1. Hadia manö gabula dödö nitaögö nono mbanua Yehowa?

HADIA so gabula dödö nitaögömö? Te so dalifusöda ba mbanua niha Keriso sangafökhöiʼö tödöu. (Yak. 3:2) Mazui, te so nawöu wohalöwö hegöi awöu sekola sangoʼaya yaʼugö börö me öfosumange Yehowa. (1 Fe. 4:3, 4) Te lasaisi ndraʼugö ira ösi nomou enaʼö öböhöli wangondrasi angowuloa mazui öböhöli wamaduhuʼö famatiu ba niha böʼö. (Mat. 10:35, 36) Na abua sibai gabula dödö nitaögöu, tola manö öwaʼö tödöu wa abölö sökhi na öböhöli wamosumange Yehowa. Hizaʼi, tola faduhu dödömö wa gofu hadia gabula dödö nitaögöu, hasambalö ibeʼe khöu Yehowa waʼatua-tua ba wangai angetula si sökhi hegöi faʼabölö ba wanaögö daʼö.

2. Moloʼö Roma 15:4, hadia mbuania khöda na tabaso Daromali Lowalangi?

² Ba Daromalinia, no ihaogö itutunö Yehowa hewisa lala niha si lö moʼahonoa ba wanaögö abula dödö salua khöra. Hadia mbörö? Börö me omasi ia na tafahaʼö ita moroi ba duma-dumara. Daʼö mbörö wa iʼogunaʼö zinenge sotöi Faulo Yehowa ba wanura ösi Roma 15:4. (Baso.) Na tabaso waö-waö andrö, tola tasöndra wondrara dödö hegöi fanötöna. Hizaʼi, lö obönö na ha tabaso manö nösi Zura Niʼamoniʼö. Moguna tatehegö ibulöʼö gera-erada ba tofakha daʼö ba dödöda. Duma-dumania, hadia zi tola tafalua na moguna khöda mene-mene sanandrösa ba gabula dödö salua khöda? Tola tafalua zi öfa ngawalö andre: (1) Angandrö, (2) Khalaigö, (3) Angerönusi, ba (4) Falua. Datatutunö hewisa wamaluada fefu daʼö. * Aefa daʼö, taʼogunaʼö lala si  öfa ngawalö andre ba wangalui famahaʼö moroi ba waö-waö waʼauri Razo Dawido hegöi sinenge sotöi Faulo.

3. Fatua lö öbaso Zura Niʼamoniʼö, hadia zinangea öfalua, ba hadia mbörö?

³ (1) Angandrö. Fatua lö öbaso Zura Niʼamoniʼö, andrö wanolo moroi khö Yehowa enaʼö tola öhalö wamahaʼö moroi ba ayati nibasomö. Duma-dumania, na öʼalui mene-mene ba wangasiwai abula dödö salua khöu, andrö wanolo moroi khö Yehowa enaʼö ösöndra goi-goi Zura Niʼamoniʼö sanolo yaʼugö ba wotatugöi hadia zinangea öfalua.​—Fil. 4:6, 7; Yak. 1:5.

4. Hadia zinangea öfalua na öbaso waö-waö si so ba Zura Niʼamoniʼö?

⁴ (2) Khalaigö. No ibeʼe khöda Yehowa waʼatua-tua sahöli-höli dödö ba wokhalaigö ngawalö hadia ia. Börö daʼö, na öbaso waö-waö si so ba Zura Niʼamoniʼö, khalaigö hadia zalua ba ginötö daʼö ba hewisa na khöu alua nitutunö ba ayati andrö. Tandraigö faigi hadia niʼila niha nidunö-dunö ba waö-waö andrö, ba rasoi hadia nirasoinia. Na öfalua daʼö, tola itugu oya mbua nitemamö moroi ba waö-waö si so ba Zura Niʼamoniʼö.

