö ba Zura Niʼamoniʼö na ötutunö khönia zi no irai alua khöu?

¹⁰ Tutunö zi no irai alua khöu. Na tefaudu, tola öʼadogoiʼö wanutunö si no irai alua khöu ba niha nifahaʼö ba Zura Niʼamoniʼö. Duma-dumania, tutunö khönia hewisa me awena öfahaʼö ndraʼugö ba zindruhu, hewisa wanaögöu abula dödö, mazui hewisa wanolo Yehowa ndraʼugö. (Si. 78:4, 7) Tola manö tefaudu zi no irai alua khöu andrö ba zalua khönia. Na ötutunö khönia daʼö, te itugu aro wamatinia, terou dödönia ba wondrouʼö yaʼia ba wamati irege tebayagö idanö, ba tola möi fanolonia daʼö ba wanaögö abula dödö salua khönia. (1 Fe. 5:9) No irai irasoi daʼö talifusöda ira matua sotöi Gabriel, samösa perintis si toröi ba Brasil.  Me ifahaʼö ia ba Zura Niʼamoniʼö, itema mbua si sökhi moroi ba zi no irai alua nitutunö ndra talifusöda khönia. Imane wanutunö, ”Me urongo zi no irai alua khö ndra talifusöda, tola ufahaʼö ndraʼo wa aboto ba dödö Yehowa gabula dödö salua khöda. Baero daʼö, na tola mofozu ndra talifusöda andrö ba wanaögö abula dödöra, tola göi mofozu ndraʼo.”

11-12. Na iʼondrasi gangowuloada niha nifahaʼö ba Zura Niʼamoniʼö, hana wa moguna tatemaʼö ia si fao faʼafahuwu?

¹¹ Enaʼö tola tedou ba wamati zi samösa niha nifahaʼö ba Zura Niʼamoniʼö irege tebayagö ia idanö, moguna owölö-ölö ia weʼamöi ba gangowuloa. Oya mbua nitemania na ifalua daʼö. (Heb. 10:24, 25) Tola manö ifarou dödönia sondröniaʼö famahaʼö khönia ba wangondrasi angowuloa. Na itandraigö weʼamöi ba gangowuloa, tola tafarou dödönia enaʼö lö iböhöli wamalua daʼö. Hadia manö zinangea tafalua?

¹² Temaʼö ia si fao faʼafahuwu. (Rom. 15:7) Na irasoi si samösa niha nifahaʼö ba Zura Niʼamoniʼö wa latemaʼö ia ba gangowuloa, tola manö terou dödönia irege lö iböhöli wangondrasi angowuloa. Börö daʼö, temaʼö ia si fao faʼafahuwu, ba ohe ia ba wamalukhaisi ira talifusöda tanö böʼö. Hizaʼi, böi falua daʼö ba lala si lö fatema ba dödönia. Lau fahuhuo khönia, börö me tola manö lö si tohare dalifusöda sondröniaʼö khönia famahaʼö mazui oya halöwö nifaluania ba mbanua niha Keriso. Haogö fondrondrongo niwaʼö niha nifahaʼö ba Zura Niʼamoniʼö andrö ba foromaʼö wa öʼameʼegö tödö ia. Hadia lua-luania khönia na tatemaʼö ia si fao faʼafahuwu? Nehegö zalua khö Dmitrii sawena tebayagö idanö ba zi hauga fakhe silalö, si no mangai halöwö iadaʼa tobali enoni. Itutunö hadia nirasoinia me awena sibai iʼondrasi gangowuloa, ”Me luo daʼö, börö waʼataʼugu, no ubalo-baloi föna Balai Mbanua Lowalangi. Iʼila ndraʼo samösa talifusöda ira matua, ba iʼohedo bakha ba Balai si fao faʼasökhi dödö. Ato ndra talifusöda samalukhaisi yaʼo. Lö utötöna wa simane daʼö wanemaʼöra yaʼo. Börö waʼomuso dödögu, omasido na ero maʼökhö möido ba gangowuloa. Lö irai urasoi zimane daʼö ba zilalö.”

13. Na öforomaʼö gamuata si sökhi, hadia lua-luania daʼö ba niha nifahaʼö ba Zura Niʼamoniʼö?

¹³ Beʼe duma-duma si sökhi. Na öforomaʼö gamuata si sökhi, tola itugu faduhu dödö niha nifahaʼö ba Zura Niʼamoniʼö wa yaʼita andre niha Keriso sindruhu. (Mat. 5:16) Imane samösa talifusöda ira matua sotöi Vitalii, sangai halöwö tobali perintis ba Moldova, ”Uhaogö wonehegö lala waʼauri, lala wangera-ngera, hegöi amuata niha ba mbanua niha Keriso. Daʼa zangaʼasogö khögu faʼafaduhu dödö wa Samaduhuʼö Yehowa andrö agama satulö.”

