1. Hana wa terou dödö Yehowa ba womböwöi ngawalö zauri?

FATUA lö ifazökhi ngawalö hadia ia, ha samösa-mösa Yehowa. Hizaʼi, lö abu dödönia. Lö moguna khönia wanolo moroi ba danö böʼö enaʼö irasoi waʼowua-wua dödö. Na simanö, hana iwöwöi ngawalö zauri Yehowa? Börö me omasi ia na so göi danö böʼö zangokhögö faʼauri hegöi faʼowua-wua dödö. Daʼa zangoromaʼö wa faʼomasi zamarou tödö Yehowa ba womböwöi ngawalö zauri.​—Zin. 36:10; 1 Yoh. 4:19.

2. Hewisa dödö Yesu hegöi ira malaʼika me ifazökhi ngawalö hadia ia Yehowa?

² Si oföna, iwöwöi Nononia sotöi Yesu. Aefa daʼö, fao khönia Nononia andrö ba womböwöi ”fefu hadia ia”, tefarahu ba daʼö ndra malaʼika si zuta faʼato. (Kol. 1:16) Omuso sibai dödö Yesu me tola falulu fohalöwö ia khö Namania. (Gamd. 8:30) Baero daʼö, owua-wua göi dödö ndra malaʼika. Laʼila samösa me falulu fohalöwö Yehowa khö Yesu si tobali Tuka khönia, ba wamazökhi sorugo hegöi ulidanö. Hadia nifalua ndra malaʼika andrö? Lasuno Yehowa me tefazökhi gulidanö, ba lö aetu lasuno ia me laʼila niwöwöinia tanö böʼö, mendrua manö niha gulidanö. (Yob. 38:7; Gamd. 8:31) Fefu niwöwöinia andrö zangoromaʼö faʼomasi hegöi faʼatua-tua Yehowa.​—Zin. 104:24; Rom. 1:20.

3. Simane nitutunö ba 1 Korindro 15:21, 22, hadia mbua nitemada börö höli nibeʼe Yesu?

³ Omasi Yehowa na auri niha sagötö faʼara ba gulidanö nifazökhinia si sökhi sibai famaigi. Hizaʼi, börö me no mamadaö Gadamo hegöi Khawa khö Namara safönu faʼomasi, tebai saʼae laʼokhögö waʼauri si lö aetu. Hasambalö mate ira hegöi ngaʼötöra.  (Rom. 5:12) Hadia nifalua Yehowa? Iʼanemaiʼö ifatunö hewisa lalania ba wangorifi niha gulidanö. (1 Moz. 3:15) No itatugöi wa hasambalö ibeʼe Yesu si tobali höli ba wangefaʼö ngaʼötö Gadamo hegöi Khawa moroi ba horö hegöi faʼamate. Daʼö mbörö wa tola ibeʼe waʼauri si lö aetu Yehowa ba niha samosumange yaʼia.​—Yoh. 3:16; Rom. 6:23; baso 1 Korindro 15:21, 22.

4. Hadia manö wanofu-nofu nitutunöda ba artikel daʼa?

⁴ So ösa wanofu-nofu si tumbu ba dödöda sanandrösa ba mbuʼusa li Lowalangi ba wanusugi niha si no mate. Duma-dumania, hewisa dania waʼalua wanusugi niha si no mate? Na tesusugi dania niha niʼomasiʼöda, hadia tebulö ira irege lö taʼila haniha ira? Hana wa tola omuso dödöda börö me so wanusugi niha si no mate? Ba hana wa tola oroma waʼomasi, faʼatua-tua, hegöi faʼebolo dödö Yehowa moroi ba wanusugi? Datazara-zara ba wanutunö yaʼia.

