1, 2. Hadia niwa’ö niha sanandrösa khö ndra Samaduhu’ö Yehowa?

ATO niha sanguma’ö wa tohude ndra Samaduhu’ö Yehowa moroi ba niha bö’ö. Duma-dumania, samösa sanura sotöi Anton Gill, isuno mbua-bua ndra Samaduhu’ö Yehowa me götö Nazi ba Jerman. Imane, ”Fatuwu niha Nazi khö ndra Samaduhu’ö Yehowa. . . . Me 1939 so 6.000 ba gotaluara nibe’e ba [kamp konsentrasi].” Imane nasa hewa’ae göna ira fanandraigö sabölö-bölö, la’ila ira niha wa ya’ira niha si tola mufaduhusi tödö, lö lafalalawa hewa’ae lafakao ira, lö faröi ira khö Lowalangira ba so khöra wahasara dödö.

² Barö-barö da’a, niha si so ba Afrika Selatan la’ila göi wa so zi tohude sanandrösa khö ndra Samaduhu’ö Yehowa. Sambua inötö, lö latehegö falukha ndra Samaduhu’ö si fabö’ö uli ba mbanua da’ö. Hiza’i, me hari Migu, 18 mbaŵa si Felendrua 2011, töra 78.000 ndra Samaduhu’ö moroi ba soi si fabö’ö ba Afrika Selatan hegöi soi sahatö  ba da’ö, owulo ira ba zi sambua gangowuloa si tohude ba stadion sabölö ebua ba Johannesburg. Imane samösa manajer stadion, ”Lö irai u’ila niha si sökhi amuata simane ya’ira ba stadion da’a. Sökhi fefu lala wonukhara, ba sökhi sibai wangehaogöra stadion andrö. Ba sabölö tohude, hewa’ae fabö’ö-bö’ö soira, hiza’i te’osambua’ö ira.”

3. Hadia zame’e tohude wa’afatalifusötada?

³ Niha si tenga Samaduhu’ö Yehowa, la’ila hewisa wa’atohude wa’afatalifusötada ba zi sagörö ulidanö. (I Fetero 5:9) Hana wa tola fabö’ö ita moroi ba organisasi tanö bö’ö? Börö wanolo moroi ba Zura Ni’amoni’ö hegöi eheha ni’amoni’ö moroi khö Lowalangi, tola taforege ba wombulö’ö lala wa’aurida si lö mangomusoi’ö tödö Yehowa. ’Taheta niha si tohöna andrö’ ba ta’oguna’ö ’nukha si bohou’.​—Kolose 3:9, 10.

4. Hadia nitutunöda ba wamaha’ö da’a? Hadia mbörö?

⁴ Na no taheta gamuata si tohöna, moguna taforege ba wondröi ya’ia. Ba wamaha’ö da’a, si oföna tatutunö ya’ia da’ö hewisa wangeheta gamuata si tohöna ba hana wa moguna sibai da’ö. Ba da’a dania ta’ila wa tola tebulö lala wa’auri si samösa niha hewa’ae no irai ifalua zi lö sökhi. Aefa da’ö, tatutunö göi hadia manö nifalua niha si no ara ba zindruhu ba wondröi gamuata si tohöna. Hana wa moguna tatutunö da’a? So ösa niha samosumange Yehowa si lö mangelama. Lafuli la’angeraigö ba lafalua hadia zi no irai lafalua ba zilalö simane fatua lö la’okhögö wa’aboto ba dödö khö Yehowa. Fefu ita moguna tatörö tödöda wamangelama da’a, ”Na so zanguma’ö tödönia sizizio ia, ba yamufaigi, faböi alau ia.”​—I Korindro 10:12.

5. (a) Be’e duma-duma hana wa böi tataha-taha ba wangeheta gamuata si tohöna. (Faigi gambara ba wamobörö wamaha’ö.) (b) Hadia manö gamuata si tohöna nitutunö ba Kolose 3:5-9?

⁵ Hadia nifaluamö na ö’ila wa no ta’unö ba aböu nukhamö? Tatu ö’aliokö wangeheta ya’ia ba nösimö. Simanö göi, na ta’ila wa no tafalua zi fatuwu khö Yehowa, böi tataha-taha ba wombulö’ö fa’aurida. Imane Faulo sanandrösa ba gamuata si fasala, ”Miböhöli göi da’ö fefu.” Datatutunö dombua ba gotaluania, fohorö hegöi fa’ara’iö.​—Baso Kolose 3:5-9.

