1. Hadia niwaʼö Dawido sanandrösa ba wangide-ngideʼö niʼokhögö Yehowa?

HADIA so khö Yehowa wangide-ngideʼö? So. Imane Dawido, ”Öbeʼe khögu mbaluse fangorifi, ba molakhömi ndraʼo me so khöu wangide-ngideʼö.” (2 Zam. 22:36, Terjemahan Dunia Baru [NW]; Zin. 18:36) Me isura daʼa Dawido, tola manö itörö tödönia me möi Zamueli ba nomo namania ba wombayoini yaʼia tobali razo ndraono Gizaraʼeli ba zi so miföna. Dawido nifili Yehowa tobali razo fogati Razo Saulo, hewaʼae na ono siakhi ia moroi ba zi dawalu zi fatalifusö.​—1 Zam. 16:1, 10-13.

2. Hadia nitutunöda ba artikel daʼa?

² Tatu fao dödö Dawido ba wehede zi samösa zanura sinunö sanutunö sanandrösa khö Yehowa, me imane, ”Ba sangide-ngideʼö yaʼia, ba wamaigi banua si yawa ba tanö tou. Samazawa si lö töi . . . enaʼö ifataro ba ngai zalawa.” (Zin. 113:6-8) Ba artikel daʼa, tatutunö dania hewisa lala Yehowa ba wangoromaʼö fangide-ngideʼö, ba hadia wamahaʼö si tola tahalö moroi ba duma-dumania. Aefa daʼö, tatutunö göi hadia wamahaʼö si tola tahalö sanandrösa ba wangide-ngideʼö moroi ba duma-duma Razo Saulo, samaʼeleʼö sotöi Danieli, hegöi Yesu.

3. Hewisa gamuata Yehowa khöda, ba hadia zi tola oroma moroi ba daʼö?

³ Oroma wa so wangide-ngideʼö khö Yehowa moroi ba gamuatania ba niha si lö moʼahonoa. Itema zumange nibeʼeda, ba ibaliʼö göi ita si fahuwu khönia. (Zin. 25:14) Tola fahuwu ita khö Yehowa börö me no ifatenge Nononia tobali höli enaʼö tola teʼefaʼö ita moroi ba horö. Sindruhu-ndruhu wa no safönu faʼahakhö dödö hegöi faʼomasi Yehowa!

4. Hadia nitehegö Yehowa khöda, ba hadia mbörö?

 ⁴ Nehegö lala tanö böʼö nifalua Yehowa ba wangoromaʼö fangide-ngideʼö. Börö me yaʼia Zomböi yaʼita, tola manö lö itehegö khöda ba wotatugöi lala waʼaurida samösa. Hizaʼi, lö ifalua daʼö. Ifazökhi ita si fakhili-khili khönia ba itehegö khöda ba wamili hadia zomasi ita tafalua. Omasi Yehowa na tafosumange ia soroi ba dödö, ba tafalua daʼö börö me taʼomasiʼö ia ba aboto ba dödöda hadia mbua nitemada na taʼoʼö niwaʼönia. (5 Moz. 10:12; Yes. 48:17, 18) Tatu taʼandrö sibai saohagölö börö me so wangide-ngideʼö khö Yehowa!

5. Hewisa wamahaʼö Yehowa yaʼita ba wangoromaʼö fangide-ngideʼö? (Faigi gambara ba guli majalah.)

⁵ Moroi ba gamuatania ba niwöwöinia, ifahaʼö ita Yehowa ba wangoromaʼö fangide-ngideʼö. Hewaʼae na Yehowa wondrege zatua-tua ba mbanua si yawa awö danö, omasi ia ifondrondrongo mbua gera-era nifaʼema khönia. Duma-dumania, itehegö fao khönia Nononia ba wamazökhi fefu hadia ia. (Gamd. 8:27-30; Kol. 1:15, 16) Baero daʼö, hewaʼae na yaʼia wondrege zebua kuaso, ibeʼe göi noro dödö ba niwöwöinia. Duma-dumania, ifataro Yesu tobali Razo ba Wamatörönia, ba ibeʼe göi kuaso ba niha si-144.000 si fao mamatörö awö Yesu. (Luk. 12:32) Tatu manö, no ifomaha Yesu Yehowa enaʼö tola mofozu ia ba wamalua halöwönia tobali Razo hegöi Ere Sebua. (Heb. 5:8, 9) Ifomaha göi zi-144.000 enaʼö tola lafalua halöwö nibeʼe khöra. Hewaʼae simanö, lö itatugöi sibai hewisa wamaluara halöwö andrö, hizaʼi ifaduhusi tödö wa hasambalö lafalua zomasi ia.​—Fam. 5:10.

