1. Hadia nibeʼe Yehowa ba nono mbanuania?

SI FAO faʼomasi, no ibeʼe halöwö si tohude Yehowa ba niha samosumange yaʼia si so ba mbanua niha Keriso. Hewaʼae na no faböʼö-böʼö halöwöda, no sebua böli fefu ita ba wamaiginia, ba faoma moguna khöda nawöda. Itolo ita sinenge sotöi Faulo enaʼö tola aboto ba dödöda daʼa. Hadia niwaʼönia?

2. Moloʼö Efeso 4:16, hana wa moguna taʼosinangegö niha böʼö ba falulu fohalöwö ita khöra?

² Ba ayati si tobali tuho artikel andre, ifahaʼö ita Faulo wa tebai tawaʼö ba nono mbanua Yehowa tanö böʼö, ”Lö moguna khögu ndraʼugö.” (1 Kor. 12:21) Na omasi ita so waʼatulö ba mbanua niha Keriso, moguna taʼosinangegö niha böʼö ba falulu fohalöwö ita khöra. (Baso Efeso 4:16.) Na falulu fohalöwö ita si fao fahasara dödö, tola tarasoi waʼomasi ndra talifusöda ba itugu teʼaroʼö mbanua niha Keriso.

3. Hadia nitutunöda ba artikel daʼa?

³ Hadia manö zi tola tafalua ba wangoromaʼö wa taʼosinangegö niha böʼö si so ba mbanua niha Keriso? Ba artikel daʼa, tatutunö hewisa wangoromaʼö ndra satua sokubaloi wa laʼosinangegö zatua sokubaloi tanö böʼö. Aefa daʼö, tatutunö hewisa wangoromaʼöda wa taʼosinangegö ndra talifusöda si lö sangowalu. Safuria, tatutunö göi hewisa lalada ba wangoromaʼö wa taʼosinangegö ndra talifusöda si lö onekhe fahuhuo ba li niʼogunaʼöda.

4. Hadia mene-mene nisura Waulo ba Roma 12:10 sinangea laʼoʼö ira satua sokubaloi?

⁴ Eheha niʼamoniʼö moroi khö Yehowa zamataro ndra satua sokubaloi ba mbanua niha Keriso. Tobali, no faböʼö-böʼö waʼonekhera hegöi si tola lafalua. (1 Kor. 12:17, 18) So ösa zawena  mufataro, ba tola manö ambö onekhe ira ba wamalua halöwöra. So göi ösa ba gotaluara zi no atua hegöi si no göna fökhö, irege lö oya zi tola lafalua. Hewaʼae simanö, tebai lawaʼö khö nawöra ira satua sokubaloi, ”Lö moguna khögu ndraʼugö.” Hizaʼi, moguna laʼoʼö mene-mene nisura Waulo ba Roma 12:10.​—Baso.

5. Hewisa wangoromaʼö ndra satua sokubaloi wa laʼosinangegö zatua sokubaloi tanö böʼö, ba hana wa moguna sibai lafalua daʼö?

⁵ Tola laforomaʼö ira satua sokubaloi wa laʼosinangegö zatua sokubaloi tanö böʼö, na faoma lafondrondrongo wehede nawöra. Moguna sibai lafalua daʼa, mendrua manö na rafe ira ba wanutunö abula dödö si tohude. Hadia mbörö? Imane The Watchtower 1 Mbaŵa si Fulu 1988, ”Moguna aboto ba dödö ndra satua sokubaloi wa iʼogunaʼö geheha niʼamoniʼö Yesu ba wanolo yaʼira, irege tola lasöndra mene-mene Zura Niʼamoniʼö si möi fanolora ba wangasiwai abula dödö hegöi ba wangai angetula si tohude. (Hal. 15:6-15) Tenga ha samösa zatua sokubaloi nitolo geheha niʼamoniʼö, hizaʼi fefu.”

6. Hadia zanolo ndra satua sokubaloi irege tola falulu fohalöwö ira si fao fahasara dödö, ba hadia mbuania na so khöra wahasara dödö?