5. Hana wa tola tawaʼö wa lö izumaigö tesusugi fefu niha ba ginötö si fagölö?

⁵ Iʼogunaʼö dania Nononia Yehowa ba wanusugi niha si miliaran faʼato. Hizaʼi, tola tawaʼö wa tenga niʼosamuzaigö wanusugi yaʼira. Hadia mbörö? Börö me tola alua waʼafawuka na izumaigö tedou waʼato niha ba gulidanö. Faduhu dödöda wa lö alua zimane daʼö börö me toföfö wamalua Yehowa fefu halöwönia. Aboto ba dödö Yehowa wa moguna toföfö wamaluania fefu hadia ia enaʼö lö tebulö so waʼahono dödö ba niha gulidanö. (1 Kor. 14:33) Me falulu fohalöwö Yehowa khö Yesu ba wamazökhi ulidanö andre tobali nahia niha gulidanö, izara-zara wamalua yaʼia. Daʼa zangoromaʼö faʼatua-tua hegöi faʼebolo dödö Yehowa. Sagötö Wamatörö zi Saribu Fakhe dania, hasambalö iforomaʼö göi mbua-bua andrö Yesu. Iforomaʼö waʼatua-tua hegöi faʼebolo dödö  na falulu fohalöwö ia ba niha si no teʼorifi ba Hamagedo, ba wamaʼanö fefu zoguna ba gulidanö andre enaʼö tola tobali nahia niha nisusugi.

6. Moloʼö Halöwö Zinenge 24:15, haniha dania zi farahu ba niha nisusugi Yehowa?

⁶ So halöwö si tohude niʼokhögö niha si no teʼorifi ba Hamagedo. Moguna lafahaʼö niha nisusugi sanandrösa ba Wamatörö Lowalangi hegöi ba gamakhoita Yehowa. Hadia mbörö? Börö me ato ba gotalua niha nisusugi andrö zi farahu ba ngawawa ”niha si lö atulö”. (Baso Halöwö Zinenge 24:15.) Oya zinangea labulöʼö ira niha nisusugi enaʼö tola latema mbua moroi ba höli nibeʼe Yesu. Khalaigö atö hawaʼoya halöwö sinangea tafalua ba ginötö daʼö. Moguna tafahaʼö niha si miliaran faʼato si lö irai mangokhögö faʼaboto ba dödö sanandrösa khö Yehowa. Hadia mufahaʼö dania niha ero zamösana, simane famahaʼö ba Zura Niʼamoniʼö nifaluada iadaʼa? Hadia mufataro dania ira ba zi sambua mbanua niha Keriso ba mufomaha ira ba wamahaʼö niha nisusugi aefa daʼö? Lö taʼila sibai. Hizaʼi, no aboto ba dödöda wa ba gangohorita Wamatörö Keriso si Saribu Fakhe dania, hasambalö ”anönö saʼae danö waʼaboto ba dödö niha Yehowa”. (Yes. 11:9) Sindruhu-ndruhu wa oya sibai halöwö sangaʼasogö faʼomuso dödö nifaluada ba Wamatörö si Saribu Fakhe!

7. Hana wa tola aboto ba dödö nono mbanua Lowalangi hadia nirasoi niha nisusugi?

⁷ Na tesusugi niha si no mate dania, moguna laforege ba wolawa isö-isö dödöra si fasala, ba lafalua goi-goi Yehowa ba waʼaurira sero maʼökhö. Hizaʼi, sagötö Wamatörö Keriso si Saribu Fakhe, moguna göi labulöʼö gamuatara iraono mbanua Lowalangi na omasi ira laʼomusoiʼö dödö Yehowa. Daʼö mbörö wa tola larasoi hadia nirasoi niha nisusugi, me latolo ira ba wombulöʼö faʼaurira. (1 Fet. 3:8) Ba me laʼila ira niha nisusugi wa lö aetu laforege iraono mbanua Yehowa ba wombulöʼö amuatara, tola aboto ba dödöra wa so wangide-ngideʼö ba gotalua nono mbanua Lowalangi. Buania, tola terou dödöra wefao ba wamosumange Yehowa.​—Fil. 2:12.

8. Hana wa tola tawaʼö wa hasambalö anehe ita dania ba niha nisusugi?

⁸ So ösa zi tobali dane-dane khöda irege tola tawaʼö wa hasambalö anehe ita dania niha niʼomasiʼöda sawena mususugi. Duma-dumania, moloʼö lala niʼogunaʼö Yehowa ba wanusugi niha ba götö föna, tola faduhu dödöda wa hasambalö fagölö wamazökhi Yehowa sikhala, lagu wahuhuosa, hegöi fangera-ngera zi samösa niha simane sibai fatua lö mate ia. Moguna tatörö tödöda wa ifagölösi niha si no mate Yesu simane niha si mörö. Ifatunö göi wa niha nisusugi moroi ba waʼamate hulö simane niha nisusugi moroi ba wemörö. (Mat. 9:18, 24; Yoh. 11:11-13) Na maoso niha moroi ba wemörö, fagölö zikhala, lagu wahuhuosa, hegöi fangera-ngerania simane sibai fatua lö mörö ia. Nehegö duma-duma Lazaro. No öfa hari mate ia irege no ibörögö obou mbotonia. Hewaʼae simanö, me isusugi ia Yesu, iʼanemaiʼö laʼila haniha ia ira Maria hegöi Marata, ba lö göi solifu Lazaro haniha ira.​—Yoh. 11:38-44; 12:1, 2.