6-7. Hadia wamahaʼö si tola tahalö moroi ba duma-duma Yehowa sanandrösa ba wameʼe halöwö ba niha böʼö?

⁶ Hewaʼae na lö moguna khönia wanolo, omasi Yehowa ba wameʼe noro dödö  ba niwöwöinia. Moguna göi tafalua zimane nifaluania andrö. Duma-dumania, hadia högö yomo ba nomo ndraʼugö, mazui satua sokubaloi ba mbanua niha Keriso? Moguna öʼoʼö duma-duma Yehowa ba wameʼe halöwö ba niha böʼö, ba böi tatugöi sibai hewisa wamaluara halöwö andrö. Na öʼoʼö duma-duma Yehowa, tola teʼasiwai zi sambua halöwö, ba tola göi öfomaha niha böʼö irege lö saʼae khöra faʼaombö dödö ba wamalua halöwö nibeʼe khöra. (Yes. 41:10) Hadia nasa wamahaʼö si tola tahalö moroi khö Yehowa?

⁷ Iforomaʼö Sura Niʼamoniʼö wa omasi iʼila mbua gera-era ndra malaʼikania Yehowa. (1 Raz. 22:19-22) Yaʼami ira satua, hewisa woloʼömi duma-duma Yehowa? Na so halöwö nibeʼemi khö ndraonomi, tola miʼandrö mbua gera-erara sanandrösa ba wangasiwai halöwö daʼö. Ba na tefaudu, tola mifalua mbua gera-era nifaʼemara.

8. Hewisa wangoromaʼö Yehowa faʼebolo dödö khö Gaberahamo hegöi Sara?

⁸ Oroma göi wa so wangide-ngideʼö khö Yehowa moroi ba waʼebolo dödö niforomaʼönia. Duma-dumania, me iwaʼö Aberahamo wa tola manö lö tefaudu gangetula Yehowa ba wanudugö banua Zodoma hegöi Gomora, ifondrondrongo ia Yehowa si fao faʼebolo dödö. (1 Moz. 18:22-33) Törö tödöu göi gamuata Yehowa khö woʼomo Gaberahamo sotöi Sara. Maʼiki Zara me irongo mbuʼusa li Yehowa wa hasambalö manabina ia hewaʼae na no alawa ndröfinia. Hewaʼae simanö, lö abao dödö Yehowa mazui mofönu ia. (1 Moz. 18:10-14) Hizaʼi, iforomaʼö Yehowa wa iʼosinangegö sibai Zara.

9. Hadia wamahaʼö si tola lahalö ira satua hegöi ira satua sokubaloi moroi ba duma-duma Yehowa?

⁹ Yaʼami ira satua hegöi ira satua sokubaloi, hadia wamahaʼö si tola mihalö moroi ba duma-duma Yehowa? Hadia nifaluami na so ndraonomi mazui ira talifusöda ba mbanua niha Keriso si lö fao tödö ba gangetula nihalömi? Hadia iʼanemaiʼö miwaʼö wa fasala nifaluara andrö? Mazui hadia miforege enaʼö aboto ba dödömi lala wangera-ngerara? Na laʼoʼö duma-duma Yehowa ira satua hegöi ira satua sokubaloi, oya mbua nitema nösi nomora hegöi banua niha Keriso. No tatutunö hadia manö wamahaʼö si tola tahalö moroi ba duma-duma wangide-ngideʼö niforomaʼö Yehowa. Iadaʼa, datatutunö hadia wamahaʼö si tola tahalö sanandrösa ba wangide-ngideʼö moroi ba duma-duma niha si no musura ba Daromali Lowalangi.

10. Hewisa wangogunaʼö Yehowa duma-duma niha böʼö ba wamahaʼö yaʼita?

¹⁰ Yehowa andrö no ”Samahaʼö Fondrege zi Sökhi”, ba no ibeʼe khöda duma-duma ba Daromalinia enaʼö tola tafahaʼö ita moroi ba daʼö. (Yes. 30:20, 21, NW) Moroi ba duma-duma niha nitutunö ba Zura Niʼamoniʼö, tola tafahaʼö ita ba wangokhögö amuata sangomusoiʼö tödö Lowalangi, tefarahu ba daʼö wangide-ngideʼö. Tola göi tafahaʼö ita moroi ba zalua ba niha si lö mangokhögö bua-bua andrö.​—Zin. 37:37; 1 Kor. 10:11.