5. Hadia geluaha woʼangerönusi, ba hewisa wamaluau daʼö?

⁵ (3) Angerönusi. Foʼangerönusi eluahania öhaogö öʼangeragö hadia zi no öbaso ba hewisa wamaluau ösi ayati andrö ba waʼauriu. Daʼö zanolo yaʼugö ba wangiʼila hadia manö gamakhaita nösi ayati andrö, ba itugu aboto ba dödöu waö-waö nidunö-dunö ba daʼö. Na ha asala tabaso Zura Niʼamoniʼö ba lö taʼangerönusi nösinia, fagölö daʼö simane na ha asala tafaigi-faigi gö si lö murino hegöi famasa si so ba dete meza, ba lö tafaruka ba wondrino. Enaʼö tola tarasoi waʼami gö andrö, moguna tafaruka fefu wamasania. Simanö göi, enaʼö tola taʼila rahu-rahu zi no tabaso, moguna tafalua woʼangerönusi. Enaʼö aoha khöu wamalua foʼangerönusi, angeragö wanofu-nofu andre: ’Hadia nifalua niha nitutunö ba waö-waö daʼa ba wangasiwai abula dödönia? Hewisa lala Yehowa ba wanolo yaʼia? Hewisa wamaluagu famahaʼö si no utema andre ba wanaögö abula dödö salua khögu?’

6. Hana wa moguna tafalua zi no tafahaʼö yaʼita?

⁶ (4) Falua. Na lö tafalua zi no tafahaʼö yaʼita, iwaʼö Yesu wa fagölö ita simane ira matua samazökhi omonia ba dete gawu. Iforege wohalöwö, hizaʼi zaya-zaya gölö. Hadia mbörö? Börö me hasambalö adudu nomonia andrö na ilau bade hegöi molö. (Mat. 7:24-27) Simanö göi, zaya-zaya gölö wamorege nifaluada ba wangandrö, ba wokhalaigö, hegöi ba woʼangerönusi, na lö tafalua zi no tafahaʼö yaʼita. Lua-luania, awuwu wamatida na göna ita abula dödö mazui famakao. Hizaʼi, na tafalua zi no tafahaʼö yaʼita, tola tahalö gangetula sabölö sökhi, itugu tarasoi waʼahono dödö, ba itugu aro wamatida. (Yes. 48:17, 18) Iadaʼa, dataʼogunaʼö lala si öfa ngawalö sawena tatutunö andre ba wangalui famahaʼö moroi ba waö-waö waʼauri Razo Dawido.

7. Hadia waö-waö Zura Niʼamoniʼö nitutunöda iadaʼa?

⁷ Hadia so nösi nomou mazui si fahuwu khöu sangafökhöiʼö tödöu? Na so, tola möi fanolomö waö-waö salua khö Razo Dawido. Tobali si manga mböli nononia Abisalomi, ba iʼalui lala ba worabu dadaoma waʼarazo. Tola öfahaʼö ndraʼugö moroi ba nifalua Dawido me luo daʼö.​—2 Sa. 15:5-14, 31; 18:6-14.

8. Hadia zi tola öfalua enaʼö itolo ndraʼugö Yehowa?

⁸ (1) Angandrö. Fatua lö öbaso waö-waö daʼö, tutunö khö Yehowa fefu nirasoimö me lafalua khöu zi lö atulö. (Si. 6:6-9) Aefa daʼö, andrö khö Yehowa enaʼö itolo ndraʼugö ba wanöndra goi-goi si tefaudu ba zalua khöu.

9. Hadia zalua ba gotalua Dawido hegöi Abisalomi?

 ⁹ (2) Khalaigö. Angeragö ngawalö zalua ba waö-waö andrö ba khalaigö hadia lua-luania khö Razo Dawido. Ba zi hauga fakhe, iforege Abisalomi ba wangai tödö ndraono Gizaraʼeli. (2 Sa. 15:7) Me iwaʼö tödönia Abisalomi wa no laʼomasiʼö ia niha sato, ifatenge ndra samauze weʼamöi ba zi sagörö tanö Gizaraʼeli ba wamarou tödö niha sato enaʼö latuhini ia tobali razo. Idönisi göi dödö Gahitofeli, samösa si fahuwu hegöi sameʼe mene-mene khö Dawido, enaʼö fao ia wamadaö. Ifatunö ba niha sato Abisalomi wa no tobali ia razo si bohou. Aefa daʼö, iforege ba wondraʼu hegöi ba wamunu Dawido. Te abölö-bölö wökhö Dawido me luo daʼö. (Si. 41:1-9) Iʼila Dawido niʼera-era Gabisalomi ba moloi ia moroi ba Yeruzalema. Ba gafuriata, kala zaradadu Gabisalomi me fasuwö ira khö ndra saradadu Dawido, ba mate Gabisalomi.

