1. Hadia döi si sökhi niʼokhögöda?

FEFU ita, no taʼokhögö döi si sökhi me tola farahu ita ba mbanua niha Keriso khö Yehowa. No farahu ita ba waradaiso ba wamati safönu faʼowua-wua dödö hegöi faʼahono dödö. Hadia halöwö si tohude niʼokhögömö ba mbanua niha Keriso?

2. Hadia gamaedola niʼogunaʼö Waulo ba zurania si hauga ngawua?

² Ba zurania si hauga ngawua, ifagölösi mbanua niha Keriso Faulo simane boto niha. Ifagölösi göi niha si so ba mbanua niha Keriso simane ndroto-ndroto si so ba mboto niha.​—Rom. 12:4-8; 1 Kor. 12:12-27; Ef. 4:16.

3. Hadia zi tölu ngawalö wamahaʼö nitutunöda ba artikel daʼa?

³ Ba artikel daʼa, so tölu wamahaʼö si tohude si tola tahalö moroi ba gamaedola niʼogunaʼö Waulo. Si oföna, tafahaʼö dania ita wa so halöwö * niʼokhögöda ba mbanua niha Keriso. Si dua, tatutunö hadia zinangea tafalua na tarasoi wa lö hadöi halöwö si tola tafalua ba mbanua niha Keriso. Si tölu, tatutunö göi hana wa moguna owölö-ölö ita ba wamalua halöwö si no ibeʼe khöda Yehowa ba mbanua niha Keriso.

4. Hadia wamahaʼö si tola tahalö moroi ba Roma 12:4, 5?

⁴ Famahaʼö si oföna si tola tahalö moroi ba gamaedola nibeʼe Waulo yaʼia daʼö taʼokhögö halöwö si tohude ba nösi nomo Yehowa. Imane Faulo ba wamörögö gamaedolania, ”Hewaʼae ha sambua mboto ba oya ndroto-ndrotonia si faböʼö-böʼö halöwö,  simanö ita ba khö Keriso hewaʼae ato, ha sambua boto ita ba no ndroto-ndroto ita zamösana khö nawöda.” (Rom. 12:4, 5) Hadia geluaha wehede Waulo andrö? Hewaʼae na faböʼö-böʼö halöwöda ba mbanua niha Keriso, no sebua böli ita.

5. Hadia ’mbuala’ nibeʼe Yehowa ba mbanua niha Keriso?

⁵ Si toʼölönia, na taʼangeragö sanandrösa ba niha sangokhögö halöwö ba mbanua niha Keriso, iʼanemaiʼö itörö tödöda ndra talifusöda si tobali sondröniaʼö ba organisasi. (1 Tes. 5:12; Heb. 13:17) Iʼogunaʼö Keriso Yehowa ba wameʼe niha si tobali ”buala” ba mbanua niha Keriso. (Ef. 4:8) Si farahu ba ’mbuala’ andrö yaʼia daʼö ira Boto Solohe, asisten ndra Boto Solohe, Panitia Ndraha, satua samasui, samahaʼö ba zekola Zura Niʼamoniʼö, satua sokubaloi, hegöi ira enoni sohalöwö. Eheha niʼamoniʼö zamataro yaʼira ba wondrorogö mbiri-biri Yehowa sebua böli hegöi ba wangaʼaroʼö banua niha Keriso.​—1 Fet. 5:2, 3.

6. Moloʼö 1 Tesalonika 2:6-8, hadia zinangea laforege ira talifusöda nifataro geheha niʼamoniʼö?

⁶ Ba mbanua niha Keriso, oya sibai noro dödö niʼokhögö ndra talifusöda nifataro geheha niʼamoniʼö. Fefu ndroto-ndroto ba mboto niha, simane tanga hegöi ahe, lafalua ngawalö halöwö soguna ba mboto maʼafefu. Simane daʼö göi, laforege ira talifusöda andre ba wamalua halöwö soguna ba mbanua niha Keriso maʼafefu. Tenga lakhömira samösa niʼaluira. Hizaʼi, laforege ba wangaʼaroʼö ndra talifusöra. (Baso 1 Tesalonika 2:6-8.) Taʼandrö sibai saohagölö khö Yehowa börö me no ibeʼe khöda ndra talifusöda andrö, sabölö mangofönaiʼö soguna ba niha böʼö moroi ba zoguna khöra samösa!