⁶ Na iʼosinangegö zatua sokubaloi tanö böʼö, tatu lö iforege si samösa dalifusöda enaʼö ha yaʼia manö zasese fahuhuo na mufalua rafe. Baero daʼö, lö iwaʼö tödönia wa atulö manö fefu mbua gera-erania. Hizaʼi, ifaʼema mbua gera-erania si fao fangide-ngideʼö. Ihaogö ifondrondrongo na so zatua sokubaloi tanö böʼö zamaʼema bua gera-erara. Ba sabölö moguna, fao dödönia ba wanutunö mene-mene Zura Niʼamoniʼö hegöi ba woloʼö fanuturu lala moroi khö ”zawuyu si lö faröi ba satua-tua”. (Mat. 24:45-47) Na laforege ira satua sokubaloi ba wangoromaʼö faʼomasi hegöi fangosinangegö ba niha böʼö, tola fao geheha niʼamoniʼö ba wanolo yaʼira, irege tola lahalö gangetula si möi fangaroʼö mbanua niha Keriso.​—Yak. 3:17, 18.

7. Hewisa lala wangera-ngera Yesu sanandrösa ba niha si lö sangowalu?

⁷ Ba mbanua niha Keriso, ato ndra talifusöda si no mongambatö hegöi si no  mangokhögö iraono. Hizaʼi, so göi ösa ndra talifusöda si lö sangowalu. Hewisa zinangeania lala wangera-ngerada sanandrösa khöra? Angeragö hewisa lala wangera-ngera Yesu. Me so Yesu ba gulidanö, lö mangowalu ia. Iʼogunaʼö fefu ginötö hegöi fangera-ngerania ba wamalua halöwö ba wamati. Sindruhu sa, no irai ifatunö khöda Yesu wa so ösa niha Keriso sangai angetula enaʼö lö mangowalu. (Mat. 19:11, 12; faigi keterangan tambahan untuk Matius 19:12.) Hizaʼi, lö nifarou Yesu ita enaʼö mangowalu mazui böi mangowalu. Iʼosinangegö niha si lö sangowalu Yesu. Lö iwaʼö Yesu wa abölö tohude niha si no mongambatö, ba lö göi iwaʼö wa moʼamböta waʼauri niha si lö sangowalu.

8. Simane nisura ba 1 Korindro 7:7-9, hadia wamarou dödö nibeʼe Waulo ba niha Keriso?

⁸ Simane Yesu, lö göi mangowalu Waulo sagötö wamaluania halöwö fanuriaigö. Lö irai ifahaʼö ita Faulo wa fasala na mangowalu niha Keriso. Aboto ba dödönia wa yaʼita samösa zangai angetula sanandrösa ba daʼö. Tobali, ifarou dödö niha Keriso Faulo ba woʼangeragö hadia tola lahalö gangetula enaʼö lö mangowalu ira. (Baso 1 Korindro 7:7-9.) Sindruhu-ndruhu wa iʼosinangegö niha si lö sangowalu Faulo. Daʼö mbörö wa lö aombö dödö Waulo ba wamili Dimoteo si lö sangowalu, ba wamalua ngawalö halöwö si tohude khö Yehowa. * (Fil. 2:19-22) Börö daʼö, he na no mangowalu zi samösa niha mazui löʼö, tola labeʼe khönia noro dödö ba mbanua niha Keriso na no sinangea ia ba wanema daʼö.​—1 Kor. 7:32-35, 38.

9. Hewisa zinangeania lala wangera-ngerada sanandrösa ba niha si no mongambatö hegöi si lö sangowalu?

⁹ Yesu hegöi Faulo, lö irai lafarou niha Keriso enaʼö mangowalu mazui böi mangowalu. Na simanö, hewisa zinangeania lala wangera-ngerada sanandrösa ba niha si no mongambatö hegöi si lö sangowalu? Imane Menara Pengawal 1 Mbaŵa si Fulu 2012, ”Sindruhunia, si dombua ngawalö andre, [he fangowalu hegöi falömangowalu] no buala moroi khö Lowalangi. . . . Ba wamaigi Yehowa, tenga fangaila mazui fangabu dödö na lö sangowalu zi samösa niha.” Börö daʼö, moguna taʼosinangegö ndra talifusöda si lö sangowalu.

