1. Hana wa iʼandrö Yesu khö Yehowa ba wolumöʼö ira nifahaʼönia?

BA MBONGI safuria waʼaurinia ba gulidanö, iʼangeragö Yesu gabula dödö salua khö ndra nifahaʼönia dania. Börö me iʼomasiʼö ira, iʼandrö khö Namania ba ’wolumöʼö yaʼira moroi khö Zatana’. (Yoh. 17:14, 15) Iʼila Yesu wa lö ara tö mangawuli ia ba zorugo. Aboto göi ba dödönia wa lö iböhöli Satana ba woʼuduni niha somasi mamosumange Yehowa. Börö daʼö, moguna telumöʼö nono mbanua Yehowa.

2. Hana wa faduhu dödöda wa hasambalö ifondrondrongo wangandröda Yehowa?

² Ifondrondrongo Yehowa wangandrö Yesu börö waʼomasinia khö Nononia. Na taforege zabölö sökhi ba wangomusoiʼö tödö Yehowa, hasambalö iʼomasiʼö göi ita, ba ifondrondrongo wangandröda na taʼandrö wanolo hegöi folumöʼö moroi khönia. Yehowa andrö Ama sebua faʼomasi. Börö daʼö, lö iböhöli wondrorogö iraononia. Na lö ifalua daʼö, tola manö teʼobousi döinia!

3. Hana wa moguna khöda wolumöʼö moroi khö Yehowa ba ginötö andre?

³ Ba ginötö andre, moguna khöda wolumöʼö moroi khö Yehowa, töra moroi ba zi no numalö. Hadia mbörö? Börö me no tetiboʼö Zatana moroi ba zorugo, ba ”ebua wönunia”. (Fam. 12:12) Iʼalui lala ba wamaduhuʼö ba dödö niha wa no sambua ”halöwö niʼamoniʼö khö Lowalangi” na lafakao ita. (Yoh. 16:2) Lafakao göi ita ira niha si lö faduhu tödö khö Lowalangi börö me faehu sibai ita moroi ba niha gulidanö. Hewaʼae simanö, lö ataʼu ita gofu hadia zalua börö me imane Taromali Lowalangi, ”Löʼö sa faröi Zoʼaya, iʼabeʼeʼö ba ilumöʼö ami moroi ba zi lö sökhi.” (2 Te. 3:3) Hadia nifalua Yehowa ba wolumöʼö yaʼita? So dombua ngawalö nibeʼenia khöda. Datatutunö atö.

4. Moloʼö Efeso 6:13-17, hadia manö wangöna ba wasuwöta si no ihenaigö khöda Yehowa?

⁴ No ihenaigö khöda Yehowa wangöna ba wasuwöta si tola molumöʼö yaʼita moroi ba deʼala niʼasogö Zatana. (Baso Efeso 6:13-17.) Abölö ba mofozu sibai wangöna ba wamati andre! Hizaʼi, awena tola ilumöʼö ita na lö tebulö taʼogunaʼö ia fefu. Hadia niʼamaedolagö wangöna andrö ero sambu-sambua? Datahaogö taʼosisiʼö.

5. Hadia geluaha mböbö löwi zindruhu andrö, ba hana wa lö tola löʼö taʼogunaʼö ia?

⁵ Böbö löwi zindruhu eluahania sindruhu moroi ba Daromali Lowalangi, Sura Niʼamoniʼö. Hana wa lö tola löʼö taʼogunaʼö mböbö löwi andre? Börö me ”ama zofaya” Zatana andrö. (Yoh. 8:44) No hauga ribu fakhe ilimo ba ifaelungu ”niha ba gulidanö maʼasagörö”! (Fam. 12:9) Hizaʼi, sindruhu andrö moroi ba Zura Niʼamoniʼö zolumöʼö yaʼita moroi ba walimosa Zatana. Hewisa wangogunaʼöda böbö löwi zindruhu andre? Moguna tafahaʼö ita ba zindruhu sanandrösa khö Yehowa, ba tafosumange ia ”moloʼö fanuturu lala moroi ba geheha niʼamoniʼö ba tefaudu ba zindruhu”. Baero daʼö, tatörö zindruhu ba ngawalö hadia ia.​—Yoh. 4:24; Ef. 4:25; Heb. 13:18.

