1, 2. (a) Hadia manö mbörö wa manofu ita, ”Hawa’ara?” (b) Hana wa möi famarou dödöda iada’a duma-duma niha si lö faröi ba götö föna?

”HAWA’ARA?” Da’a wanofu ndra sama’ele’ö si lö faröi sotöi Yesaya hegöi Habakuki. (Yesaya 6:11; Habakuki 1:2) Me isura Zinunö 13 Razo Dawido, ibe’e wanofu simane da’ö öfa kali. (Zinunö 13:1, 2) Ba ginötö lafasui Yesu Keriso ira niha si lö famati, isofu khöra, ”Hawa’aragu na khömi ena’ö?” (Matai’o 17:17) Tola manö göi tabe’e wanofu simane da’ö iada’a.

² Hana wa tola tumbu ba dödöda ba wanofu, ”Hawa’ara?” Tola manö börö walö’atulö salua khöda, fökhö mazui börö me itugu alawa ndröfida. Tola göi fawuka wangera-ngerada börö me so ita ba ”mbaŵa si lö sökhi, ba götö safuria”. (II Timoteo 3:1) Mazui, alua da’ö börö gamuata si fasala nifalua niha si so ba zi fasuida irege marase ba afatö dödöda. Gofu hadia mbörönia, tefarou dödöda börö me ta’ila  wa lö mofönu Yehowa ba niha samosumange ya’ia si lö faröi same’e fanofu da’ö ba götö föna.

3. Hadia zanolo ya’ita ba ginötö tataögö wamakao?

³ Hadia zanolo ya’ita ena’ö anau gölöda ba ginötö tataögö wamakao? Ifarou dödöda Yakobo, talifusö tiri Yesu ira matua, ”Ba mibologö dödömi, wombase, ya’ami ira talifusö, irugi wa’aso Zo’aya.” (Yakobo 5:7) Andrö wa fefu ita moguna so khöda wa’ebolo dödö. Hiza’i, hadia geluaha wa’ebolo dödö, ba hewisa wangoroma’öda mbua-bua si sökhi andre?

4, 5. (a) Hadia wa’ebolo dödö andrö, ba hewisa ena’ö so khöda wa’ebolo dödö? (b) Hewisa wanutunö Yakobo sanandrösa ba wa’ebolo dödö? (Faigi gambara ba wamobörö wamaha’ö.)

⁴ Iwa’ö Sura Ni’amoni’ö wa moroi ba geheha ni’amoni’ö Lowalangi so wa’ebolo dödö. Na lö fanolo moroi khö Lowalangi, abua ba niha si lö mo’ahonoa ba wangokhögö fa’ebolo dödö ba ginötö si basaki. Fa’ebolo dödö no buala moroi khö Lowalangi, ba na tafalua da’ö no taforoma’ö wa’omasida khö Yehowa hegöi ba niha bö’ö. Na lö khöda fa’ebolo dödö, awuwu wa’omasi si so ba gotaluada hegöi ba niha bö’ö. (I Korindro 13:4; Galatia 5:22) Hadia manö zi tefarahu ba wa’ebolo dödö? Duma-dumania, fa’anau gölö ba wanaögö fanandraigö hegöi ba wangokhögö mbua-bua si sökhi. (Kolose 1:11; Yakobo 1:3, 4) Fa’ebolo dödö zanolo ya’ita ena’ö lö faröi khö Yehowa gofu hadia gabula dödöda. Da’a zanolo ya’ita ena’ö lö tasulöni zi lö sökhi ba ginötö tataögö wanandraigö. Imane Sura Ni’amoni’ö wa moguna so khöda wa’edöna ba wombaloi. Da’a wamaha’ö si tohude nihalöda moroi ba Yakobo 5:7, 8. (Baso.)

⁵ Hana wa moguna edöna ita ba wombaloi hadia nifalua Yehowa? Ifagölöisi zalua khöda Yakobo hulö simane samösa sonowi. Hewa’ae iforege wohalöwö ba wananö sinanö, tebai ifatörö deu, lökhö mazui fa’atedou zinanö. Moguna so khönia wa’ebolo dödö ba wombaloi ”mbua danö, sebua böli”. Simanö göi iada’a, oya zi tebai tafatörö gasa-gasa wombaloida wa’alua hadia zi no ifabu’u Yehowa. (Mareko 13:32, 33; Halöwö Zinenge 1:7) Simane sonowi, moguna so khöda wa’ebolo dödö ba wombaloi.