9. Hana wa lö iʼanemaiʼö moʼahonoa lala wangera-ngera hegöi boto niha nisusugi?

⁹ No ifabuʼu Yehowa wa lö hadöi dania niha si toröi ba Waradaiso sangumaʼö, ”No gönado safökhö khögu.” (Yes. 33:24; Rom. 6:7) Eluahania, hasambalö wa lö fökhö ba mboto niha nisusugi. Hewaʼae simanö, lö iʼanemaiʼö moʼahonoa ira. Na daʼö zalua, tola manö lö anehe niha niʼomasiʼöra khöra. Sagötö Wamatörö Keriso si Saribu Fakhe, tezara-zara dania waʼatebulö mboto niha tobali  boto soʼahonoa. Ba gangohorita zi saribu fakhe dania, ifangawuli Wamatörö Lowalangi Yesu khö Namania. Ba ginötö daʼö, hasambalö no mofozu Wamatörö Lowalangi ba wamalua ohitö dödö Yehowa, farahu ba daʼö ba wamuli yaʼita ba wamoʼahonoa.​—1 Kor. 15:24-28; Fam. 20:1-3.

10. Hewisa dödöda na tesusugi niha si no mate?

¹⁰ Khalaigö hewisa dödömö na ifuli falukha dania ndraʼugö ba niha niʼomasiʼömö. Te maʼiki mazui meʼe dania ndraʼugö börö waʼomuso dödömö, ba tola manö göi öʼanunöisi zinunö fanuno khö Yehowa. Tola faduhu dödöda wa hasambalö itugu taʼomasiʼö Namada safönu faʼomasi hegöi Ononia, si no mamorege enaʼö tola tesusugi niha si no mate.

11. Simane fehede Yesu nisura ba Yohane 5:28, 29, hadia howu-howu nitema niha soloʼö khö Lowalangi?

¹¹ Khalaigö waʼomuso dödö nirasoi niha nisusugi me no laröi lala waʼaurira ba zilalö, ba lafaudugö gamuatara ba goi-goi Lowalangi. Niha sombulöʼö faʼaurira andrö, tola auri ira ba gulidanö Faradaiso sagötö faʼara. Hizaʼi, lö itehegö Yehowa na auri ba Waradaiso niha si lö omasi mamulöʼö amuatara, enaʼö lö tekiko waʼahono dödö ba Waradaiso.​—Yes. 65:20; baso Yohane 5:28, 29.

12. Hadia manö howu-howu nibeʼe Lowalangi ba niha gulidanö?

¹² Barö Wamatörö Lowalangi, hasambalö larasoi iraono mbanuania hadia nitutunö ba Gamaedola 10:22, me imane, ”Ifoʼanaʼa niha howu-howu khö Yehowa andrö; ba maʼifu lö inönö fangerege dödö.” Börö wanolo geheha niʼamoniʼö, tola itugu mofozu ndraono mbanua Lowalangi ba woloʼö amuata Yesu ba itugu moʼahonoa mboto niʼokhögöra. (Yoh. 13:15-17; Ef. 4:23, 24) Ero maʼökhö, itugu tedou waʼabölö mbotora ba itugu sökhi waʼaurira. Tatu omuso sibai dödöda na taʼokhögö waʼauri simane daʼö! (Yob. 33:25) Hizaʼi, na taʼangerönusi dötönafö ba wanusugi, tola göi tatema mbuania iadaʼa. Hadia manö mbua nitemada?