6. Hadia geluaha mbaru siʼöli waʼatulö dödö andrö, ba hana wa lö tola löʼö taʼogunaʼö ia?

⁶ Baru siʼöli waʼatulö dödö eluahania goi-goi waʼatulö moroi khö Yehowa. Hana wa lö tola löʼö taʼogunaʼö mbaru siʼöli andre? Na iʼogunaʼö mbaru siʼöli si samösa saradadu, tola telumöʼö dödönia moroi ba ngawalö wakake wasuwöta nitaruʼö khönia. Simanö göi, na taʼogunaʼö mbaru siʼöli waʼatulö dödö, tola telumöʼö dödöda fondrege zabakha moroi ba wondrönisi dödö niʼasogö gulidanö andre. (Amd. 4:23) Itötöna Yehowa enaʼö taʼomasiʼö ba tafosumange ia soroi ba dödö. (Mat. 22:36, 37) Börö daʼö, iʼalui lala Satana enaʼö mamodombua dödöda. Iforege enaʼö taʼomasiʼö gisö-isö dödö si so ba gulidanö andre, si fatuwu khö Yehowa. (Yak. 4:4; 1 Yo. 2:15, 16) Na lö mofozu nifaluania andrö, itandraigö ba wamakao yaʼita enaʼö tasawö goi-goi Yehowa.

7. Hewisa wangogunaʼöda baru siʼöli waʼatulö dödö?

⁷ No taʼogunaʼö mbaru siʼöli waʼatulö dödö na tatemaʼö goi-goi Yehowa sanandrösa ba zatulö hegöi si lö atulö, ba tafalua daʼö ba waʼaurida sero maʼökhö. (Si. 97:10) Te so ösa zorasoi wa tebai lafalua zomasi-masi dödöra na laʼoʼö goi-goi Yehowa. Hizaʼi, na taböhöli wamalua goi-goi Zura Niʼamoniʼö ba waʼaurida, fagölö ita simane saradadu sangeheta baru siʼöli khönia ba dalu wasuwöta börö me talafo abua daʼö ba worasoinia. Ha niha si lö fangera-ngera zamalua daʼö! Na taʼomasiʼö Yehowa, ”tenga safökhö” goroisania, hizaʼi si möi fangorifi.​—1 Yo. 5:3.

8. Hadia geluahania wangogunaʼö badagahe tandra wa no tefaʼanö ba wanuriaigö turia somuso dödö?

⁸ Ifarou göi ita Faulo ba wangogunaʼö badagahe tandra wa no tefaʼanö ba wanuriaigö turia somuso dödö sanandrösa ba waʼatulö. Eluahania, lö tebulö tefaʼanö ita ba wanuriaigö turia somuso dödö sanandrösa ba Wamatörö Lowalangi. Itugu aro wamatida na tafaʼema ba niha böʼö duria moroi ba Zura Niʼamoniʼö. Terou sibai dödöda me taʼila hewisa wamorege nifalua nono mbanua Yehowa ba zi sagörö ulidanö ba wanuriaigö turia somuso dödö gofu hezoso so ira. Duma-dumania, manuriaigö ira ba nahia wohalöwö, ba zekola, ba nomo-omo misa, hegöi ba nahia bisnis. Manuriaigö göi ira me möi ira mowöli, me laʼondrasi zi fahatö khöra si tenga Samaduhuʼö Yehowa, mazui me fahuhuo ira ba niha si faʼila khöra. Na ataʼu ita ba taböhöli wanuriaigö, fagölö ita simane saradadu sangeheta  badagahenia ba wasuwöta irege alio mesokho gahenia. Lua-luania, abua khönia ba wolumöʼö faʼaurinia ba tebai iʼoʼö li gumandrunia.

9. Hana wa moguna taʼohe mbaluse sebua yaʼia daʼö famati?

⁹ Baluse sebua yaʼia daʼö famati niʼokhögöda khö Yehowa. Faduhu dödöda wa hasambalö ifalua fefu zi no ifabuʼu. Famatida andrö zanolo yaʼita ba ’wanaha ono wana soʼalitö andrö khö Zatana’. Hana wa moguna taʼohe mbaluse sebua andre? Börö me tobali folumöʼöda daʼö enaʼö lö telimo ita ba wamahaʼö nifaʼema niha sondröi sindruhu, ba enaʼö lö ataʼu ita na so zangoʼaya famatida. Na lö famati, lö khöda faʼabölö ba wanimbagö niha böʼö sondrönisi tödöda ba wanawö goi-goi Yehowa. Hizaʼi, no taʼohe mbaluse sebua ero na taʼoʼawögö wamatida ba nahia wohalöwö mazui ba zekola. (1 Fe. 3:15) No göi taʼogunaʼö mbaluse sebua ero na tatimbagö halöwö sebua gazi sanaisi yaʼita ba wamalua sabölö sökhi ba wamosumange Yehowa. (Heb. 13:5, 6) Ba ilumöʼö göi ita famatida na lö tebulö tafosumange Yehowa hewaʼae so wanaisi.​—1 Te. 2:2.