6. Hadia wamaha’ö khöda ba duma-duma zama’ele’ö sotöi Mikha?

⁶ Anau gölö zama’ele’ö sotöi Mikha ba wanaögö fanandraigö salua khönia, simane salua khöda iada’a. Auri ia ba götö mamatörö Razo Gahasi. Gahasi andre razo fondrege wa’alösökhi. Lua-luania, oya wa’alösökhi salua ba mbanua da’ö. Sindruhu-ndruhu lö sökhi zalua irege iwa’ö Sura Ni’amoni’ö wa niha si so ba da’ö ’onekhe ira ba wamalua si lö sökhi’. (Baso Mikha 7:1-3.) I’ila Mikha wa tebai ibulö’ö zalua andrö. Andrö, hadia nifaluania? Imane khöda, ”Ba ya’odo, ba utöngö-töngöni khö Yehowa, manötöna ndra’o khö Lowalangi andrö, sangorifi ya’odo. Ifondro-ndrongo sa ligu Lowalangigu.” (Mikha 7:7) Simane Mikha, moguna so khöda ’mbua-bua fombaloi’.

7. Hana wa tenga ha asala tabaloi manö wa’alua hadia zi no ifabu’u Yehowa?

 ⁷ Na ta’okhögö wamati simane Mikha, hasambalö edöna ita ba wombaloi Yehowa. Salua khöda tenga simane niha gurunga sombalo-baloi hawa’ara ginötö lahuku mate ia. Lafaso ia ba wombaloi, ba lö hadöi sa’ae dötönafönia. Sindruhu-ndruhu no aröu faehu ia ba zalua khöda! Edöna ita ba wombaloi Yehowa börö me ta’ila wa alua hadia zi no ifabu’u ba wame’e khöda fa’auri si lö aetu ba ginötö si tefaudu! Andrö wa ’so khöda wanaha tödö, awö wa’ebolo dödö ba fa’omuso dödö’. (Kolose 1:11, 12) Ba ginötö tabaloi, moguna ta’angenanöi ena’ö lö mokökö-kökö ita hana wa lö alio ifalua da’ö Yehowa. Na tafalua da’ö, lö omuso dödönia.​—Kolose 3:12.

8. Hadia wamaha’ö khöda moroi ba duma-duma nifalua ndra matua hegöi ira alawe si lö faröi sauri ba götö föna?

⁸ Hadia zanolo ya’ita ena’ö abölö edöna ita ba wombaloi? Tola ta’angeraigö sanandrösa khö ndra matua hegöi ira alawe si lö faröi sauri ba götö föna. La’okhögö wa’ebolo dödö ba wombaloi ginötö wa’alua hadia zi no ifabu’u Yehowa. (Roma 15:4) Na ta’angeraigö duma-dumara, sökhi na tatörö tödöda hawa’ara ginötö ni’oguna’öra ba wombaloi, hana wa edöna ira ba wombaloi, ba hewisa wamahowu’ö  Yehowa ira börö me so khöra wa’ebolo dödö.

9, 10. Hawa’ara ginötö ni’oguna’ö Gaberahamo hegöi Sara ba wombaloi Yehowa?

⁹ Angeraigö duma-duma Gaberahamo hegöi Sara. Börö me laforoma’ö ’wamati ba fa’ebolo dödö’, la’okhögö ’gamabu’ula li’ andrö. Imane khöda Sura Ni’amoni’ö wa ”me no imanö wamologö tödönia, wombaloi”, ifabu’u Yehowa wa ifahowu’ö Gaberahamo ba ibali’ö ia ama ba mbanua sebua. (Heberai’o 6:12, 15) Hana wa moguna iforoma’ö wa’ebolo dödö Aberahamo? Börö me tola manö ara ginötö irege alua zi no tefabu’u andrö. Me 14 Nisana 1943 SM, Aberahamo, Sara hegöi fefu zoroi yomora, la’ötö Nidanö Oiferati ba ofeta ira ba Danö Gamabu’ula. Hiza’i, moguna ibaloi 25 fakhe Aberahamo fatua lö tumbu nononia Iza’aki ba 60 fakhe fatua lö tumbu ma’uwunia Gezau ba Yakobo.​—Heberai’o 11:9.