7. Hadia manö howu-howu nitema ndra talifusöda si tobali sanuriaigö safönu inötö?

⁷ Ba mbanua niha Keriso, so göi ndra talifusöda sangai halöwö tobali utusan injil, perintis istimewa, mazui perintis biasa. Ato ndra talifusöda ba zi sagörö ulidanö sangai angetula ba wangai halöwö safönu inötö khö Yehowa. Buania, ato sibai niha nitolora tobali nifahaʼö Keriso. Si toʼölönia, lö oya gokhöta niʼokhögö ndra sanuriaigö safönu inötö. Hewaʼae simanö, oya sibai howu-howu nitemara moroi khö Yehowa. (Mrk. 10:29, 30) Tatu taʼomasiʼö sibai ira, ba taʼandrö saohagölö börö me no farahu ira ba mbanua niha Keriso si so yaʼita!

8. Hana wa no sebua böli fefu zanuriaigö ba wamaigi Yehowa?

⁸ Hadia ha ira talifusöda si tobali sondröniaʼö hegöi sanuriaigö safönu inötö, zangokhögö halöwö ba mbanua niha Keriso? Löʼö. No sebua böli fefu zanuriaigö turia somuso dödö ba wamaigi Yehowa hegöi ba wamaigi ndra talifusöda. (Rom. 10:15; 1 Kor. 3:6-9) Hadia mbörö? Börö me ohitö dödö si oföna niʼokhögö niha Keriso yaʼia daʼö ba wombaliʼö niha tobali nifahaʼö Zoaya yaʼita, Yesu Keriso. (Mat. 28:19, 20; 1 Tim. 2:4) Fefu zanuriaigö ba mbanua niha Keriso, he si no tebayagö idanö hegöi si löʼö, moguna laforege ba wangofönaiʼö halöwö daʼa ba waʼaurira.​—Mat. 24:14.

9. Hana wa taʼosinangegö sibai ndra talifusöda ira alawe ba mbanua niha Keriso?

⁹ Börö me iʼameʼegö tödö ndra talifusöda ira alawe Yehowa, ibeʼe khöra halöwö si tohude ba mbanua niha Keriso. Iʼomasiʼö sibai ndra talifusöda ira alawe si lö faröi ba wamosumange yaʼia, he si no tobali foʼomo, ina, lakha mbanua, hegöi ira talifusöda si lö sangowalu. Asese itutunö Sura Niʼamoniʼö sanandrösa ba ndra alawe sangomusoiʼö tödö Yehowa. Yaʼira zi tobali duma-duma si sökhi khöda ba wangoromaʼö faʼatua-tua, famati, faʼamohiʼa dödö, faʼabarani, faʼoböwö, hegöi faʼasökhi dödö. (Luk. 8:2, 3; Hal. 16:14, 15; Rom. 16:3, 6; Fil. 4:3; Heb. 11:11, 31, 35) Taʼandrö sibai saohagölö khö Yehowa  börö me ato ndra talifusöda ira alawe ba mbanua niha Keriso sangoromaʼö bua-bua si sökhi simane daʼö!

10. Hana wa taʼosinangegö sibai ndra talifusöda si no alawa döfi?

¹⁰ Omuso göi dödöda börö me ato ndra talifusöda si no alawa döfi ba mbanua niha Keriso. Ba zi hauga mbanua niha Keriso, so ösa ndra talifusöda si no alawa döfi si lö faröi ba wamosumange Yehowa sandrohu faʼaurira. So göi ösa ba gotaluara zawena farahu ba zindruhu. Ato ba gotaluara zanaögö fökhö börö me no alawa ndröfira. Abula dödö andrö zi tobali fanaisira irege lö oya halöwö si tola lafalua khö Yehowa. Hewaʼae simanö, laforege ira talifusöda andrö ba wamalua sabölö sökhi. Laforege göi ba wangaʼaroʼö hegöi ba wamomaha niha böʼö. Tola göi tafahaʼö ita moroi ba zi no irai alua khöra. Sindruhu-ndruhu wa no sebua böli ira ba wamaigida hegöi ba wamaigi Yehowa.​—Gamd. 16:31.