10. Hadia dakula siʼöli fangorifi andrö, ba hana wa lö tola löʼö taʼogunaʼö ia?

¹⁰ Takula siʼöli fangorifi eluahania tötönafö nibeʼe Yehowa khöda wa hasambalö iʼefaʼö ita  moroi ba waʼamate, ba isulöni fefu zi no taforege ba wamalua ohitö dödönia. (1 Te. 5:8; 1 Ti. 4:10; Tit. 1:1, 2) Simane takula solumöʼö högö zaradadu, tola ilumöʼö wangera-ngerada tötönafö fangorifi. Hadia geluahania? Tötönafö andrö zanolo yaʼita ba wangosambuaʼö tödöda ba mbuʼusa li Lowalangi, hegöi ba wangokhögö lala wangera-ngera si tefaudu sanandrösa ba gabula dödö salua khöda. Hewisa wangogunaʼöda takula andre? Moguna tafaudugö lala wangera-ngerada ba lala wangera-ngera Lowalangi. Duma-dumania, tenga ba waʼakayo manötöna ita, hizaʼi khö Lowalangi.​—Si. 26:2; 104:34; 1 Ti. 6:17.

11. Hadia wöda eheha andrö, ba hana wa lö tola löʼö taʼogunaʼö ia?

¹¹ Föda eheha eluahania Taromali Lowalangi, Sura Niʼamoniʼö. Mofaʼabölö wöda andre ba wangombakha sindruhu hegöi ba wangefaʼö niha moroi ba wamahaʼö faya awö gamuata si lö sökhi si toʼölö lafalua. (2 Ko. 10:4, 5; 2 Ti. 3:16, 17; Heb. 4:12) Enaʼö onekhe ita ba wangogunaʼö föda andre, moguna tafalua wamahaʼö samösa ba tatemaʼö wamomaha moroi ba organisasi Lowalangi. (2 Ti. 2:15) Baero wangöna ba wasuwöta, hadia nasa wolumöʼö tanö böʼö si no ibeʼe khöda Yehowa?

12. Hadia nasa zoguna khöda, ba hadia mbörö?

¹² Aboto ba dödö zaradadu si no toʼölö wa tebai ikalaisi zaradadu sato na ha yaʼi-yaʼia zi fasuwö. Moguna khönia wanolo moroi khö ndra awönia saradadu tanö böʼö. Simanö göi, tebai takalaisi Zatana hegöi si faʼawö khönia na ha yaʼi-yaʼita zi fasuwö. Moguna khöda wanolo moroi khö ndra talifusöda. So mato hauga zuta zaradadu si no ihenaigö khöda Yehowa ba wanolo yaʼita. Yaʼira andrö ’talifusöda ba wamati’ ba zi sagörö ulidanö.​—1 Fe. 2:17.

13. Moloʼö Heberaiʼo 10:24, 25, hadia manö mbua nitemada na taʼondrasi gangowuloa?

¹³ Enaʼö tola tatema wanolo, moguna taʼondrasi gangowuloa. (Baso Heberaiʼo 10:24, 25.) Fefu ita, itaria tarasoi waʼide-ide dödö. Ero na alua daʼö, tola tatema wamarou dödö ba gangowuloa. Terou dödöda wamondrongo bua gera-era nifaʼema ndra talifusöda soroi ba dödö. Itugu aro gangetulada ba wamosumange Yehowa me tafondrondrongo huhuo si teʼodane-dane ba Zura Niʼamoniʼö hegöi me tafaigi wamadumaisi nifaehagö ndra talifusöda. Tola göi tefarou dödöda na fariawö ita khö ndra talifusöda fatua lö mubörögö hegöi na no aefa mufalua gangowuloa. (1 Te. 5:14) Baero daʼö, na taʼondrasi gangowuloa, tebeʼe khöda ginötö ba wanolo niha böʼö irege tarasoi waʼomuso dödö. (Hal. 20:35; Rom. 1:11, 12) So göi wanolo tanö böʼö nitemada ba gangowuloa, yaʼia daʼö mufahaʼö ita tobali sanuriaigö ba samahaʼö sabölö sökhi. Duma-dumania, tafahaʼö ita wangogunaʼö Fakake Niʼogunaʼöda ba Wamahaʼö ba lala si tefaudu. Börö daʼö, fatua lö öʼondrasi gangowuloa, haogö wamaʼanö yaʼugö. Sagötö mufalua gangowuloa, haogö wamondrondrongo. Ba na no aefa mufalua gangowuloa, oʼö fefu wamahaʼö nitemamö. Na öfalua fefu daʼö, tola tobali ndraʼugö ”saradadu si sökhi khö Keriso Yesu”.​—2 Ti. 2:3.