13. Simane nitutunö ba Zinunö 139:1-4, hewisa wa tola oroma moroi ba wanusugi wa aboto sibai ba dödö Yehowa ita?

¹³ Simane si no tatutunö, hasambalö isusugi dania niha Yehowa simane sibai me auri ira ba zilalö. Lö tebulö gamuatara, lagu wahuhuosa, hegöi fangera-ngerara. Daʼö zangoromaʼö wa itöngöni Yehowa fefu niʼera-erada, nirasoida, niwaʼöda, hegöi nifaluada. Itöngöni fefu daʼö Yehowa börö me iʼomasiʼö sibai ita. Börö daʼö, aoha khönia ba wanusugi yaʼita simane sibai me auri ita ba zilalö. Iʼila Razo Dawido wa aboto sibai ba dödö Yehowa fefu niha zamösana. (Baso Zinunö 139:1-4.) Sindruhu-ndruhu wa aboto sibai ba dödö Yehowa ita. Hewisa dödöda me no taʼila daʼö?

14. Hewisa dödöda na taʼangerönusi hawaʼaboto ba dödö Yehowa ita?

¹⁴ Na taʼangerönusi hawaʼaboto ba dödö Yehowa ita, lö saʼae aombö dödöda. Hadia mbörö? Börö me daʼö zangoromaʼö wa iʼameʼegö tödö sibai ita Yehowa. No sebua böli fefu niha ba wamaiginia, ba itöngöni fefu zalua ba waʼaurida. Tatu teʼaroʼö sibai dödöda me no taʼila fefu daʼö! Lö tarasoi wa ha yaʼi-yaʼita. Aboto ba dödöda wa fao khöda Yehowa ero maʼökhö, ba omasi ia ba wanolo yaʼita.​—2 Nga. 16:9.

15. Hewisa wa tola oroma waʼatua-tua Yehowa moroi ba dötönafö ba wanusugi?

¹⁵ Faʼataʼu ba waʼamate, tola muʼogunaʼö ia tobali fakake ba wametaʼu niha böʼö. Laʼogunaʼö daʼö ira niha si so barö wamatörö Zatana ba wamaso niha böʼö enaʼö faröi ira  khö nawöra mazui lafalua gamuata si fasala. Hizaʼi, tebai laʼogunaʼö fakake andrö ba wametaʼu yaʼita. Hadia mbörö? Börö me aboto ba dödöda wa tola isusugi ita Yehowa hewaʼae na labunu ita ira ududa. (Fam. 2:10) Faduhu dödöda wa tebai lafabali ita khö Yehowa, gofu hadia ia nifaluara khöda. (Rom. 8:35-39) Buania, tola tafosumange Yehowa si fao faʼabarani ba lö faröi ita khönia. Börö dötönafö ba wanusugi moroi khö Yehowa, lö eluaha fakake niʼogunaʼö Zatana ba wametaʼu yaʼita. Dötönafö andre zangoromaʼö wa atua-tua sibai Yehowa.

16. Hadia manö wanofu-nofu sinangea taʼangeragö, ba hana wa tola möi fanoloda daʼö ba wangiʼila hawaʼebua wamatida khö Yehowa?

¹⁶ Na lawaʼö ira ududa wa labunu ita, hadia mamati ita wa hasambalö isusugi ita Yehowa? Enaʼö tola taʼila wanema linia, moguna taʼangeragö wanofu-nofu daʼa: ’Ba gangetula si gide-ide nihalögu ero maʼökhö, hadia tola oroma wa mamati ndraʼo khö Yehowa? Moroi ba lala waʼaurigu, hadia tola oroma wa mamati ndraʼo ba mbuʼusa li Yehowa wa hasambalö ibeʼe zoguna khögu na uʼofönaiʼö Wamatörönia?’ (Luk. 16:10; Mat. 6:31-33) Na fanema li nibeʼemö ba wanofu si dombua andrö yaʼia daʼö tola, daʼö zangoromaʼö wa mamati ndraʼugö khö Yehowa, ba no tefaʼanö ndraʼugö ba wanaögö fanandraigö salua ba zi so miföna.​—Gamd. 3:5, 6.

17. (a) Hewisa wa tola oroma waʼebolo dödö Yehowa moroi ba dötönafö ba wanusugi? (b) Hewisa wangoromaʼöda wa taʼandrö saohagölö ba waʼebolo dödö Yehowa?