6, 7. (a) Moroi ba wehede Waulo, hezo tola ta’ila wa moguna muforege ba wangeheta gamuata si tohöna? (b) Hewisa lala wa’auri Sakura? Hadia zanga’aro’ö ya’ia ba wombulö’ö fa’aurinia?

⁶ Amuata Fohorö. Ba Zura Ni’amoni’ö, amuata ”fohorö” eluahania fa’orudu ba gotalua niha si tenga fo’omonia molo’ö huku. Imane Faulo wa niha Keriso moguna ’labunu ndroto-ndrotora’ na so ba wangera-ngerara wohorö. Eluahania, moguna taforege ba wangeheta fefu gisö-isö dödöda si fasala. Hewa’ae abua wamalua da’a, hiza’i tola tafalua ia!

 ⁷ Tola ta’ila da’a moroi ba duma-duma dalifusöda ira alawe sotöi Sakura moroi ba Jepang. * (Faigi nisura ba gahe zura.) Me itugu ebua-bua Sakura, irasoi wa lö awö-awö ba abu dödönia. Ena’ö lö irasoi wa lö awö-awö, ibörötaigö ilau mohorö me 15 fakhe ndröfinia. Ifalua wohorö ba niha si fabö’ö-bö’ö ba no tölu kali idudugö nononia. Imane, ”Ba wamobörö, urasoi wa’ahono dödö me ulau gamuata fohorö, urasoi wa moguna ba la’omasi’ö ndra’o. Hiza’i, me no asese ufalua da’ö itugu lö sökhi-sökhi dödögu.” Ifalua gamuata da’ö irugi 23 fakhe ndröfinia. Aefa da’ö, ibörötaigö ifaha’ö ia ba Zura Ni’amoni’ö khö ndra Samaduhu’ö Yehowa ba omasi ia hadia zi no ifaha’ö ia. Itolo ia Yehowa ba wamöhöli gamuata fohorö hegöi ba wanaögö fatahi-tahisa dödö ba fa’aila. Iada’a, no tobali perintis biasa Sakura ba lö irasoi sa’ae wa lö awö-awö. Imane, ”Omuso sibai dödögu börö me urasoi wa’omasi Yehowa ero ma’ökhö.”

8. Hadia manö gamuata si tola manga’asogö khöda fa’ara’iö ba wamaigi Lowalangi?

⁸ Fa’ara’i-ra’iö. Ba Zura Ni’amoni’ö, tenga ha ba gamuata fohorö mo’amakhaita ngawua wehede ’fa’ara’i-ra’iö’. Mo’amakhaita göi ia ba woroko mazui ba wanguma’ö fehede hokha. (II Korindro 7:1; Efeso 5:3, 4) Mo’amakhaita göi ia ba ngawalö zi lö sökhi nifalua niha ba zi ha ya’ia, simane ba wamaigi pornografi mazui ba wombaso mbuku si tola mondrönisi ya’ira ba wamalua fohorö. Fefu da’a tola molua-lua ia ba wamalua gamuata si ra’iö simane masturbasi. (Kolose 3:5) *—Faigi nisura ba gahe zura.

9. Hadia zalua na ibörötaigö adöni dödö zi samösa niha ba ”hokha”?

⁹ Niha sasese mamaigi pornografi itugu adöni dödönia ba ”hokha” ba sandru ia wamalua fohorö. Molo’ö ndra peneliti, fa’asandru ba pornografi fagölö ia ba wa’asandru ba alkohol mazui ba narkoba. Da’ö mbörö wa lö tokea ita na niha sasese mamaigi pornografi larasoi lua-lua si lö sökhi, simane fa’aila, falö mofozu halöwö, lö fa’ohahau dödö yomo ba nomo, fabali auri, ba so zamunu ya’ia samösa. Imane samösa ira matua wa tola ifuli i’ame’egö tödö wa’aurinia me no aefa iböhöli wa’asandrunia ba wamaigi pornografi ba zi döfi.