11-12. Hewisa wa tola teʼaroʼö dödöda ba nifalua ndra talifusöda sawuyu-wuyu si so ba mbanua niha Keriso?

¹¹ Angeragö göi ndra talifusöda sawuyu-wuyu ba mbanua niha Keriso. Oya sibai gabula dödö salua khöra börö me teʼebuaʼö ira ba gulidanö nifatörö Zatana, si no afönu lala wangera-ngerania si lö sökhi. (1 Yoh. 5:19) Hewaʼae simanö, lö aetu laforege ira talifusöda sawuyu-wuyu andrö ba wameʼe bua gera-erara ba gangowuloa, möi ira manuriaigö, ba laʼoʼawögö wamatira si fao faʼabarani. Tatu teʼaroʼö sibai dödöda me taʼila fefu daʼö. Yaʼami si bohou ebua, sindruhu-ndruhu wa miʼokhögö halöwö si tohude ba mbanua niha Keriso khö Yehowa!​—Zin. 8:3.

¹² Hizaʼi, so ösa ndra talifusöda sambö faduhu tödö wa so zi tola lafalua ba mbanua niha Keriso. Na daʼö nirasoida, hadia zinangea tafalua enaʼö tola faduhu dödöda wa so halöwö si tohude niʼokhögöda ba mbanua niha Keriso? Datatutunö.

13-14. Hana wa so ösa ndra talifusöda sorasoi wa lö hadöi halöwö si tola lafalua ba mbanua niha Keriso?

¹³ Imane Faulo ba zurania tanö böʼö, ”Na imane ahe, ’Börö me tenga tanga ndraʼodo,  tenga si faböbö ba mboto ndraʼo’, lö tebulö sa wa si faböbö ba mboto ia. Na imane talinga, ’Börö me tenga hörö ndraʼodo, tenga si faböbö ba mboto ndraʼo’, lö tebulö sa wa si faböbö ba mboto ia.” (1 Kor. 12:15, 16) Fehede Waulo andre zangoromaʼö wa ato niha Keriso sambö faduhu tödö wa so halöwö si tola lafalua ba mbanua niha Keriso. Na simanö, hadia wamahaʼö si dua si tola tahalö moroi ba gamaedola Waulo?

¹⁴ Böi faedo-faedogö ndraʼugö ba niha böʼö. Na öfalua daʼö, tola manö örasoi wa lö moguna ndraʼugö ba mbanua niha Keriso. Ba mbanua niha Keriso, so ösa ndra talifusöda sonekhe ba wamahaʼö niha, ba wameʼe fanuturu lala, hegöi ba wameʼe fondrara dödö mazui famarou dödö ba niha böʼö. Tola manö örasoi wa tebai öʼokhögö waʼonekhe simane niʼokhögöra. Daʼa zangoromaʼö wa so khöu wangide-ngideʼö, ba aboto ba dödöu wa so zi tebai öfalua. (Fil. 2:3) Hizaʼi, moguna mangelama ndraʼugö. Na lö aetu öfaedo-faedogö ndraʼugö ba niha sangokhögö faʼonekhe, tola manö ide-ide dödömö. Ba simane nitutunö Waulo, tola manö örasoi wa lö hadöi halöwö si tola öfalua ba mbanua niha Keriso. Hadia zi tola manolo yaʼugö ba wolawa fangera-ngera simane daʼö?

15. Moloʼö 1 Korindro 12:4-11, hadia zinangea aboto ba dödöda?

¹⁵ Angeragö daʼa: Me abad siföföna, iʼogunaʼö gehehania Yehowa ba wameʼe buala sahöli-höli dödö ba niha Keriso. Hizaʼi, no faböʼö-böʼö mbuala nibeʼenia khöra. (Baso 1 Korindro 12:4-11.) Hewaʼae na no faböʼö-böʼö waʼonekhe hegöi faʼabölö nibeʼe Yehowa khöra, no sebua böli fefu ira ba wamaiginia. Ba götöda iadaʼa, lö saʼae iʼogunaʼö dandra sahöli-höli dödö Yehowa ba wameʼe khöda faʼonekhe hegöi faʼabölö. Hizaʼi, lö tebulö moguna khöda goi-goi nibeʼe Waulo andre: Hewaʼae na faböʼö-böʼö waʼonekhe niʼokhögöda, no sebua böli fefu ita ba wamaigi Yehowa.