14. Hadia wanolo tanö böʼö si no tehenaigö khöda?

¹⁴ Tatema göi wanolo moroi khö ndra malaʼika sagabölö si hauga zuta faʼato. Angeragö atö hadia zi tola ifalua si samösa malaʼika. (Yes. 37:36) Iadaʼa, khalaigö atö hadia zi tola lafalua ira ngawawa malaʼika sagabölö! Samösa lö niha mazui malaʼika si lö sökhi si tola mokalaisi ira saradadu sagabölö khö Yehowa. No fondrege zabölö Yehowa. Börö daʼö, na fao ia khöda, abölö ita moroi khö ndra  ududa gofu hawaʼato ira. (Sangu. 6:16) Tola tafaduhusi tödö daʼö! Böi olifu ndraʼugö wa tenga ha yaʼugö zi fasuwö. Hasambalö ibeʼe khöu wanuturu lala Yehowa. Törö tödöu daʼö na so nawöu wohalöwö, awöu sekola, mazui ösi nomou si tenga samosumange Yehowa, sametaʼu yaʼugö moroi ba wehedera mazui ba nifaluara.

15. Moloʼö Yesaya 54:15, 17, hana wa lö hadöi si tola manaisi halöwö fanuriaigö nifalua nono mbanua Lowalangi?

¹⁵ Oya dane-dane wa fatuwu khöda gulidanö nifatörö Zatana. Lö faʼawö ita ba politik, ba lö fao ita fasuwö. Taturiaigö döi Lowalangi, tafatunö ba niha wa ha Famatörönia zi tola mangaʼasogö faʼatulö, ba taʼoʼö goi-goinia satulö. Taʼombakhaʼö wa ama zofaya ba samunu niha zamatörö ulidanö andre. (Yoh. 8:44) Taturiaigö göi wa lö ara tö tedudugö gulidanö nifatörö Zatana. Tatu manö, omasi Zatana hegöi ira soloʼö khönia na taböhöli wamalua halöwö fanuriaigö. Hizaʼi, lö mofozu fefu nifaluara börö me lö tebulö tafosumange Yehowa ba ngawalö nifaluada. Gofu hewisa waʼabölö Zatana, tebai isaisi wamazaewe turia somuso dödö sanandrösa ba Wamatörö Lowalangi ba zi sagörö ulidanö misa. Hadia mbörö? Börö wolumöʼö moroi khö Yehowa.​—Baso Yesaya 54:15, 17.

16. Hewisa wolumöʼö Yehowa nono mbanuania sagötö famakao sabölö-bölö?

¹⁶ Hewisa göi ba zi so miföna? Sagötö famakao sabölö-bölö, hasambalö ilumöʼö nono mbanuania Yehowa. Si oföna, ilumöʼö ita na owulo razo ba zi sagörö ulidanö ba wanudugö Babilona Sebua, angorudua agama sofaya. (Fam. 17:16-18; 18:2, 4) Si dua, ilumöʼö göi ita na ihori dania ba Hamagedo fefu zi tosai ba gulidanö nifatörö Zatana.​—Fam. 7:9, 10; 16:14, 16.

17. Hadia mbua nitemada na lö tebulö ahatö ita khö Yehowa?

¹⁷ Na lö tebulö ahatö ita khö Yehowa, tebai ifakiko waʼaurida Satana sagötö faʼara. Sindruhunia, yaʼia dania nihori sagötö faʼara. (Rom. 16:20) Börö daʼö, ogunaʼö fefu wangöna ba wasuwöta, ba böi tebulö ogunaʼö daʼö! Böi tandraigö ba wanuwö Satana hegöi ulidanö nifatörönia ba zi ha yaʼu-yaʼugö. Tuhini ndra talifusöu ba wamati, ba oʼö wanuturu lala moroi khö Yehowa. Na öfalua daʼö, tola faduhu dödöu wa hasambalö iʼabölöʼö ba ilumöʼö ndraʼugö Amada sebua faʼomasi si so ba zorugo.​—Yes. 41:10.