10. Hewaʼae na lafalua khönia zi lö atulö, hadia zi lö ifalua Dawido?

¹⁰ Iadaʼa, khalaigö hewisa dödö Dawido me alua daʼö fefu. Ono niʼomasiʼönia Gabisalomi ba faduhu sibai dödönia khö Gahitofeli. Hizaʼi, laʼafökhöiʼö dödönia. Tobali ira si manga mböli ba laforege wamunu yaʼia. Hewaʼae simanö, lö manahö-nahö dödö Dawido khö ndra si fahuwu khönia tanö böʼö, ba lö iwaʼö tödönia wa no faʼawö ira khö Gabisalomi. Tenga ha faʼaurinia samösa niʼera-era Dawido ba lö moloi ia ha yaʼia. Hewaʼae na abu sibai dödönia, lö awuwu Dawido. Hizaʼi, iforege ba wangasiwai abula dödö andrö. Hadia zanolo Dawido ba wamalua daʼö?

11. Hadia nifalua Dawido me alua khönia ginötö si basaki?

¹¹ (3) Angerönusi. Hadia manö goi-goi si tola öfahaʼö yaʼugö moroi ba waö-waö andrö? Angeragö atö wanofu andre: ”Hadia nifalua Dawido me alua fefu daʼö?” Börö me lö talafo ataʼu Dawido, tola ihalö gangetula, hizaʼi tenga ba waʼaösö. Iʼandrö wanolo moroi khö Yehowa hegöi khö ndra si fahuwu khönia. Iʼanemaiʼö göi ifalua gangetula si no ihalö. Hewaʼae na afökhö sibai dödönia, lö iʼokhögö wangera-ngera si lö sökhi ba lö fatiu dödönia ba niha böʼö. Lö tebulö ifaduhusi tödö Yehowa hegöi ira si fahuwu khönia.

12. Hadia nifalua Yehowa ba wanolo Dawido?

¹² Hewisa wanolo Yehowa Dawido? Na öfalua riset, tola öʼila wa ibeʼe Yehowa waʼabölö khö Dawido enaʼö anau gölönia. (Si. 3:1-8; superskripsi) Ifahowuʼö Yehowa gangetula nihalö Dawido. Itolo göi fefu zi fahuwu khö Dawido si lö faröi me laforege ba wolumöʼö razora andrö.

13. Hewisa woloʼöu duma-duma Dawido na so niha böʼö sangafökhöiʼö tödöu? (Mataiʼo 18:15-17)

¹³ (4) Falua. Sofu khöu samösa, ’Hewisa woloʼögu duma-duma Dawido?’ Na so niha böʼö sangafökhöiʼö tödöu, moguna öʼasiwai daʼö ba waʼalio. Na tefaudu ba zalua khöu, tola öfalua mene-mene si no izara-zara Yesu ba Mataiʼo faza 18 mazui öʼoʼö goi-goi si so ba mene-menenia andrö. (Baso Mataiʼo 18:15-17.) Hizaʼi, böi aösö halö gangetula na inötö mofönu ndraʼugö. Andrö wanolo khö Yehowa enaʼö tola öhalö khöu waʼahono dödö ba öʼila hadia zinangea öfalua. Böi tebulö faduhusi tödö ndra si fahuwu khöu ba temaʼö wanolo nibeʼera. (Amd. 17:17) Sabölö tohude, oʼö mene-mene nibeʼe Yehowa ba Daromalinia.​—Amd. 3:5, 6.