¹⁰ Hawa’ebolo Danö Gamabu’ula ni’okhögö Gaberahamo? Imane Sura Ni’amoni’ö wa Yehowa ”lö ibe’e khönia ba da’e tanö ondröita, mitou dania, sambalahe lö’ö. Ba ifabu’u linia, ibe’e khönia dania, ba khö ma’uwunia mitou; hewa’ae lö ono na khönia”. (Halöwö Zinenge 7:5) Lö ikhamö 430 fakhe me no aefa i’ötö Nidanö Oiferati Aberahamo, tobali sambua soi nga’ötönia ba toröi ira ba danö da’ö.​—II Moze 12:40-42; Galatia 3:17.

11. Hana wa edöna Gaberahamo ba wombaloi ba hadia howu-howu si tobali mbua börö wa’ebolo dödönia?

¹¹ Edöna Gaberahamo ba wombaloi börö me faduhu dödönia wa hasambalö ifalua Yehowa hadia zi no ifabu’u. Mamati ia khö Yehowa. (Baso Heberai’o 11:8-12.) Omuso dödö Gaberahamo ba wombaloi hewa’ae lö i’ila hewisa wa’alua fefu hadia zi no ifabu’u Lowalangi fatua lö mate ia. Hiza’i, khalaigö hewisa wa’owua-wua dödö Gaberahamo ba ginötö tesusugi ia ba gulidanö faradaiso. Ahöli-höli dödönia na ibaso waö-waö wa’aurinia hegöi ösi nomonia si so ba zi hauga faosatö Zura Ni’amoni’ö. * (Faigi nisura ba gahe zura.) Khalaigö hewisa wa’omuso dödönia me i’ila wa moroi ba nga’ötönia alua gohitö dödö Yehowa sanandrösa khö Mesia si no tefabu’u! Faduhu dödöda wa lö maniasa Gaberahamo hewa’ae ara ginötö wombaloinia howu-howu andrö.

12, 13. Hana wa moguna ebolo dödö Yosefo, ba hadia mbua-bua si sökhi ni’okhögönia?

¹² Ma’uwu Gaberahamo sotöi Yosefo, edöna göi ia ba wangokhögö fa’ebolo dödö. Oya wanandraigö si lö atulö nitaögönia. Si oföna, lafamawa ia ira talifusönia tobali sawuyu me 17 fakhe ndröfinia. Aefa da’ö, laböbögö khönia zi lö duhu wa omasi ia ihoröni wo’omo zokhö ya’ia irege labe’e ia ba gurunga. (I Moze 39:11-20; Zinunö 105:17, 18) Hewa’ae samosumange Lowalangi si lö faröi Yosefo, ba wamaigida hulö hukuma nitemania tenga howu-howu. Me no aefa 13 fakhe, tebulö fefu zalua. Aheta Yosefo moroi ba gurunga ba tobali ia samatörö numero dua ba Miserai.​—I Moze 41:14, 37-43; Halöwö Zinenge 7:9, 10.

 ¹³ Hadia afökhö dödö Yosefo ba walö’atulö si göna ya’ia? Hadia so ba dödönia wa no iröi ia Yehowa? Lö’ö. Ibaloi Yosefo si fao fa’ebolo dödö. Hadia zanolo ya’ia? Famatinia khö Yehowa. Aboto ba dödö Yosefo wa tola ifatörö fefu hadia ia Yehowa. Ta’ila da’ö moroi ba wehedenia khö ndra talifusönia, ”Böi mibusi dödömi! Hadia sa, no salahi Lowalangi ndra’odo? Si lö sökhi sa nifakhaimi khögu, ba no i’ohe ba zi sökhi Lowalangi, ba wamalua ni’ilada ma’ökhö fangorifi niha si no ato.” (I Moze 50:19, 20) I’ila Yosefo wa tenga zaya-zaya gölö zi no idöna-döna börö howu-howu moroi khö Yehowa.

14, 15. (a) Hana wa adöni dödöda ba wa’ebolo dödö Dawido? (b) Hadia zanolo Dawido ena’ö so khönia wombaloi si fao fa’ebolo dödö?

¹⁴ Oya göi walö’atulö nitaögö Razo Dawido. No ibayoini Dawido Yehowa tobali razo ndraono Gizara’eli me awuyu-wuyu ia. Hiza’i, moguna ibaloi 15 fakhe fatua lö tobali ia razo ba mbanuania samösa. (II Zamueli 2:3, 4) Ba götö da’ö, moloi Dawido ba ibini’ö ia moroi khö Razo Saulo, somasi mamunu ya’ia. * (Faigi nisura ba gahe zura.) Lua-luania, lö hadöi omonia. Toröi ia ba soi niha baero mazui ba dögi narö hili ba danö si mate. Ba gafuriata, mate Zaulo ba wasuwöta. Hiza’i, moguna nasa ibaloi Dawido töra fitu fakhe fatua lö tobali ia razo ndraono Gizara’eli.​—II Zamueli 5:4, 5.