10. Hewisa wangoromaʼöda wa taʼosinangegö ndra talifusöda si lö sangowalu?

¹⁰ Hewisa wangoromaʼöda wa taʼosinangegö hadia nirasoi ndra talifusöda si lö sangowalu? Moguna aboto ba dödöda wa no faböʼö-böʼö zi tobali dane-dane wa lö mangowalu  ira. Duma-dumania, so ösa niha Keriso si no mangai angetula enaʼö lö mangowalu. So göi ösa zomasi mongambatö, hizaʼi lö nasa si falukha ira ba niha si tefaudu ba dödöra. Baero daʼö, so göi ösa zi no irai mangowalu, hizaʼi no mate woʼomora andrö. Tobali, gofu hadia dane-dane wa lö sangowalu ira, lö moguna tasofu-sofu daʼö, mazui tawaʼö khöra wa omasi ita tatolo ira ba wangalui niha si tefaudu ba dödöra. Sindruhu sa, te so ösa niha Keriso sangandrö tolo khöda ba wangalui haniha zinangea tobali foʼomora. Hizaʼi, na lö niʼandröra khöda, hewisa dödöra na tawaʼö wa omasi ita tatolo ira ba wangalui haniha zinangea tobali foʼomora? (1 Tes. 4:11; 1 Tim. 5:13) Datatutunö ösa mbua gera-era ndra talifusöda si lö sangowalu, si lö faröi ba wamosumange Yehowa.

11-12. Na lö mangelama ita, hewisa wa tola taʼasogö waʼide-ide dödö khö ndra talifusöda si lö sangowalu?

¹¹ Itutunö samösa dalifusöda ira matua si no mofozu ba wamalua halöwö tobali satua samasui, wa oya mbua nitemania börö me lö sangowalu ia. Hewaʼae simanö, itutunö göi wa itaria ide-ide dödönia na so ndra talifusöda sangokhögö ohitö dödö si sökhi zanofu khönia, ”Hana wa lö sangowalu ndraʼugö?” Imane samösa dalifusöda ira matua sohalöwö ba Mbetieli, ”Itaria urasoi wa so ösa ndra talifusöda sahakhö tödö khögu börö me lö sangowalu ndraʼo. Ibörögö urasoi wa tenga saʼae buala na lö mangowalu, hizaʼi fangabu dödö.”

¹² Itutunö samösa dalifusöda ira alawe sohalöwö ba Mbetieli, ”So ösa ndra talifusöda sangumaʼö tödöra wa fefu niha si lö sangowalu, laforege ba wangalu-ngalui niha sinangea tobali foʼomora. So göi zangumaʼö wa ero na owulo niha sato, laʼogunaʼö ginötö simane daʼö ba wangalui niha si tefaudu ba dödöra. Samuza inötö, mufatenge ndraʼo ba mbanua böʼö ba wamalua halöwö soʼamakhaita ba Mbetieli. Urugi mbanua daʼö ba ngaluo wamalua angowuloa. Mörödo ba nomo zi samösa dalifusöda ira alawe. Iʼombakhaʼö khögu talifusöda andrö wa so darua dalifusöda ira matua si fagölö döfi khögu ba mbanua niha Keriso si farahu yaʼia. Sindruhu sa, ifaduhuʼö khögu wa tenga börö me iforege ba wangalui niha si tefaudu ba dödögu wa iwaʼö daʼö. Hizaʼi, me awena marugi Balai Mbanua Lowalangi, iʼohedo ba wamalukhaisi ndra talifusöda ira matua si darua, si no itutunö khögu. Aila sibai ndraʼo ba ginötö daʼö, ba simanö göi nirasoi ndra talifusöda andrö.”