14. Hawaʼara tola möi famarou dödöu 2 Timoteo 1:12-16; 4:6-11, 17-22?

¹⁴ Hadia so nösi nomou sanaisi famatiu? Hadia lasaisi mazui lö latehegö halöwö nifalua nono mbanua Yehowa ira samatörö ba soi si so yaʼugö? Na yaʼia, tola manö terou dödöu na  öbaso 2 Timoteo 1:12-16 hegöi 4:6-11, 17-22. * Ba gurunga so Waulo me isura ayati daʼa.

15. Hadia zi tola öʼandrö khö Yehowa?

¹⁵ (1) Angandrö. Fatua lö öbaso ayati andrö, tutunö gabula dödömö khö Yehowa. Tutunö göi fefu nirasoimö me alua khöu gabula dödö andrö. Aefa daʼö, andrö wanolo moroi khö Yehowa enaʼö tola ösöndra goi-goi si tefaudu ba zalua khöu moroi ba zi no irai alua khö Waulo.

16. Hewisa zalua khö Waulo me luo daʼö?

¹⁶ (2) Khalaigö. Khalaigö na khöu alua zalua khö Waulo. No labeʼe ia ba gurunga si so ba Roma. Sindruhunia, no göi irai labeʼe ia ba gurunga ba zilalö. Hizaʼi sakali daʼa, faduhu dödönia wa hasambalö labunu ia. So ösa nawönia si no mondröi yaʼia ba no erege sibai dödönia.​—2 Ti. 1:15.

17. Hewaʼae na alua khönia ginötö si basaki, hadia zi lö ifalua Faulo?

¹⁷ Lö maniasa Waulo me no tobali ia niha Keriso sowölö-ölö, hewaʼae na labeʼe ia ba gurunga börö gangetulania andrö. Lö göi mofönu ia ba niha si toröi ba Provinsi Asia hewaʼae na no laröi ia. Ba lö göi iwaʼö tödönia wa tebai mufaduhusi tödö ndra si fahuwu khönia tanö böʼö. Hizaʼi, faduhu dödö Waulo wa lö faröi khönia ndra si fahuwu khönia ba hasambalö ifahowuʼö ia Yehowa. Hana wa tola faduhu dödönia?

18. Hadia nifalua Waulo me alua khönia ginötö si basaki?

¹⁸ (3) Angerönusi. Angeragö atö wanofu andre: ”Hadia nifalua Waulo me alua fefu daʼö?” Hewaʼae na aboto ba dödö Waulo wa hasambalö labunu ia ba zi lö ara tö, lö tebulö itörö tödönia hadia zabölö tohude sinangea ifalua, yaʼia daʼö ba wamolakhömi Yehowa. Lö göi iböhöli woʼangeragö hewisa lala ba wamarou tödö niha böʼö, ba lö tebulö iʼodaligö Yehowa ba wangandrö. (2 Ti. 1:3) Lö iʼera-era manö Faulo niha sondröi yaʼia. Hizaʼi, iʼandrö sibai saohagölö khö ndra si fahuwu khönia, si lö faröi ba wanolo hegöi ba wotuhini yaʼia. Baero daʼö, lö göi mamalö ifahaʼö ia ba Daromali Lowalangi. (2 Ti. 3:16, 17; 4:13) Sabölö tohude, sindruhu-ndruhu faduhu dödönia wa iʼomasiʼö ia Yehowa hegöi Yesu. Aboto ba dödönia wa lö irai laröi ia, ba hasambalö lafahowuʼö waʼalöfaröinia ba wamalua halöwö ba wamati.

19. Hadia nifalua Yehowa ba wanolo Faulo?

¹⁹ No ifangelama Waulo Yehowa wa hasambalö göna ia folohi börö me no tobali ia niha Keriso. (Hal. 21:11-13) Hadia nifalua Yehowa ba wanolo Faulo? Ibeʼe wanema li ba wangandrö Waulo ba ibeʼe khönia waʼabölö. (2 Ti. 4:17) Ifaduhuʼö ba dödö Waulo wa tenga zaya-zaya gölö fefu waʼerege dödönia ba hasambalö itema mböli gölönia. Ifarou göi dödö ndra si fahuwu khö Waulo si lö faröi enaʼö labeʼe khönia wanolo.