11. Hadia wamahaʼö si tola tahalö moroi ba duma-duma si lö sökhi nifalua Zaulo?

¹¹ Angeragö zalua khö Razo Saulo. Ba wamobörö, so khönia wangide-ngideʼö. Aboto ba dödönia wa so zi tebai ifalua, ba aombö dödönia ba wanemaʼö halöwö si bohou. (1 Zam. 9:21; 10:20-22) Hizaʼi, lö ara me no tobali ia razo, ibörögö so khönia waʼasiliyawa, ba ifalua zi tenga halöwönia. Ba zi samuza inötö, lö khönia faʼebolo dödö ba wombaloi zamaʼeleʼö sotöi Samueli. Börö me lö ifaduhusi tödö wa hasambalö itolo nono mbanuania Yehowa, ibeʼe zumange nitunu Saulo hewaʼae na tenga sinangea ifalua daʼö. Lua-luania, lö saʼae ifahowuʼö ia Yehowa, ba  ifili niha tanö böʼö si tobali razo fangalinia. (1 Zam. 13:8-14) Moguna tafahaʼö ita moroi ba duma-duma andre enaʼö lö tafalua zi tenga halöwöda.

12. Hewisa wangoromaʼö Danieli fangide-ngideʼö?

¹² Iadaʼa, datatutunö duma-duma si sökhi nifalua zamaʼeleʼö sotöi Danieli, si no faehu sibai ba duma-duma si lö sökhi niforomaʼö Zaulo. Sagötö waʼaurinia, lö aetu iforomaʼö wangide-ngideʼö Danieli, ba lö mamalö iʼalui wanuturu lala moroi khö Yehowa. Duma-dumania, me iʼogunaʼö ia Yehowa ba wanutunö eluaha wangifi Nebukanesa, lö iwaʼö Danieli wa börö waʼabölönia samösa wa tola ifalua daʼö. Hizaʼi, si fao fangide-ngideʼö, ifatunö Danieli wa Yehowa zanolo yaʼia irege tola iʼila geluaha wangifi Nebukanesa. (Dan. 2:26-28) Hadia wamahaʼönia khöda? Na lasuno ita ira talifusöda börö me omasi ira ba huhuo nifaʼemada mazui börö me oya zi no takhamö ba wanuriaigö, moguna tafaduhuʼö khöra wa börö wanolo moroi khö Yehowa wa tola tafalua fefu daʼö. (Fil. 4:13) Na taforomaʼö mbua-bua fangide-ngideʼö simane daʼö, no göi taʼoʼö duma-duma Yesu. Hadia manö duma-duma nibeʼenia khöda?

13. Hadia wamahaʼö si tola tahalö sanandrösa ba wangide-ngideʼö moroi ba wehede Yesu nisura ba Yohane 5:19, 30?

¹³ Hewaʼae na moʼahonoa Yesu, lö aetu iʼodaligö Yehowa. (Baso Yohane 5:19, 30.) Lö irai tumbu ba dödönia ba wamadöni kuaso Namania si so ba zorugo. Ifatunö khöda Filifi 2:6 wa ”lö irai so ba wangera-ngerania ba wamadöni dadaoma Lowalangi mazui ifagölösi ia khö Lowalangi”. Aboto ba dödö Yesu wa so zi tebai ifalua ba iʼosinangegö kuaso niʼokhögö Namania.

14. Me laʼandrö khönia ba wamalua zi tenga halöwönia, hadia nifalua Yesu?

¹⁴ Samuza inötö, laʼondrasi Yesu ira Yakobo, Yohane, hegöi inara, ba laʼandrö khönia enaʼö ibeʼe khöra dadaoma si tohude ba Wamatörö Lowalangi. Omasi ira na tebeʼe khöra dadaoma ba gambölö hegöi ba gabera Yesu, ba daʼö göi zomasi ninara. Hadia nifalua Yesu? Iʼanemaiʼö iʼombakhaʼö khöra wa ha Amania si so ba zorugo zinangea motatugöi haniha zi dadao ba gambölö hegöi ba gaberania. (Mat. 20:20-23) Aboto ba dödö Yesu wa so zi tebai ifalua. Lö irai ifalua zi tenga halöwönia, ba ha si no ifaretakö Yehowa nifaluania. (Yoh. 12:49) Hewisa woloʼöda duma-duma si sökhi nibeʼe Yesu andre?

15-16. Hewisa wamaluada mene-mene nisura ba 1 Korindro 4:6?