13. Hadia duma-duma niʼila zi samösa dalifusöda ira alawe si möi famarou dödönia?

¹³ Imane samösa dalifusöda ira alawe tanö böʼö sohalöwö ba Mbetieli, ”So ösa niʼilagu ndra talifusöda si lö sangowalu, si no ara ba wangai halöwö tobali perintis. Na ufaigi, so khöra waʼatua-tua, lö mangoloi dödöra, aoha gölöra ba wanolo niha böʼö, ba owua-wua dödöra ba wamalua halöwö ba wamati. Oya sibai mbua si sökhi niʼasogöra ba mbanua niha Keriso. Laʼokhögö göi lala wangera-ngera si tefaudu sanandrösa ba wangowalu. Lö lawaʼö wa abölö tohude ira moroi ba niha böʼö ha börö me lö sangowalu ira. Ba lö göi ide-ide dödöra börö me lö hadöi foʼomora hegöi iraonora.” Tatu omuso sibai dödöda börö me faoma laʼosinangegö nawöra ira talifusöda ba mbanua niha Keriso. Lö hadöi zafökhö tödö khöda mazui sangoʼaya yaʼita. Lö talafo lasuno-suno ita ira talifusöda, ba lö göi laʼosilöʼögö ita. Faduhu dödöda wa laʼomasiʼö ita soroi ba dödö.

14. Hewisa wangoromaʼöda wa taʼosinangegö ndra talifusöda si lö sangowalu?

¹⁴ Tatu laʼandrö sibai saohagölö ira talifusöda si lö sangowalu na taʼosinangegö ira börö mbua-buara si sökhi, ba tenga börö me no mangowalu ira mazui löʼö. Moroi na tahakhösi tödö ira, abölö sökhi na taʼameʼegö  tödö waʼalöfaröira ba wamosumange Yehowa. Na tafalua daʼö, lö larasoi ira talifusöda andrö wa hulö no tawaʼö khöra, ”Lö moguna khögu ndraʼugö.” (1 Kor. 12:21) Tola aboto ba dödöra wa taʼosinangegö ira ba omuso dödöda wefao khöra ba mbanua niha Keriso.

15. Hadia manö wombulöʼö nifalua ndra talifusöda börö me omasi ira ladouʼö wamalua halöwö fanuriaigö?

¹⁵ Barö zi hauga fakhe andre, ato ndra talifusöda samorege ba wamahaʼö yaʼira ba li tanö böʼö enaʼö tola ladouʼö wamalua halöwö fanuriaigö. Ba wamalua daʼö, tatu oya zinangea labulöʼö ba waʼaurira. Laröi mbanua niha Keriso sangogunaʼö li niʼogunaʼöra, ba findra ira ba mbanua niha Keriso tanö böʼö sabölö oya muʼogunaʼö zanuriaigö. (Hal. 16:9) No angetulara samösa daʼö enaʼö tola ladouʼö wamalua halöwö khö Yehowa. Enaʼö tola onekhe ira fahuhuo ba li si bohou, te moguna lafahaʼö ira ba zi hauga fakhe. Hewaʼae simanö, oya nifaluara si tobali fanolo ba mbanua niha Keriso. Tola teʼaroʼö ndra talifusöda ba mbanua niha Keriso börö mbua-buara si sökhi hegöi si no irai alua khöra. Tatu taʼosinangegö sibai ndra talifusöda andrö börö me aoha gölöra ba wanehegö faʼaurira!

16. Hadia dane-dane wa tola tobali satua sokubaloi mazui enoni sohalöwö zi samösa dalifusöda ira matua?

¹⁶ Hewaʼae na lö onekhe nasa zi samösa dalifusöda ira matua ba li niʼogunaʼö ba mbanua niha Keriso si farahu yaʼia, tola mufataro ia tobali satua sokubaloi mazui enoni sohalöwö. Hadia mbörö? Börö me tenga faʼonekhenia ba li niʼogunaʼö ba daʼö zotatugöi hadia tola mufataro ia mazui löʼö. Latatugöi daʼö ira satua sokubaloi, moloʼö si no mufakhoi ba Zura Niʼamoniʼö.​—1 Tim. 3:1-10, 12, 13; Tit. 1:5-9.

17. Hadia gangetula sinangea lahalö ira satua na awena findra ira ba soi böʼö?

¹⁷ So ösa nösi nomo niha Keriso si findra ba soi böʼö ba wangalui halöwö mazui börö me alua gabula dödö ba soira. Ba zekola ndraonora si bohou, tola manö mufahaʼö ira ba li niʼogunaʼö ba soi daʼö. Moguna göi laforege ira satua ba wamahaʼö yaʼira ba li niʼogunaʼö ba daʼö enaʼö tola lasöndra halöwöra. Hizaʼi, hadia zinangea lafalua na so sambua mbanua niha Keriso mazui kelompok sangogunaʼö li niʼogunaʼö ba soira si oföna? Hezo mbanua niha Keriso sinangea farahu yaʼira? Hadia lafili wefao ba mbanua niha Keriso sangogunaʼö li niʼogunaʼö ba soira si bohou, mazui farahu ira ba mbanua niha Keriso sangogunaʼö li niʼogunaʼö ba soira si oföna?