14. Hewisa wa tola möi fanolo niha nifahaʼö ba Zura Niʼamoniʼö duma-duma nibeʼeu enaʼö tedou ia ba wamati?

¹⁴ Fatua lö tebayagö idanö niha nifahaʼö ba Zura Niʼamoniʼö, moguna ifalua zi no ifahaʼö yaʼia. Itaria abua wamalua daʼö. Hizaʼi, na iʼila hadia mbua nitemamö me öfalua goi-goi Zura Niʼamoniʼö, tola manö terou dödönia ba woloʼö  duma-duma nibeʼemö. (1 Ko. 11:1) Imane Hanae si no mututunö moroi yawa, ”Me ufahaʼö ndraʼo hadia zinangea ufalua, no oföna lafalua daʼö ira talifusöda. Moroi ba duma-dumara, ufahaʼö ndraʼo ba wangoromaʼö faʼomasi, ba wangefaʼö sala, hegöi ba wamarou tödö niha böʼö. Lö irai ladunö-dunö zi lö sökhi sanandrösa ba niha böʼö. Omasido uʼoʼö duma-duma nibeʼera.”

15. Simane nitutunö ba Gamaedola 27:17, hana wa moguna fahuwu ita ba niha nifahaʼö ba Zura Niʼamoniʼö?

¹⁵ Lau fahuwu ba niha nifahaʼö andrö. Na ibörögö owölö-ölö ia ba wangondrasi angowuloa, böi tebulö öʼameʼegö tödö ia. (Fil. 2:4) Forege enaʼö aboto ba dödöu haniha ia. Tola ösuno waʼatedounia ba wamati, ba tola göi ösofu sanandrösa ba wamahaʼönia ba Zura Niʼamoniʼö, ösi nomonia, hegöi halöwönia. Hizaʼi, böi sofu-sofu zi tenga urusamö. Na öforege enaʼö itugu aboto ba dödömö haniha ia, tola itugu aro wahuwusami. Buania, tola tedou ia ba wamati irege tebayagö ia idanö. (Baso Gamaedola 27:17.) Iadaʼa, no mangai halöwö dalifusöda Hanae tobali perintis biasa. Imane wanutunö salua khönia me awena sibai möi ia ba gangowuloa, ”Me ibörögö fahuwu ndraʼo khö ndra talifusöda ba mbanua niha Keriso, itugu terou dödögu weʼamöi ba gangowuloa. Hewaʼae na erege dödögu, lö tebulö uʼondrasi gangowuloa. Omuso dödögu me tola fariawö ndraʼo ba niha sawena falukha khögu ba mbanua niha Keriso. Daʼa zanolo yaʼo ba wamöhöli fariawösa ba niha si tenga samosumange Yehowa. Omasido na itugu aro wahuwusagu khö Yehowa hegöi khö ndra talifusöda. Börö daʼö, uhalö gangetula ba wamayagö yaʼo idanö.”

16. Hadia zi tola öfalua enaʼö irasoi niha nifahaʼö ba Zura Niʼamoniʼö wa no farahu ia ba mbanua niha Keriso?

¹⁶ Na tedou ba wamati niha nifahaʼö andrö ba ibulöʼö waʼaurinia, tolo ia ba worasoi wa no farahu ia ba mbanua niha Keriso. Lalania, foromaʼö wa aoha gölöu wanemaʼö tome. (Heb. 13:2) Imane talifusöda Denis, si toröi ba Moldova, ba wanutunö hadia nirasoinia me ifahaʼö ia ba Zura Niʼamoniʼö, ”No hauga kali laʼohe ndraʼo hegöi foʼomogu ira talifusöda enaʼö fariawö ndraʼaga khöra. Latutunö khöma hewisa me itolo ira Yehowa. Tobali famarou dödöma daʼö. Börö me fariawö ndraʼaga khöra, faduhu dödöma wa no angetula fondrege zi sökhi na mafosumange Yehowa, ba daʼö zangaʼasogö faʼowua-wua dödö ba waʼaurima.” Na no tobali sanuriaigö niha nifahaʼö andrö, ohe ia wanuriaigö. Imane talifusöda ira matua si toröi ba Brasil sotöi Diego, ”Ato ndra talifusöda solohe yaʼo weʼamöi manuriaigö. Daʼö lala sabölö sökhi enaʼö itugu aboto ba dödögu haniha ira. Oya wamahaʼö nitemagu moroi khöra, ba urasoi göi wa itugu ahatö ndraʼo khö Yehowa hegöi Yesu.”