16. Hadia mene-mene si sökhi nibeʼe Waulo khöda?

¹⁶ Moroi na tafaedo-faedogö ita ba niha Keriso tanö böʼö, abölö sökhi na tafalua mene-mene nibeʼe Waulo andre: ”Yamufareso nifaluania zamösana, ba omuso dödönia  ba nifaluania andrö, tenga börö me ifaedo-faedogö ia ba niha böʼö.”​—Gal. 6:4.

17. Hadia mbua nitemada na taʼoʼö mene-mene nibeʼe Waulo?

¹⁷ Na taʼoʼö mene-mene nibeʼe Waulo ba wamareso hadia nifaluada zamösana, tola aboto ba dödöda wa so waʼonekhe niʼokhögöda si lö laʼokhögö niha böʼö. Duma-dumania, te lö onekhe zi samösa satua sokubaloi ba wamaʼema huhuo ba gangowuloa, hizaʼi onekhe sibai ia ba wamahaʼö niha nifalukhaisinia ba wanuriaigö. Mazui, te lö onekhe ia ba wameʼe fanuturu lala simane ira satua sokubaloi tanö böʼö, hizaʼi laʼila ira talifusöda wa yaʼia andrö satua sokubaloi si sökhi amuata ba safönu faʼomasi, irege lö alawö ira ba wangandrö khönia mene-mene Zura Niʼamoniʼö. Mazui te no laʼila ira talifusöda wa oböwö sibai ia. (Heb. 13:2, 16) Na sindruhu-ndruhu aboto ba dödöda hadia waʼonekhe hegöi faʼabölö niʼokhögöda, tola faduhu dödöda wa so zi tola tafalua ba mbanua niha Keriso. Baero daʼö, lö saʼae afökhö dödöda na so ndra talifusöda sangokhögö faʼonekhe si faböʼö ba niʼokhögöda.

18. Hewisa lalada enaʼö tola itugu onekhe ita ba wamalua halöwö ba wamati?

¹⁸ Gofu hadia halöwö niʼokhögöda ba mbanua niha Keriso, moguna so khöda waʼedöna ba wondrouʼö faʼonekheda ba wamalua halöwö ba wamati. Oya wamomaha nihenaigö Yehowa ba organisasinia si tobali fanoloda. Duma-dumania, ba gangowuloa barö migu, ibeʼe khöda wanuturu lala enaʼö itugu mofozu ita ba wamalua halöwö ba wamati. Hadia no öforege ba wamalua famahaʼö nitemamö ba gangowuloa andrö?

19. Hewisa lala enaʼö tola ökhamö gohitö dödömö ba wefao ba Sekolah bagi Penginjil Kerajaan?

¹⁹ Famomaha tanö böʼö niʼasogö Yehowa yaʼia daʼö Sekolah bagi Penginjil Kerajaan. Tola fao ba zekola andre ndra talifusöda sangai halöwö safönu inötö, si 23 irugi 65 fakhe. Te omasiʼö fao ba zekola andre, hizaʼi öwaʼö tödömö wa tebai ökhamö gohitö dödömö andrö. Na daʼö nirasoimö, hadia zinangea öfalua? Moroi na öʼangeragö hadia manö zi tobali daha-tahamö irege tebai fao ndraʼugö ba Sekolah bagi Penginjil Kerajaan, abölö sökhi na öʼangeragö hadia manö dane-dane wa omasi ndraʼugö fao ba daʼö. Aefa daʼö, tatugöi hadia manö zinangea öfalua enaʼö tola fao ndraʼugö ba zekola andrö. Börö wanolo Yehowa hegöi famorege nifaluamö, tola mofozu ndraʼugö ba wamalua si tebai öfalua ba wamaigimö.