¹⁷ No itatugöi Yehowa, hawaʼara idudugö gulidanö safönu faʼalösökhi andre. (Mat. 24:36) Lö aetu iforomaʼö waʼebolo dödö Yehowa, ba lö ifalua gohitö dödönia na tenga ba ginötö si tefaudu. Edöna sibai ia ba wanusugi niha si no mate, hizaʼi ebolo dödönia ba wombaloi inötö si tefaudu ba wamalua daʼö. (Yob. 14:14, 15; Yoh. 5:28) Moguna taʼandrö saohagölö ba waʼebolo dödö niforomaʼö Yehowa andre. Angeragö atö daʼa: Börö me ebolo dödö Yehowa, ato niha sangokhögö inötö ba wamalalini era-era, ba tefarahu ita ba daʼö. (2 Fet. 3:9) Omasi Yehowa na ato niha sanema faʼauri si lö aetu. Börö daʼö, dataforomaʼö wa taʼameʼegö tödö waʼebolo dödö Yehowa. Hewisa lalada ba wamalua yaʼia? Dataforege ba wangalui niha ”si sökhi amuata somasi manöndra faʼauri si lö aetu”. (Hal. 13:48) Omasi ita tatolo ira ba wangomasiʼö Yehowa hegöi ba wamosumange yaʼia. Na tafalua daʼö, tola göi latema mbua moroi ba waʼebolo dödö Yehowa.

18. Hana wa moguna taforomaʼö waʼebolo dödö ba niha böʼö?

 ¹⁸ Aboto ba dödö Yehowa wa awena sindruhu-ndruhu moʼahonoa dania ita ba gangohorita Wamatörö si Saribu Fakhe. Fatua lö daʼö, lö mamalö iforomaʼö waʼebolo dödö Yehowa ba aoha gölönia ba wangefaʼö horö nifaluada. Börö daʼö, moguna göi taʼosambuaʼö dödöda ba mbua-bua si sökhi niʼokhögö niha böʼö, ba lö mamalö taforomaʼö khöra waʼebolo dödö simane nifalua Yehowa. Nehegö duma-duma zi samösa dalifusöda ira alawe andre. No göna woʼomonia faʼaombö dödö sabölö-bölö irege iböhöli weʼamöi ba gangowuloa. Imane talifusöda andrö, ”Abua sibai gabula dödögu andre. Tebai mafalua fefu zi no maʼera-era ba zilalö.” Hewaʼae simanö, lö aetu tobali foʼomo si sökhi dalifusöda andrö, ba iforomaʼö waʼebolo dödö khö woʼomonia ira matua. Iʼodaligö Yehowa ba lö irai awuwu ia. Simane Yehowa, lö aetu iforege ba wangosambuaʼö tödönia ba ngawalö zi sökhi niʼokhögö woʼomonia. Imane wanutunö, ”Oya sibai mbua-bua si sökhi niʼokhögö woʼomogu, ba lö aetu iforege enaʼö itugu döhö wökhönia.” Sindruhu-ndruhu wa moguna taforomaʼö waʼebolo dödö ba nösi nomoda mazui khö ndra talifusöda ba mbanua niha Keriso, samorege ba wangasiwai abula dödö sebua.

19. Hadia gangetula sinangea tahalö?

¹⁹ Me tewöwöi gulidanö, omuso sibai dödö Yesu hegöi ira malaʼika. Tobali, itugu omuso dödöra na laʼila dania wa no afönu gulidanö andre niha soʼahonoa, sangomasiʼö ba samosumange Yehowa. Khalaigö göi waʼomuso dödö nirasoi niha si fao awö Keriso mamatörö ba zorugo, me laʼila dania mbua si sökhi niʼasogöra ba niha gulidanö. (Fam. 4:4, 9-11; 5:9, 10) Khalaigö waʼaurida dania na lö hadöi saʼae fökhö, faʼabu dödö, hegöi faʼamate. Ba ginötö daʼö, ha tawa hörö waʼomuso dödö dania zalua ba gulidanö. (Fam. 21:4) Sagötö wombaloida waʼaluania, datahalö gangetula ba woloʼö faʼomasi, faʼatua-tua, hegöi faʼebolo dödö niforomaʼö Namada. Na tafalua daʼö, lö mamalö tarasoi waʼomuso dödö gofu hadia ia gabula dödö salua khöda. (Yak. 1:2-4) Taʼandrö sibai saohagölö ba mbuʼusa li Yehowa wa ”so wanusugi ba niha si no mate” ba zi so miföna!​—Hal. 24:15.