17. Hewisa lala ndra satua sokubaloi ba wanolo niha nifahaʼö ba Zura Niʼamoniʼö?

¹⁷ Beʼe ginötöu ba niha nifahaʼö ba Zura Niʼamoniʼö. Yaʼami ira satua sokubaloi, na miforomaʼö waʼomasi hegöi foʼameʼegö tödö ba niha nifahaʼö ba Zura Niʼamoniʼö, tola möi fanolora daʼö enaʼö tedou ira ba wamati ba tebayagö idanö. Hadia tola öbeʼe ginötöu fahuhuo khöra ero na möi ira ba gangowuloa?  Na ötanö ba dödöu döira, mendrua manö na no ibörögö labeʼe mbua gera-era ba gangowuloa, tola larasoi wa öʼameʼegö tödö ira. Baero daʼö, hadia tola ötatugöi ginötöu enaʼö tola fao ndraʼugö khö ndra sanuriaigö sondröniaʼö famahaʼö ba Zura Niʼamoniʼö? Ebua lua-luania daʼö ba niha nifahaʼö, töra moroi ba zi tola ökhalaigö. Imane talifusöda ira alawe sotöi Jackie, sangai halöwö tobali perintis ba Nigeria, ”Ato niha nifahaʼögu si tokea me laʼila wa satua sokubaloi zi fao khögu ba wondröniaʼö famahaʼö ba Zura Niʼamoniʼö. So samösa ba gotaluara zangumaʼö, ’Tatu lö omasi pastorma ba wamalua daʼö. Awena möi ia, na niha si kayo zokaoni yaʼia ba labeʼe khönia gefe!’” Iadaʼa, no ibörögö iʼondrasi gangowuloada niha nifahaʼö andrö.

18. Hewisa wamalua ndra satua sokubaloi noro dödöra nitutunö ba Halöwö Zinenge 20:28?

¹⁸ Fahaʼö ba farou dödö zondröniaʼö famahaʼö ba Zura Niʼamoniʼö. Yaʼami ira satua sokubaloi, no miʼokhögö noro dödö si tohude ba wanolo ira talifusöda enaʼö itugu onekhe ira ba wanuriaigö hegöi ba wamahaʼö. (Baso Halöwö Zinenge 20:28.) Itaria aila ndra sanuriaigö ba wondröniaʼö famahaʼö ba Zura Niʼamoniʼö na fao ndraʼugö khöra. Na daʼö nirasoira, tola öfatunö khöra wa lö fatimba khöu na yaʼugö zondröniaʼö famahaʼö andrö. Imane Jackie si no mututunö moroi yawa, ”Asese manofu ndra satua sokubaloi sanandrösa ba niha nifahaʼögu ba Zura Niʼamoniʼö. Na abua khögu ba wondröniaʼö famahaʼö, labeʼe khögu wanuturu lala si tefaudu.” Oya zi tola lafalua ira satua sokubaloi ba wamarou tödö ndra talifusöda sondröniaʼö famahaʼö ba Zura Niʼamoniʼö. (1 Te. 5:11) Imane nasa Jackie, ”Omuso sibai dödögu me lafarou dödögu ira satua sokubaloi ba laʼandrö saohagölö ba waʼerege dödögu. Möi fangokafu dödögu wehedera andrö, simane na tabadu zi sambua galasi idanö sokafu ba zino siriri-riri. Daʼö zamaduhuʼö ba dödögu wa sökhi wondröniaʼögu famahaʼö ba Zura Niʼamoniʼö, ba itugu monönö waʼomuso dödö nirasoigu.”​—Amd. 25:25.

19. Hadia zangaʼasogö khöda faʼomuso dödö?

¹⁹ Hewaʼae na lö hadöi niha nifahaʼöda ba Zura Niʼamoniʼö iadaʼa, tola tatolo niha böʼö enaʼö tedou ira ba wamati. Na fao ita khö dalifusöda sondröniaʼö famahaʼö ba Zura Niʼamoniʼö, tola tabeʼe gonönöta sadogo-dogo si no tafaʼanö. Na no ibörögö iʼondrasi gangowuloada niha nifahaʼö ba Zura Niʼamoniʼö, moguna fahuwu ita khönia ba tabeʼe duma-duma si sökhi. Enaʼö terou dödö niha nifahaʼö ba Zura Niʼamoniʼö, moguna labeʼe ginötöra ira satua sokubaloi wefao ba wondröniaʼö famahaʼö. Tola göi labeʼe wamarou dödö khö ndra sondröniaʼö famahaʼö ba Zura Niʼamoniʼö, na lafahaʼö ira ba lasuno wamorege si no laforomaʼö. Gofu hawaʼoya zi tola tafalua, tola fao ita fefu ba wanolo niha nifahaʼö ba Zura Niʼamoniʼö enaʼö laʼomasiʼö ba lafosumange Yehowa. Tatu omuso sibai dödöda ba wamalua daʼö!