20. Hadia wamahaʼö si tola tahalö moroi ba Roma 12:6-8?

²⁰ Famahaʼö si tölu si tola tahalö moroi ba gamaedola nibeʼe Waulo, no tesura daʼö ba Roma 12:6-8. (Baso.) Ba ayati daʼö, ifuli itutunö Faulo wa no faböʼö-böʼö waʼonekhe niʼokhögö niha Keriso. Tobali, ifarou göi ita ba wangogunaʼö faʼonekhe niʼokhögöda ba wangaʼaroʼö banua niha Keriso.

21-22. Hadia wamahaʼö si tola tahalö moroi duma-duma salua khö Robert hegöi Felice?

²¹ Nehegö duma-duma dalifusöda Robert. * Ba wamobörö, mangai halöwö ia ba soi böʼö. Hizaʼi ba gafuriata, mufataro ia ba soinia samösa tobali sohalöwö ba Mbetieli. Lafaduhuʼö khönia ira talifusöda wa tenga börö me no ifalua zala wa mubulöʼö halöwö nibeʼe khönia. Hewaʼae simanö, lö aetu irasoi waʼide-ide dödö. Imane wangumaʼö, ”Ba zi hauga waŵa, ide-ide dödögu börö me uwaʼö tödögu wa lö mofozu ndraʼo ba wamalua halöwögu si oföna. Itaria tumbu ba dödögu ba wamöhöli halöwö ba Mbetieli.” Hewisa wa tola ifuli iʼokhögö waʼowua-wua dödö talifusöda Robert? So samösa zatua  sokubaloi samasugi ba dödönia wa lö aetu ifomaha ita Yehowa ba wamalua halöwö nitemada ba zilalö, börö me omasi ia enaʼö mofozu ita ba wamalua halöwöda si bohou. Buania, aboto ba dödö Robert wa moguna iböhöli ba woʼangeragö faʼaurinia ba zilalö, ba iʼosambuaʼö dödönia ba halöwö si tola ifalua iadaʼa.

²² Simane daʼö göi zalua khö dalifusöda Felice Episcopo. Lulus ira foʼomonia ba Sekolah Gilead me döfi 1956, aefa daʼö, tebeʼe khönia halöwö tobali satua samasui ba Bolivia. Hizaʼi, me döfi 1964, tumbu khöra samösa nono matua. Imane Felice, ”Abua sibai khöma ba wondröi halöwö niʼomasiʼöma andrö. Lö aetu urasoi waʼide-ide dödö ba zi döfi faʼara. Hizaʼi, börö wanolo Yehowa, tola ubulöʼö lala wangera-ngeragu ba uʼosambuaʼö dödögu ba wamalua halöwögu tobali samösa satua.” Hadia örasoi göi zimane nirasoi Robert mazui Felice? Hadia ide-ide dödömö börö me tebai saʼae öfalua halöwö ba wamati si no irai tebeʼe khöu ba zilalö? Na örasoi zimane daʼö, forege enaʼö lö öʼosambuaʼö dödömö ba halöwö nifaluamö ba zilalö. Abölö sökhi na öʼosambuaʼö dödömö ba halöwö si tola öfalua iadaʼa ba wamosumange Yehowa hegöi ba wanolo ira talifusöda. Böi aetu ogunaʼö waʼonekhe mazui faʼabölömö ba wanolo hegöi ba wangaʼaroʼö ndra talifusöda. Na öfalua daʼö, tola itugu örasoi waʼomuso dödö.

23. Hadia zinangea taʼangeragö, ba hadia nitutunöda ba artikel aefa daʼa?

²³ No sebua böli fefu ita ba wamaigi Yehowa. Omasi ia enaʼö tarasoi wa no tefarahu ita ba nösi nomonia. Börö daʼö, moguna taʼangeragö hadia manö zi tola tafalua ba wangaʼaroʼö ndra talifusöda, ba taforege ba wamalua yaʼia. Na tafalua daʼö, lö saʼae tumbu ba dödöda wa lö hadöi halöwö si tola tafalua ba mbanua niha Keriso. Hizaʼi, hewisa zinangeania lala wangera-ngerada sanandrösa khö ndra talifusöda ba mbanua niha Keriso? Ba hewisa wangoromaʼöda wa taʼosinangegö ira? Tatutunö daʼö ba artikel aefa daʼa.