18. Simane nitutunö ba Galatia 6:5, hewisa wangoromaʼöda wa taʼosinangegö gangetula nihalö zi samösa högö yomo ba nomo?

¹⁸ Moguna itatugöi högö yomo ba nomo hezo mbanua niha Keriso sinangea farahu nösi nomonia. Moguna iʼangeragö hadia gangetula sabölö sökhi ba nösi nomonia. (Baso Galatia 6:5.) Börö me högö yomo ba nomo zinangea motatugöi daʼö, moguna  taʼosinangegö gangetula nihalönia. Gofu hadia gangetula nihalönia, moguna tatuhini daʼö, ba tatemaʼö ia hegöi ösi nomonia si fao faʼomasi.​—Rom. 15:7.

19. Hadia zinangea iʼangeragö si samösa högö yomo ba nomo?

¹⁹ Me findra ira ba soi böʼö, so zatua sangai angetula wefao ba mbanua niha Keriso sangogunaʼö li niʼogunaʼö ba soira si oföna. Hizaʼi, te lö onekhe ndraonora ba li daʼö, börö me tenga li daʼö niʼogunaʼö ba zekolara. Lua-luania, ambö aboto ba dödö ndraonora hadia manö nitutunö ba gangowuloa, irege lö tedou ira ba wamati. Na daʼö zalua, moguna ilau mangandrö högö yomo ba nomo, ba ihaogö iʼangeragö hadia zinangea lafalua enaʼö tola itugu aro wahuwusa ndraonora khö Yehowa hegöi ba nono mbanuania. Tola lahalö gangetula ira satua ba wamahaʼö iraonora ba li niʼogunaʼö ba soira si oföna, mazui tola findra ira ba mbanua niha Keriso sangogunaʼö li salio aboto ba dödö ndraonora. Gofu hadia gangetula nihalö högö yomo ba nomo, moguna laforomaʼö ira talifusöda ba mbanua niha Keriso wa laʼomasiʼö ba laʼosinangegö ia hegöi ösi nomonia.

20. Hewisa wangoromaʼöda wa taʼosinangegö ndra talifusöda sawena mamahaʼö yaʼira ba li si bohou?

²⁰ Simane si no tatutunö, ato ndra talifusöda ba mbanua niha Keriso samorege ba wamahaʼö yaʼira ba li si bohou. Te lö nasa onekhe ira fahuhuo ba li daʼö. Hizaʼi, na lö taʼosambuaʼö dödöda ba waʼonekhera ba wangogunaʼö li si bohou, tola taʼila wa laʼomasiʼö sibai Yehowa ba lafosumange ia soroi ba dödö. Na tafalua daʼö, tola itugu taʼameʼegö tödö ba taʼosinangegö ira. Hewaʼae na lö onekhe ira fahuhuo ba li niʼogunaʼöda, lö tawaʼö khöra, ”Lö moguna khögu ndraʼugö.”

21-22. Hadia zi no ibeʼe khöda Yehowa?

²¹ Taʼandrö sibai saohagölö khö Yehowa börö me no ibeʼe khöda halöwö si tola tafalua ba mbanua niha Keriso. He na ira matua ita mazui ira alawe, awuyu-wuyu mazui no atua, no mangowalu mazui löʼö, onekhe fahuhuo ba li böʼö mazui löʼö, no sebua böli ita ba wamaigi Yehowa hegöi niha böʼö.​—Rom. 12:4, 5; Kol. 3:10, 11.

²² Oya wamahaʼö si no tatema moroi ba gamaedola Waulo sanandrösa ba ndroto-ndroto si so ba mboto niha. Dataforege ba wamalua fefu wamahaʼö andrö. Na tafalua daʼö, tola taʼila hewisa lala ba wangaʼaroʼö ndra talifusöda. Baero daʼö, itugu taʼomasiʼö ira ba taʼosinangegö halöwöra ba mbanua niha Keriso.