10. Hewisa wondröi Ribeiro fa’asandrunia ba pornografi?

¹⁰ Ato niha, abua khöra ba wondröi pornografi. Hiza’i, tola lafalua da’ö. Angeraigö duma-duma Ribeiro moroi ba Brasil. Me awuyu-wuyu ia, iröi nomo ba ilau mohalöwö ba pabrik samuli mamazökhi karate moroi ba garate si no tekiko. Ba da’ö i’ila majalah pornografi. Imane Ribeiro, ”Itugu ara, itugu adöni dödögu. Omasido na alio mofanö ndra alawe si sambua omo khögu ena’ö tola ufaigi video pornografi.” Ba zi sambua inötö ba nahania wohalöwö, i’ila Ribeiro mbuku si no la’owuloi nifuli mu’ehaogö, ba i’ila sambua mbuku tuhonia Rahasia Kebahagiaan Keluarga.  Ihalö ba ibaso da’ö. Börö zi no ibaso, andrö wa ifaha’ö ia ba Zura Ni’amoni’ö khö ndra Samaduhu’ö Yehowa. Hiza’i, ara ginötö ni’oguna’ö Ribeiro ba wamöhöli fa’asandrunia ba pornografi. Hadia zanolo ya’ia? Itutunö, ”Börö wangandrö, famaha’ö ba Zura Ni’amoni’ö, hegöi fo’angerönusi hadia zi no ufaha’ö ndra’o, itugu u’ame’egö tödö mbua-bua Lowalangi irege itugu aro wa’omasigu khö Yehowa moroi ba gisö-isö dödögu ba pornografi.” Börö wanolo moroi ba Zura Ni’amoni’ö hegöi eheha ni’amoni’ö moroi khö Lowalangi, tola ibulö’ö lala wa’aurinia Ribeiro, tebayagö ia idanö ba iada’a tobali ia satua sokubaloi ba mbanua niha Keriso.

11. Hadia zanolo si samösa niha ena’ö aheta ia ba pornografi?

¹¹ Ena’ö tola iböhöli wamaigi pornografi Ribeiro, tenga ha asala ifaha’ö manö ia ba Zura Ni’amoni’ö. Ihaogö i’angerönusi hadia zi no ibaso ba itehegö tofakha da’ö ba dödönia. Ilau mangandrö ba i’andrö wanolo moroi khö Yehowa. Da’a fefu zanolo Ribeiro irege itugu aro wa’omasinia khö Lowalangi ba tola itimbagö gisö-isö dödönia ba pornografi. Ena’ö aheta ita ba pornografi, moguna sindruhu-ndruhu ta’omasi’ö Yehowa ba ta’ogorofi hadia ia zi lö sökhi.​—Baso Zinunö 97:10.

12. Hadia zanolo Stephen ba wondröi fönu hegöi fehede si lö sökhi?

¹² So niha salio mofönu ba iwa’ö wehede sangafökhöi’ö tödö hegöi sangailasi niha bö’ö. Lua-luania, tefakao fefu nösi nomora. Samösa ama sotöi Stephen moroi ba Australia, asese ilau fahölu ba alio mofönu ia ba ngawalö zalua side-ide. Imane, ”Ya’odo hegöi fo’omogu, no tölu kali fasambua ndra’aga ba mahalö gangetula malau fabali auri.” Hiza’i, ibörötaigö lafaha’ö ira ba Zura Ni’amoni’ö khö ndra Samaduhu’ö, ba itandraigö ifalua Stephen hadia zi no ifaha’ö ia. Iwa’ö wa fatua lö aboto ba dödönia Yehowa, alio sibai mofönu ia na so zi tetutu ba dödönia hulö simane bom samoka. Hiza’i, me no i’o’ö mene-mene moroi ba Zura Ni’amoni’ö itugu sökhi lagunia. Imane, ”Itugu sökhi wongambatöma. Börö wanolo moroi khö Yehowa, urasoi wa’atulö hegöi fa’ahono dödö.” Iada’a, no tobali enoni sohalöwö Stephen ba no merintis biasa wo’omonia ba zi hauga fakhe. Lamane ira satua sokubaloi ba mbanua niha Keriso si fao Stephen, ”Ya’ia andre niha si lö hede-hede, owölö-ölö ba so khönia wangide-ngide’ö.” Lamane nasa wa lö irai la’ila mofönu ia. Lö irai so ba wangera-ngera Stephen wa börö wa’abölönia samösa wa tola ibulö’ö wa’aurinia. Imane, ”Lö irai urasoi howu-howu ba wa’aurigu na lö utema’ö wanolo moroi khö Yehowa ba wame’e khögu lala wa’auri si bohou.”

13. Hana wa möi fama’ala wönu? Hadia wamangelama nibe’e Zura Ni’amoni’ö khöda sanandrösa ba da’ö?

 ¹³ Ifangelama ita Sura Ni’amoni’ö ena’ö lö alio mofönu, fagua-gua, ba böi tawa’ö wehede si lö sökhi. (Efeso 4:31) Fefu da’a molua-lua ia ba wa’udusa. Iada’a, ato niha gulidanö sanguma’ö wa fönu no amuata si lö sökhi si no to’ölö. Hiza’i, amuata da’a lö möi famosumange Zomböi ya’ita. Ato ndra talifusöda zombulö’ö lala wa’aurira ba la’oguna’ö gamuata si bohou.​—Baso Zinunö 37:8-11.