20. Hewisa woloʼöda famati niforomaʼö Waulo si no tesura ba Roma 8:38, 39?

²⁰ (4) Falua. Sofu khöu samösa, ’Hewisa woloʼögu duma-duma Waulo?’ Simane Faulo, aboto ba dödöda wa hasambalö göna ita folohi börö me tafosumange Yehowa. (Mrk. 10:29, 30) Enaʼö lö faröi ita khö Yehowa na göna ita abula dödö, böi taböhöli wangandrö. Moguna göi owölö-ölö ita ba wamahaʼö yaʼita ba Daromalinia. Ba böi olifu ita wa sabölö tohude sinangea tafalua yaʼia daʼö ba wamolakhömi Yehowa. Tola faduhu dödöda wa lö iröi ita Yehowa, ba samösa lö si tola mamakiko faʼomasinia khöda.​—Baso Roma 8:38, 39; Heb. 13:5, 6.

21. Hadia zanolo Aya hegöi Hector ba wanaögö abula dödö salua khöra?

²¹ Gofu hadia gabula dödö salua khöda, tola iʼabölöʼö ita duma-duma si so ba Zura Niʼamoniʼö.  Daʼö nirasoi Aya, samösa perintis si toröi ba Jepang. Itutunö wa möi fanolonia waö-waö sanandrösa khö Yona ba wolawa faʼataʼunia ba wamalua fanuriaigö ba nahia sato niha. Nehegö göi zalua khö zi samösa ono matua sotöi Hector, si toröi ba Indonesia. Tenga samosumange Yehowa ndra satuania. Hizaʼi, tola möi fanolonia duma-duma Ruti irege terou dödönia ba wamahaʼö yaʼia sanandrösa khö Yehowa hegöi ba wamosumange yaʼia.

22. Hewisa lala enaʼö sindruhu-ndruhu ötema mbua moroi ba drama Zura Niʼamoniʼö mazui buku Miʼohiaʼö Wamatira?

²² Hezo tola ösöndra duma-duma Zura Niʼamoniʼö si tola mangabölöʼö yaʼugö? Tola öfahaʼö ndraʼugö moroi ba video, drama audio, hegöi buku Miʼohiaʼö Wamatira. * No muhaogö mufalua riset ba wamaʼanö fefu wakake andrö enaʼö tola ökhalaigö waö-waö salua nitutunö ba Zura Niʼamoniʼö. Fatua lö öfaigi, öfondrondrongo, mazui öbaso waö-waö andrö, angandrö khö Yehowa enaʼö ösöndra wamahaʼö si tola öfalua. Khalaigö na khöu alua nitutunö ba waö-waö daʼö. Angerönusi hadia nifalua nono mbanua Yehowa si lö faröi andrö ba hewisa wanolo Yehowa ira ba wanaögö abula dödöra. Aefa daʼö, falua zi no öfahaʼö yaʼugö. Andrö saohagölö khö Yehowa ba wanolo si no ibeʼe khöu, ba tola öforomaʼö daʼö na öʼalui lala ba wanolo hegöi ba wangabölöʼö niha böʼö.

23. Moloʼö Yesaya 41:10, 13, hadia nifabuʼu Yehowa khöda?

²³ Börö me Satana zamatörö ulidanö si so yaʼita iadaʼa, asese göna ita abula dödö, ba itaria lö taʼila hadia zinangea tafalua. (2 Ti. 3:1) Hizaʼi, lö moguna ataʼu ita mazui aombö dödöda. Iʼila Yehowa fefu gabula dödö salua khöda. Na moguna khöda wanolo, no ifabuʼu wa hasambalö igogohe dangada faoma tangania kambölö safönu faʼabölö. (Baso Yesaya 41:10, 13.) Faduhu dödöda wa hasambalö itolo ita Yehowa, ba tola tasöndra waʼabölö moroi ba Zura Niʼamoniʼö ba wanaögö ngawalö gabula dödö.