 ¹⁵ Tola taʼoʼö duma-duma wangide-ngideʼö niforomaʼö Yesu na tafalua mene-mene nisura ba 1 Korindro 4:6. Imane ba ayati daʼö, ”Böi misawö zi no tesura.” Börö daʼö, na so niha sangandrö khöda mene-mene, böi taʼodaligö waʼatua-tuada samösa mazui ha asala noa manö wameʼeda mene-mene. Hizaʼi, moguna tabeʼe khöra mene-mene si so ba Zura Niʼamoniʼö hegöi ba publikasida. Na tafalua daʼö, no tafaduhuʼö wa lö ahori taʼila fefu hadia ia. Si fao fangide-ngideʼö, taforomaʼö wa abölö tohude mene-mene moroi khö Yehowa moroi ba mene-mene nibeʼeda.​—Fam. 15:3, 4.

¹⁶ Na taforomaʼö wangide-ngideʼö, tola tafolakhömi Yehowa. Hizaʼi, so nasa mbua tanö böʼö si tola tatema. Datatutunö hewisa wa tola möi fanoloda wangide-ngideʼö ba wangokhögö faʼowua-wua dödö hegöi fahuwusa si sökhi ba niha böʼö.

17. Hana wa tola owua-wua dödö niha sangokhögö fangide-ngideʼö?

¹⁷ Tola itugu owua-wua dödöda na taʼokhögö wangide-ngideʼö. Hana wa simane daʼö? Na taʼila wa so zi tebai tafalua, tatu taʼandrö saohagölö na latolo ita niha böʼö. Duma-dumania, angeragö hewisa zalua me ifadöhö Yesu zi dafulu niha si no göna bou auri. Ha samösa ba gotaluara zangawuli khö Yesu ba wangandrö saohagölö me no ifadöhö ia moroi ba wökhönia sabölö-bölö. Aboto ba dödö ndra matua andrö wa tebai döhö wökhönia na tenga börö wanolo moroi khö Yesu. Daʼö mbörö wa iʼandrö saohagölö ba wanolo si no itema, ba ifolakhömi Lowalangi.​—Luk. 17:11-19.

18. Na so khöda wangide-ngideʼö, hewisa wa tola möi fanoloda daʼö ba wangokhögö fahuwusa si sökhi ba niha böʼö? (Roma 12:10)

¹⁸ Na iʼokhögö wangide-ngideʼö si samösa  niha, tola aoha khönia fariawö ba niha böʼö ba tola iʼokhögö wahuwusa saro. Hadia mbörö? Börö me omasi ia ifaduhuʼö wa so gamuata si sökhi niʼokhögö niha böʼö, ba ifaduhusi tödö ira. Omuso göi dödönia na mofozu niha böʼö ba wamalua si sambua halöwö, ba lö itaha-taha ba wanuno hegöi ba wangosinangegö yaʼira.​—Baso Roma 12:10.

19. Hewisa gamuata niha si fayawa?

¹⁹ No faehu sibai niha si fayawa ba niha sangokhögö fangide-ngideʼö. Abua khöra ba wanuno niha böʼö, ba abölö omasi ira na yaʼira nisuno. Lafaehu-faehusi waʼaurira ba niha böʼö ba laforege enaʼö yaʼira zabölö tohude. Lö omasi ira ba wamomaha niha böʼö hegöi ba wameʼe khöra noro dödö. Na so halöwö sinangea mufalua, omasi ira na yaʼira samösa zamalua halöwö daʼö, börö me lawaʼö tödöra wa lö sökhi lua-luania na niha böʼö zohalöwögöigö daʼö. Omasi göi ira na yaʼira zabölö mufosumange, ba afökhö dödöra na abölö sökhi nifalua niha böʼö moroi ba nifaluara. (Gal. 5:26) Abua ba niha simane daʼö ba wangokhögö fahuwusa saro. Börö daʼö, na tarasoi wa so khöda wayawasa, moguna talau mangandrö khö Yehowa soroi ba dödö enaʼö tola ’tebulö lala wangera-ngerada’, irege lö mowaʼa ba dödöda gamuata si lö sökhi andrö.​—Rom. 12:2.

²⁰ Taʼandrö sibai saohagölö khö Yehowa börö me no iröi khöda duma-duma si sökhi sibai! Moroi ba gamuatania ba nono mbanuania, tola taʼila wa so khönia wangide-ngideʼö, ba terou göi dödöda ba woloʼö duma-dumania andrö. Baero daʼö, omasi ita taʼoʼö duma-duma si sökhi nifalua niha nitutunö ba Zura Niʼamoniʼö sangoromaʼö fangide-ngideʼö. Böi aetu tabeʼe khö Yehowa zumange hegöi lakhömi sinangea itema. (Fam. 4:11) Na tafalua fefu daʼö, tola tobali ita si fahuwu khö Yehowa irugi zi lö aetu, börö me iʼomasiʼö sibai niha sangokhögö fangide-ngideʼö.