14. Hadia tola tobali niha sebolo tödö niha si lö sökhi?

¹⁴ Talifusöda Hans no tobali satua sokubaloi ba mbanua niha Keriso ba Austria. Imane koordinator badan penatua (sondronia’ö boto zatua sokubaloi) ba mbanua niha Keriso si fao ya’ia, ”Ya’ia samösa dalifusöda si so fa’ebolo dödö.” Hiza’i, tenga i’otarai me föna so khönia wa’ebolo dödö. Me awuyu-wuyu ia, ibörögö ibadu alkohol, ba tobali ia niha safaito. Samuza inötö me mabu ia, mofönu ia irege ibunu kawania. Labe’e ia ba gurunga 20 fakhe fa’ara, hiza’i lö ibulö’ö nasa lala wa’aurinia. Me i’andrö mamania khö zatua sokubaloi ena’ö lafalukhaisi Hans, ibörötaigö ifaha’ö ia Hans ba Zura Ni’amoni’ö. Imane, ”Moguna uforege ba wondröi lala wa’aurigu si tohöna. Ayati samarou tödögu ya’ia da’ö Yesaya 55:7 sanguma’ö, ’Sebua horö, ba yamuröi lalania andrö’ hegöi I Korindro 6:11 sanutunö sanandrösa ba niha si no mondröi ngawalö horö, imane ’Ba no simanö ösa ami föna.’ Ba zi hauga fakhe, itolodo Yehowa si fao  fa’ebolo dödö ba i’oguna’ö gehehania ni’amoni’ö ba wame’e khögu gamuata si bohou.” Tebayagö idanö Hans me so ia ba gurunga, ba me no aefa 17 fakhe amatonga lakuru ia, laheta ia ba gurunga. Imane, ”U’andrö sibai saohagölö khö Yehowa börö wa’ebolo dödönia hegöi fangefa’önia salagu.”

15. Hadia duma-duma tanö bö’ö moroi ba gamuata si tohöna? Hadia niwa’ö Zura Ni’amoni’ö sanandrösa ba da’ö?

¹⁵ Duma-duma tanö bö’ö moroi ba gamuata si tohöna ya’ia da’ö falimosa. Duma-dumania, ato niha si falimo ena’ö lö labu’a pajak mazui ena’ö lö la’onorogö tödö zala nifaluara. Hiza’i, Yehowa no Lowalangi sindruhu. (Zinunö 31:6) Andrö wa omasi ia na fefu zamosumange ya’ia ’lawa’ö zindruhu’ ba ’lö falimo’. (Efeso 4:25; Kolose 3:9) Ba da’a oroma wa moguna tawa’ö zindruhu hewa’ae na abua khöda mazui möi fangailasida da’ö.​—Gamaedola 6:16-19.

16. Hadia zanolo ya’ita ena’ö tola taheta gamuata si tohöna?

¹⁶ Tebai taheta gamuata si tohöna na ta’odaligö wa’abölöda samösa. Sakura, Ribeiro, Stephen, hegöi Hans, no laforege ba wombulö’ö lala wa’aurira si tohöna. Fa’abölö moroi ba Daromali Lowalangi hegöi ehehania ni’amoni’ö zanolo ya’ira. (Luka 11:13; Heberai’o 4:12) Ena’ö tatema mbua ba wa’abölö da’ö, moguna tabaso Zura Ni’amoni’ö ero ma’ökhö, ta’angerönusi, ba ta’asese’ö ta’andrö wa’atua-tua hegöi fa’abölö ba wamalua hadia zi no tafaha’ö ita. (Yosua 1:8; Zinunö 119:97; I Tesalonika 5:17) Tola göi tatema mbua moroi ba Daromali Lowalangi hegöi ehehania ni’amoni’ö na tafa’anö ita ba ta’ondrasi gangowuloa mbanua niha Keriso. (Heberai’o 10:24, 25) Ba omasi ita ta’oguna’ö ngawalö fakake si no ihenaigö organisasi Yehowa khöda, simane majalah, JW Broadcasting, JW Library, hegöi jw.org.​—Luka 12:42.

17. Hadia nitutunöda ba wamaha’ö aefa da’a?

¹⁷ No tatutunö gamuata si lö sökhi sinangea laheta ba laröi ira niha Keriso ena’ö tola la’omusoi’ö dödö Yehowa. Hiza’i, moguna nasa so nifaluada. Moguna ta’oguna’ö gamuata si bohou sagötö fa’aurida. Ba wamaha’ö aefa da’a, tatutunö hewisa wamalua ya’ia.