¹⁵ Hana wa edöna Dawido ba wombaloi si fao fa’ebolo dödö? Ibe’e khöda wanema linia ba zinunö si fagölö me öfa kali manofu ia, ”Hawa’ara?” Imane, ”Ba ya’o, ba udöna-döna wa’ebua dödöu; ma’iki dödögu, ba wanolomö andrö. Usuno Yehowa, me no ebua dödönia khögu.” (Zinunö 13:6) I’ila Dawido wa i’omasi’ö ba lö irai faröi khönia Yehowa. I’angeraigö hewisa wanolo Yehowa ya’ia ba götö silalö, ba idöna-döna wa i’asiwaisi wanandraigö nitaögönia andrö Yehowa. I’ila Dawido wa tenga zaya-zaya gölö zi no idöna-döna börö howu-howu moroi khö Yehowa.

16, 17. Hewisa wame’e Lowalangi Yehowa hegöi Yesu duma-duma si sökhi ba wa’edöna wombaloi?

¹⁶ Lö i’andrö khöda Yehowa ba wamalua hadia zi lö omasi ia ifalua. Ibe’e khöda duma-duma sebua ba wa’edöna wombaloi. (Baso II Fetero 3:9.) Duma-dumania, ngahönö fakhe silalö ba kabu Edena, iböbögö zi lö duhu Satana wa lö atulö Yehowa. ’Ibaloi si fao fa’ebolo dödö’ Yehowa ginötö ba wangamoni’ö töinia. Buania, niha ’sanötöna khönia’ latema howu-howu sahöli-höli dödö.​—Yesaya 30:18.

 ¹⁷ Edöna göi Yesu ba wombaloi. Me so ia ba gulidanö, lö faröi ia irugi wa’amatenia. Me döfi 33 M, ibe’e zumangenia sebua böli khö Yehowa ba zorugo. Hiza’i, moguna ibaloi irugi ndröfi 1914 ba wamörögö famatörönia tobali Razo. (Halöwö Zinenge 2:33-35; Heberai’o 10:12, 13) Aefa da’ö, moguna nasa ibaloi Yesu irege ahori zi Saribu Fakhe Wamatörönia awena dania tehori fefu nudunia. (I Korindro 15:25) Ara sibai ginötö da’a ba wombaloi. Hiza’i, tenga zaya-zaya gölö fefu da’ö börö howu-howu ni’asogönia.

18, 19. Hadia zanolo ya’ita ena’ö so khöda wa’edöna ba wombaloi si fao fa’ebolo dödö?

¹⁸ Ta’ila wa omasi Yehowa na so khöda wa’ebolo dödö, fa’edöna ba wombaloi. Hadia zanolo ya’ita ba wamalua da’ö? Moguna ta’andrö geheha ni’amoni’ö moroi khö Lowalangi. Törö tödömö wa moroi ba geheha ni’amoni’ö so wa’ebolo dödö. (Efeso 3:16; 6:18; I Tesalonika 5:17-19) Börö da’ö, andrö wanolo moroi khö Yehowa ena’ö tola anau gölömö ba wa’ebolo dödö!

¹⁹ Törö göi tödömö hadia zanolo Gaberahamo, Yosefo, hegöi Dawido ba wombaloi si fao fa’ebolo dödö irege alua fefu zi no ifabu’u Yehowa. Alua da’ö börö wamati hegöi fa’afaduhu dödöra khö Yehowa. Tenga ha ya’ira samösa hegöi hadia zomasi dödöra ni’angeraigöra. Na ta’angeraigö hewisa mbua si sökhi nitemara, tefarou göi ita ba wangoroma’ö mbua-bua fombaloi.

20. Hadia zi lö mamalö tafalua?

²⁰ Andrö, hewa’ae tataögö wanandraigö, lö mamalö taforoma’ö ’mbua-bua fombaloi’. Te itaria manofu ita, ’Hawa’ara na Yehowa?’ (Yesaya 6:11) Hiza’i, börö wanolo geheha ni’amoni’ö moroi khö Lowalangi, tola ta’o’ö zama’ele’ö sotöi Yeremia ba tamane, ”Tana khögu Yehowa, . . .  andrö wa khönia udöna-döna.”​—Ngenu-ngenu Yeremia 3:21, 24.